ოგურაფალ სტატია 2
განადიდით იეჰოვა კრებას
„განგადიდენქ კრებას“ (ფსალმ. 22:22).
ობირეში 59 ვადიდათ იაჰ!
შინაარსი *
1. მუს ფიქრენდჷ დავით იეჰოვაშე დო მუშ კეთებაშო რდუ აღძრულ?
მეფე დავითიქ ჭარჷ: „იეჰოვა დიდებულ რე დო დიდებაშ ღირს რე“ (ფსალმ. 145:3). თის უჸორდჷ იეჰოვა დო თენა აღძრენდჷ, განადიდკო თინა კრებას (ფსალმ. 22:22; 40:5). მუშო ოკო რაგად, თქვა ხოლო გიჸორა იეჰოვა დო ოთანხმუთ დავითიშ სიტყვეფს, ნამუქით თქუ: „კურთხეულ რდა, იეჰოვა, ისრაელიშ ღორონთ, ჩქინ მუმა, მარადიულო!“ (1 მატ. 29:10—13).
2. ა) მუჭო შემლებნა განვადიდათ იეჰოვა? ბ) მუ სირთულეეფს შეხვადუ ნამთინე დო მუს გუვარჩიენთ თე სტატიას?
2 ამდღა ღორონთიშ განდიდებაშ ართ-ართ საშვალება კრებაშ შეხვალამეფს კომენტარიშ კეთება რე. მარა ნამთინეშო თეშ კეთება ადვილ ვა რე. თინეფს ოკონა აკეთან კომენტარეფ, მარა შიშ უღნა. მუჭო შემლებნა გივორჯგინათ შიშის? მუ პრაქტიკულ მხარეეფ მიმეხვარებნა, გუვაკეთათ გურიშ ემაკინალ კომენტარეფ? სოიშახ თე კითხვეფს ვუპასუხენდათ, მორთ, გუვარჩუათ ოთხ მნიშვნელოვან მიზეზ, მუშენ ვორთუთ კომენტარეფს.
მუშენ ვორთუთ კომენტარეფს
3—5. ა) მუჭოთ ებრაელეფიშ 13:15-ის რე მოჩამილ, მუშენ ოკო ვაკეთათ კომენტარეფ კრებას? ბ) არძაქ ართნერო ოკო ვაკეთათო კომენტარეფ? გენწყით.
3 იეჰოვაქ არძას მუჩეს თიშ პატი, განვადიდათ თინა (ფსალმ. 119:108). კრებაშ შეხვალამეფს ჩქინ კომენტარეფით იეჰოვას განვადიდენთ დო მითინს ვეშიალებე თენა ჩქინ მანგიორო გაკეთას (წეკითხით ებრაელები 13:15). არძას ართნერო ფთხინანო თინა თეშ კეთებას? მუშო ოკო რაგად ვარ!
4 ღორონც უჩქჷ, ნამდა არძას განსხვავებულ უნარ დო მდგომარეობა მიღნა. ათეშენ თინა აფასენს თი მსხვერპლის, ნამუსით შურ დო გურით ვორთუთ. დეფიქრით მუნერ მსხვერპლის ღებულენდჷ იეჰოვა ისრაელეფშე. ნამთინე ისრაელს შეულებუდ კირიბ ვარდა თხა შეწირკო. მარა ღარიბეფს შეულებდეს „ჟირ გვრიტი ვარდა ჟირ ტორონჯ“ შეწირესკო. მიდგას თეშ შესაძლებლობა ხოლო ვა უღუდ, შეულებუდ „ართ ეფა ჭიფას ქილჷ ქვირ“ შეწირკო (ლევ. 5:7, 11). ქვირ არძაშ უმოს ეფიან შესაწირ რდუ, მარა იეჰოვა აფასენდჷ თეცალ შესაწირს.
5 ჩქინ მოჸოროფე ღორონთ ვა თირე. იეჰოვა ვეთხინს, ნამდა კომენტარეფიშ დროს არძა აპოლოსცალ მჭერმეტყველ ვარდა პავლეცალ დამაჯერებელ ვორდათ (საქ. 18:24; 26:28). თის ოკო, ირნერო ვეცადათ ჯგირ კომენტარიშ კეთებას. ქიგიშინით ქომონჯ ნაღურა ოსურ, ნამუქით ჟირ ლეპტა შეწირ. თიშ შესაწირ ძვირფას რდუ იეჰოვაშო, მუშენდა მუთ ქუღუდუნ თიშე, არძაშ უჯგუშ შეწირ (ლუკ. 21:1—4).
კომენტარეფიშ კეთებას ჯგირობუა მოუღ მუჭოთ ჩქინო, თეშ შხვეფშო ხოლო (ქოძირით აბზაცეფი 6, 7) *
6. ა) ებრაელეფიშ 10:24, 25-იშ თანახმათ, მუჭო შილებე იმოქმედას ჩქინწკუმა შხვეფიშ კომენტარეფქ? ბ) მუჭო შეილებნა ოძირათ, ნამდა აფასენთ შხვეფიშ კომენტარეფს?
6 კომენტარეფით ართიანს გურშა ელვუკინანთ (წეკითხით ებრაელები 10:24, 25). არძას მოსიამოვნნა კრებას შხვადოშხვანერ კომენტარეფიშ მორჩქილაფა. მაგალთო, მოხიოლნა ჭიჭე ბაღანეფიშ უბრალო დო შურ დო გურით კეთებულ კომენტარეფ. თეს გეძინელ, ჩქინ გურს მანგარო ოხუ, მუჟამსით იფრჩქილუაფუთ თინეფიშ კომენტარეფს, მიდგას ბიბლიურ ჭეშმარიტება ახალ გაგებულ აფჷ. მოხიოლნა თინეფიშ კომენტარეფ ხოლო, მით მორდებუან რენა ვარდა ახალ დუნაჭყეფ აფნა ნინაშ გურაფა, მარა გაბედულებას გიმირჩქინანა დო ორთნა კომენტარეფს (1 თეს. 2:2). მუჭო შემლებნა ვოძირათ, ნამდა ვაფასენთ თინეფიშ მონდომას? კრებაშ თებაშ უკულ შემლებნა მადლობა ვუწუათ გურიშ ემაკინალ კომენტარიშ გურშენ. თეს გეძინელ, შემლებნა ჩქინ კომენტარეფით ხოლო ელვუკინათ თინეფს გურშა. თეგვარო, მუჭოთ ჩქი, თეშ არძა მიღენს გურიშ ელაკინას კრებაშ შეხვალამეფს (რომ. 1:11, 12).
7. მუ ჯგირობუას მომღანა კომენტარეფიშ კეთება?
7 კომენტარეფიშ კეთებას ჯგირობუა მოუღ ჩქინო (ეს. 48:17). მუჭო რე თენა შეიოლებერ? პირველ, მუჟამსით მიზანო მაღვენუნა კომენტარეფიშ კეთება, თე დროს ჯგირო მივემზადებუთ კრებაშო. ჯგირო მომზადება მიმეხვარებნა უჯგუშო ქიგებგათ ღორონთიშ სიტყვა დო ნაგურეფ ცხოვრებას გეგმიბრინუათ. მაჟია, უმოს ხიოლ მაღვენუნა კრებას, მუშენდა კომენტარეფს მიბღენთ მონაწილებას. მასმა, კომენტარეფიშ კეთებაშო მონდომა რე საჭირო, ათეშენ ბრელ ხანს ვაგმოჭყორდუნა თი აზრეფ, ნამუთ ფთქვით კომენტარიშ დროს.
8, 9. ა) მუჭოთ მალაქიაშ 3:16-ის რე ეჭარილ, მუს გინაფლენს იეჰოვა, მუჟამსით კომენტარეფს ვორთუთ? ბ) მუქ შილებე იჸუას ნამთინეშო რთულქ?
8 იეჰოვას ოსიამოვნ, მუჟამსით რწმენას გიმოფხანტუნთ. შემლებნა დარწმუნებულ ვორდათ, თინა მირჩქილენა დო მანგარო აფასენს ჩქინ მონდომას, ნამდა გუვაკეთათ კომენტარ (წეკითხით მალაქია 3:16). იეჰოვა იწონუანს ჩქინ მონდომას, მუთ თევრეშე იძირე, ნამდა კურთხევას ვა მარკენა (მალ. 3:10).
9 არგამა რე, ნამდა მიღნა საფუძვლიან მიზეზეფ, გუვაკეთათ კომენტარეფ. მარა შილებე ნამთინეს ხეშ ეჭოფუაშა ოშკურდას. თქვა ხოლო თაშ ქორეთ-და, ვა გაშკურნან. მორთ, გუვარჩუათ მუსხირენ ბიბლიურ პრინციპ, მაგალით დო პრაქტიკულ მხარე, ნამუთ მიმეხვარებნა გუვაკეთათ უმოს მეტ კომენტარ.
გივორჯგინათ შიშის
10. ა) მუშა ოშკურ ბრელს? ბ) მუშენ შილებე კომენტარიშ კეთებაშ შიშ ჯგირიშ მაძირაფალ რდას?
10 ხომ ვა გოშკურნა კრებას ხეშ ეჭოფუაშა? თაშ ქორენ-და, გიჩქუდან ხვალე თქვა ვა რეთ თაშ. სინამდვილეს ბრელს ოშკურ კომენტარიშ კეთებაშა. ჩქი ოკო გივორჯგინათ შიშის, მარა თეშო აუცილებერ რე, ქიგებგათ მუ რე თეშ მიზეზ. ხომ ვა გოშკურნა, ნამდა ხეშ ეჭოფუაშ უკულ გუგოჭყორდუნა ორაგადე ვარდა მუდგარენს არასწორო ქოთქუანთ? თიშ შიში ხომ ვაიღნა, ნამდა შხვეფცალო ჯგირო ვა გაკეთებენა კომენტარ? ზოგადო თეცალ შიშ გლახა ვა რე. თენა ოძირანს, ნამდა თანდაბალ რეთ დო შხვეფ თქვანდე უჯგუშო მიგორჩქნა. იეჰოვას უჸორს თე თვისება (ფსალმ. 138:6; ფილ. 2:3). მარა ღორონც ოკო, განვადიდათ თინა დო და დო ჯიმალეფს გურშა ელვუკინათ კომენტარეფიშ კეთებათ (1 თეს. 5:11). თის ვუჸორთ დო ქომჩანა გაბედულებას, ნამუთ მოსაჭირნა.
11. ნამ ბიბლიურ აზრეფ მიმეხვარებნა კომენტარიშ კეთებას?
11 მორთ, ქიგიფშინათ მუსხირენ ბიბლიურ აზრი. ბიბლია იჩიებ, ნამდა ჩიებაშ დროს არძას მუმალენა შეცდომეფ (იაკ. 3:2). იეჰოვა ვეთხინს ჩქინდე სრულყოფილებას დო ვართ ჩქინ და დო ჯიმალეფ ელნა თეს ჩქინდე (ფსალმ. 103:12—14). თინეფ ჩქინ სულიერ ოჯახიშ წევრეფ რენა დო მანგარო ვუჸორთ (მარ. 10:29, 30; იოან. 13:35). თეს გეძინელ, არჩქილენა, ნამდა მინშა შილებე ჯგირო ვა მარაგადუან კომენტარქ.
12, 13. მუს ბგურაფლენთ ნეემია დო იონაშ მაგალითეფშე?
12 დეფიქრით მუსხირენ ბიბლიურ მაგალითშე, ნამუთ მიგეხვარებნა, გიორჯგინათ შიშის. მაგალთო, ქიგიშინით ნეემია, ნამუთ სპარსეთიშ სამეფო კარს მსახურენდჷ. ართშა თინა მოწყინაფილ რდუ, მუშენდა ქიგეგ, ნამდა იერუსალიმიშ გალავან დო კარმინოლეფ აკორღვაფილ რდუ (ნეემ. 1:1—4). წერმიდგინით, მუჭო აშკურნედ თის, მუჟამსით მეფექ უხასიათობაშ მიზეზ ქოკითხჷ. ნეემიაქ ხეთეშე ქილოც დო უკულ ქუპასუხ. შედეგო მეფექ ღორონთიშ ხალხის ქიმეხვარ (ნეემ. 2:1—8). დეფიქრით იონაშე. მუჟამსით იეჰოვაქ თხუ, ნინეველეფშა განაჩენ გუცხადებუდკონ, თის აშკურინ დო შხვადო ინტჷ (იონ. 1:1—3). მარა, საბოლათ იეჰოვაშ მოხვარათ იონაქ მიდართჷ დო ქუქადაგ ნინეველეფს; შედეგო, თინეფქ ქიმირჩქილუეს ღორონთიშ სიტყვა (იონ. 3:5—10). ნეემიაშ მაგალითშე ბგურაფლენთ, ნამდა პასუხიშ მეჩამაშახ ლოცვა აუცილებერ რე; იონაშ მაგალითშე ბგურაფლენთ, ნამდა მუდგა შიშ ვამღუდანინ, იეჰოვას შეულებ მიმეხვარან, ვემსახურათ თის. ნინეველეფშა ქადაგებაშ უმოს ოშკურანჯ რენო კრებაშ შეხვალამას კომენტარეფიშ კეთება?
13 მუ პრაქტიკულ მხარეეფ მიმეხვარებნა, გუვაკეთათ გურიშ ემაკინალ კომენტარეფ? მორთ, გუვარჩუათ მუსხირენ მხარე.
14. მუშენ ოკო მივემზადათ ჯგირო კრებაშო დო მუჟამ შილებე თეშ კეთება?
14 მემზადით ირ შეხვალამაშო. წინასწარ დაგეგმება დო მომზადება მიმეხვარებნა კომენტარეფიშ კეთებაშ დროს ჩქინ დუც უმოსო ვორდათ დარწმუნებულ (იგავ. 21:5). მუშო ოკო რაგად, არძას ართნერ გრაფიკ ვა უღჷ. 80 წანას მენჭაფილ და ელოიზი „გინაჯინალ კოშკიშ“ ოგურაფალ სტატიას მარაშ დაჭყაფუს ამზადენს. თინა იჩიებ: „კრებას უმოს ხიოლ მიღჷ, მუჟამსით წინასწარ ვორექ მომზადებულ“. ჯოი, ნამუთ სრულ განაკვეთის მუშენს, საბატონ დღას გიშეჸოთანს დროს, ნამდა მამზადას „გინაჯინალ კოშკი“. ჯოი იჩიებ: „კრებაშო წოხლენ დღას მომზადება მოხვარ, ვაგმოჭყორდას ნაგურეფუქ“. ართ უხუცეს, ნამუთ მანგარ დაკავებულ რე დო პიონერო ხოლო მსახურენს, იჩიებ: „ჩქიმო უმოს მოხუჯურქ იჸუ, მარაშ დინახალე კრებაშო ჭიჭე-ჭიჭეთ მომზადება, ვინემ ართათ“.
15. მუჭო შეილებნა ჯგირო მემზადათ კრებაშო?
15 მუ მიშურს კრებაშო ჯგირ მომზადებაშა? ირ მომზადებაშ წოხოლე იეჰოვას ქოთხით წმინდა შურ (ლუკ. 11:13; 1 იოან. 5:14). თეშ უკულ დრო გეგმურთით მომზადებას; დეფიქრით სათაურშე, ქვესათაურეფშე, სურათეფშე დო ჩარჩოეფშე, ნამუთ მოჩამილ რე სტატიას. აბზაციშ კითხირიშ დროს ქეშეილებნა-და, წეკითხით თექ ციტირებულ ბიბლიურ მუხლეფ. განსაკუთრებულ ყურადღება ქიმიაქცით თი აზრეფს, ნამუშ რაგად გილამნა კომენტარეფიშ დროს. თაშ ნამდა, ჯგირო მომზადება მეტ სარგებელს მოიღანა დო კომენტარეფიშ კეთება ხოლო გეგეადვილებნა (2 კორ. 9:6).
16. მუ საშვალებეფ რე ხეშამალაფარ დო მუჭო შეილებნა თინეფიშ გიმორნაფა?
16 შეიოლებერ ქორენ-და, გეგმირინეთ ელექტრონულ საშვალებეფ თქვან ნინაშა. ელექტრონულ საშვალებეფ, ნამდგას იეჰოვა მუშ ორგანიზაციაშ მეშვეობით მარზენა, მოხვარნა მივემზადათ კრებაშ შეხვალამეფშო. აპლიკაცია „JW ბიბლიოთეკაშ®“ საშვალებათ შემლებნა მობილურ მოწყობილობაშა გეგნიბჭარათ ოგურაფალ პუბლიკაციეფ. თეშ უკულ, წეპკითხათ ვარდა ვურჩქილათ ჩქინო საინტერესო მასალას ნებისმიერ დროს დო ადგილს. ნამთინე თე საშვალებას გიმირინუანს სკოლას დო სამუშას მოსვანჯაშ ვარდა მოგზაურობაშ დროს. „გინაჯინალ კოშკიშ ბიბლიოთეკა“ დო „გინაჯინალ კოშკიშ ონლაინ ბიბლიოთეკა™“ მოხვარნა უმოს ადვილო დობგორათ თი საკითხეფ, მუდგაშ გიმორკვიება მოკონა.
თქვა მუჟამ გიმორთუნთ დროს, ნამდა მემზადათ კრებაშ შეხვალამეფშო? (ქოძირით აბზაცეფი 14—16) *
17. ა) მუშენ რე ჯგირ მუსხირენ კომენტარიშ მომზადება? ბ) მუს გურაფლენთ ვიდეოშე „გინირთ იეჰოვაშ მეგობარო — მამზად კომენტარი“?
17 შეიოლებერ ქორენ-და, მამზადით მუსხირენ კომენტარ თითოულ ოგურაფალ სტატიაშე. მუშენ ოკო ვაკეთათ თენა? მუშენდა შილებე ირიათო ვა რკითხან თი დროს, მუჟამსით ხეს ეჭოფუნთ. შხვეფქ ხოლო შილებე თე დროს ხე გეჭოფან დო ჩამტარებელქ თინეფშე ნამდგაინს ქოკითხას. შეხვალამაქ დროს ვეგნაჩირთასინ თიშენ, ჩამტარებელქ შილებე არძას ვა კითხას. თაშ ნამდა, კომენტარ ვა რკითხეს-და, გურქ ვა გოიტირხან ვარდა ვეგეწყინან. მუჟამსით მუსხირენ კომენტარ გაჸინა მომზადებულ, უმოს ალბათობა რე, ნამდა კომენტარიშ კეთებაშ შესაძლებლობაქ ქუმგაჩან. კომენტარეფიშ მომზადებაშა ბიბლიურ მუხლიშ კითხირ ხოლო მიშურს. ქეცადით თქვან სიტყვეფით გენწყათ კითხირებულ ბიბლიურ მუხლი. *
18. მუშენ ოკო აკეთათ მოკლე კომენტარეფ?
18 მამზადით მოკლე კომენტარეფ. ხშირას მოკლეთ დო უბრალოთ რაგადებულ კომენტარეფ გურიშ ემაკინალ რე. თაშ ნამდა, ქეცადით გაკეთათ მოკლე კომენტარეფ დო 30 წამს ქინინტირათ (იგავ. 10:19; 15:23). შეხვალამეფს კომენტარეფიშ კეთებაშ ბრელ წანიან გამოცდილება ქოიღნან-და, შეილებნა მოკლე კომენტარეფიშ კეთებაშ ჯგირ მაგალით მეჩათ შხვეფს. მუსხირენ წუთიშ დინახალე, ბრელ აზრის ქოთქუანთ-და, შხვეფქ შილებე იფიქრან, ნამდა მუნეფს თეცალ ჯგირო ვაკეთებენა კომენტარ. მოკლე კომენტარეფს გაკეთენთ-და, უმოს მეტის მიაჩამუ საშვალება მონაწილება მიღან კრებაშ შეხვალამას. პირველ კომენტარ თქვა ქორკითხეს-და, კითხვას მარტივო დო პირდაპირ ქუპასუხით. ქეცადით აბზაცის მოჩამილ არძა აზრი თქვა ვა თქუათ. მუჟამსით მთავარ აზრის ქიმიაჩამუ პასუხ, შეილებნა დამატებით აზრი ქოთქუათ (ქოძირით ჩარჩო „მუჭო ვაკეთა კომენტარ?“).
19. მუჭო შეულებ ჩამტარებელს მიგეხვარან, მარა მუ ოკო აკეთათ თქვა?
19 წინასწარ ქუწით ჩამტარებელს, ნამ აბზაცის გოკონა უპასუხათ. წინასწარ ქუგაფნა გიშაგორილ ნამ აბზაცის უპასუხათ-და, ჯგირ იჸუაფ ჩამტარებელს კრებაშ დოჭყაფაშახ ქუწუათ. მუჟამსით თე აბზაცის წეკითხენა, ხეთეშე თეშ გეჭოფით ხე, ნამდა ჩამტარებელქ ქორძირან.
20. მუთ მოგენს კრებაშ შეხვალამა მეგობრეფწკუმა ართო ოჭკუმალიშ ჭკუმუას?
20 კრებაშ შეხვალამას თეშ უჯინით, მუჭოთ ჯგირ მეგობრეფწკუმა ართო ოჭკუმალიშ ჭკუმუას. მაგალთო, მეგობრულ შეხვალამაშა ქუდგაპეჯეს დო ქორთხუეს ოჭკუმალიშ კეთება. მუჭო მიქციუბუდით? დუდშე ალბათ ჭიჭეს ქინერვიანენდით, მარა ირნერო ქეცადებუდით, თიცალ ოჭკუმალ გაკეთითკო, ნამუთ არძას მეწონებუდ. ჩქინ მენძელ იეჰოვა რე, ნამუთ კრებაშ შეხვალამეფს სულიერ საზრდოთ გონწყილ სუფრას მოხვამლუანა (ფსალმ. 23:5; მათ. 24:45). თის ოსიამოვნ შურ დო გურით კეთებულ საჩუქარ. თაშ ნამდა, ჯგირო მემზადით კრებაშ შეხვალამეფშო დო მუზმათ შეილებნან ქიაქტიურით კომენტარეფს. თეგვარო ხვალე იეჰოვაშ სუფრაშე ჭკუმუას ვემიღენთ მონაწილებას, თქვან მოღალირ საჩუქარს, შხვეფს ხოლო გუზიარენთ.
ობირეში 2 იეჰოვა რე სქან სახელი
^ აბზ. 5 ფსალმუნმაბირე დავითცალო, არძას მიჸორა ღორონთ დო მოკონა განვადიდათ თინა. ჩქი მიღნა განსაკუთრებულ შესაძლებლობა გაგმოფხანტათ ღორონთიშ ჸოროფა კრებაშ შეხვალამეფს თაყვანიშცემაშ დროს. მარა ნამთინეს უჭირს კრებას კომენტარეფიშ კეთება. თეცალ პრობლემა თქვა ხოლო ქოიღნან-და, თე სტატია მიგეხვარებნა ქიგეგათ, მუ რე შიშიშ მიზეზ დო გიორჯგინათ თის.
