1, 2. მუ სირთულეეფს შილებე შეხვადან იეჰოვაშ ართგურ მსახურეფქ?

 ᲒᲚᲐᲮᲐ შემთხვევაქ შილებე ჩქინ ცხოვრება წუთიშ დინახალე დოთირუას. მაგალთო, ჩქინ ართ ართგურ ჯიმას, ლუისის, a იშვიათ ფორმაშ კიბოშ დიაგნოზ ქიგუშქვეს. ექიმქ თის უწუ, ნამდა გვალო მუსხირენ თუთაშ სიცოცხლე აფუდ დოსქილადირ. მონიკა დო მუშ ქომონჯ ირო სულიერ საქმეეფით რდეს დაკავებულ. მარა ართ დღას მონიკაქ ქიგეგ, ნამდა მუშ ქომონჯ, ნამუთ უხუცესო მსახურენდჷ, წანეფიშ დინახალე ჟირნერ ცხოვრებათ ნოცხოვრებუე. ართ დაუქორწინებელ დას, ოლივიას, ქარბორიაშ გურშენ მუშ ჸუდექ დატებელქ აჸუ. დუნორთის თიქ ქოძირ, ნამდა ქარბორიას მუშ ჸუდე ბოლოშა აკურღვაფ. მუჭოთ გებგით, ლუისიშ, ოლივიაშ დო მონიკაშ ცხოვრებაქ წუთიშმამალას გემნირთჷ. თქვა ხოლო ხომ ვეგგოტირხეს თიცალ მუდგარენქ, მუდგაქ ცხოვრება დუდშე ბოლოშა დოითირუეს?

² შხვეფცალო, იეჰოვაშ ართგურ მსახურეფ ხოლო ფხვადუთ სირთულეეფს დო იბლახებუთ. თეს გეძინელ, შილებე შეფხვადათ წინააღმდეგობას ვარდა თხოზინს თინეფშე, მიდგას ჯოგჷ ღორონთიშ ხალხ. მართალ რე, იეჰოვა ვემოჩილითუანა თეცალ სირთულეეფს, მარა მოპირუნა, ნამდა ქიმმეხვარებუნა (ეს. 41:10). თიშ მოხვარათ შემალებენა, ვა ვოდინუათ ხიოლ, მიბღათ გონივრულ გადაწყვეტილებეფ დო არძაშ უმოს რთულ სიტუაციეფს ხოლო ართგურეფქ ქუდოფსქიდათ. თე სტატიას გუვარჩიენთ ოთხ საშვალებას, მუდგათ სირთულეეფიშ დროს იეჰოვა მოხვარუნა. თეს გეძინელ, ქობძირუნთ, მუ ოკო ვაკეთათ თე მოხვარაშ მიოღებელო.

 ᲘᲔᲰᲝᲕᲐ ᲓᲝᲠᲗᲮᲘᲚᲐᲜᲐ

3. მუშ კეთება მიჭირა, მუჟამსით დუდის გლახა გიმოტირხუნა?

³ სირთულე. მუჟამსით ჩქინ ცხოვრებას გლახა შემთხვევა ხვადუ, რთულ რე, ვა ვოდინუათ სწორ აზროვნებაშ დო გადაწყვეტილებაშ მეღებაშ უნარ, მუშენდა შილებე გურ ხაშილ მაფუდან დო ოწუხებელიშ იშო მუთუნშე ვა მაფიქრებედან. თე დროს შილებე დუდის თეშ ბგინაფლენდათ ითამ მანგარ ნირსის ქუმოფხვადით დო ვა მიჩქუდან, სოვრე იბდათ დო მუ ვაკეთათ. ქიდეკვირით, მუს გინაფლენდჷ ჟიშე მოშინაფილ ჟირ და სირთულეეფიშ დროს. ოლივია იჩიებ: „თიშ უკულ, მუთ ქარბორიაქ ჩქიმ ჸუდე აკარღვჷ, განადგურებულ ვორდჷ. ვა მიჩქუდ, მუ ვაკეთიკო“. მონიკა, ნამდგას ქომონჯიქ უღალატ, მუშ გრძნობეფს თეშნერო ეჭარუნს: „თის, მუდგას ბგინაფლენდჷ, გურიშ გოტახუა ხოლო ვა ჯოხო. თეშ ვორდჷ, ითამ გურ ფია-ფიათ მაფუდ აკოსოფილ. ვა მიჩქუდ, მუჭო გუვაგრძელიკო ნორმალურ ცხოვრება. დღას ვეფიფქრენდინ ფერ მუდგარენქ ქუმაღოლ“. მუჭო მიმეხვარებუნა იეჰოვა თეცალ რთულ სიტუაციეფიშ დროს?

4. ფილიპელეფიშ 4:​6, 7-იშ თანახმას, მუს მოპირუნა იეჰოვა?

⁴ მუჭო მოხვარუნა იეჰოვა? თინა მოპირუნა, ნამდა ქომჩანა „ღორონთიშ მშვიდობას“ (წეკითხით ფილიპელეფიშ 4:​6, 7). თე მშვიდობას იგულისხმებ სიმშვიდე, ნამდგას ხვალე ღორონთწკუმა ხოლოშიან ურთიერთობაშ შედეგო ბღებულენთ. თინა „ნებისმიერ აზრშე უმოს რე“. ჩქი ბოლოშა ხოლო ვენვანჭუთ, მუ სარკო რე ღორონთიშ მშვიდობა. დღას ქუნორღვენანო თიცალ შემთხვევა, მუჟამსით მთელ გურით ლოცულენდით დო ხეთეშე ქიგინით, მუჭო დეგემშვიდეს დო ეგექექეს გურქ? ზუსტას თენა რე ღორონთიშ მშვიდობა.

5. მუჭო თხილანს ღორონთიშ მშვიდობა ჩქინ გურს დო გონებას?

⁵ ფილიპელეფიშ 4:7-ის თინა ხოლო ჭარჷ, ნამდა ღორონთიშ მშვიდობა „დოთხილანს თქვან გურ დო გონებას“. ორიგინალ ნინას სიტყვა „თხილუა“ სამხედრო ტერმინ რდჷ. თის ირინუანდეს თი ჯარიშკოჩეფშე ჩიებაშ დროს, მით ქალაქის ნტერშე თხილანდეს. ქალაქიშ მახორუეფს სერით გემოშა ლურდეს, მუშენდა უჩქუდეს, ნამდა ჯარიშკოჩეფ ყარულენდეს კარმინოლს. თეშნერო, მუჟამსით ღორონთიშ მშვიდობა ჩქინ გურ დო გონებას თხილანს, სიმშვიდეს ბგინაფლენთ, მუშენდა მიჩქუნა, ნამდა უსაფრთხოთ ვორეთ (ფსალმ. 4:8). ხანაცალო, ჩქინ სიტუაციაქ ხეთეშე ვეთირას დო ვეგეუჯგუშასინ ხოლო, სიმშვიდეს იშენით ვა ვოდინუანთ (1 სამ. 1:​16—18). მუჟამსით მშვიდას ვორეთ, უმოს ადვილ რე სწორას აზროვნება დო ჭკვერულ გადაწყვეტილებაშ მეღება ხოლო.

6. მუ ოკო ვაკეთათ, ნამდა მიბღათ ღორონთიშ მშვიდობა? (ქოძირით სურათ).

⁶ ჩქი მუ ოკო ვაკეთათ? რთულ სიტუაციეფიშ დროს თაშ ქოფთქუათინ „ქუდუძახით  გუშაგის“. მუჭო შემლებუნა თეშ კეთება? ვემიოტუათ ლოცვა, ონდო ვეგინანთ ღორონთიშ მშვიდობას (ლუკ. 11:9; 1 თეს. 5:17). ჟიშე მოშინაფილ ლუის ენწყუნს, მუქ მეხვარ თის დო მუშ ოსურ ანას, ვადინუესკო სიმშვიდე, მუჟამსით გეგეს, ნამდა ლუისის ხვალე მუსხირენ თუთაშ სიცოცხლე აფუდ დოსქილადირ. თინა იჩიებ: „თეცალ დროს მკურნალობაშე ვარდა შხვა საკითხშე გადაწყვეტილებეფიშ მეღება მანგარ რთულ რე. მარა ზუსტას ლოცვაშ ჭყოლოფა რე თინა, ნამდა შინაგან სიმშვიდე იშენით ვამდინუაფუნა“. მუჭოთ ლუის დო თიშ მეუღლე იჩიებუნა, თინეფ ირიათო დო მთელ გურით ლოცულენდეს, ნამდა იეჰოვაქ შინაგან სიმშვიდე დო სიბრძნე ქიმეჩუკო სწორ გადაწყვეტილებეფიშ მიოღებელო. თინეფქ ქოთ ქიგინეს იეჰოვაშ ხე. თაშ ნამდა, რთულ სიტუაციას ქორეთ-და, ვემიოტუათ ლოცვა დო თქვა ხოლო ქიგინანთ ღორონთიშ მშვიდობას, ნამუთ დოთხილანს თქვან გურს დო გონებას (რომ. 12:12).

ᲘᲔᲰᲝᲕᲐ ᲛᲘᲒᲔᲮᲕᲐᲠᲔᲑᲣᲜᲐ, ᲕᲐᲓᲘᲜᲣᲐᲗ ᲔᲛᲝᲪᲘᲣᲠ ᲬᲝᲜᲐᲡᲬᲝᲠᲝᲑᲐ

7. მუს შილებე ბგინაფლენდათ რთულ მდგომარეობაშ დროს?

⁷ სირთულე. მუჟამსით რთულ სიტუაცია მიღუნა, ჩქინ გრძნობეფ, ფიქრეფ დო ემოციეფ ჯვეშობურო გაწონასწორებულ ვა რე. მუჭოთ ქარბორიაშ დროს ტალღეფს გემ იშო-აშო გილუღ, თეშ რთულ მდგომარეობაშ დროს შილებე ემოციეფიშ ტალღეფქ ქომფაფუან დო სვანჯ მემდინუან. ანა, ნამუთ ჟიშე მიფშინეთ, იჩიებ, მუდანერ ემოციას ობრძოლუდ ლუისიშ ღურაშ უკულ: „მუჟამსით გურ ეკმეჭირებუდ, ფიფქრენდჷ, ნამდა მანგარ ცოდა ვორდჷ. ლუისშე ხოლო მუმალედ გურ, მუშენდა ხვალე ქუდომტუ“. ხვალე თენა ვარინ, ანა მინშა დუდის ხვალახეთ გინაფლენდჷ დო გურგოტახილ ხოლო რდჷ, მუშენდა თი საქმეეფ, ნამდგას აიშახ ლუის მიკაჯინედ, ასე მუს აფუდ ოკეთებელ. მინშა თინა დუდის თეშ გინაფლენდჷ, ითამ ქარბორიაშ დროს შქა ზღვას რდჷ. მუჭო მოხვარუნა იეჰოვა, მუჟამსით ემოციეფიშ ტალღეფ გინომლუანა?

8. მუჭოთ ფსალმუნიშ 62:2-ს ჭარჷ, მუშა მარწმუნენა იეჰოვა?

⁸ მუჭო მოხვარუნა იეჰოვა? თინა მოპირუნა, ნამდა ქიმმეხვარებუნა, დიფრთინუათ ემოციურ წონასწორობა (წეკითხით ფსალმუნიშ 62:2). მუჟამსით ზღვას ქარბორია გელალუ, ძალიერ ტალღეფ გემს იშო-აშო ოჸოთანს. თეცალ დროს წონასწორობა ვადინუასინ თიშენ, ბრელ გემს ქვინჯის გეურე ფსუალეფცალ მოწყობილობა, ნამდგას სტაბილიზატორ ჯოხო. თე სტაბილიზატორეფიშ ჭყოლოფათ ძალიერ ტალღეფიშ დროს გემ იშო-აშო იზმათ ველმერთუ დო თექ ხალხ უმოს თხილერო დო კომფორტულო რე. მარა თე სტაბილიზაციაშ სისტემა არძაშ უჯგუშო თიმწკუმა მუშენს, მუჟამსით გემ ვა ჩერდუ დო აგრძელენს ულას. თეშნერო, იეჰოვა მიმეხვარებუნა, ვა ვოდინუათ წონასწორობა, მუჟამსით სირთულეეფიშ უმკუჯინუო ვემვოტენთ თიშ ართგურო მსახურებას.

9. მუჭო მიმეხვარებუნა ჩქინ ორკვიებელ საშვალებეფ, ვა ვოდინუათ ემოციურ წონასწორობა? (ქოძირით სურათ).

 ⁹ ჩქი მუ ოკო ვაკეთათ? ემოციეფიშ ქარბორიაქ ქიგგანთხეს-და, ირფელ გაკეთით, ნამდა მიაჸუნათ სულიერ განრიგის. მუშო ოკო რაგად, ულირზმა ვა გაკეთებედან იჸი, მარა რშუდან, იეჰოვას არჩქილე თქვან დო ვეშეილებუნან თისხის ვა რთხინა (ქეშუდარით ლუკაშ 21:​1—4). დრო გეგმურთით პირად გურაფას დო ფიქრის, მუშენდა იეჰოვა მუშ ორგანიზაციაშ საშვალებათ თიცალ ვიდეოეფს დო სტატიეფს მარზენა, მუთ მოხვარუნა, ვა ვოდინუათ ემოციურ წონასწორობა რთულ მდგომარეობას. თიცალ ორკვიებელ საშვალებეფიშ გიმორნაფათ, მუნერით რე აპლიკაცია JW ბიბლიოთეკა, „გინაჯინალ კოშკიშ პუბლიკაციეფიშ საძიებელ“ დო „იეჰოვაშ მოწმეეფიშ ორკვიებელ სახემძღვანელო“, შეილებუნა ზუსტას თის ქიმიოგორუათ, მუთ გოსაჭირუნა. ჟიშე მოშინაფილ მონიკა იჩიებ, ნამდა მუჟამსით უარყოფით ემოციეფ ეჭოფუნდჷ, თე ორკვიებელ საშვალებეფს ირინუანდჷ თინეფშა გიორჯგინალო. მაგალთო, ოგორალ ველს ქინაჭარანდჷ სიტყვეფს „გურიშმოულა“, „ღალატ“, „ართგურობა“, დო უმოს ინფორმაციას გორუნდჷ თე საკითხეფშე. თინა თეიშახ აგრძელენდჷ თე საკითხეფიშ გიმორკვიებას, ონდო დუდის უჯგუშო ვეგინანდჷ. მონიკა იჩიებ: „მართალ რე, მუჟამსით კითხირს იბჭყანდჷ მანგარ გაჟღამებულ ვორდჷ, მარა გიმორკვიებას გუვაგრძელენდინ, ბგინაფლენდჷ, მუჭო მიხუტოლუანდჷ იეჰოვა გურშა. მარჩქილედ, ნამდა თინა ბოლოშა ინანჭუდ ჩქიმ გრძნობეფს დო მოხვარუდ“. იეჰოვაშე მეღებულ თეცალ მოხვარათ თქვა ხოლო შეგალებენა აკონტროლათ ემოციეფ, ონდო უმოს სიმშვიდეს ვეგინანთ (ფსალმ. 119:​143, 144).

ᲘᲔᲰᲝᲕᲐ ᲥᲔᲚᲐᲘᲓᲘᲠᲗᲣᲜᲐ

10. მუჭო შილებე ბგინაფლენდათ დუდის, მუჟამსით უბედრობა გიმოტირხუნა?

¹⁰ სირთულე. მუჟამსით უბედრობა გიმოტირხუნა, შილებე მინშა ძალაგიშალიებურ ვორდათ დო მუთუნიშ დუდ ვა მიღუდან. შილებე თი სპორტსმენს ბგუდათ, ნამუთ ართ დროს ჩქარას გილერულედ, მარა ასე, ტრავმაშ უკულ, გილაქულანს. თეცალ დროს პიროვნებას თიცალ მუდგარენიშ კეთება ხოლო უჭირს, მუდგას ადრე მუჭოდგა ორთუდ დო ვართ თიშ კეთებაშ სურვილ უღჷ, მუდგას ულირს თიშა ხიოლ მოუღუდ. ელიაცალო, შილებე მინშა თიშ ძალა ხოლო ვა მიღუდან, ნამდა გებდირთათ დო დორულაფაშ მეტ მუთუნ ვა მოკოდან (1 მეფ. 19:​5—7). მუჭო მიმეხვარებუნა იეჰოვა, მუჟამსით ძალაგიშალიებურ ვორეთ?

11. ხოლო მუჭო მოხვარუნა იეჰოვა? (ფსალმ. 94:18).

¹¹ მუჭო მოხვარუნა იეჰოვა? თინა მოპირუნა, ნამდა ქელამდირთუნა (წეკითხით ფსალმუნიშ  94:18). მუჭოთ ტრავმამეღებულ სპორტსმენს ოსაჭირ ელარნა, ნამდა მდგომარეობაშე გეგშართას, თეშ ჩქი ხოლო მოსაჭირუნა მოხვარა, ნამდა გუვაგრძელათ იეჰოვაშ მსახურებას აქტიურო მონაწილებაშ მეღება. იეჰოვა მარწმუნენა: „მა, იეჰოვას, სქან ღორონთის, მიკინებ სქან მარძგვან ხე დო გირაგადუქ: ვა გაშქურინას, მა მიგეხვარებუქ!“ (ეს. 41:13). დავითიქ ხოლო გეგმოცად მუშ დუდშა იეჰოვაშ ხე. მუჟამსით სირთულეეფ უღუდ დო ნტერეფ ვასვანჯუანდეს, თის იეჰოვაშ მოხვარაშ იმენდ უღუდ (ფსალმ. 18:35). მუჭო მოხვარუნა იეჰოვა?

12. მი შილებე გიმირინუას იეჰოვაქ, მუჟამსით ძალაგიშალიებურ ვორეთ?

¹² იეჰოვა ხშირას შხვეფს ირინუანს ჩქინ მახვარებელო. მაგალთო, ართშა, მუჟამსით დავით ძალაგიშალიებურ რდჷ, იეჰოვაქ თიშ ხოლოშიან მეგობარ, იონათან, გიმირინუ თიშა გურიშ ელაკინალო დო გამანგარებელო (1 სამ. 23:​16, 17). თიქ ელიას ხოლო მეხვარ ელისეშ საშვალებათ (1 მეფ. 19:​16, 21; 2 მეფ. 2:2). ამდღა იეჰოვაქ შილებე ჩქინ ოჯახიშ წევრეფ, მეგობრეფ ვარდა უხუცესეფ გეგმირინუას, ნამდა ქელამდირთან. მარა, მუჟამსით გურშეჭირებულ ვორეთ, შილებე მითინიშ ძირაფაშ დუდ ვა მიღუდან დო ხვალე რინა მისხუნუდან. თენა ნორმალურ რე. მუშ კეთება შემლებუნა, ნამდა იეჰოვაშე მოხვარა მიბღათ?

13. მუ ოკო ვაკეთათ, ნამდა მიბღათ იეჰოვაშ მოხვარა? (ქოძირით სურათ).

¹³ ჩქი მუ ოკო ვაკეთათ? ირნერო ქეცადით, ხვალე ვა დოსქიდათ, მუშენდა, მუჟამსით პიროვნება ხვალე რე, მთელ ყურადღება მუშ დუდშა დო თი პრობლემეფშა გინუღ, ნამდგას ობრძოლ. თეცალ ფიქრეფ უკულ გადაწყვეტილებეფშა ხოლო მოქმედენს (იგავ. 18:1). მუშო ოკო რაგად, მინშა არძას მოკონა ხვალე რინა, განსაკუთრებულო, მუჟამსით მუდგარენ უბედრობა გიმოტირხუნა. მარა თაშ ბრელ ხანს ქიგრძელებუნ-და, შილებე ვარიას იფჩიებუდათ თი მოხვარაშე, ნამდგას იეჰოვა შხვეფიშ საშვალებათ მარზენა. ათეშენ, მუდგა რთულ ვა რდასინ, მიღით მოხვარა თქვან ოჯახიშ წევრეფშე, მეგობრეფშე დო უხუცესეფშე. რშუდან, თინეფიშ საშვალებათ იეჰოვა გოხვარუნა (იგავ. 17:17; ეს. 32:​1, 2).

ᲘᲔᲰᲝᲕᲐ ᲒᲣᲠᲨᲐ ᲔᲚᲐᲘᲙᲘᲜᲐᲜᲐ

14. მუ ოშქურანჯ სიტუაციეფს შილებე შეფხვადათ?

¹⁴ სირთულე. მინშა შილებე თიცალ სიტუაციას ქუმოფხვადათ, ნამდა შიშიქ ქინმაჭკირან. ბიბლიას ბკითხულენთ ღორონთიშ თი ართგურ მსახურეფიშ სიტყვეფს, მით ნტერეფიშ დოვარ შხვა პრობლემეფიშ გურშენ შიშით კანკალანდეს (ფსალმ. 18:4; 55:​1, 5). თეშნერო, შილებე ჩქი ხოლო ფხვადუდათ წინააღმდეგობას სკოლას, სამუშას, ოჯახის დოვარ მთავრობაშე.  ხვალე თენა ვარინ, შილებე ჯამრთელობაშ პრობლემაშ გურშენ თიშა ხოლო მოშქურუდან, ნამდა დობღურუთ. მინშა, თეცალ დროს დუდის ჭიჭე ბაღანაცალო ბგინაფლენთ, ნამდგას მუშ დუდშა ვამახვარებე. მუჭო მოხვარუნა იეჰოვა თეშნერ სიტუაციეფს?

15. მუშა მარწმუნენა ფსალმუნიშ 94:19?

¹⁵ მუჭო მოხვარუნა იეჰოვა? თინა გურშა ელამკინანა დო მამშვიდენა (წეკითხით ფსალმუნიშ 94:19). მუჟამსით თე მუხლის ბკითხულენთ, წერმიბდგინენთ ჭიჭე ძღაბის, ნამდგას ვალ დო გურგინიშ შიშით ვა ლურს. უკულ შემლებუნა წერმიბდგინათ, მუჭო მეურს თიშა მუმა, ხეშა ეჭოფუნს, იხუტოლუანს დო ვა უტენს, ონდო ვედირულუანს. მართალ რე, ვალ დო გურგინ კინ იგრძელებ, მარა ბაღანა მშვიდას ირულუანს, მუშენდა მუამუშიშ ხუტოლ დუდის თხილერო ოგინაფუანს. თეშნერო, ოშქურანჯ სიტუაციეფიშ დროს, შილებე ჩქი ხოლო მოსაჭირუდან, ჩქინ ზეციერ მუმაქ, თაშ ქოფთქუათინ, გურშა ქომხუტოლუან დო ხე ვაგომტუან, ონდო ვედემშვიდებუთ. მუჭო შემლებუნა მიბღათ თეცალ გურიშელაკინა იეჰოვაშე?

16. მუ ოკო ვაკეთათ, ნამდა მიბღათ იეჰოვაშე გურიშ ელაკინა? (ქოძირით სურათ).

¹⁶ ჩქი მუ ოკო ვაკეთათ? ირიათო გეგშურთით დრო იეჰოვაწკუმა ურთიერთობას, ქილოცით დო წეკითხით თიშ სიტყვა (ფსალმ. 77:​1, 12—14). თეშნერო, მუჟამსით ოწუხებელ გაღვენუნა, პირველ, მუდგას გაკეთენთ, თინა იჸუაფ, ნამდა ზეციერ მუმას ქოთხინთ მოხვარას. ქეჩით თის, მუ გაწუხენა დო მუშა გოშქურუნა დო მუს ხოლო ქიმეჩით საშვალება, ქიგეჩუან დო გურშა ელაიკინან მუშ სიტყვაშ საშვალებათ (ფსალმ. 119:28). მუჟამსით შიშ გიღუნა, შილებე კონკრეტულ ბიბლიურ მონაკვეთეფქ განსაკუთრებულო ელაიკინან გურშა. მაგალთო, შილებე თქვანო გურიშემაკინალქ იჸუას თიცალ წიგნეფიშ კითხირქ, მუნერით რე იობ, ფსალმუნეფ დო იგავეფ ვარდა მათეშ მა-6 დუდის ინოჭარილ იესოშ სიტყვეფქ. მუჟამსით ლოცვას გურს გეგნუფაჩუნთ იეჰოვას დო თიშ სიტყვას წეკითხენთ, ქიგინანთ, მუჭო ელაიკინანა თინა გურშა.

17. მუშა შემლებუნა ვორდათ დარწმუნებულ?

¹⁷ შემლებუნა ბჯერდან, ნამდა ჩქინ ცხოვრებაშ არძაშ უმოს რთულ სიტუაციეფს ხოლო, იეჰოვა ხვალე დღას ვა დომტენა დო ირო ჩქინწკუმა იჸუაფ (ფსალმ. 23:4; 94:14). თინა მოპირუნა, ნამდა დოფთხილანა, ქიმმეხვარებუნა ვა ვოდინუათ ემოციურ წონასწორობა, ქელამდირთუნა დო გურშა ქელამკინანა. ესაიაშ 26:3-ს იეჰოვაშ გურშენ ჭარჷ: „დეცვენქ თინეფს, მით სრულაშე გონდუნა; ირიათო მშვიდას დარინუანქ, მუშენდა სქან იმენდ უღუნა“. თაშ ნამდა, მიენდით იეჰოვას დო გეგმირინეთ თი არძა საშვალება, მუდგათ თინა გოხვარუნა. თაშ გაკეთენთ-და, დუდის მუდგაქ ვეგგოტირხანინ, ძალეფ დღას ვეშქელიებუნა.