1. მუჭო გაფუნა წარმოდგენილ იეჰოვა?

 ᲓᲦᲐᲡ დაფიქრებეთო, მუნერ რე იეჰოვა? მუჭო გაფუნა წარმოდგენილ თინა, მუჟამსით ლოცულენთ? მართალ რე, იეჰოვა თოლშო უძირაფ რე, მარა ბიბლია თის ბრელნერო ეჭარუნს. მაგალთო, იეჰოვა მოშინაფილ რე, მუჭოთ „ჩხანა დო ფარ“ დო „გუმანადგურებელ დაჩხირ“ (ფსალმ. 84:11; ებრ. 12:29). ეზეკიელ იჩიებ, ნამდა ხილუას ძირჷ იეჰოვა, ნამუთ მოგენდჷ ვარკალა მეტალს, გეხედ საფირონიშ ტახტის დო ირდიხას რწკინუნდუნ ფერ ცისარტყელა გოურდჷ (ეზეკ. 1:​26—28). მუჟამსით ბკითხულენთ, მუჭო რე ეჭარილ იეჰოვა ბიბლიას, შილებე რიდიქ ვარდა შიშიშ გრძნობაქ ხოლო გომრჩქინდან.

2. მუშენ შილებე ნამთინეს უჭირდას ღორონთწკუმა დაახლოება?

² რახანს იეჰოვაშ ძირაფა ვეშემლებუნა, შილებე გამჭირდან თიშ დაჯერებაქ, ნამდა თის ვუჸორთ. ნამთინეშ აზრით, ულირს დაშებულიშ გურშენ იეჰოვა დღას ვეჸოროფუანს. შილებე თეცალ ადამიანეფს, დღას ვეგმუცადებუნა მუმაშ ჸოროფა. იეჰოვას ჯგირო არჩქილე, მუს ბგინაფლენთ თე დროს დო მუჭო მოქმედენს თეცალ გრძნობეფ ჩქინდა. ათეშენ მუშ სიტყვაშ საშვალებათ მოგებაფუანა, მუნერ ღორონთ რე თინა.

3. მუშენ ოკო გებგათ უმოს იეჰოვაშ ჸოროფაშენ?

³ ჸოროფა რე თი თვისება, ნამუთ არძაშ უჯგუშო ეჭარუნს იეჰოვას (1 იოან. 4:8). თინა ჸოროფა რე დო ირფელს ჸოროფათ ორთჷ. ღორონთიშ ჸოროფა თიცალ ძალიერ დო ულიებ რე, ნამდა თის თი ადამიანეფიშ მიმართ ხოლო გიმირჩქინანს, მიდგას თინა ვა უჸორა (მათ. 5:​44, 45). თე სტატიას უმოსის ქიგებგენთ იეჰოვაშ დო თიშ ჸოროფაშ გურშენ. მუთ უმოს უჯგუშო გეფჩინებაფუანთ ღორონთის, თით უმოსო ქიმეჸოროფებუნა თინა.

 ᲘᲔᲰᲝᲕᲐᲡ ᲛᲐᲜᲒᲐᲠᲝ ᲣᲸᲝᲠᲗ

4. მუჭო მოქმედენს თქვანდა იეჰოვაშ ჸოროფა? (ქოძირით სურათ).

⁴ „მუმას უჸორთ“ (იოან. 16:27). ბიბლიას იეჰოვა მუშ დუდის მოჸოროფე დიდას ადარენს (ეს. 66:​12, 13). წერმიდგინით დიდა, ნამუთ ჸოროფათ ულუანს მუშ ჭიჭე ბაღანას. თინა კართეშა აწიხუნუანს თის, უკვანწუანს დო გემუან დო მშვიდ ხონარით ეჩიებ. მუჟამსით ბაღანა ინგარს ვარდა მუდგარენს აჭჷ, დიდა დუდის გალუაფ დო მუთუნს ვარკენს. მუჟამსით მუდგარენ მაწუხენა, იეჰოვა ხოლო თეშნერ ჸოროფას გიმირჩქინანს ჩქინ მიმართ. ფსალმუნმაბირექ ჭარჷ: „მუჟამსით ოწუხებელქ სვანჯ მემდინუ, სი ემქექე გურშა დო სიმშვიდე მუჩჷ“ (ფსალმ. 94:19).

5. მუ ჯგირობუა მოუღ თქვანდა იეჰოვაშ ართგურ ჸოროფას?

⁵ იეჰოვა ართგურ რე (ფსალმ. 103:8). მუჟამსით მუდგაინს მეფჩირთუთ, თინა ვამჯოგუანა. თექ ჯგირო ქიძირ ისრაელეფიშ მაგალითშე, მიდგაქ ბრელშა უწყუნუეს თის გურ, მარა იეჰოვა იშენით ართგურ ჸოროფას გიმირჩქინანდჷ თინეფიშ მიმართ, მით ნარღენდეს დაშებულს. თიქ ისრაელეფ მუშ ჸოროფაშა თეცალ სიტყვეფით დარწმუნ: „ძვირფას რექჷ ჩქიმ თოლს, პატიგედვალირ დო საჸოროფო“ (ეს. 43:​4, 5). იეჰოვა ვა თირე დო ამდღა ხოლო თეცალ ჸოროფას გიმირჩქინანს. ირიათო შემლებუნა მიღუდან თიშ იმენდ. სერიოზულო შეფცოდათინ ხოლო, თინა დღას ვემმოტენა. მუჟამსით იბნარღენთ დაშებულს დო დუვართუთ თის, კინ ქიბგინანთ იეჰოვაშ ძალიერ ჸოროფას. თინა მოპირუნა, ნამდა „ბრელ მუდგარენს“ მაპატიენა (ეს. 55:7). მუჭოთ იეჰოვა მუშ სიტყვაშე მოგებაფუანა, მუჟამსით მაპატიენა, თაშ ქოფთქუათინ, „ჭყანას მომკათუანა“ (საქ. 3:19).

6. მუს მოგებაფუანა ზაქარიაშ 2:8 იეჰოვაშ გურშენ?

⁶ წეკითხით ზაქარიაშ 2:8. იეჰოვას მანგარო უჸორთ. ათეშენ თიშო არძაართ ვა რე ჩქინ გრძნობეფ დო ოკო, დოფთხილუან. ჩქინ ჭუა თიშ ჭუა რე. ათეშენ შემლებუნა ბჯერდან, ნამდა ქუპასუხენს ჩქინ ლოცვეფს, მუჟამსით ფთხინთჷ: „თოლიშ გუგაცალო დოფთხილე“ (ფსალმ. 17:8). მუჭოთ მიჩქუნა, თოლ სხეულიშ სათუთ დო მნიშვნელოვან ნაწილ რე. ათეშენ, მუჟამსით იეჰოვა მუშ თოლიშ გუგას მადარენა, ფაქტიურო, თეცალ მუდგარენს მირაგადუნა: „გიჩქუდან, მით ჩქიმ ხალხის მიორინუანს ზიანს, თის მიორინუანს ზიანს, მუთ ჩქიმო მანგარ ძვირფას რე“.

7. მუშენ რე საჭირო, უმოსო დებრწმუნათ იეჰოვაშ ჸოროფაშა?

⁷ იეჰოვას ოკო, ბჯერდან, ნამდა თითოულ მანგარო უჸორთ. მარა თის თინა ხოლო ჯგირო არჩქილე, ნამდა ულირს დაშებულქ ვარდა ამდღარ სირთულეეფქ, შილებე ეჭვეფ გომირჩქინან, სინამდვილეს ქოუჸორთ დო ვარ თის. მუჭო  შემლებუნა უმოსო დებრწმუნათ იეჰოვაშ ჸოროფაშა? თეს ქიმმეხვარებუნა თიშ უჯგუშო გაგება, მუჭო გიმირჩქინანს იეჰოვა ჸოროფას იესოშ, ცხებულეფიშ დო ჩქინ მიმართ.

ᲛᲣᲭᲝ ᲒᲘᲛᲘᲠᲩᲥᲘᲜᲐᲜᲡ ᲘᲔᲰᲝᲕᲐ ᲸᲝᲠᲝᲤᲐᲡ

8. მუშენ რდჷ იესო დარწმუნებულ მუამუშიშ ჸოროფაშა?

⁸ თიზმახანიან ურთიერთობა, მუნერით იეჰოვა დო იესოს უღუნა, სამყაროს მითინს ვა ნოღვე. თინეფ ზეცას მილიარდობით წანას ართო ხანდენდეს, მუდგაშ შედეგო ძალიერ ჸოროფაქ დო ხოლოშიან ურთიერთობაქ გევითარეს. მათეშ 17:5-შე არგამათ ვორწყეთ, მუშმადიდა ჸოროფა უღჷ იეჰოვას იესოშ მიმართ. თის შეულებუდ იესოშ გურშენ უბრალოთ უთქუალუდუკო: „თინა მა მიბწონე“. მარა იეჰოვას ოკოდ, ქუმოძირუესკო, მუჭო უჸორდჷ იესო, ათეშენ დიო აწუჸუნუ: „თენა რე ჩქიმ საჸოროფო სქუა“. იეჰოვას ოამაყუდ იესო, განსაკუთრებულო თიშ გურშენ, ნამდა ართგურო ასრულენდჷ მუმაშ დავალებას დო მზათ რდჷ, სიცოცხლე ხოლო დათმუკო (ეფეს. 1:7). იესოს ართ წამით ვემშუღალ ეჭვ იეჰოვაშ ჸოროფაშა დო ირიათო იჩიებუდ, ნამდა მუმას უჸორდჷ თინა (იოან. 3:35; 10:17; 17:24).

9. მუნერ ჸოროფას გიმირჩქინანს იეჰოვა ცხებულეფიშ მიმართ? გენწყით (რომ. 5:5).

⁹ იეჰოვა ცხებულეფიშ მიმართ ხოლო გიმირჩქინანს ჸოროფას (წეკითხით რომაელეფიშ 5:5). ორიგინალ ნინას თე მუხლის გიმორინაფილ სიტყვა თი აზრის გიტენს, ნამდა ღორონთიშ ჸოროფა ცხებულეფიშ მიმართ თიცალ ულიებ რე, შემლებუნა თინა წყურგილეს შეუდარათ. მართალო, მუ ჯგირო იძირე თე შედარებაშე, მუნერ ძალიერ რე იეჰოვაშ ჸოროფა ცხებულეფიშ მიმართ. თე ჸოროფას ცხებულეფ ხოლო გინაფლენა (იუდ. 1). მოციქულ იოანექ ხოლო ეჭარ თი ძალიერ ჸოროფა, ნამდგას ცხებულეფ იეჰოვაშე გინაფლენა: „დეკვირით, მუნერ ჸოროფა გიმირჩქინ მუმაქ ჩქინ მიმართ, ნამდა ღორონთიშ სქუალეფქ ქიგმადვესკო“ (1 იოან. 3:1). ხვალე ცხებულეფიშ მიმართ გიმირჩქინანსო იეჰოვა ჸოროფას? ვარ, თინა არძას მარწმუნენა მუშ ჸოროფაშა.

10. არძაშ უმოსო სოვრეშე იძირ, ნამდა იეჰოვას უჸორთ?

¹⁰ არძაშ უმოსო სოვრეშე იძირ იეჰოვაშ ჸოროფაქ? გიშაჸიდირალშე, მუშენდა თეცალ ჸოროფა დღას მითინს ვეგმურჩქინუ! (იოან. 3:16; რომ. 5:8). იეჰოვაქ მუშ საჸოროფო სქუა შემობწირეს, მუდგაშ საშვალებათ მეპატიებუნა ცოდეფ დო გინიფრთუთ თიშ მეგობრეფო (1 იოან. 4:10). მუთ უმოსის იფიფქრენთ იეჰოვა დო იესოშ გინოგაფილ გიშაჸიდირალშე, თით უმოსო ქინვანჭუთ, მუჭო უჸორთ თითოულ (გალ. 2:20). იეჰოვას გიშაჸიდირალ უბრალოთ თიშ გურშენ ვეგნუგაფ, ნამდა მუშ სამართლიანობას თაშ უხუჯანდჷ; თეშნერო თიქ ჸოროფა მოძირუეს. იეჰოვაქ არძაშ უმოს ძვირფას, მუშ საჸოროფო სქუა შემობწირეს დო თინა ხოლო დაუშვჷ, ნამდა თინა ტანჯებულო დოღურედუკო ჩქინ საჯგირობუოთ. თეშნერო ქუმოძირუეს, მუნერ ძალიერ რე თიშ ჸოროფა ჩქინ მიმართ.

11. მუს ბგებულენთ იეჰოვაშ გურშენ იერემიაშ 31:3-შე?

¹¹ მუჭოთ ბძირით, იეჰოვა არგამათ მოძირანა, მუზმათ ვუჸორთ დო გურშა ვენიხვილანს თე ჸოროფას (წეკითხით იერემიაშ 31:3). მაგალთო, უჸორთინ თიშენ, თინა მარზენა საშვალებას, დევეახლოვათ (ქეშუდარით კანონიშ 7:​7, 8). მითინს დო მუთუნს ვეშულებ, გენკმოჸოთან თე ჸოროფას (რომ. 8:​38, 39). მუჟამსით თეშე ფიქრენთ, მუჭო მოქმედენს თქვანდა იეჰოვაშ ჸოროფა? წეკითხით 23-ა ფსალმუნ დო ქიდეკვირით, მუ გრძნობეფ უღუდ დავითის, მუჟამსით ორწყედ, მუჭო უჸორდჷ დო ზრუნენდჷ იეჰოვა თიშე. უკულ დეფიქრით, თქვანდა მუჭო შილებე იმოქმედას იეჰოვაშ ჸოროფაშ ძირაფაქ.

ᲛᲣᲭᲝ ᲛᲝᲥᲛᲔᲓᲔᲜᲡ ᲗᲥᲕᲐᲜᲓᲐ ᲘᲔᲰᲝᲕᲐᲨ ᲸᲝᲠᲝᲤᲐᲨ ᲫᲘᲠᲐᲤᲐ?

12. მუ რე ეჭარილ 23-ა ფსალმუნს?

¹² წეკითხით ფსალმუნიშ 23:​1—6. დავითიშ ართ-ართ ობირეშშე, ნამუთ 23-ა ფსალმუნს რე მოჩამილ, იძირე, მუჭო რე თინა ბოლოშა დარწმუნებულ, ნამდა იეჰოვა ზრუნენს თიშე დო მთელ გურით უჸორს. დავით თე ფსალმუნს თის ხოლო ეჭარუნს, მუნერ ხოლოშიან ურთიერთობა  უღჷ მუშ ჭყიშწკუმა, იეჰოვაწკუმა. თიშ ხემძღვანელობაშ მეჸუნა დავითის დუდის თხილერო ოგინაფუანდჷ, ათეშენ ბოლოშა რდჷ თიშა მენდებულ. დავითის თინა ხოლო ჯერდჷ, ნამდა სიცოცხლეშ ბოლოშა ქიგინანდ თეცალ ჸოროფას. მუშენ რდჷ თინა თე ირფელშა დარწმუნებულ?

13. მუშენ ჯერდჷ დავითის, ნამდა იეჰოვა ქიზრუნენდ თიშე?

¹³ „მუთუნ ვემმოკორდუ“. დავით ირიათო გინაფლენდჷ, ნამდა იეჰოვა ირიათო ზრუნენდჷ თიშე, მუშენდა აუცილებერს მუთუნს ვარკენდჷ. დავითშა ხიოლ თიშ რჩქინას ხოლო მოუღუდ, ნამდა იეჰოვაშ მეგობარ რდჷ დო თიშ მოწონა უღუდ. ათეშენ რდჷ თინა ბოლოშა დარწმუნებულ, ნამდა მომავალს მუდგაქ ვა მოხვადუკონ, იეჰოვა ირიათო ქიზრუნენდ თიშ საჭიროებეფშე. თინა თიშმანწარას რდჷ დარწმუნებულ იეჰოვაშ ჸოროფაშა, ნამდა სირთულეეფიშ დროს ხოლო ხიოლს დო კმაყოფილებას ვადინუანდჷ (ფსალმ. 16:11).

14. მუ შილებე იეჰოვაქ აკეთას ჩქინ მახვარებელო?

¹⁴ იეჰოვა განსაკუთრებულო ზრუნენს ჩქინდე, მუჟამსით სირთულეეფ მიღუნა. თენა მუშ დუდშა გიმოცად ართ დაქ, კლერქ, a ნამუთ 20 წანაშე უმოს ხანს მსახურენდჷ ბეთელს. თიშ ოჯახის ართიანიშ მეჸუნელო მუსხირენ უბედრობაქ ქიგიოტირხჷ. კლერს ვა უჩქუდ, მუ აკეთუკო თინეფიშ მახვარებელო. თიშ მუმაქ ინსულტ მიღჷ დო უკლაშ დაქ კრებაშე გერიცხჷ. თე ირფელს თიქ ხოლო ქიგიაძინ, ნამდა მუნეფიშ ჭიჭე ბიზნესიქ ოკილარქ აჸუეს დო ბანკიქ ჸუდე ხოლო მიდუღ. მუჭო გიმირჩქინ იეჰოვაქ ჸოროფა კლერიშ ოჯახიშ მიმართ? კლერ იჩიებ: „ვა ჸოფე თიცალ დღა, მუჟამსით ჩქიმ ოჯახის აუცილებერ ვა უღუდ. იეჰოვა ირიათო თიცალ მუდგარენეფს ორთუდ, მუდგას აიშახ დღას ვეფიფქრენდჷ. თინა აუცილებერშე უმოსის ხოლო მარზენდეს. ხშირას ფიფქრენქ, მუჭო ზრუნენდჷ იეჰოვა თიმწკუმა ჩქიმდე დო მუშმადიდა  ჸოროფას გიმირჩქინანდჷ. თეშე ფიქრ შხვა სირთულეეფიშ დროს ხოლო მოხვარუდ, ვა ვოდინეკო ხიოლ“.

15. მუქ გიშაცოცხალ დავით? (ქოძირით სურათ).

¹⁵ „თინა რე ჩქიმ გიშმაცოცხალებერ“. მინშა პრობლემეფ დო სირთულეეფ დავითის გურს უმონკენდჷ დო ძალეფს მიდმუღანდჷ (ფსალმ. 18:​4—6). მარა თი ჸოროფა დო ალარნა, ნამდგას იეჰოვაშე გინაფლენდჷ, გიშაცოცხალენდჷ თის. იეჰოვა მუშ ძალაგიშალიებურ მეგობარს მასვანჯებელო „გოფალირ ოდიარეეფ“ დო „წყარით ეფშა ადგილეფჸურე“ აწოჸუნდჷ. შედეგო, დავითიქ დირთინუ ძალეფ დო შეიალებუ, ხიოლით გაგრძელუკო იეჰოვაშ მსახურება (ფსალმ. 18:​28—32).

16. პირადო თქვა მუჭო გიშქაცოცხალეს იეჰოვაშ ჸოროფაქ?

¹⁶ თაშ რე ამდღა ხოლო. თიშ უმკუჯინუო, ნამდა ქიანაშ პრობლემას ფხვადუთ, „იეჰოვაშ ართგურ ჸოროფათ მიდგუნა შურ“ (გოდ. 3:22; კოლ. 1:11). გუვარჩუათ ართ დაშ, რეიჩელიშ, შემთხვევა. პანდემიაშ დროს თიშ ქომონჯიქ მიოტუ თინა დო იეჰოვას ხოლო ქურთინუ ოჭიშ, მუდგაქ რეიჩელ განადგურ. მუ აკეთ იეჰოვაქ თიშ მახვარებელო? თინა იჩიებ: „იეჰოვა მეგობრეფიშ საშვალებათ ირიათო მოგინაფუანდჷ, ნამდა უჸორდჷ. თინეფ დროს გიმომრთუნდეს, ოჭკუმალ მოუღუდეს ჩქიმდა დო გურიშემაკინალ წერილეფს მიჯღონანდეს. თინეფიშ გოძიცებულ სახეეფ დო თეცალ ალარნა, ირიათო გუმოშინანდჷ, ნამდა იეჰოვა ზრუნენდჷ ჩქიმდე. მარდულ ვაფუქ იეჰოვას თეცალ მოჸოროფე ოჯახშენ“.

17. მუშენ იჩიებუდ დავით, ნამდა მუთუნ ვაშქურინუანდჷ?

¹⁷ „მუთუნ ვა მოშქურინუანს, მუშენდა სი რექჷ ჩქიმწკუმა“. დავითიშ სიცოცხლე ხშირას რდჷ საფრთხეშ თუდო, მუშენდა თის ბრელ ძალიერ ნტერ ჸუნდჷ. მარა იეჰოვაშ ჸოროფა დავითის დუდის თხილერო ოგინაფუანდჷ. თინა არძა სიტუაციას გინაფლენდჷ, ნამდა იეჰოვა ალურდჷ, მუთ ოხვარუდ, შინაგან სიმშვიდე ვადინუკო. ათეშენ თამამას შეულებუდ უთქუალუდუკო: „იეჰოვაქ არძა ჩქიმ შიშშე გუმათავისფალ“ (ფსალმ. 34:4). მართალ რე, დავითის მინშა შიშ ინაჭკირუდ, მარა თიშ ჭყოლოფათ, ნამდა ჯერდჷ, იეჰოვას უჸორდჷ, ირნერ შიშის გიორჯგინანდჷ.

18. მუჭო მამანგარენა ოშქურანჯ სიტუაციეფს თიშ რჩქინა, ნამდა იეჰოვას უჸორთ?

¹⁸ მუჭო მამანგარენა ოშქურანჯ სიტუაციეფს თიშ რჩქინა, ნამდა იეჰოვას უჸორთ? ართ პიონერ და, სუზი, იჩიებ, მუს გინაფლენდეს მუ დო მუშ მეუღლე, მუჟამსით თინეფიშ სქუაქ დუდ დიჸვილ: „თეცალ უბედრობაშ უკულ განადგურებულ რექჷ დო გლახაშ მეტის, ჯგირს მუთუნს ველუქ. მარა ირიათო ვორწყედით, მუჭო უჸორდით იეჰოვას დო მუჭო ალამირდეს, მუთ დუდის თხილერო მოგინაფუანდეს“. რეიჩელ, ნამუთ ჟიშე მიფშინეთ, იშინანს: „ართ სერს გურ მანგარ ეკოჭირებულ მაფუდ დო შიშიქ ქენმაჭკირ. ხონარმაღალო  დო ანგარებულო ქიდიბჭყჷ ლოცვა. იეჰოვაქ ხეთეშე დუმამშვიდ თეშ, მუჭოთ დიდა ამშვიდენს ჭიჭე ბაღანას. შედეგო, სიმშვიდე ქიბგინ დო ქოთ ქუდმარულ. თე მომენტ დღას ვაგმოჭყორდუ“. ართ უხუცეს ჯიმა ხოლო, ტასოს, ნამუთ ჯარშა ულაშე ვარიაშ გურშენ ოთხ წანას ხედჷ ციხეს, იჩიებ: „იეჰოვა მუთუნს ვა მარკენდჷ დო საჭიროშე უმოსის ხოლო მარზენდჷ. თექ გამიმანგარ რწმენა, ნამდა შემლებ ბოლოშა მივენდე თის. თიშ უმკუჯინუო, ნამდა ციხეს მანგარ გლახა გარემო რდჷ, ღორონთიშ წმინდა შურიშ ჭყოლოფათ, ხიოლ იშენით ვამდინუაფ. თექ დუმარწმუნ, ნამდა მუთ უმოსო მივენდებუდ იეჰოვას, თით უმოსო ქიბგინანდ თიშ ჸოროფას. ათეშენ ციხეს ვორდინ თეშ ქიდიბჭყჷ პიონერო მსახურება“.

ᲓᲔᲐᲮᲚᲝᲕᲘᲗ ᲗᲥᲕᲐᲜ ᲛᲝᲸᲝᲠᲝᲤᲔ ᲛᲣᲛᲐᲡ

19. ა) მუნერ რე ჩქინ ლოცვეფ, მუჟამსით ბჯერა, ნამდა იეჰოვას უჸორთ? ბ) ჩარჩოს მოჩამილ აზრეფშე თქვანო ნამ ეჭარუნს იეჰოვაშ ჸოროფას არძაშ უჯგუშო? (ქოძირით ჩარჩო  „ბიბლიურ მუხლეფ, სოვრეშეთ იძირე, მუჭო უჸორთ იეჰოვას“).

¹⁹ ჟიშე გარჩიებულ შემთხვევეფ ამტკიცენს, ნამდა ჸოროფაშ ღორონთ, იეჰოვა, ჩქინწკუმა რე (2 კორ. 13:11). იეჰოვა ჩქინდე თითოულით პირადო რე დაინტერესებულ დო შემლებუნა ბჯერდან, ნამდა თიშ ჸოროფა ფთხილანა (ფსალმ. 32:10). მუთ უმოსის ფიფქრენთ თიშ გიმორჩქინელ ჸოროფაშე, თით უმოს რეალურ პიროვნებათ გინირთუ იეჰოვა ჩქინო დო უმოსო ვეახლოებუთ. თენა მოხვარუნა, თავისფალო დურაგადუათ ლოცვას დო ქუწუათ, მუჭო მოსაჭირუნა თიშ ჸოროფა. შემლებუნა თავისფალო ვეჩუათ ჩქინ ოწუხებელშენ, მუშენდა ბჯერა, ნამდა ბოლოშა არჩქილე ჩქინ დო აუცილებერო ქიმმეხვარებუნა (ფსალმ. 145:​18, 19).

20. მუჭო მაახლოვენა იეჰოვაშ გიმორჩქინელ ჸოროფა თიწკუმა?

²⁰ მუჭოთ ჩხურუშ დროს დაჩხირიშ სიტიბა მოჰამუნა, თეშნერო, იეჰოვაშ ჸოროფა უჰამუანს ჩქინ გურს, მუჟამსით სირთულეეფ მიღუნა. იეჰოვაშ ძალიერ ჸოროფა გურშა ემქექუანა დო დუდის მშვიდას მოგინაფუანა. თაშ ნამდა, ბედნერეფ ოკო ვორდათ, მუშენდა იეჰოვას უჸორთ. ათეშენ მორთჷ, თიშ ჸოროფას ფსალმუნმაბირეშ სიტყვეფით ქუპასუხათ: „მიჸორს იეჰოვა“! (ფსალმ. 116:1).