ᲡᲘᲢᲧᲕᲐ, ნამუთ „ახალ ქვეყნიერებაშ თარგმანს“ თარგმნილ რე, მუჭოთ „ეტლ“, შილებე შხვადოშხვანერ ეტლის ნიშნენდას (საქ. 8:​28, 29, 38). მარა საეგებიოთ, ეთიოპ საჭურისიშ ეტლ ბრელით უმოს დიდ რდჷ თი ეტლეფიშ გინაწონს, ნამდგას ბრძოლეფიშ დო შეჯიბრებეფიშ დროს ირინუანდეს. მორთჷ, გუვარჩუათ მუსხირენ მიზეზ თიშ ოძირაფალო, მუშენ იფჩიებუთ თეს.

ეთიოპ საჭურისის სახელმწიფოს მაღალ მდგომარეობა უკინებუდ დო შორ შარაშა უხვადუდ გილულა. მუჭოთ ღორონთიშ სიტყვა მოგებაფუანა, თინა რდჷ „ეთიოპელეფიშ დედოფალიშ, კანდაკეშ, კარიშ მსახურ, ნამდგას მთელ განძ ობარუდ“ (საქ. 8:27). ჯვეშ ეგვიპტეშ ტერიტორიაშა მიშეშ ამდღარ სუდან დო ეგვიპტეშ უკიდურეს სამხრეთ ნაწილ. მართალ რე, ეთიოპ საჭურის, საეგებიოთ, მთელ შარას ართ ეტლით ვემკიშუკონ იჸიდ, მარა, თეშ უმკუჯინუო, თეშმადიდა შარაშო იშენ ბრელ ოღალ აღვენუდ. პირველ საუკუნეს მგზავრობაშო ოთხბარბალამ გინორთვილ ეტლის ირინუანდეს. თე ეტლიშ გურშენ ართ წიგნის ჭარჷ: „თეცალ ეტლის უმოს ადგილ რდჷ, მუჭოთ ბარგშო თეშ შხვა ოღალშო ხოლო, მუთ მგზავრობას კომფორტულო გინაშქვანდჷ. საეგებიოთ, თე ეტლით მიშეს შორ ადგილეფშა“ (Acts—An Exegetical Commentary).

ეთიოპ საჭურის კითხულენდჷ, მუჟამსით თიშა ფილიპექ მერთჷ. ბიბლიას ბკითხულენთ: „ირულ ფილიპექ დო, მუჟამსით ქიგიოჭიშუ, ქიგეგონ, ნამდა თე კოჩ ესაიაშ წინასწარმეტყველებას კითხულენდჷ“ (საქ. 8:30). ეტლეფს, ნამდგას თი დროს მგზავრობაშო ირინუანდეს, ჩქარას ვალნედ. თენა ეთიოპ საჭურისის ქიმეჩანდჷ საშვალებას, ნამდა წეკითხუკო ღორონთიშ სიტყვა დო ფილიპეს ხოლო ადვილ აჸიდ, კუჩხით ქეკაჭიშუკო თის.

ეთიოპ საჭურისიქ „ეხვეწ ფილიპეს, ნამდა გეშურთუმუდუკო დო თიშა ქალუხუნუდუკო“ (საქ. 8:31). თი ეტლის, ნამდგას შეჯიბრებაშო ირინუანდეს მეეტლე კუჩხის გერდჷ. მარა მგზავრობაშო ირინუანდესინ თი ეტლის უმოს ადგილ უღუდ დო შხვეფს ხოლო ინტირინუანდჷ. თაშ ნამდა, თექ ფილიპეშო ხოლო იჸიდ დასაბაღ ადგილ.

საქმეეფიშ მა-8 დუდიშ დო ისტორიულ წყაროეფშე მეღებულ ინფორმაციაშ საშვალებათ, ბოლო დროს ჩქინ პუბლიკაციეფს მოჩამილ ილუსტრაციეფს ვორწყეთ, ნამდა ეთიოპ საჭურის მითოხე დიდ ეტლის, ნამდგას მგზავრობაშო ირინუანდეს, დო ვართ ხოლო თი ეტლის, ნამდგას ბრძოლეფიშ დო შეჯიბრებეფიშ დროს ირინუანდეს.