1, 2. ნამ რე 2018 წანაშ არძაშ უმოს გუმაართიანებელ მოვლენა დო მუშენ? (ქოძირით სურათ თე გვერდის).

ქრისტეშ ღურაშ გოშინაშ ონჯუას 2018 წანაშ 31 მარტის, ბჟაშ ენულაშ უკულ აბღნიშნენთ. მთელ მსოფლიოს ღორონთიშ ხალხი დო ბრელ დაინტერესებულ აკიშაყარუ, ნამდა ქიდესწრას თე მნიშვნელოვან ღონისძიებას. ირ წანას გოშინაშ ონჯუა მთელ მსოფლიოს მილიონობით ხალხის აართენს. თეცალ ართობას შხვა ნამთინ ღონისძიებას ვა ბძირუნთ.

² უბრალოთ წერმიდგინით, მუ გახარებულეფ იჸუაფნა იეჰოვა დო იესო გოშინაშ ონჯუაშ დღას, მუჟამსით ქოძირნა მილიონობით კოჩის, ნამუთ მთელ მსოფლიოს იშაყარუ, ნამდა ქიდესწრან თე მნიშვნელოვან ღონისძიებას. ბიბლიას ნაწინასწარმეტყველებ რდუ, ნამდა „აუარებელ ხალხი, ნამუშ თვალუა მითინს ვეშულებუდ, არძა რჯულშე, ტომშე, ხალხშე დო ნინაშე“, ხონარმაღალო ქოთქუანდ: „რსხებას ჩქინ ღორონც, მით ტახტის გეხენ, დო კირიბის ვუმარდუთ“ (გამოცხ. 7:9, 10). მუშმაჯგირა რე, ნამდა ირ წანას ქრისტეშ გოშინაშ ონჯუას აუარებელ ხალხი განადიდენს იეჰოვას დო იესოს თი დიდებულ საქმეეფშენ, მუდგა თინეფქ აკეთეს.

3. მუ კითხვეფს მიაჩამუ პასუხ თე სტატიას?

 ³ თე სტატიას ოთხ კითხვას ქიმიაჩამუ პასუხი: 1) მუჭო შემლებნა პირადო მივემზადათ დო სარგებელ მიბღათ ქრისტეშ გოშინაშ ონჯუაშე? 2) მუჭო მოქმედენს ქრისტეშ გოშინაშ ონჯუა ღორონთიშ ხალხიშ ართობაწკუმა? 3) მუჭო შემლებნა პირადო შევუნწყუათ ხე ართობას? 4) დღას ქიჸუაფნო ბოლო გოშინაშ ონჯუა დო ქიჸუაფ-და, მუჟამ?

4. მუშენ რე მნიშვნელოვან, ონდო შემლებნან, დღას ვაგვოჩილითუათ გოშინაშ ონჯუა?

⁴ დეფიქრით, მუ მნიშვნელობა უღჷ გოშინაშ ონჯუაშ დასწრებას. ვაგგოჭყორდან, ნამდა კრებაშ შეხვალამეფ თაყვანიშცემაშ ნაწილ რე. იეჰოვა დო იესო ოკვირნა, ირნერო ქუვოცადუთ დო ვარ, ქიდვესწრათ წანაშ არძაშ უმოს მნიშვნელოვან ღონისძიებას. ჩქი მთელ გურით მოკონა ქუვოძირათ თინეფს, ნამდა ონდო შემლებნან, დღას ვაგვოჩილითუანთ გოშინაშ ონჯუას. მუჟამსით იეჰოვას საქმეთ ვოძირანთ, ნამდა ქრისტიანულ შეხვალამეფ ჩქინო მნიშვნელოვან რენ, თის ხოლო ართ მიზეზის ვარზენთ, ჩქინ სახელ ვეგშალასას „გასაშინე წიგნიშე“. თეს ბიბლია „სიცოცხლეშ წიგნის“ უძახ, სოდეთ თინეფიშ სახელეფ რე მოჩამილ, მით მარადიულო იცხოვრენა (მალ. 3:16; გამოცხ. 20:15).

5. მუჭო შეილებნა გოშინაშ ონჯუაშახ „შეამოწმათ თქვან დუდ, რწმენას ქორეთ დო ვარ“?

⁵ გოშინაშ ონჯუაშ წოხოლენ დღალეფს შემლებნა დრო გეგმურთათ ლოცვას დო დეფიფქრათ, მუნერ ურთიერთობა მიღნა იეჰოვაწკუმა (წეკითხით 2 კორინთელები 13:5). * მუჭო შემლებნა თეშ კეთება? ბიბლია იჩიებ: „ირიათო შეამოწმით თქვან დუდ, რწმენას ქორეთ დო ვარ“. ათეშენ ჩქინ დუც ოკო ქოპკითხათ: „დასურო ქობჯერსო, ნამდა თი ორგანიზაციაშ წევრი ვორექ, ნამუთ იეჰოვაქ გიშაგორ მუშ ნებაშ შეიოსრულებელო? მუთ შემლებუნ ირფელს ქუვორთუქო, სახიოლო ამბე იფქადაქე დო ვოგურუე ჭეშმარიტება? ქიძირენო ჩქიმ საქმეეფშე, ნამდა დასურო ბჯერს ბოლო დღალეფს ფცხოვრენქ დო სატანაშ ქიანა მალას მისპუ? ამდღა ხოლო ქომღუნო თიცალ რწმენა, მუნერით იეჰოვაშა დუდიშ მეძღვინუაშ დროს მიღუდ?“ (მათ. 24:14; 2 ტიმ. 3:1; ებრ. 3:14). თე კითხვეფშე ფიქრი, მიმეხვარებნა შევამოწმათ ჩქინ დუდი.

6. ა) მი მიღენს მარადიულ სიცოცხლეს? ბ) მუს ორთ ართ უხუცეს ირ წანას გოშინაშ ონჯუაშახ დო თქვა მუჭო შეილებნა მიაჸუნათ თიშ მაგალითის?

⁶ წეკითხით თი სტატიეფ, ნამუთ თე ღონისძიებაშ მნიშვნელობას ოხუ დო დეფიქრით ნაკითხირშე (წეკითხით იოანე 3:16; 17:3). * მარადიულ სიცოცხლეს ხვალე თინეფ მიღენა, მით იეჰოვას იჩინებაფუანს დო თიშ ხვალეგუნაჭყეფ სქუაშ, იესოშ რწმენას გიმირჩქინანს. გოშინაშ ონჯუაშო მივემზადათინ, შემლებნა ბიბლიაშ გურაფაშ შხვადოშხვა მეთოდ გეგშაბგორათ, მუთ მიმეხვარებნა უმოს ხოლოს ვორდათ იეჰოვა დო იესოწკუმა. დეფიფქრათ ართ ჯიმაშ მაგალითშე, ნამუთ ბრელ ხან რე უხუცესო მსახურენს. წანეფიშ დინახალე, თინა შაყარანდჷ „გინაჯინალ კოშკიშ“ სტატიეფს, ნამუთ ოხუდ გოშინაშ ონჯუას დო თი ჸოროფას, მუთ იეჰოვაქ დო იესოქ გიმირჩქინეს. გოშინაშ ონჯუაშახ მუსხირენ მარათ ადრე, თინა კითხულენს თე სტატიეფს დო ფიქრენს თე ღონისძიებაშ მნიშვნელობაშ გურშენ. დრო ხანიშ მიკულაწკუმა ართო თინა ართ ვარა ჟირ სტატიას მეუძინანს მუშ ნაშაყარა სტატიეფს. თიქ ქოძირ, ნამდა თინეფიშ კითხირით დო გოშინაშ ონჯუაშო ოკითხე ბიბლიურ მონაკვეთეფშე  დაფიქრებათ, ირ წანას ახალ მუდგარენს გურაფლენს. მუთ არძაშ უმოს მნიშვნელოვან რე, ირ წანას თე უხუცეს უმოსო ივითარენს იეჰოვაშ დო იესოშ ჸოროფას. ბიბლიაშ გურაფაშ თეცალ მეთოდიქ შილებე თქვა ხოლო მიგეხვარან უმოსო ქიჸოროფუათ იეჰოვა დო იესო დო თეგვარო, გოშინაშ ონჯუაშე სრულ სარგებელ მიღათ.

7. ა) მუშ გურშენ ილოც იესოქ გოშინაშ ონჯუაშ სერს? ბ) სოვრეშე იძირე, ნამდა იეჰოვაქ ქუპასუხ თიშ ლოცვას?

⁷ გოშინაშ ონჯუა სერს, იესოქ ილოც, ნამდა მუშ მიმაჸუნალეფ შქას თიცალ ართობა ჸოფედკო, მუნერით იეჰოვას დო მუს უღდეს (წეკითხით იოანე 17:20, 21). * იეჰოვაქ ქუპასუხ მუშ ძვირფას სქუაშ ლოცვას. შხვა ქრისტიანულ შეხვალამეფიშ გინაწონს, არძაშ უჯგუშო გოშინაშ ონჯუაშე იძირე, ნამდა იეჰოვაშ მოწმეეფ შქას მანგარ ართობა რე. თე ღონისძიებაშ დროს შხვადოშხვა რჯულიშ დო კანიშ ფერიშ კათა მთელ დედამიწას ართო ეკმიშაყარუ. თეგვარო თინეფ თიშ რწმენას გიმოხანტუნა, ნამდა იეჰოვაქ მუშ სქუა მაშქვჷ დედამიწაშა. ნამთინე ქიანას თეცალ შეხვალამეფ იშვიათობა რე დო ჭკვერულო ხოლო ვემიორჩქუნა, მუჟამსით შხვადოშხვა რჯულიშ კათა ართ რელიგიურ შეხვალამას ართო ეკმიშაყარუ. მარა თეცალ ართობას იეჰოვა დო იესო შხვანერო უჯინენა, თინეფშო თენა მანგარ სახიოლო რე.

8. მუ უწუ იეჰოვაქ წინასწარმეტყველ ეზეკიელს?

⁸ ღორონთიშ ხალხის ვა უკვენს თეცალ ართობა. იეჰოვას თენა ნაწინასწარმეტყველეფ აფუდ. თიქ წინასწარმეტყველ ეზეკიელს უწუ, ნამდა ჟირ კეტის — იუდაშ დო იოსებიშ კეტის, ართ კეტო გინართინუანდ (წეკითხით ეზეკიელი 37:15—17). * 2016 წანაშ კვირკვეშ „გინაჯინალ კოშკიშ“ 31, 32 გვერდეფს მოჩამილ სტატიას ჭარუდ: «იეჰოვაქ ეზეკიელს იმენდიშ მუმაჩამალ ამბე გინოჩ, ნამდა დუნაპირებ ქიანაშა დორთაშ უკულ ისრაელიშ დო იუდაშ სამეფოეფ ართ სამეფოთ გინირთუდ. თე წინასწარმეტყველებაშა თინა ხოლო მიშეშ, ნამდა „ბოლო დღალეფს“ ღორონთიშ ხალხ შქას ართობა იჸუაფუდ».

9. მუჭო იძირე გოშინაშ ონჯუაშე, ნამდა ართობაშ გურშენ ეზეკიელიშ წინასწარმეტყველება ისრულებ?

⁹ იეჰოვაქ 1919 წანაშე მოჸუნაფილ ჭიჭე-ჭიჭეთ ქიდიჭყჷ ცხებულეფიშ რეორგანიზაცია დო გაერთიან თინეფი. სიმბოლურო ცხებულეფ რენა კეტი „იუდაშო“. დრო ხანიშ უკულ ქუმაძინ თინეფიშ რიცხვის, მიდგას დედამიწას ცხოვრებაშ იმენდ უღუდ. სიმბოლურო თინეფ რენა კეტი „იოსებშო“. თე ქრისტიანეფქ ქაკათეს ცხებულეფს დო „ართ ოჭყიშალო“ გინირთეს (იოან. 10:16; ზაქ. 8:23). იეჰოვაქ თიშ პირობა დოდვ, ნამდა თე ჟირ კეტის მუშ ხეს ართ კეტო გინართინუანდ (ეზეკ. 37:19). ასე ჟირხოლო ჯგუფ ართათ ომსახურ იეჰოვას დო თინეფს ართ მეფე, იესო ქრისტე ჸუნა, ნამუსით ბიბლია ღორონთიშ „მსახურ დავითო“ მიშინუანს (ეზეკ. 37:24, 25). ეზეკიელიშ წიგნის ეჭარილ თე სარკო ართობა ჯგირო იძირე, მუჟამსით დოსქილადირ ცხებულეფ დო „შხვა შხური“ გოშინაშ ონჯუას ართო ოსწრუნა. მუჭო შემლებნა ხე შევუნწყუათ ართობას?

10. მუჭო შემლებნა ხე შევუნწყუათ ართობას?

¹⁰ პირველ საშვალება, ნამუთ მიმეხვარებნა ხე შევუნწყუათ ართობას, თანდაბლობა რე. დედამიწას ცხოვრებაშ დროს იესოქ მუშ მოწაფეეფს უწუ, თანდაბლობა გეგმურჩქინდესკო (მათ. 23:12). ამდღა ბრელს მიორჩქჷ, ნამდა  შხვეფშე უჯუშ რე. თანდაბალეფ ქიპჸუაფუთ-და, ვა გამჭირდუნა ჯიმალეფიშ ხემძღვანელობაშ მეჸუნა, მუთ ხეს შეუნწყუნს ართობას. თეს გეძინელ, თანდაბლობათ გურს ვუხარენთ იეჰოვას, მუშენდა „ღორონთი ამაყეფს ოწინააღმდეგ, მარა თანდაბალეფწკუმა ჭყოლოფას გიმირჩქინანს“ (1 პეტ. 5:5).

11. მუჭო მიმეხვარებნა გოშინაშ ონჯუაშ სიმბოლოეფიშ მნიშვნელობაშე დაფიქრება ხე შევუნწყუათ ართობას?

¹¹ ართობაშ ხეშ შენწყუალაშ მაჟია საშვალება გოშინაშ ონჯუაშ სიმბოლოეფიშ მნიშვნელობაშე დაფიქრება რე. გოშინაშ ონჯუაშახ დო განსაკუთრებულო გოშინაშ ონჯუაშ სერს, სერიოზულო დეფიქრით, მუ მნიშვნელობა უღჷ უდროჟე ქობალს დო ჭითა ღვინს (1 კორ. 11:23—25). ქობალ იესოშ სრულყოფილ სხეულიშ სიმბოლო რე, ნამუთ თიქ ჩქინ ორსხებელო შეწირ, ჭითა ღვინი — იესოშ დობუნილ ზისხირიშ. მარა ხვალე თეშ რჩქინა ვა რე დასაბაღ. გიშაჸიდირალშე იძირე თი დიდ ჸოროფა, ნამუთ იეჰოვაქ დო იესოქ გიმირჩქინეს. ღორონთიქ მუშ სქუა ჩქინ ორსხებელო მაშქვ დო იესოქ მუშ ნებათ დათმჷ სიცოცხლე ჩქინ გურშენ. თე ირფელშე ფიქრი მოხვარნა, ჩქი ხოლო გეგმიფრჩქინათ თინეფიშ ჸოროფა. იეჰოვაშ ჸოროფა ამანგარენს ჩქინ ართობას.

12. მუჭო იძირე იესოშ მოჸუნაფილ მაგალითშე, ნამდა იეჰოვა ჩქინდე ელჷ, შხვეფიშ პატიებას?

¹² ართობაშა ხეშ შენწყუალაშ მასმა საშვალება, შხვეფიშ პატიება რე. მუჟამსით ვაპატიენთ თინეფს, მიდგაქ მოწყინებაფესინ, ვოძირანთ, ნამდა ვაფასენთ ქრისტეშ გიშაჸიდირალს, ნამუშ ჭყოლოფათ შეიოლებერქ იჸუ ჩქინ ცოდეფიშ პატიებაქ. დეფიქრით მათეშ 18:23—34-ის ინოჭარილ მაგალითშე. ქოკითხით თქვან დუც: ქუმოკონო თიშ გიმორნაფა ცხოვრებას, მუდგას იესო ოგურუანდ? ქუვოცადუქო ქუგუგე დო მუთვინე თანამორწმუნეეფს? ქუვორექო მზათ ქუვაპატუე თინეფს, მით გლახათ მოქცუ? მართალ რე, მინშა შილებე პიროვნებაქ თიცალ სერიოზულო ქუდაშუას, ნამდა არასრულყოფილ კოჩის გუჭირდას პატიებაქ, მარა იესოშ მოჸუნაფილ მაგალითშე იძირე, მუს ელჷ იეჰოვა ჩქინდე (წეკითხით მათე 18:35). * მუჭოთ თე მაგალითშე ბგებულენთინ, იეჰოვა ვა მაპატიენა, მუჟამსით ჩქი ვა ვაპატიენთ და დო ჯიმალეფს, თიშ უმკუჯინუო, ნამდა თეშო საფუძვლიან მიზეზ მიღნა. დასურო, მუშმაჯგირა აზრი რე! ჩქი ხეს ვუნწყუნთ ართობას, მუჟამსით მეპჸუნთ იესოშ რჩევას დო ვაპატიენთ შხვეფს.

13. მუჭო ვუნწყუნთ ხეს ართობას, მუჟამსით ვოცადუთ ართიანწკუმა მშვიდობა ქომღუდან?

 ¹³ მუჟამსით შხვეფს ვაპატიენთინ, ვოძირანთ, ნამდა ირფელს ვორთუთ, ართიანწკუმა მშვიდობა ქომღუდან. მოციქულ პავლექ ჭარ: „გურგედვალირო იცვენდათ შურიშ ართობას მშვიდობაშ გუამაართებელ კავშირით“ (ეფეს. 4:3). ქრისტეშ გოშინაშ ონჯუა პერიოდის დო განსაკუთრებულო გოშინაშ ონჯუა დღას, დეფიქრით, მუჭო ოქცუთ შხვეფს. ქოკითხით თქვან დუც: ქუვოძირანქო, ნამდა გურშა ვენიბდვანქ წყენას? ქომჩინენანო თიცალ პიროვნებათ, ნამუთ ხეს უნწყუნს მშვიდობას დო ართობას? თენა მნიშვნელოვან კითხვეფ რე, ნამდგაშე ოკო დეფიფქრათ გოშინაშ ონჯუა პერიოდის.

14. მუჭო შეილებნა ოძირათ, ნამდა ჸოროფათ უთვინენთ ართიანს?

¹⁴ ართობაშა ხეშ შენწყუალაშ მანთხა საშვალება რე ჸოროფაშ გიმორჩქინა. თეშ მაგალით შემლებნა იეჰოვაშე გეპჭოფათ (1 იოან. 4:8). ჩქინ და დო ჯიმალეფშე დღას ოკო ვაფთქუათ თეცალ მუდგარენ: „არძაწკუმა ჯგირო ოკო ვორდე, მარა ვა რე აუცილებერ არძა მიჸორდას“. თეცალ აზროვნება შუროთ ვემურე პავლეშ სიტყვეფს: „ჸოროფათ უთვინენდათ ართიანს“ (ეფეს. 4:2). ქიდეკვირით, პავლეს ვა უთქუალ, უბრალოთ „უთვინენდათ ართიანს“, თიქ თქუ, ნამდა თენა „ჸოროფათ“ ოკო ვაკეთათ. ზუსტას თე სხვაობა რე უბრალოთ მოთვინებაშ დო „ჸოროფათ“ მოთვინებაშ შქას. კრებეფს შეფხვადუთ არძანერ კათას, ნამუთ იეჰოვაშ მოჸონაფილ რე (იოან. 6:44). ღორონთიქ თე ხალხი მუშ ორგანიზაციაშა ქიმიჸონ-და, გიშმურს მუდგარენ ჯგირ ქოძირ თინეფიშ გურს. ათეშენ, მუ უფლებათ შემლებნა ფთქუათ, ნამდა თანამორწმუნე ვა რე ჩქინ ჸოროფაშ ღირსი? ჩქი ოკო გიმიფრჩქინათ თიცალ ჸოროფა, ნამუსით იეჰოვა ითხინს ჩქინდე (1 იოან. 4:20, 21).

15. სოვრეშე მიჩქუნა, ნამდა იჸუაფ ბოლო გოშინაშ ონჯუა?

¹⁵ ქუმურს დღა, მუჟამსით ბოლო გოშინაშ ონჯუას აბღნიშნენთ. სოვრეშე მიჩქუნა თენა? კორინთელეფშა მეჭარილ პირველ წერილს პავლე ცხებულ ქრისტიანეფს უწუ, ნამდა ირ წანას გოშინაშ ონჯუაშ აღნიშნებათ აცხადენდეს „უფალიშ ღურას თიშ მულაშახ“ (1 კორ. 11:26). დიდ გასაჭირიშ გურშენ იესოქ იწინასწარმეტყველ: „თიმწკუმა ცას გორჩქინდუ კოჩიშ სქუაშ ნიშან დო დედამიწაშ არძა ტომი დარდით გურშა ლიკვიშ მეგამას ქიდიჭყანს; თინეფ ქოძირნა კოჩიშ სქუას, ნამუთ ცაშ მუნაფას ძალიერებათ დო დიდებათ მოურს. საყვირიშ დიდ ხონარიშ დროს [იესო] მუშ ანგელოზეფს მიდაშკვანს დო თინეფ აკოშაყარანა თიშ გიშაგორილეფს დედამიწაშ ოთხოლო კუნთხუშე, ცაშ კუნთხუეფშე“ (მათ. 24:29—31). თაქ მოჩამილ წინასწარმეტყველებას იესოქ თქუ, ნამდა არძა ქოძირუნდჷ „კოჩიშ სქუას, ნამუთ ... მოურს“. თე სიტყვეფ დო პავლეშ მოშინაფილ ფრაზა „თიშ მულაშახ“ ართ დო იგივე მოვლენას ოხუ. სიტყვეფ „აკოშაყარანა თიშ გიშაგორილეფს“ მეუთითენს თი პერიოდშა, მუჟამსით არძა ცხებულ ქრისტიან, მით თიმ დროს ცოცხალ იჸუაფუნ, მიღენს ზეციურ ჯილდოს. თენა დიდ გასაჭირიშ პირველ ეტაპიშ უკულ, არმაგედონიშ დოჭყაფაშახ მოხვადუ. თეშ უკულ იესო 144 000 ცხებულწკუმა ართო ბოლოს მუღენს დედამიწაშ მეფეეფს (გამოცხ. 17:12—14). ქრისტეშ გოშინაშ ონჯუა, ნამუთ ცხებულეფიშ ზეცას აკოშაყარუაშახ ჩეტარებ, იჸუაფ ბოლო გოშინაშ ონჯუა.

16. მუშენ გაფნა გინოჭყვიდილ ქიდესწრათ ქრისტეშ გოშინაშ ონჯუას?

¹⁶ მორთ, ირნერო ქივეცადათ სარგებელ მიბღათ გოშინაშ ონჯუაშ დასწრებაშე, ნამუთ 2018 წანაშ 31 მარტის ეღინიშნებ. ქოფთხუათ იეჰოვას ქიმმეხვარან, ხე ქეშუნწყუათ მუშ ხალხიშ ართობას (წეკითხით ფსალმუნი 133:1). * ვაგგოჭყორდან, ნამდა მოურს დღა, მუჟამსით აბღნიშნენთ ბოლო გოშინაშ ონჯუას. ეშობას მორთ, ქუვოძირათ, ნამდა ვაფასენთ ართობას, ნამუთ თე ღონისძიებაშ დროს მიღნა.