1, 2. ა) მუს ოკვირ იეჰოვა, მუჟამსით ქრისტეშ ღურაშ გოშინაშ ონჯუაშ აღნიშნებელო მულირ მილიონობით კოჩის ორწყე? (ქოძირით სურათი პირველ გვერდის). ბ) მუს გუვარჩიენთ თე სტატიას?

დეფიქრით მუს ორწყე იეჰოვა, მუჟამსით მთელ მსოფლიოს მილიონობით კოჩ იშაყარუ გოშინაშ ონჯუაშ აღნიშნებელო. თინა ხალხიშ რაოდენობაშე მეტის ორწყე; იეჰოვა ოკვირ თითოულ პიროვნებას, ნამუთ თე შეხვალამას ოსწრჷ. მაგალთო, თინა ორყწე თინეფს, მით ირ წანას ართგურო ოსწრჷ გოშინაშ ონჯუას. შილებე თინეფ შკას რდან თიცალ პიროვნებეფ, მით თხოზინიშ უმკუჯინუო მოურს თე შეხვალამა. შხვეფ შილებე რეგულარულო ვეგლეშან შეხვალამეფშა, მარა ირიათო ოსწრუნა თე განსაკუთრებულ ღონისძიებას, მუშენდა თინა მნიშვნელოვანო მიორჩქნა. თეს გეძინელ, იეჰოვა ოკვირ თინეფს, მით დაინტერესებულ რე თე შეხვალამათ დო პირველო ოსწრჷ თის.

² მუშო ოკო რაგად, იეჰოვას ოსიამოვნ, მუჟამსით ორწყე, ნამდა ბრელ ოსწრჷ თე შეხვალამას (ლუკ. 22:19). მარა, იეჰოვაშო ხალხიშ რაოდენობა ვა რე მნიშვნელოვან. თინა უმოსო დაინტერესებულ რე თინეფიშ მოულაშ მიზეზით. თე სტატიას პასუხის ქიმეფჩანთ მნიშვნელოვან კითხვას: მუშენ ვოსწრუთ ქრისტეშ ღურაშ გოშინაშ ონჯუაშ გარდა შხვა ირმარიან შეხვალამეფს ხოლო, ნამუთ იეჰოვაქ თინეფშო მამზად, მიდგას უჸორს თინა?

3, 4. ა) მუშენ ვოსწრუთ შეხვალამეფს? ბ) ნამ თვისებეფს გიმიფრჩქინანთ კრებაშ შეხვალამეფიშ დასწრებათ? გ) 1 კორინთელეფიშ 11:23—26-იშ თანახმათ, მუშენ ოკო დევესწრათ გოშინაშ ონჯუას?

³ კრებაშ შეხვალამეფ წმინდა თაყვანიშმცემლობაშ ნაწილ  რე, ათეშენ რეგულარულო ვოსწრუთ თის. თეს გეძინელ, კრებაშ შეხვალამეფით იეჰოვა ბრელ მუდგარენს მოგურუანა. მარა ამაყ ადამიანეფ ფიქრენა, ნამდა მუთუნიშ გურაფა ვასაჭირნა (3 იოან. 9). თინეფიშ გინაწონს, ირნერო ვოცადუთ, დიბგურუათ იეჰოვაშე დო თიშ ორგანიზაციაშე (ეს. 30:20; იოან. 6:45).

⁴ მუჟამსით კრებაშ შეხვალამეფს ვოსწრუთ, ვოძირანთ, ნამდა თანდაბალეფ ვორეთ, თეწკუმა ართო, მზათ ვორეთ დო მოკონა, უმოს დიბგურუათ. გოშინაშ ონჯუას თიშენ ვოსწრუთ, ნამდა მესმებნა მუსხით მნიშვნელოვან რე თე ღონისძიება. თეს გეძინელ, თანდაბლურო მეპჸუნთ იესოშ მითითებას: „თენა აკეთით ჩქიმ გასაშინეთ“ (წეკითხით 1 კორინთელები 11:23—26). თე შეხვალამეფ მიმანგარენა მომავალიშ იმენდის დო გუმოშინანა, ნამდა იეჰოვას მანგარო ვუჸორთ. თის უჩქჷ, ნამდა გაბედულება დო სიმტკიცე წანაშე ართშა ვარინ, ირიათო მოსაჭირნა. ათეშენ, თინა მირაგადნა დევესწრათ ირმარიან შეხვალამეფს. თანდაბლობა მიმეხვარებნა დევემორჩილათ იეჰოვაშ თე მითითებას. ჩქი დროს გუმვურთუნთ, ნამდა მივემზადათ ირმარიან კრებაშ შეხვალამეფშო დო დევესწრათ თის.

5. მუშენ ღებულენა თანდაბალ ადამიანეფ იეჰოვაშ მოწვევას?

⁵ ირ წანას ბრელ თანდაბალ ადამიან ღებულენს იეჰოვაშ მოწვევას, ნამდა ქიდიგურუან თიშე (ეს. 50:4). თინეფ სიამოვნებას ღებულენა გოშინაშ ონჯუაშ დასწრებათ დო შხვა შეხვალამეფშა დასწრებას ხოლო იჭყანა (ზაქ. 8:20—23). თინეფწკუმა ართო, ჩქი ხოლო მოკონა მივაჸუნათ იეჰოვაშ, ჩქინ „მარსხებელიშ“ ხემძღვანელობას, ნამუთ ირიათო ალამრენა (ფსალმ. 40:17). ნამდვილო, მუთუნ ვა რე თიშე სასიამოვნო დო მნიშვნელოვან, მიბღათ თე მოწვევა, დიბგურუათ იეჰოვაშე დო თიშ საჸოროფო სქუა, იესოშე (მათ. 17:5; 18:20; 28:20).

6. მუჭო მეხვარ ართ კოჩის თანდაბლობაქ ქიდესწრუკო გოშინაშ ონჯუას?

⁶ ირ წანას, ირნერო ვოცადუთ გიმიბრინუათ არძა საშვალება, ნამდა დევესწრათ ქრისტეშ ღურაშ გოშინაშ ონჯუას. ბრელ თანდაბალ ადამიანშო ჯგირობუა მოუღ თე მოწვევაშ მეღებას. გუვარჩუათ ართ მაგალით. მუსხირენ წანაშ წოხოლე ჩქინ ჯიმაქ ართ კოჩის გოშინაშ ონჯუაშ მაწვიებელ ქუდუტუ, მარა თიქ უწუ, ნამდა ვამართინედ თე ღონისძიებაშა. ჯიმაქ გაკვირებულქ ქუდოსკიდ, მუჟამსით გოშინაშ ონჯუას თე კოჩიქ სამეფო დარბაზშა გემნორთჷ. თე პიროვნებას მანგარო მეწონ თიქ, მუჭო შეხვადეს კრებას დო ქიდიჭყჷ ირმარიან შეხვალამეფშა გილულა. მთელ წანაშ განმავლობას თე კოჩის ხვალე სუმშა გუჩირთჷ კრებაშ შეხვალამაქ. მუქ გინაჭყვიდირაფუ თის, დესწრუკო გოშინაშ ონჯუას? თინა თვინიერ პიროვნება რდუ დო შეიალებუ დოთირუკო აზროვნება. უმოს გვიანო, თი ჯიმაქ ნამდგაქ თის მაწვიებელ დოუტუ, თქუ: „თინა ართო თანდაბალ პიროვნება რე“. იეჰოვაქ აღძრჷ თე პიროვნება, ნამდა გინორთედკო თიშ თაყვანიშმცემელ დო ამდღა თინა ჩქინ ჯიმა რე (2 სამ. 22:28; იოან. 6:44).

7. მუჭო მოხვარნა კრებაშ შეხვალამეფ დო ბიბლიაშ კითხირ, ვორდათ თანდაბალეფ?

⁷ მუდგას კრებაშ შეხვალამეფს ბგურაფლენთ დო ბიბლიას პკითხულენთ, მიმეხვარებნა ვორდათ თანდაბალეფ. გოშინაშ ონჯუაშ წოხოლეიან მარეფს, ჩქინ შეხვალამეფს ხშირას გენიფხილენთ იესოშ მაგალითის დო თიშ თანდაბლობას, ნამუთ მუშ სიცოცხლეშ დათმებათ დო გიშაჸიდირალით გიმირჩქინ. თეს გეძინელ, გოშინაშ ონჯუაშ წოხოლენ დღალეფს, პკითხულენთ ბიბლიურ მონაკვეთეფს, ნამუთ ოხუ იესოშ ღურას დო გათელებას. თე ირფელ მოხვარნა, უმოს მარდულეფ ვორდათ თი მსხვერპლშე, ნამუთ იესოქ ჩქინ გურშენ აკეთ. თენა მიმეხვარებნა მივაჸუნათ თიშ თანდაბლობაშ მაგალითის დო შევასრულათ იეჰოვაშ ნება,  თიმწკუმა ხოლო, მუჟამსით თეშ კეთება ადვილ ვა მაფნა (ლუკ. 22:41, 42).

8. მუჭო გიმირჩქინ იესოქ გაბედულება?

⁸ ჩქი თიმწკუმა ხოლო მეპჸუნთ ქრისტეშ მაგალითის, მუჟამსით გიმიფრჩქინანთ გაბედულებას. დეფიქრით მუჭო გიმირჩქინანდჷ იესო თე თვისებას ღურაშ წოხოლენ დღალეფს. თის ჯგირო უჩქუდ, ნამდა ნტერეფ გიჯოგუანდეს, გოლახუნდეს დო ძელს ქიმკაჭკადანდეს (მათ. 20:17—19). მარა თინა იშენით, მზათ რდუ დათმუკო სიცოცხლე. მუჟამსით თეშ დროქ ქუდოდირთჷ, გეთსემანეშ ბაღის მუშ ართგურ მოციქულეფს უწუ: „გედირთით, იბდათ. ხოლოს რე ჩქიმ გიმმაჩამალ“ (მათ. 26:36, 46). მუჟამსით იარაღამ კათაქ თიშ ოჭოფშა ქუმორთეს, ქეწაზად თინეფს, ქუწუ მი რდუ დო მუშ მოციქულეფ გატებაფუ (იოან. 18:3—8). გაბედულებაშ გიმორჩქინაშ მუშმაჯგირა მაგალით რე! ამდღა ცხებულ ქრისტიანეფ დო შხვა შხურ ოცადნა, ნამდა მიაჸუნან იესოშ მაგალითის გაბედულებაშ გიმორჩქინას. საინტერესო რე, მუჭო?

9. ა) მუშენ ოკო დევესწრათ რეგულარულო კრებაშ შეხვალამეფს? ბ) მუჭო შილებე იმოქმედას ჩქინ ჯგირ მაგალითიქ თინეფწკუმა, მით რწმენაშ გურშენ ციხეს ხე?

⁹ კრებაშ შეხვალამეფს რეგულარულო დევესწრათინ, შილებე გაბედულებაშ გიმორჩქინაქ დემესაჭირან, მუშენდა რთულ სიტუაციეფს შეფხვადუთ. ნამთინე ჩქინ და დო ჯიმა იშენით ოსწრჷ კრებაშ შეხვალამეფს, თიშ უმკუჯინუო, ნამდა ბრელ ოწუხებელ, გურიშ გოტახუა ვარდა ჯამრთელობაშ პრობლემეფ უღჷ. შხვეფს შილებე ოჯახიშ წევრეფ ვარდა მთავრობაშ წარმომადგენელეფ თხოზდან, მარა გიმირჩქინანა გაბედულებას დო ირიათო ოსწრუნა შეხვალამეფს. დეფიფქრათ, მუჭო იმოქმედენს ჩქინ მაგალით და დო ჯიმალეფწკუმა, ნამუთ რწმენაშ გურშენ ციხეს ხენა (ებრ. 13:3). თინეფიშ რწმენა დო გაბედულება იმანგარებ, მუჟამსით გებულენა, ნამდა სირთულეეფიშ უმკუჯინუო ართგურო ვომსახურუთ იეჰოვას. მოციქულ პავლე ხოლო თეგვარ სიტუაციას რდუ. მუჟამსით რომიშ ციხეს ხედჷ, თის ახიოლ თიშ გაგებაქ, ნამდა ჯიმალეფ ართგურო ომსახურდეს ღორონც (ფილ. 1:3—5, 12—14). საეგებიოთ, გათავისუფლებაშახ ვარდა თიშ უკულ, პავლექ ებრაელეფს წერილ მეჭარ, სოდეთ ელუჩანდჷ ართგურ ქრისტიანეფს, ვა უდინუაფდესკო „ჯიმალურ ჸოროფა“ დო ვემუტებდესკო შეხვალამეფშა დასწრება (ებრ. 10:24, 25; 13:1).

10, 11. ა) მი ოკო დუვაპეჯათ გოშინაშ ონჯუაშა? ბ) თეშ ოკეთებელო მუ მიზეზ რე მოჩამილ ეფესოელეფიშ 1:7-ის?

¹⁰ გაბედულებას გიმიფრჩქინანთ, მუჟამსით ნათესეფს, თანამშრომელეფს დო მეზობელეფს გოშინაშ ონჯუაშა ვაპეჯენთ. მუშენ ოკო დუვაპეჯათ თინეფ? მარდულეფ ვორეთ თი ირფელშე, მუთ იეჰოვაქ დო იესოქ ჩქინო აკეთეს, ათეშენ მთელ გურით მოკონა შხვეფ ხოლო დუვაპეჯათ თე ღონისძიებაშა. თეგვარო თინეფ ქიდიგურუანა, მუჭო მიღან სარგებელ იეჰოვაშ „ჭყოლოფაშ სიხვეიანეშე“ გიშაჸიდირალიშ საშვალებათ (წეკითხით ეფესოელები 1:7; გამოცხ. 22:17).

 ¹¹ კრებაშ შეხვალამეფიშ დასწრებათ, გაბედულებაწკუმა ართო შხვა ძვირფას თვისებას ხოლო გიმიფრჩქინანთ, ნამუსით იეჰოვა დო იესო ხოლო შხვადოშხვა საშვალებათ გიმირჩქინანა.

12. ა) მუჭო მიმანგარენა კრებაშ შეხვალამეფ იეჰოვაშ დო იესოშ ჸოროფას? ბ) მუჭო მოხვარნა 2 კორინთელეფიშ 5:14, 15, ნამდა მივაჸუნათ იესოშ მაგალითის?

¹² ჩქინ ზეციერ მუმაშ დო იესოშ ჸოროფა მოხვარნა, დევესწრათ შეხვალამეფს. კრებაშ შეხვალამეფს ნაგურეფ, მიმანგარენა იეჰოვაშ დო თიშ სქუაშ ჸოროფას. შეხვალამეფ ირიათო გიმოშინანა, მუ აკეთეს თინეფქ ჩქინ გურშენ (რომ. 5:8). გოშინაშ ონჯუა გუმოშინანა, მუშმადიდა ჸოროფა გიმირჩქინეს იეჰოვა დო იესოქ თინეფწკუმა ხოლო, მიდგას ვესმებ გიშაჸიდირალიშ მნიშვნელობა. მუჟამსით მარდულეფ ვორეთ, ირნერო ვოცადუთ მივაჸუნათ ქრისტეშ მაგალითის, მუდგას ჩქინ ცხოვრებათ ვოძირანთ (წეკითხით 2 კორინთელები 5:14, 15). თეს გეძინელ, მთელ გურით მოკონა განვადიდათ იეჰოვა გიშაჸიდირალშე. თეშ ართ-ართ საშვალება თინა რე, ნამდა კრებაშ შეხვალამეფს კომენტარეფს მიბღათ მონაწილება.

13. მუჭო შემლებნა ვოძირათ, ნამდა მანგარო მიჸორა იეჰოვა დო იესო ქრისტე?

¹³ ჩქი შემლებნა იეჰოვაშ დო თიშ სქუაშ ჸოროფა გიმიფრჩქინათ დო საქმეეფით ვოძირათ, ნამდა მზათ ვორეთ ირნერ მსხვერპლშა იბდათ თინეფიშ გურშენ. ხშირას თეცალ მსხვერპლი, კრებაშ შეხვალამეფიშ დასწრება რე. ბრელ ადგილს კრებაშ ართ შეხვალამა სამუშა დღაშ ბოლოს იტარებ, მუჟამსით შილებე შულადირეფ ვორეთ. მაჟია შეხვალამა იტარებ საბატონს ვარდა

ჟეშხას, მუჟამსით იფსვანჯუთ. ქარწყენო იეჰოვა, ნამდა შულადაშ უმკუჯინუო იშენით ვოსწრუთ შეხვალამეფს? მუშო ოკო რაგად, ორწყე! იეჰოვა აფასენს ჩქინ მონდომას, მუდგასით კრებაშ შეხვალამეფიშ დასწრებელო გიმიფრჩქინანთ (მარ. 12:41—44).

14. მუჭო დომტუეს იესოქ დუდგინოდვალირ ჸოროფაშ არძაშ უჯგუშ მაგალით?

¹⁴ იესოქ დუდგინოდვალირ ჸოროფაშ მაგალით დომტუეს. თიქ სიცოცხლე დათმჷ მუშ მოწაფეეფშო; თეს გეძინელ, საქმეეფით ამტკიცენდჷ, ნამდა მუშ დუდიშ წოხოლე შხვეფიშ ინტერესეფ გეურდჷ. მაგალთო, ფიზიკურო დო ემოციურო მუდგა შულადირ ვარდუკო, იესო იშენით მუშ მიმაჸუნალეფწკუმა რდუ (ლუკ. 22:39—46). თინა ირიათო შხვეფს მუჭო მემსახურკონ თიშო  ფიქრენდჷ (მათ. 20:28). იეჰოვაშ დო და დო ჯიმალეფიშ ჸოროფა აღბძრენა ირნერო ვეცადათ დევესწრათ გოშინაშ ონჯუას დო შხვა შეხვალამეფს ხოლო.

15. განსაკუთრებულო მის ოკო მივეხვარათ?

¹⁵ ჩქი ჭეშმარიტ ქრისტიანულ საჯიმალოშ წევრეფ ვორეთ, ათეშენ მუთ შემლებნან, ბრელ დროს ვუთმენთ, ნამდა შხვეფს ხოლო ქიმვეხვარათ ქაკათან თე ძვირფას საჯიმალოს. განსაკუთრებულო მოკონა მივეხვარათ თინეფს, მით რწმენათ ჩქინიან რენა, მარა გარკვეულ მიზეზეფიშ გურშენ ვა ქადაგენა ვარდა ვეგლულა კრებაშა (გალ. 6:10). შემლებნა ჸოროფა გეგმიფრჩქინათ თინეფშა დო ქიმვეხვარათ, კინ ქიდიჭყან კრებაშა გილულა, განსაკუთრებულო გოშინაშ ონჯუას ქიდესწრან. იეჰოვა დო იესოცალო ჩქი ხოლო მანგარო მოხიოლნა, მუჟამსით თეცალ პიროვნებეფ ართუნა იეჰოვას, ჩქინ მოჸროფე მუმა დო ჭყიშის (მათ. 18:14).

16. ა) მუჭო შემლებნა გურშა ელვუკინათ ართიანს დო მუს მიმეხვარებნა კრებაშ შეხვალამეფშა დასწრება? ბ) მუშენ რე ჯგირ წანაშ თე დროს ქიგიფშინათ იესოშ სიტყვეფი, ნამუთ იოანეშ 3:16-ის რე მოჩამილ?

¹⁶ წოხოლენ მარეფს, მორთ მუთ შილებენ ბრელ ქუდვაპეჯათ გოშინაშ ონჯუაშა, ნამუთ 2019 წანაშ 19 აპრილს, ობიშხას ჩეტარებ (ქოძირით ჩარჩო „ ქუდაპეჯით შხვეფ“). მორთ, დევესწრათ კრებაშ შეხვალამეფს მთელ წანაშ განმავლობას დო გურშა ელვუკინათ ართიანს. ქვეყნიერებაშ განადგურება მონჭაფილ რე, ათეშენ კრებაშ შეხვალამეფიშ დასწრება მიმეხვარებნა გეგმიფრჩქინათ თანდაბლობა, გაბედულება დო ჸოროფა (1 თეს. 5:8—11). საქმეეფით ქუვოძირათ, ნამდა მთელ გურით მოკონა ვემსახურათ იეჰოვას დო თიშ სქუას თი დიდ ჸოროფაშენ, ნამდგას ჩქინწკუმა გიმირჩქინანა (წეკითხით იოანე 3:16).