1. მუ კითხვაქ შილებე გომრჩქინდან, მუჟამსით აბრაამშე ფიფქრენთ?

 ᲑᲠᲔᲚ ადამიანს გუგონებ აბრაამიშ გურშენ, მარა თინეფშე უმენტაშის გვალო ჭიჭე მუდგარენ უჩქჷ ღორონთიშ თე ართგურ მსახურშენ. მუშ რაგად შილებე ჩქინდე? თე ადამიანეფიშ გინაწონს, ჩქი ბრელ მუდგარენ მიჩქნა აბრაამშენ. მაგალთო, ბიბლიაშე ბგებულენთ, ნამდა თის „არძა მორწმუნეშ მუმა“ ჯოხო (რომ. 4:11). მინშა შილებე ფიფქრენდათ: შემლებნო მივაჸუნე აბრაამიშ მაგალითის დო მიღდას თიცალ რწმენა, მუნერით თის უღუდ? საბედნეროთ, თეშ კეთება შეიოლებერ რე.

2. მუშენ რე მნიშვნელოვან აბრაამიშ ცხოვრებაშ გიმორკვიება? (იაკ. 2:22, 23).

² ართ-ართ საშვალება, მუთ მიმეხვარებუნა თიცალ რწმენაშ გავითარებას, მუნერით აბრაამს უღუდ, თიშ ცხოვრებაშ გიმორკვიება რე. მაგალთო, მუჭოთ მიჩქნა, აბრაამქ დემორჩილ ღორონთიშ მითითებას დო ოცხოვრებშა გეგნორთჷ შხვა ქიანაშა, ნამუთ თი ადგილშე შორს რდჷ, სოდეთ აბრაამ აიშახ ოხორანდჷ. თინა წანეფიშ დინახალე კარავს ცხოვრენდჷ დო, თეს გეძინელ, მზათ რდჷ, მუშ საჸოროფო სქუა, ისაკ, მსხვერპლო შეწირკო. აბრაამს ძალიერ რწმენა უღუდ, მუდგას საქმეეფით ხოლო ოძირანდჷ დო ზუსტას თეშ ჭყოლოფათ შეიალებუ თე ირფელიშ კეთებაქ. შედეგო, აბრაამქ იეჰოვაშ მოწონა მიღჷ დო თიშ მეგობარო გინირთჷ (წეკითხით იაკობიშ 2:22, 23). იეჰოვას მთელ გურით ოკო, ნამდა არძაქ მიბღათ თიშ მოწონა დო გინიფრთათ თიშ მეგობრეფო. ჩქინ ღორონთის ოკო სი ხოლო გეხარე თე კურთხევეფით. ზუსტას ათეშენ, თიქ ბიბლიაშ მაჭარალეფს, პავლეს დო იაკობის, მუშ სიტყვას აბრაამიშ ცხოვრებაშ გურშენ ენაჭარაფუ. მორთ ასე გუვარჩუათ რომაელეფიშ მა-4 დო იაკობიშ მა-2 დუდეფ, სოდეთ ბრელ მნიშვნელოვან მუდგარენს ბგებულენთ აბრაამიშ გურშენ.

3. ნამ ბიბლიურ მუხლიშ სიტყვეფ მიშინუეს პავლექ დო იაკობიქ მუნეფიშ წერილეფს?

 ³ ქოთ პავლექ დო ქოთ იაკობიქ, ღორონთიშ შთაგონებათ ნაჭარა მუნეფიშ წერილეფს, მიშინუეს დაბადებაშ 15:6-ის ინოჭარილ სიტყვეფ, სოდეთ აბრაამიშ გურშენ ბკითხულენთ: „ქირწმუნ თიქ იეჰოვაშ სიტყვეფ დო თიქ სიმართლეთ ჩაუთვალ თენა“. თი პიროვნება, მიდგას იეჰოვა მართალო მირჩქინანს, თიშ მოსაწონ რე დო მუთუნ ბრალ ვა უღჷ თიშ თოლს. მუ სახიოლო რე თიშ რჩქინა, ნამდა არასრულყოფილ, ცოდამ ადამიანეფს მიღნა შესაძლებლობა, იეჰოვაშ თოლს ვორდათ თიცალეფ, მიდგას მუთუნ ბრალ ვა უღჷ. მუშო ოკო რაგად, თქვა ხოლო გოკოდან იჸი, ღორონთიქ მართალ ადამიანო მეირჩქინან დო მუშმაჯგირა რე თიშ რჩქინა, ნამდა თეშ მენჭირნაფა შეიოლებერ რე. მორთ ასე ქიგებგათ, მუშენ რდჷ აბრაამ ღორონთიშ თოლს მართალ დო მუ ოკო ვაკეთათ, ნამდა ჩქი ხოლო ქიმვოჭირინუათ თეს.

4. მუქ შილებე მეცილან თის, ნამდა ღორონთიქ მართალეფო მემრჩქინან?

⁴ რომაელეფშა მეჭარილ წერილს პავლექ თქუ, ნამდა არძა ადამიან ცოდამ რე (რომ. 3:23). ათეშენ, შილებე თეცალ კითხვაქ გორჩქინდას: მუჭო რე შეიოლებერ, ნამდა ცოდამ ადამიანქ ღორონთიშ მოწონა მიღას დო თიშ თოლს მართალ დო მუთუნ ბრალ ვეგიდვინენ თიცალ რდას? თე კითხვაშ პასუხის პავლე მოციქულ აბრაამიშ მაგალითით მოგებაფუანა, მით ჩქინცალ ცოდამ რდჷ, მარა მართალო იჸუ მერჩქინელქ.

5. მუშენ მირჩქინ იეჰოვაქ აბრაამ მართალ კოჩო? (რომ. 4:2—4).

⁵ აბრაამ ქანაანიშ დიხას ოხორანდჷ, მუჟამსით თინა იეჰოვაქ მართალ კოჩო მირჩქინ. მუშენ აკეთ ღორონთიქ თენა? თიშენიო, ნამდა აბრაამ კილ-კილშა მეჸუნდჷ მოსეშ კანონს? ვარ (რომ. 4:13). ღორონთიქ მოსეშ კანონ ისრაელეფს თე ამბეშე 400-შე უმოს წანაშ უკულ მეჩჷ. მოსეშ კანონიშ დაცვება ვა რდჷ-და, იმწკუმა მუ რდჷ თიშ მიზეზ, ნამდა ღორონთიქ აბრაამ მართალ კოჩო მირჩქინ? თის ძალიერ რწმენა უღუდ, მუდგაშ გურშენ ღორონთიქ ჭყოლოფა გიმირჩქინ თიშ მიმართ დო მართალ კოჩო მირჩქინ (წეკითხით რომაელეფიშ 4:2—4).

6. მუშ ჭყოლოფათ რე შეიოლებერ, ნამდა ღორონთიქ ცოდამ კოჩ მართალო მირჩქინას?

⁶ პავლექ თქუ, ნამდა თი პიროვნებას, მიდგას ღორონთიშ წანსჷ „მუშ რწმენა სიმართლეთ ათვალუ“ (რომ. 4:5). უკულ გეუძინ: «დავით ხოლო იჩიებ, ნამდა ბედნერ რე თი კოჩ, მით ღორონთის მართალო აფჷ მერჩქინელ, მარა საქმეეფიშ გურშენ ვარ: „ბედნერეფ რენა თინეფ, მიდგას ეპატუეს უკანონო საქმეეფქ დო ცოდეფქ. ბედნერ რე კოჩ, მიდგას იეჰოვა დაშებულს ცოდათ ვა უთვალუნს“» (რომ. 4:​6—8; ფსალმ. 32:​1, 2). თაშ ნამდა, მიდგას ღორონთიშ წანსჷ, იეჰოვა ბოლოშა პატიენს ცოდეფს დო მეტო ვა გუშინანს თინეფს. ხვალე თენა ვარინ, მუშ რწმენაშ გურშენ ღორონთ თეცალ კოჩის მართალო დო მუთუნ ბრალ ვა უღუნ ფერო მირჩქინანს.

7. მუშენ მირჩქინ ღორონთიქ აბრაამ, დავით დო შხვა ართგურ მსახურეფ მართალეფო?

⁷ მართალ რე, აბრაამქ, დავითიქ დო შხვა ღორონთიშ ართგურ მსახურეფქ მართალეფო იჸუეს მერჩქინელქ, მარა იშენით არასრულყოფილეფ დო ცოდამეფ რდეს. იეჰოვაქ თე ართგურ მსახურეფ მუნეფიშ რწმენაშ გურშენ მირჩქინ ბრალ ვეგიდვინენ ფერ ადამიანეფო, განსაკუთრებულო თი კათაშ გინაწონს, მიდგას ვა წანდჷ ღორონთიშ დო ვამსახურუდ თის (ეფეს. 2:12). რომაელეფშა მეჭარილ პავლეშ წერილშე არგამათ იძირე, ნამდა ღორონთწკუმა პირად, ხოლოშიან ურთიერთობაშ გავითარებელო აუცილებერ რე რწმენა. ზუსტას რწმენაშ გურშენ გინირთეს აბრაამქ დო დავითიქ ღორონთიშ ხოლოშიან მეგობრეფო. ჩქი ხოლო ზუსტას რწმენაშ გურშენ მერზიებნა შესაძლებლობა, გინიფრთათ ღორონთიშ მეგობრეფო.

8, 9. მუ არასწორ დასკვნაშა მეურს ნამთინე დო მუშენ?

⁸ საუკუნეეფ რე, მუთ რელიგიურ ლიდერეფ ნირზენა, მუჭო რე ართიანწკუმა დაკავშირებულ  რწმენა დო საქმეეფ. ნამთინე ოგურუანს, ნამდა რსხებაშო დასაბაღ რე, რწანდას იესოშ. შილებე თქვა ხოლო გაიგებნა: „ქირწმუნ იესო დო გინოსქიდუქ“. ნამთინე მღვდელ იჩიებ, ნამდა ზუსტას თეს ოგურუანდჷ პავლე ხოლო დო თეშ დამტკიცებელო პავლეშ სიტყვეფ მოჸუნს, სოდეთ თინა იჩიებ: „ღორონთის კოჩ მართალო აფჷ მერჩქინელ, მარა საქმეეფიშ გურშენ ვარ“ (რომ. 4:6). შხვეფ ოგურუანა, ნამდა რსხებაშო დასაბაღ რე, ოლოცებშა გილართე შხვადოშხვა წმინდა ადგილშა დო აკეთე ჯგირ საქმეეფ. თინეფქ თე აზრიშ დამტკიცებელო შილებე იაკობიშ 2:24-ის ინოჭარილ სიტყვეფ მიჸონან, სოდეთ ბკითხულენთ: „კოჩ საქმეეფით იჸუაფ მართალო მერჩქინელ დო ვართ ხოლო ხვალე რწმენათ“.

⁹ თეცალ დამოკიდებულებეფიშ გურშენ ნამთინე ბიბლიაშ მარკვიებელქ თი დასკვნაშა მერთჷ, ნამდა თე საკითხის პავლე დო იაკობ ართიანს ვათანხმუდეს. მაგალთო, მუჭოთ ნამთინე მღვდელ ამტკიცენს პავლეს ჯერდჷ, ნამდა კოჩიქ ღორონთიშ თოლს მართალო იჸუას მერჩქინელქინ, თეშო ხვალე რწმენა რე დასაბაღ. მარა იაკობ ოგურუანდჷ, ნამდა ღორონთშე მოწონაშ მიოღებელო საქმეეფ რე აუცილებერ. ართ თეოლოგიაშ პროფესორქ თქუ: „იაკობის ბოლოშა ვარჩქილედ, მუშენ თქუ პავლექ, ნამდა კოჩ ღორონთიშ თოლს ხვალე რწმენათ იჸუაფ მართალო მერჩქინელ დო ვართ ხოლო საქმეეფით“. მუჭოთ მიჩქუნა, ქოთ პავლექ დო ქოთ იაკობიქ მუნეფიშ წერილეფ ღორონთიშ შთაგონებათ ჭარეს (2 ტიმ. 3:16). ათეშენ, კონტექსტიშ გათვალისწინება მიმეხვარებნა, უჯგუშო ქიგებგათ თინეფიშ ნაჭარა სიტყვეფ დო ქობძირათ, ნამდა თინეფ ართიანიშ საწინააღმდეგოს ვეჩიებნა.

10. ნამ საქმეეფიშ გურშენ იჩიებუდ პავლე? (რომ. 3:21, 28; ქოძირით სურათ).

¹⁰ ნამ საქმეეფიშ გურშენ იჩიებუდ პავლე რომაელეფიშ მა-3 დო მა-4 დუდეფს? თინა ძირითადო გულისხმენდჷ მოსეშ კანონს მოჩამილ საქმეეფს, ნამდგაქ ისრაელეფს სინაშ გვალას მიაჩეს (წეკითხით რომაელეფიშ 3:21, 28). პავლეშ  დროს ნამთინე ებრაელ ქრისტიანს გუჭირდჷ თიშ მეღებაქ, ნამდა მოსეშ კანონიშ მეჸუნა დო თი საქმეეფიშ კეთება, ნამდგას კანონ ითხინდჷ, მეტო ვა რდჷ საჭირო. ათეშენ, თიქ აბრაამიშ მაგალით მიჸუნ თიშ ოძირაფალო, ნამდა ღორონთშე მოწონაშ მიოღებელო მოსეშ კანონით დოდგინელ საქმეეფიშ კეთება ვარინ, რწმენა რე აუცილებერ. თეშ რჩქინა გურშა ელამკინანა, მუშენდა, მუჭოთ ბგებულენთ, ღორონთიშ დო იესო ქრისტეშ მიმართ რწმენა ქუმაღვენუნან-და, იეჰოვაშე მოწონას მიბღენთ.

11. ნამ საქმეეფს გულისხმენდჷ იაკობ?

¹¹ პავლეშ გინაწონს, იაკობ მუშ წერილიშ მა-2 დუდის ვა გულისხმენს მოსეშ კანონით დოდგინელ საქმეეფს. თინა გულისხმენს საქმეეფს, ნამდგას ქრისტიანეფ ირდღაშიან ცხოვრებას ორთუნა. ზუსტას თე საქმეეფშე იძირე, ქუღუნ დო ვარ ქრისტიანს ნამდვილ რწმენა ღორონთიშ მიმართ. მორთ გუვარჩუათ იაკობიშ მოჸუნაფილ ჟირ მაგალით.

12. მუჭო ენწყჷ იაკობიქ, მუ კავშირ რე რწმენა დო საქმეეფ შქას? (ქოძირით სურათ).

¹² პირველ მაგალითის იაკობიქ იჩუ ართ კოჩიშ გურშენ, მიდგაქ კრებაშა მოულირ ქონებიერ პიროვნებაშ მიმართ პატიცემა გიმირჩქინ, მარა ღარიბის არდებულო მექცუ. შილებე თი კოჩ იჩიებუდ რწმენა მიღუნია, მარა საქმეეფ გვალო შხვა მუდგარენს ოძირანდჷ (იაკ. 2:​1—5, 9). თე მაგალითით იაკობიქ ოძირუ, მუსხით მნიშვნელოვან რე, ქრისტიანქ არძას ართნერო მექცუას დო ვეგმირჩქინას გიშაკერძაფა. მაჟია მაგალითის იაკობიქ ჯგირო ენწყჷ, ნამდა ვართ თი კოჩიშ რწმენას უღუდ ფას, მით ქოძირუნდჷ, ნამდა დას ვარდა ჯიმას მიკაქუნალ დო ოჭკუმალ ვაპალუდ, მარა მუთუნნერო ვემეხვარებუდ. შილებე თე კოჩ ხოლო ამტკიცენდკო, ნამდა რწმენა უღუდ, მარა სინამდვილეს საქმეეფით გვალო შხვა მუდგარენს ოძირანდჷ. თაშ ნამდა, მუჭოთ იაკობიქ ჭარჷ: „რწმენას საქმეეფ ვა უღუნ-და, ღურელ რე“ (იაკ. 2:​14—17).

13. ნამ მაგალითით ოძირუ იაკობიქ, ნამდა რწმენა საქმეეფით ოკო გიმოფხანტათ? (იაკ. 2:25, 26).

 ¹³ იაკობიქ მუშ წერილს რახაბ მიშინუ, მუჭოთ ჯგირ მაგალით, მიდგაქ რწმენა საქმეეფით ოძირუ (წეკითხით იაკობიშ 2:25, 26). თის გუნაგონ აფუდ იეჰოვაშ გურშენ დო უჩქუდ, ნამდა თინა ისრაელეფს ირიათო ელურდჷ დო უკინენდჷ ხუჯის (იეს. 2:9—11). რახაბიქ რწმენა საქმეეფით ქაძირუ, მუჟამსით მუშ ჸუდეშა შურ დო გურით მიღჷ ჟირ ისრაელ მზვერავ დო დოთხილუ თინეფ, მუჟამსით თინეფიშ სიცოცხლე საფრთხეშ თუდო რდჷ. შედეგო, თე არასრულყოფილ, უცხოტომელ ოსურქ, აბრაამცალო მართალო იჸუ მერჩქინელქ. თიშ მაგალითშე ჯგირო იძირე, მუსხით მნიშვნელოვან რე, რწმენა საქმეეფით ხოლო გეგმოფხანტათ.

14. მუშენ შემლებნა თიშ რაგად, ნამდა პავლეშ დო იაკობიშ სიტყვეფ ართიანს ვაწინააღმდეგ?

¹⁴ პავლე დო იაკობ შხვადოშხვანერო ენწყუნდეს, მუ კავშირ რე რწმენა დო საქმეეფ შქას. მაგალთო, პავლე იუდეველ ქრისტიანეფს ურაგადუდ, ნამდა ხვალე მოსეშ კანონიშ მეჸუნათ დღას ვემიაღებედეს იეჰოვაშ მოწონა. იაკობიქ ხაზ გუსვჷ, მუსხით მნიშვნელოვან რე ქრისტიანეფშო, რწმენა საქმეეფით ქაძირუან.

15. ნამ საქმეეფით შემლებნა ვოძირათ, ნამდა რწმენა მიღნა? (ქოძირით სურათეფ).

¹⁵ მუშო ოკო რაგად, იეჰოვა ვამრაგადნა, ნამდა მართალეფო მემრჩქინანინ თიშენ, ზუსტას თინა ოკო ვაკეთათ, მუთ აბრაამქ აკეთ. ჩქი შხვა საქმეეფით ხოლო შემლებნა ვოძირათ, ნამდა მიღნა ძალიერ რწმენა. მაგალთო, შემლებნა გემუანო ქეშეფხვადათ ჩქინ კრებაშა ახალ გინულირ და დო ჯიმალეფს დო თინეფს, მით პირველო ოსწრუნა შეხვალამას. თეს გეძინელ, ქიმვეხვარათ თი თანაქრისტიანეფს, მიდგას მოხვარა ოსაჭირ დო იბზრუნათ ოჯახიშ წევრეფშე. თე ირფელს იეჰოვა მიწონუანს დო აკურთხენს (რომ. 15:7; 1 ტიმ. 5:​4, 8; 1 იოან. 3:18). არძაშ უმოს მნიშვნელოვან საქმე, მუდგათ შემლებნა ვოძირათ, ნამდა რწმენა მიღნა, რე სახიოლო ამბეშ მთელ მონდომათ ქადაგება (1 ტიმ. 4:16). თითოულს  შემლებნა საქმეთ ვოძირათ, ნამდა ბწანა იეჰოვაშ დუნაპირებუეფიშ დო თიშ, ნამდა ღორონთიშ ხემძღვანელობა არძაშ უჯგუშ რე. თე ირფელს გუვაკეთენთ დო რწმენას საქმეეფით ქუვოძირანთ-და, შემლებნა დარწმუნებულეფ ვორდათ, ნამდა იეჰოვა მართალეფო მემრჩქინანა დო მუშ მეგობრეფო მემღენა.

16. მუშ იმენდ უღუდ აბრაამს დო მუშ წანდჷ?

¹⁶ რომაელეფიშ მა-4 დუდის მოჩამილ აბრაამიშ მაგალითშე თის ხოლო ბგურაფლენთ, მუსხით მნიშვნელოვან რე, მიღდან იმენდ. იეჰოვაქ აბრაამს დეპირ, ნამდა თიშით იჸუაფუდ კურთხეულ „ბრელ ხალხ“. წერმიდგინით, მუ დიდებულ დუნაპირებუშ შესრულებას ელუდ აბრაამ! (დაბ. 12:3; 15:5; 17:4; რომ. 4:17). მარა დრო მიკიშ, თინა უკვე 100 წანერ რდჷ, სარა — 90, დო დუნაპირებ სქუა დიო ხოლო ვა ჸუნდეს. კოჩიშ გინაჯინუშე თეშ იძირედ, ნამდა შეიოლებერ ვა რდჷ აბრაამ დო სარას სქუა ჸუნდესკო. თენა აბრაამშო რწმენაშ გამოცდა იჸუაფუდ. მარა მუჭოთ ბიბლიაშე ბგებულენთ, თის „იშენით იმენდ უღუდ დო წანდჷ, ნამდა ანაყუ კათაშ მუმათ გინირთუდ“ (რომ. 4:​18, 19). ქოთ თაშ ქუმოხვად! აბრაამიშ იმენდ ვა გამტყუნებე დო ქეშეძინ ისაკიქ, სქუაქ, ნამდგას ქიანაშ ხანს ნატრენდჷ (რომ. 4:​20—22).

17. სოვრეშე მიჩქნა, ნამდა შემლებნა ვორდათ ღორონთიშ მეგობრეფ დო მართალეფო იპჸუათ მერჩქინელქ?

¹⁷ მუჭოთ გებგით, აბრაამცალო ჩქი ხოლო შემლებნა მიბღათ ღორონთშე მოწონა, გინიფრთათ თიშ მეგობრეფო დო მართალეფო იპჸუათ მერჩქინელქ. პავლექ ხოლო ზუსტას თეს გუსვჷ ხაზ, მუჟამსით თქუ: «სიტყვეფ „მართალო იჸუ მერჩქინელქ“, ხვალე თიშო [აბრაამშო] ვა ჭარენ, ჩქინო ხოლო იჭარ, მით მართალეფო იპჸუაფუთ მერჩქინელ, მუშენდა ბწანა თინა, მიდგაქ გათელ იესო» (რომ. 4:​23, 24). საჭირო რე, მიღდან რწმენა, თინა საქმეეფით ვოძირათ დო ვა ვოდინუათ იმენდ, მუჭოთ თენა აბრაამქ აკეთ. პავლე იმენდშე ჩიებას რომაელეფიშ მა-5 დუდის ხოლო აგრძელენს, ნამდგას უკულიან სტატიას გუვარჩიენთ.