ᲩᲥᲘ მანგარო ვაფასენთ იეჰოვაშე მოჩამილ შხვადოშხვა ძღვინს. თინეფ შქას ნებაშ თავისუფლებას ხოლო, ნამდა ჩქინით გინობჭყვიდათ, მუჭო იფსიამოვნათ თითოულ თე ძღვინით. ბიბლიაშე ბგებულენთ, ნამდა ღვინ ღორონთშე მოჩამილ ართ-ართ ძღვინ რე. თექ ჭარჷ: „ქობალ გურს უხარენს კოჩის, ღვინ ცხოვრებას უხალისენს“ (ეკლ. 10:19; ფსალმ. 104:15). შილებე დაიკვირებნა, ნამდა ნამთინე არასწორო ირინუანს ალკოჰოლს. თეს გეძინელ, მთელ მსოფლიოს, შხვადოშხვა კულტურას, განსხვავებულ დამოკიდებულება უღნა ოშუმალიშ მიმართ. მუ მეხვარებ ქრისტიანს, გონივრულ გადაწყვეტილება მიღას, მუჟამსით საქმე ოხუ ოშუმალს?

მნიშვნელობა ვა უღჷ, სო ფცხოვრენთ ვარდა მუნერ კულტურას იბრდით, გადაწყვეტილებეფიშ მეღებაშ დროს იეჰოვაშ აზროვნება ოკო გეფთვალისწინათ დო ვართ ხოლო თინა, მუს ფიქრენა თე საკითხშენ ჩქინ ტერიტორიას მახორუ ადამიანეფ. თაშ ქიმიფქციებუთ-და, ბედნერ ცხოვრება მაღვენუნა.

ამდღა ქვეყნიერებას ბრელ ადამიან ხშირას დო ბრელს შუნს. ნამთინე თეს თიშენ ორთჷ, ნამდა დუდ ქექას დო თავისფალო იგინას. შხვეფს პრობლემეფ უღნა დო ოშუმალს გინუნქირუანა გურს. თეს გეძინელ, ნამთინე ქიანას მიორჩქნა, ნამდა მიდგაინ ბრელს ქოშუნს-და, გიშურს, ნამდა მანგარ დო ძალიერ რე.

თე კათაშ გინაწონს, ქრისტიანეფს თე საკითხის ჯგირ ხემძღვანელობა მიღნა ჩქინ მოჸოროფე გუმაჭყაფალშე. მაგალთო, თიქ გუმაფრთხილეს, ნამდა ბრელ შუმა გლახა შედეგეფშა ქიმემიჸონანა. შილებე წაიკითხირნა იგავეფიშ 23:​29—35-ის ინოჭარილ კოჩიშ შემთხვევა, მიდგაქ დიშუმ დო მუშ დუდის გლახა შედეგეფ მუღჷ. a ევროპას მახორუ ართ უხუცეს, დანიელ, მირაგადნა, მუნერ რდჷ თიშ ცხოვრება, ონდო იეჰოვაშ მოწმეთ გინირთუდ. თინა იჩიებ: „უზომეთ ფშუნდჷ, მუდგაშ გურშენ ბრელშა მემღებ გლახა გადაწყვეტილებეფ. თე გადაწყვეტილებეფიშ შედეგეფქ ჩქიმ ემოციურ მდგომარეობაშა თეშ იმოქმედ, ნამდა ამდღა ხოლო გლახათ ბგინაფლენქ დუდის, მუჟამსით თინეფს იფშინანქ“.

მუჭო შეულებნა ქრისტიანეფს, გონივრულო გეგმირინუან ნებაშ თავისუფლება დო დუდ ეუჩილითუან თი გლახა შედეგეფს, მუთ უზომე შუმას მოჸუნს. თეშ ოკეთებელო აუცილებერ რე, ღორონთიშ აზროვნებას ქიმეფჩათ თიშ საშვალება, ნამდა იმოქმედას ჩქინ გადაწყვეტილებეფშა დო მოქმედებეფშა.

მორთ ასე გუვარჩუათ, მუს იჩიებ ბიბლია ოშუმალწკუმა დაკავშირებით დო თინა ხოლო ქიგებგათ, მუშენ შუნს ნამთინე.

ღორონთიშ სიტყვა ვარიას ვეჩიებ ზომიერო შუმაშე. თეშ გინაწონს, მოგებაფუანა, ნამდა ღვინიშ შუმას შეულებ, ჯგირ ხასიათშა ქუმომიჸონან. ბიბლიას ბკითხულენთ: „ხიოლით ჭკუმ სქან ქობალ დო ხიოლით ეფშა გურით შვი ღვინ“ (ეკლ. 9:7). მინშა იესო დო ღორონთიშ შხვა ართგურ მსახურეფ ხოლო შუნდეს ოშუმალს (მათ. 26:​27—29; ლუკ. 7:34; 1 ტიმ. 5:23).

ღორონთიშ სიტყვას არგამათ იძირე, მუ განსხვავება რე ოშუმალიშ ზომიერო მეღებაშ დო შუმილობაშ შქას. თექ პირდაპირ ჭარჷ: „ვეშუმათ ღვინით“ (ეფეს. 5:18). თეს გეძინელ, თის ხოლო ბკითხულენთ, ნამდა „შუმილიეფს … ვა დამკვიდრებენა ღორონთიშ სამეფო“ (1 კორ. 6:10). არგამა რე, ნამდა იეჰოვაშო მიუღებელ რე უზომე შუმა დო შუმილობა. ათეშენ, თიშ მანგიორო, ნამდა შხვეფს ევაჸუნათ დო უბრალოთ თინა ვაკეთათ, მუთ ჩქინ კულტურას რე მეღებულ, უჯგუშ იჸუაფ, გადაწყვეტილებაშ მეღებაშახ, გეფთვალისწინათ იეჰოვაშ დამოკიდებულება თე საკითხიშ მიმართ.

 ნამთინე ფიქრენს, ნამდა ბრელ აშვინე ვეშუმასინ თეშ, მარა თეცალ აზროვნება ოშქურანჯ რე. წმინდა წერილეფშე არგამათ იძირე, ნამდა თიქ, მით ღვინს უზომეთ შუნს შილებე სერიოზულო მეჩირთას დო ხვალე თენა ვარინ, იეჰოვაწკუმა ურთიერთობა ხოლო გილელუას (ტიტ. 2:3; იგავ. 20:1). იესოქ ხოლო გაფრთხილ მუშ მიმაჸუნალეფ, ნამდა გინოჸუნელ შუმაქ შილებე ეცილას ადამიანს, დემკვიდრას ახალ ქვეყნიერება (ლუკ. 21:​34—36). მორთ ასე ქიგებგათ, მუ მეხვარებ ქრისტიანს, დუდ ეუჩილითუას თი პრობლემეფს, ნამდგაქ შილებე შუმაშ გურშენ აშუას.

ალკოჰოლიშ მიმართ ჩქინ დამოკიდებულებაშა, ჩქინ კულტურას გავრცელებურ აზროვნება ქიმოქმედენს-და, შილებე თექ გლახა შედეგეფშა ქიმემიჸონან. ქრისტიანეფ გონიერებას გიმირჩქინანა, მუჟამსით საქმე ოხუ შუმა დო ჭკუმუას. ბიბლია გუმოშინანა: „ჭკუმუნთ, შუნთჷ დოვარ შხვა მუდგარენს ორთუთ, ირფელ ღორონთიშ ოდიდებელო აკეთით“ (1 კორ. 10:31). თუდონ აბზაცეფს გარჩიებულ იჸუაფ ნამთინე კითხვა დო ბიბლიურ პრინციპ, ნამდგაშეთ ჯგირ იჸუაფ დეფიფქრათ.

თიშენ ფშუნქო, ნამდა შხვეფშე გიშართილ ვა ვორდე? გამოსვლაშ 23:2-ს ბკითხულენთ: „ვეიაჸუნა უმენტაშის“. იეჰოვაქ თე სიტყვეფით ისრაელეფ გაფრთხილ, ვეიაჸუნესკო თი კათას, მით ვამსახურუდ თის. თე რჩევაშ მეჸუნა ამდღა ჩქინო ხოლო მნიშვნელოვან რე. მუჟამსით შხვეფს უფლებას ქიმეფჩანთ, ნამდა ალკოჰოლიშ მიმართ ჩქინ დამოკიდებულება დო გადაწყვეტილებეფშა ქიმოქმედან, შილებე იეჰოვაშ ნორმეფით ცხოვრება მივოტუათ დო თიწკუმა ხოლოშიან ურთიერთობა ხოლო მივოდინუათ (რომ. 12:2).

თიშ დამტკიცებელო ფშუნქო, ნამდა მანგარ დო ძალიერ ვორექ? ნამთინე კულტურას ხშირას დო ბრელ შუმა მეღებულ რე დო იწონუანა (1 პეტ. 4:3). მარა ქიდეკვირით, მუ ჭარჷ 1 კორინთელეფიშ 16:13-ს: „კურცხას რდათ, მტკიცას გერდათ რწმენას, რდათ გაბედულეფ დო გემანგარით!“. ქიმეხვარებნო ოშუმალ პიროვნებას თე ირფელიშ მენჭირნაფას? ვარ. სინამდვილეს, ოშუმალს შეულებ კოჩის ნორმალურო აზროვნებაშ დო მოქმედებაშ უნარ მიდუღას. თაშ ნამდა, ბრელიშ შუმა შინაგან ძალიერებაშ ვარინ, სისუსტეშ მაძირაფალ რე. ესაიაშ 28:7-ის ხოლო ეჭარილ რე, ნამდა შუმილ კოჩის სწორას აზროვნება ვეშულებ დო უბედრობას იკინდუანს დუდშა.

ნამდვილ ძალა იეჰოვაშე მოურს დო თიშ მიოღებელო აუცილებერ რე, ქრისტიან კურცხას რდას დო მტკიცას გერდას რწმენას (ფსალმ. 18:32). თეშ კეთება თიმწკუმა შეიალებე, მუჟამსით ფრთხილას იჸუაფ, ნამდა გეიჩილითუას საფრთხეეფ,  დო მიღენს თიცალ გადაწყვეტილებეფს, ნამუთ იეჰოვაწკუმა ურთიერთობას ვეგლულუანს. დედამიწას ცხოვრებაშ დროს იესოქ, მუშ საქმეეფით ოძირუ, ნამდა იეჰოვაწკუმა უღუდ ხოლოშიან ურთიერთობა დო თიშე ღებულენდჷ ძალას. ბრელ ადამიან იესოს შინაგან ძალიერებაშ დო გაბედულებაშ გურშენ აფასენდჷ.

თიშენ ფშუნქო, ნამდა პრობლემეფშე დუდ დებრსხე? ფსალმუნმაბირექ ღორონთიშ შთაგონებათ თეცალ სიტყვეფ ჭარჷ: „მუჟამსით ოწუხებელქ მოსვანჯა მემდინუ, სი [იეჰოვა] ემქექე გურშა დო სიმშვიდე მუჩჷ“ (ფსალმ. 94:19). ოწუხებელ თქვა ხოლო სვანჯის ქოიდინუანა დო ძალეფს მიდმაიღანან-და, იეჰოვაწკუმა გორით გურიშექექაფა დო ვართ ხოლო ოშუმალს. მუთ შილებე ხშირას დურაგადეთ იეჰოვას ლოცვას, თენა მიგეხვარებნა, გურქ ვედგემონკან ოწუხებელით. ბრელქ სირთულეეფიშ დროს რჩევა ქელაკითხუ სულიერო მოწიფულ მეგობარს, მუდგაქ ჯგირობუა მოუღ თინეფს. თქვა ხოლო გაკეთით თენა. არგამა რე, ნამდა პრობლემეფიშ დროს ოშუმალიშ შუმა კოჩის „სწორიშ კეთებაშ უნარს მიდმუღანს“ (ოს. 4:11). ჟიშე მოშინაფილ დანიელ იჩიებ: „ოწუხებელ მიღუდ დო დაშებულიშ გურშენ გურ ბრალს გებდვანდჷ, ათეშენ ბრელს ფშუნდჷ, ნამდა თე მდგომარეობაშე დუდ დებრსხკო. მარა სინამდვილეს, პრობლემეფქ ქუმმაძინ დო მივოდინე, მუჭოთ მეგობრეფ, თეშ ჩქიმ დუდიშ პატიცემა ხოლო“. მუქ მეხვარ საბოლათ დანიელს? თინა იჩიებ: „ქიმეფხვად, ნამდა გურიშექექაფა დო მოხვარა იეჰოვაწკუმა ოკო ბგორკო დო ვართ ხოლო ოშუმალს. იეჰოვაშ მოხვარათ დო თიშ ელარნათ შემალებუ, გეგნიბღკო ჩქიმ პრობლემეფ დო გივორჯგინკო თინეფს“. არგამა რე, სიტუაცია მუდგა უიმენდო ვეძირედას, იეჰოვა ირიათო მზათ რე ჩქინ მახვარებელო (ფილ. 4:​6, 7; 1 პეტ. 5:7).

თიშ გაგებელო, მუდგაინიშ თირუა ხომ ვა გოსაჭირნა თიწკუმა დაკავშირებით, მუსხით ხშირას შუნთჷ დო მუზმას, ქოკითხით თქვან დუდის: ჩქიმ ოჯახიშ წევრ ვარდა ხოლოშიან მეგობარ ხომ ვა ფიქრენს, ნამდა მოძინელ მაფჷ შუმაშა? თაშ ქორენ-და, თენა შილებე თის ნიშნენდას, ნამდა გერეთ საფრთხეშ წოხოლე, ნამდგას პირადო თქვა ვა გინაფლენთ. ულირიშ გინაწონს, ამდღა უმოსის ხომ ვა ფშუნქ? თენა შილებე ნიშნენდას, ნამდა ჭიე-ჭიეთ უძინანთ ოშუმალიშ შუმას დო თიშა დამოკიდებულო გინირთუთ. მიჭირსო ოშუმალიშ უმშო მუსხირენ დღას ვარდა უმოს მეტ ხანს გარზება? თაშ ქორენ-და, თენა შილებე ნიშნენდას, ნამდა თქვა უკვე რეთჷ ოშუმალშა დამოკიდებულ.  თეცალ დროს შილებე სპეციალისტეფიშ მოხვარაქ ხოლო დეგესაჭირან თე ჩვევაშ ჩათხინაფალო.

პრობლემეფს დუდ ეუჩილითუასინ თიშენ, ნამთინექ გინოჭყვიდ, შურო ვემკანჭას მუთუნნერ ოშუმალს. ნამთინე თიშენ ვა შუნს, ნამდა უბრალოთ ვა მოწონს ოშუმალიშ გემო. თეცალ კათა თქვან შქას ხოლო ქორენ-და, პატი ქოცით თინეფიშ არჩევანს დო ვა გაკრიტიკათ თინეფიშ გადაწყვეტილება.

შილებე ქიმეხვადით, ნამდა ჯგირ იჸუაფ, თქვან დუდის წესეფ დუდგინათ თიწკუმა დაკავშირებით, მუსხიშა დო მუსხის გეშუნთ. მაგალთო, შილებე გინოჭყვიდათ, ნამდა მარაშე ართშა ვარდა მინშა ჭკუმუაშ დროს გეშვათ ჭიჭე. ნამთინექ გინოჭყვიდ, ზომიერო გეშვას ღვინ დო პივა, მარა ვარიას იჩიებ უმოს გრადუსამ დო ძალიერ ოშუმალშე. მუჟამსით თქვან დუდის თეცალ კონკრეტულ წესის დუდგინენთ, უმოს ადვილ გაჸინა თინეფიშ მეჸუნა. ქრისტიანს მორდებაქ ოკო ვაშუას მუშ მეღებულ გადაწყვეტილებაშ გურშენ დო ვართ თიშ გურშენ, ნამდა მტკიცას მეჸუნს თის.

ქრისტიანქ შხვაშ გრძნობეფ ხოლო ოკო გეთვალისწინას, მუჟამსით საქმე ოხუ შუმას. რომაელეფიშ 14:21-ის ბკითხულენთ: „სქან ჯიმა დებრკოლებ-და, უჯგუშ იჸუაფ ვა ჭკუმე ხორც, ვაშვე ღვინ დო შხვა თიცალ მუთუნ ვაკეთე, მუთ დაბრკოლენდჷ თის“. მუჭო შეილებნა თე რჩევაშ გიმორნაფა? ჯგირ იჸუაფ, გეგმირჩქინათ ჯიმალურ ჸოროფა დო ვარია თქუათ შუმაშე, მუჟამსით ატყუაფუთ, ნამდა მიდგაინქ შილებე დებრკოლას. თეშნერო ოძირანთ, ნამდა პატის ცენთჷ შხვეფიშ გრძნობეფს დო თქვან დუდიშ ვარინ, თინეფიშ ჯგირობუაშე ფიქრენთ (1 კორ. 10:24).

ხვალე თენა ვარინ, ქრისტიანეფქ ოკო დემორჩილან ოშუმალწკუმა დაკავშირებით სახელმწიფოშ დოდგინელ წესეფს. მაგალთო, სახელმწიფოქ შილებე ასაკობრივ შეზღუდვა დადგინას ოშუმალწკუმა დაკავშირებით დო თეს გეძინელ, მუშ მოქალაქეეფს კანონით უვარუას ნაშუმას მანქანაშ გილაჸონაფა ვარდა ნამდგაინ სამუშა დანადგარიშ გიმორნაფა (რომ. 13:​1—5).

იეჰოვაქ ბრელ ძღვინ მუჩეს, თინეფ შქას რე ნებაშ თავისუფლება ხოლო, ნამდა ჩქინით გინობჭყვიდათ, მუჭო გიმიბრინუანთ თიშე მოჩამილ თითოულ ძღვინს. მორთ ჩქინ გადაწყვეტილებეფით ვოძირათ, ნამდა ვაფასენთ ღორონთშე მოჩამილ ნებაშ თავისუფლებაშ ძღვინს დო თის ჩქინ ზეციერ მუმაშ ოდიდებელო იბრინუანთ.