1. მუშა შილებე კანკალეშა მოშქურუდან?

 ᲭᲔᲨᲛᲐᲠᲘᲢᲔᲑᲐᲨ გაგებაქ გუმათავისფალეს ღურელეფიშ, დემონეფიშ დო თიშ შიშშე, მუ მოხვადუ მომავალს. მარა კანკალეშა არძას მირჩქინდუნა შიშიშ გრძნობა, მუშენდა თიცალ დროს ბცხოვრენთ, სოდეთ ხშირ რე თიცალ ოშქურანჯ მუდგარენეფ, მუნერით რე ომ, დამნაშავეობა დო ლახალეფ (ლუკ. 21:11). თეს გეძინელ, შილებე მინშა კოჩიშ შიშიქ გებჭოფან დო მაშქურინან თი კათაშა, მით რწმენაშ გურშენ მოწინააღმდეგუნა. მაგალთო, სახელმწიფო მოხელეეფშა ვარდა ოჯახიშ წევრეფშა ხოლო. ნამთინე თიშე წუხენს, ნამდა ვა გარზინე ამდღარ ვარდა მომავალ სირთულეეფშა.

2. გეჭარით, მუ სიტუაცია უღუდ დავითის ქალაქ გათის.

² ართ დროს დავითის ხოლო მანგარო აშქურინ. მუჭოთ მიჩქუნა, თის მეფე საულ ოჸვილარო მოთხოზუდ. ათეშენ დავითიქ გინოჭყვიდ, თიშე დუდიშ დარსხებელო, ფილისტიმელეფიშ ქალაქ გათშა ინტუკო. გათიშ მეფეს, აქიშის, მსახურეფქ ხეთე ქუგაგებაფუეს, ნამდა დავით რდჷ თი ძალიერ მეომარ, მიდგაშ გურშენ ისრაელეფქ იბირეს, ვით ანთას ფილისტიმელ ჸვილუა. თე ამბექ დავითიშ ჸუჯშა ქიმერთუნ, „მანგარო აშქურინ“ (1 სამ. 21:​10—12). თის სვანჯ მეუდინუ თიშე ფიქრიქ, მუს ღოლანდჷ მეფე აქიშ. მორთჷ ასე გუვარჩუათ, მუქ მეხვარ მეფე დავითის, გიორჯგინუკო შიშის.

3. ფსალმუნიშ 56:​1—3, 11-იშ თანახმას, მუჭო შეიალებუ დავითის, გიორჯგინუკო შიშის?

³ 56-ა ფსალმუნს დავით იჩიებ მუშ გრძნობეფიშ გურშენ, ნამუთ გათის რინაშ დროს უღუდ. თე ფსალმუნს თინა ეჭარუნს, მუშა ოშქურუდ, მარა თის ხოლო მოგებაფუანა, მუქ მეხვარ, გიორჯგინუკო შიშის. მუჭოთ თევრეშე ბგებულენთ, მუჟამსით დავითის ოშქურუდ, იეჰოვაშა რდჷ მენდებულ (წეკითხით ფსალმუნიშ 56:1—3, 11). დავით ტყურათ ვანდუდ იეჰოვას, თის თეშო ქიანაშ მიზეზ უღუდ. იეჰოვაშ მოხვარათ დავითიქ ჭიჭე უცნაურ, მარა ჯგირ გეგმა ქუდარსხუ. თიქ მეფე აქიშის დუდ ხანგათ ქუმაძირუ. დავითიშ მოქმედებეფქ  აქიშ თეშ გაღიზიან, ნამდა თიშ ჸვილუა ვარ, თოლშა მოძირაფა ხოლო ვაკოდ. თეცალ გეგმაშ ჭყოლოფათ დავითის შეიალებუ გათშე ნტებაქ დო დუდიშ დარსხებაქ (1 სამ. 21:​13—22:1).

4. მუ მიმეხვარებუნა იეჰოვაშ მიმართ ნდობაშ გამანგარებას? ქიმიჸუნით მაგალით.

⁴ იეჰოვაშა მენდებათ ჩქი ხოლო შემალებენა გივორჯგინათ შიშის დო ვორდათ მშვიდას. მარა შილებე თეცალ კითხვაქ გორჩქინდას: მუჭო გუვამანგარა იეჰოვაშ მიმართ ნდობა, მუჟამსით მანგარ შქურნაფილ ვორექ? თე კითხვაშე პასუხიშ მიოღებელო, ქიმიპჸუნათ თეცალ სიტუაცია: წერმიდგინით, ართ დღას ქიგეგით, ნამდა სერიოზულ ლახალა გიღუნა. მუშო ოკო რაგად, დუდშე შილებე მანგარო დოშქურდათ, მარა, მუჟამსით ექიმს ქუდურაგადუანთ დო თის ქიმიენდებუთ, სიმშვიდეს ქიგინანთ დო შიშ ხოლო მედინუ. შილებე თი ექიმს, მიდგაწკუმა მკურნალენთ, ბრელ პაციენტ დუსქილიდუაფ თქვა გიღუნან თიცალ ლახალაშე. ხვალე თენა ვარინ, ყურადღებათ გირჩქილენა დო გარწმუნენა, ნამდა ინანჭუ, მუს გინაფლენთ დო უკულ მკურნალობაშ თიცალ მეთოდის ელაიჩანა, ნამდგაქ შხვეფწკუმა ჯგირ შედეგეფ მიღჷ. თეშნერო, თიშე დაფიქრებათ, მუ აკეთ იეჰოვაქ ჩქინო, მუს ორთჷ ამდღა დო მუს გაკეთენს მომავალს, თიშ მიმართ ნდობას იმამნგარენთ. ზუსტას თეს ორთუდ დავით ხოლო. თე სტატიას გუვარჩიენთ მუსხირენ მუხლის 56-ა ფსალმუნშე, ნამუთ დავითიქ ღორონთიშ შთაგონებათ ჭარჷ. თინეფიშ გარჩიებაშ დროს დეფიქრით, თქვა მუ მიგეხვარებუნა, გემანგარათ იეჰოვაშ მიმართ ნდობა დო გიორჯგინათ შიშის.

ᲛᲣ ᲐᲙᲔᲗ ᲘᲔᲰᲝᲕᲐᲥ?

5. მუშე ფიქრენდჷ დავით, მუჟამსით შქურნაფილ რდჷ? (ფსალმ. 56:​12, 13).

⁵ თიშ უმკუჯინუო, ნამდა დავითიშ სიცოცხლე დიო ხოლო საფრთხეშ თუდო რდჷ, თის მთელ ყურადღება თიშა აფუდ გინოღალირ, მუ აფუდ იეჰოვას კეთებულ (წეკითხით ფსალმუნიშ 56:​12, 13). დავით მთელ ცხოვრებას ხშირას გიმურთუნდჷ დროს იეჰოვაშ საქმეეფშე ფიქრის. მაგალთო, მინშა თინა ფიქრენდჷ იეჰოვაშ გუნაჭყეფუეფშე, მუთ გაშინანდჷ, მუსხით ძალიერ რე ღორონთ დო მუჭო უჸორს ადამიანეფ (ფსალმ. 65:​6—9). თეს გეძინელ, დავით თიშე ფიქრის ხოლო გიმურთუნდჷ დროს, მუ აფუდ იეჰოვას კეთებულ შხვეფშო (ფსალმ. 31:19; 37:​25, 26). დავით განსაკუთრებულო თიშე ფიქრენდჷ, მუ აფუდ იეჰოვას კეთებულ პირადო თიშო. იეჰოვა ირიათო ელურდჷ დო თხილანდჷ თის დაბადებაშე მოჸუნაფილ (ფსალმ. 22:​9, 10). წერმიდგინით, მუჭო გუმანგარენდჷ დავითის თე ირფელშე ფიქრ იეჰოვაშ მიმართ ნდობას.

6. მუ მიმეხვარებნა, მივენდათ იეჰოვას, მუჟამსით შქურნაფილ ვორეთ?

 ⁶ მუჟამსით მუდგაინშა გოშქურუნა დო თენა სვანჯის გიდინუანა, ქოკითხით თქვან დუდის: მუ აფჷ იეჰოვას კეთებულ? დეფიქრით თიშ გუნაჭყეფუეფშე. მაგალთო, მუჟამსით ვოკვირუთ, მუჭო ზრუნენს იეჰოვა მუშ გოჭყაფილ ჩიტეფშე დო ყვავილეფშე, ნამუთ მუშ ამნახანტო დო თიშო ვა გუჭყაფ, ნამდა ემსახურან თის, უმოსო ბჯერა, ნამდა იეჰოვა ჩქინდე ხოლო იზრუნენს (მათ. 6:​25—32). დეფიქრით თიშე ხოლო, მუ აკეთ იეჰოვაქ მუშ მსახურეფშო. მაგალთო, შეილებუნა გეგმირკუათ ნამდგაინ ბიბლიურ პერსონაჟიშ შემთხვევა, მიდგას იეჰოვაშ მიმართ ძალიერ რწმენა უღუდ ვარდა შეილებუნა წეკითხათ თანამედროვე დროს მახორუ იეჰოვაშ ართგურ მსახურიშ შემთხვევა. a თიშე ფიქრის ხოლო გეგმურთით დრო, მუ აკეთ იეჰოვაქ თქვანო ულირს. მაგალთო, დეფიქრით, მუჭო მიგეხვარეს, დეახლოვითკო თის დო გეგითკო ჭეშმარიტება (იოან. 6:44). ქიგიშინით, მუჭო უპასუხ თქვან ლოცვეფს (1 იოან. 5:14). თიშე ხოლო დეფიქრით, მუ ჯგირობუა მოუღ თქვანო ირდღას იეჰოვაშ საჸოროფო სქუაშ კეთებულ მსხვერპლის (ეფეს. 1:7; ებრ. 4:​14—16).

7. მუჭო მეხვარ წინასწარმეტყველ დანიელიშ მაგალითიქ ვანესას, გიორჯგინუკო შიშის?

⁷ გუვარჩუათ ჰაიტის მახორუ ართ დაშ, ვანესაშ, b შემთხვევა, მიდგაქ ოშქურანჯ სიტუაციას ქუმოხვად. თის ართ მუშ ნაჩინებ კოჩ ვათხუდ დო სექსუალურ ურთიერთობას ანძალენდჷ, მუდგაშ გურშენ ირდღას ურეკუნდჷ დო ჭარუნდჷ. ვანესაქ თი კოჩის კატეგორიულო უწუ, ნამდა ვაკეთენდჷ თეს, მარა ვანესაშ თეცალ პასუხიქ თი კოჩ ხოლო უმოსო გარისხჷ დო დარცქინ თის. ვანესა იჩიებ, ნამდა მანგარო აშქურინ. მუქ მეხვარ თის, გიორჯგინუკო შიშის? დუდიშ დაცვებელო თიქ პრაქტიკულ ნაბიჯეფ გინოდგჷ. მაგალთო, მოხვარა ქოთხუ უხუცესის, მიდგაქ ელუჩ, თე ამბე პოლიციას ქუგაგებაფუკო. თეს გეძინელ, ვანესაქ დეფიქრჷ, მუჭო თხილანდჷ იეჰოვა მუშ მსახურეფს ულირს. თინა იჩიებ: „პირველქ, მიდგაქ გუმაშინ, რდჷ წინასწარმეტყველ დანიელ. თიშ უმკუჯინუო, ნამდა მუთუნ ვა აფუდ დაშებულ დო მუთუნნერ ბრალ ვა უღუდ, ნტერეფქ შქირენიშ განწარებულ ლომეფწკუმა ქინაჸათეს. მარა იეჰოვას ვემუტებ თინა დო დერსხჷ ლომეფშე. იეჰოვას ფთხი, მა ხოლო დამირსხუკო თი კოჩიშ ხეშე დო მიმეხვარუკო, თე სირთულეშ ჩათხინაფას. თე ირფელიშ უკულ მეტო ვა მოშქურუდ დო მშვიდას ვორდჷ“ (დან. 6:​12—22).

ᲛᲣᲡ ᲝᲠᲗᲷ ᲘᲔᲰᲝᲕᲐ ᲐᲛᲓᲦᲐ?

8. მუშა რდჷ დავით დარწმუნებულ? (ფსალმ. 56:8).

⁸ მართალ რე, დავითიშ სიცოცხლე ქალაქ გათის საფრთხეშ თუდო რდჷ, მარა შიშის ვეჸუნაფ დო თიშე ფიქრენდჷ, მუს ორთუდ იეჰოვა თიშო თი დროს. დავით გინაფლენდჷ, ნამდა იეჰოვა ხემძღვანელენდჷ თის, თხილანდჷ დო არჩქილედ თიშ გრძნობეფ (წეკითხით ფსალმუნიშ 56:8). თეს გეძინელ, დავითის იეჰოვაშ ჭყოლოფათ ჸუნდჷ ართგურ მეგობრეფ — იონათან დო მღვდელმთავარ ახიმელექ, მით ირიათო ელურდეს დო ოხვარუდეს თის (1 სამ. 20:​41, 42; 21:​6, 8, 9). ხვალე თენა ვარინ, იეჰოვაშ მოხვარათ დავითის შეიალებუ, დუდ დერსხუკო მეფე საულშე, მით ოჸვილარო მოთხოზუდ. დავით დარწმუნებულ რდჷ, ნამდა იეჰოვას ჯგირო უჩქუდ, მუ განსაცდელიშ წოხოლე გერდჷ დო მუჭო მოქმედენდჷ თე ირფელ თიშ გრძნობეფშა.

9. მუს ორწყე იეჰოვა, მუჟამსით სირთულეეფ მიღუნა?

⁹ მუჟამსით განსაცდელიშ ვარდა სირთულეშ გურშენ შქურნაფილ რეთ, რშუდან, ნამდა იეჰოვა ორწყე თქვან სირთულეს დო თის ხოლო, მუჭო მოქმედენს თინა თქვან გრძნობეფშა. მაგალთო, მუჟამსით ისრაელეფ ეგვიპტეს მონეფ რდეს, იეჰოვას ხვალე თინა ვა უძირ, მუჭო ოქცუდეს ეგვიპტელეფ მუშ ხალხის, თინა ხოლო ქოძირ, მუ ჭუას გინაფლენდეს თინეფ (გამ. 3:7). ართ-ართ ფსალმუნს დავით მუშ ობირეშის მიშინუანს, ნამდა იეჰოვაქ ქოძირ, მუ უჭირდჷ დო მუ ვარზენდჷ სვანჯის (ფსალმ. 31:7). ხვალე თენა ვარინ, იეჰოვას მანგარო უჭუანდჷ გურს მუშ ხალხიშ  ტანჯებაშ ძირაფა, თიმწკუმა ხოლო, მუჟამსით თენა მუნეფიშ უგუნურ გადაწყვეტილებეფიშ შედეგ რდჷ (ეს. 63:9). თაშ ნამდა, რშუდან, მუჟამსით მუდგარენშა გოშქურუნა, იეჰოვას არჩქილე, მუს გინაფლენთ დო მზათ რე, ირნერო მიგეხვარან, გიორჯგინათ შიშის.

10. მუ გარწმუნენა, ნამდა იეჰოვა ზრუნენს თქვანდე დო მიგეხვარებუნა სირთულეეფიშ გარზებას?

¹⁰ ასე განსაცდელიშ წოხოლე ქიგერეთ დო თეშ გურშენ შქურნაფილ ქორეთ-და, შილებე გაიჭირდან თიშ ძირაფაქ, მუჭო ელაირენა დო გოხვარუნა იეჰოვა. თეცალ დროს შეილებუნა იეჰოვას ქოთხუათ, ქიმგეხვარან, ნამდა ქოძირათ თიშ ხე თქვან ცხოვრებას (2 მეფ. 6:​15—17). უკულ დეფიქრით: კრებაშ შეხვალამას თიცალ კომენტარ ვარდა მოხსენება ხომ ვა მოირჩქილუაფუნა, ნამდგაქ გუგამანგარეს? ნამდგაინ პუბლიკაციაქ, ვიდეოქ ვარდა მაუწყებლობაშ ობირეშიქ ხომ ველაიკინეს გურშა? მიდგაინქ თიცალ აზრ ვარდა ბიბლიურ მუხლ ხომ ვაიწუეს, ნამდგაქ გურს მოიჰამუეს? გვალო ადვილო შილებე გუმოჭყორდან, მუშმადიდა ჸოროფას დო მოხვარას ბღებულენთ მუჭოთ და დო ჯიმალეფშე, თეშ ღორონთიშ სიტყვაშე. ვარინ თე ირფელ იეჰოვაშ ჸოროფათ კეთებულ ძღვინ რე (ეს. 65:13; მარ. 10:​29, 30). თე ირფელ ამტკიცენს, ნამდა იეჰოვა ზრუნენს ჩქინდე დო დასურო იმსახურენს ჩქინ ნდობას (ეს. 49:​14—16).

11. მუქ მეხვარ აიდას, გიორჯგინუკო შიშის?

¹¹ სენეგალს მახორუ ართ დაქ, აიდაქ, მუშ დუდშა გეგმოცად იეჰოვაშ ელარნა განსაცდელიშ დროს. რახანს თინა უნჩაშ სქუა რდჷ, მშობლეფ ელუდეს, ნამდა ფინანსურო ქიმკაჯინედ მუჭოთ მუშ დუდის, თეშ თინეფს ხოლო. მარა თიშ უკულ, მუთ აიდაქ პიონერობა დიჭყჷ დო ცხოვრება გემარტივ, ეკონომიკურ პრობლემეფქ ქაშუ. თეშ გურშენ აიდაშ ოჯახიშ წევრეფ მანგარ გურმულირეფ რდეს დო აკრიტიკენდეს თის. თინა იჩიებ: „მოშქურუდ, ქეშმალებედუო მშობლეფიშ მიკოჯინა დო თიშ შიშ ხოლო მიღუდ, ნამდა შხვეფ ჩქიმდე გლახას ქოთქუანდეს დო გუმაკრიტიკენდეს. თი დონეშა ქიმეფრთჷ, იეჰოვას ვაბრალუაფუდ, ირფელქ თაშ გეუფრაშუნ“. ართ დღას აიდაქ კრებას მოხსენება ქიმირჩქილუ. თინა აგრძელენს: „მომხსენებელქ გუმოშინეს, ნამდა იეჰოვას ჯგირო უჩქჷ, მუ ხვადუ ჩქინ გურს დო მუშე ბწუხენთ. უხუცესეფშე დო თანაქრისტიანეფშე მეღებულ რჩევეფქ დუმარწმუნ იეჰოვაშ ჸოროფაშა. თე ირფელიშ უკულ, მუჟამსით ბლოცულენდჷ, უმოსო ვონდუდ იეჰოვას დო ბგინაფლენდჷ შინაგან სიმშვიდეს, მუშენდა ვორწყედ, მუჭო პასუხენდჷ იეჰოვა ჩქიმ ოთხუალს“. ჭიჭე ხანშა აიდაქ სამუშა ქიშუ დო ნამუშერ ფარათ ხვალე პიონერო მსახურებაქ ვარინ, შეიალებუ ფინანსურო ელუდირთუკო მშობლეფს დო  შხვეფს ხოლო. აიდა იჩიებ: „იეჰოვაშა ბოლოშა მენდება ქიდიბგურე დო ასე, მუჟამსით ბლოცულენქ, ჩქიმ შიშ დინუ“.

ᲛᲣᲡ ᲒᲐᲙᲔᲗᲔᲜᲡ ᲘᲔᲰᲝᲕᲐ ᲛᲝᲛᲐᲕᲐᲚᲡ?

12. მუჭოთ ფსალმუნიშ 56:9-შე იძირე, მუშა რდჷ დავით დარწმუნებულ?

¹² წეკითხით ფსალმუნიშ 56:9. თე მუხლის ეჭარილ რე ხოლო ართ საშვალება, მუდგაშ ჭყოლოფათ დავითიქ გიორჯგინ შიშის. თიშ უმკუჯინუო, ნამდა თიშ სიცოცხლე დიო ხოლო საფრთხეშ თუდო რდჷ, დავით თიშე ფიქრენდჷ, მუს გაკეთენდჷ იეჰოვა თიშო. დავითის უჩქუდ, ნამდა ღორონთ დერსხენდჷ თის საჭირო დროს. ხვალე თენა ვარინ, იეჰოვას დავითშა გაცხადებულ აფუდ, ნამდა თინა იჸუაფუდ ისრაელიშ უკულიან მეფე (1 სამ. 16:​1, 13). ღორონთიქ შეასრულ ირფელ, მუდგას დავითის დეპირ.

13. მუშა შემლებუნა ვორდათ დარწმუნებულ?

¹³ მუს დეგეპირეს იეჰოვაქ პირადო თქვა? მუშო ოკო რაგად, ვეველუთ, ნამდა ღორონთ ამდღა არძა პრობლემაშე მირსხენა. c მარა რშუდან, ამდღა მუდგა სირთულეს დო განსაცდელს ვა ხვადუდათინ, შეილებუნა დარწმუნებულ რდათ, ნამდა ღორონთ ახალ ქვეყნიერებას აუცილებერო ჩაითხინუანა თინეფს (ეს. 25:​7—9). ჩქინ გუმაჭყაფალს უღჷ თიშ ძალა, ნამდა გათელას ღურელეფ, დუმოსქილიდუან ლახალაშე დო მირსხან მოწინააღმდეგეეფიშ ხეშე (1 იოან. 4:4).

14. მუშე შემლებუნა იფიფქრათ?

¹⁴ მუჟამსით სირთულეეფიშ დროს შქურნაფილ რეთ, დეფიქრით თი ირფელშე, მუდგას იეჰოვა მომავალს გაკეთენს. წერმიდგინით, მუჭო იგინანთ დუდის, მუჟამსით სატანა მისპუ, უბადო კათაშ მანგიორო დედამიწას მართალ ადამიანეფ იცხოვრენა დო ირდღას ჭიე-ჭიეთ გეფთავისფალებუთ არასრულყოფილებაშე. 2014 წანაშ რეგიონულ კონგრესიშ ართ-ართ ინსცენირებას ძირაფილ რდჷ, მუჭო შემლებუნა იფიფქრათ ჩქინ დიდებულ იმენდშე. თე ინსცენირებას მუმაქ მუშ ოჯახიშ წევრეფს ყურადღება გუმახვილ 2 ტიმოთეშ 3:​1—5-შა დო ქაძირუ, მუ შხვანერ იჸუაფუდ თე მუხლეფ, თექ ინოჭარილ სიტყვეფ სამოთხეშე ქორდუკო ნაწინასწარმეტყველებინ. მუმაქ თე მუხლეფ თაშ წეკითხ: „გიჩქუდას, ნამდა ახალ ქვეყნიერებას მანგარ ბედნერ დრო ქუდოდირთუ. ადამიანეფ იჸუაფუნა შხვეფიშ მოჸოროფეეფ, ჭეშმარიტებაშ მოჸოროფეეფ, მოკრძალებურეფ, თანდაბალეფ, ღორონთიშ მადიდებელეფ, მშობლეფიშ მორჩილეფ, მარდულეფ, ართგურეფ, კეთილეფ, დუგაჸუნუნან ფერეფ, შხვეფიშ გურშენ ჯგირიშ მორაგადეეფ, დუდშეკება ვა უჭირან ფერეფ, ლიბ ხასიათ უღნან ფერეფ, ჯგირიშ მოჸოროფეეფ, სანდოეფ, დათმობაშა მეულან ფერეფ, დუდშე დიდ წარმოდგენა ვა უღუნან ფერეფ, სიამოვნებაშ მანგიორო ღორონთიშ მოჸოროფეეფ, ღორონთიშ შიშით მოქმედენან ფერეფ. თეცალეფწკუმა ხოლოს რდა“. ოჯახიშ წევრეფ დოვარ თანაქრისტიანეფწკუმა ქიჩიებუთო, მუნერო გაფუნა წარმოდგენილ ცხოვრება ახალ ქვეყნიერებას?

15. მუქ მეხვარ ტანიას, გიორჯგინუკო შიშის?

¹⁵ გუვარჩუათ ჩრდილოეთ მაკედონიას მახორუ ართ დაშ, ტანიაშ, შემთხვევა, მიდგას შიშიშ გერჯგინას მომავალ კურთხევეფშე ფიქრიქ მეხვარ. მუჟამსით თიქ ბიბლიაშ გურაფა დიჭყჷ, მშობლეფ მანგარო ოწინააღმდეგუდეს. თინა იშინანს: „ნამთინე მუდგარენქ, მუდგაშათ მოშქურუდ, მართალო ქუმოხვად. მშობლეფ მორცქინანდეს, ნამდა იეჰოვაშ მოწმეთ გინიფრთუდ-და, დოპჸილუნდეს დო დიაჩქიმ ირ ბიბლიაშ გურაფაშ უკულ ბლახუნდჷ“. საბოლათ, მშობლეფქ თინა ჸუდეშე გეგნაჸათეს. მუ აკეთ თიქ? ტანია იჩიებ: „ყურადღება თიშა გეგნიბღჷ, მუშმადიდა ბედნერობას მომღანდ მთელ მარადიულობას თინა, ნამდა იეჰოვაშ ართგურქ ქუდოფსქიდ. თიშე ხოლო ფიფქრენდჷ, ნამდა ახალ ქვეყნიერებას ირფელ გლახა ულირს ქაჸუნუდ დო იეჰოვა დუმაჯილდოვენდჷ თი ირფელიშ გურშენ, მუდგაშეთ თე ქვეყნიერებას ვარიას ფთქუანდჷ“. წინააღმდეგობაშ უმკუჯინუო, ტანიას ოჭიშ ვა ურთინუაფ იეჰოვაშა, თიშ ართგურქ ქუდოსქიდ დო იეჰოვაშ მოხვარათ დუდიშ გითაფორაფალქ ხოლო ქაშუ. ამდღა ტანიას ღორონთიშ ართგურ მეუღლე ჸუნსჷ დო თინეფ სრულ დროთ ომსახურუნა იეჰოვას, მუდგას ხიოლ დო ბედნერობა მოუღ ჟირხოლოშა.

 ᲐმᲓᲦᲐᲠᲨᲔ ᲒᲔᲛᲐᲜᲒᲐᲠᲘᲗ ᲘᲔᲰᲝᲕᲐᲨ ᲛᲘᲛᲐᲠᲗ ᲜᲓᲝᲑᲐ

16. მუ მიმეხვარებუნა, ვა ვოდინუათ გაბედულება, მუჟამსით ქობძირუნთ ლუკაშ 21:​26—28-ს ნაწინასწარმეტყველებ მოვლენეფიშ შესრულებას?

¹⁶ „დიდ გაჭირებაშ“ დროს მსოფლიოს თიცალ მოვლენეფ მოხვადუ, ნამდა მუჭოთ ბიბლიაშე ბგებულენთ, „ხალხის გურ მიდალე შიშით“. მარა იეჰოვაშ ხალხ მტკიცას დო გაბედულო გერდას იჸუაფ (წეკითხით ლუკაშ 21:26—28). სოვრეშე მაღვენუნა თეშმადიდა გაბედულება? ულირს მიკნაულა სირთულეეფიშ შედეგო თოლწკურილო ვონდუდათ იჸუაფ იეჰოვას. ჟიშე მოშინაფილ ტანია მირაგადუნა, ნამდა ულირს გინოღალირ განსაცდელეფ ოხვარ, ქუგურზას თი რთულ სიტუაციეფს, ნამდგას ამდღა ხვადუ. თინა იჩიებ: „ჩქიმ დუდშა გეგმოფცად, ნამდა ვა არსებენს თიცალ სიტუაცია, ნამდგაშა ვეგმარჯგინნენა, მუშენდა იეჰოვა მოხვარუნა ნებისმიერ სირთულეშ გარზებას დო მოქმედენს ჩქინ საჯგირობუოთ. მინშა შილებე თეშ იძირედას, ნამდა მუდგარენ სიტუაციეფს შხვეფ აკონტროლენა, მარა სინამდვილეს თინეფს ხვალე თისხიშ კეთებაშ საშვალება უღუნა, მუზმაშ კეთებაშ უფლებას იეჰოვა მეჩანს. მართალ რე, ნამთინე განსაცდელ შილებე რთულ გინაღალარ რდას, მარა ართ დროს თის ხოლო მეღებ ბოლო“.

17. მუჭო მიმეხვარებუნა 2024 წანაშ მუხლ? (ქოძირით სურათ გალენ გვერდის).

¹⁷ ამდღა მსოფლიოს თიცალ მდგომარეობა რე, ნამდა შუროთ ვა რე გასაკვირ, მინშა შიშიქ გებჭოფან. მარა, მუჭოთ თე სტატიაშე ბძირით, დავითცალო, ჩქი ხოლო შემლებუნა გივორჯგინათ შიშის დო ვემეფჩათ თიშ უფლება, ნამდა სიმშვიდე მიმოდინაფუან. 2024 წანაშ მუხლის, ნამუთ ფსალმუნშე რე ეჭოფილ, დავით იეჰოვას ლოცვას ურაგად: „ქუმაშქურინ-და, სი მიგენდებუქ“ (ფსალმ. 56:3). ართ ბიბლიაშ მარკვიებელ თე მუხლიშ გურშენ თეცალ სიტყვეფს იჩიებ: „დავითის მთელ ყურადღება შიშშა დო პრობლემეფშა ვა აფჷ გინოღალირ. თინა მუშ მარსხებელს მიოჯინე დო თიშა რე მენდებულ“. მთელ წანაშ დინახალე იფიქრით თე მუხლშე დო განსაკუთრებულო თიმწკუმა ქიგიშინით, მუჟამსით ოშქურანჯ სიტუაციეფს ქეშეხვადუთ. დრო გეგმურთით თიშე ფიქრის, მუ აკეთ იეჰოვაქ ულირს, მუს ორთჷ ამდღა დო მუს გაკეთენს მომავალს. თე ირფელიშ უკულ დავითცალო თქვა ხოლო გარაგადენა: „ღორონთიშ იმენდ მიღჷ, ვა მაშქურინე“ (ფსალმ. 56:4).