1. მუშენ შემლებნა თიშ რაგად, ნამდა ადამიანეფს ცხოველეფშე მაღალ მდგომარეობა უკებნა?

იეჰოვაქ ადამიანეფს განსაკუთრებულ მუდგარენ, სინდის მუჩეს. თენა რე ართ-ართ მიზეზ, მუშ გურშენით ცხოველეფიშ უმოს მაღალ მდგომარეობა მიკინებნა. მუჟამსით ადამ დო ევაქ იეჰოვაშ კანონს გეგნურთესინ, თინეფქ დიტყობეს. თავრეშე იძირე, ნამდა თინეფ სინდისიქ შეაწუხ.

2. მუშენ რე სინდის კომპასშა შედარებულ? (ქოძირით სურათ თე გვერდის).

² თინეფ, მიდგას სინდის სწორას ვაფნა გაწაფულინ, გუნა გემს, ნამუთ გაფუჭებულ კომპასით მოძრავენს. მარა თეცალ მოგზაურობა ოშკურანჯ რე, მუშენდა ბორიას დო ზღვაშ დინებას შეულებ ადვილო დუთირუას გემს მიმართულება. თეშ გინაწონს, სწორ კომპას ოხვარ კაპიტანს, ვადინუას მიმართულება. ჩქინ სინდის ხოლო შილებე შევადარათ კომპასის. თინა მოხვარნა გუვარჩუათ ჯგირ დო ფურ დო მარზენა სწორ მიმართულებას. ათეშენ, მუჟამსით სინდის ჯგირო რე გაწაფულინ, თინა სწორას მიხემძღვანელენა.

3. მუ შედეგ მოჸუნს, მუჟამსით სინდის სწორას ვა რე გაწაფულ?

³ სინდის სწორას გაწაფულ ვამაფნან-და, თინა ვემმეხვარებნა  დუდ ევუჩილითუათ გლახაშ კეთებას (1 ტიმ. 4:1, 2). თეცალ სინდისიქ შილებე თიშა ხოლო დუმარწმუნან, ნამდა „გლახა ჯგირ რე“ (ეს. 5:20). იესოქ მუშ მიმაჸუნალეფს უწუ: „მოურს დრო, მუჟამსით არძა თქვან მაჸვილარს მიორჩქდას იჸი, ნამდა თეთ ღორონც ომსახურ“ (იოან. 16:2). თე სიტყვეფქ შისრულ თინეფშა, მიდგაქ მოწაფე სტეფანე ჸვილ (საქ. 6:8, 12; 7:54—60). თეს გეძინელ, ისტორიულო ცნობილ რე, ნამდა რელიგიურ ფანატიკოსეფქ ბრელ უბადობა ქიმინეს, მაგალთო ჸვილუნდეს ხალხის დო ფიქრენდეს, ნამდა თეს ღორონთიშ სახელით ორთუდეს, მარა სინამდვილეს თიშ კანონეფიშ წინააღმდეგ მიშეს (გამ. 20:13). მუშო ოკო რაგად, სინდის სწორას ვახემძღვანელენდჷ თინეფს!

4. მუჭო შემლებნა დებრწმუნათ, ნამდა ჩქინ სინდის სწორას რე გაწაფულ?

⁴ მუჭო შემლებნა ვორდათ დარწმუნებულ, ნამდა ჩქინ სინდის სწორას რე გაწაფულ? ბიბლიას მოჩამილ კანონეფ დო პრინციპეფ „სასარგებლო რე ოგურაფალო, გიოწურაფალო, გიშასწორებელო დო სიმართლეს ორდალო“ (2 ტიმ. 3:16). ათეშენ, გურგედვალირო ოკო იბგურუათ ბიბლია, იფიფქრათ ნაგურეფშე დო გიმიბრინუათ თინა ჩქინ ცხოვრებას. თენა მიმეხვარებნა გაპწაფათ სინდის დო მიღდან იეჰოვაშ მოსაწონ აზროვნება. თაშ ქიმიფქციებუთ-და, შემლებნა დარწმუნებულ ვორდათ, ნამდა ჩქინ სინდის სწორას მიხემძღვანელენა. მორთ, გუვარჩუათ მუჭო შეულებ იეჰოვაშ კანონეფს დო პრინციპეფს ჩქინ სინდისიშ გაწაფვა.

5, 6. მუ ჯგირობუა მოუღჷ ღორონთიშ კანონეფიშ დაცვებას?

⁵ ღორონთიშ კანონეფქ სარგებელ ქუმომღანინ, დასაბაღ ვა რე ხვალე თინეფიშ რჩქინა. ჩქი ოკო ქიპჸოროფუათ დო დუვაფასათ ღორონთიშ კანონეფ. ბიბლია იჩიებ: „გიჯოგეთ თინა, მუთ გლახა რე დო ქიჸოროფეთ თინა, მუთ ჯგირ რე“ (ამოს. 5:15). მუჭო შემლებნა თეშ კეთება? ჩქი ოკო ქიდიბგურუათ იეჰოვაცალო ვუჯინათ საკითხეფს. ქიმიპჸონათ მაგალით: წერმიდგინით, ნამდა ლურიშ პრობლემა გიღნა. ექიმქ დაინიშნეს დიეტა, ვარჯიშ დო ელაიჩეს ცხოვრებაშ წესიშ თირუა. მუჟამსით ექიმიშ რჩევას ქიმიაჸუნითინ, ჯგირ შედეგ ქოძირით. მუშო ოკო რაგად, დიდ მარდულ იჸუაფუთ ექიმიშ, მუშენდა თიქ მიგეხვარეს პრობლემაშ მოგვარებას.

⁶ ჩქინ გუმაჭყაფალ ღორონთიქ ხოლო მუჩეს კანონეფ, ნამუთ მიცვენა ცოდაშ შედეგეფშე დო მოხვარნა მიღდან უჯგუშ ცხოვრება. დეფიფქრათ, მუ ჯგირობუა მოუღჷ ბიბლიურ კანონეფიშ დაცვებას, ნამუთ ოხუ ტყურაშ რაგადის, შხვაშ შეცდომაშა მიშაჸუნაფას, ხირუას, უზნეობას, ძალადობას დო სპირიტიზმის (წეკითხით იგავები 6:16—19; * გამოცხ. 21:8). მუჟამსით ვორწყეთ, ნამდა ღორონთიშ კანონეფიშ დაცვებას ჯგირობუა მოჸუნსინ, უმოსო მიჸორა დო ვაფასენთ იეჰოვას დო თიშ კანონეფს ხოლო.

7. მუს მიმეხვარებნა ბიბლიას ინოჭარილ მაგალითეფიშ კითხირ დო თინეფშე ფიქრი?

⁷ საბედნეროთ, თიშ გაგებელო მუ რე ჯგირ დო ფურ, ვა რე აუცილებერ ჩქინ დუდშა გიმოფცადათ თი გლახა შედეგეფ, ნამუთ ღორონთიშ კანონეფიშ დარღვიებას მოჸუნს. ჩქი შემლებნა შხვეფიშ შეცდომეფშე იბგურუათ, ნამუთ ღორონთიშ სიტყვას რე მოჩამილ. იგავეფიშ 1:5 იჩიებ: „ბრძენ ქიმირჩქილუანს დო მეტის დიგურუანს“. დასურო, მუჟამსით ბიბლიას მოჩამილ შხვეფიშ მაგალითეფს პკითხულენთ დო ფიფქრენთინ, თეთ იეჰოვა არძაშ უჯგუშ განათლებას მარზენა. მაგალთო, ქიფიქრით თი გლახა შედეგეფშე,  ნამუთ მეფე დავითის აშუ, მუჟამსით ვადაჸუნ იეჰოვაშ მითითებას დო ბათ-შებაწკუმა ქიმრუშ (2 სამ. 12:7—14). მუჟამსით თე მონაკვეთის პკითხულენთინ, ჯგირ იჸუაფ დეფიფქრათ თეცალ კითხვეფშე: მუჭო შეულებუდ დავითის თი გურჭუაშა დუდიშ ეჩილითაფა, ნამუთიქ ბათ-შებაწკუმა მრუშობას მაჸუნ? თეცალ ცდუნებას მა ქეშეფხვალამუდკონ, ქომბაღუდუო ძალეფ, ნამდა ვადვაჸუნკო თის? იოსებცალ რეაქცია მაღვენუდ დო ვარ დავითცალ? (დაბ. 39:11—15). მუჟამსით ცოდაშ გლახა შედეგეფშე ფიფქრენთინ, უმოსო მაჸინა გინოჭყვიდილ გიბჯოგუათ „თინა, მუთ გლახა რე“.

8, 9. ა) მუ მოვალეობა უღჷ სინდისის? ბ) მუჭო მოქმედენს იეჰოვაშ პრინციპეფ ჩქინ სინდისწკუმა?

⁸ ჩქი დუც ვურიდანთ თიცალ მუდგარენეფიშ კეთებას, მუთ ღორონც ჯოგჷ. მარა მუჭო მიფქცუათ, მუჟამსით საქმე ოხუ თიცალ საკითხეფს, ნამუშ გურშენ ბიბლია პირდაპირ მუთუნს ვეჩიებ? მუჭო გებგათ, მუნერ საქციელ რე ღორონთშო მისაღებ დო მოსაწონ? ზუსტას თე დროს ოკო გიმიბრინუათ ჩქინ სინდისი, ნამუთ ბიბლიათ რე გაწაფულ.

⁹ იეჰოვაქ ჸოროფათ მუჩეს პრინციპეფ, ნამუთ თხილანს ჩქინ სინდისის. ღორონთიქ მუშ სიტყვას თქუ: „მა, იეჰოვა, სქან ღორონთი ვორექ, მა გოგურუანქ სქან საჯგირობუოთ დო გილაიჸონანქ თი შარათ, ნამდგათ ოკო გილართე!“ (ეს. 48:17, 18). მუჟამსით ბიბლიურ პრინციპეფიშ გურშენ ფიფქრენთინ, თინეფ ჩქინ გურს ოხუ დო შემლებნა გაპწაფათ ჩქინ სინდისი. თე ირფელ მოხვარნა ბრძნულ გადაწყვეტილებაშ მეღებას.

10. მუს ნიშნენს პრინციპ დო მუჭო გიმირინუანდჷ თინეფს იესო ეფექტურო?

¹⁰ ართ-ართ ლექსიკონ სიტყვა პრინციპის თეცალ განმარტებას არზენს: „ძირითად ჭეშმარიტება ვარდა წესი, ნამუსით ნამთინე ქცევაშ ვარდა მსჯელობაშ საფუძველო გიმირინუანა“. პრინციპეფ ჯგირო ქიგებგათინ, ოკო ქინვანჭათ თი პიროვნებაშ აზროვნებას, მიდგაქ კანონეფ მუჩეს დო თიშ მიზეზის ხოლო მუშენ მუჩეს თიქ ნამთინე კანონეფ. დედამიწას მსახურებაშ დროს იესო ოგურუანდჷ მუშ მოწაფეეფს ძირითად პრინციპეფს, ნამდა ქუგუგებდესკო, მუ შედეგეფ მაჸუნუდ მუნეფიშ საქციელს. მაგალთო, თინა ურაგადუდ მოწაფეეფს, ნამდა გარისხებას ძალადობა მაჸუნუდ დო არასწორ ფიქრეფს — უზნეობა (მათ. 5:21, 22, 27, 28). ქუმოკონა სინდისიშ სწორაშე გაწაფვა-და, ღორონთიშ პრინციპეფით ოკო იფხემძღვანელათ დო თეგვარო განვადიდათ ღორონთ (1 კორ. 10:31).

11. მუჭო გენესხვავებ ქრისტიანეფიშ სინდის ართიანშე?

¹¹ კონკრეტულ სიტუაციაშ დროს ქრისტიანეფქ შილებე შხვადოშხვა გადაწყვეტილება მიღან. მაგალთო, დეფიფქრათ ალკოჰოლიშ მეღებაშე. ბიბლია ვარიას ვეჩიებ ზომიერო შუმაშე. მარა თინა მირაგადნა, ნამდა ბრელიშ შუმა დო ლოთობა მიუღებელ რე (იგავ. 20:1; 1 ტიმ. 3:8). ხომ ვა ნიშნენს თენა თის, ნამდა რახან ალკოჰოლიშ ზომიერო მეღება შილებენ, ქრისტიანქ შხვა ფაქტორეფ ოკო ვეგეთვალისწინას? მუშო ოკო რაგად, ვარ. შილებე ჩქინ სინდის მარზენდან თეშ ნებას, მარა შხვა ქრისტიანეფიშ სინდის ხოლო ოკო გეფთვალისწინათ.

12. მუჭო მოხვარნა რომაელეფიშ 14:21 შხვეფიშ სინდისიშ გათვალისწინებას?

¹² შხვეფიშ სინდისიშ გათვალისწინებაშ გურშენ მოციქულ პავლექ ჭარ: „ჯგირს ქიმინუნქ ხორცის ვა ჭკუმუნქ-და, ვა შუნქ ღვინს ვარდა ვაკეთენქ თიცალ მუდგარენს, მუთ აპრკოლენს სკან ჯიმას“ (რომ. 14:21). ქეშეილებნანო ვარია ქოთქუათ თიცალ მუდგარენეფშე, მუშ კეთებაშ უფლება გიღნა დო თეგვარო ვადაპრკოლათ თინეფ, მიდგას განსხვავებულ სინდის უღჷ? მუშო ოკო რაგად თქვა თეს გაკეთენთ. ჭეშმარიტებაშ გაგებაშახ, ნამთინე და დო ჯიმა შუმას რდუ გინოჸუნელ, მარა ამდღა თინეფ ოცადნა დუდ არიდან თეს. მუშო  ოკო რაგად, ვამოკონა თიცალ მუდგარენ ვაკეთათ, ნამდა თე და დო ჯიმალეფქ კინ ჯვეშ ჩვევეფს დართან (1 კორ. 6:9, 10). ჸოროფაშ გიმორჩქინა ვეჸუაფ ჯიმას შუმა დუვანძალათ, მუჟამსით თინა ვარიას იჩიებ თეშ გურშენ.

13. შხვეფიშ სინდისიშ გათვალისწინებაშ მუ მაგალით დომტუეს ტიმოთექ?

¹³ სოიშა იუდეველეფწკუმა ქადაქებას დიჭყანდკო, ახალგაზრდა ტიმოთექ დეთანხმჷ წინადაცვეთა გუკეთებუდკო, თიშენ ნამდა, ვა დუპრკოლებუდკო თინეფ. პავლეცალო, თის ხოლო ვაკოდ მითინ დაპრკოლკო (საქ. 16:3; 1 კორ. 9:19—23). ქორეთო თქვა ხოლო მზათ ტიმოთეცალო პირველ ადგილს შხვეფიშ ინტერესეფ ქიგიორინუათ?

14, 15. ა) მუს ნიშნენს ქრისტიანულ მოწიფულობა? ბ) მუჭო ოქცუნა მოწიფულ ქრისტიანეფ შხვეფს?

¹⁴ ქრისტიანეფქ ვეგეჯერდან ოკო ხვალე „ქრისტეშ გურშენ მთავარ გურაფეფს“ დო ოკო ინჭუან მოწიფულობაშა (ებრ. 6:1). თეშო მონდომა რე საჭირო. ჩქი ირიათო ოკო მიბღათ ბიბლიურ რჩქინა. თეშო საჭირო რე ირ დღას იპკითხათ ბიბლია (ფსალმ. 1:1—3). თენა მიმეხვარებნა უმოსო ქინვანჭათ იეჰოვაშ კანონეფს დო პრინციპეფს დო უჯგუშო ქიგებგათ თიშ სიტყვა.

¹⁵ ქრისტიანეფშო არძაშ უმოს მთავარ კანონ ჸოროფა რე. იესოქ მუშ მოწაფეეფს უწუ: „ჩქიმ მოწაფეეფ რეთინ, თით გეგენა, ნამდა ართიანიშ ჸოროფა გაღვენუნა“ (იოან. 13:35). იესოშ ჯიმაჸონერ იაკობიქ ჸოროფა „დიდებულ კანონო“ მიშინუ (იაკ. 2:8). პავლექ თქუ: „ჸოროფა კანონიშ შესრულება რე“ (რომ. 13:10). ჸოროფაშა ყურადღებაშ გამახვილება გასაკვირ ვა რე, მუშენდა ბიბლია იჩიებ, ნამდა „ღორონთ ჸოროფა რე“ (1 იოან. 4:8). ღორონთშო ჸოროფა გრძნობაშე მეტის ნიშნენს. თინა მუშ ჸოროფას საქმეეფით მიმტკიცენა. იოანექ ჭარ: „ღორონთიშ ჸოროფაქ თით ქიძირ, ნამდა მუშ ხვალეგუნაჭყეფ სქუა ქუმაშქვჷ დედამიწაშა, ნამდა თიშ ჭყოლოფათ სიცოცხლე მემღებდესკო“ (1 იოან. 4:9). მუჟამსით იეჰოვაშ, იესოშ, თანაქრისტიანეფიშ დო შხვეფიშ ჸოროფას გეგმიფრჩქინანთინ, თეთ ქრისტიანულ მოწიფულობას ვოძირანთ (მათ. 22:37—39).

16. მუშენ დუვაფასენთ ხოლო უმოსო ბიბლიურ პრინციპეფს, მუჟამსით სულიერ მოწიფულობას ქიმვოჭირნუანთ?

¹⁶ მუთ უმოსო მივანჭუაფუთ მოწიფულობას, თით უმოსო დუვაფასენთ ბიბლიურ  პრინციპეფს. კანონეფს კონკრეტულ სიტუაციეფიშ დროს გიმიბრინუანთ, მარა პრინციპეფით შხვადოშხვა სიტუაციეფიშ დროს ფხემძღვანელენთ. მაგალთო, ბაღანას ვარჩქილე, მუშენ რე ოშკურანჯ გლახა ხალხწკუმა ურთიერთობა, ათეშენ გონიერ მშობელ თის წესეფს უდგინენს, ნამუთ იცვენს ბაღანას (1 კორ. 15:33). მარა მუჟამსით ბაღანა მოწიფულობას მიოჭირნუანსინ, თინა გურაფლენს, მუჭო გიმირინუას ბიბლიურ პრინციპეფ. თაშ ნამდა, თე პრინციპეფ მეხვარებ თის გონივრულო გეგშაგორას მეგობრეფი (წეკითხით 1 კორინთელები 13:11; 14:20). * ბიბლიურ პრინციპეფს მუთ უმოსო ბგურაფლენთინ, თით უმოს სანდო იჸუაფ ჩქინ სინდის. ჩქი უმოს უჯგუშო მარჩქვენუნა, მუს ითხინს ღორონთი ჩქინდე შხვადოშხვა სიტუაციაშ დროს.

17. მუშენ შემლებნა ფთქუათ, ნამდა ირფელ მიღნა, მუთ საჭირო რე, მიბღათ ღორონთიშ მოსაწონ გადაწყვეტილებეფ?

¹⁷ ჩქი ირფელ მიღნა, მუთ საჭირო რე, მიბღათ ღორონთიშ მოსაწონ გადაწყვეტილებეფ. ბიბლიას მოჩამილ რე კანონეფ დო პრინციპეფ, ნამუთ მოხვარნა მზათ ვორდათ ირ ჯგირ საქმეშო (2 ტიმ. 3:16, 17). თაშ ნამდა, გუვაგრძელათ ღორონთიშ პრინციპეფიშ გორუა დო ქინვანჭათ, „მუ რე ღორონთიშ ნება“ (ეფეს. 5:17). გეგმიბრინუათ არძა ოგურაფალ საშვალება, ნამუთ ხეშა მალაფარ რე ქრისტიანულ კრებას („საგუშაგო კოშკის პუბლიკაციების საძიებელი“, „იეჰოვას მოწმეების საკვლევი სახელმძღვანელო“, საგუშაგო კოშკის ბიბლიოთეკა, საგუშაგო კოშკის ონლაინ ბიბლიოთეკა, JW ბიბლიოთეკა). თე საშვალებეფ მოხვარნა პირად გურაფა დო ოჯახურ თაყვანიშცემაშ დროს.

18. მუ კურთხევეფს მომღანა იეჰოვაშ კანონეფიშ დო პრინციპეფიშ გიმორნაფა?

¹⁸ იეჰოვაშ კანონეფიშ დო პრინციპეფიშ გიმორნაფა კურთხევეფს მომღანა. ფსალმუნიშ 119:97—100-ის ჭარ: „მუჭო მიჸორს სქან კანონი! თიშე ფიფქრენქ მთელ დღას. ჩქიმ ნტერეფშე უმოს ბრძენო გინმორთინუანს სქან მცნება, მუშენდა მარადიულო ჩქიმ რე თინა. ჩქიმ მასწავლებელეფშე უმოს გაგება მიღჷ, მუშენდა ფიფქრენქ სქან შეხსენებეფშე. მოხუცებულეფშე უმოსო გიმიფრჩქინანქ გაგებაშ უნარს, მუშენდა იფცვენქ სქან ბრძანებეფს“. სიბრძნე დო გაგებაშ უნარ უმოსო მაღვენუნა, მუჟამსით დროს გეგმოფრთუნთ დო დეფიფქრებუთ ღორონთიშ კანონეფ დო პრინციპეფშე. მუჟამსით ჩქინ სინდის ღორონთიშ კანონეფით დო პრინციპეფით გეწაფებუნ, ქიმვოჭირინუანთ „ქრისტეშო დამახასიათებელ მოწიფულობას“ (ეფეს. 4:13).