1, 2. მუშ დიდ იმენდ უღნა იეჰოვაშ მსახურეფს?

იმენდ მანგარ მნიშვნელოვან რე. ნამთინეს თიშ იმენდ უღჷ, ნამდა ბედნერ ქორწინება აღვენუ, მუშ ბაღანეფ ჯამრთელეფ მირდუნა ვარდა სერიოზულ ლახალაშე დოსქიდუ. თეცალ იმენდ შილებე ქრისტიანეფს ხოლო მიღდან. მარა ჩქი უმოს დიდ იმენდ ხოლო მიღნა. თენა რე მარადიულო ცხოვრებაშ დო ჩქინ საჸოროფო ღურელეფიშ გათელებაშ იმენდ.

² პავლე მოციქულქ თქუ: „თენეფცალო მა ხოლო მიღჷ ღორონთიშ იმენდ, ნამდა იჸუაფ ღურელეფიშ გათელება, ქოთ მართალეფიშ დო ქოთ უმართლოეფიშ“ (საქ. 24:15). პავლე პირველ ვა რდუ, მით გათელებაშ იმენდიშ გურშენ იჩიებუდ. პატრიარქ იობიქ ხოლო იჩუ თეშე. თინა დარწმუნებულ რდუ, ნამდა ღორონთ ქიგიშინანდჷ დო დურთინუანდჷ თის სიცოცხლეს (იობ. 14:7—10, 12—15).

3. მუს მოხვარნა პირველ კორინთელეფიშ მა-15 დუდ?

³ ღურელეფიშ გათელება ქრისტიანულ გურაფეფიშ „ფუნდამენტ“ დო ართ-ართ მთავარ გურაფა რე (ებრ. 6:1, 2). თე საკითხიშ გურშენ პავლეშ მსჯელობა 1 კორინთელეფიშ მა-15 დუდის რე მოჩამილ. თიშ ნაჭარა სიტყვეფ გურშა ქელუკინანდჷ პირველ საუკუნეშ ქრისტიანეფს. ვა უღჷ მნიშვნელობა, მუსხი ხან რე ღურელეფიშ გათელებაშ იმენდ მიღნა, თექ მოჩამილ სიტყვეფ ჩქი ხოლო ქელამკინანა გურშა დო გამმანგარენა თიშ რწმენას, ნამდა თენა მართალო მოხვადუ.

4. მუ მარწმუნენა, ნამდა ჩქინ საჸოროფო ღურელ ადამიანეფ გეთელებნა?

⁴ იესო ქრისტეშ გათელება მარწმუნენა, ნამდა ჩქინ საჸოროფო ადამიანეფქ დომღურეს-და, გათელებაშ იმენდ არსებენს. ქრისტეშ გათელება სახიოლო ამბეშ ნაწილ რდუ, ნამუთ მოციქულ პავლექ კორინთელეფს გინოჩ (1 კორ. 15:1, 2). ფაქტიურო თიქ უწუ, ნამდა თი ქრისტიანიშ რწმენა მიდგას  გათელებაშ ვა წანდჷ, ურგებელ იჸუაფუდ (1 კორ. 15:17). იესოქ გეთელუნ თიშ რწმენა, რე მიზეზ, მუდგაშეთ შემლებნა ბჯერდან, ნამდა შხვეფ ხოლო გეთელებნა.

5, 6. მუს ნიშნენს ჩქინო, პირველ კორინთელეფიშ 15:3, 4-ის ენოჭარილ სიტყვეფ?

⁵ მუჟამსით გათელებაშ გურშენ ჭარუა დიჭყჷ, პავლექ სუმ ფაქტ მიშინუ. თენეფ რე: 1) „ქრისტექ ჩქინ ცოდვეფიშ გურშენ ღურ“. 2) „დასაფლებურქ იჸუ“. 3) „მუჭოთ წმინდა წერილეფ იჩიებ, მასმა დღას  გეთელ“ (წეკითხით 1 კორინთელეფიშ 15:3, 4).

⁶ მუს ნიშნენს ჩქინო იესოშ ღურა, დასაფლება დო გათელება? ესაიაქ იწინასწარმეტყველ, ნამდა მესია მეტო ვეჸუაფუდ ცოცხალეფ შქას დო უბადოეფწკუმა მუმზადენდეს სასაფლას. მარა თეშე უმოს ხოლო მოხვადუდ. ესაიაქ გეუძინ, ნამდა თინა ბრელიშ ცოდვას გეჭოფუნდჷ მუშ დუდშა. იესოქ თენა აკეთ, მუჟამსით მუშ სიცოცხლე დათმჷ შხვეფიშ გიშაჸიდირალო (ეს. 53:8, 9, 12; მათ. 20:28; რომ. 5:8). ათეშენ, იესოშ ღურა, დასაფლება დო გათელება მარზენა მტკიცე იმენდის, ნამდა შემლებნა გეფთავისუფლათ ცოდვა დო ღურაშე დო კინ ვორდათ ჩქინ საჸოროფო ადამიანეფწკუმა ართო, მიდგაქ მიღურეს.

7, 8. მუ არწმუნენს ქრისტიანეფს, ნამდა იესოქ მართალო გეთელ?

⁷ ჩქინ იმენდ გათელებაშ გურშენ დაკავშირებულ რე იესოშ გათელებაწკუმა, ათეშენ აუცილებერ რე, დარწმუნებულ ვორდათ, ნამდა თიქ ნამდვილო გეთელ. მუშენ შემლებნა ბჯერდან, ნამდა იეჰოვაქ იესოს სიცოცხლე დურთინუ?

⁸ ბრელქ მუშ თოლით ძირ, გათელებურ იესო დო შხვეფს ხოლო ურაგადუდ თეშ გურშენ (1 კორ. 15:5—7). პირველ მოწმე, მიდგა პავლექ მიშინუ, რდუ მოციქულ პეტრე (კეფა). მოწაფეეფქ ხოლო თქუეს, ნამდა პეტრექ გათელებურ იესო ძირჷ (ლუკ. 24:33, 34). თეს გეძინელ, მოციქულეფქ ხოლო ძირეს თინა გათელებაშ უკულ. თეშ უკულ ქრისტექ 500-შე მეტ და დო ჯიმას ართათ გიმეცხად, შილებე თენა გალილეას თი სახიოლო შეხვალამაშ დროს ჸოფედკო, ნამუთ მათეშ 28:16—20-ის რე მოჩამილ. იესოქ იაკობის ხოლო გიმეცხად, ნამუთ მუჭოთ იძირენ, ჯიმაჸონერ აფუდ. იაკობის დუდშე ვა წანდჷ, ნამდა იესო მესია რდუ (იოან. 7:5). გათელებურ იესოშ ძირაფაშ უკულ თიქ ქიდეჯერ თენა. საინტერესო რე, ნამდა სოდგარენ ახ. წ. 55 წანას, მუჟამსით პავლექ თე წერილ ჭარჷ, იესოშ გათელებაშ ბრელ მოწმე ცოცხალ რდუ დო მიდგას თიშ გათელება ოეჭვუდ, შეულებუდ სანდო მოწმეეფშა უკითხირუდკო.

9. მუჭოთ საქმეეფიშ 9:3—5-ის ბკითხულენთ, ხოლო მუ მტკიცებულება მიღჷ პავლექ თიშ, ნამდა იესოქ დასურო გეთელ?

⁹ უმოს გვიანო იესოქ პავლეს გიმეცხად (1 კორ. 15:8). პავლე (სავლე) დამასკოშა მიშჷ, მუჟამსით გათელებურ იესოშ ხონარ გეგონ დო ხილუას ძირჷ თინა ზეციურ დიდებათ (წეკითხით საქმეეფიშ 9:3—5). თე შემთხვევა ხოლო ართ მტკიცებულება რე თიშ, ნამდა იესოშ გათელება მოგონილ ვა რდუ (საქ. 26:12—15).

10. მუშ კეთებაშა აღძრჷ პავლე თიშ რწმენაქ, ნამდა იესოქ დასურო გეთელ?

¹⁰ პავლეშ დამოწმება ნამთინეშო განსაკუთრებულო საინტერესო იჸუაფუდ, მუშენდა თინა ართ დროს ქრისტიანეფს თხოზუდ. თიშ უკულ, მუთ პავლექ დერწმუნ, ნამდა იესოქ დასურო გეთელ, თინა ირფელს ორთუდ, ნამდა შხვეფ ხოლო დარწმუნკო თე ჭეშმარიტებაშა. იესოშ ღურა დო გათელებაშ გურშენ ჭეშმარიტებაშ გავრცელებაშ დროს თიქ გინიღ ლახუა, პატიმრობა დო გემიშ ნწყუალა (1 კორ. 15:9—11; 2 კორ. 11:23—27). პავლე იესოქ გეთელუნ თიშა, თიცალო რდუ დარწმუნებულ, ნამდა მზათ რდუ, თე რწმენაშ გაცხადებაშ გურშენ დოღურკო. თე პირველ ქრისტიანეფიშ დამოწმება ვა გარწმუნენანო, ნამდა იესოქ  დასურო გეთელ? დო ვაიმანგარენანო ღურელეფიშ გათელებაშ რწმენას?

11. მუშენ შილებე ნამთინე კორინთელ ქრისტიანს გათელებაშ გურშენ არასწორ აზროვნება უღუდკო?

¹¹ ნამთინე კორინთელ ქრისტიანს არასწორ შეხედულება უღუდ ღურელეფიშ გათელებაშ გურშენ. ნამთინე თის ხოლო იჩიებუდ, „ვეჸუაფუნია ღურელეფიშ გათელება“. მუშენ იჩიებდეს თეს? (1 კორ. 15:12). საბერძნეთიშ ქალაქ ათენს ფილოსოფოსეფქ გიაძიცეს თი აზრის, ნამდა იესო გათელებურ რდუ. თეცალ აზროვნებაქ შილებე იმოქმედკო ნამთინე კორინთელ ქრისტიანშა (საქ. 17:18, 31, 32). შხვეფ შილებე ფიქრენდეს, ნამდა ღურელეფიშ გათელებას პირდაპირ მნიშვნელობა ვა უღუდ. თინეფიშ აზრით, ცოდვილ ადამიან ღურელო ითვალუდ დო ქრისტიანო გინორთაშ უკულ თინა ითელებუდ. ვა უღჷ მნიშვნელობა, მუშენ ვა წანდეს თინეფს გათელებაშ, თინეფიშ რწმენა უაზრო რდუ. ღორონთის იესო ვა გუთელებუნ-და, გიშაჸიდირალ ვა ჸოფე გაფილ დო თინეფიშ ცოდვეფ ვა ჸოფე პატიებულ. ათეშენ, მიდგას გათელებაშ ვა წანდჷ, ვა უღუდ ნამდვილ იმენდ (1 კორ. 15:13—19; ებრ. 9:12, 14)

12. მუჭოთ პირველ პეტრეშ 3:18, 22-ს ჭარჷ, მუთ რდუ განსხვავებულ იესოშ გათელება თეიშახ მოხვალამირ გათელებეფშე?

¹² პავლექ პირადო მიღჷ დამოწმება, ნამდა იესოქ გეთელ. თე გათელება წოხოლე მოხვალამირ გათელებეფს თით უჯგუდ, ნამდა მიდგაქ თეიშახ დედამიწას გეთელუნ, კინ დოღურ. პავლექ თქუ, ნამდა იესო რდუ „ღურაშ ლურით მიკორულაფირეფშე პირველ ნაყოფ“. მუ მნიშვნელობათ რდუ თინა პირველ? თინა რდუ პირველ, მიდგაქ სულიერ პიროვნებათ გეთელ დო მიდგაქ გათელებაშ უკულ ზეცაშა იდჷ (1 კორ. 15:20; საქ. 26:23; წეკითხით 1 პეტრეშ 3:18, 22).

13. მუჭოთ პავლექ თქუ, მუ განსხვავება რე ადამ დო იესოშ შქას?

¹³ მუჭო შეულებ ართ კოჩიშ ღურას, მილიონეფს მუღას სიცოცხლე? პავლე თე კითხვაშ ლოგიკურ პასუხის ირზენს. თინა ოძირანს განსხვავებას, მუ მოუღ ადამიშ მოქმედებაქ კაცობრიობას დო მუ გინაშქვჷ შეიოლებერო ქრისტეშ მსხვერპლიქ. ადამიშ გურშენ პავლექ ჭარჷ: „ართ კოჩიქ მიღჷ ღურა“. მუჟამსით ადამქ შეცოდ, თიქ უბედრობა მოუღ მუშ დუდის დო მუშ გამნარყის. ჩქი ამდღა ხოლო ბღებულენთ თიშ დაუმორჩილებლობაშ გლახა შედეგეფს. მარა მუშ სქუაშ გათელებათ იეჰოვაქ შეიოლებერო გინაშქვჷ, მიღდან ჯგირ მომავალ! „თეშნერო, ართ კოჩიშ [იესოშ] საშვალებათ იჸუაფ ღურელეფიშ გათელება; მუჭოთ ადამიშ გურშენ ღურუ არძა, თეშ გეთელებ არძა ქრისტეშ ჭყოლოფათ“ (1 კორ. 15:21, 22).

14. გეთელებუნო ადამ? გენწყით.

¹⁴ მუს გულისხმენდჷ პავლე, მუჟამსით თქუ, ნამდა „ადამიშ გურშენ ღურუ არძა“? თის ადამიშ გამნარყიშ ამბე აფუდ, ნამდგაქ მემკვიდრეობათ მიღჷ ცოდვა დო არასრულყოფილება ადამშე, მუდგას ღურა მოჸუნს (რომ. 5:12). ადამ ვა რე თინეფ შქას, მით გეთელებუ. ქრისტეშ გიშაჸიდირალ თის ვახუ, მუშენდა თინა სრულყოფილ რდუ დო ღორონთის შეგნებულო ვა დემორჩილ. ადამცალ შედეგის მიღენა თინეფ ხოლო, მიდგას „კოჩიშ სქუა“ გასამართლენს, მუჭოთ „თხალეფს“ დო „სამუდამოთ გენადგურებნა“ (მათ. 25:31—33, 46; ებრ. 5:9).

15. მი იგულისხმებ „არძას“, მით გეთელებ?

¹⁵ ქიდეკვირით, ნამდა პავლექ თქუ, „გეთელებ არძა ქრისტეშ ჭყოლოფათ“ (1 კორ. 15:22). პავლეშ წერილქ კორინთელ ცხებულ ქრისტიანეფშო იჭარ, მიდგაქ ზეცას ოკო გეთელესკო. თე ქრისტიანეფ ქრისტე იესოწკუმა გაერთიანებულეფ — წმინდეფო  გიშაგორილეფ რდეს. თეს გეძინელ, პავლექ მიშინუ თინეფ, მით „ღურენა ქრისტეწკუმა ართობას“ (1 კორ. 1:2; 15:18; 2 კორ. 5:17). ღორონთშე შთაგონებულ შხვა წერილს პავლექ ჭარჷ, ნამდა თინეფ, მით იესოწკუმა ართნერ ღურათ რენა გაერთიანებულ, თიწკუმა ართნერ გათელებათ ხოლო იჸუაფნა გაერთიანებულ (რომ. 6:3—5). იესოქ გეთელ, მუჭოთ სულიერ პიროვნებაქ დო ზეცაშა მიდართჷ. თაშ ნამდა, თეცალო მოხვადუ არძაწკუმა, მით „ქრისტეწკუმა ართობას“ რენა — არძა ცხებულ ქრისტიანწკუმა.

16. მუს გულისხმენდჷ პავლე, მუჟამსით იესოს „პირველ ნაყოფ“ გიოდვჷ?

¹⁶ პავლექ ჭარჷ, ნამდა ქრისტექ გეთელ, მუჭოთ „ღურაშ ლურით მიკორულაფირეფშე პირველ ნაყოფიქ“. ყურადღება ქიმიაქცით, ნამდა შხვეფქ, თინეფ შქას ლაზარექ, გათელებურქ იჸუეს დედამიწას, მარა იესო რდუ პირველ, მიდგაქ გეთელ მუჭოთ სულიერ პიროვნებაქ მარადიულ სიცოცხლეშ მიოღებელო. თინა შილებე შევადარათ მოსავალიშ პირველ ნაყოფის, ნამდგას ისრაელეფ ღორონთის წირენდეს. თეწკუმა ართო, მუჟამსით პავლექ იესოს პირველ ნაყოფ გიოდვჷ, გულისხმენდჷ, ნამდა იესოშ უკულ გათელებურ არძა ცხებულ ზეცას იცხოვრენდჷ. მოციქულეფ დო თინეფ, მით „ქრისტეწკუმა ართობას“ რენა, ზეცაშა მიდეშეს. მუშ დროს თინეფ, იესოცალო, ზეცას გეთელებდეს.

17. მუჟამ მიღენდეს ქრისტეწკუმა ართობას რდესინ თინეფ ზეციურ ჯილდოს?

¹⁷ ზეციურ გათელება თინეფშო, მით „ქრისტეწკუმა ართობას“ რენა, თიმწკუმა ვა დოჭყაფე, მუჟამსით პავლექ თეშ გურშენ კორინთელეფს მეჭარ. თინა მომავალიშ გურშენ იჩიებუდ: „თითოულ მუშ წეს დო რიგით ღებულენს სიცოცხლეს: დიო ქრისტე, პირველ ნაყოფ, დო უკულ თინეფ მით ქრისტეშ რენა — მუჟამსით თინა მოულირ იჸუაფ“ (1 კორ. 15:23; 1 თეს. 4:15, 16). ამდღა ჩქი ბცხოვრენთ თი დროს, მუჟამსით ქრისტეშ მოულაშ გურშენ წინასწარმეტყველება ისრულებ. მოციქულეფ დო შხვა ცხებულ ქრისტიანეფ, მიდგაქ ღურეს, ქრისტეშ მოულაშახ ვემიღენდეს მუნეფიშ ზეციურ ჯილდოს დო „[იესოწკუმა] ართნერ გათელებათ“ ვეჸუაფდეს გაერთიანებულ.

18. ა) მუშენ შემლებნა ბჯერდან, ნამდა ზეციურ გათელებაშ უკულ შხვა გათელება ხოლო იჸუაფ? ბ) მუჭოთ 1 კორინთელეფიშ 15:24—26-ის რე მოჩამილ, მუ მოვლენეფ მოხვადუ ზეცას?

¹⁸ მუშ რაგად შილებე თი ართგურ ქრისტიანეფშე, მიდგას ვა უღნა ზეცას, ქრისტეწკუმა ართო, ცხოვრებაშ იმენდ? გათელებაშ  იმენდ თინეფს ხოლო უღნა. ბიბლია იჩიებ, ნამდა პავლე დო შხვეფ, მით ზეცაშა მეულა, „პირველეფ გეთელებნა“ (ფილ. 3:11). ვეძირენო თავრეშე, ნამდა თეს ხოლო შხვა გათელება მაჸუნუ? თე აზრ მეურე თის, მუდგაშ იობის, მუშ მომავალიშ გურშენ, წანდჷ (იობ. 14:15). „თინეფ, მით ქრისტეშ რენა“, ზეცას იჸუაფნა იესოწკუმა ართო, „მუჟამსით თინა მოულირ იჸუაფ“ დო მოსპუნს არძა მთავრობას, ძალაუფლებას დო ძალას. „უკანასკნელ ნტერ, . . ღურა“, ხოლო მისპუ. მუშო ოკო რაგად, მემკვიდრეობათ მეღებულ ღურას მუთუნ ვა დარკებე თინეფშა, მით ზეცას გეთელებნა. მარა მუშ რაგად შემლებნა შხვეფშე? (წეკითხით 1 კორინთელეფიშ 15:24—26).

19. მუს ოკო ელდან თინეფ, მიდგას დედამიწას ცხოვრებაშ იმენდ უღნა?

¹⁹ მუშ რაგად შემლებნა თინეფშე, მით დედამიწას ცხოვრებას ელნა? თინეფს შეულებნა იმენდ პავლეშ სიტყვეფშე მიღან, ნამდგაქ თქუ: „მა ხოლო მიღჷ . . . იმენდ, ნამდა იჸუაფ ღურელეფიშ გათელება, ქოთ მართალეფიშ დო ქოთ უმართლოეფიშ“ (საქ. 24:15). მუშო ოკო რაგად, უმართლო კოჩის ვალნე ზეცაშა, თაშ ნამდა, თე მუხლის მომავალ მიწიერ გათელება იგულისხმებ.

20. თქვა მუჭო გეგემანგარეს ღურელეფიშ გათელებაშ იმენდიქ?

²⁰ აუცილებერო „იჸუაფ ღურელეფიშ გათელება“! მით დედამიწას გეთელებ, საშვალება აღვენუ, მარადიულო იცოცხლას. თქვა შეილებნა რჯერდან, ნამდა თე დუნაპირებ შისრულებ. თე იმენდ გურშა ელაიკინანა, მუჟამსით თი საჸოროფო ადამიანეფშე ფიქრენთ, მიდგაქ გიღურეს. თინეფ გეთელებნა, მუჟამსით იესო დო შხვეფ „იმეფენა 1 000 წანას“ (გამოცხ. 20:6). შეილებნა დარწმუნებულ რდათ, ნამდა იესოშ ანთასწანიან მეფობაშ მოულაშახ დოღურით-და, გეთელებუთ. თე „იმენდ გურს ვა გომტახნა“ (რომ. 5:5). თენა ამდღა ხოლო გამანგარენა დო ღორონთიშ მსახურებას მეტ ხიოლს გარზენა. მარა მუჭოთ ანწიან სტატიაშე იძირე, ხოლო უმოს მეტ მუდგარენიშ გურაფა შემლებნა 1 კორინთელეფიშ მა-15 დუდშე.