თითოულ ქრისტიან წყვილქ თე საკითხიშ გურშენ ჯგირო ოკო გეგმირკვიას არძა ფაქტი დო ბიბლიურ პრინციპეფი. თეშ უკულ თიშნერ გადაწყვეტილება ოკო მიღან, ნამდა სინდისიქ ვეშიაწუხან.

ადამ დო ევას დო უმოს გვიანო ნოე დო მუშ ოჯახის იეჰოვაქ მეჩ მითითება: „ინაყოფიერით დო გემრავლით“ (დაბ. 1:28; 9:1). მარა ბიბლია ვეჩიებ, ნამდა ქრისტიანეფ ვალდებულ რენა მიაჸუნან თე მითითებას. ათეშენ, თითოულ წყვილქ მუშით ოკო გინოჭყვიდას, ორსულობაშ საწინააღმდეგო ნამ საშვალება გიმირინუას, მუსხი ბაღანაქ აჸვენუას დო მუჟამ. მუ საკითხეფშე ოკო დეფიქრან თინეფქ?

გადაწყვეტილებაშ მეღებაშახ, ქრისტიანეფქ ოკო დეფიქრან ორსულობაშ საწინააღმდეგო არძა საშვალებაშე, ხომ ვაწინააღმდეგ თინეფ ბიბლიურ პრინციპეფს. ქრისტიანეფ კატეგორიულ ვარიას იჩიებნა აბორტშე, მუჭოთ ორსულობაშ საწინააღმდეგო საშვალებაშე, მუშენდა თინა პირდაპირ ოწინააღმდეგ თის, მუდგას ბიბლია იჩიებ სიცოცხლეშ დაფასებაშ გურშენ. დაგეგმილ აბორტი ნიშნენს ნაყოფიშ მოსპუალას, ნამუთ შხვა შემთხვევას მირდუდ დო ქიდებადებუდ (გამ. 20:13; 21:22, 23; ფსალმ. 139:16; იერ. 1:5). მუშ რაგად შილებე საშვილოსნოშ დინახლენ კონტრაცეფციაშე (სპირალი)?

თე საკითხი გარჩიებულ რდუ 1979 წანაშ 15 მესიშ „გინაჯინალ კოშკის“ (გვ. 30, 31). * თექ ჩიება მიშ, ნამდა ორსულობაშ საწინააღმდეგო საშვალებას, სპირალს ინმოდგუნა საშვილოსნოს. თე სტატიას მოშინაფილ რდუ, ნამდა სპეციალისტეფს ბოლოშა ვარჩქილენა, მუჭო მოქმედენს თე საშვალება. თექ ჭარუდ, ნამდა ბრელ  ექიმიშ აზრით, სპირალი ვარზენს სპერმას კვერცხუჯრედიშ განაყოფიერებაშ საშვალებას. მუშო ოკო რაგად, თეშ უმშო, ახალ სიცოცხლე ვედიჭყაფუ.

მარა, მუჭოთ თექ ჭარუდუნ, რდუ შემთხვევეფ, მუჟამსით განაყოფიერებაქ ქუმოხვად. განაყოფიერებულ კვერცხუჯრედიქ შილებე გევითარას ფალოპიშ მილს (საშვილოსნოშ გარე ორსულობა) ვარდა გეგნორთას საშვილოსნოშა. თე შემთხვევას სპირალი ვარზენს განაყოფიერებულ კვერცხუჯრედის თიშ საშვალებას, ნამდა ქიმკიმანგარას საშვილოსნოშ ლორწოვან გარსის. თენა აჩერენს ორსულობას, მუთ აბორტიშ კეთებაცალ რე. თე სტატია თეცალ დასკვნას ორთუდ: „თი ქრისტიანეფქ, მით სპირალიშ გიმორნაფაშენ ფიქრენან, სერიოზულო ოკო დეფიქრან თაქ მოჩამილ ინფორმაციაშე, ხომ ვა წინააღმდეგ თინა ბიბლიურ პრინციპეფს, ნამუთ სიცოცხლეშ სიწმინდეს ოხუ“ (ფსალმ. 36:9).

ხომ ვათირე მედიცინას მუთუნ თე სტატიაშ ჭარუაშ უკულ, ნამუთ 1979 წანას გიშაშკვეს?

ამდღა მედიცინას ჟირნერ სპირალს გიმირინუანა. ართ-ართ რე სპილენძიშ სპირალი, ნამუშ გიმორნაფა 1988 წანას დიჭყეს ამერიკას. მაჟია რე ჰორმონულ სპირალი, ნამუთიქ 2001 წანას მიშართ. მუჭო მოქმედენს თე საშვალებეფი?

სპილენეძიშ სპირალი: მუჭოთ მიფშინეთინ, სპირალი ვარზენს სპერმას საშვალებას, ქიმიოჭირნუას კვერცხუჯრედშა. თეს გეძინელ, სპილენძის ტოქსიკურ მოქმედება უღუ დო სპერმიციდეფცალო ანადაგურენს სპერმას. * სპილენძიშ სპირალი თირანს საშვილოსნოშ ლორწოვან გარსის.

ჰორმონულ სპირალი: არსებენს შხვადოშხვანერ სპირალი, ნამუსით თიცალ ჰორმონ უღუ, მუნერით ორსულობაშ საწინააღმდეგო ტაბლეტეფს. თე სპირალეფშე ჰორმონი საშვილოსნოშა გინმურს. ნამთინეშ შემთხვევას ჰორმონულ სპირალ ოცილ საკვერცხეშე კვერცხუჯრედიშ გიშულას. თეშ უმშო განაყოფიერება ვა მოხვადუ. თეს გეძინელ, ჰორმონულ სპირალი ათხითხარენს საშვილოსნოშ ლორწოვან გარსის. * თინა საშვილოსნოშ ყელიშ ლორწოვან გარსის ხოლო ასქელენს დო თეგვარო ოცილ სპერმას, ქიმერთას საშვილოსნოშა.

მუჭოთ მოშინაფილ რდუნ, ჟირხოლო სპირალი საშვილოსნოშ ლორწოვან გარსის თირანს. მუქ შილებე მოხვადას, კვერცხუჯრედიქ იშენით გენაყოფიერ-და? თე შემთხვევას განაყოფიერებულ კვერცხუჯრედიქ შილებე გეგნორთას საშვილოსნოშა მარა ვემკიმანგარას საშვილოსნოშ ლორწოვან გარსის. თენა თის ნიშნენს, ნამდა დაჭყაფ ეტაპის მეჭყორდუ ორსულობა. მარა თეცალ შემთხვევეფ იშვიათ რე. გამორიცხულ ვა რე, ნამდა თექ კონტრაცეპტულ ტაბლეტეფიშ მეღებაშ დროს ხოლო ქუმოხვადას.

ათეშენ მითინს ვეშულებ გინოჭკირილო თიშ რაგად, ნამდა სპილენძიშ ვარდა ჰორმონულ სპირალეფიშ გიმორნაფაშ დროს ვა მოხვადუ კვერცხუჯრედიშ განაყოფიერება. მარა მუჭოთ მეცნიერულ გამოკვლევეფქ ოძირუნ, თე სპირალეფ თიშნერო მოქმედენს, ნამდა ორსულობაშ შემთხვევეფ მანგარ იშვიათ რე.

დაოჯახებულ ქრისტიანეფქ, მით საშვილოსნოშ დინახლენ კონტრაცეფციაშ გიმორნაფას აპირენან, თე საკითხიშ გურშენ გამოცდილ ექიმწკუმა ოკო ქორაგადუან, ნამ საშვალებეფ რე თინეფშო ხეშამალაფარ დო მუ რისკეფწკუმა რე დაკავშირებულ თიშ გიმორნაფა. ჩილ დო ქომონჯიქ მითინს, თეწკუმა ართო ექიმს ხოლო ვემაჩას ოკო თიშ უფლება, მუნეფიშ მანგიორო გეგნოჭყვიდას თე საკითხი (რომ. 14:12; გალ. 6:4, 5). თენა არძაქ მუშით ოკო გინოჭყვიდას დო ველდან ოკო, ნამდა მუნეფიშ მანგიორო თეს შხვა გაკეთენს. თინეფიშ მიზან ოკო რდას, მიღან ღორონთიშ მოსაწონ გადაწყვეტილება დო უღდან სუფთა სინდისი (ქოძირით 1 ტიმ. 1:18, 19; 2 ტიმ. 1:3).