1, 2. მუჭოთ ართ ჯიმაშ მაგალითშე იძირე, მუ ოკო ვაკეთათ თითოულქ?

იეჰოვაშ მოწმეეფიშ ოჯახის ირდითო? თაშ ქორენ-და, ირიათო რშუდან, იეჰოვაწკუმა პირად ურთიერთობა მშობლეფშე მემკვიდრეობათ ვეგნურს. ვა უღჷ მნიშვნელობა ჩქინ მშობლეფ იეჰოვაშ მოწმეეფ რენა დო ვარ, თითოულქ მუშით ოკო გავითარას იეჰოვაწკუმა ხოლოშიან ურთიერთობა.

² გუვარჩუათ ართ ჯიმაშ მაგალით. თიქ მოწმეეფიშ ოჯახის მირდჷ, მარა, ახალგაზრდობას ხოლოშიან ურთიერთობა ვა უღუდ იეჰოვაწკუმა. თინა იჩიებ: „იეჰოვას თიშენ ვომსახურუდ, ნამდა მოკოდ თინა ვაკეთკო, მუდგას ჩქიმ ოჯახ ორთუდ“. მარა, თე ჯიმაქ გეგნოჭყვიდ დრო დუთმუკო ღორონთიშ სიტყვაშ კითხირს დო ნაკითხერშე ფიქრის. თეს გეძინელ, თიქ უმოს ხშირაშო ლოცვა ქიდიჭყჷ. მუ რდუ თე ირფელიშ შედეგ? თინა იჩიებ: „ქიმეფხვად, ნამდა ჩქიმ ძვირფას მუმა, იეჰოვაწკუმა დაახლოება ქუმოკოდ-და, თენა ჩქიმით ოკო მიკეთებუდკო“. თე ჯიმაშ მაგალით მუსხირენ მნიშვნელოვან კითხვას მირჩქინანა: მუ განსხვავება რე თიშ შქას მიჩქუდან მი რე იეჰოვა დო ჯგირო იფჩინენდათ თის? მუშ კეთება შემლებნა, ნამდა ჯგირო გეფჩინებაფუათ იეჰოვა?

3. მუ განსხვავება რე თიშ შქას, მიჩქუდან მი რე იეჰოვა დო ჯგირო იფჩინენდათ თის?

³ შილებე ფიფქრენდათ, ნამდა იფჩინენთ ღორონთის, მუშენდა მიჩქნა თიშ სახელ დო მუსხირენ მუდგარენ, მუთ თქუ ვარდა აკეთ. მარა იეჰოვაშ ჯგირო გაჩინებაფაშა უმოს მეტ მიშურს. პირველ, ჩქი დრო ოკო გეგმურთათ იეჰოვაშ დო თიშ ძვირფას თვისებეფიშ გურშენ რჩქინაშ მეღებას. ხვალე თეშ  უკულ შემალებენა ქიგებგათ, მუ გერე იეჰოვაშ სიტყვაშ დო საქმეშ უკახალე. თენა მიმეხვარებნა, ქიგებგათ ქუმოწონს დოვარ იეჰოვას თინა, მუდგას იფჩიებუთ ვარდა ვორთუთ. ჩქი ქიგებგით მუშ კეთებას ელჷ იეჰოვა ჩქინდე დო ათეშენ საჭირო რე თიშ შესაბამისო იმოფქმედათ.

4. მუშა დუმარწმუნენა, ბიბლიას ენოჭარილ არასრულყოფილ ქომოლკოჩეფიშ მაგალითეფიშ გარჩიება?

⁴ იეჰოვაშ მსახურება მოკონან თიშენ, ნამთინექ შილებე ქუგმაძიცუან დო უმოსო ქიმეწინააღმდეგან, მუჟამსით კრებაშ შეხვალამეფშა დასწრებას დიბჭყანთ. მარა, იეჰოვას ქიმვენდებუთ-და, თინა ხვალე დღას ვა დომტენა. თეშნერო, დიბჭყანთ იეჰოვაწკუმა თიცალ მეგობრობაშ გავითარებას, ნამუთ მარადიულო გეგრძელებ. მართალო შემლებნანო თეცალ ხოლოს გეფჩინებაფუათ იეჰოვა? მუშო ოკო რაგად, ქო! თეს ამტკიცენს თიცალ არასრულყოფილ ქომოლკოჩეფიშ მაგალით, მუნერეფით რდეს მოსე დო მეფე დავით. თინეფიშ მაგალითიშ გარჩიებაშ დროს პასუხის ქიმეფჩანთ ჟირ კითხვას: მუჭო გეჩინებაფეს თინეფქ იეჰოვა? მუშ გურაფა შემლებნა თინეფიშ მაგალითშე?

5. მუ ისხუნუ მოსექ?

⁵ მოსექ ღორონთიშ მსახურება ისხუნუ. მუჟამსით თინა, სოდგარენ 40 წანერ რდუ, ისხუნუ ღორონთიშ ხალხწკუმა, ისრაელეფწკუმა ჸოფედკო ვინემ „ფარაონიშ ძღაბიშ სქუაშ სახელ ქიგედვალუდკო“ (ებრ. 11:24). მოსექ მაღალ მდგომარეობაშე თქუ ვარია. მუჟამსით თიქ ისრაელეფიშ გვერდით ქიგედირთჷ, უჩქუდ, ნამდა თეშ გურშენ ფარაონ მანგარო გერისხებუდ. ფარაონ ძალიერ მეფე რდუ დო ეგვიპტელეფ თის ღორონთო მირჩქინანდეს. თე ირფელქ ქაძირუ, ნამდა მოსეს მანგარ რწმენა უღუდ დო ონდუდ იეჰოვას. ზუსტას თექ მეხვარ თის, ხოლოშიან ურთიერთობა უღუდკო იეჰოვაწკუმა, ნამუქით თიშ ცხოვრებაშ ბოლოშახ გეგრძელ (იგავ. 3:5).

6. მუშ გურაფა შემლებნა მოსეშ მაგალითშე?

⁶ მუს ბგურაფლენთ თავრეშე? მოსეცალო, არძაქ ოკო მიბღათ გადაწყვეტილება: იფსხუნუანთო ღორონთიშ მსახურებას დო თიშ ხალხწკუმა ურთიერთობას? ღორონთიშ მსახურებაშ გურშენ შილებე მსხვერპლშა მაჸუან ოულარქ. თეს გეძინელ, შილებე ქიმეწინააღმდეგან თინეფქ, მით ვეჩინენს იეჰოვას. მარა ჩქინ ზეციერ მუმას ქიმვენდებუთ-და, შემლებნა დარწმუნებულ ვორდათ, თინა ქიმმეხვარებნა!

7, 8 მუშ გურაფას აგრძელენდჷ მოსე?

⁷ მოსე აგრძელენდჷ იეჰოვაშ თვისებეფიშ გურშენ გურაფას დო თიშ ნებაშ შესრულებას. მაგალთო, მუჟამსით იეჰოვაქ მოსეს დავალ, ისრაელიშ ეგვიპტეშე გიშაჸონაფა, მოსეს მუშ დუდიშ იმენდ ვა უღუდ დო იეჰოვას მუსხირენშა უწუ, ნამდა თე დავალებაშო მომზადებულ ვარდჷ. ღორონთიშ პასუხშე ქიძირ, ნამდა თის არჩქილედ მუს გინაფლენდჷ მოსე დო ქიმეხვარ თის (გამ. 4:10—16). შედეგო, მოსექ ფარაონს გეგნოჩ გასამართლებაშ გურშენ ცნობა. უკულ მოსექ ქოძირ, მუჭო გიმირინუ იეჰოვაქ მუშ ძალა, მუჟამსით ისრაელეფ გეგნასქილიდუ, მარა ფარაონ მუშ ჯარიშკოჩეფწკუმა ათრო განადგურ უკულ ჭითა ზღვას (გამ. 14:26—31; ფსალმ. 136:15).

⁸ თიშ უკულ, მუთ მოსექ ისრაელეფ გეგშეჸონ ეგვიპტეშე, თინეფ ირიათო უკმაყოფილებას გიმოხანტუნდეს. თე დროს მოსე ორწყედ მუშმადიდა მოთვინებას გიმირჩქინანდჷ იეჰოვა თი ხალხწკუმა, მით მონობაშე გათავისუფალ (ფსალმ. 78:40—43). თეს გეძინელ, მოსე ორწყედ იეჰოვაშ განსაკუთრებულ თანდაბლობას, მუჟამსით თიქ მოსეშ ნარაგადიშ გურშენ მუშ გადაწყვეტილება დოთირუ (გამ. 32:9—14).

9. მუჭოთ ებრაელეფიშ 11:27-ის ჭარჷ, მუნერ ხოლოშიან ურთიერთობა უღუდ მოსეს იეჰოვაწკუმა?

 ⁹ ეგვიპტეშე გიშულაშ უკულ, მოსეს თიცალ ხოლოშიან ურთიერთობა უღუდ იეჰოვაწკუმა, ითამ ორწყედკო მუშ ზეციერ მუმას (წეკითხით ებრაელები 11:27). ბიბლიაშე ბგებულენთ მუნერ ხოლოშიან ურთიერთობა უღდეს თინეფს ართიანწკუმა. თექ ჭარჷ: „იეჰოვა მოსეს პირისპირ ურაგადუდ, მუჭოთ კოჩ ურაგად კოჩის“ (გამ. 33:11).

10. მუ ოკო ვაკეთათ, ნამდა იეჰოვა ჯგირო გეფჩინებაფუათ?

¹⁰ მუს ბგურაფლენთ თავრეშე? იეჰოვა ჯგირო გეფჩინებაფუათინ, ხვალე თიშ თვისებეფიშ გურშენ მეტიშ გაგება ვა რე დასაბაღ. ჩქი ოკო შევასრულათ თიშ ნება. ამდღა იეჰოვაშ „ნება რე არძანერ კოჩიქ გეგნოსქიდას დო ჭეშმარიტებაშ ზუსტ რჩქინა მიღას“ (1 ტიმ. 2:3, 4). ღორონთიშ ნებაშ შესრულებაშ ართ-ართ საშვალება რე შხვეფს იეჰოვაშ გურშენ ვოგურუათ.

11. მუჭო იფჩინებაფუანთ იეჰოვას უჯგუშო, მუჟამსით შხვეფს თიშ გურშენ ვოგურუანთ?

¹¹ ხშირას, მუჟამსით შხვეფს იეჰოვაშ გურშენ ვოგურუანთ, უჯგუშო იფჩინებაფუანთ ღორონთის. მაგალთო, ჩქი არგამათ ვორწყეთ, ნამდა იეჰოვა მიშურს ხალხიშ მდგომარეობაშა, მუჟამსით თიშ ხემძღვანელობათ ვუქადაგუთ თინეფს, მიდგას ღორონთწკუმა დაახლოება ოკო (იოან. 6:44; საქ. 13:48). ჩქი ვორწყეთ ღორონთიშ სიტყვაშ ძალას, მუჟამსით თინეფ, მიდგას ბიბლიას ვოგურუანთ თირანა ცხოვრებას დო ახალ პიროვნებათ გინირთუნა (კოლ. 3:9, 10). თეს გეძინელ, ვორწყეთ მუჭო გიმირჩქინანს ღორონთ ხალხწკუმა მოთვინებას, მუჟამსით ბრელშა არზენს საშვალებას გეჩინებაფუან თინა დო გინასქიდან (რომ. 10:13—15).

12. მუჭოთ გამოსვლაშ 33:13-ს ჭარჷ, მუ თხუ მოსექ ღორონთის დო მუშენ?

¹² მოსე მანგარო აფასენდჷ იეჰოვაწკუმა მეგობრობას. თიშ უმკუჯინუო, ნამდა მოსე იეჰოვაშ სახელით ბრელ ძალიერ საქმეეფს ორთუდ, იშენით თანდაბლურო ქოთხუ ღორონთის, თიშა მუშ უჯგუშო გაჩინებაფაშ ნება ქიმუჩამუდკო (წეკითხით გამოსვლა 33:13). მოსე სოდგარენ 80 წანას გინოჩილათირ რდუ, მუჟამსით თენა ითხუ, მარა თის ჯგირო უჩქუდ, ნამდა ხოლო ბრელ მუდგარენ ოკო დიგურუკო მუშ ზეციერ მუმაშ გურშენ.

13. მუჭო შემლებნა ვოძირათ, ნამდა ვაფასენთ იეჰოვაწკუმა მეგობრობას?

¹³ მუს ბგურაფლენთ თავრეშე? ვა უღჷ მნიშვნელობა, მუსხი ხან რე იეჰოვას ვომსახურუთ, ჩქი ირიათო მანგარო ოკო ვაფასენდათ იეჰოვაწკუმა მეგობრობას. ართ-ართ საშვალება თეშ ოძირაფალო თინა რე, ნამდა ლოცვაშ საშვალებათ დურაგადუათ თის.

14. მუშენ რე ლოცვა მნიშვნელოვან, ნამდა იეჰოვაშ გურშენ უმოს მეტ ქიგებგათ?

¹⁴ მტკიცე მეგობრობას ხეს უნწყუნს ჯგირ კომუნიკაცია. თეშნერო, ღორონთწკუმა ხოლოშიან მეგობრობა ქუგოკონან-და, ხშირას ილოცით დო დღას ვემგერიდან თიშა თქვან გრძნობეფიშ დო ფიქრეფიშ გაზიარებაქ (ეფეს. 6:18). კრისტა, ნამუთ თურქეთის ცხოვრენს, იჩიებ: „ირიათო, მუჟამსით იეჰოვას ლოცვაშ დროს ჩქიმ ფიქრეფს ვუზიარენქ დო ვორწყექ მუჭო მოხვარ, თიშ მიმართ ჩქიმ ჸოროფა დო ნდობა უმოსო იმანგარებ. თიშ ძირაფაქ, მუჭო პასუხენს იეჰოვა ჩქიმ ლოცვეფს, მიმეხვარ თინა ჩქიმ მუმა დო მეგობარ ჸოფედკო“.

15. მუ თქუ იეჰოვაქ მეფე დავითიშ გურშენ?

¹⁵ მეფე დავითიქ თი ხალხ შქას დებად, ნამუთ იეჰოვაშა რდუ მეძღვინელ. მარა დავით თიშენ ვამსახურუდ იეჰოვას, ნამდა მუშ მშობლეფ ომსახურდეს თის. თიქ მუშით გავითარ პირად ურთიერთობა იეჰოვაწკუმა  დო ღორონთის ხოლო მანგარო უჸორდჷ დავით. იეჰოვაქ დავითიშ გურშენ თქუ, ნამდა თინა რდუ „მოსაწონ კოჩ“ (საქ. 13:22). მუჭო დეახლოვ დავითიქ იეჰოვას?

16. მუს გურაფლენდჷ დავით იეჰოვაშ გუნაჭყეფშე დაკვირებათ?

¹⁶ დავით გუნაჭყეფშე დაკვირებათ გურაფლენდჷ იეჰოვაშ გურშენ. მუჟამსით დავით ახალგაზრდა რდუ, თინა დიდ დროს ატარენდჷ ჸუდეშ გალე, მუშენდა ზრუნენდჷ მუამუშიშ შხურეფშე. შილებე თიქ თე დროს დიჭყჷ იეჰოვაშ გუნაჭყეფშე დაფიქრება. მაგალთო, მუჟამსით სერით კურცხას რდუ, თინა ხვალე ანთასობით მურიცხის ვაძირუნდუნ, თინა ბრელ მუდგარენს ქიგეგენდჷ ღორონთიშ თვისებეფიშ გურშენ, ნამუთიქ თე ირფელ გაჭყჷ. დავითიქ ჭარჷ: „ღორონთიშ დიდებაშე იჩიებ ზეცა დო სივრცე თიშ ხეშ გუნაჭყეფშე რაგადანს“ (ფსალმ. 19:1, 2). მუჟამსით დავით ოკვირუდ, მუნერ სარკოთ აფუდ ღორონთის გოჭყაფილ ადამიანეფ, თინა ორწყედ იეჰოვაშ დიდებულ სიბრძნეს (ფსალმ. 139:14). მუჟამსით დავით ფიქრენდჷ იეჰოვაშ გუნაჭყეფშე, გინაფლენდჷ მუშმაჭიჭა რდუ ღორონთწკუმა შედარებით (ფსალმ. 139:6).

17. მუს დიბგურუანთ გუნაჭყეფშე დაკვირებათ?

¹⁷ მუს ბგურაფლენთ თავრეშე? დრო გეგმურთით იეჰოვაშ სარკო გუნაჭყეფშე დაკვირებას. ირდღას დეფიქრით, მუს გურაფლენთ იეჰოვაშ გურშენ თიშ გუნაჭყეფშე; მაგალთო, მცენარეეფშე, ცხოველეფშე დო ადამიანეფშე. თეშნერო, ირდღას მუდგარენ ახალს დიგურუანთ თქვან მოჸოროფე მუმა იეჰოვაშ გურშენ (რომ. 1:20). შედეგო, ირდღას ქოძირუნთ, მუჭო იმანგარებ თქვან ჸოროფა იეჰოვაშ მიმართ.

18. მუჭოთ მა-18 ფსალმუნშე ვორწყეთ, მუ არჩქილედ დავითის?

¹⁸ დავითის უჩქუდ, ნამდა იეჰოვა ოხვარუდ. მაგალთო, მუჟამსით თინა მუამუშიშ შხურეფს იცვენდჷ ლომშე დო თუნთშე, ჯგირო უჩქუდ, ნამდა იეჰოვა ოხვარუდ, გიორჯგინკო თე მტაცებელ ცხოველეფს. თეს გეძინელ, მუჟამსით დავითიქ გოლიათის გიორჯგინ, არგამათ ქოძირ, ნამდა იეჰოვა ოხვარუდ თის (1 სამ. 17:37). მუჟამსით თინა მეფე საულს ატყობუდ, უჩქუდ, ნამდა იეჰოვა იცვენდჷ (ფსალმ. 18, ეპიგრაფი). დავით ამაყ ქოჸოფედკონ, თე ირფელს მუშ დუდის ქიმიოჭარანდჷ. მარა თინა თანდაბალ რდუ დო ათეშენ, ჯგირო არჩქილედ, ნამდა იეჰოვა ოხვარუდ თიშ კეთებას, მუდგა მუშით ვეშიალებედ (ფსალმ. 138:6).

19. მუშ გურაფა შემლებნა დავითიშ მაგალითშე?

¹⁹ მუს ბგურაფლენთ თავრეშე? ჩქი იეჰოვაშა უბრალოთ მოხვარაშ თხუალაშე უმოს მეტ ოკო ვაკეთათ. თეს გეძინელ, ოკო მიჩქუდან, მუჟამ დო მუჭო მოხვარნა ღორონთ. ჩქინ შეზღუდულ შესაძლებლობეფს თანდაბლურო ქუვაღიარენთ-და, არგამათ ქობძირუნთ, ნამდა იეჰოვა მოხვარნა თიშ კეთებას, მუდგა ჩქინით ვეშმალებენა. ირიათო, მუჟამსით ვორწყეთ, მუჭო მოხვარნა იეჰოვა, თიწკუმა ჩქინ ურთიერთობა უმოსო იმანგარებ. ართ ჯიმა, ისააკი, ნამუთ ფიჯის ცხოვრენს, ბრელ ხან რე იეჰოვას ომსახურ. თიქ დერწმუნ, თე სიტყვეფიშ ჭეშმარიტებას. თინა იჩიებ: „ულირ ცხოვრებას იფშინანქინ, ვორწყექ, მუჭო მოხვარუდ იეჰოვა თი დროშე მოჸუნაფილ, მუთ ბიბლიაშ გურაფა დიბჭყჷ დო თინა ამდღა ხოლო მოხვარ. შედეგო, იეჰოვა ჩქიმო უმოს რეალურ პიროვნება რე“.

20. მუ აკეთ დავითიქ, ნამდა ხოლოშიან ურთიერთობა უღუდკო იეჰოვაწკუმა დო მუშ გურაფა შემლებნა თავრეშე?

²⁰ დავით თი თვისებეფს გიმირჩქინანდჷ, ნამუთ იეჰოვას უღჷ. იეჰოვაქ თეშ შეფქნეს, ნამდა შემლებნა თი თვისებეფ გიმიფრჩქინათ, ნამუთ თის უღჷ (დაბ. 1:26). მუთ უმოს მეტის გებგენთ იეჰოვაშ თვისებეფიშ გურშენ, თით უჯგუშო შემალებენა მივაჸუნათ თიშ მაგალითის. დავითიქ ჯგირო გეჩინებაფუ  მუშ ზეციერ მუმა, ათეშენ, შხვეფწკუმა ურთიერთობაშ დროს შეულებუდ მიაჸუნკო თიშ მაგალითის. გუვარჩუათ თეშ ართ-ართ მაგალით. მართალ რე, დავითიქ შეცოდ იეჰოვას, მუჟამსით ბათ-შებაწკუმა იმრუშ დო უკულ, თიშ ქომონჯ დაჸვილაფუ, მარა იეჰოვაქ იშენით გეგმირჩქინ ჭყოლოფა დავითწკუმა (2 სამ. 11:1—4, 15). იეჰოვაქ თენა თიშენ აკეთ, ნამდა დავით თიშ მაგალითის მეჸუნდჷ დო ჭყოლოფას გიმირჩქინანდჷ შხვეფწკუმა. ისრაელეფს მანგარო უჸორდეს დავით, მუშენდა თის ჯგირ ურთიერთობა უღუდ იეჰოვაწკუმა. თეს გეძინელ, იეჰოვაქ გიმირინუ თინა, მუჭოთ მაგალით ისრაელიშ შხვა მეფეეფშო (1 მეფ. 15:11; 2 მეფ. 14:1—3).

21. მუჭოთ ეფესოელეფიშ 4:24 დო 5:1-ის ჭარჷ, მუ ჯგირ შედეგეფ მაჸუნუ, მუჟამსით ღორონთიშ მაგალითის მივაჸუნუთ?

²¹ მუს ბგურაფლენთ თავრეშე? ჩქი ოკო მივაჸუნათ ღორონთიშ მაგალითის. თეშნერო მოქციება ჩქინო ჯგირ რე დო თეს გეძინელ, მოხვარნა უჯგუშო გეფჩინებაფუათ იეჰოვა. მუჟამსით თი თვისებეფს გიმიფრჩქინანთ, ნამუთ იეჰოვას უღჷ, ვოძირანთ, ნამდა თიშ სქუალეფ ვორეთ (წეკითხით ეფესოელები 4:24; 5:1).

22, 23. მუ ჯგირ შედეგეფ მაჸუნუ იეჰოვაშ გურშენ მეღებულ რჩქინაშ გიმორნაფას?

²² მუჭოთ ბძირით, იეჰოვა მუშ დუდის მოჩინებაფუანა გუნაჭყეფუშ დო მუშ სიტყვა, ბიბლიაშ საშვალებათ. თე განსაკუთრებულ წიგნ ეფშა რე ღორონთიშ ართგურ მსახურეფიშ მაგალითეფით, ნამდგას შემლებნა მივაჸუნათ. თინეფ შქას რენა, მოსე დო დავითი. იეჰოვაქ მუშ ოკეთებელ გაკეთ. ასე ჩქინ ოკეთებელ ოკო ვაკეთათ დო მუთ შილებენ მეტ დიბგურუათ იეჰოვაშ გურშენ.

²³ ჩქი ირიათო ბგურაფლენდათ იჸი იეჰოვაშენ (ეკლ. 3:11). მნიშვნელოვან რე, მუჭო გიმიბრინუანთ მეღებულ რჩქინას დო ვართ ხოლო თინა, მუსხი მიჩქნა ღორონთიშ გურშენ. ნაგურეფუშ გიმორნაფას დო ჩქინ მოჸოროფე მუმაშ მაგალითიშ მეჸუნას ქუვოცადუთ-და, თინა უმოსო დემეახლოვებნა (იაკ. 4:8). მუშ სიტყვაშ საშვალებათ თინა მარწმუნენა, ნამდა დღას ვემიოტენს თინეფს, მით თიშ ჯგირო გაჩინებაფას ოცად.