1. მუს ფიქრენს ხალხ მუშობაშენ?

მუნერ შეხედულება უღნა თქვან ტერიტორიას მახორუ ადამიანეფს მუშობაწკუმა დაკავშირებით? ბრელ ქიანას ხალხი ამდღა უმოსის მუშენს ვინემ აიშახ. მით ბრელს მუშენან თინეფს ხშირას დრო ვასქიდუნა, ნამდა მისვანჯან, მუნეფიშ ოჯახწკუმა ართო გატარან დრო ვარდა ქიზრუნან სულიერ საჭიროებეფიშ დაკმაყოფილებაშე (ეკლ. 2:23). ხოლო ართ პრობლემა თინა რე, ნამდა, ნამთინეს ვა უჸორს მუშობა დო ოცად დუდ ეუჩილითუას თის (იგავ. 26:13, 14).

2, 3. მუშობაწკუმა დაკავშირებით, მუ მაგალით მუჩეს იეჰოვა დო იესოქ?

² მთელ მსოფლიოს ხალხიშ უმენტაშ ვარდა სამუშას რე გინოჸუნელ ვარდა ჭიჭეს მუშენს. მორთ, გუვარჩუათ მუნერ დამოკიდებულება უღნა თე საკითხწკუმა დაკავშირებით იეჰოვა დო იესოს. მუშო ოკო რაგად, იეჰოვა ბრელს ხანდენს. თენა იესოქ ჯგირო ოძირუ, მუჟამსით თქუ: „ჩქიმ მუმა ამდღარშახ ხანდენს დო მა ხოლო ფხანდენქ“ (იოან. 5:17). დეფიქრით თი ირფელშე მუთ იეჰოვაქ შექმნჷ — ანგელოზეფ, მურიცხეფ დო შხვადოშხვა პლანეტა. თეს გეძინელ, ხოლო ართ მტკიცებულება, ნამდა ღორონთ ხანდენს, თი ირფელ რე, მუთ დედამიწას არსებენს. ფსალმუნმაბირე დავითიქ თქუ: „მუსხით ბრელ რე სქან საქმეეფ, იეჰოვა! ირფელ სქან სიბრძნეთ შექმნჷ. ეფშა რე დედამიწა სქან ნახანდით“ (ფსალმ. 104:24).

³ იესო მეჸუნდჷ მუმაშ მაგალითის დო ოხვარუდ, მუჟამსით ღორონთ „ცას ორჩქინანდჷ“, იესო იეჰოვაწკუმა რდუ „მუჭოთ ოსტატი“ (იგავ. 8:27—31). თეშ უკულ, დედამიწას ცხოვრებაშ დროს იესოქ სარკო საქმეეფ აკეთ. თე საქმეეფს თიშა თიცალ კმაყოფილება მოუღუდ, მუჭოთ ოჭკუმალიშ ჭკუმუას დო თე საქმეეფ არგამათ ოძირანდჷ, ნამდა თინა ღორონთიქ მაშქვჷ (იოან. 4:34; 5:36; 14:10).

4. მოსვანჯაწკუმა დაკავშირებით, მუ მაგალით დომტუეს იეჰოვა დო იესოქ?

 ⁴ იეჰოვა დო იესო ირიათო ბრელს ხანდენა. ხომ ვა ნიშნენს თენა თის, ნამდა ჩქი ხოლო ირიათო ოკო იმუფშუათ დო ვემიფსვანჯათ? მუშო ოკო რაგად, ვარ. ბიბლია იჩიებ, ნამდა თიშ უკულ, მუთ იეჰოვაქ ცა დო დედამიწა გაჭყჷ „გათუ მუშობა დო ქიმისვანჯჷ“ (გამ. 31:17). იეჰოვა დღას ვა შურდუ, ათეშენ მუდგარენს გაკეთენსინ უკულ, ვასაჭირ მოსვანჯა. თე მუხლის ინოჭარილ სიტყვეფ ნიშნენს, ნამდა იეჰოვაქ უბრალოთ გაჩენდჷ დო სიამოვნება მიღჷ თი ირფელშე, მუთ შექმნჷ. მუჟამსით იესო დედამიწას რდუ, ბრელს ხანდენდჷ, მარა მუშ მეგობრეფწკუმა ართო მოსვანჯას დო ჭკუმუას ხოლო დროს გიმურთუნდჷ (მათ. 14:13; ლუკ. 7:34).

5. მუქ შილებე გუჭირდას ღორონთიშ ბრელ მსახურს?

⁵ ბიბლია ღორონთიშ ხალხის ელუჩანს, ხიოლით იხანდან. ღორონთიშ მსახურეფ მოხანდეეფ რენა დო ვართ ხოლო ზარმაცეფ (იგავ. 15:19). შილებე გიღნა სამუშა, ნამუთ ოჯახიშ ეჯუმალას გოხვარნა. თეს გეძინელ, იესოშ მოწაფეეფს მიღნა პასუხიშმგებლობა, მონაწილება მიბღათ სახიოლო ამბეშ ქადაგებაშ საქმეს. მარა, ჩქი ხოლო მოსაჭირნა მოსვანჯა. მინშა ხომ ვაიჭირა საჭირო დრო დაუთმათ მუშობას, ქადაგებას დო მოსვანჯას? მუჭო შეილებნა თიშ გაგება, მუსხი დრო დაუთმათ მუშობას დო მოსვანჯას?

6. მუჭო ოძირანს მარკოზიშ 6:30—34-ის ინოჭარილ სიტყვეფ, ნამდა იესოს გაწონასწორებულ თვალსაზრის უღუდ მუშობა დო მოსვანჯაშენ?

⁶ მნიშვნელოვან რე გაწონასწორებულ თვალსაზრის მიღდან მუშობაშენ. ღორონთიშ შთაგონებათ მეფე სოლომონქ ჭარჷ, ნამდა „ირფელს მუშ დრო უღჷ“. თეშ უკულ თიქ მიშინუ თიცალ საქმეეფ, მუნერით რე რგუალა, შენება, ნგარა, ძიცა, სხაპუა დო შხვა მუდგარენეფ (ეკლ. 3:1—8). არგამა რე, მუშობა დო მოსვანჯა ცხოვრებაშ ჟირ მნიშვნელოვან ნაწილ რე. იესოს გაწონასწორებულ თვალსაზრის უღუდ მუშობა დო მოსვანჯაშენ. ართშა, მოწაფეეფქ მსახურებაშე მანგარ შულადირეფქ დირთეს. თინეფ თიცალ დაკავებულეფ რდეს, ნამდა „ჭკუმუაშა ხოლო ვამაჩომილეს“. იესოქ უწუ თინეფს: „მორთ სოდგაინ მიდაფრთათ, ხვალე ქუდოფსკიდათ დო ჭიჭე ქიმიფსვანჯათ“ (წეკითხით მარკოზი 6:30—34). მართალ რე, იესოს დო თიშ მოწაფეეფს ირიათო ვა უღდეს მოსვანჯაშ დრო, მარა იესოს არჩქილედ, ნამდა მოსვანჯა ხოლო საჭირო რდუ.

7. მუს მიმეხვარებნა ისრაელეფშა მეჩამილ საბატონიშ კანონიშ გურშენ ინფორმაციაშ მეღება?

⁷ მინშა, არძას მოსაჭირნა მოსვანჯა ვარდა ირდღაშიან ცხოვრებას ჭიჭე ცვლილებეფ. თეს ვორწყეთ მნიშვნელოვან ღონისძიებაშე, ნამუთ იეჰოვაქ ჯვეშ დროს მახორუ მუშ მსახურეფს დაუდგინ. თენა რდუ საბატონიშ კანონიშ დაცვება. ამდღა ჩქი ვა ვორეთ ვალდებულ, დეფცვათ მოსეშ კანონ, მარა შემლებნა ბრელ მუდგარენ დიბგურუათ ისრაელეფშა მეჩამილ თე კანონშე. ნაგურეფ მიმეხვარებნა, გაწონასწორებულ თვალსაზრის მიღდან მუშობა დო მოსვანჯაშენ.

8. მუჭოთ გამოსვლაშ 31:12—15-ის ჭარჷ, მუ დანიშნულება უღუდ საბატონიშ კანონს?

⁸ ღორონთიშ სიტყვაშე ბგებულენთ, ნამდა ამშვ შემოქმედებით „დღაშ“ უკულ, ღორონთიქ გათუ შემოქმედებით საქმიანობა დედამიწას (დაბ. 2:2). იეჰოვას უჸორს შრომა დო „ამდღარშახ ხანდენს“ (იოან. 5:17). იეჰოვა ამშვ „დღას“ ხანდენდჷ დო მაშქვითა „დღას“ მისვანჯჷ. თიქ ისრაელეფს ხოლო უწუ, ირ მაშქვითა დღას მისვანჯესკო. თე კანონშე იძირედ, ნამდა ღორონთის  განსაკუთრებულ დამოკიდებულება უღუდ ისრაელ ერწკუმა. თენა „სრულ მოსვანჯაშ საბატონი“ დო წმინდა დღა რდუ იეჰოვაშო (წეკითხით გამოსვლა 31:12—15). თე კანონ მოქმედენდჷ არძაწკუმა, თინეფ შქას ბაღანეფ, მონეფ დო შინაურ ცხოველეფწკუმა ხოლო (გამ. 20:10). თინა საშვალებას არზენდჷ ხალხის, უმოს მეტ ყურადღება ქიმიაქცუესკო სულიერ საკითხეფს.

9. მუ არასწორ წესეფ გეუძინეს იესოშ დროს საბატონიშ კანონს?

⁹ საბატონიშ დღაშ კანონ ჯგირ რდუ ღორონთიშ ხალხშო. მარა იესოშ დროს მახორუ ბრელ რელიგიურ წინამძღოლქ თე კანონს ბრელ წესი ქიგუძინ. თინეფ ამტკიცენდეს, ნამდა საბატონ დღას ქობალიშ კაკალიშ დუდეფიშ ტახუა დო თიშ ჭკუმუა ხოლო ვეშილებედ; თეს გეძინელ, ლეხიშ სქილიდაფა ხოლო ცოდვათ ითვალუდ (მარ. 2:23—27; 3:2—5). მარა ღორონთ თაშ ვა ფიქრენდუნ თენა იესოქ არგამათ ოძირუ მუშ მარჩქილეეფს.

10. მუჭოთ მათეშ 12:9—12-შე ვორწყეთ, მუჭო უჯინედ იესო საბატონიშ კანონს?

¹⁰ იესო დო თიშ მიმაჸუნალეფ, მით იუდეველეფ რდეს, იცვენდეს საბატონიშ დღას, მუშენდა თინეფ ომორჩილდეს მოსეშ კანონს. * მარა იესოქ სიტყვათ დო საქმეთ ოძირუ, ნამდა საბატონიშ დღას ჯგირ საქმეეფიშ კეთება დო შხვეფიშ მოხვარა არასწორ ვა რდუ. თიქ არგამათ თქუ: „საბატონს ჯგირიშ კეთება აკრძალურ ვა რე“ (წეკითხით მათე 12:9—12). თის ჯგირ საქმეეფიშ კეთება დო შხვეფიშ მოხვარა საბატონიშ კანონიშ დარღვიებათ ვემიორჩქუდ.  იესოშ საქმეეფშე იძირედ, ნამდა თის ჯგირო არჩქილედ, მუ მიზეზით მეჩჷ ღორონთიქ ისრაელეფს თე კანონ. თე დღას ღორონთიშ ხალხ ისვანჯუდ ირდღაშიან საქმეეფშე, ათეშენ, თინეფს შეულებდეს მთელ ყურადღება სულიერ საკითხეფშა გეგნიღესკო. მუჭოთ იძირენ, იესო თიცალ ოჯახის ირდუდ, სოდეთ საბატონიშ კანონს იცვენდეს დო თე დღას თიშო გიმირინუანდეს, ნამდა ღორონთწკუმა ურთიერთობა გამანგარესკო. თეს თიშენ ბრაგადანთ, ნამდა იესოშ გურშენ ბიბლიას ბკითხულენთ: „უკულ იესოქ ნაზარეთშა გენორთჷ, თექ, სოდეთ მირდჷ. საბატონს, მუჭოთ წესინ, სინაგოგაშა გემნორთჷ“ (ლუკ. 4:15—19).

11. მიქ მეჩჷ იესოს მუშობაშ ჯგირ მაგალით?

¹¹ იესოშ მუმაჸონერ იოსებ ღორონთიშ თოლით უჯინედ მუშობას, მუშენდა იესოს ხოლო ოგურუანდჷ ჯაშ ხელობას (მათ. 13:55, 56). იესო ორწყედ, ნამდა იოსებ ირდღას ბრელს მუშენდჷ, მუშ დიდ ოჯახ გეიჯუმუკო. უმოს გვიანო, იესოქ მუშ მოწაფეეფს უწუ: „მუშა ღირს რე ნამუშერშე გინუგე“ (ლუკ. 10:7). მუშო ოკო რაგად, იესოს ჯგირო არჩქილედ მუს ნიშნენდჷ ბრელ მუშობა.

12. ნამ მუხლეფშე იძირე, მუნერ დამოკიდებულება უღუდ პავლეს მუშობაწკუმა?

¹² პავლე მოციქულს ხოლო უჩქუდ მუშობაშ ფასი. თიშ მთავარ საქმე იესოშ სახელიშ დო თიშ საქმეეფიშ გურშენ ქადაგება რდუ. მარა, დუდიშ ეიოჯუმალარო თინა ხოლო მუშენდჷ. თესალონიკელეფს ჯგირო უჩქუდეს, ნამდა პავლე „დღაშ დო სერით“ ბრელს მუშენდჷ, მუშენდა თინეფიშ ეიოჯუმალარ ვა ჸოფედკო (2 თეს. 3:8; საქ. 20:34, 35). მუჟამსით პავლექ მუშ სამუშაშ გურშენ ჭარჷ, შილებე გულისხმენდკო კარვეფიშ ჭალას. კორინთის თიქ აკვილა დო პრისკილაწკუმა ქუდოსკიდ დო „ართო მუშენდეს, მუშენდა თინეფ კარვეფს ჭანდეს“. თინა საბატონ დღას ვა მუშენდჷ; თე დღას იუდეველეფს უქადაგუდ, მუშენდა საბატონ დღას თინეფ ხოლო ისვანჯუდეს (საქ. 13:14—16, 42—44; 16:13; 18:1—4).

13. მუშ გურაფა შემლებნა პავლეშ მაგალითშე?

¹³ პავლე მოციქულქ ჯგირ მაგალით მუჩეს. თის სამუშა ხოლო უღუდ, მარა რეგულარულო მონაწილენდჷ „ღორონთიშ სახიოლო ამბეშ წმინდა საქმეს“ (რომ. 15:16; 2 კორ. 11:23). თინა შხვეფს ხოლო ელუჩანდჷ თაშ მიქცუესკო. აკვილა, პრისკილა დო პავლე ართო რდეს პავლეშ „თანამსახურეფ ქრისტე იესოს“ (რომ. 12:11; 16:3). პავლექ ჭარჷ: „მიდგას მუშობა ვაკო, თიქ ვართ ჭკუმას“ (2 თეს. 3:10). მარა იეჰოვაქ აღძრჷ თინა კორინთელეფს ელუჩკო, ბრელ იხანდესკო უფალიშ საქმეს (1 კორ. 15:58; 2 კორ. 9:8).

14. მუს გულისხმენდჷ იესო იოანეშ 14:12-ს ინოჭარილ სიტყვეფს?

¹⁴ ამდღა არძაშ უმოს მნიშვნელოვან საქმე, მუდგაშ კეთება შემლებნა, ქადაგება დო მოწაფეეფიშ მომზადება რე. მუჭოთ იესოქ იწინასწარმეტყველ, მოწაფეეფ მუშე უმოს დიდ საქმეეფს გაკეთენდეს! (წეკითხით იოანე 14:12). თინა ვა გულისხმენდჷ, ნამდა ჩქი სასწაულეფს გუვაკეთენდით. თინა გულისხმენდჷ, ნამდა მუშ მიმაჸუნალეფ უქადაგენდეს დო ქუდაგურუანდეს უმოს მეტ ხალხის, უმოს დიდ ტერიტორიას დო უმოს მეტ ხანს.

15. მუ კითხვეფ ოკო დუსვათ ჩქინ დუდის დო მუშენ?

¹⁵ ქომუშენთ-და, ქოკითხით თქვან დუდის: ქომჩინენანო სამუშას თეშ, მუჭოთ მოხანდე თანამშრომელს? მუთ შილებე ჯგირო დო დროულო ქუვორთუქო ჩქიმ საქმეს? თენა თაშ ქორენ-და, თქვან დამსაქმებელიშ ნდობას დემსახურენთ. თეწკუმა ართო, შილებე ღორონთიშ სამეფოშ გურშენ სახიოლო ამბე ხოლო მირჩქილუან თინეფქ, მიდგაწკუმა ართო მუშენთ. თეს გეძინელ, მუჟამსით საქმე ქადაგებას დო მოწაფეეფიშ მომზადებას ოხუ, ქოკითხით თქვან დუდის:  ქომჩინენანო შხვეფ, მუჭოთ დუდგინოდვალირ მაქადაგებელს? ქივემზადებუქო პირველ ჩიებაშო? მალას ქიმვაკითხანქო თინეფს, მიდგაქ ინტერეს გიმირჩქინ? რეგულარულო ქობღებულენქო მონაწილებას მსახურებაშ შხვადოშხვა ფორმას? თე ირფელს ქართუთ-და, მსახურებას ხიოლ გაღვენუნა.

16. მუჭო უჯინედეს იესო დო თიშ მოციქულეფ მოსვანჯას დო მუჭო უჯინე ამდღა ხალხიშ უმენტაშ თეს?

¹⁶ იესოს ჯგირო არჩქილედ, ნამდა თის დო მუშ მოციქულეფს მინშა მოსვანჯა ოსაჭირდეს. მარა, თიმ დროს დო ამდღა მახორუ ხალხიშ უმენტაშ, მოგენს იესოშ მაგალითის მოჸუნაფილ მდიდარ კოჩის. თე კოჩ მუშ დუდის ურაგადუდ: „მისვანჯ, ჭკუმ, შვი დო ისიამოვნ“ (ლუკ. 12:19; 2 ტიმ. 3:4). თინა ფიქრენდჷ, ნამდა ცხოვრებას არძაშ უმოს მნიშვნელოვან მოსვანჯა დო სიამოვნებაშ მეღება რდუ. მარა იესო დო თიშ მოციქულეფიშ ცხოვრებას მოსვანჯა დო სიამოვნებაშ მეღება ვა რდუ არძაშ უმოს მნიშვნელოვან.

17. მუჭო გიმიბრინუანთ თი დროს, მუჟამსით ვა მუფშენთ?

¹⁷ ამდღა ვოცადუთ მივაჸუნათ იესოშ მაგალითის თით, ნამდა ვა მუფშენთინ თი დრო ხვალე მოსვანჯაშენ ვარინ, ჯგირ საქმეეფიშ კეთებაშო ხოლო გეგმიბრინუათ, მაგალთო: იფქადაგათ დო დევესწრათ კრებაშ შეხვალამეფს. ჩქინო მოწაფეეფიშ მომზადება დო კრებაშ შეხვალამეფშა დასწრება თიცალ მნიშვნელოვან რე, ნამდა ირნერო ვოცადუთ თე საქმეეფს რეგულარულო მიბღათ მონაწილება (ებრ. 10:24, 25). თიმწკუმა ხოლო, მუჟამსით შვებულებას ვორეთ დო იფსვანჯუთ, სოდგა ვა ვორდათინ, ვოსწრუთ კრებაშ შეხვალამეფს დო ირნერო ვოცადუთ, ვუქადაგათ თინეფს, მიდგას შეფხვადუთ (2 ტიმ. 4:2).

18. მუშ კეთებას ელჷ ჩქინდე იესო ქრისტე?

¹⁸ მარდულეფ ვორეთ, ნამდა ჩქინ მეფე, იესო ქრისტე ჩქინდე ველჷ თიშე უმოსის, მუდგაშ კეთება შემლებნა დო ირნერო მოხვარნა გაწონასწორებულ თვალსაზრის მიღდან მუშობა დო მოსვანჯაშენ (ებრ. 4:15). თის ოკო, ნამდა მიფსვანჯათ, მუჟამსით მოსაჭირნა თენა. თეს გეძინელ, თიშ სურვილ რე დუდ გეიბჯუმუათინ თიშენ იმუფშუათ დო მონაწილება მიბღათ მოწაფეეფიშ მომზადებაშ საქმეს, მუთ ძალეფს მარზენა. უკულიან სტატიას გუვარჩიენთ მუს ორთ იესო, ნამდა დამირსხან საშინელ მონობაშე.