ოგურაფალ სტატია 3
მუჭო შემლებნა დოფთხილუათ ჩქინ გურ?
„არძაშ უმოსო გურს ქუმუთხილე“ (იგავ. 4:23).
ობირეში 36 დოფთხილუათ ჩქინ გური
შინაარსი *
1—3. ა) მუშენ უჸორდჷ იეჰოვას სოლომონი დო მუ კურთხევეფ მიღჷ თიქ? ბ) მუ კითხვეფს გუვარჩიენთ თე სტატიას?
სოლომონ ახალგაზრდა რდუ, მუჟამსით ისრაელიშ მეფეთ გინირთჷ. მეფობაშ დაჭყაფუს თის იეჰოვაქ გეგმეცხად დო უწუ: „ქომწი, მუ გოკო დო მერჩანქ“. სოლომონქ უპასუხ: „დიო მარდუ დო გამოუცდელ ვორექ, . . . ქიმეჩ სქან მსახურს მორჩილ გურ, ნამდა სამართალ გურჩქინას სქან ხალხის“ (1 მეფ. 3:5—10). თენა ნამდვილო მოკრძალებულ თხოვნა რდუ. ათეშენ ვამკვენა, მუშენ უჸორდჷ იეჰოვას სოლომონი (2 სამ. 12:24). ღორონთიქ შეუსრულ ახალგაზრდა მეფეს თხოვნა დო ქიმეჩ თის (1 მეფ. 3:12).
2 სოიშახ იეჰოვაშ ართგურ რდუ, სოლომონ ბრელ კურთხევას ღებულენდჷ. თის ქიმიაჩ პატიქ, აშენკო ტაძარი „იეჰოვაშ, ისრაელიშ ღორონთიშ სახელშა“ (1 მეფ. 8:20). სოლომონს ირდიხას ჩინებულენდეს თი სიბრძნეთ, ნამუთ ღორონთშე მიღჷ. თიშ ბრძნულ აზრეფ, ნამუთ ღორონთიშ შთაგონებათ თქუ, ბიბლიაშ სუმ წიგნის რე ინოჭარილ. ართ-ართ თეცალ წიგნი იგავეფ რე.
3 იგავეფიშ წიგნის სიტყვა გურ, სოდგარენ ოშშა რე მოშინაფილ. მაგალთო, იგავეფიშ 4:23-ს პკითხულენთ: „არძაშ უმოსო გურს ქუმუთხილე“. მუ იგულისხმებ თე მუხლის მოშინაფილ სიტყვას „გურ“? თე კითხვაშ პასუხის თე სტატიაშე ქიგებგენთ. თეს გეძინელ, პასუხის ქიმეფჩანთ ჟირ კითხვას: მუჭო ოცად სატანა გილამლუან გურიშ მდგომარეობა? დო მუჭო შემლებნა დოფთხილუათ ჩქინ გურ?. ღორონთიშ ართგურეფქ ქუდოფსკიდათინ, საჭირო რე მიჩქუდან პასუხეფ თე კითხვეფშე.
მუ იგულისხმებ გურს
4, 5. ა) მუჭო მოხვარნა ფსალმუნიშ 51:6 თიშ გაგებას, მუს ნიშნენს სიტყვა „გურ“? ბ) მუჭო იძირე ფიზიკურ ჯამრთელობაშ მაგალითშე, ნამდა მნიშვნელოვან რე ქიმკვოჯინათ სიმბოლურ გურს?
4 იგავეფიშ 4:23-ს „გურ“ „შინაგან პიროვნებაშა“ მეუთითენს (წეკითხით ფსალმუნი 51:6). შხვა სიტყვეფით ქოფთქუათინ, თის ჩქინ ფიქრეფ, გრძნობეფ, მოტივეფ დო სურვილეფ იგულისხმებ. თენა ოძირანს მუნერეფ ვორეთ შინაგანო დო ვართ ხოლო მუნერეფ ვორეთ გარეგნულო.
5 გუვარჩუათ ფიზიკურ ჯამრთელობაშ მაგალით, სოვრეშეთ იძირე, მუსხით მნიშვნელოვან რე ქიმკვოჯინათ ჩქინ სიმბოლურ გურს. პირველ, ჯგირ ჯამრთელობაშო საჭირო რე ჯანსაღ დიეტა დო ფიზიკურ ვარჯიშ. თეგვარო, სულიერ ჯამრთელობაშო ხოლო აუცილებერ რე რეგულარულო მიბღათ სულიერ საზრდო დო გეგმიფრჩქინათ იეჰოვაშ რწმენა. თეშა მიშურს ნაგურეფუშ ცხოვრებას გიმორნაფა დო რწმენაშ გურშენ შხვეფწკუმა ჩიება (რომ. 10:8—10; იაკ. 2:26). მაჟია, შილებე იფიფქრათ, ნამდა ჯამრთელეფ ვორეთ, მუშენდა გარეგნულო მუთუნ ვეგმოხენა, მარა სინამდვილეს მუდგაინ ლახალა მიღდან. თეგვარო, შილებე ფიფქრენდათ ნამდა მანგარ რწმენა მიღნა, მუშენდა მეპჸუნთ თეოკრატიულ განრიგის, მარა სინამდვილეს არასწორ სურვილეფქ ქიდიჭყას ჩქინ გურს რდუალა (1 კორ. 10:12; იაკ. 1:14, 15). ვაგმოჭყორდან, ნამდა სატანას ოკო მიღდან თიცალ აზროვნება, მუნერით მუს უღჷ. მუჭო ოცად თინა თეშ კეთებას? მუჭო ოკო დეფცვათ დუდ?
მუჭო ოცად სატანა ქიმოქმედას ჩქინ გურწკუმა
6. მუ რე სატანაშ მიზანი დო მუჭო ოცად თიშ მეჭირნაფას?
6 სატანა ვა მორჩილ იეჰოვაშ კანონეფს დო ეგოისტურ მიზნეფ უღჷ. თის ოკო ჩქი ხოლო მუს ქუვაგურათ. მარა თის ვეშულებ დუმანძალან, იფიფქრათ ვარდა ვაკეთათ თინა, მუთ თის ოკო. ათეშენ ოცად მუშ მიზანს შხვადოშხვა საშვალებათ ქიმიოჭირინუას. მაგალთო, ჩქინ გვერდით ირიათო რენა თიცალ კათა, მიდგას სატანაშ აზროვნება უღჷ (1 იოან. 5:19). თის უღჷ იმენდი, ნამდა ხშირ ურთიერთობა მაღვენუნა თეცალ კათაწკუმა, თიშ უმკუჯინუო ნამდა, მიჩქნა გლახა საზოგადოება იმოქმედებ ჩქინ ფიქრეფ დო აზროვნებაწკუმა (1 კორ. 15:33). თეცალ ტაქტიკა თიქ მეფე სოლომონწკუმა გიმირინუ. თიქ ბრელ წარმართ მიჸონ ოსურო. თინეფქ მანგარო იმოქმედეს სოლომონწკუმა დო საბოლათ გემკაჸათეს იეჰოვაშ შარას (1 მეფ. 11:3).
მუჭო შეილებნა დოთხილუათ გურ სატანაშ გავლენაშე? (ქოძირით აბზაცი 7) *
7. მუჭო ოცად სატანა მუშ აზროვნებაშ გავრცელებას დო მუშენ ოკო რდათ კურცხას?
7 ამდღა სატანა კინოეფ დო სატალევიზიო პროგრამეფით ავრცელენს მუშ აზროვნებას. თის უჩქჷ, ნამდა მობწონა შხვადოშხვა ისტორიეფიშ მორჩქილაფა. თეცალ საშვალებეფ ხვალე ჩქინ გართობას ვამსახურ. თინა მოქმედენს ჩქინ ფიქრეფ, გრძნობეფ დო მოქმედებეფწკუმა. იესო ხოლო გიმირინუანდჷ თე მეთოდის დო გურაფაშ დროს მაგალითეფ მოჸუნდჷ, მარა სატანაშ გინაწონს, თე ირფელ დადებითო მოქმედენდჷ ხალხწკუმა. მაგალთო, ქიგიფშინათ თიშ იგავეფ ალალ გურიშ სამარიელ დო შარას ეჩილათირ ქომოლსქუაშ გურშენ (მათ. 13:34; ლუკ. 10:29—37; 15:11—32). მარა თინეფ, მიდგას სატანაშ აზროვნება უღჷ, ოცადნა კინოეფს დო სატელევიზიო პროგრამეფს მოჩამილ ისტორიეფით აზროვნება გილამლუან. ათეშენ საჭირო რე გაწონასწორებულ ვორდათ. მუშო ოკო რაგად, რე თიცალ კინოეფ დო გადაცემეფ, ნამუთ გლახათ ვემოქმედებ ჩქინ აზროვნებაწკუმა დო შემლებნა გართობაშ მიზნით ვუჯინათ. მარა კურცხას ოკო ვორდათ გიშაგორუაშ დროს დო ქოპკითხათ ჩქინ დუც: „ხომ ვა მოგურუანს თე ფილმი ვარდა გადაცემა, ნამდა ხორციელ სურვილეფიშ ეჸუნა ნორმალურ რე“? (გალ. 5:19—21; ეფეს. 2:1—3). მუჭო ოკო მიქცუათ, მუჟამსით ქოძირუნთ, ნამდა ფილმი ვარდა გადაცემა ხუც უკინენს სატანაშ აზროვნებას? მუჭოთ გინმადვალუნ ფერ ლახალას თეშ, დუდ არიდით დო ვა გაგრძელათ თიშ ჯინა.
8. მუჭო შეულებნა მშობლეფს ქიმეხვარან სქუალეფს, დითხილუან გურ?
8 მშობლეფი, თქვან მოვალეობა რე დეცვათ ბაღანეფ სატანაშ გავლენაშე, ნამუთ ირნერო ოცად თეშ კეთებას. მუშო ოკო რაგად, თქვა ირფელს ორთუთ, ნამდა ბაღანეფს ლახალაქ ვაღოლან. მაგალთო, ოცადუთ ჸუდეს ირიათო სისუფთავე გიღდან დო დეთხინუათ ირფელ, მუთ თქვა ვარდა თქვან ბაღანეფიშ ჯამრთელობას ქეცილებ. თეგვარო, აუცილებერ რე დეცვათ თქვან ბაღანეფ თიცალ ფილმეფ, გადაცემეფ, კომპიუტერულ ლაჸაფეფ დო ვებ-გვერდეფშე, ნამუთ სატანაშ აზროვნებას უკინენს ხუჯის. იეჰოვაქ თქვა მიგანდეს თიშ პასუხიშმგებლობა, ნამდა ქიზრუნათ სქუალეფიშ სულიერ ჯამრთელობაშე (იგავ. 1:8; ეფეს. 6:1, 4). ვემგერიდან თინეფშა ბიბლიურ ნორმეფშა გერსხილ წესეფიშ დადგენაქ. ქეჩით ბაღანეფს მუშ ჯინა შეულებნა დო მუშ ვარ დო გეუნწყით, მუშენ უდგინენთ თეცალ წესეფს (მათ. 5:37). მუჟამსით ბაღანეფ გემწირდუნა, ქუდაგურეთ, ჯგირ დო ფურიშ გიშაგორუაშ დროს, მუჭო იხემძღვანელან იეჰოვაშ ნორმეფით (ებრ. 5:14). ვაგგოჭყორდან, ბაღანეფ თქვან საქციელშე უმოსის დიგურუანა, ვინემ სიტყვეფშე (კან. 6:6, 7; რომ. 2:21).
9. ნამ რე სატანაშ ართ-ართ გავრცელებურ აზროვნება დო მუშენ რე თინა ოშკურანჯ?
9 სატანა ოცად გავლენა უღდას ჩქინ გურწკუმა თით, ნამდა ვამღუდან იეჰოვაშ აზროვნება დო ადამიანურ სიბრძნეს ვენდათ (კოლ. 2:8). დეფიფქრათ სატანაშ გავრცელებურ აზროვნებაშე, ნამდა ცხოვრებაშ მთავარ მიზან ქონებაშ შაყარუა რე. თაშ ფიქრენან თინეფშე ნამთინექ შილებე ბრელ ქონება დოშაყარუას, მარა ნამთინეს ვემიაჭირინუას თე მიზანშა. ჟირხოლო შემთხვევას, თინეფს მთელ ყურადღება ქონებაშ შაყარუაშა გინუღნა, მუდგას ეწირებ ჯამრთელობა, ოჯახწკუმა ურთიერთობა დო მუთ არძაშ უმოს მთავარ რე, ღორონთწკუმა მეგობრობა (1 ტიმ. 6:10). მარდულეფ ვორეთ ჩქინ ზეციერ მუმაშ, ნამუთ მოხვარნა ფარაშე გაწონასწორებულ თვალსაზრის მიღდან (ეკლ. 7:12; ლუკ. 12:15).
მუჭო ფთხილუათ გურ
ჯვეშ დროშ გუშაგეფ დო ყარულეფცალო, კურცხას რდათ დო ვემეჩათ საშვალება გლახააზროვნებას ქიმოქმედას თქვანწკუმა (ქოძირით აბზაცეფი 10, 11) *
10, 11. ა) მუ ოკო ვაკეთათ, ნამდა დოფთხილუათ ჩქინ გური? ბ) მუს ორთუდეს ჯვეშ დროს გუშაგეფ დო მუჭო შილებე ჩქინ სინდისიქ გუშაგცალ იჸუას?
10 ჩქინ გურ დოფთხილუათინ, ოკო შემლებდან საფრთხეეფიშ გიშაჩინება დო ხეთეშე რეაგირება. იგავეფიშ 4:23-ს მოშინაფილ სიტყვა, ნამუთ „თხილუათ“ რე თარგმნილ, გუმოშინანა გუშაგიშ სამუშას. სოლომონიშ დროს გუშაგი ქალაქიშ ოთხილარო გალავანს გიმარდჷ დო მუთუნ საფრთხეს ქოძირუნდ-და, განგაშის ეტახუნდჷ. თე მაგალითიშ წარმოდგენა მოხვარნა თიშ გაგებას, მუჭო ოკო მიფქცუათ, მუჟამსით სატანა ოცად გილამლუან აზროვნება.
11 ჯვეშ დროს გუშაგი დო კარმინოლიშ ყარულეფ ართიანწკუმა თანამშრომლენდეს (2 სამ. 18:24—26). შედეგო, ქალაქ თხილერ რდუ, მუშენდა ნტერ ხოლოშა მანჭუაფუდუნ, კარმინოლს ინაკილანდეს (ნეემ. 7:1—3). გუშაგცალო, ბიბლიათ განსწავლულ სინდის * მაფრთხილენა, მუჟამსით სატანა ოცად ქიმოქმედას ჩქინ გურწკუმა — შხვა სიტყვეფით ქოფთქუათინ, მუჟამსით ოცად ქიმოქმედას ჩქინ ფიქრეფ, გრძნობეფ, მოტივეფ დო სურვილეფწკუმა. მუჟამსით ჩქინ სინდის განგაშის გეტახუნს, ოკო ქუმურჩქილუათ თის, თაშ ქოფთქუათინ, დოპკილუათ კარმინოლ.
12, 13. მუ დროს შილებე ქიგებდირთათ ცდუნებაშ წოხოლე, მარა მუჭო ოკო მიფქცუათ?
12 მორთ, ქობძირათ, მუჭო შემლებნა დოფთხილუათ ჩქინ გურ სატანაშ აზროვნებაშ გავლენაშე. იეჰოვა მოგურუანა, ნამდა „სიძვა, [დო] ირნერ უწმინდურება თეშ ხოლო ვემიშინუათ“ (ეფეს. 5:3). მარა მუჭო მიფქცუათ, მუჟამსით ჩქინ სამუშას ვარდა სკოლას უზნეო თემეფშე იჭყანა რაგადის? თეცალ დროს მიჩქნა, ნამდა „ვარია [ოკო] ქოფთქუათ უღორონთობაშე დო ქვეყნიურ კორნებეფშე“ (ტიტ. 2:12). თე დროს გუშაგი, ანუ ჩქინ სინდისი განგაშის ეტახუნს (რომ. 2:15). მარა ქუმურჩქილუანთო თის? შილებე ცდუნებაშ წოხოლე ქიგებდირთათ დო გევაჸუნათ თანამშრომლეფს ვარდა კლასელეფს უზნეო თემეფშე რაგადის ვარდა გლახა სურათეფიშ დათვალიერებას. მარა ზუსტას თე დროს რე საჭირო შხვა თემაშა გეგნვოჸოთათ ჩიება ვარდა გვალო ქიდიპტუათ თექიანობა, შხვა სიტყვეფით ქოფთქუათინ, დოპკილუათ კარმინოლ.
13 გაბედულება მოსაჭირნა, ვევაჸუნათ ჩქინ მახანეფიშ გლახა საქციელს. შემლებნა დარწმუნებულ ვორდათ, ნამდა იეჰოვა ორწყე ჩქინ მონდომას დო თინა ქომჩანა ძალას დო სიბრძნეს, გავურზათ სატანაშ აზროვნებას (2 მატ. 16:9; ეს. 40:29; იაკ. 1:5). ხოლო მუშ კეთება შემლებნა, ნამდა დოფთხილუათ ჩქინ გურ?
რდათ კურცხას
14, 15. ა) მუს ოკო მეფჩათ საშვალება, ნამდა იმოქმედას ჩქინ გურწკუმა დო მუჭო შემლებნა თეშ კეთება? ბ) მუჭო მოხვარნა იგავეფიშ 4:20—22 მიბღათ მეტ სარგებელი ბიბლიაშ კითხირშე? (ქოძირით ჩარჩო „მუ საკითხეფშე ოკო დეფიფქრათ“).
14 ჩქინ გურ დოფთხილუათინ, ხვალე თინა ვა რე დასაბაღ, ვევაჸუნათ გლახა აზროვნებას. ჩქი საშვალება ოკო ქიმეფჩათ დადებით ფიქრეფს, ნამდა ქიმოქმედას ჩქინწკუმა. მორთ, კინ დეფიფქრათ ქალაქიშ გალავანიშ მაგალითშე. ყარულეფ კარმინოლს ინაკილანდეს, ნამდა ნტერს ვემნურთუმუდკო, მარა მინშა ოჭკუმალ დო შხვა საჭირო ნივთეფიშ მინაღალარო კარეფს ონჯანდეს. კარმინოლს დღას ვა განჯანდეს-და, ქალაქიშ მახორუეფ შკირენულ ქუდოსკიდუდეს. თეგვარო, საჭირო რე საშვალება ქიმეფჩათ ღორონთიშ აზროვნებას ქიმოქმედას ჩქინ გურწკუმა.
15 ბიბლიას მოჩამილ რე იეჰოვაშ აზროვნება, ათეშენ ირდღაშიან კითხირ მიმეხვარებნა თიშ აზროვნებაქ ქიმოქმედას ჩქინ ფიქრეფ, გრძნობეფ დო მოქმედებეფწკუმა. მუ ოკო ვაკეთათ, ნამდა ბიბლიაშ კითხირქ სარგებელ ქუმომღან? თეშო აუცილებერ რე ლოცვა. ართ და იჩიებ: „ბიბლიაშ კითხირშახ, იეჰოვას ფთხინქ, ქიმმეხვარას ჯგირო ქიგებგე თიშ სიტყვას მოჩამილ აზრეფი“ (ფსალმ. 119:18). თეს გეძინელ, ოკო დეფიფქრათ ნაკითხერშე. მუჟამსით ბლოცულენთ, პკითხულენთ დო ფიფქრენთ, ღორონთიშ სიტყვა უმოსო ინანჭუ ჩქინ გურს დო იეჰოვაშ აზროვნება მეჸოროფებნა (წეკითხით იგავები 4:20—22; ფსალმ. 119:97).
16. მუჭო ოხვარ ბრელს JW მაუწყებლობაშ ჯინა?
16 JW მაუწყებლობაშ® ჯინა ხოლო ართ საშვალება რე, ნამუთ მიმეხვარებნა მიღდან ღორონთიშ აზროვნება. ართ წყვილ იჩიებ: „ირ თუთაშ გადაცემეფ ჩქინ ლოცვეფიშ პასუხ რე! თინეფ მამანგარენა დო გურშა ელამკინანა, მუჟამსით გლახათ ბგინაფლენთ დუც. ხშირას ვურჩქილეთ მაუწყებლობაშ ობირეშეფს, ოჭკუმალიშ კეთებაშ, დონწყუალაშ ვარდა უბრალოთ ჩაიშ შუმაშ დროს ხოლო“. თე პროგრამეფ მოხვარნა დოფთხილუათ ჩქინ გურ; თეს გეძინელ ბგურაფლენთ საკითხეფს იეჰოვაშ თოლით ვუჯინათ დო უფლება ვემეფჩათ სატანაშ აზროვნებას ქიმოქმედას ჩქინწკუმა.
17, 18. ა) მუჭოთ 1 მეფეეფიშ 8:61-შე იძირე, მუ შედეგის მიბღენთ, მუჟამსით ნაგურეფუს ცხოვრებას გეგმიბრინუანთ? ბ) მუშ გურაფა შემლებნა მეფე ხიზკიაშ მაგალითშე? გ) ფსალმუნიშ 139:23, 24-ის მოშინაფილ დავითიშ ლოცვაშ თანახმათ, მუ საკითხეფშე შემლებნა იბლოცათ?
17 მუჟამსით სწორაშო იფქციებუთ დო შედეგეფს ვორწყეთ, ჩქინ რწმენა უმოსო იმანგარებ (იაკ. 1:2, 3). ჯგირო ბგინაფლენთ დუც, მუშენდა სწორაშო მოქციებათ იეჰოვას ვარზენთ საშვალებას მუშ სქუალეფო მემრჩქინან დო უმოსო მოკონა ვასიამოვნათ თის (იგავ. 27:11). ირ გამოცდაშ დროს საშვალება მიღნა დუვამტკიცათ, ნამდა გვერდ გურით ვა ვომსახურუთ ჩქინ მოჸოროფე მუმას (ფსალმ. 119:113). პირიქით, ვამტკიცენთ, ნამდა მიჸორა იეჰოვა მთელ გურით დო გინოჭყვიდილ მაფნა დეფცვათ თიშ მითითებეფ (წეკითხით 1 მეფეები 8:61).
18 ნიშნენსო თენა თის ნამდა, დღას ვემეფჩირთუთ დო ვა დუშვენთ შეცდომეფს? მუშო ოკო რაგად, ვარ, მუშენდა არასრულყოფილეფ ვორეთ. ვაგმოჭყორდან მეფე ხიზკიაშ მაგალითიქ. თიქ შეცდომეფ დუშვჷ, მარა მინანუ დო კინ „მთელ გურით“ აგრძელენდჷ იეჰოვაშ მსახურებას (ეს. 38:3—6; 2 მატ. 29:1, 2; 32:25, 26). მორთ, ირიათო ქივეწინააღმდეგათ სატანაშ მონდომას დო ვევაჸუნათ თიშ აზროვნებას. თეშ გინაწონს, ფთხუათ იეჰოვას ქომჩან „მორჩილ გურ“ (1 მეფ. 3:9; წეკითხით ფსალმუნი 139:23, 24). ჩქი შემალებენა ქუდოფსკიდათ იეჰოვაშ ართგურ, მუჟამსით არძაშ უმოსო ჩქინ გურს დოფთხილანთ.
ობირეში 54 „თენა რე შარა“
^ აბზ. 5 ქუდოფსკიდუთო ბოლოშა იეჰოვაშ ართგურეფ დო ვარ სატანას მეფჩანთ თიშ საშვალებას, განკმოჸოთან ღორონთიშ მსახურებას? თენა თიშა რე დამოკიდებულ, ქუვოცადუთ დო ვარ დოფთხილუათ ჩქინ გურ დო ვართ ხოლო თიშა, მუსხით სერიოზულ გამოცდას შეფხვადუთ. მუ იგულისხმებ სიტყვას „გურ“? მუჭო ოცად სატანა გილამლუან გურიშ მდგომარეობა? დო მუჭო შემლებნა დოფთხილუათ ჩქინ გურ? თე სტატიას პასუხ ქიმიაჩამუ თე მნიშვნელოვან კითხვეფს.
^ აბზ. 11 განმარტება: იეჰოვაქ მუჩეს თიშ უნარ, ნამდა შევამოწმათ ჩქინ ფიქრეფი, გრძნობეფ, მოქმედებეფ დო თეშ უკულ განმსაჯათ ჩქინ დუდი. ბიბლიას თე უნარს სინდის ჯოხო (რომ. 2:15; 9:1). ბიბლიათ განსწავლულ სინდის ნიშნენს იეჰოვაშ ნორმეფით შევაფასათ, ჯგირ რე დო ვარ გლახა თინა, მუდგას ფიფქრენთ, ვორთუთ დო იფჩიებუთ.
