1. მუ პრობლემეფ მიღნა, მარა მუს ოპირ ღორონთ მუშ ართგურ მსახურეფს? (ქოძირით სურათი თე გვერდის).

ამდღა ცხოვრება პრობლემეფით რე ეფშა. ბრელ ჩქინ ძვირფას და დო ჯიმას სერიოზულ ლახალა აწუხენს. ნამთინე თვითონ რე ხანშამიშულირ, მარა შხვა ხანშამიშულირ ნათესეფშა აფუ მიკალუაფარი. შხვეფ თიშო ხანდენა, ნამდა ფუფუნებას ცხოვრება ვარინ, ლუკმა ქიშუან ოჯახიშ ეიოჯუმალარო. ბრელს შხვადოშხვა პრობლემა ართო უსოფუანს. თე ირფელ ქიანაშ დროს დო ენერგიას ითხინს, ფინანსეფშე მუთუნ ვა ფთქუათინ. თეშ უმკუჯინუო, ბჯერა ღორონთიშ დუნაპირებუშ დო უჯგუშ ცხოვრებას ველუთ. იეჰოვას მანგარო ახარენს თეშ ძირაფა!

2. მუჭო ემქექუანა გურშა ესაიაშ 40:29, მარა მუ სერიოზულ შეცდომა შილებე დუშვათ?

² დღას ქოიგინაფნანო დუდ თეშ, ნამდა მეტიშ გინოღალა ვეშეილებნა? თაშ ქორენ-და, ხვალე თქვა ვა რეთ თეცალ მდგომარეობას. ჯვეშო ღორონთიშ ართგურ მსახურეფ ხოლო თაშ გინაფლენდეს დუც (1 მეფ. 19:4; იობ. 7:7). მარა თინეფ დუც ვა დვანდეს, იეჰოვას თხულენდეს მოხვარას დო გურს ვეტახუნდეს, მუშენდა ღორონთ არზენდ ძალას (ეს. 40:29). სანარღოთ, პრობლემეფს დუდ ეუჩილითუანინ, იეჰოვაშ ნამთინე მსახურქ გეგნოჭყვიდ, ჭიჭე ხანით მიოტუას სულიერ საქმეეფიშ კეთება. თინეფს ღორონთიშ მსახურება  კურთხევათ ვარინ, მონკა ოღალო მიორჩქუნა. ათეშენ მიოტუეს ბიბლიაშ კითხირ, კრებაშა გილულა დო ქადაქება. სატანას ხოლო ზუსტას თენა ოკო.

3. ა) მუ ოკო ფქიმნათ, ნამდა სატანაქ მუშ მიზანს ვემიოჭირნუას? ბ) მუს გუვარჩიენთ თე სტატიას?

³ სატანას ჯგირო უჩქჷ, ნამდა სულიერ საქმეეფს სრულაშე მონაწილება ძალეფს ქომჩანა, მუთ თის შუროთ ვანწყუნს. ათეშენ, მუჟამსით ფიზიკურო დო ემოციურო ძალა გიშალიებურ რეთინ, ვემიოტუათ იეჰოვა, გავითარით თიწკუმა უმოს ხოლოშიან ურთიერთობა დო თინა გუგამანგარენა (1 პეტ. 5:10; იაკ. 4:8). თე სტატიას გუვარჩიენთ ჟირ სიტუაციას, ნამუქით შილებე მეცილან იეჰოვაშ მსახურებას; თეს გეძინელ ქობძირუნთ, მუჭო მიმეხვარებნა ბიბლიურ პრინციპეფიშ გიმორნაფა. მორთ, დიო გუვარჩუათ ესაიაშ 40:26—31-ის ინოჭარილ სიტყვეფ, სოვრეშეთ იძირე, ნამდა იეჰოვას შეულებ ჩქინ გამანგარება.

4. მუს ბგურაფლენთ ესაიაშ 40:26-შე?

⁴ წეკითხით ესაია 40:26. * მითინს ვეშულებ მურიცხეფიშ კოროცხუა. მეცნიერეფ ფიქრენა, ნამდა ხვალე ჩქინ გალაქტიკას 400 მილიარდშე უმოს მურიცხ რე. მარა იეჰოვას არძაშა სახელ აფუ გედვალირი. მუს ბგურაფლენთ თავრეშე? ღორონთ მუშ შურუდგუმ გუნაჭყეფუეფს ყურადღებას ქაქციენს-და, წერმედგინით, მუსხით უმოსო დეინტერესებ თქვანით, მით თის ჸოროფათ ომსახურუთ დო ვართ ხოლო თიშენ, ნამდა თაშ რეთ დაპროგრამებული (ფსალმ. 19:1, 3, 14). ჩქინ საჸოროფო ზეციერ მუმა ჯგირო მიჩინენა. ბიბლია იჩიებ: „თქვან დუც თუმაშ არძა ღერ ხოლო თვალირ რე“ (მათ. 10:30). ფსალმუნმაბირე მარწმუნენა: „იეჰოვა ოკვირ სუფთა გურიშ კათას“ (ფსალმ. 37:18). მუშო ოკო რაგად, თინა ორწყე, მუ განსაცდელეფიშ წოხლე გერეთ დო ძალას ხოლო ქიმერჩანა თინეფიშ გარზებელო.

5. მუ მარწმუნენა, ნამდა იეჰოვას შეულებ ჩქინ გამანგარება?

⁵ წეკითხით ესაია 40:28. * იეჰოვა დიდ ძალაშ მენდულ რე. დეფიქრით, მუსხი ენერგიას არზენს ღორონთ ჩხანას. შხვადოშხვა მეცნიერულ წიგნიშ ავტორ დეივიდ ბოდანისი, იჩიებ: „ენერგია, ნამუსით ჩხანა ირ წამს გიშმართუნსინ, უდრენს [მილიარდობით ატომურ] ბომბიშ აფეთქებას“. შხვა მკვლევარ იჩიებ, ნამდა ჩხანა ართ წამშა თისხი ენერგიას გიშმართუნს, ნამუთ მთელ კაცობრიობას 200 000 წანას უბაღჷ! ღორონთის ჩხანაშა თესხი ენერგია ქიმიაჩენ-და, თქვანდა ვემიაჩენო ძალეფ პრობლემეფიშ გარზებელო?

6. მუშენ რე იესოშ ოღალ „ქექე“ დო მუჭო მოხვარნა თეშ რჩქინა?

⁶ წეკითხით ესაია 40:29. * იეჰოვაშ მსახურებას დიდ ხიოლ მოუღჷ. იესოქ მუშ მოწაფეეფს უწუ: „ქიგიდგით ჩქიმ უღუ“, მარა უკულ გეუძინ: „დო გეგშეცოცხალებ თქვან შური. ჩქიმ უღუ ეფ გილაღალარ რე დო ჩქიმ ოღალ ქექე რე“ (მათ. 11:28—30). თენა მართალო თაშ რე! მინშა, მუჟამსით კრებაშა ვარდა მსახურებაშა მეურთინ, შილებე ძალა გიშალიებურეფ ვორდათ. მარა თევრეშე დორთელს, ბრელით უჯგუშო ბგინაფლენთ დუც დო უმოსო ვორეთ მომზადებულ, გივორჯგინათ პრობლემეფს. თეგვარო, იესოშ ოღალ დასურო „ქექე რე“.

7. მუჭო იძირე ართ დაშ მაგალითშე, ნამდა მათეშ 11:28—30-ის ინოჭარილ სიტყვეფ ჭეშმარიტება რე?

⁷ ართ დას ქრონიკულ შულადა, დეპრესია  დო შაკიკი აწუხენდჷ. ათეშენ მინშა უჭირდჷ კრებაშ შეხვალამეფშა გილულა. თე და იშინანს, მუჭო იგინ დუდ ართშა, მუჟამსით ლახალაშ უმკუჯინუო, იშენით მიდართ კრებაშა. თინა იჩიებ: „საჯარო მოხსენებას გურიშგოტახუაშ გურშენ მიშ ჩიება. თე მოხსენებაქ მანგარო იმოქმედ ჩქიმწკუმა დო ქუმანგარინ. თე თემაშე ქობძირ, ნამდა კრება რე თი ადგილ სოდეთ ოკო ვორდე“. თინა ბედნერ რდუ, ნამდა პრობლემეფიშ უმკუჯინუო იშენით მიდართ კრებაშა.

8, 9. მუს ნიშნენს პავლეშ სიტყვეფი: „უჭყანობაშ დროს ვორექ ძალიერი“?

⁸ წეკითხით ესაია 40:30. * შილებე ბრელ მუთუნიშ კეთებაშ უნარ მიღდან, მარა დღას ოკო ვაგმოჭყორდან, ნამდა ხვალე ჩქინ ძალეფით ირფელ ვამაკეთნენა. მაგალთო, მოციქულ პავლე უნარიან კოჩ რდუ, მარა მუდგა ოკოდუნ, ირფელ ვაკეთებედ. მუჟამსით ღორონც ლოცვას ქუწუ, დუც მუჭო გინაფლენდუნ, იეჰოვაქ თის უპასუხ: „უჭყანობაშ დროს გინმირთუ სრულყოფილო ჩქიმ ძალა“. პავლექ ქენანჭ თე სიტყვეფს დო ბოლოს თეცალ აზრი თქუ: „უჭყანობაშ დროს ვორექ ძალიერი“ (2 კორ. 12:7—10). მუს ნიშნენს თე სიტყვეფი?

⁹ პავლეს არჩქილედ, ნამდა ღორონთიშ მოხვარაშ უმშო ბრელ მუთუნ ვაკეთებედ. ღორონთიშ წმინდა შურს შეულებუდ მოციქულშა ძალეფიშ მეჩამა. თეს გეძინელ, წმინდა შურიშ ჭყოლოფათ თის შეიალებედ თიცალ მუდგარენეფიშ კეთება, მუთ მუშ ძალეფით დღას ვაკეთებედ. ჩქინ შემთხვევას ხოლო თაშ რე. იეჰოვაშ წმინდა შურს შეულებ ჩქინ გამანგარება!

10. მუჭო მეხვარ იეჰოვაქ დავითის პრობლემაშ გარზებას?

¹⁰ ფსალმუნმაბირე დავითის ბრელშა გიმუცადებ წმინდა შურიშ მოხვარა. თინა იბირდჷ: „სქან მოხვარათ ვენტებუქ ნტერეფს, ჩქიმ ღორონთიშ მოხვარათ ქალაქიშ დიდ კიდალეფს ხოლო გინიბლენქ“ (ფსალმ. 18:29). მინშა თიცალ პრობლემეფს შეფხვადუთ, ნამუთ „ქალაქიშ დიდ კიდალეფს“ მოგენს. თეშ გარზება იეჰოვაშ მოხვარაშ უმშო ჩქინ ძალეფით ვეშმალებენა.

11. მუჭო მოხვარნა წმინდა შური პრობლემეფიშ დროს?

¹¹ წეკითხით ესაია 40:31. * არწივი შორ ადგილეფშა ხვალე მუშ ძალათ ვეგლაფურინუნს. თის ტიბ ჰაერი ოხვარ, ბრელ ენერგია ვა დახარჯასინ თეშ გილაფურინას. მუჟამსით ფიქრენთ, ნამდა პრობლემეფშა ვამგარიებენან, ქიგიშინით არწივიშ მაგალითი. ქოთხით იეჰოვას გუგამანგარან მუშ წმინდა შურით (იოან. 14:26). საბედნეროთ, წმინდა შურიშ თხუალა ირიათო შემლებნა. არძაშ უმოსო ღორონთიშ მოხვარა თიმ დროს მოსაჭირნა, მუჟამსით თანაქრისტიანწკუმა რჩქინდუ პრობლემა. მარა მუშენ შილებე თექ მოხვადას?

12, 13. ა) მუშენ რჩქინდუ ქრისტიანეფ შქას პრობლემეფი? ბ) მუს ბგურაფლენთ იოსებიშ მაგალითშე იეჰოვაშ გურშენ?

¹² ნამთინ ვა ვორეთ სრულყოფილ, ათეშენ მინშა ართიანწკუმა პრობლემეფ მიღნა. შილებე ჩქინ და დო ჯიმალეფიშ სიტყვეფიშ ვარდა საქციელიშ გურშენ გურქ მომირთან ვარდა ჩქი ვოწყინებაფუათ შხვეფს. თექ შილებე ჩქინო სერიოზულ გამოცდაქ იჸუას. თე დო შხვა გამოცდეფით იეჰოვა მარზენა საშვალებას ქიდიბგურუათ და დო ჯიმალეფწკუმა თანამშრომლობა დო თეგვარო დუმტკიცათ თის ართგურობა. ირიათო ოკო ფშუდან, ნამდა არასრულყოფილებაშ უმკუჯინუო, ღორონც იშენით უჸორს მუშ მეძღვინელ მსახურეფი.

¹³ იოსებიშ მაგალითშე იძირე, ნამდა იეჰოვა უშვენს, გეგმიცადან მუშ მსახურეფქ. ახალგაზრდა იოსები მუშ მენჯარიშე ჯიმაჸონერეფქ მონათ გეგმოჩეს დო  თიქ ეგვიპტეს ქუმოხვად (დაბ. 37:28). იეჰოვა ორწყედ თე ირფელს დო მუშო ოკო რაგად, თიშო არძა ართ ვა რდუ, მუჭო მექცუეს მუშ მეგობარ იოსების. მარა ღორონთი ვაჩარიებე თე საქმეს. უმოს გვიანო, იოსების ქეკაწამეს, ითამ თიქ ფოტიფარიშ ოსურიშ გაუპატიურება მინდომ დო ციხეს ქუდახუნეს, მარა იეჰოვა თე დროს ხოლო ვაჩარიებე. ხომ ვა ნიშნენდ თენა თის, ნამდა ღორონთიქ მიოტუ იოსები? მუშო ოკო რაგად, ვარ. ბიბლიას პკითხულენთ: „იეჰოვა ოხვარუდ [იოსების]“ (დაბ. 39:21—23).

14. მუ სულიერ დო ფიზიკურ სარგებელ მოუღჷ რისხუაშა დუდიშ ეჩილითაფას?

¹⁴ ქობძირათ ხოლო ართ მაგალითი. შილებე ბრელს ვა მოქციებნა თიცალ გლახათ, მუჭოთ დავითის. თეშ უმკუჯინუო, თის გურშა ჟღამი ვენუტებ. თიქ ჭარ: „მიოტე რისხუა დო გურიშ მულა; ვეგერისხა დო ვაკეთა უბადობა“ (ფსალმ. 37:8). მნიშვნელოვან მიზეზი, მუშ გურშენით ოკო ვეგებრისხათინ, თინა რე, ნამდა მოკონა იეჰოვაშ მაგალითის მივაჸუნათ. ბიბლიას ღორონთშე ჭარ: „ჩქინ ცოდეფიშ გურშენ, მუჭოთ მოკუთნუდესინ თეშ ვემმექცის“ (ფსალმ. 103:10). თეს გეძინელ, რისხუაშა დუდიშ ეჩილითაფას შხვა სარგებელ ხოლო მოუღჷ. გარისხებას შილებე ჯამრთელობაშ თიცალ პრობლემეფქ ქუმაჸუნას, მუნერით რე მაღალ წნევა დო რესპირატორულ პრობლემეფი. შილებე ჩხონჩხიშ, კუჭიშ თუდოიან ჯირკვალიშ დო კუჭიშ პრობლემეფქ ხოლო გომრჩქინდან. მუჟამსით გარისხებულ ვორეთინ, სწორაშე ფიქრ ხოლო მიჭირა. მინშა შილებე დეპრესიაშე ხოლო დიდ ხანს ვეგშმართინან. თეშ გინაწონს ბიბლიას ჭარ: „მშვიდ გური სიცოცხლე რე სხეულშო“ (იგავ. 14:30). მუ ოკო ვაკეთათ, ნამდა მიღდან თანაქრისტიანეფწკუმა ჯგირ ურთიერთობა დო მივერუათ გურიშ მულას? ჩქი შემლებნა წარმატებას მივოჭირინუათ ბიბლიურ რჩევეფიშ მეჸუნათ.

15, 16. მუჭო ოკო მიფქცუათ, მუჟამსით მოწყინებაფუანა?

¹⁵ წეკითხით ეფესოელები 4:26. * ჩქი ვამკვენა, ქვეყნიურ კათაქ გლახათ ქიმმექცის-და, მარა მანგარო ალმაჭუნა გური, მუჟამსით თანაქრისტიანეფ ვარდა ოჯახიშ წევრეფ მოწყინებაფუანა. დავუშვათ ადვილო ვეშეილებნა მოხვალამირ ამბეშ გოჭყოლიდაფა. გეგმირინუანდითო ბიბლიურ რჩევეფს, ნამდა ხეთეშე მაგვარათ პრობლემა, დო ვარ ბრელხანს იჸუაფუდით გურმოულირი? მუთ უმოსო გინობდვანთ პიროვნებაწკუმა თე საკითხშე ჩიებასინ, თით უმოს ძნელ იჸუაფ პრობლემაშ მოგვარება.

¹⁶ დავუშვათ მოწყინებაფუეს ქრისტიანქ დო მუთუნნერო ვეშმალებეს თეშ გოჭყოლიდაფაქ. მუშ კეთება შემლებნა, ნამდა კინ ჯგირ ურთიერთობა მიღდან თიწკუმა? პირველ  რიგის, იეჰოვას შურდოგურით ქოთხით მოხვარა, ნამდა თე პიროვნებას მშვიდას ქუდურაგადუათ. ვაგგოჭყორდან, ნამდა თინა ხოლო ღორონთიშ ართ-ართ მეგობარ რე (ფსალმ. 25:14). იეჰოვას უჸორს თინა. ღორონთი მუშ მეგობრეფს ჯგირო ოქცუ დო თქვანდე ხოლო თეს ელუ (იგავ. 15:23; მათ. 7:12; კოლ. 4:6). დეფიქრით, მუს უწინთ თის. ვეფიქრათ, ნამდა თანაქრისტიანქ გარძახ აკეთ თენა. შილებე თენა შეცდომა ვარდა გაუგებრობა რდუკო. თიშ რაგადშო ხოლო მზათ რდათ, ნამდა თქვა ხოლო მიშაიძნა თეშა ბრალი. შეილებნა ჩიება თეცალ სიტყვეფით ქიდიჭყათ: „შილებე ნაბეტანო მიბღჷ თენა გურშა, მარა გოღა დოირაგადენ, იბგინ, ნამდა . . .“. თე ჩიებას ჯგირ შედეგიქ ვამაყუნ-და, შხვა დროს ქეცადით დორაგადაფას. ვემიოტუათ ლოცვა თანაქრისტიანშე დო ქოთხით იეჰოვას, აკურთხას თინა. თეს გეძინელ, ქოთხით იეჰოვას, ქიმგეხვარან, ქოძირათ თიშ ჯგირ თვისებეფი. მუჭოდგა ვეჸუასინ, შეილებნა რჯერდან, ნამდა იეჰოვას მოწონს თქვან მონდომა, გერიგათ თანაქრისტიანს, ნამუთ ღორონთიშ მეგობარ რე.

17. მუჭო მოხვარნა იეჰოვა, მუჟამსით სერიოზულო ვაშენთ დო მუშენ ოკო ვა ფთქუათ ვარია თეცალ მოხვარაშე?

¹⁷ ნამთინე დუც ღირსო ვა თვალუნს, ემსახურას იეჰოვას, მუშენდა ადრე სერიოზულო დაშუ. დუც დამნაშავეთ ქოგინაფლენთ-და, თექ შილებე ხიოლ მიდაიღან. მეფე დავითი, ნამუთ თეცალ მდგომარეობას რდუნ, იჩიებ: „მუჟამსით ხონარ ვეკომღუდუნ, ძვალეფქ ჭუათ დუმაშირ, მუშ გურშენით მთელ დღას ბწვალენდჷ. დღაშ დო სერით მამონკენდ სქან ხე“. საბედნეროთ, დავითიქ თეშ მიქცუ, მუჭოთ სულიერ პიროვნება მიქციებუდ. თიქ ჭარ: „ბოლოს ვაღიარ ცოდა სქან წოხოლე . . . სი ხოლო ქუმაპატი ჩქიმ ცოდეფ დო დაშებული“ (ფსალმ. 32:3—5). თქვა ხოლო სერიოზულო ქუგაფნა დაშებულ-და, იეჰოვა მზათ რე ქიმგეხვარან მუწკუმა ჯგირ ურთიერთობაშ დორთინაფას. მარა ვარია ვა თქუათ ოკო თი მოხვარაშე, ნამუთ კრებაშ საშვალებათ მუგაჩამნა (იგავ. 24:16; იაკ. 5:13—15). დრო ვეღათ — თქვან მარადიულ მომავალ სასწორს გეძჷ! დავუშვათ, ბრელ ხანიშ წოხოლე დაშეთ სერიოზულო დო იეჰოვაქ ხოლო ქუგაპატის, მარა სინდისი იშენით ვა გოსვანჯუანა. მუ ოკო აკეთათ თეცალ დროს?

18. მუჭო ოხვარ პავლეშ მაგალით თინეფს, მიდგას სინდის აწუხენს ჯვეშო ნაკეთებ გლახა საქმეეფიშ გურშენ?

¹⁸ რდუ დრო, მუჟამსით პავლე მოციქულს ხოლო მანგარო აწუხენდ სინდის ადრე ნაკეთებ გლახა საქმეეფიშ გურშენ. თინა იჩიებ: „მოციქულეფ შქას არძაშ უმოს ნაკლებ ვორექ დო ღირს ხოლო ვა ვორექ, მოციქულ დომძახან, მუშენდა ღორონთიშ კრებას ფთხოზუდი“. თეშ უმკუჯინუო, პავლე აგრძელენს: „მარა ღორონთიშ ჭყოლოფათ ვორექ, მუთ ვორექ“ (1 კორ. 15:9, 10). არასრულყოფილებაშ უმკუჯინუო, იეჰოვას ვარია ვა უთქუალ პავლეშე დო ოკოდ მოციქულ ხოლო დარწმუნკო თეს. შურდოგურით ქონარღენთ დო ქაღიარენთ ადრე ნაკეთებ გლახა საქმეეფს-და, შეილებნა თქვა ხოლო დარწმუნებულ რდათ, ნამდა იეჰოვა ჭყოლოფას გეგმირჩქინანს. რჯერდან, იეჰოვა გაპატიენა, ათეშენ ვარია ვა თქუათ თიშ ჭყოლოფაშე (ეს. 55:6, 7).

19. ნამ რე 2018 წანაშ მუხლი დო მუშენ რე თინა ჩქინო დროული?

¹⁹ მუთ უმოს ხოლოს ვორეთ თე ქიანაშ მოსპუალაწკუმა, თით უმოს მეტ პრობლემეფ მაშინა. მარა შემლებნა ბჯერდან, ნამდა ღორონთი, ნამუთ „ძალას არზენს შულადირს დო ღონეთ ეთმიოფშანს ძალა ეშალიებურს“, ქიმერჩანა ირფელს, მუთ საჭირო რე თიშო, ნამდა ართგურო ემსახურათ თის (ეს. 40:29; ფსალმ. 55:22; 68:19). 2018 წანას, სამეფო დარბაზშა ირ მინულას, მუჟამსით ქობძირუნთ წანაშ მუხლის, ქიგიფშინანთ მნიშვნელოვან ჭეშმარიტებას: „იეჰოვაშა მენდებულეფ ძალას დირთინუანა“ (ეს. 40:31).