შხვადოშხვა ფერ უღუდუნ თიშენ თე წიგნეფს ცაშორტყაფის უძახდეს. მუჟამსით თე წიგნეფს გუვოჯინედინ, თექ მოჩამილ სურათეფქ მანგარო იმოქმედ ჩქიმწკუმა. თეშ შედეგო, ბაღანობაშე მოკოდ თიცალ ბიბლიურ რჩქინაშ მეღება, მუნერით თე წიგნეფს რდუ მოჩამილ.

მაჟია მსოფლიო ჩხუპ მალას ინდოეთშა ხოლო ქუმანჭირნუანდჷ, თეშ იძირედ, ნამდა ჩქიმ ცხოვრება იუფრაშებუდ. ჩქიმ მშობლეფქ ართიანს ჩეთხის. მიჭირდ თიშ გაგებაქ, მუშენ ეთხიებდეს ართიანს თინეფ, მით მანგარო მიჸორდჷ. ემოციურო განადგურებულ ვორდ დო დუც მეტებულო ბგინაფლენდჷ. ართ კაკალია სქუა ვორდინ თიშენ ფიფქრენდჷ, ვამაშიდ გურიშ ელაკინა დო მოხვარა, ნამუთ მანგარო მოკოდ.

მა დო დიაჩქიმ ქალაქ კარაჩის ფცხოვრენდით. ართ დღას ჸუდეშა ქუმმაკითხეს ართ ხანშა მიშულირ ექიმქ ფრედ ჰარდაკერქ. ჯიმა ფრედ ხოლო თი მისიონერეფცალო, მიდგაქ ჩქი წიგნეფ დომტუეს, იეჰოვაშ მოწმე რდუ. თიქ დიაჩქიმს ბიბლიაშ გურაფა შეთავაზ. დიაჩქიმქ ვედეთანხმჷ, მარა უწუ, ნამდა შილებედ მა  დებინტერესიკო. მაჟია მარას ჯიმა ფრედიწკუმა ბიბლიაშ გურაფა ქიდიპჭყჷ.

მუსხირენ მარაშ უკულ ქრისტიანულ შეხვალამეფშა ქიდიპჭყჷ გილულა, ნამუთ ჯიმა ჰარდაკერიშ კლინიკას იტარებუდ. თე შეხვამალას სოდგარენ 12 ხანშა მიშულირ მოწმე ოსწრუდ. თინეფქ გურშა ელამკინეს დო სქუაცალო მოქცუდეს. ჸოროფათ იფშინანქ თი მომენტეფს, მუჟამსით თინეფ ჩქიმ გვერდით ხედეს, ოცადდეს ქუგამგესკო დო ნამდვილ მეგობრეფცალო მოქცუდეს, მუთ თიმწკუმა მანგარო მოსაჭირუდ.

ჭიჭე ხანშა ჯიმა ჰარდაკერქ მიწუ მსახურებაშა მიდამრთუმდესკო. თიქ დუმოგურუ პორტატული გრამაფონიშ გიმორნაფა, ნამუშ საშვალებათ ხალხის ჭიჭე ბიბლიურ მოხსენებეფშა ვორჩქილუანდით. კანკალე მოხსენება გვალო პირდაპირ იჩიებუდ ორაგადეს დო ათეშენ ნამთინეს ვა მოწონდ თინა. თეშ უმკუჯინუო, მა იშენ მოხიოლუდ შხვეფწკუმა ქადაქება დო დიდ მონდომათ ვორთუდ თე საქმეს.

იაპონიაშ ჯარქ ინდოეთშა გემშეჭკირ დო ბრიტანეთიშ მთავრობაქ იეჰოვაშ მოწმეეფიშ თხოზინ ქიდიჭყჷ. 1943 წანაშ კვირკვეს თე სიტუაციაქ მა ხოლო ქეშმეხუ. სკოლაშ დირექტორქ, ნამუთ ანგლიკანურ ეკლესიაშ მღვდელ რდუნ, დიაჩქიმს უწუ, ნამდა იეჰოვაშ მოწმეეფწკუმა ურთიერთობათ, შხვა მოსწავლეეფს გლახა მაგალითის ვარზენდჷ. დიაჩქიმს მანგარო აშკურინ დო ათეშენ გილამვარუ მოწმეეფწკუმა ურთიერთობა. უმოს გვიანო თიქ მუაჩქიმშა გომტუ, ნამუთ 1 370 კმ-იშ მაშორას, ჩრდილოეთით, ქალაქ პეშევარს ცხოვრენდჷ. სულიერ გარემოს დუვოკორდ დო ათეშენ სულიერო დეფსუსტ.

1947 წანას ქალაქ კარაჩიშა დიფრთ სამუშაშ ოგორშა დო ჯიმა ჰარდაკერს კლინიკაშა ქიმვაკითხე. თის მანგარო ახიოლ ჩქიმ ძირაფაქ დო ჯგირო მემიღჷ. თინა ფიქრენდჷ, ნამდა ჯამრთელობაშ პრობლემეფ მიღუდ.

„აბა ქომწი, მუ გაწუხენს?“, — პკითხ თიქ.

„მუთუნ ვა მაწუხენს. მა სულიერ მოხვარა მოსაჭირ დო ბიბლიაშ გურაფა მოკო“, — ვუპასუხ.

„მუჟამშე გოკო დიჭყე?“, — პკითხ თიქ.

„ასე ხოლო მზათ ვორექ“, — ვუპასუხ მა.

თიმ ონჯუას ბიბლიაშ გურაფა ქიდიპჭყჷ. დუც თეშ ბგინაფლენდჷ, ითამ კინ ჸუდეშა დიფრთკო. დიაჩქიმ ირნერო ოცადუდ ჭეშმარიტებაშე ჩქიმ მიკოჸოთამას, მარა გინოჭყვიდილ მაფუდ, ირიათო ვემსახურკო ღორონც. 1947 წანაშ 31 არგუსოს, იეჰოვაშა დუდიშ მეძღვინუა დო ნათუა გეგნოპჭყვიდ. ჭიჭე ხანშა, მუჟამსით 17 წანერო გინიფრთინ, პიონერულ მსახურება ქიდიპჭყჷ.

პიონერულ მსახურება პირველო კვეტას დიპჭყჷ, სოდეთ ჯვეშო ბრიტანეთიშ ჯარ გერდჷ. 1947 წანას ინდოეთიქ ჟირ ნაწილო, ინდოეთო დო პაკისტანო * გირთჷ. თე მოვლენეფს რელიგიურ ძალადობაქ დო ისტორიას ართ-ართ მასიურ მიგრაციაქ ქუმაჸუნ. თი დროს სოდგარენ 14 მილიონ კოც აჸუ ჸუდექ დატებელქ. მუსლიმანეფქ ინდოეთშე პაკისტანშა გეგნორთეს, თე დროს ინდუსეფქ დო სიკხეფქ პაკისტანშე ინდოეთშა მიდართეს. თეცალ არეულობაშ დროს ხალხით ეფშა მატარებელით კარაჩიშე კვეტაშა მიფშჷ. დინახალე ონტირუ ვა რდუ, ათეშენ მთელ შარას ვაგონიშ გალე გივორდჷ დო მოაჯირით მიმარგუდ დუდ.

კვეტას ჯორჯ სინხის შეფხვად, ნამუთ სპეციალურ პიონერო მსახურენდჷ. თინა სოდგარენ 25 წანერ რდუ. თიქ ჯვეშ ველისპეტ ქომუჩ, ნამუშ საშვალებათ გვალა ადგილეფშა გილეფშჷ. უმენტაშ დროს ხვალე ფქადაქენდჷ. ამშვ თუთაშ დინახალე 17 ბიბლიაშ გურაფა ქიდიპჭყჷ დო თინეფშე ნამთინექ საბოლათ დინათ. ართ-ართ რდუ სადიქ მასი, ნამუთ ჯვეშო ჯარს მსახურენდჷ. თიქ მა დო ჯორჯის მიმეხვარეს მუსხირენ ბიბლიურ ლიტერატურა პაკისტანელეფიშ მშობლიურ, ურდუ ნინაშა გეგნომთარგმნუდესკო. დრო ხანიშ უკულ სადიქ სახიოლო ამბეშ გურგედვალირო ქადაქება ქიდიჭყჷ.

ჭიჭე ხანშა კარაჩიშა დიფრთჷ, სოდეთ ჰენრი ფინჩ დო ჰარი ფორესტწკუმა ართო ქიდიპჭყჷ ქადაქება. თინეფს ახალ ნათებ აფდეს გალაადიშ სკოლა. მა ბრელ მუთუნ დიბგურე თე ჯიმალეფშე. ართშა ჯიმა ფინჩწკუმა ართო ფქადაქენდჷ ჩრდილოეთ პაკისტანს. თი მხარეშ გვალა ადგილეფს ურდუ ნინაშა მორაგადე ბრელ პიროვნებას შეფხვადით, მიდგაქ ბიბლიურ ჭეშმარიტებათ დეინტერეს. ჟირ წანაშ უკულ, მა ხოლო გემკოფრთ გალაადიშ სკოლა დო  პაკისტანშა დიფრთჷ, სოდეთ მინშა რაიონულ ზედამხედველო ვმსახურენდჷ. მა ლაჰორს, მისიონერეფიშ ჸუდეს ფცხოვრენდჷ შხვა სუმ მისიონერწკუმა ართო.

სანარღოთ, 1954 წანას ლაჰორს ცხოვრენდესინ თი მისიონერეფს ართიანშა ვემიახუჯეს, ათეშენ ფილიალქ თინეფ შხვადო დანიშნჷ. მა გურუგუჩამუო ართ-ართიშ მხარე ქიდეპკინ, ათეშენ მკაცრ რჩევა ქომჩეს. გურქ მანგარო გომტირხჷ. თეშ უკულ კარაჩიშა დიფრთჷ დო ჭიჭე ხანშა ლონდონშა გეგნოფრთ ოცხოვრეფშა თი იმენდით, ნამდა ირფელ დუდშე ქუდომჭყაფუდკო.

ლონდონიშ კრებას, სოდეთ მა ვმსახურენდინ, ბრელ ბეთელელ რდუ. ფილიალიშ კომიტეტიშ წევრ ჯიმა პრაის ჰიუზი დიდ ყურადღებას მაქციენდჷ. ართშა თიქ მიწუ, მუჭო მეჩჷ თის რჩევა ჯიმა ჯოზეფ რუტერფორდიქ, ნამუთ თი დროს ქადაქებაშ საქმეს ხემძღვანელენდჷ. მუჟამსით ჯიმა ჰიუზიქ დუდიშ გიშაღალა ქიდიჭყუნ, რუტერფორდიქ თის პირდაპირ ქუწუ ორაგადე. გაკვირვებულ ვორდ თით, ნამდა ჯიმა ჰიუზი თე ამბეს გოძიცებულო იშინანდჷ. თიქ მიწუ, ნამდა დუდშე გურქ მანგარო ქელაჭვჷ. მარა უკულ ქიმეხვად, ნამდა დასურო ოსაჭირუდ მკაცრ რჩევა დო თავრეშე იეჰოვაშ ჸოროფა ხოლო ქოძირ (ებრ. 12:6). თიშ სიტყვეფქ ჩქიმ გურს ქიმოქმედ დო სულიერო გუმამანგარ.

თე დროშო დიაჩქიმქ ხოლო გინილ ლონდონშა დო ბიბლიაშ გურაფა ქიდიჭყჷ ჯიმა ჯონ ბარიწკუმა, ნამუთ უმოს გვიანო ხემძღვანელ საბჭოშ წევრო მსახურენდჷ. დიაჩქიმ სულიერო წიმი მიშჷ დო 1957 წანას დინათ. დრო ხანიშ უკულ ქიგებგჷ, ნამდა ღურაშახ მუაჩქიმ ხოლო ნოგურაფუე ბიბლიას იეჰოვაშ მოწმეეფწკუმა.

1958 წანას ოსურო ქიმიპჸონ ლინი, ნამუთ დანიაშე ლონდონშა რდუ ოცხოვრეფშა გინულირ. ართ წანაშა ძღაბიქ ქეშმეძინეს, ნამუსით ჯეინ გივოდვით. თიშ უკულ ხოლო ოთხ სქუაქ ქეშმეძინეს. თე დროს ფულემიშ კრებას ვმსახურენდჷ, ნამუთ ჩქიმო დიდ პატი რდუ. მარა 1967 წანას ადელაიდაშა (ავსტრალია) გინიბლით ოცხოვრებშა, მუშენდა ლინის ჯამრთელობაშ პრობლემეფ უღუდ დო უმოს ტიბ კლიმატ ოსაჭირუდ.

ჩქინ კრებას ადელაიდას 12 ხანშა მიშულირ ცხებულ ქრისტიან რდუ. თინეფ მთელ მონდომათ ხემძღვანელენდეს ქადაქებაშ საქმეს. ჩქი ხეთეშე ქიგვანწყით სულიერ განრიგის.

1979 წანას მა დო ლინს მახუთა ბაღანაქ, დანიელქ ქეშმეძინეს. თის დაუნიშ სინდრომ * უღუდ რთულ  ფორმეფს დო ბრელ დრო ვაღინედ. ამდღა ხოლო მიჭირს თი ამბეშ გოშინა, მუთ თიმ დროს გინიბღით. ჩქი დუც გუვალუაფუდით დანიელს დო თეწკუმა ართო შხვა სქუალეფს ხოლო ვავარკენდით ყურადღებას. დანიელს მინშა ფერ უდინუდ დო სასწრაფოთ საავადმყოფოშა მეპჸუნდეს. თეშ მიზეზ თინა რდუ, ნამდა გურ ჟირ ადგილს აფუდ რხვილ დო თენა ჟანგბადიშ უკმარისობას იწვიენდჷ. მართალ რე, დანიელს მანგარ გლახა ჯამრთელობა უღუდ, მარა თინა ართო ჭკვერ დო მოჸოროფე ბაღანა რდუ. თის იეჰოვა ხოლო მანგარო უჸორდ. მუჟამსით ჭკუმუაშახ ბლოცულენდითინ, დანიელ მუშ ჭიჭე ხელეფს აკუნჭირანდჷ, დუც გიმუკინანდჷ დო ლოცვაშ უკულ მთელ გურით „ამინს“ იჩიებუდ. თეშ უკულ იჭყანდჷ ჭკუმუას.

ოთხ წანერ რდუნ თეშ, დანიელქ ლეიკემიათ დელახ. მა დო ლინს ფიზიკურ დო ემოციურ ძალეფ მაფდეს ეშალიებურ. ბგინაფლენდ, ნამდა მეტიშ გენტირნაფა ვეშებლებუდ. ზუსტას თიცალ დროს, მუჟამსით მა დო ჩქიმ მეუღლეს მანგარო მაფდეს გურ გოტახილინ, რაიონულ ზედამხედველქ, ნევილ ბრომიჩიქ ქუმმაკითხეს. თიმ სერს ჩილამურით ეფშა თოლეფით, თიქ გურშა ქომხუტოლეს. ჩქი სუმხოლო იმგარდით. თიშ ჸოროფაქ დო გემუან სიტყვეფქ მანგარო ელამკინეს გურშა. თინა სერიშ პირველ საათშა ჩქინწკუმა რდუ. ჭიჭე ხანშა დანიელქ დომღურეს. თენა არძაშ უმოს გურსაჭუო ამბე რდუ ჩქინ ცხოვრებას. მარა თე გურჭუაშ გინოღალას თიშ რწმენა მოხვარნა, ნამდა მუთუნს — ღურას ხოლო ვეშულებ დაშორას დანიელ იეჰოვაშ ჸოროფას (რომ. 8:38, 39). ჩქი ართ შურ მიღნა დო ვუჯინეთ თი დროს, მუჟამსით იეჰოვა გათელენს ჩქინ სქუას ახალ ქვეყნიერებას (იოან. 5:28, 29).

ჯამრთელობაშ სერიოზულ პრობლემეფიშ უმკუჯინუო, ამდღა უხუცესო ვმსახურენქ. ჩქიმ გამოცდილება მოხვარ შხვეფიშ მდგომარეობაშა გემშაფრთე დო გურშა ეუქექუე, განსაკუთრებულო თინეფს, მიდგას პრობლემეფ უღჷ. ვოცადუქ ვაგვაკრიტიკე თინეფ. პირიქით, ჩქიმ დუც ვოკითხუქ: მუჭო იმოქმედ ულირ ცხოვრებაქ თინეფიშ ემოციეფ დო აზროვნებაწკუმა? მუჭო შემლებ თინეფიშ ელარნა? მუჭო შემლებ მივეხვარე, ნამდა ვემიოტუან იეჰოვაშ მსახურება? მა მანგარო მიჸორს კრებაშ წევრეფიშ გურიშ ელაკინა დო სულიერო მოხვარა, მუშენდა თენა მა ხოლო ძალეფს მარზენს.

ჩქიმ დუდშა ბგინაფლენქ ფსალმუნმაბირეშ სიტყვეფს: „მუჟამსით გლახა ფიქრეფ მისოფუანდუნ, სი ელამქექე გურშა დო დუმაწყნარ“ (ფსალმ. 94:19). ღორონთიშ ხე მანგარო იბგინ ოჯახის სირთულეეფიშ, თხოზინიშ დო გურიშ გოტახუაშ დროს. დასურო, იეჰოვა ნამდვილ მუმა რე ჩქიმო!