1. მუ ოკო აკეთან ჯიმალეფქ, ნამდა ქიმიოჭირინუან სულიერ მოწიფულობას?

 ᲛᲝᲪᲘᲥᲣᲚ პავლექ კორინთის მახორუ ჯიმალეფს ელუჩ: „ჯიმალეფ, ბაღანეფცალო ვეაზროვნათ . . . რდათ . . . აზროვნებათ ძინათებულეფ“ (1 კორ. 14:20). მნიშვნელოვან რე, თე რჩევა არძა ჯიმაქ გიმირინუას. თინეფქ სულიერ მოწიფულობას ქიმიოჭირინუანინ აუცილებერ რე, დიგურუან ღორონთიშ კანონეფიშ მორჩილება დო ბიბლიურ პრინციპეფიშ გიმორნაფა ცხოვრებაშ ირნერ მხარეს (ლუკ. 2:52). მუშენ რე მნიშვნელოვან, ახალგაზრდა ჯიმალეფქ ინჭუან სულიერ მოწიფულობაშა?

2, 3. მუშენ რე მნიშვნელოვან, ნამდა ახალგაზრდა ჯიმალეფქ ქიმიოჭირინუან სულიერ მოწიფულობას?

² ქრისტიან ჯიმალეფს ბრელ მნიშვნელოვან პასუხიშმგებლობა უღნა, მუჭოთ ოჯახის, თეშ კრებას. ახალგაზრდა ჯიმალეფ, მუშო ოკო რაგად, ფიქრენდათ იჸი თქვან მომავალ პასუხიშმგებლობეფშო. შილებე მიზანო გიღდან სრულ დროთ პიონერო, მომსახურეთ ვარდა უხუცესო მსახურება. თეს გეძინელ, შილებე გინოჭყვიდილ გაფდან, დექორწინათ დო რჸუნდან სქუალეფ (ეფეს. 6:4; 1 ტიმ. 3:1). თე მიზნეფს ქიმიოჭირინუათ დო თქვან პასუხიშმგებლობეფ ჯგირო შეასრულათინ, სულიერ მოწიფულობა რე საჭირო. b

³ ახალგაზრდა ჯიმალეფ, მუ მიგეხვარებნა, ქიმიოჭირინუათ სულიერ მოწიფულობას? თეშო მნიშვნელოვან რე, გავითარათ შხვადოშხვა უნარეფ. მორთ ასე ქიგებგათ, მუ ოკო აკეთათ, ნამდა ამდღარშე მემზადათ მომავალ პასუხიშმგებლობეფშო დო თიშო, ნამდა ჯგირო შეასრულათ თინეფ.

4. მიშ მაგალითის შეულებნა მიაჸუნან ახალგაზრდა ჯიმალეფქ? (ქოძირით სურათ).

⁴ გეგშეგორით, მიშ მაგალითის მიაჸუნუთ. ბიბლია ეფშა რე ღორონთიშ ართგურ ქომოლკათაშ ისტორიეფით, მიდგაშეთ ბრელ მუდგარენიშ გურაფა შეილებნა. თინეფს უჸორდეს იეჰოვა დო ჯგირო ასრულენდეს მუნეფშა მენდებულ პასუხიშმგებლობას, ნამდა იზრუნესკო ღორონთიშ ხალხშე. თეს გეძინელ, შილებე თქვან ოჯახის ვარდა კრებას რდას სულიერო მოწიფულ ქომოლკოჩ, მიდგაშ მაგალითის შეილებნა მიაჸუნათ (ებრ. 13:7). დო მუთ არძაშ უმოს მთავარ რე, რჸუნა სრულყოფილ მაგალით, იესო ქრისტე (1 პეტ. 2:21). თე ქომოლკათაშ მაგალითეფშე დაფიქრებაშ დროს ქიდეკვირით თინეფიშ თვისებეფს დო დეფიქრით, თქვა მუჭო შეილებნა მიაჸუნათ თინეფიშ მაგალითის (ებრ. 12:​1, 2).

5. მუჭო შეილებნა სწორას აზროვნებაშ უნარიშ გავითარება დო მუშენ რე თენა მნიშვნელოვან? (ფსალმ. 119:9).

⁵ გავითარით სწორას აზროვნებაშ უნარ დო მუთხილეთ თის (იგავ. 3:21). ჭკვერ კოჩ ხეთეშე ვა მოქმედენს დო ონდო მუდგაინიშ კეთებას გინოჭყვიდუნდას, ჯგირო ფიქრენს. ათეშენ, ბრელ იხანდით, ნამდა გავითარათ სწორას აზროვნებაშ უნარ. მუშენ რე თენა მნიშვნელოვან? მუშენდა, ამდღარ ქვეყნიერებას ახალგაზრდა ბოშეფ მუნეფიშ ჭკუაშა მოქმედენა დო ეჸუნა ემოციეფს (იგავ. 7:7; 29:11). თეს გეძინელ, აზროვნებაშა მანგარო მოქმედენს მედია ხოლო. მუჭო შეილებნა გავითარათ სწორას აზროვნებაშ უნარ? თეშ კეთება ქიდიჭყით ბიბლიურ პრინციპეფიშ გიმორკვიებათ დო თიშე დაფიქრებათ, მუ ჯგირობუა მოუღ თინეფს თქვანდა. თეშ უკულ, ეცადით, გეგმირინუათ თე ბიბლიურ პრინციპეფ, მუთ მიგეხვარებნა თიცალ გადაწყვეტილებეფიშ მეღებას, ნამუთ განადიდენს იეჰოვას (წეკითხით ფსალმუნიშ 119:9). სწორას აზროვნებაშ უნარს გავითარენთ-და, გარაგადენა, ნამდა სულიერ მოწიფულობაშა მნიშვნელოვან ნაბიჯ გაფნა გინოდგუმილ (იგავ. 2:​11, 12; ებრ. 5:14). მორთ ასე გუვარჩუათ, მუჭო მიგეხვარებნა თე უნარ, მიქცუათ სწორას, მუჟამსით საქმე ოხუ დალეფწკუმა ურთიერთობას დო მიკოქუნა დო გარეგნობას.

6. მუჭო მეხვარებ სწორას აზროვნებაშ უნარ ჯიმალეფს, პატიცემა გეგმირჩქინან ოსურკათაშ მიმართ?

⁶ ქომოლკოჩის სწორას აზროვნებაშ უნარ მეხვარებ, პატიცემა გიმირჩქინას ოსურკათაშ მიმართ. მუშო ოკო რაგად, გასაკვირ მუთუნ ვა რე, ნამდა ახალგაზრდა ჯიმას დაქ მეწონას დო თიწკუმა ურთიერთობაშ დოჭყაფა ოკოდას. მარა ჯიმას, მიდგას სწორას აზროვნებაშ უნარ უღჷ, დაქორწინება ვა ულამ დო თეშე სერიოზულო ვა  ფიქრენს-და, ვემეჭარუნს, ვა უწინს დო ვაკეთენს თიცალ მუდგარენს, მუთ დას ოფიქრებაფუანდჷ, ნამდა თის მოწონს (1 ტიმ. 5:​1, 2). ჯიმას დაწკუმა რომანტიკულ ურთიერთობა ქუღუნ-და, ირნერო მუთხილუანს თიშ რეპუტაციას დო, მუჟამსით ქუმოხვადნა თიცალ სიტუაციას, სოდეთ შხვეფ ვა ძირნა, ირფელს გაკეთენს, ნამდა თინეფწკუმა ართო მოწიფულ ქრისტიან ხოლო რდას (1 კორ. 6:18).

7. მუჭო მეხვარებ სწორას აზროვნებაშ უნარ ახალგაზრდა ჯიმას მიკოქუნა დო გარეგნობაწკუმა დაკავშირებულ გადაწყვეტილებაშ მეღებას?

⁷ ახალგაზრდა ჯიმას მუშ მიკაქუნალით დო გარეგნობათ ხოლო შეულებ ოძირუას, ნამდა უღჷ სწორას აზროვნებაშ უნარ დო თე საკითხის იეჰოვაშ თოლით უჯინე. ხშირას თი მიკაქუნალ, ნამუთ მოდას რე თიცალ კათაშ მოგონილ დო გავრცელებურ რე, მიდგას შურო მუთუნო ვემიორჩქ იეჰოვაშ ნორმეფ დო უზნეო ცხოვრებაშ წესის მეჸუნს. თინეფიშ უზნეო აზროვნება არგამათ იძირე მიკოქუნაშ თიცალ სტილშე, ნამუთ რე მორწკიპილ დო ქომოლკოჩის ოსურკოჩიშ მეჯინას არზენს. ახალგაზრდა ჯიმა, მით სულიერ მოწიფულობაშა ინჭუაფ, იხემძღვანელენს ბიბლიურ პრინციპეფით დო მიაჸუნუ შხვა სულიერო მოწიფულ ჯიმალეფიშ მაგალითის. მუჟამსით საქმე ოხუ მიკოქუნას, თის შეულებ მუშ დუდის კითხას: ქიძირენო ჩქიმ მიკოქუნა დო გარეგნობაშე, ნამდა გიმიფრჩქინანქ გონიერებას დო იფთვალისწინენქ შხვეფს? დასურო იძირენო ჩქიმ მიკოქუნაშე, ნამდა იეჰოვაშა მაფჷ დუდ მეძღვინელ დო თის ვომსახურუქ, დოვარ უჭირა შხვეფს თეშ დაჯერება? (1 კორ. 10:​31—33; ტიტ. 2:6). ახალგაზრდა ჯიმა, მიდგას სწორას აზროვნებაშ უნარ უღჷ, ხვალე და დო ჯიმალეფიშ მოწონას ვარინ, მუშ ზეციერ მუმაშ მოწონას ხოლო მიღენს.

8. მუშ კეთება შეულებ ახალგაზრდა ჯიმას, ნამდა რდას სანდო პიროვნება?

⁸ რდათ სანდო. სანდო ახალგაზრდა მუშ არძა დავალებას პასუხიშმგებლობათ ასრულენს (ლუკ. 16:10). თეშ სრულყოფილ მაგალით იესო ქრისტექ დომტეს. თინა ვა რდჷ უპასუხიშმგებლო პიროვნება დო არდებულო ვემურდჷ საქმეს. თეშ გინაწონს, მთელ პასუხიშმგებლობათ ასრულენდჷ იეჰოვაშე მეღებულ ირნერ დავალებას, თიმწკუმა ხოლო, მუჟამსით თეშ კეთება ადვილ ვა რდჷ. იესოს უჸორდჷ ადამიანეფ დო განსაკუთრებულო მუშ მოწაფეეფ. ზუსტას ჸოროფაქ აღძრჷ თინა, მუშ სიცოცხლე დათმუკო შხვეფშო (იოან. 13:1). ახალგაზრდა ჯიმალეფ, მიაჸუნით იესოშ მაგალითის დო ბრელ იხანდით, ნამდა პასუხიშმგებლობათ შეასრულათ თქვანდა მენდებულ არძა დავალება. მუჟამსით ვაიჩქნა, მუჭო შეასრულათ თქვანდა მენდებულ საქმე გეგმირჩქინით თანდაბლობა დო ქოთხით მოხვარა სულიერო მოწიფულ ჯიმალეფს. მუჟამსით მუდგაინ საქმეს დუგავალენა დღას ვეგეჯერდათ აკაბურცხაშ კეთებას (რომ. 12:11). მთელ შურ დო გურ ქინოდვით თქვანდა მენდებულ დავალებას დო თეშ შეასრულით თინა „ითამ იეჰოვაშო ორთუდათ დო ვართ ხოლო ადამიანეფშო“ (კოლ. 3:23). მუშო ოკო რაგად, სრულყოფილეფ ვა რეთჷ დო დავალებაშ შესრულებაშ დროს შილებე შეცდომეფქ მოირთან, ათეშენ, გეგმირჩქინით თანდაბლობა დო აღიარით თი შეცდომეფ, ნამუთ მუგალენა (იგავ. 11:2).

9. მუშენ ოკო გავითარას ახალგაზრდა ჯიმაქ შხვადოშხვა უნარ?

⁹ ახალგაზრდა ჯიმალეფ, სულიერ მოწიფულობას ქიმიოჭირინუათინ, აუცილებერ რე, გავითარათ  თიცალ უნარეფ, ნამუთ ირდღაშიან ცხოვრებას გიმგოდირთუნა. თე უნარეფიშ გავითარება მიგეხვარებნა, ჯგირო შეასრულათ თქვანდა მენდებულ პასუხიშმგებლობეფ, ქიშუათ სამუშა, ეიჯუმუათ, მუჭოთ თქვან დუდ, თეშ ოჯახ დო გიღდან ჯგირ ურთიერთობა შხვეფწკუმა. მორთ ასე გუვარჩუათ ნამთინე მნიშვნელოვან უნარ, ნამუთ ოკო გავითარათ.

10, 11. მუ ჯგირობუას მოუღანს კითხირ დო ჭარუაშ ჯგირო გურაფა, მუჭოთ ახალგაზრდა ჯიმას, თეშ მთელ კრებას? (ფსალმ. 1:1—3; ქოძირით სურათ).

¹⁰ ქიდიგურეთ ჯგირო კითხირ დო ჭარუა. ბიბლია იჩიებ, ნამდა ბედნერ დო ხეგომორძგვილ რე კოჩ, მით ირდღას კითხულენს ღორონთიშ სიტყვას დო ფიქრენს თიშე (წეკითხით ფსალმუნიშ 1:1—3). ბიბლიაშ ირდღაშიან კითხირით პიროვნება ქინანჭუ იეჰოვაშ აზროვნებას, მუთ მეხვარებ, მუქ ხოლო გავითარას სწორ აზროვნება დო ცხოვრებას გეგმირინუას ნაგურეფ (იგავ. 1:3, 4). თეცალ ჯიმალეფ მართალო საჭირო რენა კრებას. მორთ ასე გუვარჩუათ, მუშენ იფჩიებუთ თეს.

¹¹ და დო ჯიმალეფ ბიბლიაშა გერსხილ რჩევეფიშ დო მითითებეფიშ მიოღებელო თიცალ ჯიმალეფშა მეულა, მიდგას გურაფაშ უნარ უღნა (ტიტ. 1:9). თაშ ნამდა, კითხირ დო ჭარუას ჯგირო ქიდიგურუანთ-და, შეგალებენა მამზადათ აზრიან დო რწმენაშ გუმამანგარებელ მოხსენებეფ დო კომენტარეფ. თეს გეძინელ, შეგალებენა ქინიჭარათ პირად გურაფაშ დროს ძირაფილ საინტერესო აზრეფ დო თი აზრეფ ხოლო, ნამდგაქ კრებაშ შეხვალამეფს ვარდა კონგრესეფს მორჩქილაფირ მოხსენებეფს მიგეწონეს. თეცალ ჩანაწერეფიშ ჭყოლოფათ, გემანგარენთ რწმენას დო შეგალებენა შხვეფს ხოლო ელუკინათ გურშა.

12. მუ მიგეხვარებნა კომუნიკაციაშ უნარიშ გავითარებას?

¹² გავითარით კომუნიკაციაშ უნარ. თი პიროვნება, მიდგას თე უნარ გავითარებულ აფჷ, ყურადღებათ ურჩქილე შხვეფს დო არჩქილე თინეფიშ (იგავ. 20:5). თეს გეძინელ, პიროვნებაშ ხუმაშ ტონით, სახეშ გამომეტყველებათ დო ჟესტეფით გებულენს, მუს გინაფლენს თინა. ხალხწკუმა ურთიერთობას დრო ვეგმურთით-და, თე ირფელ ვადგაგურენა. ადამიანეფწკუმა ურთიერთობა ირიათო ელექტრონულ მოწყობილობეფით დო წერილეფით ქოიღნან-და, გაიჭირდუნა თინეფწკუმა პირისპირ ურთიერთობა. ათეშენ ირნერო ეცადით, ადამიანეფს პირისპირ ეჩუათ (2 იოან. 12).

13. ხოლო მუ ოკო დიგურუას ახალგაზრდა ქომოლკოჩიქ? (1 ტიმ. 5:8; ქოძირით სურათ).

¹³ ქიდიგურეთ დუდიშ ეჯუმალა. სულიერო მოწიფულ ქომოლკოჩის ოკო შეულებდას, მუჭოთ მუშ დუდიშ, თეშ ოჯახიშ ეჯუმალა (წეკითხით 1 ტიმოთეშ 5:8). ნამთინე ქიანას ახალგაზრდას ხელობას მუმა ვარდა ნამთინე ნათესე ოგურუანს. შხვა ქიანეფს ახალგაზრდეფ სკოლას ბოლო წანეფს ღებულენა პროფესიულ განათლებას. მუჭოდგა ვა რდასინ, ირფელ გაკეთით, ნამდა ქიდიგურუათ თიცალ მუდგარენ, მუთ მიგეხვარებნა სამუშაშ შიბას (საქ. 18:​2, 3;  20:34; ეფეს. 4:28). ირნერო ქეცადით, ნამდა გიღდან თიცალ კოჩიშ სახელ, მით ბრელს ხანდენს დო დოჭყაფილ საქმე ბოლოშა მეჸუნს. თაშ ქიმიქციებუთ-და, უმოს შანს გაღვენუნა, ქიშუათ სამუშა დო ვემიოდინუათ თინა. თი თვისებეფ დო უნარეფ, ნამუთ გუვარჩით აუცილებერ რე ქრისტიან ქომოლკოჩშო, ნამდა მემზადას მომავალ პასუხიშმგებლობეფშო დო ჯგირო შეასრულას თინეფ. მორთ ასე გუვარჩუათ, მუ პასუხიშმგებლობეფ შილებე უღდას ქრისტიან ქომოლკოჩის.

14. მუჭო შეულებ ახალგაზრდა ჯიმას, მემზადას სრულ დროთ მსახურებაშო?

¹⁴ სრულ დროთ მსახურება. ბრელ სულიერო მოწიფულ ქრისტიანქ სრულ დროთ მსახურება ახალგაზრდობას დიჭყჷ. პიონერობა ოხვარ ახალგაზრდა ქომოლკოჩის, ქიდიგურუას შხვადოშხვა ხასიათიშ ადამიანეფწკუმა თანამშრომლობა. თეს გეძინელ, ოგურუანს ფარაშ გონივრულო ხარჯებას (ფილ. 4:​11—13). შეილებნა სრულ დროთ პიონერობაშ დოჭყაფაშახ, მუდგარენ პერიოდის, დამხმარე პიონერო იმსახურათ. ბრელ ქრისტიანქ აკეთ თენა, მუდგაქ მეხვარ თინეფს, გეგნოდგესკო ნაბიჯ დო ქიდიჭყესკო სრულ დროთ პიონერო მსახურება. ახალგაზრდა ჯიმალეფ, პიონერობა შესაძლებლობას მერჩანა, იმსახურათ სრულ დროთ მსახურებაშ შხვადოშხვა სფეროს, მაგალთო, მუნერით რე მშენებლობა ვარდა ბეთელ.

15, 16. მუშ კეთება შეულებ ახალგაზრდა ჯიმას, ნამდა იმსახურას მომსახურეთ ვარდა უხუცესო?

¹⁵ მომსახურეთ ვარდა უხუცესო მსახურება. ჯიმას მიზანო ოკო უღდას, იმსახურას უხუცესო დო იზრუნას და დო ჯიმალეფშა კრებას. ბიბლია იჩიებ, ნამდა თე პასუხიშმგებლობაშა ინჭუაფუნ თის „ჯგირ საქმე ნოკობუე“ (1 ტიმ. 3:1). უხუცესო მსახურებაშ დოჭყაფაშახ ჯიმა დიო მომსახურე ოკო რდას. მომსახურეეფ ქიანაშ საქმეშ კეთებას ოხვარნა უხუცესეფს. ქოთ მომსახურეეფ დო ქოთ უხუცესეფ თანდაბლობას გიმირჩქინანა დო ზრუნენა და დო ჯიმალეფშა. თეს გეძინელ, მთელ მონდომათ ღებულენა მონაწილებას სახიოლო ამბეშ ქადაგებას. ახალგაზრდა ჯიმაქ შილებე მომსახურეთ 17 წანაშე ხოლო დენიშნას დო უხუცესო მსახურებაშო დაჭყაფალ არძა მოთხოვნას ქაკმაყოფილენს-და, 20 წანაშ ასაკის შილებე თე პასუხიშმგებლობა ხოლო მიღას.

¹⁶ ჯიმაქ მომსახურეთ დო უმოს გვიანო, უხუცესო ქიმსახურასინ, საჭირო რე, აკმაყოფილენდას თი მოთხოვნეფს, ნამუთ ბიბლიას რე გიმოკოროცხილ. თე პასუხიშმგებლობეფიშ მიოღებელო საჭირო მოთხოვნეფ გერსხილ რე იეჰოვაშ, ოჯახიშ დო კრებაშ ჸოროფაშა (1 ტიმ. 3:​1—13; ტიტ. 1:​6—9; 1 პეტ. 5:​2, 3). მუჭო შეილებნა მიოჭირინუათ თე მიზანს? ირნერო ქეცადით, ჯგირო ქინანჭათ თითოულ მოთხოვნას დო იეჰოვას ქოთხით, ქიმგეხვარან ნამდა აკმაყოფილენდათ თინეფს. c

17. მუჭო შეულებ ახალგაზრდა ჯიმას, მემზადას ქომონჯიშ დო ოჯახიშ დუდიშ პასუხიშმგებლობაშო? (ქოძირით სურათ).

 ¹⁷ ქომონჯიშ დო ოჯახიშ დუდიშ პასუხიშმგებლობა. იესოქ თქუ, ნამდა ნამთინე ქრისტიან ისხუნუანს, ვედექორწინას (მათ. 19:12). მარა თქვა დაქორწინებას გეგნოჭყვიდუნთ-და, თქვან დუდშა ეჭოფუნთ ქომონჯიშ დო ოჯახიშ დუდიშ პასუხიშმგებლობას (1 კორ. 11:3). იეჰოვა ქომონჯშე ითხინს, ნამდა უჸორდას მუშ ოსურ დო იზრუნას თიშ ფიზიკურ, ემოციურ დო სულიერ საჭიროებეფშო (ეფეს. 5:​28, 29). თი თვისებეფ დო უნარეფ, ნამუთ თე სტატიას გუვარჩით, მუნერით რე, სწორას აზროვნებაშ უნარ, ოსურკათაშ პატიცემა დო სანდოობა, მიგეხვარებნა, რდათ ჯგირ ქომონჯ. თეს გეძინელ, ჯგირო მუგამზადენა ოჯახიშ დუდიშ პასუხიშმგებლობაშო.

18. მუჭო შეულებ ახალგაზრდა ჯიმას, მემზადას მუმალობაშო?

¹⁸ მუმალობა. დაქორწინებაშ უკულ, შილებე სქუალეფქ ქუგაშუან. იეჰოვაშ მაგალით მიგეხვარებნა, რდათ ჯგირ მუმა (ეფეს. 6:4). თინა ირიათო ურაგადუდ იესოს, ნამდა უჸორდჷ დო იწონუანდჷ თის (მათ. 3:17). თქვა ხოლო სქუა ქუგაჸვენუნან-და, ხშირას ქუწით თის, ნამდა გიჸორა დო ქაცქვეთ, მუჟამსით ჯგირო ქიმიქციებ. იეჰოვაშ მაგალითიშ მეჸუნათ მეხვარებუთ სქუას, გინირთას სულიერო მოწიფულ ქრისტიანო. მუჭო შეილებნა ამდღარშე მემზადათ თიშო, ნამდა მომავალს რდათ ჯგირ მუმა? თეშ მიოჭირნაფალო ჯგირ იჸუაფ, ოჯახის დო კრებას გეგმოხანტათ ჸოროფა შხვეფიშ მიმართ დო ქაცქუათ თინეფს (იოან. 15:9). ჯიმალეფ, თე ირფელიშ კეთება ხვალე თის ვემგეხვარებნა, ნამდა მემზადათ მომავალ პასუხიშმგებლობაშო, თის ხოლო მიგეხვარებნა, ნამდა ამდღარშე უმოს გაკეთათ იეჰოვაშო, თქვან ოჯახშო დო კრებაშო.

19, 20. მუ მეხვარებნა ახალგაზრდა ჯიმალეფს, გინირთან მოწიფულ ქრისტიანეფო? (ქოძირით სურათ გალენ გვერდის).

¹⁹ ახალგაზრდა ჯიმალეფ, სულიერო მოწიფულ ქრისტიანეფო ავტომატურო ვეგნირთუთ. საჭირო რე, თქვან მხარეშე მუდგაინ გაკეთათ. ოკო გეგშეგორათ მიშ მაგალითის მიაჸუნუთ, გევითარათ სწორას აზროვნებაშ უნარ, რდათ სანდოეფ, გავითარათ თიცალ უნარეფ, ნამუთ ირდღაშიან ცხოვრებას გიმგოდირთუნა დო მემზადათ მომავალ პასუხიშმგებლობეფშო.

²⁰ მუჟამსით ფიქრენთ თი ირფელშე, მუთ ოკეთებელ გაფნა, შილებე თენა რთულო გაძირედან, მარა თქვა შეგალებენა თეშ კეთება. რჯერდან, იეჰოვას ხოლო მთელ გურით ოკო, ნამდა მიგეხვარან (ეს. 41:10, 13). მუშო ოკო რაგად, კრებას და დო ჯიმალეფ ხოლო ირნერო ქელაიდირთუნა. თაშ ნამდა, მუჟამსით ირფელს გაკეთენთ, ნამდა რდათ სულიერო მოწიფულ ქრისტიან, თქვან ცხოვრება აზრიან დო კმაყოფილებათ ეფშა იჸუაფ. ახალგაზრდა ჯიმალეფ, მანგარო მიჸორთ! იეჰოვაქ აკურთხას თქვან მონდომა, ნამდა გინირთათ სულიერო მოწიფულ ქრისტიანო (იგავ. 22:4).