1. მუ პასუხიშმგებლობას არზენს იეჰოვა მშობლეფს?

იეჰოვაქ პირველ წყვილ თიშ სურვილით გაჭყჷ, ნამდა ჸუნდესკო სქუალეფ. ბიბლია გასაგებო იჩიებ: „სქუალეფ მემკვიდრეობა რე იეჰოვაშე“ (ფსალმ. 127:3). მუს ნიშნენს თენა? წერმიდგინით, ნამდა თქვან ხოლოშიან მეგობარქ დიდ რაოდენობაშ თანხა ჩუგაბარეს დო რთხის ქიმკოიჯინდესკო თიშა. მუჭო იგინანდით დუდის? ალბათ დაფასენდით, ნამდა მეგობარ თაშ გონდუნა. მარა, შილებე ჭიჭეს ნერვიანენდათ თიშენ, მუჭო თხილუათ თე ფარა. ჩქინ უხოლაშ მეგობარ, იეჰოვა, მშობლეფს ფარაშე ბრელით უმოს ძვირფას მუდგარენს არზენს. თენა რე პასუხიშმგებლობა, ნამდა ქიზრუნან სქუალეფიშ უსაფრთხოება დო ბედნერობაშე.

2. ნამ კითხვეფს გუვარჩიენთ?

² მიქ ოკო გინოჭყვიდას, ოკო ჸუნდან დოვარ დაქორწინებულ წყვილს სქუალეფ დო მუჟამ ჸუნდან? მუშ კეთება შეულებნა მშობლეფს, ნამდა ქიმეხვარან სქუალეფს, რდან ბედნერეფ? მორთ, გუვარჩუათ მუსხირენ ბიბლიურ პრინციპ, ნამუთ მეხვარებ დაქორწინებულ წყვილეფს, მიღან ბრძნულ გადაწყვეტილებეფ.

3. ა) მიქ ოკო გინოჭყვიდას ჩილ დო ქომონჯის ჸუნდან დოვარ სქუალეფ? ბ) ნამ ბიბლიურ პრინციპეფ ოკო გეთვალისწინან დაქორწინებულ ჩილ დო ქომონჯიშ მეგობრეფ დო ოჯახიშ წევრეფქ?

³ ნამთინე კულტურას ხალხ ფიქრენს, ნამდა ახალდაქორწინებულ ჩილ დო ქომონჯის მუთ შილებე მალას ოკო ჸუნდან სქუალეფ. თეს გეძინელ, შილებე ოჯახიშ წევრეფ ვარდა შხვეფ უჩემენა, ნამდა მალას გარჩქინან სქუალეფ. ართ აზიელ ჯიმა, ჯეთრო * იჩიებ: „კრებას, ნამთინე, მიდგას ბაღანეფ ჸუნს,  შხვა ჩილ დო ქომონჯეფს ირიათო თის ურაგადნა, ნამდა ჸუნდან ბაღანეფ“. ხოლო ართ აზიელ ჯიმა ჯეფრი რაგადანს: „ნამთინე კათა, ჩილ დო ქომონჯის ეჩიებნა, ნამდა დირჩინუნან მიკმალუაფარ ვაჸვენუნა“. მარა, არძაქ მუშით ოკო გინოჭყვიდას აჸვენუ დოვარ სქუალეფ. თენა მუნეფიშ გინაჭყვიდირალ დო მუნეფიშ პასუხიშმგებლობა რე (გალ. 6:5). მუშო ოკო რაგად, ოჯახიშ წევრეფს დო მეგობრეფს ოკონა, ნამდა ახალდაქორწინებულ ჩილ დო ქომონჯიქ ბედნერეფქ იჸუან. მარა, არძას ჯგირო ოკო არჩქილედას, ნამდა გადაწყვეტილება ჸუნდან დოვარ სქუალეფ, პირადო ჩილ დო ქომონჯიქ ოკო მიღას (1 თეს. 4:11).

4, 5. ნამ ჟირ მნიშვნელოვან საკითხშე ოკო იჩუან წყვილეფქ დო მუჟამ იჸუაფ ჯგირ თეშენ ჩიება? გენწყით.

⁴ დაქორწინებულ ჩილ დო ქომონჯიქ, მიდგაქ გინოჭყვიდეს სქუალეფ ჸუნდან ჟირ მნიშვნელოვან საკითხშე ოკო დეფიქრან: პირველ, მუჟამ ჸუნდან სქუალეფ? მაჟია, მუსხი სქუა ოკონა? მუჟამ ოკო იჩუან თინეფქ თე საკითხეფშენ? მუშენ რე თე ჟირ საკითხ თეცალ მნიშვნელოვან?

⁵ უმენტაშო, სოიშახ დექორწინებდანინ, წყვილ ჯგირს ქიმინუნს, მუჟამსით ართიანწკუმა ქიდირაგადუანა, ჸუნდან დოვარ სქუალეფ. თეს თიშენ იფჩიებუთ, ნამდა მნიშვნელოვან რე თე საკითხშენ ჟირხოლოს ართ აზრი უღდან. თეს გეძინელ, ოკო იჩუან, მუჟამ იჸუაფნა მზათ თე პასუხიშმგებლობაშო. ნამთინე ჩილ დო ქომონჯიქ გინოჭყვიდ ართ ვარდა ჟირ წანას ვა ჸუნდან ბაღანეფ, მუშენდა ბაღანეფს დიდ დრო დო ენერგია ოსაჭირნა. თეცალ წყვილეფ ფიქრენა, ნამდა ჭიჭე ხანს ბაღანეფ ვავენუნა-და, უმოს მეტ დრო აღვენუნა ართიანშო დო უმოსო ხოლო დეახლოებნა ართიანს (ეფეს. 5:33).

6. მუ გინოჭყვიდ ნამთინე წყვილქ თი მიზეზით, ნამდა ძნელ გინაღალარ დროს ფცხოვრენთ?

⁶ შხვა ქრისტიანეფქ გინოჭყვიდეს მიაჸუნესკო ნოეშ ქომოლსქუალეფიშ დო ნოსალეფიშ მაგალითის. თინეფს დაქორწინებაშ უკულ ხეთეშე ვაგურჩქინუნა სქუალეფ (დაბ. 6:18; 9:18, 19; 10:1; 2 პეტ. 2:5). იესოქ ჩქინ დრო „ნოეშ დღალეფს“ შეადარ; მუშო ოკო რაგად, ჩქი ფცხოვრენთ „მანგარ ძნელ გინაღალარ“ დროს (მათ. 24:37; 2 ტიმ. 3:1). თე მიზეზიშ გურშენ, ნამთინე წყვილქ გინოჭყვიდ, მუდგარენ პერიოდის ვა ჸუნდესკო სქუალეფ დო თეშნერო მეტ დრო დუთმესკო მსახურებას.

7. მუჭო შეულებ ლუკაშ 14:28, 29-ს დო იგავეფიშ 21:5-ის მოჩამილ პრინციპეფს წყვილეფიშ მოხვარა?

⁷ მუჟამსით ჩილ დო ქომონჯ გინოჭყვიდნა, ჸუნდან დოვარ ბაღანეფ დო მუსხი ბაღანა ჸუნდან, გონივრულო მიქციებნა ლუკაშ  14:28, 29-ს (წეკითხით) ინოჭარილ პრინციპის გეთვალისწინენან-და. ართ-ართ მხარე თინა რე, ნამდა თი კოჩცალო, მიდგას კოშკიშ შენება ოკო, წყვილქ ხოლო წინასწარ ოკო დეფიქრას უღნან დოვარ საჭირო სახსრეფ. გამოცდილ მშობლეფს მუნეფიშ გამოცდილებაშე შეულებნა გიწუან, ნამდა ბაღანეფიშ რდუალა ხვალე ფინანსურ ხარჯეფწკუმა ვარინ, დრო დო ენერგიაწკუმა რე დაკავშირებულ. ათეშენ, მნიშვნელოვან რე წყვილეფქ თეცალ კითხვეფ ქუდუსვან მუნეფიშ დუდის: „ჟირხოლოქ ოკო იმუფშუათო, ნამდა ოჯახიშ საჭიროებეფშო იბზრუნათ? ჟირხოლო ართნერო ფიფქრენთო, მუ მოსაჭირნა ოჯახის? ჟირხოლოს ომუშებელქ ქუმაჸუეს-და, მი მიკულუანს ბაღანეფს? მის აღვენუ გავლენა ჩქინ ბაღანეფიშ საქციელ დო აზროვნებაწკუმა?“. მუჟამსით წყვილეფ თე საკითხეფშე იჩიებნა, თეშნერო გიმირინუანა იგავეფიშ 21:5-ის (წეკითხით) ინოჭარილ სიტყვეფს.

8. მუ სირთულეეფს შილებე შეხვადას დაქორწინებულ წყვილქ დო მუშ კეთება შეულებ მოჸოროფე ქომონჯის?

⁸ ბაღანაშო საჭირო რე, ნამდა მშობლეფქ დრო დო ენერგია დუთმან, მუშენდა ბაღანა თეს იმსახურენს. ჩილ დო ქომონჯის ჭიჭე დროშ დინახალე მუსხირენ ბაღანაქ ართო ქეშეძინეს-და, შილებე გუჭირდან თითოულშა საჭირო ყურადღებაშ დათმებაქ. ნამთინე წყვილ, მიდგაქ თეცალ სიტუაციას ქუმოხვად, აღიარეს, ნამდა ვა უჩქნა მუ უწუან ვარდა მუჭო მექცუან ბაღანეფს. დიდაქ შილებე ემოციურო დო ფიზიკურო გეგნოშურდას. თინა შილებე თიცალ შულადირ რდას, ნამდა რეგულარულო გურაფაშ, ლოცვაშ დო ქადაგებაშ დუდ ვა უღდას. თეს გეძინელ, შილებე თიშო რთულ რდას ყურადღებით ურჩქილას კრებაშ შეხვალამას დო სარგებელ მიღას თევრეშე. მუშო ოკო რაგად, მოჸოროფე ქომონჯ მუთ შეულებ ირფელს გაკეთენს, ნამდა ქელუდირთას მუშ ოსურს, მუჟამსით ბაღანას მიკოჯინა ოსაჭირ, მუჭოთ კრებაშ შეხვალამეფს თეშ ჸუდეს ხოლო. მაგალთო, თის შეულებ ჸუდეშ საქმეეფს მეხვარას ოსურს. თეწკუმა ართო, თინა ირფელს გაკეთენს, ნამდა რეგულარულო ჩატარას ოჯახურ თაყვანიშმცემა დო ოჯახიქ სარგებელ მიღას თიშე. თეს გეძინელ, თინა ოჯახიშ წევრეფწკუმა ართო რეგულარულო ქიმსახურენს.

9, 10. მუ ოკო აკეთან მშობლეფქ, ნამდა ქიმეხვარან მუნეფიშ სქუალეფს?

⁹ მუშ კეთება შეულებნა მშობლეფს, ნამდა ქიმეხვარან მუნეფიშ სქუალეფს, უჸორდან იეჰოვა? მუჭო შეულებნა დეცვან სქუალეფ ქვეყნიერებაშ გლახა გავლენაშე? მორთ გუვარჩუათ, მუ ნაბიჯეფ ოკო გინოდგან მშობლეფქ.

¹⁰ ლოცვას იეჰოვას ქოთხით მოხვარა. ქიგიშინით სამსონიშ მშობლეფიშ, მანოახიშ დო თიშ ოსურიშ მაგალით. მუჟამსით მანოახიქ  ქიგეგ, ნამდა სქუა აჸვენუდეს, თიქ იეჰოვას ქოთხუ ხემძღვანელობა ბაღანაშ ორდალო.

11. მუჭო მიაჸუნ ნამთინე მშობელქ მანოახიშ მაგალითის, ნამუთ მსაჯულეფიშ 13:8-ს რე მოჩამილ?

¹¹ ნიჰადი დო ალმაქ, ნამუთ ბოსნია-ჰერცოგოვინას ცხოვრენა, მიაჸუნეს მანოახიშ მაგალითის. თინეფ იჩიებნა: „მანოახცალო, ჩქი ხოლო ფთხინდით იეჰოვას ხემძღვანელობას, ნამდა ჯგირ მშობლეფ პჸოფედითკო. დო იეჰოვა შხვადოშხვანერო პასუხენდჷ ჩქინ ლოცვეფს, მინშა ბიბლიაშ საშვალებათ, მინშა ბიბლიურ ლიტერატურათ, კრებაშ შეხვალამეფით დო კონგრესეფით“ (წეკითხით მსაჯულები 13:8).

12. მუ მაგალით მეჩეს იოსებ დო მარიამქ მუნეფიშ სქუალეფს?

¹² ქუდაგურეთ პირად მაგალითით. მნიშვნელოვან რე მუს იჩიებუთ, მარა ბაღანაწკუმა უმოს დიდ გავლენა თის აღვენუ, მუდგას თქვანდე ძირნა. შემლებნა დარწმუნებულ ვორდათ, ნამდა იოსებ დო მარიამ ჯგირ მაგალითის ქიმეჩანდეს მუნეფიშ ბაღანეფს დო თინეფ შქას იესოს ხოლო. იოსებ დღაშ დო სერით მუშენდჷ ოჯახ გეიჯუმუკონ. თეს გეძინელ, ოხვარუდ ოჯახიშ წევრეფს, ქიჸოროფესკო იეჰოვაშ მსახურება (კან. 4:9, 10). მართალ რე, იოსების მოსეშ კანონით ვემეთხიებუდ, „ირ წანას“ ოჯახ ხოლო მიდუჸუნაფუდკო იერუსალიმშა, ნამდა პასექ აღნიშნესკო, მარა თის იშენით გილაჸუნდჷ თექ მუშ ოჯახ (ლუკ. 2:41, 42). თი დროს ნამთინე ოჯახიშ დუდ შილებე ფიქრენდჷ, ნამდა ოჯახწკუმა ართო ულა მანგარ რთულ რდუ დო თეს გეძინელ, დიდ დრო დო ხარჯეფწკუმა იჸუაფუდ დაკავშირებულ. მარა იოსებ აფასენდჷ სულიერ საკითხეფს დო მუშ სქუალეფს ხოლო თეს ოგურუანდჷ. თეს გეძინელ, მარიამს ჯგირო უჩქუდ წმინდა წერილეფ დო მუშო ოკო რაგად, მარიამ მუშ სიტყვეფ დო საქმეეფით ქუდაგურუანდჷ სქუალეფს, უჸორდესკო ღორონთიშ სიტყვა.

13. მუჭო მიაჸუნ ართ ჩილ დო ქომონჯიქ, იოსებ დო მარიამიშ მაგალითის?

¹³ ჟიშე მოშინაფილ ნიჰად დო ალმას ოკოდეს, მიაჸუნესკო იოსებ დო მარიამიშ მაგალითის. მუჭო მეხვარ თექ თინეფს, მუნეფიშ სქუას ქუდაგურესკო იეჰოვაშ ჸოროფა დო მსახურება? თინეფ იჩიებნა: „ირნერო ვეცადით ჩქინ ცხოვრებაშ წესით ქუვოძირეთკო ჩქინ სქუას, მუ ჯგირ რე იეჰოვაშ პრინციპეფით ცხოვრება“. ნიჰად გეუძინანს: „სი ოკო რდე თიცალ პიროვნება, მუნერით გოკო სქან სქუა რდას“.

14. მუშენ ოკო უჩქუდან მშობლეფს მიწკუმა უღნა ურთიერთობა მუნეფიშ ბაღანეფს?

¹⁴ ქიმეხვარით თქვან ბაღანეფს, გეგშაგორან ჯგირ მეგობრეფ. დიდა დო მუმას ოკო უჩქუდას, მიწკუმა უღჷ ურთიერთობა მუნეფიშ ბაღანეფს დო მუს ორთნა თინეფ. თეშა მიშურს თიშ რჩქინა ხოლო, მიწკუმა უღნა ბაღანეფს ურთიერთობა სოციალურ ქსელეფიშ ვარდა მობილურ ტელეფონიშ საშვალებათ. თეცალ ურთიერთობეფს გავლენა უღჷ ბაღანეფიშ აზროვნება დო საქციელწკუმა (1 კორ. 15:33).

15. მუშ გურაფა შეულებნა მშობლეფს ჯესიშ მაგალითშე?

¹⁵ მუ ოკო აკეთან მშობლეფქ, მუჟამსით კომპიუტერეფიშ დო მობილურ ტელეფონეფიშ ბრელ მუთუნ ვარჩქილენა? ართ ფილიპინელ მუმა, ჯესი იჩიებ: „ჩქი ელექტრონულ მოწყობილობეფიშ ბრელ მუთუნ ვა მარჩქილენა. მარა თეს ვა უცილებ ჩქინდა, ნამდა ჩქინ სქუალეფს ქუვოძირეთკო თი საფრთხეეფ, ნამდგაქ შილებე ელექტრონულ მოწყობილობეფიშ გიმორნაფას მაჸუნას“. ჯესის ვაუვარიებ ბაღანეფშა ელექტრონულ მოწყობილობეფიშ გიმორნაფა თი მიზეზით, ნამდა მუს თეშ ბრელ მუთუნ ვარჩქილედ. თინა ენწყუნს: „მა ვურაგადუდ სქუალეფს, ნამდა ელექტრონულ მოწყობილობეფიშ გიმორნაფა ჯგირ საშვალება რე ახალ ნინაშ დაგურაფალო, კრებაშ შეხვალამეფშო მამზადებელო დო ბიბლიაშ ირდღაშიან  კითხირშო“. თქვა ხოლო მშობლეფ ქორეთ-და, გარჩიებულ ქუგაფნანო თქვან ბაღანეფწკუმა ჩქინ ვებგვერდ jw.org^®-იშ ართ-ართ განყოფილებას მოჩამილ მასალა მესიჯეფიშ ჭარუაშ დო სურათეფიშ გედვალაშ გურშენ? (განყოფილება „ახალგაზრდები“). ქუჯინით დო გარჩითო ვიდეოეფ „სი აკონტროლენქო ელექტრონულ მოწყობილობეფს დო ვარ თინა გაკონტროლენს სი?“ დო „ვემშაიტყურუას სოციალურ ქსელქ“? * თე მასალაქ შილებე მიგეხვარან ქუდაგურუათ თქვან ბაღანას, მუჭო გიმირინუას გონივრულო ელექტრონულ მოწყობილობეფ (იგავ. 13:20).

16. მუ აკეთ ბრელ მშობელქ დო მუ შედეგიქ მაჸუნ თეს?

¹⁶ ბრელ მშობელ ირნერო ოცად, მუნეფიშ სქუალეფს თინეფწკუმა უღდან ურთიერთობა, მით ღორონთიშ მსახურებას ჯგირ მაგალითის მეჩანს. მაგალთო, ართ წყვილ, დენი დო ბელა, ნამუთ კოტ-დ’ ივუარს ცხოვრენა, ხშირას აპეჯენდეს ჸუდეშა რაიონულ ზედამხედველეფს. დენი იშინანს: „თექ ჯგირო იმოქმედ ჩქინ ბოშწკუმა. თიქ პიონერობა ქიდიჭყჷ დო ასე რაიონულ ზედამხედველიშ დამხმარეთ მსახურენს“. შეილებნანო თქვა ხოლო მოუნწყუათ თეცალ გარემო თქვან ბაღანეფს?

17, 18. მუჟამ ოკო დიჭყან მშობლეფქ ბაღანეფშა დოგურაფა?

¹⁷ მუთ შილებე მალას დუჭყით გურაფა თქვან ბაღანეფს. მუთ უმოს ადრე დიჭყანს მშობელ ბაღანაშა გურაფას, თით უმოს უჯგუშ იჸუაფ (იგავ. 22:6). ქიგიშინით ტიმოთეშ მაგალით, მუჟამსით თიქ გემწირდჷ, პავლეწკუმა ართო მოგზაურენდჷ. ტიმოთეშ დიდა, ევნიკე დო თიშ ბები ლოისი, თის „ჭიჭანობაშე“ ოგურუანდეს (2 ტიმ. 1:5; 3:15).

¹⁸ შხვა წყვილს, ჯონი დო პაულას, ნამუთ კოტ-დ’ ივუარს ცხოვრენა, ამშვ სქუა ჸუნა დო თინეფს იეჰოვაშ ჸოროფა დო მსახურება ქუდაგურეს. მუქ მეხვარ თინეფს? თინეფქ მიაჸუნეს ევნიკე დო ლოისიშ მაგალითის. თე ჩილ დო ქომონჯ იჩიებ: „ხეთეშე, მუთ ბაღანეფქ შემეძინეს, თინეფს გონებაშა ენუდვანდით ღორონთიშ სიტყვას“ (კან. 6:7).

19. მუს ნიშნენს ბაღანეფს „გონებაშა ქენუდვათ“ ღორონთიშ სიტყვა?

¹⁹ მუს ნიშნენს ბაღანეფს „გონებაშა ქენუდვათ“ ღორონთიშ სიტყვა? „გონებაშა ენოდვალა“ ნიშნენს, „ოგურუე დო ხშირას გამეორებათ ქუგაშინე ნაგურეფ“. თეშ კეთებაქ  ქეშიალებუანინ, მშობლეფქ რეგულარულო ოკო დუთმან დრო ბაღანეფწკუმა ურთიერთობას. მინშა შილებე მშობლეფშო ადვილ ვა რდას ბაღანეფშა ართ დო იგივეშ გამეორება. მარა მშობლეფქ ოკო ეცადან, თენა მირჩქინან საშვალებათ, ნამუთ მეხვარებ თინეფიშ ბაღანეფს, ქინანჭან ღორონთიშ სიტყვას დო გეგმირინუან თინა.

20. გენწყით, მუჭო შილებე ფსალმუნიშ 127:4-იშ გიმორნაფა ბაღანეფიშ რდუალაშ დროს.

²⁰ ჯგირო იჩინენდათ თქვან ბაღანას. 127-ა ფსალმუნ ბაღანეფს ისარეფს ადარენს (წეკითხით ფსალმუნი 127:4). ისარ შილებე შხვადოშხვა მასალაშე დამზადან დო შხვადოშხვა ზომაშ რდას, თეშნერო, არძა ბაღანა ვა რე ართნერ. თაშ ნამდა, მშობლეფქ ოკო გინოჭყვიდან, მუჭო მეუდირთან თითოულ სქუას. ართ წყვილქ, ნამუთ ისრაელს ცხოვრენს, ჟირ ბაღანა მორდჷ დო თინეფს იეჰოვაშ მსახურება ქუდაგურეს. თე წყვილ იჩიებ მუქ მეხვარეს სქუალეფიშ რდუალას: „თითოულ სქუაწკუმა ცალ-ცალკე ვატარენდით ბიბლიაშ გურაფას“. მუშო ოკო რაგად, არძა ოჯახიშ დუდიქ პირადო ოკო გინოჭყვიდას, ქორენ დოვარ შეიოლებერ ვარდა აუცილებერ, ნამდა თითოულ ბაღანას ცალ-ცალკე ჩუტარან ბიბლიაშ გურაფა.

21. მუჭო ოხვარ იეჰოვა მშობლეფს?

²¹ შილებე მინშა მშობლეფშო რთულ რდას ოგურუან მუნეფიშ სქუალეფს, მარა ბაღანეფ ძღვინ რენა იეჰოვაშე. თინა ირიათო მზათ რე ქიმეხვარას მშობლეფს. თინა შურდოგურით ირჩქილე მშობლეფიშ ლოცვეფს. თეს გეძინელ, პასუხენს თინეფიშ ლოცვეფს ბიბლიაშ, პუბლიკაციეფიშ, კრებას რენან თი გამოცდილ მშობლეფიშ მაგალითით დო რჩევეფიშ საშვალებათ.

22. მუ რე თი არძაშ უჯგუშ მუდგარენეფ, მუდგაშ მეჩამა მშობლეფს ბაღანეფშა შეულებნა?

²² ნამთინეშ აზრით, ბაღანაშ რდუალა 20-წანიან პროექტ რე, მარა მშობლეფ ირიათო მშობლეფ იჸუაფნა. არძაშ უჯგუშ მუდგარენ, მუდგაშ მეჩამა მშობლეფს შეულებნა, რე ჸოროფა, დრო დო ბიბლიაშა გერსხილ გურაფა. ბაღანეფ შხვადოშხვანერო ღებულენა გურაფას. მარა ბრელ, მით თიცალ მშობლეფიშ ნარდჷ რე, მიდგას იეჰოვა უჸორს, ართ და, ანაცალო ფიქრენს: „მუჟამსით იფშინანქ, მუჭო მოგურუანდეს ჩქიმ მშობლეფ, მანგარ მარდულ ვორექ, ნამდა თინეფქ გიმოწურეს დო ქუდგმოგურეს იეჰოვაშ ჸოროფა. თინეფქ ხვალე სიცოცხლე ვარინ, აზრით ეფშა ცხოვრება მაჩუქეს“ (იგავ. 23:24, 25). თაშ ბრელ ჩქინ და დო ჯიმა ფიქრენს.