1. მუშენ ვადინუანდჷ აბრაამ იმენდის?

 ᲘᲔᲰᲝᲕᲐᲥ მუშ მეგობარ აბრაამს დეპირ, ნამდა თიშ გამნარყიშ საშვალებათ იჸუაფუდ კურთხეულ „არძა ერ“ (დაბ. 15:5; 22:18). აბრაამს ღორონთიშ მიმართ ძალიერ რწმენა უღუდ, ათეშენ დარწმუნებულ რდჷ, ნამდა თიშ დუნაპირებ აუცილებერო შისრულებუდ. მარა დრო მიკიშ, აბრაამ 100 წანერ რდჷ, სარა — 90 დო თე ართგურ ჩილ დო ქომონჯის სქუა დიო ხოლო ვა ჸუნდეს (დაბ. 21:1—7). მარა, მუჭოთ ბიბლიას ბკითხულენთ, თეშ უმკუჯინუო, „აბრაამ იშენით ვადინუანდჷ იმენდის დო წანდჷ, ნამდა იჸუაფუდ ბრელ ხალხიშ მუმა, მუჭოთ ღორონთის აფუდ რაგადებულ“ (რომ. 4:18). მუჭოთ მიჩქნა, აბრაამიშ იმენდ ვა გამტყუნებე. თის ქეშეძინ ქომოლსქუაქ, ისაკიქ, ნამდგას ქიანაშ ხანს ნატრენდჷ. მორთ ქიგებგათ, მუშენ რდჷ აბრაამ დარწმუნებულ, ნამდა ღორონთიშ დუნაპირებ აუცილებერო შისრულებუდ.

2. მუშენ რდჷ აბრაამ დარწმუნებულ, ნამდა იეჰოვაშ დუნაპირებ შისრულებუდ?

² აბრაამ ჯგირო იჩინენდჷ იეჰოვას დო ხოლოშიან ურთიერთობა უღუდ თიწკუმა, ათეშენ „ბოლოშა ჯერდჷ, ნამდა ღორონთის შეულებუდ მუშ დუნაპირებუშ შესრულება“ (რომ. 4:21). ზუსტას რწმენაშ გურშენ მიწონუ იეჰოვაქ აბრაამ დო მართალ კოჩო მირჩქინ თინა (იაკ. 2:23). მუჭოთ რომაელეფიშ 4:18-შე ბგებულენთ, აბრაამს რწმენაწკუმა ართო იმენდ ხოლო უღუდ. მორთ ასე გუვარჩუათ, მუს იჩიებ მოციქულ პავლე იმენდიშ გურშენ რომაელეფიშ მა-5 დუდის.

3. მუს იჩიებ პავლე იმენდიშ გურშენ?

³ პავლე ენწყუნს, მუშენ შემლებნა დარწმუნებულ ვორდათ, ნამდა „იმენდ ვეგემტყუნებ“ (რომ. 5:5). თეს გეძინელ, თინა მოგებაფუანა,  მუ მიმეხვარებნა იმენდიშ გამანგარებას. თე სტატიას გუვარჩიენთ რომაელეფიშ 5:1—5-ის ინოჭარილ სიტყვეფს. თიშ გარჩიებაშ დროს ქიგიშინით, თქვა მუქ მიგეხვარეს, ნამდა დროშ ულაწკუმა ართო, უმოსო გემანგარითკო იმენდ. თე გარჩიება თის ხოლო ქუმოძირანა, მუ მიმეხვარებნა ჩქინ იმენდ თიშე უმოს ძალიერ რდას, ვინემ ამდღა რე. მორთ, პირველ რიგის გუვარჩუათ თი დიდებულ იმენდ, ნამდგაშ გურშენ პავლე იჩიებ, ნამდა დღას ვეგემტყუნებ.

4. მუშე მეურს ჩიება რომაელეფიშ 5:1, 2-ს?

⁴ წეკითხით რომაელეფიშ 5:1, 2. პავლექ თე სიტყვეფ რომს მახორუ ქრისტიანეფს მეჭარ. თე და დო ჯიმალეფქ გეჩინებაფუეს იეჰოვა დო იესო ქრისტე, გეგმირჩქინეს რწმენა დო გინირთეს ქრისტიანეფო. თე ქრისტიანეფ ღორონთიქ მუნეფიშ რწმენაშ გურშენ მართალეფო მირჩქინ დო მუშ წმინდა შურით გიშეგორ, მუდგაშ ჭყოლოფათ ცხებულეფო გინირთეს. თინეფქ დიდებულ იმენდ მიღეს, ნამუთ დღას ვეგემტყუნებუდ.

5. მუ იმენდ უღნა ცხებულ ქრისტიანეფს?

⁵ უმოს გვიანო, პავლექ ეფესოს მახორუ ცხებულ ქრისტიანეფს მეჭარ თი იმენდიშ გურშენ, ნამუთ უღდეს დო უწუ, ნამდა თინა „მემკვიდრეობა“ რდჷ წმინდეფშო (ეფეს. 1:18). კოლოსელეფშა მეჭარილ წერილს, პავლე აარგამენს, ნამდა თე იმენდ ცხებულეფშო ზეცას რე კინოჩუალირ (კოლ. 1:4, 5). თაშ ნამდა, ცხებულ ქრისტიანეფს ზეცას მარადიულ ცხოვრებაშ იმენდ უღნა, სოდეთ ქრისტეწკუმა ართო იმართველენა (1 თეს. 4:​13—17; გამოცხ. 20:6).

6. მუ თქუ ართ ცხებულ ჯიმაქ მუშ იმენდიშ გურშენ?

⁶ ცხებულ ქრისტიანეფ, მანგარო აფასენა თი იმენდის, მუთ იეჰოვაშე მიღეს. მაგალთო, ჯიმა ფრედერიკ ფრენციქ, მით ცხებულ რდჷ, თიშ უკულ, მუთ ვითობით წანას ართგურო ემსახურ იეჰოვას, ცხებულეფიშ დიდებულ იმენდიშ გურშენ 1991 წანას თეცალ მუდგარენ თქუ: „ჩქინ იმენდ უსაფუძვლო ვა რე, თინა შისრულებ თითოულშო, მით 144 000-იშ ნაწილ რე. თე ჯილდო თიშე ბრელით უმოს დიდებულ იჸუაფ, ვინემ ჩქი ველუთ ვარდა წერმიბდგინენთ. [ჩქი] ვა გობჭყოლადნა, მუსხით ძვირფას რე თე იმენდ. მუთ უმოს ბრელ ხანს  მაფნა ოჯინე, თით უმოსო ვაფასენთ თის. თე იმენდიშ მიოღებელო მილიონ წანას ხოლო ღირჷ ჯინა. ამდღა ბრელით უმოსო ვაფასენქ თე იმენდის“.

7, 8. მუ იმენდ უღჷ იეჰოვაშ მსახურეფიშ უმენტაშის? (რომ. 8:20, 21).

⁷ ამდღა იეჰოვაშ მსახურეფიშ უმენტაშის ცხებულეფშე განსხვავებულ იმენდ უღნა. თინეფ აბრაამცალო ელნა დროს, მუჟამსით ღორონთიშ მართველობაშ თუდო მარადიულო იცხოვრენა სამოთხეთ გინორთელ დედამიწას (ებრ. 11:8—10, 13). თე დიდებულ იმენდიშ გურშენ მოციქულ პავლექ ხოლო იჩუ რომაელეფშა მეჭარილ წერილს (წეკითხით რომაელეფიშ 8:20, 21). ქიგიშინით გვალო პირველო, მუჟამსით მომავალწკუმა დაკავშირებულ ბიბლიურ დუნაპირებუეფიშ გურშენ გეგით, არძაშ უმოსო ნამუქ შეხუ თქვან გურს. თიქ ხომ ვარ, ნამდა ართ დღას სრულყოფილეფ იჸუაფუთ დო გეთავისფალებუთ ცოდაშ მონობაშე? დო ვარ თიქ, ნამდა თქვან საჸოროფო ადამიანეფ, მით ღურაქ მიდაიღეს, გეთელებნა დო იცხოვრენა სამოთხეთ გინორთელ დედამიწას? თე ირფელიშ შესრულებას თი იმენდიშ ჭყოლოფათ ელუთ, ნამუთ ღორონთიქ მერჩეს.

⁸ ვა უღჷ მნიშვნელობა ზეცას ცხოვრებას ველუთ დო ვარ დედამიწას, ჩქინ დიდებულ იმენდ არძას გურს ხიოლით ემიფშანა. თე იმენდ შემლებნა უმოსო გუვამანგარათ. მოციქულ პავლე რომაელეფიშ მა-5 დუდის თის ხოლო ემინწყუნა, მუჭო შემლებნა თეშ კეთება. მორთ ქიგებგათ, მუ ჭარჷ თიქ თეწკუმა დაკავშირებით. პავლეშ სიტყვეფიშ გარჩიება მიმეხვარებნა, გუვამანგარათ ჩქინ იმენდ დო უმოსო ბჯერდან, ნამდა თინა დღას ვეგემტყუნებ.

9, 10. მუჭოთ პავლეშ მაგალითშე იძირე, მუს ოკო ელდან ქრისტიანეფ? (რომ. 5:3; ქოძირით სურათეფ).

⁹ წეკითხით რომაელეფიშ 5:3. მუჭოთ პავლეშ სიტყვეფშე იძირე გაჭირება ხოლო მოხვარნა იმენდიშ გამანგარებას. ართ მეჯინათ თენა შილებე გასაკვირო იძირედას. მარა სინამდვილეს, ქრისტეშ არძა მიმაჸუნალ ოკო ელდას, ნამდა მუ ამდღა მუ ჭუმე, განსაცდელეფს ქეშეხვადუ. თაშ მოხვად პავლე მოციქულიშ შემთხვევას ხოლო. თიქ თესალონიკელ ქრისტიანეფს მეჭარ: „თქვანწკუმა ვორდინ წინასწარ გირაგადუდით, ნამდა გაჭირება მაღვენუდეს,  მუდგაქ ქოთ თაშ ქუმოხვად“ (1 თეს. 3:4). თიქ კორინთელეფს ხოლო მეჭარ: „მოკონა გიჩქუდან ჯიმალეფ, მუ გაჭირება გინიბღით. გინოსქილადაშ იმენდ ხოლო ვა მიღდეს“ (2 კორ. 1:8; 11:​23—27).

¹⁰ ქრისტიანეფ ამდღა ხოლო ხვადუნა შხვადოშხვა განსაცდელს (2 ტიმ. 3:12). მუშ რაგად შილებე თქვანდე? ქიგიშინით, წინააღმდეგობას ხომ ვეშეხვადით თიშ უკულ, მუთ ქრისტეშ მიმართ რწმენა გავითარით დო თიშ მიმაჸუნალო გინირთით? შილებე მეგობრეფ დო ნათესეეფ გიგაძიცანდეს დო თენა დასაბაღ ვა რდუკონ თეშ, არდებულო დო უპატიცემულოთ ხოლო გოქცუდეს. ვარდა სამუშას ხომ ვა გაშის პრობლემეფქ თიშ გურშენ, ნამდა ნებისმიერ საკითხის ოცადუდით, პატიოსნურო მიქცითკო? (ებრ. 13:18). მთავრობაშე თხოზინს დო წინააღმდეგობას ხომ ვეშეხვადით ქადაგებაშ დო თქვან იმენდიშ გაცხადებაშ გურშენ? მნიშვნელობა ვა უღჷ, მუნერ სირთულეს ფხვადუთ, მუჭოთ პავლეშ სიტყვეფშე იძირე, თე დროს ხოლო ოკო ვა ვოდინუათ ხიოლ. მუშენ იფჩიებუთ თეს?

11. მუშენ ოკო მაფდან გინოჭყვიდილ, ნამდა გაურზათ ირნერ სირთულეს?

¹¹ გაჭირებაშ დროს ხიოლ თიშენ ოკო ვა ვოდინუათ, ნამდა, მუჭოთ რომაელეფიშ 5:3-ს ჭარჷ, „თინა მოთვინებას ავითარენს“. არძა ქრისტიან ქეშეფხვადუთ განსაცდელეფს, ათეშენ არძას მოსაჭირნა მოთვინება. გინოჭყვიდილ ოკო მაფდან, ნამდა ირნერ სირთულეს მოთვინებათ გაურზათ, მუშენდა ხვალე თე შემთხვევას იჸუაფ შეიოლებერ, მიბღათ ჯილდო, ნამდგაშ იმენდ მიღნა. ნამთინს ვამკონა, ვაგურათ თიცალ კათას, მიდგას იესო გულისხმენდჷ, მუჟამსით „ქუალამ ადგილს“ დოლაფირ თასიშ გურშენ იჩიებუდ. თინეფქ დუდშე ხიოლით მიღეს ჭეშმარიტება, მარა გაჭირებას დო თხოზინს ქეშეხვადესინ ხეთეშე დებრკოლეს (მათ. 13:5, 6, 20, 21). მუშო ოკო რაგად, თხოზინ დო სირთულეეფ ვა რე სასიამოვნო, მარა თინეფიშ მოთვინებათ გარზება მარადიულ ჯგირობუას მომღანა. მორთ ქიგებგათ, მუჭო.

12. მუ ჯგირობუა მოუღ ჩქინდა განსაცდელეფიშ გარზებას?

¹² მოწაფე იაკობიქ ხაზ გუსვჷ, მუ ჯგირობუა მოუღ განსაცდელეფიშ გარზებას. თიქ ჭარჷ: „მოთვინებას გათებაფეთ მუშ საქმე, ნამდა რდათ სრულყოფილეფ, მუთუნნერ ბრალ ვეგიდვინენ ფერეფ“ (იაკ. 1:​2—4). თე მუხლეფს იაკობ მოთვინებას თეშ ეჭარუნს, ითამ თის მუდგაინ საქმე აფდას ოკეთებელ. მოთვინებაშ საქმე თინა რე, ნამდა მიმეხვარან, გუვავითარათ ღორონთიშ მიმართ რწმენა დო ნდობა, დო თეს გეძინელ, უმოსო შემალებუან გარზებაქ. მარა სირთულეეფიშ მოთვინებათ გარზებას შხვა ჯგირობუა ხოლო მოუღ ჩქინდა. მორთ ასე თეშე ქიფჩუათ.

13, 14. მუ მოჸუნს შედეგო მოთვინებას დო მუჭო რე თენა დაკავშირებულ იმენდწკუმა? (რომ. 5:4).

¹³ წეკითხით რომაელეფიშ 5:4. პავლე მოციქულ მოგებაფუანა, ნამდა მოთვინებას მოჸუნს „ღორონთიშ მოწონა“. თაშ ნამდა, მუჟამსით მოთვინებათ ურზუთ სირთულეეფს იეჰოვაშ მოწონას ღებულენთ. მუშო ოკო რაგად, თენა ვა ნიშნენს, ნამდა იეჰოვა ბედნერ რე, მუჟამსით განსაცდელეფს დო სირთულეეფს ხვადუთ. თიშა ხიოლ თის მოუღ, ნამდა მოთვინებათ ურზუთ თე ირფელს დო ბოლოშა თიშ ართგურ სქიდუთ. გურშა ელამკინანა თიშ რჩქინა, ნამდა ჩქინ გიმორჩქინელ მოთვინებათ იეჰოვას გურს ვუხარენთ (ფსალმ. 5:12).

¹⁴ მუჭოთ ფშუნა, აბრაამქ მოთვინებათ გურზჷ განსაცდელეფს, მუდგაშ შედეგო ღორონთიშ მოწონა მიღჷ. იეჰოვაქ თინა მართალ კოჩო დო მუშ მეგობარო მირჩქინ (დაბ. 15:6; რომ. 4:​13, 22). თენა თაშ იჸუაფ ჩქინ შემთხვევას ხოლო. ღორონთშე მოწონაშ მეღება დამოკიდებულ ვა რე თიშა, მუსხის ვორთუთ იეჰოვაშ მსახურებას ვარდა მუ პასუხიშმგებლობეფ მიღნა ორგანიზაციას. იეჰოვაშე მოწონას ბღებულენთ, მუჟამსით სირთულეეფს  მოთვინებათ ურზუთ დო ბოლოშა ართგურ ფსქიდუთ. მნიშვნელობა ვა უღჷ, მუ ასაკიშ ვორეთ ვარდა მუ სიტუაცია დო შესაძლებლობეფ მიღნა, თითოულს შემლებნა, მოთვინებათ გურზათ სირთულეეფს. თაშ ნამდა, ასე განსაცდელიშ წოხოლე ქიგერეთ დო თის მოთვინებათ ქურზუთ-და, თქვან დუდის ხშირას ქუგაშინით, ნამდა უკვე გიღნა ღორონთიშ მოწონა. თიშ რჩქინა, ნამდა იეჰოვაშ მოწონა მიღნა ძალეფით ემოფშანა დო უმოსო ამანგარენს ჩქინ იმენდის.

15. მუ თქუ პავლექ რომაელეფიშ 5:​4, 5-ის დო მუ კითხვაქ შილებე გორჩქინდას?

¹⁵ მუჭოთ პავლე ენწყუნს, ღორონთიშ მოწონას ბღებულენთ, მუჟამსით მოთვინებათ ვურზუთ სირთულეეფს. ქიდეკვირით, მუს იჩიებ თინა უკულ: „ღორონთიშ მოწონას [მოჸუნს] იმენდ დო თე იმენდ ვეგემტყუნებ“ (რომ. 5:​4, 5). ნამთინეს შილებე გუკვირდას, მუშენ დიჭყჷ პავლექ კინ იმენდშენ ჩიება, მუჟამსით რომაელეფიშ 5:2-ს თქუ, ნამდა რომს მახორუ ქრისტიანეფს უკვე უღდეს „ღორონთშე განდიდებაშ იმენდ“. ათეშენ რჩქინდუ კითხვა: თე ქრისტიანეფს იმენდ უკვე ქუღდეს-და, მუშენ დართჷ პავლექ კინ თე საკითხის?

16. მუჭო იმანგარებ ჩქინ გურს იმენდ? (ქოძირით სურათეფ).

¹⁶ ჩქი თავისფალო ქინვანჭუთ, მუს გულისხმენდჷ პავლე, მუჟამსით გეფთვალისწინენთ თის, ნამდა იმენდ დროშ მიკულაწკუმა ართო უმოსო იმანგარებ. ქორშუნანო მუ რეაქცია გიღდეს, მუჟამსით პირველო გეგით ღორონთიშ სიტყვას მოჩამილ დიდებულ იმენდიშ გურშენ? შილებე იფიქრით, ნამდა სამოთხეთ გინორთელ დედამიწას მარადიულო ცხოვრება უბრალოთ ოცნება რდჷ. მარა მუთ უმოს გეგით იეჰოვაშ დო თიშ დუნაპირებუეფიშ გურშენ, თქვან იმენდიქ უმოს რეალურო გინირთჷ დო დერწმუნით, ნამდა თე დუნაპირებ აუცილებერო შისრულებ.

17. მუჭო გემანგარ თქვან იმენდიქ იეჰოვაშა დუდიშ მეძღვინუაშ დო ნათუაშ უკულ?

¹⁷ იეჰოვაშა დუდიშ მეძღვინუაშ დო ნათუაშ უკულ უჯგუშო გეჩინებაფეთ ღორონთ, სულიერო მოწიფულეფო გინირთით დო თე ირფელიშ შედეგო, თქვან იმენდიქ ხოლო უმოსო  გემანგარ (ებრ. 5:​13—6:1). შილებე თქვან დუდშა გიმოცადით რომაელეფიშ 5:​2—4-ის ინოჭარილ სიტყვეფ. თქვა ბრელ გაჭირება გინიღით, მუდგას მოთვინებათ გურზით დო შედეგო ქიგინით, ნამდა იეჰოვაშ მოწონა გიღნა. დო რახანს, დარწმუნებულ რეთჷ, ნამდა ღორონთიშ მოსაწონ რეთჷ, ხოლო უმოსო რჯერა, ნამდა მიღენთ თის, მუდგას იეჰოვაქ დეგეპირეს. თაშ ნამდა, თქვან იმენდიქ ხოლო უმოსო გემანგარ დო ამდღა ბრელით უმოს რეალურ რე თქვანო. თე იმენდ მთელ თქვან ცხოვრებაშა მოქმედენს. მაგალთო, თიშა, მუჭო ოქცუთ ოჯახიშ წევრეფს, მუ გადაწყვეტილებეფს ღებულენთ დო მუჭო ირინუანთ დროს.

18. მუშა მარწმუნენა იეჰოვა?

¹⁸ მოციქულ პავლექ ხოლო ართ მნიშვნელოვან მუდგარენს იჩიებ იმენდიშ გურშენ, ნამუთ ღორონთშე მიბღით. თინა მარწმუნენა, ნამდა თე იმენდ ვეგემტყუნებ. მუშენ შემლებნა ვორდათ თეშა დარწმუნებულ? ღორონთიშ შთაგონებათ, თიქ ქრისტიანეფ დარწმუნ: „თე იმენდ ვეგემტყუნებ, მუშენდა გურშა ღორონთიშ ჸოროფაქ ქალამიოლეს ჩქინდა მოჩამილ წმინდა შურიშ ჭყოლოფათ“ (რომ. 5:5). თაშ ნამდა, ქიანაშ მიზეზ გიღნა თიშ დაჯერებელო, ნამდა თქვან იმენდ აუცილებერო შისრულებ დო ვეგემტყუნებ.

19. მუშა შეილებნა რდათ დარწმუნებულ?

¹⁹ მუჭოთ ბძირით, აბრაამქ იეჰოვაშე დუნაპირებ მიღჷ, თიშ მოსაწონ რდჷ დო თიშ მეგობარო გინირთჷ. ბიბლიას თიშ გურშენ ბკითხულენთ: „აბრაამქ მოთვინება გიმირჩქინ დო მიღჷ დუნაპირებ“ (ებრ. 6:15; 11:​9, 18; რომ. 4:​20—22). აბრაამიშ იმენდ ვა გამტყუნებე. ბოლოშა იეჰოვაშ ართგურ ქუდოფსქიდუთ-და, ვართ ჩქინ იმენდ გემტყუნებ. თე იმენდ რეალურ რე, მუდგაშ რჩქინას ხიოლ მოუღ ჩქინდა (რომ. 12:12). პავლექ ღორონთიშ შთაგონებათ ჭარჷ: „რახანს ონდუთ თის, იმენდიშ მუმაჩამალ ღორონთიქ ეგოფშან დიდ ხიოლით დო მშვიდობათ, ნამდა თქვან იმენდიქ ხოლო უმოსო გემანგარას წმინდა შურიშ ძალათ“ (რომ. 15:13).