1. მუ ოკო ვაკეთათ, ნამდა ქიმვოჭირინუათ სულიერ მოწიფულობას?

 ᲛᲐᲙᲕᲘᲠᲔᲜᲐ თიშ ძირაფა, მუშმამალას ირდუნა ბაღანეფ. თე პროცეს ავტომატურო ხვადუ, მარა თეშ რაგად ვეშემლებნა სულიერ რდუალაშე. პიროვნება სულიერო მოწიფულო ავტომატურო ვეგნირთუ. თეშ მიოჭირნაფალო კონკრეტულ ნაბიჯეფიშ გინოდგუმა რე საჭირო b (1 კორ. 13:11; ებრ. 6:1). თე მიზანს ქიმვოჭირინუათინ, საჭირო რე, მიღდან იეჰოვაწკუმა პირად ხოლოშიან ურთიერთობა. თეს გეძინელ, წმინდა შურ მოსაჭირნა, ნამდა მიღდან ღორონთიშ მოსაწონ თვისებეფ, გუვავითარათ თიცალ უნარეფ, ნამუთ ირდღაშიან ცხოვრებას გიმმოდირთუნა დო მივემზადათ მომავალ პასუხიშმგებლობეფშო (იგავ. 1:5).

2. მუს ბგებულენთ დაბადებაშ 1:27-შე დო მუს გუვარჩიენთ თე სტატიას?

² მუჭოთ მიჩქნა, ქოთ ოსურკოჩ დო ქოთ ქომოლკოჩ იეჰოვაქ გაჭყჷ (წეკითხით დაბადებაშ 1:27). თინეფ ართიანშე ხვალე ფიზიკურო ვარინ, შხვა მუდგარენეფით ხოლო გენესხვავებნა. მაგალთო, იეჰოვაქ ქოთ კოჩის დო ქოთ ოსურს ართიანშე განსხვავებულ დავალებეფ მეჩჷ, მუდგაშ შეიოსრულებერო შხვადოშხვა თვისებეფ დო უნარეფ ოსაჭირნა (დაბ. 2:18). თე სტატიას ქიფჩიებუთ, მუჭო შეულებნა ახალგაზრდა დალეფს, გინირთან სულიერო მოწიფულ ქრისტიანეფო. უკულიან სტატიას გუვარჩიენთ, მუჭო შეულებნა თეშ კეთება ახალგაზრდა ჯიმალეფს.

3, 4. მიშ მაგალითეფს შეულებნა მიაჸუნან ახალგაზრდა ქრისტიან დალეფქ? (ქოძირით სურათ).

³ ბიბლიას მოშინაფილ რე ბრელ თიცალ ართგურ ოსურკათა, მიდგას უჸორდჷ იეჰოვა დო ომსახურუდ თის (ვებგვერდის jw.org  ქოძირით სტატია: „მუშ გურაფა შემლებნა ბიბლიას მოშინაფილ ოსურკათაშე?“ [ქორთ.]). თინეფ გიმირჩქინანდეს თი თვისებეფს, ნამუთ თე სტატიაშ მთავარ მუხლის რე მოჩამილ, რდეს „ზომიერეფ დო ირნერო ართგურეფ“. თე ძვირფას ოსურკოჩეფ ჯგირ მაგალით რენა ახალგაზრდა ქრისტიან დალეფშო. მარა თინეფს მუნეფიშ კრებეფს ხოლო შეულებნა ძირან სულიერო მოწიფულ დალეფ, მიდგაშეთ ბრელ მუდგარენიშ გურაფა შეიალებენა.

⁴ ახალგაზრდა დალეფ, გეგშეგორით სულიერო მოწიფულ მუსხირენ და, მიდგაშ მაგალითის მიაჸუნუთ. ქიდეკვირით თინეფიშ ძვირფას თვისებეფს დო დეფიქრით, თქვა მუჭო შეილებნა თინეფიშ გიმორჩქინა. უკულიან აბზაცეფს გუვარჩიენთ სუმ მნიშვნელოვან თვისებას, ნამდგას სულიერო მოწიფულ ქრისტიან და ოკო გიმირჩქინანდას.

5. მუშენ რე თანდაბლობა მნიშვნელოვან სულიერო მოწიფულ დალეფშო?

⁵ თანდაბლობა რე ართ-ართ მნიშვნელოვან თვისება, ნამუთ სულიერო მოწიფულ დაქ ოკო გიმირჩქინას. თანდაბალ პიროვნებას ჯგირ ურთიერთობა უღჷ იეჰოვაწკუმა დო შხვეფწკუმა (იაკ. 4:6). თანდაბალ და, მიდგას უჸორს იეჰოვა, ირიათო ომორჩილ დო მეჸუნს ღორონთიშ დოდგინელ მეთაურობაშ პრინციპის, მუჭოთ კრებას თეშ ოჯახის ხოლო c (1 კორ. 11:3).

6. მუშ გურაფა შეულებნა ახალგაზრდა დალეფს რებეკაშე?

⁶ გუვარჩუათ ჯვეშ დროს მახორუ რებეკაშ მაგალით. თინა მანგარ ჭკვერ რდჷ, ირიათო გაბედულ გადაწყვეტილებეფს ღებულენდჷ დო უჩქუდ, სო მუჭო ოკო მიქცუკო (დაბ. 24:58; 27:​5—17). თეშ უმკუჯინუო, თინა ირიათო გიმირჩქინანდჷ შხვეფიშ მიმართ პატიცემას დო მეჸუნდჷ იეჰოვაშ ხემძღვანელობას (დაბ. 24:​17, 18, 65). ახალგაზრდა დალეფ, თქვა ხოლო, რებეკაცალო თანდაბლობას გეგმირჩქინანთ დო იეჰოვაშ დოდგინელ მეთაურობაშ პრინციპის ქიმიაჸუნუთ-და, ჯგირ მაგალით იჸუაფუთ მუჭოთ კრებაშო თეშ ოჯახშო ხოლო.

7. მუჭო შეულებნა ახალგაზრდა დალეფს, მიაჸუნან ესთერიშ მოკრძალებაშ მაგალითის?

⁷ მოკრძალება რე ხოლო ართ მნიშვნელოვან თვისება, ნამუთ არძა სულიერო მოწიფულ დაქ ოკო გიმირჩქინას. ბიბლიას ბკითხულენთ: „მოკრძალებურ ბრძენ რე“ (იგავ. 11:2). თე თვისებას  გიმირჩქინანდჷ ჯვეშ დროს მახორუ ესთერ, მით ღორონთიშ ართგურ მსახურ რდჷ. თის ზუსტას მოკრძალებაქ მეხვარ, ვა გაამაყებედკო, მუჟამსით დედოფალო გინირთჷ. ესთერ ირიათო ურჩქილედ მუშ უნჩაშ ბიძისქუაშ, მორდოქაიშ, რჩევას დო მეჸუნდჷ თის (ესთ. 2:​10, 20, 22). ახალგაზრდა დალეფ, თქვა ხოლო რჩევას შხვეფს ქელაკითხანთ-და, შეგალებენა გიმირჩქინათ თიცალ მოკრძალება, მუნერით ესთერს უღუდ (ტიტ. 2:​3—5).

8. 1 ტიმოთეშ 2:9, 10-იშ თანახმას, მუჭო მეხვარებ მოკრძალება დალეფს, მიღან ბრძნულ გადაწყვეტილება მიკოქუნა დო გარეგნობაწკუმა დაკავშირებით?

⁸ ესთერ მოკრძალებას შხვა საკითხის ხოლო გიმირჩქინანდჷ. მუჭოთ მიჩქნა, თინა მანგარ სქვამ რდჷ, მარა ვაცადუდ, მუშ სისქვამეთ შხვეფიშ ყურადღება მიქცუკო (ესთ. 2:​7, 15). ქრისტიან დალეფ, თქვა მუჭო შეილებნა მიაჸუნათ ესთერიშ მოკრძალებაშ მაგალითის? ართ-ართ საშვალება მოჩამილ რე 1 ტიმოთეშ 2:​9, 10-ის (წეკითხით). თე მუხლეფს პავლე მოციქულ ელუჩანს ქრისტიან ოსურკათას, ნამდა მიკაქუნდან მოკრძალებურო დო გონივრულო გიშაგორილ მიკაქუნალ. თაქ გიმორნაფილ ბერძნულ სიტყვეფშე იძირე, ნამდა ქრისტიან ოსურიშ მიკაქუნალშე შხვეფიშ აზრიშ დო გრძნობეფიშ პატიცემა ოკო იძირედას. მოამაყნა ჩქინ სულიერო მოწიფულ დალეფ, მიდგას ირო მოკრძალებურო მიკაქუნა.

9. მუშ გურაფა შემლებნა აბიგაილშე?

⁹ გურგოჩამილობა რე ხოლო ართ თვისება, მუთ სულიერო მოწიფულ დალეფქ ოკო გავითარან. მუ რე გურგოჩამილობა? თენა რე ინონჭაფაშ უნარ. თაშ ქოფთქუათინ, სწორ დო არასწორიშ გარჩიებაშ უნარ დო უკულ თიშ კეთება, მუთ სწორ რე. გურგოჩამილობაშ გიმორჩქინაშ ჯგირ მაგალით აბიგაილქ დომტუეს. მუჟამსით თიშ ქომონჯიქ, ნაბალქ, უგუნურ გადაწყვეტილება მიღჷ, თინეფიშ არძა ჸუდეშარქ საფრთხეშ თუდო ქიგედირთჷ. თე დროს აბიგაილქ ხეთეშე მოქმედება ქიდიჭყჷ. თიქ გურ ქუგუჩ, მუ აფუდ ოკეთებელ დო მუშ საქციელით ქიანაშ ადამიან ღურაშე ირსხჷ (1 სამ. 25:​14—23, 32—35). გურგოჩამილობა ამდღა ჩქი ხოლო მოხვარნა, ქინვანჭათ, მუჟამ ოკო იფჩუათ დო მუჟამ ოკო ვა ფთქუათ მუთუნ. თეს გეძინელ, თე თვისება მოხვარნა, შხვეფიშ მიმართ პირად ინტერესიშ გიმორჩქინაშ დროს ვორდათ გაწონასწორებულეფ დო ზედმეტო ვემშაფრთათ თინეფიშ საქმეშა (1 თეს. 4:11).

10, 11. მუ ჯგირობუას მოუღანთ მუჭოთ თქვან დუდის თეშ შხვეფს, ჯგირო კითხირ დო ჭარუაშ დოგურაფათ? (ქოძირით სურათ).

¹⁰ სულიერ მოწიფულობაშ მიოჭირნაფალო აუცილებერ რე, ქრისტიან დალეფქ გავითარან თიცალ უნარეფ, ნამუთ ირდღაშიან ცხოვრებას გიმადირთუნა. ბაღანობას გავითარებულ ნამთინე უნარ დალეფს მთელ ცხოვრებას გიმადირთუნა. მორთ ასე გუვარჩუათ, ნამ უნარეფიშ გავითარება შეულებნა დალეფს.

¹¹ ქიდიგურეთ ჯგირო კითხირ დო ჭარუა. ნამთინე კულტურას აუცილებერ ვა რე, ოსურს კითხირ დო ჭარუა უჩქუდას, მარა თე უნარიშ გავითარება აუცილებერ რე თითოულ ქრისტიანშო d (1 ტიმ. 4:13). ირფელ გაკეთით, ნამდა ქიდიგურუათ ჯგირო  კითხირ დო ჭარუა დო მუთუნს ვემეჩათ უფლება, გეცილან თეშ კეთებას. მუ ჯგირობუას მოიღანა თე უნარიშ გავითარება? კითხირ დო ჭარუა ჯგირო ქუგარჩქვენუნან-და, ადვილ გაჸინა სამუშაშ გორუა. თეს გეძინელ, უჯგუშო შეგალებენა ღორონთიშ სიტყვაშ გიმორკვიება დო თიშ შხვეფშა გურაფა. დო მუთ არძაშ უმოს მნიშვნელოვან რე, მუჟამსით ჯგირო კითხირ გარჩქვენუნა, ბიბლიაშ კითხირით დო თიშე დაფიქრებათ, შეგალებენა დეახლოვათ იეჰოვა ღორონთის (იეს. 1:8; 1 ტიმ. 4:15).

12. მუჭო მიგეხვარებნა იგავეფიშ 31:26 კომუნიკაციაშ უნარიშ გავითარებას?

¹² გავითარით კომუნიკაციაშ უნარ. აუცილებერ რე, ქრისტიანეფქ გავითარან თე უნარ დო ქიდიგურუან ყურადღებათ მორჩქილაფა დო გემუან ჩიება. თე საკითხწკუმა დაკავშირებით პრაქტიკულ რჩევას მარზენა მოწაფე იაკობ: „თითოულ მზათ რდას მარჩქილაფარო დო ვეჩქარას მუთუნიშ რაგად“ (იაკ. 1:19). მუჟამსით მიდგაინს ყურადღებათ ურჩქილეთ, თეთ ოძირანთ, ნამდა თქვანო არძა ართ ვა რე თიშ ნარაგად დო გურშა მეიღნა თიშ გაჭირება (1 პეტ. 3:8). მუჟამსით გიჭირა თიშ ინონჭაფა, მუშ რაგად ოკო პიროვნებას ვარდა მუს გინაფლენს, ქუდუსვით კითხვეფ. თეშ უკულ, ვეჩქარათ ჩიებაშ დოჭყაფა დო დეფიქრით, მუშ რაგად იჸუაფ ჯგირ (იგავ. 15:28). ქოკითხით თქვან დუდის: ქორენო სიმართლე თინა, მუდგაშ რაგად მილამ დო ელუკინანქო გურშა თის ჩქიმ სიტყვეფით? ქორენო ჩქიმ სიტყვეფ პატიცემაშ მაძირაფალ? მაგალით გეჭოფით თი სულიერო მოწიფულ დალეფშე, მიდგას ჯგირო აფუნა გავითარებულ ყურადღებათ მორჩქილაფაშ დო გემუანო ჩიებაშ უნარ (წეკითხით იგავეფიშ 31:26). ყურადღებათ ქიდეკვირით, მუს დო მუჭო იჩიებუნა თინეფ. რშუდან, მუთ უმოსო გაუჯგუშენთ კომუნიკაციაშ უნარს, თით უმოს სასიამოვნო ურთიერთობა გაღვენუნა შხვეფწკუმა.

13. მის შეულებ დუგოგურუან ჸუდეშ საქვარიშ კეთება? (ქოძირით სურათ).

¹³ ქიდიგურეთ ჸუდეშ საქვარიშ კეთება. ნამთინე ქიანას ჸუდეშ საქვარს უმოსო ოსურეფ ორთუნა. თიშ დოგურაფას, მუჭო აკეთათ ჸუდეშ საქვარ შილებე დიდაქ ვარდა ნამდგაინ დაქ ქიმგეხვარან, მიდგას ჯგირო უჩქჷ თე საქმე. ართ და, სახელო სინდი, იჩიებ: „ართ-ართ მნიშვნელოვან მუდგარენ მუდგას დიაჩქიმ მოგურუანდჷ თინა რდჷ, ნამდა საქმეს შურ დო გურ ინობდვიკო დო მიბღიკო ხიოლ ჩქიმ ნახანდით. თეს მანგარო ვაფასენქ. ბაღანობაშე დიბგურე ოჭკუმალიშ კეთება, ჸუდეშ დონწყუალა, ჭალა დო ფარაშ ჭკვერულო ხარჯება, მუდგაქ ცხოვრებას მანგარო ეწმოდირთჷ დო მიმეხვარ, უმოს ვაკეთკო იეჰოვაშ მსახურებას. თეს გეძინელ, დიაჩქიმქ სტუმარიშ ჸოროფაშ გიმორჩქინა ხოლო დუმოგურუ, მუდგაქ საშვალება ქომუჩ, გეფჩინებაფეკო და დო ჯიმალეფ, მით ჯგირ მაგალით იჸუაფუდეს ჩქიმო“ (იგავ. 31:​15, 21, 22). მოხანდე დო სტუმარიშ მოჸოროფე ოსურ, მიდგას ჯგირო უჩქჷ ჸუდეშ საქვარიშ კეთება, კურთხევა რე, მუჭოთ ოჯახშო, თეშ კრებაშო (იგავ. 31:13, 17, 27; საქ. 16:15).

14. მუს ბგურაფლენთ კრისტალიშ მაგალითშე დო მუშა ოკო მაფუდან ყურადღება გინოღალირ?

¹⁴ ქიდიგურეთ დუდიშ ეჯუმალა. არძა სულიერო მოწიფულ ქრისტიანს ოკო შეულებდას დუდიშ ეჯუმალა (2 თეს. 3:​7, 8). ართ და, სახელო კრისტალ, იჩიებ: „ჩქიმ მშობლეფ მოხვარდეს პრაქტიკულ პროფესიაშ გიშაგორუას. მაგალთო, მუაჩქიმქ ელამიჩ, დიბგურეკო ბუღალტერია, მუდგაქ მანგარო ეწმოდირთჷ“. მარა რშუდან, ხვალე თინა ვა რე მნიშვნელოვან, ნამდა სამუშაშ  დაჭყაფალო პრაქტიკულ პროფესია გიშეგორათ, მნიშვნელოვან რე თინა ხოლო, ნამდა დიგურუათ თქვან ნამუშერ ფარაშ გონივრულო გიმორნაფა (იგავ. 31:​16, 18). საჭირო ვა რენ ფერ ვალეფს დუდის ეუჩილითუანთ დო მუთ გიღნან თის ქიგეჯერდუთ-და, შეგალებენა მთელ ყურადღება თქვან სულიერ მიზნეფშა გეგნიღათ (1 ტიმ. 6:8).

15, 16. მუშენ რენა თანაქრისტიანეფშო ძვირფას დაუქორწინებელ დალეფ? (მარ. 10:29, 30).

¹⁵ მუჟამსით ღორონთიშ მოსაწონ თვისებეფს დო თიცალ უნარეფს გავითარენთ, ნამუთ ირდღაშიან ცხოვრებას გიმგოდირთუნა, მზათ იჸუაფუთ მომავალ გადაწყვეტილებეფშო დო პასუხიშმგებლობეფშო. მორთ ასე გუვარჩუათ თინეფშე ნამთინე.

¹⁶ დაუქორწინებლობა. ნამთინე და იესოშ სიტყვეფიშ თანახმას იქციებ დო გინოჭყვიდუნს, ვედექორწინას, თიშ უმკუჯინუო, ნამდა თენა მუშ კულტურას მეღებულ ვა რე (მათ. 19:​10—12). შხვეფს დაუქორწინებლობაშო შხვა მიზეზეფ უღნა. დალეფ, დარწმუნებულ რდათ, იეჰოვა დო იესო ვა ფიქრენა, ნამდა გათხილ ვა რეთინ თიშენ მუთუნ ფას ვაიღნა. პირიქით, თინეფიშ თოლს მანგარ ძვირფასეფ რეთჷ! მთელ მსოფლიოს დაუქორწინებელ დალეფ ბრელ ჯგირ საქმეს ორთუნა კრებაშო. თინეფს მანგარო უჸორა და დო ჯიმალეფ დო ზრუნენა თინეფშო, მუდგაშ შედეგო, ბრელ თანაქრისტიანიშ სულიერ დალეფო დო დიდალეფო გინირთეს (წეკითხით მარკოზიშ 10:​29, 30; 1 ტიმ. 5:2).

17. მუშ კეთება შეილებნა ამდღარშე, ნამდა დიჭყათ სრულ დროთ მსახურება?

¹⁷ სრულ დროთ მსახურება. დალეფ ბრელ მუდგარენს ორთუნა სახიოლო ამბეშ ქადაგებაშ საქმეს (ფსალმ. 68:11). ახალგაზრდა დალეფ, დეფიქრით შეილებნანო ამდღარშე გიღდან მიზანო, დიჭყათ სრულ დროთ მსახურება? მაგალთო, შეილებნა იმსახურათ პიონერო, სამშენებლო პროექტეფს ვარდა ბეთელს. ქილოცით თქვან მიზანიშ გურშენ. ქუდურაგადეთ თი და დო ჯიმალეფს, მიდგას მენჭირნაფილ აფუნა თი მიზანშა, მუთ თქვა გიღნა დო ქეცადით, ქოძირათ თქვან მხარეშე მუშ კეთება რე საჭირო, ნამდა ქიდიჭყათ სრულ დროთ მსახურება. თე ირფელიშ უკულ დეფიქრით, კონკრეტულო მუ ნაბიჯეფიშ გინოდგუმა შეილებნა, ნამდა ქიმიოჭირინუათ თქვან მიზანს დო მიაჸუნით გეგმას. სრულ დროთ მსახურებაშ დოჭყაფა იეჰოვაშ მსახურებაშ შხვადოშხვა კარს გოინჯანა დო მიგეხვარებნა, მუთ შილებე მეტ აკეთათ თიშო.

18. მუშენ ოკო რდას და ყურადღებათ მომავალ მეუღლეშ გიშაგორუაშ დროს? (ქოძირით სურათ).

¹⁸ დაქორწინება. თი თვისებეფიშ დო უნარეფიშ გავითარება, ნამდგაშე ჟი იფჩით, მიგეხვარებნა, რდათ ჯგირ მეუღლე. დაქორწინება ქოილამნან-და, მუშო ოკო რაგად, ყურადღებათ ოკო გიშეგორათ  თქვან მომავალ მეუღლე. ქორწინება რე ართ-ართ არძაშ უმოს მნიშვნელოვან გადაწყვეტილება, მუდგას პიროვნება მუშ ცხოვრებას ღებულენს. რშუდან, თქვა ოკო მიაჸუნათ თიშ მეთაურობას, მიდგაშეთ დექორწინებუთ (რომ. 7:2; ეფეს. 5:​23, 33). ათეშენ, დაქორწინებაშახ ქოკითხით თქვან დუდის: ქორენო თე ჯიმა სულიერო მოწიფულ ქრისტიან? ქიგურენო იეჰოვაშ მსახურება ცხოვრებას პირველ ადგილს? ქოღებულენსო ბრძნულ გადაწყვეტილებეფს? ქაღიარენსო შეცდომეფს? გიმირჩქინანსო პატიცემას ოსურკათაშ მიმართ? შეიალებენო იზრუნას ჩქიმდე სულიერო, მატერიალურო დო ემოციურო? ჯგირო ქასრულენსო მუშა მენდებულ პასუხიშმგებლობეფს? მაგალთო, მუ დავალებეფ უღჷ კრებას დო მუჭო ასრულენს თინეფს? (ლუკ. 16:10; 1 ტიმ. 5:8). არგამა რე, ქუგოკონა ჯგირ მეუღლე ქორჸუნდან-და, თქვა ხოლო ოკო რდათ ჯგირ.

19. მუშენ რე პატი ოსურშო, რდას ქომონჯიშ „დამხმარე“?

¹⁹ ბიბლია იჩიებ, ნამდა ჯგირ ოსურ ქომონჯშო რე, მუჭოთ „დამხმარე“ დო „აკმაფშაფალ“ (დაბ. 2:18). ამცირენსო თენა ოსურს დო ფასის უდინუანსო თის? ვარ! თიშო პატი რე, რდას ქომონჯიშ „დამხმარე“, მუშენდა ბიბლიას იეჰოვაშ გურშენ ხოლო ხშირას ჭარჷ, ნამდა თინა რე „დამხმარე“ (ფსალმ. 54:4; ებრ. 13:6). ოსურშე მართალო ირაგადე, ნამდა თინა ქომონჯიშ დამხმარე რე, მუჟამსით ხუჯის უკინენს დო ელურე თიცალ გადაწყვეტილებეფიშ მეღებაშ დროს, ნამუთ მნიშვნელოვან რე ოჯახშო. თეცალ ოსურს იეჰოვაშ ჸოროფა აღძრენს, ირფელ გაკეთას თიშო, ნამდა მუშ ქომონჯის შხვეფიშ თოლს, ჯგირ რეპუტაცია უღდას (იგავ. 31:​11, 12; 1 ტიმ. 3:11). თაშ ნამდა, მუჟამსით გემანგარენთ იეჰოვაშ მიმართ ჸოროფას დო იჸუაფუთ დამხმარე შხვეფშო, მუჭოთ ჸუდეს თეშ კრებას, თენა ამდღარშე მუგამზადენა მომავალ პასუხიშმგებლობაშო, ნამდა რდათ ჯგირ მეუღლე.

20. მუშ კეთება შეულებ ოჯახშო დიდას?

²⁰ დიდალობა. დაქორწინებაშ უკულ შილებე თქვა დო თქვან მეუღლექ გეგნოჭყვიდათ, ნამდა რჸუნდან სქუალეფ (ფსალმ. 127:3). თაშ ქორენ-და, მუშო ოკო რაგად, ჭკვერულ იჸუაფ, დეფიქრათ, მუ რე საჭირო თიშო, ნამდა რდათ ჯგირ დიდა. თი თვისებეფ დო უნარეფ, ნამუთ თე სტატიას გუვარჩით, მიგეხვარებნა, რდათ მუჭოთ ჯგირ მეუღლე თეშ ჯგირ დიდა. თქვან გიმორჩქინელ ჸოროფა, სიკეთე დო მოთვინება, ხეს შეუნწყუნს, ნამდა გიღდან ბედნერ ოჯახ, სოდეთ ბაღანეფ თხილერო იგინანა დუდის (იგავ. 24:3).

21. მუშენ ვაფასენთ დალეფს? (ქოძირით სურათ გალენ გვერდის).

²¹ ძვირფას ახალგაზრდა დალეფ, რშუდან, მანგარო მიჸორთ დო გაფასენთ თი ირფელიშ გურშენ, მუდგას იეჰოვაშო დო თიშ ხალხშო ორთუთ (ებრ. 6:10). თქვა ბრელს ხანდენთ თიშო, ნამდა გავითარათ ღორონთიშ მოსაწონ თვისებეფ დო უნარეფ, ნამუთ ირდღაშიან ცხოვრებას გიმგოდირთუნა დო ჯგირობუაშ მუმაღალარ იჸუაფ, მუჭოთ თქვანო, თეშ შხვეფშო ხოლო. თეს გეძინელ, მონდომას ვარკენთ, ნამდა მემზადათ მომავალ გადაწყვეტილებეფშო დო პასუხიშმგებლობეფშო. დალეფ, თქვა მართალო მანგარ ძვირფას რეთჷ იეჰოვაშ ორგანიზაციაშო!