1. მუშენ შემლებნა ფთქუათ, ნამდა ამდღარცალ დრო დღას ვა ჸოფე კაცობრიობაშ ისტორიას?

ჩქი ფცხოვრენთ თიცალ დროს, ნამუთ კაცობრიობაშ ისტორიას დღას ვა ჸოფე. მუჭოთ ბიბლიას რდუ ნაწინასწარმეტყველებუნ, იეჰოვა შაყარანს ანაყუ ხალხის „არძა რჯულშე დო ტომშე, ხალხშე დო ნინაშე“. თინეფ ბრუო მილიონშე მეტ რენა, ნამუსით ბიბლია „ძალიერ ხალხო“ მიშინუანს, მით „მსახურებას უსრულენა [ღორონც] დღაშ დო სერით“ (გამოცხ. 7:9, 15; ეს. 60:22). აიშახ დღას ვა ჸოფე თესხი ხალხ, მით ღორონთიშ დო მოყვასიშ ჸოროფას გიმირჩქინანდჷ.

2. მუნერ ჸოროფას გიმირჩქინანს თი ხალხ, მით ღორონც ვეჩინენს? (ქოძირით სურათ თე გვერდის).

² წმინდა წერილეფს თინა ხოლო რდუ ნაწინასწარმეტყველებ, ნამდა ბოლო დროს ღორონც ვეჩინენდუნ ფერ ხალხ ეგოისტურ ჸოროფას გეგმირჩქინანდჷ. მოციქულ პავლექ ჭარ: „ბოლო დღალეფს . . . ხალხ იჸუაფ დუდიშ მოჸოროფე, ფარაშ მოჸოროფე . . . ღორონთიშ უმოსო სიამოვნებაშ მოჸოროფე“ (2 ტიმ. 3:1—4). ეგოისტურ ჸოროფა შუროთ ვემურე ღორონთიშ მოსაწონ ჸოროფას. ეგოისტურ ჸოროფაშ გიმორჩქინას ვამუღჷ ხალხშა თიცალ ბედნერობა, მუდგასით ელნა დო თეს გეძინელ, არძას ურთულენს ცხოვრებას.

3. მუს გუვარჩიენთ თე სტატიას დო მუშენ?

 ³ პავლეს ჯგირო არჩქილედ, ნამდა ირდიხას მოდვალირ ეგოისტურ ჸოროფაქ შილებედ ქრისტიანეფწკუმა ხოლო გლახათ ქიმოქმედკო. ათეშენ გაფრთხილ თინეფ, ვემკანჭესკო თი კათას, მით თეცალ ჸოროფას გიმირჩქინანდჷ (2 ტიმ. 3:5). მუშო ოკო რაგად, გვალო ვემაჩილითენა დუდ თინეფწკუმა ურთიერთობაშა. ათეშენ მნიშვნელოვან რე დეფიფქრათ, მუშ კეთება შემლებნა, ნამდა ქვეყნიურ აზროვნებას ჩქინწკუმა გავლენა ვა უღდას დო გუვახარათ ჩქინ მოჸოროფე ღორონთი. მორთ, ქობძირათ, მუ განსხვავება რე ღორონთიშ მოსაწონ ჸოროფაშ დო 2 ტიმოთეშ 3:2—4-ის მოშინაფილ ჸოროფა შქას. თენა მიმეხვარებნა, ქობძირათ, ხომ ვა მოსაჭირნა გაუჯგუშება თიცალ ჸოროფაშ გიმორჩქინას, ნამუსით ნამდვილ ბედნერობა მოუღჷ.

4. მუს იჩიებ ბიბლია დუდიშ ზომიერ ჸოროფაშე?

⁴ მოციქულ პავლექ ჭარ: „ხალხ იჸუაფ დუდიშ მოჸოროფე“. დასურო გლახა რენო, მიჸორდან ჩქინ დუდი? მუშო ოკო რაგად, ვარ. აუცილებერ რე, ჩქინ დუდ ზომიერო მიჸორდან თიშენ, ნამდა იეჰოვას თაშ ვაფუთ გოჭყაფილი. იესოქ თქუ: „მოყვას სქან დუდცალო გიჸორდას“ (მარ. 12:31). ჩქინ დუდ ვამიჸორან-და, შხვას მუჭო იპჸოროფუანთ? თეს გეძინელ, ბიბლიას პკითხულენთ: „ქომონჯეფს ხოლო მუნეფიშ სხეულცალო ოკო უჸორდან მუნეფიშ ოსურეფი. მისით მუშ ოსურ უჸორს, თის მუშ დუდ ხოლო უჸორს, მუშენდა დღას მითინს ვა გოჯოგაფ მუშ ხორცი, პირიქით ოდიარუანს დო გალუაფ თის“ (ეფეს. 5:28, 29). თაშ ნამდა, დუდიშ ზომიერო ჸოროფა აუცილებერ რე.

5. მუშ რაგად შილებე თინეფშე, მიდგას ნაბეტანო უჸორს მუშ დუდი?

⁵ მუჭოთ 2 ტიმოთეშ 3:2-ს ჭარუნ, დუდიშ ჸოროფას ჯგირ მუთუნ ვა მოჸუნს, მუშენდა თინა ეგოისტურ ჸოროფა რე. თი კათა, მიდგას დუდ ზედმეტო უჸორს, მუშ დუდშე თიშე უმოსის ფიქრენს, ვინემ ოკო ფიქრენდას (წეკითხით რომაელები 12:3). * თინეფს ხვალე მუნეფიშ დუდ ოინტერესნა დო შხვეფიშ ამბე ნაკლებო აწუხენა. მუჟამსით საქმე გილმელებუნ, მუნეფიშ დუდშა ვეჭოფნა პასუხიშმგებლობას დო ირფელს შხვეფს გინმაბრალენა. 2 ტიმოთეშ 3:2-ს მოშინაფილ კათას, მიდგას დუდ ზედმეტო უჸორს, ბიბლიაშ ართ კომენტატორი ადარენს ზღარბის. მინშა თინა ბურთცალო გინმირთუ, მუ თვითონ ჯგირო გინაფლენც დუც, მარა ხე მითინს ვემიათხე, მუშენდა ირდიხაშე იძგვიტუაფ. თეგვარო, თი კათა მით ზღარბცალო ხვალე მუნეფიშ ჯგირობუაშე ფიქრენსინ, სინამდვილეს ბედნერ დღას ვეჸუაფ.

6. მუ ჯგირობუა მოუღჷ ღორონთიშ მოსაწონ ჸოროფაშ გიმორჩქინას?

⁶ ბიბლიაშ ნამთინე მარკვიებელიშ აზრით, პავლექ გლახა თვისებეფ შკას დუდიშ ჸოროფა პირველ რიგის თიშენ მიშინუ, ნამდა თინა ხეს უნწყუნს თექ ინოჭარილ შხვა უარყოფით თვისებეფიშ გიმორჩქინას. თეშ გინაწონს, ღორონთიშ მოჸოროფე ხალხ ოცად ჯგირ თვისებეფიშ გიმორჩქინას. ბიბლიას ღორონთიშ მოსაწონ ჸოროფა მოშინაფილ რე თიცალ თვისებეფწკუმა, მუჭომით რე ხიოლი, მშვიდობა, მოთვინება, ჯგირობუა, სიჯგირა, რწმენა, ლიბ ხასიათ დო დუდშეკება (გალ. 5:22, 23). ფსალმუნმაბირექ ჭარ: „ბედნერ რე ხალხ, ნამუშ ღორონთ იეჰოვა რე!“ (ფსალმ. 144:15). იეჰოვა ბედნერ ღორონთ რე, ათეშენ თიშ ხალხ ხოლო ბედნერ რე. თი კათაშ გინაწონს, მით ხვალე მუნეფიშ დუდშე ფიქრენან, იეჰოვაშ მსახურეფშო მუნეფიშ ძალეფიშ შხვეფიშ საჯგირობუოთ გიმორნაფას ხიოლ მოუღჷ (საქ. 20:35).

7. ნამ კითხვეფ მიმეხვარებნა თიშ გაგებას, ქომიჸორან დო ვარ ღორონთი?

⁷ მუჭო შემალებენა თიშ გაგება, ხომ  ვეგნმოფორუნს ჩქინ დუდიშ ჸოროფა ღორონთიშ ჸოროფას? დეფიფქრათ ფილიპელეფიშ 2:3, 4-ის ინოჭარილ სიტყვეფშე: „მუთუნ ვაკეთათ ართიანიშ ჯინით დო ეგოისტობათ, რდათ თანდაბლეფ დო შხვეფ თქვან დუდშე უმოსო მირჩქინით; ხვალე თქვან ჯგირობუაშე ვარინ, შხვეფიშ ჯგირობუაშე ხოლო იხანდით“. ჩქინ დუც ოკო ქოპკითხათ: ქიგმიბრინუანქო თე რჩევას? შურ დო გურით ქუვოცადუქო ღორონთიშ ნებაშ შესრულებას? ქობგორუნქო თიშ საშვალებეფს, ნამდა ჯგირ გუკეთე შხვეფს, მუჭოთ კრებას თეშ მსახურებას ხოლო? თეშ კეთება ირო ვა რე ადვილ, მუშენდა თენა დუდიშ გინოდვალას დო დიდ მონდომას ითხინს. დასურო, მუთუნ ვა მომღანა თიცალ ბედნერობას, ვინემ თიშ რჩქინა, ნამდა გურს ვუხარენთ უზენაეს ღორონც.

8. მუ გინაჭყვიდირაფუ ნამთინეს ღორონთიშ ჸოროფაქ?

⁸ ღორონთიშ ჸოროფაქ გინაჭყვიდირაფუ ნამთინეს, ვარია ქუთქუალუდკო კარიერაშე, ნამდა სრულაშე ემსახურკო იეჰოვას. ართ და ერიკა, ნამუთ შეერთებულ შტატეფს ცხოვრენსინ, ექიმ რე. თიქ პრესტიჟულ კარიერაშა პიონერო მსახურება ისხუნუ დო ქომონჯწკუმა ართო მუსხირენ ქიანას მსახურენდ. თინა იშინანს: „შხვა ქიანეფს მსახურებაშ დროს ბრელ ჯგირ შემთხვევა მიღდეს, თეს გეძინელ, ამდღა თექ ბრელ მეგობარ პჸუნა. თე ირფელიშ ჭყოლოფუათ უმოს საინტერესო ცხოვრება მიღნა. მედიცინაშა დუდ ვადამნებებ, მარა ჩქიმო ნამდვილ ხიოლ დო ბედნერობა თის მოუღჷ, ნამდა დროშ უმენტაშის შხვეფიშ სულიერო მოხვარას ვუთმენქ“.

9. მუშენ ვა მომღანა ბედნერობას ფარაშ ჸოროფა?

⁹ პავლექ ჭარ, ნამდა ბოლო დროს „ფარაშ მოჸოროფე“ ხალხ იცხოვრენდჷ. მუსხირენ წანაშ წოხლე ირლანდიას პიონერ ჯიმა ართ კოჩის ღორონთიშ გურშენ ეჩიებუდ. თე კოჩიქ ჯიბეშე ფარა გეშიღ, ხეს ქიდეკინ დო თქუ: „ჩქიმ ღორონთ თენა რე!“. მართალ რე, ბრელ ვაარგამენს თეს, მარა ქონებაშ გურშენ ზუსტას თაშ ფიქრენს. თინეფს უჸორა ფარა დო ირფელ, მუდგაშ ჸიდირ ფარათ შილებე. ბიბლია მაფრთხილენა: „ვარჩხილიშ მოჸოროფე ვარჩხილით ვერძღუ, ვართ ქონებაშ მოჸოროფე ირძღუ ქონებათ“ (ეკლ. 5:10). თეცალ კათას ირიათო მეტ ფარა ოკო დო მეტიშ შაყარუას ოცად, მარა საბოლათ დუდშა უბედრობას გიტახანა (1 ტიმ. 6:9, 10).

10. მუ თქუ აგურქ სიმდიდრეშ დო სიღარიბეშ გურშენ?

¹⁰ მუშო ოკო რაგად, ფარა არძას მოსაჭირნა, მუშენდა მუდგარენ გაგებათ, თის შეულებ ჩქინ დაცვება (ეკლ. 7:12). მარა შილებენო პიროვნება დასურო ბედნერ რდას, მუჟამსით თის ხვალე თისხი უღჷ, მუთ აუცილებერო ოსაჭირ? მუშო ოკო რაგად, ქო! (წეკითხით ეკლესიასტე 5:12). * იაკეშ სქუაქ, აგურქ ჭარ: „ვართ სიღარიბეს დომტუა დო ვართ სიმდიდრე მუჩა. ქომუჩ ჩქიმ დასაბაღ ოჭკომალი“. არძაშო გასაგებ რე, მუშენ ვაკოდ თის სიღარიბეს ცხოვრება. მუჭოთ ენწყუნ, თის ვაკოდ მეჩირთკო დო მიხირკო, მუდგათ ღორონთიშ უპატიცემლობას გეგმირჩქინანდჷ. მარა მუშენ თხუ ღორონც, ნამდა ბრელ ქონება ვემეჩკო? თიქ გენწყ თეშ მიზეზი: «მუშენდა ირფელ ქუმაშინ ვაფთქუე: „მი რე იეჰოვა?“» (იგავ. 30:8, 9). შილებე იჩინენდათ თიშნერ ხალხის, მისით ღორონთიშ უმოსო ფარაშ იმენდ უღჷ.

11. მუ რჩევა მუჩეს იესოქ ფარაშ გურშენ?

¹¹ ფარაშ მოჸოროფეს ვაგახარებე ღორონთიშ გური. იესოქ თქუ: „მითინს ვეშიალებე რდას ჟირ ბატონიშ მონა, მუშენდა, ვარდა ართის გიჯოგუანს დო მაჟიას ქიჸოროფუანს, ვარდა ართის გეგნაჸუნუ დო მაჟიას მუთუნო ვემირჩქინანს. ვეშქალებენა ღორონთიშ მონათ რდათ დო ქონებაშ ხოლო“. თეშ რაგადშახ იესოქ თქუ: „ვაშაყარუათ ქონება დედამიწას,  სოდეთ კიტიტ დო ღანჯ ჭკომუნს დო მახინჯეფ იხირა. დოშაყარეთ ქონება ზეცას, სოდეთ ვართ კიტიტ დო ღანჯ ჭკომუნს დო ვართ მახინჯეფ იხირა“ (მათ. 6:19, 20, 24).

12. მუჭო მიმეხვარებნა უბრალო ცხოვრება მეტ ვაკეთათ იეჰოვაშო? ქიმიჸონით მაგალითი.

¹² იეჰოვაშ ბრელ მსახურქ ქიმეხვად, ნამდა უბრალო ცხოვრებას უმოს ბედნერობა მოუღჷ დო მსახურებას ხოლო მეტიშ კეთება შეულებნა. ჯეკიქ, ნამუთ შეერთებულ შტატეფს ცხოვრენსინ, გეგმოჩ მუშ დიდ ჸუდე დო მიოტუ ბიზნესი, მუშენდა მუშ ოსურწკუმა ართო პიონერულ მსახურებაშ დოჭყაფა ოკოდ. თინა იშინანს: «მიჭირდჷ ჩქიმ დიდ ჸუდეშ დო ქონებაშ დოტება. მართალ ქოფთქუენ, წანეფიშ დინახალე ჸუჩა ირო განერვიანებულ იფრთუდ სამუშას პრობლემეფ მიღუდუნ თიშენ. ჩქიმ ოსურ პიონერო მსახურენდ დო ბედნერო გინაფლენდ დუც. თინა მინშა თქუანდ: „არძაშ უჯგუშ უნჩაშ პჸუნს!“. ასე მა ხოლო პიონერ ვორექ დო ჩქი ართ „უნჩაშ“, იეჰოვა პჸუნა!».

13. მუჭო შემლებნა გებგათ, მუნერ დამოკიდებულება მიღნა ფარაწკუმა?

¹³ ქუმოკონა ქიგებგათ, ფარაწკუმა მუნერ დამოკიდებულება მიღნან-და, ჩქინ დუც ოკო ქოპკითხათ: ქიძირენო ჩქიმ ცხოვრებაშე, ნამდა დასურო ბჯერს თიშ, მუდგას ბიბლია ფარაშენ იჩიებ? ფარაშ კეთებას ხომ ვა უკინებ ჩქიმ ცხოვრებას პირველ ადგილი? უმოს მნიშვნელოვან ხომ ვა რე ჩქიმო მატერიალურ ნივთეფ, ვინემ იეჰოვაწკუმა დო თიშ ხალხწკუმა ურთიერთობა? დასურო ქობჯერსო, იეჰოვა ქიზრუნენს ჩქიმ საჭიროებეფშე? შემლებნა ბჯერდან, ნამდა ღორონთ დღას ვა გუტახუნს გურს თინეფს, მიდგას თიშ იმენდ უღჷ (მათ. 6:33).

14. მუჭო ოკო ვუჯინედათ დროშ ტარებას?

¹⁴ ნაწინასწარმეტყველებ რდუ, ნამდა ამდღა „სიამოვნებაშ მოჸოროფე“ ხალხ იცხოვრენდჷ. ჩქი მიჩქნა, ნამდა მუთუნ გლახა ვა რე, მუჟამსით სწორ დამოკიდებულება მიღნა ფარაშე დო ჩქინ დუდშე. თეგვარო, ზომიერო დროშ ტარებას ხოლო მუთუნ გლახა ვა რე. იეჰოვას ვაკო, საერთოთ ვარია ქოფთქუათ გართობაშე. ბიბლია ღორონთიშ ართგურ მსახურეფს ურაგად: „მეუ დო ხიოლით ჭკომ სქან ქობალ დო ხიოლით ეფშა გურით შვი ღვინი“ (ეკლ. 9:7).

15. მუს ნიშნენს 2 ტიმოთეშ 3:4-ის მოშინაფილ სიტყვეფ „სიამოვნებაშ მოჸოროფე“?

¹⁵ პავლე მოციქულ 2 ტიმოთეშ 3:4-ის იჩიებ თი კათაშე, მიდგას ხვალე სიამოვნება უჸორს დო ღორონთ შუროთ ვაინტერეს.  მართალ რე თე მუხლის ჭარ, ნამდა ხალხ ღორონთიშ უმოსო სიამოვნებას ქიჸოროფუანდ, მარა თენა თის ვა ნიშნენს, ხალხის ჭიჭეთ იშენით აღვენუდ ღორონთიშ ჸოროფა. ართ მეცნიერქ პავლე მოციქულიშ სიტყვეფს თეცალ კომენტარ უკეთ: „თე [მუხლი] ვეჩიებ, ნამდა ხალხის ღორონთიშ ჸოროფა ხოლო აღვენუდ. თენა ნიშნენს, ნამდა თინეფს შურო ვაღვენდეს ღორონთიშ ჸოროფა“. თე მუხლი სერიოზულ გაფრთხილებას არზენს თიცალ ხალხის, მით გართობას რე გინოჸუნელი. ბიბლია „სიამოვნებაშ მოჸოროფე“ კათაშენ იჩიებ, ნამდა „დროშ ტარებას“ რენა გინოჸუნელი (ლუკ. 8:14).

16, 17. მუ მაგალით დომტუეს იესოქ დროშ ტარებაშ გურშენ?

¹⁶ იესო გართობაშ საკითხის ზომიერებას გიმირჩქინანდჷ. თინა ქოთ კამპანიას რდუ დო ქოთ „დიდ სუფრას“ (იოან. 2:1—10; ლუკ. 5:29). მუჟამსით კამპანიას ღვინქ მიოკორდესინ, თიქ წყარ ღვინო გინართინუ. ართშა იესოქ თინეფიშ გურშენ, მით თის შუმა-ჭკუმუაშენ აკრიტიკენდესინ, თქუ, ნამდა გართობაშე სწორ დამოკიდებულება ვა უღდეს (ლუკ. 7:33—36).

¹⁷ მარა იესო დროშ ტარებას ვა რდუ გინოჸუნელი. თის იეჰოვაშ მსახურება გეურდ პირველ ადგილშა დო დუც ვაზოგენდ, შხვეფს ქიმეხვარკო. იესოქ მუშ დუდ გაწირ დო თეთ ბრელს მარადიულ სიცოცხლეშ მეღებაშ იმენდ ქიმეჩჷ. მუშ მიმაჸუნალეფიშ გურშენ იესოქ თქუ: „ბედნერეფ რეთ, მუჟამსით რლანძღუნა, რთხოზუნა დო ჩქიმ გურშენ არძანერ უბადობას ეკკაბრალენა. გოხიოლდან, მუშენდა ზეცას დიდ ჯილდო გელნა; თქვანშახ ცხოვრენდესინ თი წინასწარმეტყველეფს ხოლო თაშ თხოზდეს“ (მათ. 5:11, 12).

18. მუჭო შემლებნა გებგათ, მუნერ დამოკიდებულება მიღნა დროშ ტარებაწკუმა?

¹⁸ მუჭო შემლებნა თიშ გაგება, მუნერ დამოკიდებულება მიღნა დროშ ტარებაწკუმა? ჯგირ იჸუაფ ჩქინ დუც ქოპკითხათ: დროშ ტარება ხომ ვა რე ჩქიმო უმოს მნიშვნელოვან, ვინემ მსახურება დო კრებაშ შეხვალამეფი? ქუვორექო მზათ იეჰოვაშ გურშენ დაფთმე თიცალ მუდგარენეფ, მუსით ჩქიმდა სიამოვნება მოუღჷ? მუჟამსით საქმე დროშ ტარებას ოხუნ, ქოფიფქრენქო ქუმოწონს დო ვარ იეჰოვას ჩქიმ არჩევანი? იეჰოვა დასურო ქომიჸორან-და, ვა ფქიმინუნთ თიცალ მუდგარენეფს, მუთ მიჩქნა, ნამდა ღორონც ვა მოწონს; თეს გეძინელ, თიცალ საქმეეფს ხოლო ვა ვაკეთენთ, ნამუთ შილებე თის ვემეწონას (წეკითხით მათე 22:37, 38). *

19. მუნერ კათა ვეჸუაფ დღას ბედნერი?

¹⁹ სატანაშ ქიანას ხალხ უკვე სოდგარენ 6 000 წანა რე იტანჯებუ, მარა თე სისტემაშ აღსასრულ მონჭაფილ რე. ქიანა ეფშა რე თიცალ კათათ, ნამუთ დუდიშ ჸოროფას, ფარაშ შიბას დო დროშ ტარებას რე გინოჸუნელი. თეცალ კათა ხვალე მუნეფიშ ჯგირობუაშე ფიქრენს დო თინეფიშ ცხოვრებას პირად კორნებეფს უკებ პირველ ადგილი. თეცალ ხალხ დღას ვეჸუაფ ბედნერი. ფსალმუნმაბირექ თე საკითხშე ჭარ: „ბედნერ რე კოჩ, მიდგას იაკობიშ ღორონთ ჸუნს მარსხებელო, მიდგას მუშ ღორონთშა, იეჰოვაშა უღჷ იმენდი“ (ფსალმ. 146:5).

20. მუ ბედნერობა მოუღჷ თქვანო ღორონთიშ ჸოროფას?

²⁰ იეჰოვაშ ხალხის ღორონთიშ ჸოროფა უმოსო აძინუ. თეს გეძინელ, თიშ მსახურეფიშ რიცხვი ირ წანას ირდუ. თე ირფელ ამტკიცენს, ნამდა ღორონთიშ სამეფო დასურო მართველენს დო მალას დედამიწას თოლით უძირაფ კურთხევეფს მუღანს. მარადიულ დო ნამდვილ ბედნერობა უზენაეს ღორონთიშ გურიშ გახარებას დო თიშ ნებაშ შესრულებას მოუღჷ. თინეფ, მისით იეჰოვა უჸორან, დასურო ბედნერეფ იჸუაფნა. ანწიან სტატიას გუვარჩიენთ თი გლახა თვისებეფს, ნამუთ დუდიშ ზედმეტ ჸოროფას მოჸუნს. თეს გეძინელ, ქობძირუნთ მუჭო გენესხვავებ თინეფ თი თვისებეფშე, ნამუსით იეჰოვაშ მსახურეფ გიმირჩქინანა.