1, 2. მუ სიტუაციეფს შეხვადუ იეჰოვაშ ბრელ მსახურ დო მუჭო მოქმედენს თენა თინეფწკუმა?

წერმიდგინით სუმ სიტუაცია: ახალგაზრდა ჯიმას ექიმქ საშინელ ლახალაშ დიაგნოზ ქიგუშქვჷ. ართ ჯიმაქ, ნამუთ 50 წანას რე გინოჩილათირ, სამუშა მიოდინუ დო დიდ მონდომაშ უმკუჯინუო, ვაგორ სამუშაქ. ხანშა მიშულირ ართგურ დას ვეშულებ თისხი აკეთას მსახურებას, მუსხის თეიშახ ორთუდ.

² თაქ ეჭარილ სიტუაციეფშე ართ-ართ ვარა ქუგაწუხენა-და, შილებე თქვა ხოლო უღირსო მიგორჩქუდან დუდ. თეცალ სიტუაციეფს შეულებ ხიოლ მიდაიღან, დუდ უღირსო გოგინაფუან დო შხვეფწკუმა ურთიერთობა ხოლო გილაილუან.

3. მუჭო უჯინე სატანა დო თიშ გავლენას რენან თი კათა ადამიანეფს?

³ თე ქვეყნიერება სატანა ეშმაკცალო ვაფასენს ადამიანეფიშ სიცოცხლეს. სატანა ირო თეშ ოქცუდ ხალხის, ითამ თინეფ მუთუნშო ვა ღირუდესკო. თიქ უნამუსოთ დაღორ ევა, ნამდა ღორონთის ვედემორჩილებუდ-და, თავისფალ იჸუაფუდ, ვარინ თე დროს ჯგირო უჩქუდ, ნამდა ღორონთიშ დაუმორჩილებლობა თინეფს ღურას მოუღანდჷ. სატანა ირიათო აკონტროლენდჷ თე ქვეყნიერებაშ კომერციულ, პოლიტიკურ დო რელიგიურ სისტემას. ათეშენ გასაკვირ ვა რე, ნამდა ბრელ ბიზნესმენ, პოლიტიკოს დო რელიგიურ ლიდერ ნაკლებო აფასენს ხალხის დო თინეფიშ პირად ღირსებაშ გრძნობას.

4. მუს გუვარჩიენთ თე სტატიას?

⁴ იეჰოვას ოკო გაწონასწორებულ თვალსაზრის მიღდან, ჩქინ დუდიშ გურშენ დო თინა ელამრენა, მუჟამსით თიცალ სიტუაციეფს შეფხვადუთ, ნამუთ დუდის უღირსო მოგინაფუანა (ფსალმ. 136:23; რომ. 12:3). თე სტატიას გარჩიებულ იჸუაფ,  მუჭო მოხვარნა იეჰოვა თუდო მოშინაფილ სიტუაციეფიშ დროს: 1) მუჟამსით ლახალა მაწუხენა, 2) მუჟამსით ეკონომიკურო მიჭირა დო 3) მუჟამსით ასაკწკუმა დაკავშირებულ პრობლემეფიშ გურშენ ფიფქრენთ, ნამდა იეჰოვაშ მსახურებაშო ვეგმობდირთუთ. პირველ რიგის ქობძირათ, მუშენ შემლებნა ბჯერდან, ნამდა იეჰოვა თითოულს მაფასენა.

5. მუ გარწმუნენა, ნამდა იეჰოვაშო ძვირფასეფ რეთ?

⁵ თიშ უმკუჯინუო, ნამდა დიხაშ ტვერშე ვორეთ გოჭყაფილ, დიხაშ ტვერშე ბრელით უმოს ძვირფასეფ ვორეთ (დაბ. 2:7). გუვარჩუათ ნამთინე მიზეზ, ნამუთ მარწმუნენა, ნამდა იეჰოვაშ თოლს ძვირფასეფ ვორეთ. იეჰოვაქ თეშ გუმოჭყეს, ნამდა შემალებუან მუს უღუნ თიცალ თვისებეფიშ გიმორჩქინაქ დო თეშნერო, შხვა ფიზიკურ ქმნილებეფშე უმოს მაღალას ქიგმორნეს (დაბ. 1:27). თეს გეძინელ, მთელ დედამიწა დო ცხოველეფ ჩუმაბარეს (ფსალმ. 8:4—8).

6. ხოლო მუ მარწმუნენა, ნამდა იეჰოვა აფასენს არასრულყოფილ ადამიანეფს?

⁶ იეჰოვა ადამიშ დაშებაშ უკულ ხოლო აფასენდჷ ადამიანეფს. თინა თიცალო მაფასენა, ნამდა ჩქინ ცოდეფიშ გურშენ, მუშ ხვალეგუნაჭყეფ სქუა გაწირ (1 იოან. 4:9, 10). გიშაჸიდირალიშ ჭყოლოფათ იეჰოვა გათელენს არძას, მით ადამიშ ცოდაშ შედეგო ღურ, მუჭოთ მართალეფს, თეშ მართალ ვა რენან თინეფს ხოლო (საქ. 24:15). ღორონთიშ სიტყვაშე ბგებულენთ, ნამდა ჯამრთელობაშ პრობლემეფიშ, ფინანსურ მდგომარეობაშ დო ვარ ასაკიშ მოძინაშ უმკუჯინუო ღორონთშო ძვირფასეფ ვორეთ (საქ. 10:34, 35).

7. ხოლო მუ მიზეზეფ არწმუნენს იეჰოვაშ მსახურეფს თიშა, ნამდა იეჰოვა აფასენს თინეფს?

⁷ ჩქი შხვა მიზეზეფ ხოლო მიღნა თიშ დაჯერებელო, ნამდა იეჰოვას ვუჸორთ. ღორონთიქ საშვალება ქომჩეს, დევეახლოვითკო თის დო თით ხოლო დეინტერეს, მუჭო მიფრჩქილეთ სახიოლო ამბე (იოან. 6:44). მუჟამსით იეჰოვას დევეახლოებუთ, თინა ხოლო დემეახლოვებნა (იაკ. 4:8). იეჰოვა დროს დო ძალისხმევას უთმენს ჩქინდა გურაფას დო თეთ მოძირანა, ნამდა თიშო ძვირფასეფ ვორეთ. თის უჩქჷ მუნერეფ ვორეთ ასე დო მუნერეფ შემლებნა იპჸუათ. იეჰოვას ვუჸორთ დო ათეშენ გიმოწურუანა (იგავ. 3:11, 12). თე ირფელ დასურო მარწმუნენა, ნამდა იეჰოვა მართალო მაფასენა.

8. მუჭო შეულებ ფსალმუნიშ 18:27—29-ს ინოჭარილ სიტყვეფს მიმეხვარან სწორ თვალსაზრის მიღდან ჩქინ პრობლემეფშე?

⁸ მინშა შხვეფს მეფე დავით უღირს პიროვნებათ მიორჩქუდეს, მარა თის უჩქუდ, ნამდა იეჰოვას უჸორდ თინა დო ხუჯის უკინენდ თის. თეშ რჩქინაქ დავითის მეხვარ მითვინკო მუშ მდგომარეობა დო სწორ თვალსაზრის უღუდკო (2 სამ. 16:5—7). მუჟამსით გურ მაფნა გოტახილ ვარდა დეპრესიას ვორეთ, იეჰოვას შეულებ ქიმმეხვარან, შხვანერო ქუჯინათ სიტუაციას დო გივორჯგინათ არძანერ პრობლემას (წეკითხით ფსალმუნი 18:27—29). მუჟამსით იეჰოვა ალამრენა, მუთუნს ვაცილებე ჩქინდა, ხიოლით ვემსახურათ თის (რომ. 8:31). მორთ გუვარჩუათ სუმ შხვადოშხვა სიტუაცია, მუჟამსით განსაკუთრებულო ოკო ფშუდან, ნამდა იეჰოვას ვუჸორთ დო მაფასენა.

9. მუჭო შეულებ ლახალას იმოქმედას თიშა, მუჭო ვუჯინეთ ჩქინ დუდის?

⁹ ლახალას შეულებ ქიმოქმედას ჩქინ ემოციეფშა დო თეშ მოგინაფუან დუდ, ითამ მითინს ვაგმვოდირთუთ. შილებე უხერხულს ქინვოლათ, მუჟამსით შხვეფ ჩქინ შეზღუდულ შესაძლებლობეფს ორწყენა ვარდა შხვეფს ოკო ფთხუათ მოხვარა. თიმწკუმა ხოლო მუჟამსით შხვეფს ვა უჩქნა ჩქინ ლახალაშენ, იშენით შილებე უხერხულო  ბგინაფლენდათ დუდის თიშ გურშენ, ნამდა ვეშემლებნა თიშ კეთება, მუდგას ადრე ვორთუდით. მუჭო ელამკინანა გურშა იეჰოვა თეცალ რთულ დროს?

10. მუჭოთ იგავეფიშ 12:25-ის ინოჭარ, მუ მიმეხვარებნა, მუჟამსით ლახალა მაწუხენა?

¹⁰ მუჟამსით ლახალა მაწუხენა, „გემუან სიტყვას“ შეულებ გურშა ელამკინან (წეკითხით იგავები 12:25). მუშ სიტყვას, ბიბლიას იეჰოვა გემუან სიტყვეფით გუმოშინანა, ნამდა ლახალაშ უმკუჯინუო თიშ თოლს ძვირფასეფ ვორეთ (ფსალმ. 31:19; 41:3).ღორონთიშ სიტყვას ქობკითხულენთ-და, გავურზუთ უარყოფით ემოციეფს, ნამუთ ჩქინ ლახალას მოჸუნს.

11. მუჭო იგინ ართ ჯიმაქ იეჰოვაშ მოხვარა?

¹¹ გუვარჩუათ ართ ახალგაზრდა ჯიმაშ, ხორხეშ მაგალით. თის თიცალ სერიოზულ ლახალაქ ქაღოლ, ნამუთ უცფას ივითარებუდ დო ათეშენ დუდის უღირსო გინაფლენდჷ. ხორხე იჩიებ: „შურო ვა ვორდჷ თი ფიზიკურ დო ემოციურ ჭუაშო მზათ, მუდგაქ ჩქიმ ლახალაშ გურშენ მაშუ დო ვართ თი უხერხულობაშო, ნამდგას თიმწკუმა ბგინაფლენდჷ, მუჟამსით ხალხ მა მიჯინედ. ჩქიმ ჯამრთელობა იუფრაშებუდ დო ფიფქრენდჷ, მუჭო ითირუდ ჩქიმ ცხოვრება. დუდის განადგურებულო ბგინაფლენდჷ დო იეჰოვას მოხვარას ფთხულენდჷ“. მუჭო მეხვარ იეჰოვაქ თის? ხორხე აგრძელენს: „კონცენტრირება მიჭირდჷ, ათეშენ ელამჩეს, ჭიჭე მონაკვეთეფ წამკითხირუდკო ფსალმუნეფშე, სოვრეშეთ იძირე, მუჭო ზრუნენს იეჰოვა მუშ მსახურეფშე. თე მუხლეფს ირდღას ბკითხულენქ, მუთ გურშა ელამკინანს. დრო-ხანიშ უკულ, შხვეფქ ქოძირეს, ნამდა უმოს ხშირას იბძიცანდჷ. თინა ხოლო ქომწის, ნამდა ჩქიმ ჯგირ განწყობა შხვეფს გურშა ელუკინანდჷ. ქიმეფხვად, ნამდა იეჰოვაქ ქუპასუხ ჩქიმ ლოცვეფს! თიქ მიმეხვარ, ჩქიმ დუდშა შხვა თოლით ქინომჯინუდკო. ქიდიბჭყჷ თი ბიბლიურ მონაკვეთეფშე ფიქრ,  სოვრეშეთ იძირე, მუს ფიქრენს იეჰოვა ჩქიმ გურშენ, ჩქიმ ლახალაშ უმკუჯინუო“.

12. მუჟამსით ლახალას ობრძოლუთ, მუ შეილებნა აკეთათ, ნამდა იეჰოვაქ ქიმგეხვარან?

¹² ლახალას ქაბრძოლუთ-და, რჯერდან, იეჰოვას უჩქჷ, მუ სირთულეეფშა გაფნა გარზებელ. ქოთხით თის ქიმგეხვარან, სრულაშე შეაფასათ თქვან სიტუაცია. თეშ უკულ, დოგორით თი გურიშემაკინალ ბიბლიურ მონაკვეთეფ, ნამუთ იეჰოვაქ მუშ სიტყვას, ბიბლიას კინოიჩუეს. ქიფიქრით თი მუხლეფშე, სოვრეშეთ იძირე, მუ მანგარო აფასენს იეჰოვა მუშ მსახურეფს. თეს გაკეთენთ-და, ქოძირუნთ, ნამდა იეჰოვა სიჯგირას გიმირჩქინანს თინეფწკუმა, მით თის ართგურო ომსახურ (ფსალმ. 84:11).

13. მუჭო შილებე სამუშაშ დინაფაქ იმოქმედას ოჯახიშ დუდწკუმა?

¹³ არძა ოჯახიშ დუდის ოკო, ნამდა მუშ ოჯახის მუთუნ ვარკუდას, მუთ აუცილებერ რე არსებობაშო. მარა წერმიდგინით, ნამდა ჯიმაქ, მუთუნ ბრალს ვა რდუნ თეშ, სამუშა მიოდინუ. თინა ოცად შხვა სამუშა დოგორას, მარა დიო მუთუნქ ვაშუ. თე დროს, თიქ შილებე დუდ უღირსო იგინას. მუჭო მეხვარებ თის იეჰოვაშ დუნაპირებუეფშე დაფიქრება?

14. მუ მიზეზეფიშ გურშენ ასრულენს იეჰოვა მუშ დუნაპირებუეფს?

¹⁴ იეჰოვა ირიათო ასრულენს მუშ დუნაპირებუეფს (იეს. 21:45; 23:14). თინა თაშ მუსხირენ მიზეზიშ გურშენ იქციებ. პირველ მიზეზ თინა რე, ნამდა თენა მუშ სახელშა მოქმედენს. იეჰოვაქ პირობა დოდვჷ, ნამდა მუშ ართგურ მსახურეფშე იზრუნენს დო თინა დუდის ვალდებულო თვალუნს შეასრულას მუშ პირობა (ფსალმ. 31:1—3). თეს გეძინელ, იეჰოვას უჩქჷ, ნამდა ჩქინდე, მით თიშ ოჯახიშ წევრეფ ვორეთ, ვეზრუნ-და, დუდის განადგურებულო იბგინანთ. თინა პირობას მარზენა, ნამდა ქიზრუნენს, მუჭოთ სულიერო თეშ მატერიალურო ხოლო დო თეშ კეთებას  თის მუთუნ ვეცილებ! (მათ. 6:30—33; 24:45).

15. ა) მუ პრობლემაშ წოხლე გერდეს პირველ საუკუნეშ ქრისტიანეფ? ბ) მუშა მარწმუნენა ფსალმუნიშ 37:18 დო 19?

¹⁵ თიშ რჩქინა, მუშენ ასრულენს იეჰოვა მუშ დუნაპირებუეფს, მიმეხვარებნა გაურზათ ეკონომიკურ გაჭირებას. გუვარჩუათ პირველ საუკუნეშ ქრისტიანეფიშ მაგალით. მუჟამსით იერუსალიმიშ კრებაშ წინააღმდეგ მანგარ თხოზინქ ქიდიჭყ, „მოციქულეფიშ მეტიქ არძაქ . . . ეკოცუ“ (საქ. 8:1). დეფიქრით, თენა თინეფშო ეკონომიკურ გაჭირებას ნიშნენდჷ. სავარაუდოთ, ქრისტიანეფქ მიოდინეს მუნეფიშ ჸუდეეფ დო სამუშა. მარა იეჰოვას ვემუტებ თინეფ დო ვართ ხიოლ უდინუაფნა (საქ. 8:4; ებრ. 13:5, 6; იაკ. 1:2, 3). იეჰოვა ოხვარუდ მუშ ართგურ მსახურეფს დო თინა ჩქი ხოლო ქიმმეხვარებნა (წეკითხით ფსალმუნი 37:18, 19).

16. მუშენ შილებე იფიფქრათ, ნამდა იეჰოვა ვაფასენს ჩქინ მსახურებას?

¹⁶ მუჟამსით ხანშა მიშურთ, შილებე იფიფქრათ, ნამდა იეჰოვაშო ბრელიშ კეთება ვეშემლებნა. მეფე დავით ხოლო შილებე თაშ გინაფლენდჷ დუდის, მუჟამსით თიქ ხანშა მიშელ (ფსალმ. 71:9). მუჭო შეულებ იეჰოვას ჩქინ მოხვარა?

17. მუშ გურაფა შემლებნა ჯერიშ მაგალითშე?

¹⁷ გუვარჩუათ ართ დაშ, ჯერიშ მაგალით. თინა მიწვიეს ტრენინგშა სამეფო დარბაზის, სოდეთ დაგურუანდეს, მუჭო მიკაჯინესკო იეჰოვაშ თაყვანიშცემაშო განკუთვნილ შენობეფს, მარა თის ვაკოდ თექ ულა. ჯერიქ თქუ: „მა მოხუცებულ ვორექ დო ქომონჯ ხოლო ღურელ მაფჷ, თეს გეძინელ, ვა მიჩქ მუთუნ, მუთ სარემონტო სამუშაშ შესრულებას მიმეხვარებ. ჩქიმდე მუთუნ ვეგშურს“. ტრენინგიშ წოხლენ სერს თიქ ლოცვას გურ გეგნუფაჩ იეჰოვას. მაჟია დღას, მუჟამსით  სამეფო დარბაზშა ქიმერთჷ, დიო ხოლო ოეჭვუდ ქორდჷ დო ვარ თექ მუშ ადგილ. პროგრამაშ დროს, ართ მომხსენებელქ ხაზ გუსვჷ თის, ნამდა არძაშ უმოს მნიშვნელოვან უნარ რე ჩქინ მზადყოფნა, ქიდიბგურუათ იეჰოვაშე. ჯერი იჩიებ: „ფიფქრენდჷ, ნამდა თე უნარ მიღუდ! მუჟამსით ქიმეფხვად, მუჭო უპასუხ იეჰოვაქ ჩქიმ ლოცვას, ნგარაქ გემიოლ. თიქ დუმარწმუნ, ნამდა შემლებუდ თიშო ძვირფას საქმე ვაკეთკო დო იეჰოვა ხოლო მზათ რდუ ქუდმოგურუკო!“. ჯერი იშინანს: „თე ტრენინგშა მევურდინ, მნერვიანენდჷ, გურგოტახილ ვორდჷ დო უღირსობაშ გრძნობა მიღუდ. მარა თევრეშე გეგმოფრთინ, ჩქიმ დუდშა დარწმუნებულ დო გურშა ელაკინელ ვორდჷ. თეს გეძინელ, ქიბგინ, ნამდა იეჰოვას გიმვოდირთუდ!“.

18. მუჭო ვორწყეთ ბიბლიაშე, ნამდა ხანშა მიშულაშ უმკუჯინუო, იეჰოვა აფასენს ჩქინ მსახურებას?

¹⁸ შემლებნა დარწმუნებულ ვორდათ, ნამდა ხანშა მიშულაშ უმკუჯინუო იეჰოვას იშენით შეულებ მუშ საქმე გუმოკეთებაფუან (ფსალმ. 92:12—15). იესოქ დუმოგურეს, ნამდა ვა უღჷ მნიშვნელობა ბრელიშ კეთება შემლებნა დო ვარ ჭიჭეშ, იეჰოვა მანგარო აფასენს, მუჟამსით თიშ მსახურებას მუთ შემლებნან ირფელს ვორთუთ (ლუკ. 21:2—4). თაშ ნამდა, ყურადღება თიშა გეგნიღით, მუდგაშ კეთება შეილებნა. მაგალთო, შეილებნა შხვეფს იეჰოვაშ გურშენ ეჩუათ, და დო ჯიმალეფშო ილოცათ დო გურშა ელუკინათ შხვეფს, ნამდა ართგურეფ ქუდოსქიდან. იეჰოვას მუშ თანამშრომელო თიშენ მიორჩქუთ, ნამდა მზათ რეთ დემორჩილათ თის დო ვართ ხოლო თიშენ, ნამდა მუდგარენიშ კეთებაშ უნარ გიღნა (1 კორ. 3:5—9).

19. მუშა მარწმუნენა რომაელეფიშ 8:38 დო 39 მუხლეფ?

¹⁹ მანგარ მარდულეფ ვორეთ, მუშენდა თაყვანს ფცენთ იეჰოვას, ნამუთ აფასენს მუშ მსახურეფს! იეჰოვაქ თეშ შეფქმნეს, ნამდა შევასრულათ თიშ ნება დო თეს ჩქინდა დიდ კმაყოფილება მოუღ, მუშენდა აზრიან ცხოვრება მიღნა (გამოცხ. 4:11). თე ქვეყნიერებას შილებე უღირსეფო მივორჩქუდათ, მარა იეჰოვა გვალო შხვანერო ფიქრენს (ებრ. 11:16, 38). მუჟამსით გურგოტახილეფ ვორეთ ლახალაშ, ეკონომიკურ გაჭირებაშ ვარდა ხანშა მიშულაშ გურშენ, ირიათო ფშუდან, ნამდა მუთუნს ვეშულებ გენკმოჸოთან იეჰოვაშ, ჩქინ ზეციერ მუმაშ ჸოროფას (წეკითხით რომაელები 8:38, 39).