1, 2. ა) მუს აღნიშნენა ნამთინე ქიანას დო მუ რდუ იუბილეშ წანა? (ქოძირით ჩარჩო „ მუ რდუ იუბილეშ წანა?“) ბ) მუჭოთ ლუკაშ 4:16—18-ს ინოჭარ, მუშ გურშენ იჩიებუდ იესო?

ნამთინე ქიანას ხალხ აღნიშნენს მნიშვნელოვან მოვლენეფიშ 50 წანაშ დუდის. თე დღას იუბილეშ დღას უძახნა. თე დღახუეფ შილებე მუსხირენ დღას, მარას ვარდა უმოს მეტ ხანს აღნიშნან; მარა ართ დროს თინა იშენ გეთებუ დო ხალხის მალას გიშულუანს თი ხიოლ, მუთ თი დღალეფს მიღეს.

² ჯვეშო ისრაელს განსაკუთრებულო ოხიოლდეს ირ 50-ა წანა, ნამდგას თინეფშო თავისუფლება მოუღუდ. მუშენ რე თე ღონისძიება ჩქინო საინტერესო ამდღა? თე იუბილეშ წანა გუმოშინანა თი მნიშვნელოვან მუდგარენს, მუთ იეჰოვაქ აკეთ ჩქინო, ნამდა მარადიულო გუმათავისუფლესკო, მუდგაშ გურშენ იესო ხოლო იჩიებუდ (წეკითხით ლუკა 4:16—18).

3. მუჭოთ ლევიანეფიშ 25:8—12-ს რე მოჩამილ, მუ ჯგირობუა მოუღუდ ისრაელეფშა იუბილეშ წანას?

³ თიშ უჯგუშო გაგებელო, მუს გულისხმენდჷ იესო, მუჟამსით გათავისუფლებაშ გურშენ იჩიებუდ, დიო გუვარჩუათ იუბილეშ წანაშ გურშენ ისრაელეფშა მეჩამილ ღორონთიშ კანონი. იეჰოვაქ უწუ ისრაელეფს: „წმინდათ გეგმაცხად 50-ა წანა დო გეგმაცხად თი დიხას თავისუფლება არძა თექიან მახორუშო. იუბილე იჸუაფ თენა თქვანო. დართინეთ არძა მუშ ოკვირდეშა დო მუშ ოჯახშა“ (წეკითხით ლევიანები 25:8—12). წოხოლენ სტატიას გუვარჩით, მუ ჯგირობუა მოუღუდ ისრაელეფშა საბატონიშ დღას. მორთ, ასე ქიგებგათ მუ ჯგირობუა მოუღუდ თინეფშო იუბილეშ წანას. წერმიდგინით, ნამდა ისრაელ კოჩის ვალეფქ ქიგიადვჷ დო შედეგო, იძულებურქ იჸუ,  ვალეფიშ ოსურებელო მუშ დიხა გეგმოჩკო. იუბილეშ წანას, თე დიხა თის დართუდ. ათეშენ, დიხაშ მინჯე დირთუდ „მუშ ოკვირდეშა“ დო მომავალს, თიშ შთამომავლეფს დიხა ვა უდინუდეს. წერმიბდგინათ ხოლო შხვა შემთხვევა: ისრაელ კოჩის თიზმა ვალქ ქიგიადვჷ, ნამდა თიშ ოსურებელო, მუშ სქუა ვარდა მუშ დუდ მონათ ოკო გიმოჩკო. იუბილეშ წანას, თე მონა დირთუდ „მუშ ოჯახშა“. თაშ ნამდა, სამუდამოთ მონათ მითინ ვა დოსქიდუდ. იეჰოვა მართალო ზრუნენდჷ მუშ ხალხშე!

4, 5. მუშენ ოკო დებინტერესათ იუბილეშ წანათ?

⁴ ხოლო მუ ჯგირობუა მოუღუდ იუბილეშ წანას? იეჰოვაქ თქუ: „თქვან შქას ოკო ვა რდას ღარიბ, მუშენდა იეჰოვა გაკურთხენა თი დიხას, ნამდგას იეჰოვა, თქვან ღორონთ გარზენა ოკვირდეთ, ნამდა დემკვიდრათ თექ“ (კან. 15:4). თენა გენესხვავებ თი სიტუაციაშე, ნამუთ ამდღა ქვეყნიერებას რე. მუჭოთ ვორწყეთ, ღარიბეფ უმოსო იღარიბებნა დო ქონებიერ კათა უმოს მეტის შიბულენა.

⁵ ამდღა ჩქი ვა მოვალნა მოსეშ კანონიშ შესრულება. თენა ნიშნენს, ნამდა ვეფცვენთ იუბილეშ წანაწკუმა დაკავშირებულ ღონისძიებეფს, მონეფიშ გათავისუფლებაშ, ვალეფიშ პატიებაშ დო დიხეფიშ დორთინაფაშ გურშენ (რომ. 7:4; 10:4; ეფეს. 2:15). მარა იშენით ოკო დებინტერესათ იუბილეშ წანაშ გურშენ. მუშენ იფჩიებუთ თეს? თენა გუმოშინანა თი ირფელს, მუთ იეჰოვაქ აკეთ, ნამდა გუმათავისუფლესკო ცოდვაშ მონობაშე.

6. მუშე ოსაჭირ კაცობრიობას გათავისუფლება?

⁶ არძას მოსაჭირნა გათავისუფლება ცოდვაშ მონობაშე, ნამუთ მონობაშ სასტიკ ფორმა რე. ცოდვაშ მონეფ ვორეთინ თიშენ იფრჩინუთ, იბლახებუთ დო ბღურუთ. თეს ბრელ თიმწკუმა ამჩნიენს, მუჟამსით სარკეშა ენიჯინე ვარდა ექიმშა ომკურნალეფშა მეურს. თეს გეძინელ, გურ მიტირხუნა, მუჟამსით ფცოდენთ. მოციქულ პავლექ აღიარ, ნამდა თინა მუშ „სხეულიშ ნაწილეფს“ რდუნ თი „ცოდვაშ კანონიშ“ მონა რდუ; უკულ გეუძინ: „ცოდა კოჩ ვორექ! მი მირსხენს თე მაღურუ სხეულშე?“ (რომ. 7:23, 24).

7. მუ იწინასწარმეტყველ ესაიაქ გათავისუფლებაშ გურშენ?

 ⁷ საბედნეროთ, ღორონთიქ დოგორ შარა, ნამუთ ცოდვაშ მონობაშე გუმათავისუფლენდეს. თექ ხვალე იესოშ საშვალებათ იჸუ შეიოლებერქ. ჯვ. წ. მა-8 საუკუნეს, ესაიაქ იწინასწარმეტყველ, მომავალ გათავისუფლებაშ გურშენ, ნამუთ უმოს უჯგუშ იჸუაფუდ, ვინემ თი გათავისუფლება, ნამდგას ისრაელეფ იუბილეშ წანას ღებულენდეს. თიქ ჭარჷ: „უზენაეს უფალიშ, იეჰოვაშ შურ მოქმედენს ჩქიმწკუმა, მუშენდა იეჰოვაქ გიშაბგორ, ნამდა თვინიერეფს სახიოლო ამბე გეგნოფჩიკო. თიქ მუმაშქვჷ გურგოტახილეფშო გურჭუაშ ეიოქექაფალო, ტყვეეფშო თავისუფლებაშ გაცხადებელო“ (ეს. 61:1). მის ოხუ თე წინასწარმეტყველება?

8. მის ოხუ გათავისუფლებაშ გურშენ ესაიაშ წინასწარმეტყველება?

⁸ გათავისუფლებაშ გურშენ თე მნიშვნელოვან წინასწარმეტყველებაშ შესრულებაქ დიჭყჷ იესოშ დედამიწას მსახურებაშ დოჭყაფაშ უკულ. მუჟამსით იესოქ მუშ მშობლიურ ქალაქ ნაზარეთის, სინაგოგაშა მერთჷ, თიქ ესაიაშ სიტყვეფ ეშუკითხჷ თექ შაყარელ იუდეველეფს: „იეჰოვაშ შურ რე ჩქიმწკუმა, მუშენდა თიქ ცხებულო გინმოშქვჷ, ნამდა სახიოლო ამბე გუცხადკო ღარიბეფს დო ქუმმაშქვჷ, ნამდა ტყვეეფს გათავისუფლებაშ გურშენ, თოლს ვარწყენან თინეფს თოლსინთეშ მოკათაფაშ გურშენ ვუქადაგკო, გუვათავისუფალკო დაჩაგრულეფ დო იეჰოვაშ მოსაწონ წარმოწანაშ გურშენ იფქადაგკო“. უკულ იესოქ თე სიტყვეფ მუშ დუდის დუკავშირ (ლუკ. 4:16—19, 21). მუჭო შეასრულ იესოქ თე წინასწარმეტყველება?

9. მუშე გათავისუფლებას ელუდ ბრელ იესოშ დროს?

⁹ გათავისუფლებაშ გურშენ ესაიაშ წინასწარმეტყველებაშ შესრულებაქ, ნამდგაშ გურშენ იესო ხოლო იჩიებუდ, პირველ საუკუნეს დიჭყჷ. იესოქ დამტკიც თენა, მუჟამსით თქუ: „ამდღა შესრულ წმინდა წერილეფიშ თე ადგილქ, მუთ ასე მირჩქილეთ“ (ლუკ. 4:21). ბრელ, მით იესოშ თე სიტყვეფს ირჩქილედ, შილებე პოლიტიკურ სიტუაციაშ თირუას ელუდ, ნამდა რომიშ მართველობაშე გეთავისუფლესკო. შილებე იესოშ მოწაფეეფ ხოლო თეშნერო ფიქრენდეს, მუშენდა უმოს გვიანო, ჟირ მოწაფექ თქუ: „ჩქი იმენდ მიღდეს, ნამდა ზუსტას თინა ირსხენდჷ ისრაელს“ (ლუკ. 24:13, 21). მარა, მუჭოთ მიჩქუნან, იესო დღას ვა მუწოდენდჷ მუშ მიმაჸუნალეფს რომიშ მართველობაშ წინააღმდეგ ულას. პირიქით, თინა ოგურუანდჷ თინეფს „კეისარიშ კეისარს“ ქიმეჩესკო (მათ. 22:21). თაშ ნამდა, მუ გაგებათ გათავისუფალ იესოქ ხალხ თიმწკუმა?

10. მუშე გათავისუფალ იესოქ ხალხ?

 ¹⁰ ღორონთიშ სქუაქ თიშენ მორთჷ, ნამდა ხალხის ჟირ მუდგარენშე გათავისუფლებას მეხვარკო. პირველ, თიქ მეხვარ ხალხის გეთავისუფლესკო რელიგიურ ლიდერეფიშ ტყურა გურაფეფშე. თი დროს ბრელ იუდეველს ანძალენდეს ტრადიციეფიშ მეჸუნას დო სწორ ვა რდუნ ფერ მუდგარენეფიშ დაჯერებას (მათ. 5:31—37; 15:1—11). თინეფ, მით იჩიებდეს, ნამდა ხალხის ღორონთიშ მსახურებას ოხვარდეს, ჸვერე წინამძღოლეფცალ რდეს, მუშენდა მუნეფ ღორონთის სწორას ვა ცენდეს თაყვანს. თინეფქ ვარია თქუეს მესია დო თიშ გურაფეფიშ გურშენ. შედეგო, ვეგეჩინებაფეს ღორონთ დო ცოდვეფქ ვეპატუეს (იოან. 9:1, 14—16, 35—41). იესო ჭეშმარიტებას ოგურუანდჷ, ჯგირ მაგალითის ირზენდჷ დო თეთ, თანდაბალ ხალხის ოძირანდჷ, მუჭო გეთავისუფლესკო ტყურა გურაფეფშე (მარ. 1:22; 2:23—3:5).

11. ხოლო მუ მნიშვნელოვან მუდგარენშე გათავისუფალ იესოქ ხალხ?

¹¹ მაჟია მუდგარენ, მუდგაშეთ იესოქ ხალხ გათავისუფალ, ცოდვაშ მონობა რდუ. იესოშ მსხვერპლიშ საფუძველშა, ღორონთ პატიენს ცოდვეფს თინეფს, მით გიშაჸიდირალიშ რწმენას გიმირჩქინანს დო თეს საქმეეფით ოძირანს (ებრ. 10:12—18). იესოქ თქუ: „ღორონთიშ სქუა გუგათავისუფლენან-და, ნამდვილო თავისუფალეფ იჸუაფუთ“ (იოან. 8:36). თე თავისუფლება უმოს დიდებულ რდუ, ვინემ თი თავისუფლება, ნამდგას ისრაელეფ იუბილეშ წანას ღებულენდეს! მაგალთო, იუბილეშ წანას გათავისუფლებურ კოჩ, შილებე კინ მონათ გინორთედკო დო საბოლათ თინა დოღურუდ. მარა იესოშ მოჩამილ თავისუფლება მარადიულო გეგრძელებ.

12. პირველო მიქ მიღჷ ჯგირობუა თავისუფლებაშე, ნამდგაშ გურშენ იესო იჩიებუდ?

¹² ახ. წ. 33 წანაშ ჟარნეჩდომავითა დღაშ დღახუს, იეჰოვაქ ცხებულეფო გინაშქვჷ მოციქულეფ დო შხვა ართგურ ქომოლკათა დო ოსურკათა. თიქ სქუალეფო გეგშაგორ თინეფ, ნამდა მომავალს იესოწკუმა ართო ზეცას მეფეეფ ჸოფედესკო (რომ. 8:2, 15—17). თენა რდუ პირველ კურთხევა, მუთ თი თავისუფლებაქ მიღჷ, ნამდგაშ გურშენ იესო ნაზარეთიშ სინაგოგას იჩიებუდ. თე პიროვნებეფ ვართ თი ტყურა გურაფეფიშ მონეფ რდეს, ნამდგას იუდეველ რელიგიურ წინამძღოლეფ ოგურუანდეს დო ვართ თი ტრადიციეფიშ, ნამდგას ღორონთიშ სიტყვა ვეწონუანდჷ. თეს გეძინელ, იეჰოვას უღჷ თიშ საფუძვლიან მიზეზეფ, მუდგაშ გურშენ თე ხალხ თიშ თოლს, ცოდვაშ შედეგეფშე თავისუფალ რე. სიმბოლურ იუბილეშ წანაქ ახ. წ. 33 წანას დიჭყჷ, მუჟამსით იესოშ მიმაჸუნალეფქ ცხებულეფო გინირთეს; იუბილეშ წანა იესოშ ანთასწანიან მართველობაშ  ბოლოს გეთებუ. მუ ჯგირობუა მოხვადუ თე დროშ დინახალე?

13, 14. ცხებულეფიშ გარდა, ხოლო მის შეულებ მიღას თავისუფლება, ნამდგაშ გურშენ იესო იჩიებუდ?

¹³ ამდღა მილიონობით ალალ გურიშ ხალხ არძა ერშე, „შხვა შხურიშ“ ნაწილ რე (იოან. 10:16). ღორონთის თინეფ ვეგშუგორ, ნამდა იესოწკუმა ართო იმეფესკო ზეცას. მუჭოთ ბიბლია იჩიებ, თინეფს უღნა საშვალება, მარადიულო იცხოვრან დედამიწას.

¹⁴ თქვა ხოლო თე იმენდ ქოიღნან-და, უკვე ამდღარშე ღებულენთ ჯგირობუას თინეფშე, მით ღორონთიშ სამეფოშ ნაწილ რე. თქვა შეილებნა ცოდვეფიშ პატიება ქოთხუათ ღორონთის, მუშენდა იესოშ დობუნილ ზისხირიშ რწმენას გიმირჩქინანთ. შედეგო, შეილებნა ღორონთიშ მოწონა მიღათ დო გიღდან სუფთა სინდის (ეფეს. 1:7; გამოცხ. 7:14, 15). დეფიქრით თი კურთხევეფშე ხოლო, ნამუთ ტყურა გურაფეფშე გათავისუფლებაქ მოიღეს. იესოქ თქუ: „ქიგეგენთ ჭეშმარიტებას დო ჭეშმარიტება გუგათავისუფლენა თქვა“ (იოან. 8:32). მუნერ ბედნერეფ ვორეთ, ნამდა თეცალ თავისუფლება მიღნა!

15. მუნერ თავისუფლებას დო მუ კურთხევეფს ველუთ მომავალს?

¹⁵ თქვა შეილებნა ხოლო უმოს დიდ თავისუფლებაშ იმენდ გიღდან. უხოლაშ მომავალს, იესო ართ დო სამუდამოთ მოსპუნს ტყურა რელიგიას დო კორუმპირებულ ადამიანურ მართველობას. ღორონთ  დეცვენს „ანაყუ ხალხის“, ნამუთ ომსახურ თის დო უკულ საშვალებას ქიმეჩანს, გეხარან დედამიწას მარადიულ სიცოცხლეთ (გამოცხ. 7:9, 14). თი დროს ბრელ გეთელებ დო მით ღორონთიშ მსახურებას გინოჭყვიდუნს, ცოდვაშ გლახა შედეგეფშე გეთავისუფლებ (საქ. 24:15).

16. მუ დიდებულ თავისუფლება ელჷ კაცობრიობას?

¹⁶ ანთასწანიან მართველობაშ დროს, იესო დო თიშ თანამართველეფ მეხვარებნა ხალხის უღდან სრულყოფილ ჯამრთელობა დო კინ ღორონთიშ სქუალეფო გინირთან. ისრაელეფშა იუბილეშ წანას თავისუფლება მოუღუდ, მარა ანთასწანიან მართველობაშ დროს ხალხის უმოს დიდ თავისუფლება აღვენუ. თინეფ, მით დედამიწას ართგურო ემსახურებნა იეჰოვას, გესრულყოფილებნა დო ცოდვაშ მონობაშე გეთავისუფლებნა.

17. მუშ იმენდის მარზენა ესაიაშ 65:21—23-ს მოჩამილ წინასწარმეტყველება? (ქოძირით სურათ გალენ გვერდის)

¹⁷ ესაიაშ 65:21—23-ს (წეკითხით) ეჭარილ რე, მუნერ ცხოვრება იჸუაფ მომავალს დედამიწას. ნამთინე ფიქრენს, ნამდა სამოთხეს მოსვანჯაშ მეტის მუთუნს ვა ფქიმინუნთ. მარა, ბიბლია იჩიებ, ნამდა ღორონთიშ ხალხის თიმწკუმა სასიამოვნო სამუშა აღვენუ. შემლებნა დარწმუნებულეფ ვორდათ, ნამდა ანთასწანიან მართველობაშ უკულ „გუნაჭყეფ გეთავისუფლებ ჸორადუაშ მონობაშე დო მიღენს ღორონთიშ სქუალეფიშ დიდებულ თავისუფლებას“ (რომ. 8:21).

18. მუშენ შემლებნა ბჯერდან, ნამდა ბედნერ მომავალ მაღვენუნა?

¹⁸ ჯვეშო, იეჰოვაქ მუშ ხალხის საბატონიშ კანონ მეჩჷ, ნამდა სამუშაშე მისვანჯესკო დო ყურადღება სულიერ საკითხეფშა გეგნიღესკო. ანთასწანიან მართველობაშ დროს ჩქი ხოლო სულიერ საქმეეფით იპჸუაფუთ დაკავებულ. ამდღა ბედნერობაშო აუცილებერ რე ღორონთიშ მსახურება დო თენა თაშ იჸუაფ ახალ ქვეყნიერებას ხოლო. თაშ ნამდა, ღორონთიშ არძა ართგურ მსახურ, ანთასწანიან მართველობაშ დროს ბედნერ იჸუაფ, მუშენდა არძას მაღვენუნა სასიამოვნო სამუშა დო ვემსახურებუთ იეჰოვას.