1. ხიოლიშ მუ მიზეზეფ მიღნა?

სახიოლო რე თიშ ძირაფა, მუჭო იძინანს იეჰოვაშ მოწმეეფიშ რიცხვი. ულირ წანას მთელ მსოფლიოს რეგულარულო 10 მილიონშე უმოს ბიბლიაშ გურაფა იტარებუდ. თენა არგამათ ოძირანს, ნამდა ღორონთიშ მსახურეფიშ „სინთე“ ჯგირო ანათენს! თეს გეძინელ, გოშინაშ ონჯუას მილიონობით პიროვნებაქ დესწრჷ, სოდეთ თინეფქ ქიგეგეს, მუშმადიდა ჸოროფა გიმირჩქინ ღორონთიქ გიშაჸიდრალიშ საშვალებათ (1 იოან. 4:9).

2, 3. ა) მუ ვა მოცილნა, ნამდა „მურიცხეფცალო ვანათენდათ ქვეყნიერებას“? ბ) მუ საკითხეფს გუვარჩიენთ ასეიან სტატიას, ნამუშ გურშენ მათეშ 5:14—16-ის მეურს ჩიება?

² მთელ მსოფლიოს იეჰოვაშ მოწმეეფ შხვადოშხვა ნინაშა იბჩიებუთ. მარა თენა შუროთ ვა მოცილნა, ნამდა იეჰოვას თაყვან ფცათ, მუჭოთ თიშ ოჯახიშ წევრეფქ (გამოცხ. 7:9). ვა უღჷ მნიშვნელობა, ნამ ნინაშა იფჩიებუთ ვარდა სო ფცხოვრენთ, ჩქი შემლებნა „მურიცხეფცალო ვანათენდათ ქვეყნიერებას“ (ფილ. 2:15).

³ ჩქინ მსახურებათ, ქრისტიანულ ართობათ დო სიფხიზლეს ვა  ვოდინუანთინ თით, იეჰოვას განვადიდენთ. ასეიან სტატიას თე სუმ საკითხიშ გურშენ მაღვენუნა ჩიება (წეკითხით მათე 5:14—16). *

4, 5. ა) მუჟამსით საქმე ქადაქებას ოხუნ, მუჭო შემლებნა ჩქინ სინთექ ანათას? ბ) მუ დადებით შედეგეფ მაჸუნუ ჩქინ ჯგირ საქციელს? (ქოძირით სურათ 21 გვერდის).

⁴ 1925 წანაშ 1 ივანობაშ გინაჯინალ კოშკის მოჩამილ რდუ სტატია „სინთე უკმელას“, სოდეთ ჭარუდ: „მითინს ვეშიალებე თე ბოლო დღალეფს უფალიშ ართგურ ქუდოსკიდას . . . ონდო ვეგმირინუანს შესაძლებლობეფს, ნამდა მურიცხცალო ანათას“. თე სტატიას ენწყუმილ რდუ: «ქრისტიანს თეშ კეთება შეულებ სახიოლო ამბეშ ქადაქებათ დო „სინთეშ“ საქმეეფიშ კეთებათ». მუშო ოკო რაგად, ჩქინ სინთექ ანათასინ თეშ ართ-ართ საშვალება, სახიოლო ამბეშ ქადაქება დო მოწაფეეფიშ მომზადება რე (მათ. 28:19, 20). თეს გეძინელ, ღორონთიშ განდიდება ქრისტიანულ საქციელით ხოლო შემლებნა. მობინადრეეფ დო მიკმალ-მუკმალეფ ოკვირნა ჩქინ საქციელს. ჩქინ გოძიცელ სახე დო მეგობრულ მისალმება ბრელ მუთუნს იჩიებ ჩქინ გურშენ დო ღორონთშენ ხოლო.

⁵ იესოქ მუშ მოწაფეეფს უწუ: „ჸუჩა მინულაშ დროს ქიმიესალმით ოჯახის“ (მათ. 10:12). თი მხარეს, სოდეთ იესო დო მოწაფეეფ ხშირას ქადაქენდესინ, ჩვეულებრივ მუდგარენ რდუ უცხო კოჩიშ ჸუდეშა მინოპატიჟება, მარა ამდღა თენა ბრელ დიხას ჩვევათ ვა უღნა. მუჟამსით მობინადრეს ჩქინ მეულაშ მიზეზის რბილაშე გევუნწყუნთინ, თექ შილებე ჯგირო იმოქმედას თიწკუმა, ნაკლებო გეღიზიანას დო უმოს თავისფალო იგინას დუდ. მუჟამსით სტენდით ვმსახურენთინ, შილებე შევამჩნუათ, ნამდა გოძიცებულ სახე ქომღუნა დო ხალხის მეგობრულო ქუვოსალმუთ-და, ბრელქ შილებე ქუმორთას დო პუბლიკაცია გეჭოფას. თეგვარ საქციელ თინეფწკუმა ჩიებაშ დოჭყაფას მოხვარნა.

6. მუჭო გაფართოვ ართ წყვილქ მუნეფიშ მსახურება?

⁶ ართ ხანშა მიშულირ წყვილს, ნამუთ ინგლისის ცხოვრენსინ, გლახა ჯამრთელობაშ გურშენ ბრელ ხანით ვეშულებნა კარდოკარ მსახურებაშა მონაწილებაშ მეღება. ათეშენ თინეფქ გინოჭყვიდეს ჸუდეშ წოხოლე სტოლშა ლიტერატურა ქიგუდვალდესკო თი დროს, მუჟამსით მშობლეფ ბაღანეფს მიაკითხანდეს სკოლაშა, ნამუთ თინეფიშ ჸუდეშ გოხოლუას რე. ბრელქ დეინტერეს დო გეჭოფ წიგნ „ახალგაზრდეფიშ შეკითხვეფიშ“ პირველ დო მაჟია ტომიშ მუსხირენ ეგზემპლიარ დო ბროშურეფ. თინეფიშ კრებაშე ართ პიონერ დაქ ხოლო მიკორინუ თე ჩილ დო ქომონჯწკუმა ართო მსახურება. თე დაშ მეგობრულ დამოკიდებულებაქ დო წყვილიშ შურდოგურით გიმორჩქინელ მონდომაქ ართ მშობელს ბიბლიაშ გურაფაშ დოჭყაფა გეგნაჭყვიდრაფუ.

7. მუჭო შეილებდეს თქვან ქიანაშა გინულირ უცხოელეფიშ მოხვარა?

⁷ ბოლო წანეფს დევნილეფ შხვადოშხვა ქიანაშა გინმულა. მუშ კეთება შეილებნა, ნამდა ქიმეხვარათ თეცალ ხალხის იეჰოვაშ დო თიშ განზრახვეფიშ გაჩინებაფას? ხომ ვეშეილებდეს თინეფიშ ნინაშა ქუდიგურუათ მისალმება? თეშ კეთებას „JW ნინეფიშ აპლიკაცია“ მიგეხვარებნა. თეს გეძინელ, შეილებნა თინეფიშ ნინაშა შხვადოშხვა წინადადებეფ ქიდიგურუათ დო თეთ ჭეშმარიტებათ დაინტერესათ. თეშ უკულ შეილებნა ჩქინ ვებ-გვერდშე ქაძირუათ ვიდეოეფ დო პუბლიკაციეფ მუნეფიშ ნინაშა (კან. 10:19).

8, 9. ა) მუ პრაქტიკულ რჩევეფს ბღებულენთ შქამარაშ კრებაშ შეხვალამაშე? ბ) მუჭო შეულებნა მშობლეფს, მეხვარან ბაღანეფს კრებაშ შეხვალამეფშა მონაწილებაშ მეღებას?

⁸ იეჰოვა მოგურუანა ეფექტურ მსახურებას დო თეშო გიმირინუანს შქამარაშ შეხვალამას,  სოდეთ „ცხოვრება დო მსახურებაშ“ ფურცელ რე გარჩიებულ. თი პრაქტიკულ რჩევეფ, ნამუსით თე შეხვალამას ბღებულენთინ, მოხვარნა უმოს უჯგუშო გუვაკეთათ კინ მეკითხირ დო ჩუვატარათ ბიბლიაშ გურაფეფ.

⁹ ბრელ, მით კრებას პირველო ოსწრუნ, ამჩნიენს, ნამდა შეხვალამას ბაღანეფ ხოლო ღებულენა მონაწილებას. მშობლეფ, ქიმეხვარით თინეფს, მუნეფიშ სიტყვეფით გაკეთან კომენტარეფ. ბაღანეფიშ შურდოგურით ნათქუელ კომენტარეფქ ნამთინე დაინტერესებულს გინაჭყვიდრაფუ, ჭეშმარიტება მეუღებუდკო (1 კორ. 14:25).

10. მუჭო შეულებ ოჯახურ თაყვანიშცემას ართობაშა ხეშ შენწყუალა?

¹⁰ ჩქინ სინთექ ანათასინ თეშ ხოლო ართ საშვალება რე, ართობაშა ხეშ შენწყუალა, მუჭოთ ოჯახისინ თეშ, კრებას ხოლო. მშობლეფს შეულებნა თეშ კეთება ოჯახურ თაყვანიშცემაშ ონჯუაშ რეგულარულო ჩატარებათ. ბრელ ოჯახიქ გინოჭყვიდ ართო ქუჯინან „JW მაუწყებლობაშ“ პროგრამას დო უკულ გარჩუან, მუჭო შეულებნა თექ მოჩამილ ინფორმაციაშ გიმორნაფა. მუჟამსით ოჯახურ თაყვანიშმცემლობას ატარენან, მშობლეფს ოკო შუდან, ნამდა ჭიჭე ბაღანეფს შხვანერ ხემძღვანელობა ოსაჭირნა დო დიდეფს გვალო შხვანერ. ათეშენ, ირფელ გაკეთით, ნამდა ოგურაფალ მასალა ოჯახიშ არძა წევრშო რდას მოხუჯურ (ფსალმ. 148:12, 13).

11—13. მუჭო შეულებ არძას ხე შეუნწყუას ართობას კრებას დო მეხვარას შხვეფს, ნამდა ანათას თინეფიშ სინთექ?

¹¹ მუჭო შეულებნა ახალგაზრდეფს ხე შეუნწყუან ართობას კრებას დო გურშა ელუკინან შხვეფს, ნამდა ანათას თინეფიშ სინთექ? ახალგაზრდა ქორეთ-და, ჯგირ იჸუაფ დეინტერესათ ხანშა მიშულირ და დო ჯიმალეფით. შეილებნა ქოკითხათ, მუქ მეხვარეს თინეფს, ნამდა ართგურო ემსახურესკო იეჰოვას წანეფიშ დინახალე. თენა უმოსო ელაიკინანა გურშა მუჭოთ თქვან თეშ, თინეფს ხოლო! არძას შემლებნა მიზანო მიღდან, ნამდა ჯგირო ქეშეფხვადათ სამეფო დარბაზშა მოულირ ხალხის. თეგვარ საქციელ ხეს შეუნწყუნს ჩქინ ართობას დო უმოს მეტ პიროვნებას აღვენუ თიშ სურვილ, ნამდა ანათას თინეფიშ სინთექ. ჯგირ იჸუაფ გოძიცებულ სახეთ ქეშეხვადათ სტუმარეფს დო ქიმეხვარათ ადგილიშ გორუას. ქეცადით შხვა და დო ჯიმალეფ ხოლო გაჩინებაფუათ დო თეშ ქაგინებაფეთ დუდ, მუჭოთ ჸუდეს.

¹² მუჟამსით სამქადაქებლო მსახურებაშ შეხვალამეფს ატარენთინ, შეილებნა ქიმეხვარათ შხვეფს, ნამდა მეტ მონაწილება მიღან მსახურებას. ჯიმალეფ, დერწმუნით, ნამდა მსახურებაშო შესაფერის ტერიტორია გიღნა. მინშა შეილებნა ახალგაზრდეფ ხანშამიშულირეფწკუმა ართო გოუტუათ მსახურებაშა,  ნამდა თინეფს ფიზიკურო ქიმეხვარან. ასაკოვან და დო ჯიმალეფს, მიდგას ჯამრთელობაშ პრობლემეფ უღნან, ბრელიშ კეთება ვეშულებნა მსახურებას დო ათეშენ შილებე გურგოტახილეფ რდან. მარა თინეფ უჯგუშო იგინანა დუც, მუჟამსით ქოძირნა, ნამდა ზრუნენთ დო გარჩქილენა თინეფიშ. თქვან თეშნერ საქციელ დო მზრუნველობა, მეხვარებ ახალგაზრდეფს დო ხანშამიშულირეფს, გამოცდილეფს დო ნაკლებო გამოცდილეფს, ნამდა გურგედვალირო იქადაქან სახიოლო ამბე (ლევ. 19:32).

¹³ ფსალმუნმაბირექ ჭარ: „მუ ჯგირ რე დო მუ ჰამო, ნამდა ართო ცხოვრენა ჯიმალეფ ართობას!“ (წეკითხით ფსალმუნი 133:1, 2). * ისრაელეფშო ჯგირობუა მოუღუდ ართობას, მუშენდა იეჰოვაშ თაყვანიშმცემელეფ ართიანს ჯგირ მაგალითის არზენდეს. თენა დავითიქ ზეთის შეადარ, ნამუთ კანშო სასარგებლო რე დო სასიამოვნო შურ უღჷ. თეგვარო, თქვა ხოლო შეილებნა გურშა ელუკინათ და დო ჯიმალეფს დო ჯგირ თვისებეფ გიმიფრჩქინათ. თაშ ქიქციებუთ-და, ცქვაფაშ ღირსეფ რეთ. შეილებნანო კრებას უჯგუშო გეჩინებაფუათ და დო ჯიმალეფ? (2 კორ. 6:11—13).

14. მუჭო შეილებნა სამეზობლოს ანათენდას თქვან სინთე?

¹⁴ მუშ რაგად შილებე ჩქინ სამეზობლოშენ? ჩქინ გემუან სიტყვეფქ დო ჯგირ საქმეეფქ შილებე მეზობლეფ ჭეშმარიტებათ დაინტერესას. ქოკითხით თქვან დუც: „მუჭო მიჩინენა ჩქიმ მეზობელეფ? ქიფცვენქო ჸუდეს სისუფთავეს დო თეგვარო ქუნწყუნქო ხეს, ნამდა სამეზობლოს სისუფთავე რდას? ქომღუნო თიშ სურვილ, ნამდა შხვეფს მივეხვარე?“ შეილებნა ქოკითხათ შხვა მოწმეეფს, მუჭო იმოქმედ თინეფიშ ჯგირ საქციელქ დო მაგალითიქ ნათესეფ, მეზობლეფ, თანამშრომლეფ დო კლასელეფწკუმა. მუშო ოკო რაგად, თქვა ბრელ ჯგირ შემთხვევეფს ქიმირჩქილუანთ (ეფეს. 5:9).

15. მუშენ რე მნიშვნელოვან კურცხას ვორდათ?

¹⁵ ქუმოკონა ჩქინ სინთექ ანათას-და, ოკო ფშუდან, მუ დროს ფცხოვრენთ. იესო ირიათო ურაგადუდ მუშ მოწაფეეფს: „კურცხას რდათ“ (მათ. 24:42; 25:13; 26:41). ქიფიფქრენთ, „დიდ გასაჭირ“ ხოლო ჭიჭე ხანს ვამურს-და, კურცხას ვეპჸუაფუთ დო ნაკლებ ყურადღებას მივაქციენთ ქადაქებაშ საქმეს (მათ. 24:21). შედეგო, ჩქინ სინთე ჭიჭე-ჭიჭეთ შკირატუას ქიდიჭყანს დო შილებე გვალო დოშკირტას.

16, 17. მუ ოკო ვაკეთათ, ნამდა სიფხიზლე ვა ვოდინუათ?

¹⁶ მუჭოთ დრო მიკურსინ თეშ, მდგომარეობა უმოსო იუფრაშებ დო ათეშენ, არძა კურცხას ოკო ვორდათ. იეჰოვა საჭირო დროს ქიდიჭყანს მოქმედებას დო ჩქი ბჯერა, ნამდა თენა დასურო თაშ იჸუაფ (მათ. 24:42—44). თეშობას მოთვინება ოკო გიმიფრჩქინათ დო კურცხას ვორდათ. იკითხით ღორონთიშ სიტყვა ირ დღას დო დღას ვემიოტუათ ლოცვა (1 პეტ. 4:7). ყურადღება ქიმიაქცით თი და დო ჯიმალეფიშ გურიშ ემაკინალ მაგალითეფს, მით კურცხას რე დო თეგვარო ანათენა. ართ-ართ თეცალ შემთხვევა მოშინაფილ რე 2012 წანაშ 15 აპრილიშ „გინაჯინალ კოშკიშ“ მა-18 გვერდის მოჩამილ სტატიას (სამოცდაათი წელი „იუდეველის კალთას ჩაჭიდებული“).

¹⁷ მონაწილება მიღით მსახურებას დო თანაქრისტიანეფწკუმა ხოლოშიან ურთიერთობა გიღდან. თეშნერ საქციელ ხიოლს მოიღანა დო შურო ვეგინანთინ თეშ გემკურს დრო (ეფეს. 5:16). ულირ ოშ წანაშ დინახალე ჩქინ ჯიმალეფქ ბრელ მუთუნს მიოჭირნეს, მარა იეჰოვაშ ხემძღვანელობათ ამდღა უმოს დიდ საქმეეფს ვორთუთ. იეჰოვაშ საქმექ თიცალ მაშტაბეფს მიოჭირნუ, ნამდგას დღას ვეფიფქრენდით. თეგვარო, ჩქინ სინთე ირდიხას ანათენს!

18, 19. მუჭო მოხვარნა კრებაშ უხუცესეფ ვორდათ კურცხას დო ვიმსახურათ აქტიურო? ქიმიჸონით მაგალით.

¹⁸ რწმენას მიმანგარენა თიშ გაგება, ნამდა ჩქინ არასრულყოფილება ვა მოცილნა იეჰოვას  მუშ მოსაწონო ფცათ თაყვან. დაფასით თინა, ნამდა იეჰოვაქ „ძღვინო მუჩეს ადამიანეფ“ — კრებაშ უხუცესეფ (წეკითხით ეფესოელები 4:8, 11, 12). * ანწჷ, მუჟამსით უხუცესეფ ქუმგაკითხანან, ქირგებეთ თე შესაძლებლობა, ნამდა დეკვირათ თინეფიშ სიბრძნეს დო მიღათ რჩევა, ნამუსით გარზენა.

¹⁹ ინგლისის ართ წყვილქ ჟირ უხუცესის ქოთხუ, ნამდა თინეფშა ქიმუკითხირალდესკო, მუშენდა პრობლემეფ უღდეს. ოსურ სულიერო გლახათ გინაფლენდჷ დუც. ქომონჯიქ აღიარ, ნამდა ჯგირო ვახემძვანელენდ ოჯახის დო ოჯახურ თაყვანისცემას რეგულარულო ვატარენდჷ. უხუცესეფქ თინეფს იესოშ მაგალითშა გუმახვილეს ყურადღება. იესო ზრუნენდჷ მუშ მოწაფეეფშე დო ითვალისწინენდჷ თინეფიშ საჭიროებეფს. უხუცესეფქ ელუჩეს თე ჯიმას, მიაჸუნკო ქრისტეშ მაგალითის დო თიშ ოსურს უწის, ნამდა მოთვინება გეგმურჩქინუდკო. თეს გეძინელ, ნამთინე პრაქტიკულ რჩევა ხოლო ქიმეჩეს, მუჭო ჩატარესკო ოჯახურ თაყვანიშცემა მუნეფიშ ჟირ ბაღანაწკუმა ართო (ეფეს. 5:21—29). დრო ხანიშ მიკულაშ უკულ, უხუცესეფქ ქაცქვეს თე ჯიმას გიმორჩქინელ მონდომაშ გურშენ. ჯიმალეფქ ელუჩეს თის, თაშ გაგრძელკო დო ღორონთიშ წმინდა შურიშ ნდობა გეგმირჩქინკო, მუთ მეხვარებუდ ჯგირო უხემძღვანელკო ოჯახის. უხუცესეფიშ ყურადღებაქ დო ელარნაქ მეხვარ თე ოჯახის უნათებუდკო თინეფიშ სინთეს.

20. მუს შედეგის მიღენთ, მუჟამსით ქეცადებუთ ანათას თქვან სინთექ?

²⁰ ფსალმუნმაბირექ ჭარ: „ბედნერ რე არძა, მისით იეჰოვაშ შიშ უღჷ დო მით თიშ შარეფით გილურს“ (ფსალმ. 128:1). ბედნერეფ იჸუაფუთ, მუჟამსით შხვეფს ქიმეხვარებუთ, ემსახურან იეჰოვას, თქვან საქციელით ხეს ქეშუნწყუნთ ართობას დო კურცხას იჸუაფუთ. თეგვარო, შეგალებენა ანათას თქვან სინთექ. შხვეფ ქოძირნა თქვან ჯგირ საქმეეფს დო ბრელ ქიმიკორინუანს, განადიდას ჩქინ ზეციერ მუმა (მათ. 5:16).