დაიანა 80 წანას რე გინოჩილათირ. თიშ ქომონჯის ალცჰეიმერიშ ლახალა უღუდ დო მუსხირენ წანას ღურაშახ სპეციალურ დაწესებულებას რდუ, სოდეთ თეცალ ლეხეფს ულუანდეს. თის ჟირ ქომოლსქუა ხოლო აფუდ ღურელ; თეს გეძინელ კიბო უღუდ. მარა დაიანაშ კრებაშ წევრეფ იჩიებნა, ნამდა სამეფო დარბაზის ვარდა მსახურებას თინა ირიათო მხიარულ რე.

ჯონი 43 წანაშე მეტ ხანს გილმალ ზედამხედველო მსახურენდჷ. თის მანგარო უჸორდჷ თეცალ მსახურება, მარა მიოტებელქ აჸუ, ლეხ ნათესეშა მიკულუაფუდკონ თიშენ; ასე თინა ადგილობრივ კრებას მსახურენს. მუჟამსით კონგრესის ვარდა კრებას ჯონის ჯვეშ ნაჩინებუეფ შეხვადუნან, იჩიებნა, ნამდა თინა შურო ვა რე თირელ. ჯონი კინ ხიოლით აგრძელენს მსახურებას.

მუჭო შეიალებუეს დაიანა დო ჯონის, ვადინუესკო ხიოლ? მუჭო შილებე ვა ვოდინუათ ხიოლ, მუჟამსით ემოციურო ვარდა ფიზიკურო იბტანჯებუთ? მუჭო შილებე ბედნერ რდას პიროვნება თიმწკუმა ხოლო, მუჟამსით უკვე ვა მსახურენს თი სფეროს, ნამუთ მანგარო უჸორდჷ? ბიბლია მარზენა თე კითხვეფიშ პასუხის: „იეჰოვათ გეხარენს მართალ“ (ფსალმ. 64:10). თე სიტყვეფს მოჩამილ ჭეშმარიტებას უმოსო ქინვანჭუთ, მუჟამსით ქიგებგენთ მუშა რე დამოკიდებულ შინაგან ხიოლ.

გარკვეულ საქმეეფს ირიათო მოუღ ხიოლ. მაგალთო, ქორწინებას, ბაღანაშ შეძენას ვარდა თეოკრატიულ დანიშნულებაშ მეღებას დიდ ხიოლ მოჸუნს, მუშენდა თე ირფელს იეჰოვაქ მეჩჷ დაჭყაფ. თიქ გაჭყჷ ქორწინება დო წყვილეფს გამრავლებაშ უნარ ქიმეჩ. კრებეფიშ საშვალებათ თინა შხვადოშხვა დავალებეფს არზენს ქრისტიანეფს (დაბ. 2:18, 22; ფსალმ. 127:3; 1 ტიმ. 3:1).

მარა მინშა გარკვეულ მიზეზეფიშ გურშენ ხიოლ დიდ ხანს ვეგრძელებ. მაგალთო, ართ-ართ მიზეზ შილებე მეუღლეშ ღალატ ვარდა ღურა რდას (ეზეკ. 24:18; ოს. 3:1). მაჟია მიზეზ, შილებე თინა რდას, ნამდა სქუალეფ ვამორჩილდან მშობლეფს ვარდა ღორონც დო შედეგო კრებაშე ხოლო გერიცხან. მაგალთო, სამუელიშ ქომოლსქუალეფ ვამორჩილდეს იეჰოვას; დავითიქ მუშ საქციელით ბრელ უბედრობა მოუღ მუჭოთ მუშ დუც, თეშ ოჯახიშ წევრეფს ხოლო (1 სამ. 8:1—3;  2 სამ. 12:11). მუშო ოკო რაგად, თეცალ მოვლენეფს ჭუა დო გურიშგოტახუა მოუღ დო ხიოლს მიდინუანა.

გლახა ჯამრთელობაშ, ოჯახურ მოვალეობეფიშ ვარდა თეოკრატიულ ცვლილებეფიშ გურშენ შილებე მსახურებაშ ნამდგაინ სფეროს მონაწილებაქ მაჸუან მიოტებელქ. ბრელ, მიდგას თეცალ ცვლილებეფიშ გურშენ მსახურებაქ აჸუ მიოტებელქ, იჩიებ, ნამდა ონატრუნა თი დრო, მუჟამსით მუნეფიშ საქმეს დიდ კმაყოფილება დო ხიოლ მოუღუდ თინეფშა.

ადვილო შემლებნა ბძირათ, ნამდა გარკვეულწილო ხიოლიშ მუმაღალარ მიზეზეფ დროებით რე. თე ირფელიშ უმკუჯინუო, არსებენს თიცალ ხიოლ, ნამუთ სირთულეეფიშ დროს იშენით სქიდუ ჩქინწკუმა. სამუელი, დავითი დო შხვეფიშ ცხოვრებაშე იძირე, ნამდა განსაცდელეფიშ დროს ვადინუანდეს ხიოლს.

იესოს უჩქუდ, მუ რდუ ნამდვილ ხიოლ. ონდო დედამიწაშა მიშკო, თინა ზეცას ირნერო ჯგირ პირობეფს ცხოვრენდჷ. იესოშ გურშენ ბიბლიას ჭარჷ: „ირიათო ფხარენდჷ თიშ [იეჰოვაშ] წოხოლე“ (იგავ. 8:30). მარა დედამიწას თიქ განსაკუთრებულო რთულ პრობლემეფს ქეშეხვად. თეშ უმკუჯინუო, იესო იშენით ხიოლით ასრულენდჷ იეჰოვაშ ნებას (იოან. 4:34). ღურაშ წოხოლე მუსხირენ საათის თინა მანგარო იტანჯებუდ. მარა ბიბლიას პკითხულენთ: „ხიოლშენ, ნამდგას ელუდ, ონჯღორე მუთუნო ვემირჩქინ დო ბოძის წამებას გურზჷ“ (ებრ. 12:2). თაშ ნამდა, საფუძვლიან მიზეზ მიღნა დეფიფქრათ ბიბლიას ინოჭარილ თე სიტყვეფშენ, ნამუთ ნამდვილ ხიოლს ოხუ.

ართშა ქადაგებაშ უკულ 70 მოწაფექ დირთჷ იესოშა. თინეფ მანგარ გახარებულ რდეს, მუშენდა თიცალ ძალიერ საქმეეფ აკეთეს, მუნერით რე დემონეფიშ დამორჩილება. მარა იესოქ უწუ: „შურეფ გომორჩილნან თინა ვარინ, თქვან სახელეფქ ზეცას დიჭარუნ თინა გოხიოლდან“ (ლუკ. 10:1—9, 17, 20). დასურო, იეჰოვაშ მოწონება უმოს მნიშვნელოვან რე დო მეტ ხიოლ მოუღ, ვინემ მუდგარენ განსაკუთრებულ დავალებაშ შესრულება.

ხოლო ართ შემთხვევას, იესო აკოშაყარელ ხალხის უქადაგუდ. თე დროს ართ ებრაელ ოსურქ, ნამუთ იესოშ გურაფეფით რდუ გაკვირვებულ, დირაგადუ, მუ ბედნერ იჸუაფუნია თეშ  დიდა. მარა იესოქ თის უწუ: „ბედნერ თინა რე, მით ირჩქილუაფ ღორონთიშ სიტყვას დო იცვენს თის!“ (ლუკ. 11:27, 28). მართალ რე, ბედნერეფ ვორეთ, მუჟამსით სამაგალითო სქუალეფ პჸუნა, მარა უმოს ბედნერეფ ვორეთ დო ხიოლიშ მეტ მიზეზ მიღნა, მუჟამსით ვომორჩილუთ ღორონც დო თიწკუმა ჯგირ ურთიერთობა მიღნა.

დასურო ნამდვილ ხიოლ თიშ რჩქინას მოუღ, ნამდა იეჰოვა მიწონუანა. მართალ რე, განსაცდელეფ სასიამოვნო ვა რე, მარა თის ვემდაღინე ჩქინდა ხიოლ. სინამდვილეს განსაცდელეფიშ დროს ართგურო დოსკილადა უმოსო ამანგარენს ჩქინ ხიოლს (რომ. 5:3—5). თეს გეძინელ, იეჰოვა წმინდა შურს არზენს თინეფს, მით თიშა რენა მენდებულ; ხიოლ ხოლო წმინდა შურიშ ნაყოფ რე (გალ. 5:22). თენა მოხვარნა ფსალმუნიშ 64:10-ის ინოჭარილ სიტყვეფიშ გაგებას: „იეჰოვათ გეხარენს მართალ“.

თავრეშე ბგებულენთ, მუჭო ინარჩუნენდეს ხიოლს სირთულეეფიშ დროს ჟიშე მოშინაფილ დაიანა დო ჯონი. დაიანა იჩიებ: „მუჭოთ ბაღანა მშობელწკუმა თეშ, მა ხოლო იეჰოვაწკუმა ბგორუნდჷ დუდიშ გითაფორაფალს“. მუჭო იგინ თიქ იეჰოვაშ მოწონა? დაიანა აგრძელენს: „იეჰოვაშ კურთხევა თინა რდუ, ნამდა მიღუდ ძალეფ გუვაგრძელკო მსახურება გოძიცებულ სახეთ“. ჯონი, ნამუთ გილმალ მსახურებაშ უკულ აქტიურო აგრძელენდჷ ქადაქებაშ საქმეს მონაწილებას, იჩიებ, მუქ მეხვარ თის: „1998 წანაშე მსახურებას დახელოვნებაშ სკოლაშ მასწავლებელ ვორდჷ; თე დროს არძაშ უმოს დრო დუთმჷ პირად გურაფას“. თინა იჩიებ, ნამდა მუშ მეუღლეს დო მუს ვა გუჭირდეს ახალ ცხოვრებაშა მერჩქვანაქ, მუშენდა ირიათო მზათ რდეს აკეთესკო თინა, მუდგას იეჰოვა დავალენდჷ. თინა იჩიებ: „ვა ბნარღენთინ თეშ ვორთუთ ირფელს“.

ბრელ ქრისტიანქ გიმოცად მუშ დუდშა ფსალმუნიშ 64:10-ის ინოჭარილ სიტყვეფიშ ჭეშმარიტება. ართ წყვილ, ნამუთ 30 წანაშე მეტ ხანს მსახურენდჷ შეერთებულ შტატეფიშ ბეთელს, სპეციალურ პიონერეფო დანიშნეს. თინეფქ თქუეს: „ბუნებრივ რე დამწუხრებულო იგინე დუდ, მუჟამსით მიოტებელ გაფჷ თიცალ საქმე, მუთ მანგარო გიჸორს. მარა ირიათო დამწუხრებულო ვეგლგართინე“. თინეფქ ხეთეშე ქიმიაჸუნეს ქადაგებაშ საქმეს ახალ კრებაწკუმა. თე წყვილ იჩიებ: „ჩქი კონკრეტულ საკითხეფშენ ბლოცულენდით. ლოცვეფშა პასუხიშ მეღება გურშა ელამკინანდეს დო მეტ ხიოლ მიღდეს. ჩქინ მეულაშ უკულ შხვეფქ ხოლო ქიდიჭყეს კრებას პიონერო მსახურება. ჩქი ჟირ პიროვნებაწკუმა ქიდიპჭყით ბიბლიაშ გურაფა, მით სულიერო წოხოლე მიშჷ“.

მუშო ოკო რაგად, ვა რე ადვილ ირიათო ხიოლ მიღდან. მაღვენუნა სიტუაციეფ, მუჟამსით დამწხურებულო იბგინანთ დუც. მარა იეჰოვა იმენდის მარზენა ფსალმუნიშ 64:10-ის ინოჭარილ სიტყვეფით. მუჟამსით გურ მაფნა გოტახილ, შემლებნა დარწმუნებულ ვორდათ, ნამდა ართგურო ქუდოფსკიდუთ-და, გეფხარებუთ იეჰოვათ. ხოლო უმოს, ველუთ თი დროს, მუჟამსით შისრულებ იეჰოვაშ დუნაპირებ „ახალ ცა დო ახალ დედამიწაშ“ გურშენ. ღორონთიშ არძა მსახურ სრულყოფილო გინირთუ დო მარადიულო გეხარენა თი ირფელით, მუდგას იეჰოვა აკეთენს (ეს. 65:17, 18).

წერმიდგინით, სრულყოფილ ჯამრთელობა მაღვენუნა დო ირ ოჭმარეს ახალ ძალეფით ეფშა გოპკურცხუთ. ირნერ ჭუა დო ემოციურ ჭრილობეფ, მუთ ულირს მაწუხენდეს, დღას ვაგმოშინანა დუც. ჩქი დარწმუნებულ ვორეთ, ნამდა თი დროს მახორუეფ „ულირს ვეგიშინანა დო გურს ხოლო ვეფიქრენა“. ღორონთ გათელენს ღურელეფს დო თინეფ გეხარებნა ოჯახიშ წევრეფწკუმა ართო. მილიონობით კოჩ იგინანს დუც თი მშობლეფცალო, მიდგაშ 12 წანერ ძღაბის იესოქ სიცოცხლე დურთინუ. ბიბლიას ჭარ: „თინეფიშ ხიოლს საზღვარ ვა უღუდ“ (მარ. 5:42). საბოლათ, არძა პიროვნება დედამიწას „მართალ“ იჸუაფ დო „იეჰოვათ გეხარნეს“ მარადიულო.