ქორეთო თიცალ პიროვნება, ნამუთ მარდულობას გიმირჩქინანს? თე კითხვაშე თითოულქ ოკო დეფიფქრათ. ბიბლიას ნაწინასწარმეტყველებ რე, ნამდა ჩქინ დროს ბრელ იჸუაფუდ „უმარდულ“ (2 ტიმ. 3:2). ალბათ გიძირნა თიცალ პიროვნებეფ, მით ფიქრენა, ნამდა შხვეფქ ოკო მემსახურან დო ვალდებულ რენა მუდგარენ მეჩან, ითამ ირფელ მუნეფს ოკუთვნუდან. ათეშენ, თეცალ პიროვნებეფ ფიქრენა, ნამდა ვა რე საჭირო მარდულობაშ გიმოხანტუა თიშო, მუდგას ღებულენა. ალბათ თქვანო ვა რე სასიამოვნო თეცალ ხალხწკუმა ურთიერთობა.

თეშ გინაწონს, იეჰოვაშ მსახურეფს ბიბლია ურაგად: „რდათ მარდულეფ“. ჩქი „ირფელშო მარდულეფ“ ოკო ვორდათ (კოლ. 3:15; 1 თეს. 5:18). მარდულობაშ გიმოხანტუა ჩქინო ხოლო ჯგირ რე. თეშ მუსხირენ მიზეზ არსებენს.

თეშ ართ-ართ მიზეზ თინა რე, ნამდა მარდულობაშ გიმოხანტუა ღირსებაშ გრძნობას უმოსო მივითარენა. მუჟამსით პიროვნება შხვეფს მადლობას ურაგად, საეგებიოთ თის უმოსო მაძინუ ღირსებაშ გრძნობა დო თინა ხოლო, მიდგას მადლობას გინუგანა, ჯგირო იგინანს დუდის. მუშენ იფჩიებუთ თეს? დეფიფქრათ თე მაგალითშე: მუჟამსით შხვეფ მზათ რენა თქვანო მუდგარენ გაკეთან, მუშენდა ზრუნენა თქვანდე, თენა თის ვა ნიშნენსო, ნამდა თქვა უღირუთ თე ირფელშა? მუჟამსით გინაფლენთ, ნამდა შხვეფ პატის რცენა დო გაფასენა, თე ირფელ ღირსებაშ გრძნობას უმოსო გივითარენა. თენა თაშ რდუ რუთიშ შემთხვევას ხოლო. ბოაზიქ რუთიშ მიმართ ხეგოფაჩილობა გიმირჩქინ. მუშო ოკო რაგად, რუთი მანგარ ბედნერ იჸუაფუდ, მუშენდა უჩქუდ, ნამდა მიდგარენ ზრუნენდჷ თიშე დო აფასენდჷ თის (რუთ. 2:10—13).

განსაკუთრებით მნიშვნელოვან რე ღორონთიშ მარდულეფ ვორდათ. მუშო ოკო რაგად, ხშირას ფიქრენდათ იჸი თი სულიერ დო ფიზიკურ ძღვინიშ გურშენ, ნამდგას იეჰოვა გარზენა (კან. 8:17, 18; საქ. 14:17). მარა უბრალოთ ფიქრ ვა რე დასაბაღ; საჭირო რე, დრო გეგმურთათ თიშე ჯგირო დაფიქრებას, მუდგა იეჰოვაქ ხვეიანო მერჩეს, მუჭოთ თქვა თეშ, თქვან ხოლოშიანეფს ხოლო. მუჟამსით დეფიქრებუთ, მუნერ ხეგოფაჩილობას გიმირჩქინანს ღორონთ, უმოს მარდულეფ იჸუაფუთ დო უჯგუშო ქოძირუნთ, მუჭო უჸორთ დო გაფასენა იეჰოვა (1 იოან. 4:9).

მარა საჭირო რე, თიშე უმოს გაკეთათ, ვინემ ღორონთიშ ხეგოფაჩილობაშე დო კურთხევეფშე ფიქრ რე; მარდულობა გეგმოხანტით იეჰოვაშ მიმართ (ფსალმ. 100:4, 5). მარდულობაშ გიმოხანტუას უმოს ბედნერობა მოუღ თიშა, მით თეს ორთჷ.

ხოლო ართ მიზეზ, მუშენ რე თქვანო ჯგირ მარდულობაშ გიმოხანტუა, თინა რე, ნამდა თეშ კეთება ამანგარენს მეგობრულ ურთიერთობეფს. არძას მოკონა შხვეფ მაფასენდან. მუჟამსით მთელ გურით გიმოხანტუნთ მარდულობას თი პიროვნებაშ მიმართ, მიდგაქ ჯგირ გიკეთეს, თქვა უმოსო ეახლოვებუთ ართიანს (რომ. 16:3, 4). თეს გეძინელ, თინეფ, მით მარდულობას გიმირჩქინანა, ალბათ უმოსო მეხვარებნა შხვეფს. თინეფ ორწყენა თი ჯგირ საქმეეფს, მუთ შხვეფქ უკეთეს დო აღძრულეფ რენა იშო ხოლო ჯგირ გუკეთან. მუშო ოკო რაგად, შხვეფიშ მოხვარას ბედნერობა მოუღ. ზუსტას თენა თქუ იესოქ: „შხვაშა ჯგირიშ კეთებას უმოს მეტ ბედნერობა მოუღ, ვინემ მეღებას“ (საქ. 20:35).

მუჭოთ კალიფორნიაშ უნივერსიტეტიშ პროფესორ, რობერტ ემონს იჩიებ, მარდულეფ ქუვორდათინ, საჭირო რე, მარჩქილედან, ნამდა ართიანშა ვორეთ დამოკიდებულ; მინშა შხვეფს ვუკეთენთ ჯგირს დო მინშა აშო მიკეთენა ჯგირს. ფაქტ რე, ნამდა ჩქინ სიცოცხლე დო ბედნერობა შხვეფშა ბრელნერო რე დამოკიდებულ. მაგალთო,  თინეფქ შილებე ოჭკუმალ ვარდა წამალეფ ქუმმოჭირინუან (1 კორ. 12:21). მარდულ პიროვნება არგამათ გიმოხანტუნს, ნამდა აფასენს თის, მუდგას შხვეფ ორთნა თიშო. თაშ ნამდა, ქოიღნანო ჩვევას გეგმოხანტათ მარდულობა, თიშ გურშენ, მუდგას შხვეფ თქვანო ორთნა?

მარდულობაშ გავითარებაშ ხოლო ართ მიზეზ თინა რე, ნამდა მარდულობა გოხვარნა ცხოვრებას უარყოფით ვარინ დადებით თოლით უჯინათ. თქვან გონება ფილტრიშ როლს ასრულენს. თის შეულებ ნამთინე საკითხეფშე გამახვილას ყურადღება დო ნამთინე საკითხშე შურო ვეფიქრას. მუჟამსით მარდულობას გიმირჩქინანთ, უმოს ყურადღებას დადებითის მიაქციენთ დო ვართ ხოლო უარყოფითის. მუთ უმოს მარდულეფ იჸუაფუთ, თით უმოსო შეამჩნიენთ ჯგირს დო თენა მიგეხვარებნა ხოლო უმოს მარდულეფ რდათ. მუჟამსით თი საკითხეფშე გამახვილენთ ყურადღებას, მუდგაშეთ შეილებნა მარდულეფ რდათ, თენა მიგეხვარებნა გეთვალისწინათ პავლეშ რჩევა: „ირიათო ხიოლ გიღდან უფალს“ (ფილ. 4:4).

მარდულობას გეგმოხანტუნთ-და, ქოძირუნთ, მუჭო მიგეხვარებნა თენა, ვეფიქრათ უარყოფითშე.მარდულეფ ქიჸუაფუთ-და ვა გაღვენუნა მიზეზ რდათ გარისხებულ ვარდა მოწყინაფილ. თეს გეძინელ, თინეფ მით მარდულობას გიმირჩქინანს, მატერიალისტეფ ვა რენა. თინეფ აფასენა თის, მუთ უღნა დო ვაცადნა უმოს მეტ ქიშუან (ფილ. 4:12).

სატანას ოკო, ნამდა გურქ გოიტირხან დო ძალეფქ ქეშქელუან თი პრობლემეფიშ გურშენ, ნამდგას თე ბოლო დღალეფს შეხვადუთ. თის მანგარო ოხიოლ, მუჟამსით ორწყე, ნამდა უარყოფით დო კრიტიკულ შურ გევითარებნა. თეცალ განწყობა ქოიღნან-და, შილებე გაიჭირდან სახიოლო ამბეშ თეშ გინოჩამაქ, მუჭოთ თენა თე ცნობას ოსქვანს. მარა თინეფ, მიდგას ღორონთიშ შურ უღნა, მარდულობას გიმირჩქინანა დო უმოს ადვილო გიმოხანტუნა ხიოლს. თეცალ ხიოლიშ მიზეზ თინა რე, ნამდა ორწყენა თი ჯგირ საქმეეფს, მუდგას ღორონთ თინეფშო ორთჷ დო ღორონთიშ დაპირებეფიშ მტკიცე რწმენა უღნა (გალ. 5:22, 23).

მუჭოთ იეჰოვაშ ართ-ართ მსახურ, ალბათ ოთანხმუთ თი ირფელს, მუთ მარდულობაშ გურშენ თე სტატიას რდუ რაგადებულ. მარა, თინა ხოლო ჯგირო გარჩქილენა, ნამდა მარდულობა დო დადებით თვალსაზრის მუშით ვევითარებ. გურქ ვა გოიტირხან; თქვა შეილებნა გავითარათ დო ვადინუათ მარდულობა. მუჭო შეილებნა თეშ კეთება? ირდღას დრო გეგმურთით თიშე დაფიქრებას, მუდგაშ გურშენ შეილებნა მარდულეფ რდათ. მუთ უმოს მეტის იფიქრენთ თეშე, თით უმოს ბუნებრივო გევითარენთ მარდულობას. თე ირფელ მიგეხვარებნა, თინეფშე უმოს ბედნერეფ რდათ, მით ხვალე სირთულეეფშა ამახვილენს ყურადღებას. იფიქრით თი ჯგირ მუდგარენეფშე, მუდგას ღორონთ დო შხვეფ ორთნა თქვანო, ნამდა გურშა ელაიკინან. თეშე ფიქრ თქვან ბედნერობას შეუნწყუნს ხეს. შეილებნა ირდღას გეგმაჭარათ ჟირ ვარდა სუმ მუდგარენ, მუდგაშ გურშენ შეილებნა მარდულეფ რდათ.

ნამთინე მარკვიებელქ, მით მარდულობაშ საკითხის ირკვიენდჷ, თქუ, ნამდა მუჟამსით ირიათო გიმოფხანტუნთ მარდულობას, თეს შეულებ დოთირუას ჩქინ ტვინიშ ფუნქციონირება თეშ, ნამდა ცხოვრებას დადებით თოლით ვუჯინათ. მარდულ პიროვნება უმოს ბედნერ რე. თაშ ნამდა, ქიფიქრით მუსხი კურთხევა გიღნა, ქისიამოვნით თი ჯგირ მუდგარენეფშე, მუთ თქვან ცხოვრებას ხვადუ დო გეგმირჩქინით მარდულობა! დაფასით თი ჯგირ მუდგარენეფ, მუთ გიღნა დო „მადლობა ქუწით იეჰოვას“. თაშ ნამდა, „ირფელშო მარდულეფ რდათ“ (1 მატ. 16:34; 1 თეს. 5:18).