1, 2. მუჭო გიმირინუანს იეჰოვა ბუნებრივ რესურსეფს ხეგოფაჩილო?

იეჰოვა ხეგოფაჩილ ღორონთ რე. მუთ მიღნა ირფელ თიშე მიღნა. იეჰოვაშ რე ბუნებრივ რესურსეფ დო თეს გიმირინუანს, ნამდა დედამიწას სიცოცხლექ ქიარსებას (ფსალმ. 104:13—15; ანგ. 2:8). ბიბლიას მოშინაფილ რე თიცალ შემთხვევეფ, მუჟამსით იეჰოვაქ მუშ ხალხიშ საჯგირობუოთ სასწაულებრივო გიმირინუ ბუნებრივ რესურსეფი.

² ონდო ისრაელეფ უდაბნოს რდესინ, იეჰოვა 40 წანას არზენდ თინეფს მანანას დო წყარს (გამ. 16:35). თეგვარო, ისრაელეფს „მუთუნ ვემერკებნა“ (ნეემ. 9:20, 21). იეჰოვაქ წინასწარმეტყველ ელისეშ ხეთ ხოლო გაკეთ სასწაულ, მუჟამსით ქომონჯღურელ ოსურიშ ჸუდეს ზეთი ველიებუდ. ღორონთიშ თე საჩუქარიშ ჭყოლოფათ თე ოსურქ გეგნიგ ვალეფ დო თეშ უკულ დასაბაღ ფარაქ ხოლო ქუდასკიდ, ნამდა მუს დო მუშ ბოშეფს ცხოვრება გუგრძელებდესკო (2 მეფ. 4:1—7). იეჰოვაშ ძალათ იესოქ სასწაულებრივო დადიარუ მუშ მარჩქილაფშა მულირ კათა დო მუჟამსით ფარაქ საჭიროქ ქიჸუნ, თიშე ხოლო ქიზრუნ (მათ. 15:35—38; 17:27).

3. მუს გუვარჩიენთ თე სტატიას?

³ იეჰოვას შეულებ არძანერ რესურს გიმირინუას თიშო, ნამდა მუშ  გუნაჭყეფუს ქიმეხვარას. მარა თეშ უმკუჯინუო, თინა იშენით მოუწოდენს მუშ მსახურეფს, ნამდა ფინანსურო ქელუდირთან მუშ ორგანიზაციას (გამ. 36:3—7; წეკითხით იგავები 3:9). * მუშენ ელჷ იეჰოვა, ნამდა შებწირენთ ირფელ ძვირფასის მუთ მიღნა? მუჭო ოხვარდეს ჯვეშ დროს ფინანსურო ართგურ მსახურეფ იეჰოვაშ წარმომადგენლეფს? მუჭო გიმირინუანს ამდღა ორგანიზაცია შეწირულ ფარას? თე სტატიას პასუხის ქიმეფჩანთ თე კითხვეფს.

4. მუშენ ვორთუთ შესაწირავეფს?

⁴ შესაწირავეფს თიშენ ვორთუთ, ნამდა მიჸორა იეჰოვა. მუჟამსით ფიფქრენთ იეჰოვაქ ჩქინ საჯგირობუოთ მუ აკეთუნ, თენა ჩქინ გურს ოხუ. მუჟამსით მეფე დავითი ტაძარიშ შენებაშე იჩიებუდუნ, თქუ, ნამდა ირფელს მუთ მიღნა, იეჰოვა მარზენა დო თიშ მუნაჩემს კინ თის ვურთინუანთ უკახალე. ჩქი ვოთანხმუთ თე სიტყვეფს (წეკითხით 1 მატიანე 29:11—14). *

5. მუჭო იძირე ბიბლიაშე, ნამდა შესაწირავეფიშ კეთება თაყვანიშმცემლობაშ ნაწილ რე?

⁵ შესაწირავეფიშ კეთება იეჰოვაშ თაყვანიშცემაშ ნაწილ რე. მოციქულ იოანექ ხილუას ძირჷ ანგელოზეფ, ნამუთ იჩიებდეს: „სი ღირს რექ, იეჰოვა, ჩქინ ღორონთი, მიღე დიდება, პატი დო ძალიერება, მუშენდა ირფელ სი გაჭყჷ, სქან ნებათ არსებენს დო გოჭყაფილ რე“ (გამოცხ. 4:11). მუშო ოკო რაგად, იეჰოვა ჩქინდე იმსახურენს დიდებას დო პატის, ათეშენ მოკონა არძაშ უჯგუშ შებწირათ თის. იეჰოვაქ მოსეს უწუ, ნამდა ისრალ ერს წარმოწანაშე სუმშა აღუნიშნებუდკო დღახუეფი. ისრაელეფშო თე დღახუეფ თაყვანიშცემაშ ნაწილ რდუ დო ათეშენ თინეფს ხეცარიელო ოკო ვემურთუმდესკო თექ (კან. 16:16). ამდღა ხოლო შესაწირავეფიშ კეთება ჩქინ თაყვანიშმცემლობაშ ნაწილ რე. თეთ ვოძირანთ, ნამდა ვაფასენთ დო ხუც ვუკინენთ იეჰოვაშ ორგანიზაციას.

6. მუშენ რე ჩქინო ჯგირ შესაწირავეფიშ კეთება? (ქოძირით სურათ მა-17 გვერდის).

⁶ ჩქინო ხეგოფაჩილობაშ გიმორჩქინა უმოს ჯგირ რე, ვინემ ხვალე აშო მუდგარენიშ მეღება (წეკითხით იგავები 29:21). * დეფიქრით თეცალ მაგალითეფშე: ჭიჭე ბაღანა მშობლეფიშ მინაჩემ ფარაშე თინეფს საჩუქარს უკეთენს, მუთ მშობლეფშო ძვირფას რე; ახალგაზრდა პიონერი მშობლეფს ოხვარ ქირაშ გაფას ვარდა ოჯახშო ოჭკუმალს ჸიდულენს. შილებე თიშ მშობლეფ შუროთ ვეთხინდან თეშ კეთებას, მარა იშენით ვარიას ვეჩიებნა თეცალ საჩუქარშე. მუშენ იქციებნა მშობლეფ თაშ? თინეფს არჩქილენა, ნამდა თეშნერ საქციელით სქუალეფ თინეფიშ მარდულობას გიმოხანტნა. თეგვარო, იეჰოვას უჩქჷ, ნამდა ჩქინო ხოლო ჯგირ რე შესაწირავეფიშ კეთება.

7, 8. მუჭო აკეთენდ ჯვეშო შესაწირავეფს იეჰოვაშ ხალხი: ა) განსაკუთრებულ მიზნეფშო? ბ) თიშ საქმეშ ხუჯიშ დაკინებელო?

⁷ ბიბლიაშე ბგებულენთ, ნამდა იეჰოვაშ ხალხი თიშ საქმეშ ხუჯიშ დაკინებელო შესაწირავეფს ორთუდ. რდუ შემთხვევეფ, მუჟამსით თინეფ განსაკუთრებულ მიზნეფშო გინმოდვანდეს ფარას. მაგალთო, მოსექ ხალხის უწუ, ნამდა კარავიშ ოშენებელო შესაწირავეფ ქუმუღალდესკო. მეფე დავითიქ ხოლო თენა უწუ ისრაელეფს, მუჟამსით საქმე ტაძარიშ შენებას ოხუდ (გამ. 35:5; 1 მატ.  29:5—9). მეფე იეჰოაშიშ დროს, იეჰოვაშ ჸუდეშ ორემონტებელო მღვდელეფ შეწირულ თანხას გიმირინუანდეს (2 მეფ. 12:4, 5). პირველ საუკუნეშ ქრისტიანეფქ ხოლო, მუჟამსით ქიგეგეს, იუდეას შქირენა რდუნ, „გეგნოჭყვიდეს, მის მუსხით შეიალებედუნ, იუდეას ჯიმალეფშა ქიმუხვარებდესკო“ (საქ. 11:27—30).

⁸ შხვა შემთხვევას, იეჰოვაშ მსახურეფ ფინანსურო ელურდეს თინეფს, მიდგას ღორონთიშ ხალხიშ ხემძღვანელობა ოვალდეს. მოსეშ კანონით შხვა ტომეფიშ გინაწონს, ლევიანეფს სამკვირდო დიხეფ ვემიაჩამდეს. ათეშენ ისრაელეფს ოვალდეს ნავითალიშ შეწირუა, მუთ ლევიანეფს მეჩანდ საშვალებას, მთელ ყურადღება კარავს მსახურებაშა გეგნუღალდესკო (რიცხ. 18:21). პირველ საუკუნეს ხოლო რდეს ოსურკათა, ნამუთ „მუნეფიშ ქონებათ ომსახურუდეს“ იესოს დო თიშ მოწაფეეფს (ლუკ. 8:1—3).

9. მუ დო მუ საშვალებას გიმირინუანდეს ჯვეშო, ნამდა შესაწირავეფიშ კეთებაქ ქეშიალებესკო?

⁹ ჯვეშო შესაწირავეფიშ კეთებაქ ქეშიალებესკონ, შხვადოშხვა საშვალებას გიმირინუანდეს. მაგალთო, თი შესაწირავეფ, ნამუთ ისრაელეფქ უდაბნოს კარავიშ ოშენებელო აკეთესინ, შილებედ ეგვიპტეშე ნაღელ ძვირფას ნივთეფ ხოლო ოკათუდკონ (გამ. 3:21, 22; 35:22—24). პირველ საუკუნეს, ნამთინე ქრისტიანქ გეგმოჩ დიხაშ ნოკვეთეფ დო ჸუდეეფი. თინეფქ ეჭოფილ ფარა მოციქულეფს ქიმუღეს დო მოციქულეფქ თე ფარათ თი და დო ჯიმალეფს ქიმეხვარეს, მიდგას უჭირდ (საქ. 4:34, 35). შხვეფი შესაწირავეფიშ ოკეთებელო ფარას ირიათო გინმოდვანდეს (1 კორ. 16:2). თაშ ნამდა, შესაწირავეფს ორთდეს, მუჭოთ მდიდარეფინ თეშ ღარიბეფ ხოლო (ლუკ. 21:1—4).

10, 11. ა) მუჭო შემლებნა მივაჸუნათ ღორონთიშ მსახურეფიშ მაგალითის, ნამუთ ჯვეშ დროს ცხოვრენდეს? ბ) თქვა მუს ფიქრენთ სამეფოშ საქმეშ ფინანსურო ხუჯიშ დაკინებაშენ?

¹⁰ შილებე ამდღა ხოლო განსაკუთრებულ მიზნეფშო იჸუას საჭიროქ შესაწირავეფიშ კეთებაქ. მაგალთო, დაგეგმილ რდას სამეფო დარბაზიშ შენება, ნამუსით მომავალს თქვან კრება გიმირინუანს ვარდა ასე იშაყარუთინ თი დარბაზ რდას გინაკეთებელი. შილებე ქიგებგათ, ნამდა ფარა რე საჭირო ადგილობრივ ფილიალიშ ორემონტებელო, საკონგრესო დარბაზიშ ოშენებელო ვარდა თი და დო ჯიმალეფიშ მახვარებელო, ნამუსით სტიქიურ უბედრობეფქ გიოტირხეს დუც. თეს გეძინელ, შესაწირავეფით ხუც ვუკინენთ და დო ჯიმალეფს, მით მსოფლიო მთავარ სამმართველოს დო შხვადოშხვა ფილიალს მსახურენა. თეწკუმა ართო, შესაწირავეფიშ კეთებათ ელურეთ მისიონერეფს, სპეციალურ პიონერეფს დო გილმალ ზედამხედველეფს. თეს გეძინელ, თქვან კრება რეგულარულო ოჯღონანს შესაწირავეფს, ნამუსით მთელ მსოფლიოს სამეფო დო საკონგრესო დარბაზეფიშ ოშენებელო გიმირინუანა.

¹¹ არძას შემლებნა მონაწილება მიბღათ თი საქმეს, მუსით იეჰოვა ბოლო დღალეფს ორთჷ. შესაწირავეფიშ უმენტაშის თეშ ვორთუთ, ნამდა თეშ გურშენ მითინს ვა ურაგადუთ. შილებე ფარა შესაწირავეფიშ ყუთის ენვოჸოთათ ვარდა ვებ-გვერდიშ jw.org-იშ საშვალებათ ვოჯღონათ ფილიალშა. შილებე ფიფქრენდათ, ნამდა ჩქინ ჭიჭე შესაწირავ ბრელ მუთუნს ვა ნიშნენს. მარა ამდღა შესაწირავეფიშ უმენტაშ რეგულარულო კეთებულ ჭიჭე-ჭიჭე შესაწირავეფშე შითმოდირთუ ვინემ კანკალეშა კეთებულ დიდ შესაწირავშე. რთულ ეკონომიკურ პრობლემეფიშ უმკუჯინუო, ჩქინ ჯიმალეფ მაკედონელ ქრისტიანეფიშ მაგალითის მეჸუნა. თინეფს ეკონომიკურო უჭირდეს, მარა ჯიმალეფს ოხვეწდეს, შესაწირავეფიშ კეთებაშ საშვალება ქიმუჩამდესკო (2 კორ. 8:1—4).

12. მუს ორთჷ ორგანიზაცია, ნამდა გონივრულო განაწილას შესაწირავეფი?

¹² ხემძღვანელ საბჭო გონიერებას დო ართგურობას გიმირჩქინანს, მუჟამსით საქმე ოხუ ორგანიზაციაშ ფინანსეფიშ სწორაშე გიმორნაფას (მათ. 24:45). გადაწყვეტილებაშ  მეღებაშახ თე ჯიმალეფ ლოცულენა, ნამდა გონივრულო გეგმირინუან შემოწირულ თანხეფი (ლუკ. 14:28). თინეფს, მიდგას ბიბლიურ დროს შესაწირავეფ ობარდესინ, ოკო დერწმუნესკო, ნამდა თანხეფ იეჰოვაშ თაყვანიშცემაშო იხარჯებუდ. მაგალთო, მუჟამსით ეზრა იერუსალიმშა მიშუნ, თის მოუღუდ სპარსეთიშ მეფეშ მუნაჩემ ოქრო, ვარჩხილ დო შხვა ძვირფას ნივთეფი, ნამუშ ფასი ამდღანერ ფარათ 100 მილიონ დოლარშე უმოს რდუ. ეზრა თე შესაწირავეფს თეშ უჯინედ, მუჭოთ იეჰოვაშ საჩუქარს, ათეშენ ირნერო ქიზრუნ, ნამდა თე ნივთეფ იერუსალიმშა უსაფრთხოთ გენუღალდესკო (ეზრ. 8:24—34). იუდეას მახორუ და დო ჯიმალეფს ქიმეხვარკონ, მოციქულ პავლექ შესაწირავეფ დოშაყარუ. თიქ ზომეფ მიღ, ნამდა შეწირულ ფარა, მუჭო საჭირო რდუნ თეშ გუნაწილებდესკო (წეკითხით 2 კორინთელები 8:18—21). * მუჟამსით საქმე შესაწირავეფს ოხუნ, ორგანიზაცია პავლეშ დო ეზრაშ მაგალითის მეჸუნს დო ფინანსეფს გონივრულო ანაწილენს.

13. მუშენ მოხვად ბოლო წანეფს ორგანიზაციას ნამთინე ცვლილებაქ?

¹³ მაგალთო, ოჯახიქ შილებე მუდგარენ დოთირუას, ნამდა თიშე უმოს ვადახარჯან, ვინემ შემოსავალ უღნა; თეს გეძინელ, ოცადნა გემარტივან ცხოვრება დო მეტ აკეთან იეჰოვაშო. ღორონთიშ ორგანიზაცია ხოლო თაშ უჯინე ხარჯეფს. ბოლო წანეფს ბრელ სიახლე მიღდეს დო კანკალეშა გასალი უმოს მეტ რდუ ვინემ შემოსავალი. ათეშენ ორგანიზაცია ხოლო გორუნს შარეფს, ნამდა საქმეშ გამარტივებათ ნაკლებ ხარჯ ქოძირას დო ჩქინ შესაწირავეფიშ ჭყოლოფათ, მუთ შილებე მეტ ჯგირ საქმე გაკეთას.

14—16. ა) მუქ იჸუ შეიოლებერქ ჩქინ შესაწირავეფიშ ჭყოლოფათ? ბ) თქვა მუ სარგებელ მოიღეს თაქ მოშინაფილ სიახლეეფქ?

¹⁴ იეჰოვაშ დიდ ხანიშ მსახურეფშე ხშირას გამგონებნა, ნამდა თესხი სულიერ საზრდო აიშახ დღას ვა ჸოფე. უბრალოდ დეფიქრით: ბოლო წანეფშე მოჸუნაფილ მიღნა ვებ-გვერდი jw.org, JW მაუწყებლობა დო ბიბლიაშ „წმინდა წერილეფიშ ახალ ქიანაშ თარგმანი“ ბრელ ნინაშა. 2014/2015 წანეფს 14 ქალაქის, არძაშ უდიდაშ სტადიონეფს ჩეტარ სუმ დღიან საერთაშორისო კონგრესიქ, ნამუთ გურიშ ემაკინალ რდუ დამსწრეეფშო.

¹⁵ ბრელქ გიმოხანტ მარდულობა თი სულიერ საზრდოშენ, ნამუსით იეჰოვაშ ორგანიზაციაშე  ღებულენს. მაგალთო, ჩილ დო ქომონჯიქ, ნამუთ აზიაშ ართ ჭიჭე ქიანას მსახურენან, JW მაუწყებლობაშ გურშენ თეცალ მუდგარენ ჭარ: „ჩქი ჭიჭე ქალაქის დაბნიშნეს. ათეშენ კანკალეშა დუც არძაშე მოჩილათირო ბგინაფლენთ დო მოჭყორდუნა მუ მაშტაბებს მიოჭირინუ იეჰოვაშ საქმექ. მარა მუჟამსით JW მაუწყებლობაშ შხვადოშხვა პროგრამას ვუჯინეთინ, ბგინაფლენთ, ნამდა ჩქი ხოლო მსოფლიო საჯიმალოშ წევრეფ ვორეთ. თაქ მახორუ ძვირფას და დო ჯიმალეფს ხოლო გურშა ელმუკინანს JW მაუწყებლობა. თინეფშე ხშირას იფრჩქილუაფუთ, ნამდა ირ თუთაშ მაუწყებლობაშ ჯინაშ უკულ, ხემძღვანელ საბჭოწკუმა უმოს ხოლოს გინაფლენა დუც. ასე თინეფს უმოსო ოამაყნა, ნამდა ღორონთიშ ორგანიზაციაშ წევრეფ რენა!“.

¹⁶ ამდღარშო მთელ მსოფლიოს სოდგარენ, 2 500 სამეფო დარბაზიშ შენება ვარდა რემონტ მეურს. ახალ დარბაზშა გინულაშ უკულ, ჰონდურასიშ ართ-ართ კრებაქ თეცალ წერილ ჭარ: „ბედნერეფ ვორეთ, ნამდა იეჰოვაშ დიდებულ ოჯახიშ წევრეფ ვორეთ დო გურს მიხარენა მსოფლიო საჯიმალოწკუმა ურთიერთობა, ნამუშ საშვალებათ ოცნებაქ გემირთეს დო ასე სამეფო დარბაზ მიღნა“. ბრელ გიმოხანტუნს თეცალ სიმარდულს, მუჟამსით ბიბლიას დო შხვა პუბლიკაციეფს მუნეფიშ ნინაშა ღებულენს, სტიქიურ უბედრობეფიშ დროს და დო ჯიმალეფ ოხვარნა ვარდა ორწყენა თი ჯგირ შედეგეფს, ნამუთ დიდ ქალაქეფს სტენდეფით ქადაქებას მოჸუნს.

17. მუჭო იძირე, ნამდა იეჰოვა მიკურე ჩქინ საქმეს?

¹⁷ ჩქინ მიმაჯინეეფს ვარჩქილენა, მუჭო რე შეიოლებერ თე ირფელიშ კეთება ხვალე ნებაყოფლობით შესაწირავეფით. მაგალთო, ართ-ართ დიდ კომპანიაშ დირექტორს ქაძირეს ჩქინ ორგანიზაციაშ შენობა, სოდეთ ლიტერატურა იბეშტუდ. თინა გაკვირებულ რდუ, მუჟამსით ქიგეგ, ნამდა არძა საქმეს მოხალისეეფ ასრულენდეს, ირფელ ნებაყოფლობით შესაწირავეფით იკეთებუდ დო ფარაშ ოშაყარალო საქველმოქმედო ღონისძიებეფს ვატარენდეს. მუჭოთ თიქ თქუნ, თე საქმე მითინს ვაკეთებედ დო ქოთ თაშ რე! ჩქი ჯგირო მიჩქნა, ნამდა იეჰოვაშ მოხვარაშ უმშო მუთუნ ვამაკეთებედეს (იობ. 42:2).

18. ა) მუ კურთხევეფს მიბღენთ, მუჟამსით სამეფოშ საქმეს ხუც ქუდუკინენთ? ბ) მუჭო შემლებნა მივეხვარათ სქუალეფს დო ჭეშმარიტებაშა ახალ მოულირეფს?

¹⁸ იეჰოვა მარზენა საშვალებას დო პატის, მონაწილება მიბღათ სამეფოშ საქმეშ წიმიულას. თინა გარანტიას მარზენა, ნამდა კურთხევეფით ემოფშანა, მუჟამსით სამეფოს ხუც ქუდუკინენთ (მალ. 3:10). მუჭოთ იეჰოვა მოპირნან, ხეგოფაჩილობაშ გიმორჩქინა ჯგირობუას მომღანა (წეკითხით იგავები 11:24, 25). * შესაწირავეფიშ კეთებას ჩქინო ბედნერობა მოუღჷ, მუშენდა ბიბლიას ჭარ: „შხვაშო ჯგირიშ კეთებას უმოს ბედნერობა მოუღჷ, ვინემ აშო მეღებას“ (საქ. 20:35). შემლებნა სიტყვათ დო საქმეთ ვოძირათ სქუალეფს დო ჭეშმარიტებაშა ახალ მოულირეფს, ნამდა თინეფს ხოლო შეულებნა შესაწირავეფიშ კეთება, მუდგას დიდ კურთხევეფ მაჸუნუ.

19. მუჭო ელაიკინეს გურშა თე სტატიაქ?

¹⁹ ირფელ მუთ მიღნან, იეჰოვაშე მიღნა. შესაწირავეფიშ კეთებათ, ღორონც მუშ მუნაჩემს უკახალე ვურთინუანთ. თეთ ვოძირანთ, ნამდა მიჸორა იეჰოვა დო ვაფასენთ თი ირფელს, მუთ თიქ ჩქინო აკეთ (1 მატ. 29:17). მუჟამსით ტაძარიშ ოშენებელო შესაწირავეფს აკეთენდესინ, ბიბლიას ჭარ, ნამდა „გეხარ ხალხიქ ნებაყოფლობით კეთებულ შესაწირავიშ გურშენ, მუშენდა მთელ გურით აკეთეს შესაწირავ იეჰოვაშო“ (1 მატ. 29:9). თაშ ნამდა, მორთ, ჩქი ხოლო ხიოლით შებწირათ იეჰოვას თინა, მუსით თიშ ხეშე ბღებულენთ.