1. მუჭო პასუხენს იეჰოვა ხშირას მუშ მსახურეფიშ ლოცვეფს?

 ᲥᲝᲘᲩᲥᲣᲓᲔᲡᲝ, ნამდა იეჰოვაქ შილებე გიმოირნუესკო მიდგარენიშ მთელ გურით რაგადებულ ლოცვაშა პასუხიშ მიოჩამალო? თენა შეიოლებერ რე, თიშ უმკუჯინუო უხუცეს რეთ, მომსახურე, პიონერ დოვარ მაუწყებელ; ვართ თის უღჷ მნიშვნელობა, ახალგაზრდა რეთ დოვარ — ხანშამიშულირ, ჯიმა რეთ დოვარ — და. მუჟამსით მიდგარენ მოხვარას თხინს იეჰოვას, ღორონთ ხშირას უხუცესეფს დო შხვა ართგურ მსახურეფს ირინუანს, ნამდა გურშა ეუქექუას თის (კოლ. 4:11). მუშმადიდა პატი რე, თეშნერო მივემსახურათ იეჰოვას დო და დო ჯიმალეფს! თეშ კეთება შემლებნა ეპიდემიეფიშ, სტიქიურ უბედრობეფიშ ვარდა თხოზინიშ დროს.

2. მუშენ შილებე რთულ რდას შხვეფიშ მოხვარა ეპიდემიაშ დროს?

² ეპიდემიაშ მოდვალაშ დროს შილებე რთულ რდას, ქიმვეხვარათ ართიანს. მაგალთო, შილებე მოკოდან, ქიბძირუათ მეგობრეფ, მარა თენა ვა რდას უსაფრთხო. ვარდა შილებე მოკოდან, ოჭკუმალშა დუვაპატიჟათ თინა, მიდგას ფინანსურო უჭირს, მარა თენა ხოლო ვა რდას შეიოლებერ. მუშო ოკო რაგად, მოკონა, მთელ გურით მივეხვარათ შხვეფს, მარა შილებე თენა ვეშემლებდან, მუშენდა ჩქინ ხოლოშიანს ხოლო უჭირს. თე ირფელიშ უმკუჯინუო, იეჰოვას გურს უხარენს თინა, მუჟამსით ნამ შემლებნან თის ვორთუთ და დო ჯიმალეფიშ მახვარებელო (იგავ. 3:27; 19:17).

3. მუშ გურაფა შემლებნა თი უხუცესეფშე, მით დესიშ კრებას მსახურენა? (იერ. 23:4)

³ მუშ კეთება შეულებნა უხუცესეფს? უხუცესო ქომსახურენქ-და, ჯგირო გეჩინებაფე „შხურ“ (წეკითხით იერემიაშ 23:4). დესი, ნამუთ წოხოლენ სტატიას მიფშინეთ, იჩიებ: „თი უხუცესეფ,  მით ჩქინ სამქადაგებლო ჯგუფის რენა, ხშირას მსახურენდეს, მუჭოთ ჩქიმწკუმა თეშ შხვეფწკუმა ხოლო, დო დროს გიმომრთუნდეს“ b. თეცალ მონდომაშ შედეგო ჭყიშეფს უმოს ადვილო შეიალებეს ქელუდირთესკო თის, მუჟამსით ᲙᲝᲕᲘᲓ-19 პანდემიაშ გურშენ თე დას, მუსხირენ ოჯახიშ წევრიქ დოუღურ.

4. მუშენ შეიალებუეს უხუცესეფს დესიშ მოხვარაქ დო მუს ბგურაფლენთ თავრეშე?

⁴ დესი ენწყუნს: „უხუცესეფწკუმა უკვე მეგობრულ ურთიერთობა მიღუდუნ თიშენ, ჩქიმო უმოს ადვილქ იჸუ, ქივეჩიკო ჩქიმ გრძნობეფიშ დო თიშ გურშენ, მუ მაწუხენდჷ“. მუშ გურაფა შეულებნა უხუცესეფს თე შემთხვევაშე? დოჭყიშეთ თქვანდა მენდებულ შხურ, სოიშახ რთულ დრო დოდირთუდას, რდათ თინეფიშ მეგობრეფ. თქვან ტერიტორიას ეპიდემიაქ გევრცელ-და, მუდგაშ გურშენ ვეშქალებენა პირადო ქიძირუათ და დო ჯიმალეფ, შხვა საშვალებეფ დოგორით, ნამდა დეკავშირათ თინეფს. დესი იჩიებ: „მინშა ართ დღაშ დინახალე შხვადოშხვა უხუცეს მირეკუნდჷ ვარდა მიჯღონანდჷ წერილეფს. თინეფიშ მოჯღონილ მუხლეფ ჩქიმ გურს მანგარო ოხუდ თიშ უმკუჯინუო, ნამდა თე მუხლეფ ჯგირო მიჩქუდ“.

5. მუჭო შეულებნა უხუცესეფს თიშ გაგება, მუ ოსაჭირნა და დო ჯიმალეფს დო უკულ მუჭო შეულებნა მეხვარან თინეფს?

⁵ ართ-ართ საშვალება, მუდგათ შეილებნა გეგათ, მუ ოსაჭირნა და დო ჯიმალეფს, რე ტაქტიან კითხვეფიშ გიმორნაფა (იგავ. 20:5). ქუღნანო დასაბაღ ოჭკუმალ, წამალეფ ვარდა შხვა აუცილებერ მუდგარენეფ? სამუშაშ ვარდა ჸუდეშ უმშო ხომ ვა დოსქიდნა? მოხვარა ხომ ვასაჭირნა, ნამდა გეგმირინუან თი სახელმწიფო პროგრამა, ნამუთ თეცალ დაზარალებურეფშო რე? დესის თანამორწმუნეეფქ მატერიალურო ელუდირთეს, მარა თის არძაშ უმოსო მეხვარ ემოციურ დო სულიერ ელარნაქ, ნამუთ უხუცესეფშე მიღჷ თეცალ რთულ დროს. თინა იჩიებ: «უხუცესეფ ჩქიმწკუმა ართო ლოცულენდეს. მართალ რე, ვა ფშჷ, მუ თქუეს თინეფქ, მარა ჯგირო ფშჷ, მუს ბგინაფლენდჷ. თეშ ვორდჷ, ითამ იეჰოვა მირაგადუდკო: „ხვალე ვა რექ“» (ეს. 41:10, 13).

6. მუშ კეთება შეულებ კრებას ბრელს შხვეფიშ მახვარებელო? (ქოძირით სურათ).

⁶ მუშ კეთება შეულებნა შხვეფს? ჩქი უხუცესეფშე ველუთ, ნამდა ქიზრუნენა და დო ჯიმალეფშე, მარა იეჰოვა არძაშე ითხინს, გურშა ელუკინას დო ქელუდირთას შხვეფს (გალ. 6:10). ჭიჭე საქმეთ გიმორჩქინელ ჸოროფაქ ხოლო შილებე მანგარო  იმოქმედას თიშა, მით გლახათ რე. ბაღანაქ ხოლო შილებე ბარათ ვარდა ნახანტა ქუჯღონას ჯიმას თიშა გურიშ ელაკინალო. ახალგაზრდას შეულებ შხვაშ მანგიორო მიდართას ოჸიდეეფშა დო მუთ ოსაჭირუნ, თინეფ ქუმუღას. მუს ფთქუანდით გლახათ რენ თინეფშა ოჭკუმალიშ მომზადებაშენ დო სიფრთხილეშ ზომეფიშ გიმორჩქინათ თე ოჭკუმალიშ მეჭირნაფაშენ? მუშო ოკო რაგად, ეპიდემიაშ დროს კრებას არძას ოსაჭირ გურიშელაკინა. შილებე კრებაშ უკულ ქუდოფსქიდათ, ნამდა ქიფჩუათ და დო ჯიმალეფწკუმა, იჸუაფნო თენა ართო, პირისპირ დოვარ ვიდეო კონფერენციაშ საშვალებათ. გურიშელაკინა უხუცესეფს ხოლო ოსაჭირნა. ნამთინე მოწმექ მადლობაშ წერილ ქიმუჯღონ თი უხუცესეფს, მით მანგარ დაკავებულ რდეს ეპიდემიაშ დროს და დო ჯიმალეფიშ მოხვარათ. მუშმაჯგირა რე, მუჟამსით არძა მუდგარენს ვორთუთ, ნამდა გურშა ელუკინათ დო გუვამანგარათ ართიან (1 თეს. 5:11).

7. მუქ შილებე სტიქიურ უბედრობას მაჸუნას?

⁷ სტიქიურ უბედრობაქ ადამიანიშ ცხოვრება შილებე თოლიშ დოვალაფაშა დოთირუას. თეცალ დროს ადამიანქ შილებე მიოდინუას მუშ საკუთრება, ჸუდე ვარდა საჸოროფო პიროვნება. თეშე ჩქინ და დო ჯიმალეფ ხოლო ვა რენა თხილერ. მუშ კეთება შემლებნა თინეფიშ მახვარებელო?

8. მუ შეულებნა აკეთან უხუცესეფქ დო ოჯახიშ დუდეფქ, სოიშახ სტიქიურ უბედრობა მოხვადუდას?

⁸ მუშ კეთება შეულებნა უხუცესეფს? უხუცესეფ, ქიმეხვარით და დო ჯიმალეფს, რდან წინასწარ მომზადებულ. დერწმუნით, ნამდა კრებას არძას უჩქჷ, მუჭო დეკავშირას უხუცესეფს დო მუ ოკო აკეთას, ნამდა რდას თხილერ. წოხოლენ სტატიას მოშინაფილ მარგარეტ იჩიებ: „ჩქინ უხუცესეფქ ადგილობრივ საჭიროებეფს ქიმიშინუეს დო გუმაფრთხილეს, ნამდა დიო ხოლო რდჷ საშიშროება, ჩქინ ტერიტორიას დაჩხირქ გორჩქინდკო. თინეფქ მიწის, ნამდა სახელმწიფოშ წარმომადგენელეფ ევაკუაციას გეგმაცხადენდეს ვარდა სიტუაცია ოშქურანჯო გინირთუდ-და, ხეთეშე ოკო ქიდიპტეთკო თექიანობა. თენა დროულ ინფორმაცია რდჷ, მუშენდა ხუთ მარაშა დასურო გორჩქინდჷ დაჩხირქ.“ ოჯახურ თაყვანიშცემაშ დროს ოჯახიშ დუდეფს შეულებნა გარჩუან, მუს გაკეთენს ოჯახიშ თითოულ წევრ თეცალ დროს. თქვა დო თქვან ბაღანეფ ჯგირო მომზადებულ ქიჸუაფუთ-და, ნაკლებო მიოდინუანთ სიმშვიდეს, მუჟამსით სტიქიურ უბედრობა ქუმოხვადუ.

9. მუშ კეთება შეულებნა უხუცესეფს სტიქიურ უბედრობაშახ დო თიშ უკულ?

⁹ ჯგუფიშ ზედამხედველ ქორექ-და, ვაუჯინა, მუჟამ მოხვადუ სტიქიურ უბედრობა. თეიშახ დერწმუნ, ნამდა გიღჷ არძაშ ზუსტ საკონტაქტო ინფორმაცია, მით სქან ჯგუფის რე. გეგმოჭარ სია დო გეგნამოწმ, მუთუნქ ხომ ვეთირ? შედეგო სტიქიურ უბედრობა ქუმოხვადუნ, შეგალებე დეკავშირე თითოულ მაუწყებელს დო ქიგეგე, მუ ოსაჭირ. ხეთეშე გეგნოჩ თე ინფორმაცია უხუცესეფიშ საბჭოშ კოორდინატორს, მით რაიონულ ზედამხედველს დეკავშირებ. თეშნერ თანამშრომლობათ საქმე უჯგუშო გეკეთებაფუაფ. თიშ უკულ, მუთ დაჩხირქ გორჩქინდჷ, მარგარეტიშ რაიონულ ზედამხედველს 36 საათის ვა დურულუაფ. თინა ხემძღვანელენდჷ უხუცესეფს, ნამდა დეკავშირესკო სოდგარენ 450 და დო ჯიმას, მიდგას ჸუდე აფუდ დატებელ, დო ქიზრუნესკო თინეფშა (2 კორ. 11:27). თეშნერო, დუდიშგითაფორაფალ ქუშის არძას, მიდგას თენა ოსაჭირუდ.

10. მუშენ მიორჩქუნა უხუცესეფს ჭყიშუაშ საქმე მნიშვნელოვანო? (იოან. 21:15)

¹⁰ სულიერ დო ემოციურ მოხვარა ხოლო უხუცესეფიშ საქმეშა მიშურს (1 პეტ. 5:2). სტიქიურ უბედრობაშ დროს თინეფქ ოკო დერწმუნან, ნამდა თითოულ და დო ჯიმა უსაფრთხოთ რე, უღჷ ოჭკუმალ, მიკაქუნალ დო დუდიშგითაფორაფალ. მარა გინოსქილადირეფს  თუთეფიშ დინახლე ოსაჭირნა სულიერ დო ემოციურ ალარნა (წეკითხით იოანეშ 21:15). ჰაროლდ, ნამუთ ფილიალიშ კომიტეტის მსახურენს დო იძირუანდჷ სტიქიურ უბედრობათ დაზარალებურ და დო ჯიმალეფს, იჩიებ: „მდგომარეობაშე გიშულას დრო ოსაჭირ. თინეფქ შილებე ნორმალურ ცხოვრება ქიდიჭყან, მარა იშენით გაშინედან საჸოროფო ადამიანეფ, მიდგაქ უღურეს, თი ირფელ, მუთ ოდინეს ვარდა შიშ, ნამუთ გინიღეს. თეცალ ფიქრეფქ შილებე თინეფს მუნეფიშ ჭუა კინ მუახალას. თენა ბუნებრივ რე დო შუროთ ვა ნიშნენს რწმენაშ ნაკლებობას“.

11. მუშ გოშინაქ შილებე მუსხირენშა დესაჭირან ოჯახეფს?

¹¹ უხუცესეფ, გურიშ ხოლოშა მიღით რჩევა „ინგარან თინეფწკუმა ინგარით“ (რომ. 12:15). გინოსქილადირეფს შილებე ბრელშა დესაჭირან თიშა დარწმუნებაქ, ნამდა იეჰოვაშე დო და დო ჯიმალეფშე ჸოროფა ვა უდინუაფნა. უხუცესეფ ქიმეხვარებნა ოჯახეფს, მიაჸუნან სულიერ განრიგის, მუდგაშა მიშურს ლოცვა, გურაფა, კრებაშ შეხვალამეფ დო მსახურებას მონაწილება. უხუცესეფს შეულებნა ელუჩან მშობლეფს, ნამდა თინეფქ ქიმეხვარან მუნეფიშ სქუალეფს, მთელ ყურადღება თიშა აფდან გინოღალირ, მუდგაშა სტიქიურ უბედრობას ვაცილებე. მშობლეფ, ქუგაშინით თქვან სქუალეფს, ნამდა იეჰოვა ირიათო თინეფიშ მეგობარ იჸი დო თინეფწკუმა იჸუაფ. გეუნწყით სქუალეფს, ნამდა ჸუნა მსოფლიო ოჯახ, სოდეთ რენა თიცალ და დო ჯიმალეფ, მით ირო მზათ რენა, ქელუდირთან (1 პეტ. 2:17).

12. მუშ კეთება შეულებნა შხვეფს სტიქიურ უბედრობეფით დაზარალებურეფიშ მოხვარაშ საქმეს? (ქოძირით სურათ).

¹² მუშ კეთება შეულებნა შხვეფს? თქვან გოხოლუას სტიქიურ უბედრობაქ ქუმოხვად-და, ქოკითხით უხუცესეფს, მუჭო შეილებნა მოხვარა. შილებე თქვან ჸუდეს ცხოვრება შეთავაზათ თის, მიდგას ჸუდექ აჸუ დატებელქ ვარდა თის, მით თინეფიშ მახვარებშა რე მოულირ. ხომ ვეშქალებე, დაზარალებურეფს ოჭკუმალ ვარდა შხვა საჭირო ნივთეფ ქიმიოჭირინუე. სტიქიურ უბედრობაქ შორს ქუმოხვად-და, თიმწკუმა ხოლო შეილებ თინეფიშ მოხვარა. მაგალთო, ქილოც თინეფშო (2 კორ. 1:8—11). შეილებ ფინანსურო დუკინე ხუჯ დაზარალებურეფიშ მოხვარაშ საქმეს მსოფლიო საქმეშო შესაწირავეფიშ კეთებათ (2 კორ. 8:2—5). თი ტერიტორიაშა გინულა ქეშეილებუნ-და, მუ ოკო აკეთე თეშო? მახვარებშა ქუდოიძახეს-და, ალბათ მიკილენქ მომზადებას, ნამდა საჭირო დროს შეიალებუან სქან გიმორნაფაქ თექ, სოდეთ არძაშ უმოსო ოსაჭირნა მოხვარა.

13. მუ სირთულეეფს ხვადუნა ჯიმალეფ თი ტერიტორიეფს, სოდეთ ჩქინ საქმიანობა ვარიებულ რე?

¹³ თი ტერიტორიეფს, სოდეთ ჩქინ საქმიანობა ვარიებულ რე, თხოზინ ცხოვრებას ხოლო უმოსო ართულენს. თეცალ ტერიტორიეფს ხოლო ჩქინ და დო ჯიმალეფს უღნა ეკონომიკურ პრობლემეფ, გინმირთუნა გლახათ დო ოდინუანა საჸოროფო ადამიანეფს. მარა თხოზინიშ გურშენ უხუცესეფს შილებე თავისფალო ვემიართინედან ვარდა ვა დაკავშირებედან თი და დო ჯიმალეფშა, მიდგას მოხვარა ოსაჭირ. თაშ რდჷ წოხოლენ სტატიას მოშინაფილ ანდრეიშ შემთხვევას. თიშ სამქადაგებლო ჯგუფის ართ დას ფინანსურო გუჭირდჷ, თიქ ავარიას ქუმოხვად დო მუსხირენ ოპერაცია ოსაჭირუდ, ათეშენ ვამუშებედ. ჯიმალეფქ ირფელ გაკეთეს თე დაშ მახვარებელო, მუთ თხოზინიშ დო პანდემიაშ დროს შეიალებედეს. იეჰოვას ჯგირო უჩქუდ თე დაშ სიტუაცია დო ჯიმალეფიშ საშვალებათ ქიმეხვარ თის.

14. მუჭო შეულებნა უხუცესეფს იეჰოვაშა მენდებაშ მაგალით მეჩან შხვეფს?

¹⁴ მუშ კეთება შეულებნა უხუცესეფს? ანდრეი ლოცულენდჷ დო ნამ შეულებუდუნ თის ორთუდ. მუჭო უპასუხ იეჰოვაქ თის? თიქ შხვა თანამორწმუნეეფს ქოთხუ მოხვარა, მიდგას უმოსიშ კეთება შეულებუდ. ნამთინექ თე და საავადმყოფოშა მიდეჸონ, შხვეფქ ფარათ ქელუდირთეს. იეჰოვაქ გინაჭყვიდირაფუ თინეფს, ქიმეხვარესკო თე დას, აკურთხჷ თინეფიშ ართობა დო გაბედულებათ გიმორჩქინელ მონდომა (ებრ. 13:16). უხუცესეფ, თავისფალო მოქმედებაშ საშვალება ვაიღნან თიმწკუმა, შხვეფს ქოთხით მოხვარა (იერ. 36:5, 6). მუთ მთავარ რე, მიენდით იეჰოვას. თის შეულებ მიგეხვარან, ქიზრუნათ და დო ჯიმალეფშა.

15. მუჭო შემლებნა ართობა ვა ვოდინუათ თხოზინიშ დროს?

¹⁵ მუშ კეთება შეულებნა შხვეფს? თხოზინიშ დროს შილებე ხვალე მუსხირენ და დო ჯიმაწკუმა შეხვალამაშ საშვალება მიღდან. ათეშენ, ასეშე რე მნიშვნელოვან, მშვიდობიან ურთიერთობა ვა ვოდინუათ არძა და დო ჯიმაწკუმა. ჩქი სატანას ოკო ვებრძოლათ დო ვართ ხოლო ართიანს. გურ ვა უჩათ და დო ჯიმალეფიშ შეცდომეფს დო მუთ შილებენ მალას მუვაგვარათ პრობლემა (იგავ. 19:11; ეფეს. 4:26). მზათ ვორდათ და დო ჯიმალეფიშ მახვარებელო (ტიტ. 3:14). მუჟამსით ჟიშე მოშინაფილ დას შხვეფქ ქიმეხვარეს, თექ დადებითო იმოქმედ მთელ ჯგუფშა. თინეფქ უმოსო დეახლოვეს ართიანს, მუჭოთ ართ ოჯახ (ფსალმ. 133:1).

16. მუჭოთ კოლოსელეფიშ 4:3, 18-შე იძირე, მუჭო შემლებნა მივეხვარათ თი და დო ჯიმალეფს, მიდგას თხოზუნა?

 ¹⁶ ანთასობით ჩქინ და დო ჯიმა ომსახურ იეჰოვას, მთავრობაშე თხოზინიშ უმკუჯინუო. თინეფშე ნამთინე რწმენაშ გურშენ ციხეს ხე. ჩქი ბლოცულენთ თე თანამორწმუნეეფშო დო თინეფიშ ოჯახიშ წევრეფშო. თეწკუმა ართო, თინეფშო ხოლო, მით მუნეფიშ თავისუფლებას საფრთხეშ თუდო გიორინუანა, ნამდა ქელუდირთან თეცალ და დო ჯიმალეფს სულიერო, ფიზიკურო დო იურიდიულო c (წეკითხით კოლოსელეფიშ 4:3, 18). დღას ვა მიეფუათ ლოცვაშ ძალა (2 თეს. 3:1, 2; 1 ტიმ. 2:1, 2).

17. მუჭო შეილებნა ასეშე მემზადათ თხოზინშო?

¹⁷ თქვა დო თქვან ოჯახიქ შეილებნა ასეშე მემზადათ თხოზინშო (საქ. 14:22). ოკო ვა ვეცადათ თი ირფელ გლახაშ წარმოდგენა, მუდგაქ შილებე მოხვადას, თეშ მანგიორო გამანგარით იეჰოვაწკუმა მეგობრობა დო სქუალეფს ხოლო ქიმეხვარით თეშ კეთებას. მინშა, მუჟამსით გურ გაფნა შეწუხებულ, თქვან გრძნობეფიშ გურშენ ალალას ქეჩით ღორონთის (ფსალმ. 62:7, 8). მთელ ოჯახიქ ქიჩით თი მიზეზეფიშ გურშენ, მუშენ შეილებნა ენდათ იეჰოვას. d სტიქიურ უბედრობაშ დროს პირადო მომზადება დო იეჰოვაშა მენდება მეხვარებ თქვან სქუალეფს, ვადინუან გაბედულება დო სიმშვიდე.

18. მუნერ მომავალ მელნა?

¹⁸ ღორონთიშ მშვიდობა დუდის თხილერო მოგინაფუანა (ფილ. 4:6, 7). თიშ საშვალებათ იეჰოვა მარზენა შინაგან სიმშვიდეს ეპიდემიეფიშ, სტიქიურ უბედრობეფიშ დო თხოზინიშ დროს. თინა ჩქინ ოჭყიშალო მოხანდე უხუცესეფს ირინუანს დო თითოულს მარზენა ართიანიშ მოხვარაშ პატის. მშვიდობა, ნამდგათ ასე ფხარენთ, მამზადენა, უმოს დიდ განსაცდელშო. მაგალთო, მუნერით რე, „დიდ გასაჭირ“ (მათ. 24:21). თი დროს საჭირო იჸუაფ, ვა ვოდინუათ სიმშვიდე დო შხვეფს ხოლო ქიმვეხვარათ თეშ კეთებას. მარა თე მოვლენა გინილენსინ მეტო ვეშეფხვადუთ სირთულეეფს, ნამუთ გურს შემწუხენა. საბოლათ გეფხარებუთ თით, მუთ იეჰოვას ირო განზრახულ აფუდ ჩქინო — სრულყოფილ დო მარადიულ მშვიდობათ (ეს. 26:3, 4).