„გამარჯობა! მუჭო რექ?“

მუშო ოკო რაგად, თე სიტყვეფ ბრელშა მაჸინა ნარაგად. თეწკუმა ართო, შილებე ხე ხოლო გეგწუღათ დო გუვაჯუნათ კოც. შხვადოშხვა ადგილს გამარჯობაშ რაგადიშ შხვადოშხვანერ წეს უღნა, მარა მიზან ირდიხას ართ რე. ჯგირ საქციელო ვეთვალუ, მუჟამსით კოჩის გამარჯობას ვა ვურაგადუთ ვარდა აშო მირაგადნან თიმწკუმა პასუხის ვა ვარზენთ.

მარა შილებე ნამთინეს უჭირდას გამარჯობაშ რაგად, მუშენდა მანგარ მორდებუანეფ რდან ვარდა უღირსობაშ გრძნობა აწუხენდან. ნამთინეს შილებე ოძნელდას შხვა ეროვნებაშ, კულტურაშ დო სოციალურ მდგომარეობა უღუნ ფერ კათაშა გამარჯობაშ რაგად. თე ირფელიშ უმკუჯინუო, უბრალოთ გამარჯობაშ რაგადის ხოლო ჯგირ შედეგეფ მოჸუნს.

ქოკითხით თქვან დუც: „მუშენ რე ჯგირ გამარჯობაშ რაგად? დო მუს იჩიებ ბიბლია თეშ გურშენ?“

მუჟამსით პირველ უცხოტომელქ, კორნელიუსიქ ქრისტიანო გინირთუნ, მოციქულ პეტრექ თქუ: „ღორონც გიშაკერძაფა ვა უჩქჷ“ (საქ. 10:34). უმოს გვიანო პეტრექ ჭარ, ნამდა ღორონც „ოკო არძაქ მინანუას“ (2 პეტ. 3:9). ჩქი შილებე თე მუხლეფ დუკავშირათ პიროვნებას, ნამუთ ბიბლიას გურაფლენს. მარა თე სიტყვეფ პეტრექ ქრისტიანეფიშ გურშენ ხოლო თქუ: „პატი ცით არძას, გიჸორდან მთელ საჯიმალო“ (1 პეტ. 2:17). თაშ ნამდა, ჯგირ იჸუაფ გამარჯობა ქუწუათ არძა ეროვნებაშ, კულტურაშ დო სოციალურ მდგომარეობაშ კათას. თეშნერ საქციელით, თინეფიშ პატიცემას დო ჸოროფას გიმიფრჩქინანთ.

მოციქულ პავლე ქრისტიანეფს ელუჩანდჷ: „მთელ გურით მიღით ართიან, მუჭოთ ქრისტექ მეიღეს მთელ გურით“ (რომ. 15:7). პავლექ განსაკუთრებულ ჸოროფათ მიშინუ თი ჯიმალეფ, მით თის ამანგარენდჷ. მუშო ოკო რაგად, და დო ჯიმალეფს ამდღა უმოსო ოსაჭირნა გურიშ ელაკინა, მუშენდა სატანა ღორონთიშ ხალხის ოწინააღმდეგ (კოლ. 4:11; გამოცხ. 12:12, 17).

ბიბლიურ მაგალითეფშე იძირე, ნამდა გამარჯობაშ რაგადის დიდ ძალა უღჷ.

მუჟამსით იეჰოვაქ გინოჭყვიდ, ნამდა მუშ სქუაშ სიცოცხლე მარიამიშ საშვილოსნოშა გეგნუღალუდკონ, თიქ ანგელოზი მიდაშკვჷ თიშა. ღორონთიშ ანგელოზიქ ჩიება თაშ დიჭყჷ: „გომორძგუა მარდით ეფშა ცირასქუა, სქანწკუმა რე იეჰოვა“. თე სიტყვეფიშ მორჩქილაფაქ მარიამს ოფიქრებელ გურჩქინ. ანგელოზიქ ქიმეხვად თეს დო უწუ: „ვაგაშკურნას მარიამ, ღორონთ გიწონუანს“. თიქ გეუნწყჷ მარიამს, ნამდა ღორონთიშ განზრახვა რდუ, მესიაშ დიდაქ იჸუკო. მარიამქ მორჩილება გეგმირჩქინ დო უწუ: „იეჰოვაშ მხევალ ვორექ! მუჭოთ იჩიებუქ თეშ ქორდას“ (ლუკ. 1:26—38).

ანგელოზშო დიდ პატი რდუ თეცალ ცნობაშ გინოჩამა დო თის შურო ვათაკილებ არასრულყოფილ პიროვნებაწკუმა რაგად. თიქ მარიამწკუმა ჩიება გამარჯობაშ რაგადით დიჭყჷ. მუშ გურაფა შემლებნა თე მაგალითშე? ვედმეზარან ოკო შხვეფშა გამარჯობაშ რაგადიქ დო გურშა ელაკინაქ. შემლებნა უბრალო სიტყვეფით ქიმიპკითხუათ შხვეფ დო დუვარწმუნათ, ნამდა დასურო იეჰოვაშ ოჯახიშ ნაწილ რენა.

პავლე მცირე აზიას დო ევროპას ბრელ და დო ჯიმას იჩინენდჷ. მუშ წერილეფს თინა შხვადოშხვანერო მიკითხანდჷ კრებაშ წევრეფს.

 თენა ჯგირო იძირე რომაელეფიშ მა-16 დუდშე. პავლექ ბრელ თანაქრისტიანს მეუჩინ მოკითხვა. თიქ და ფებე მიშინუ დო ჯიმალეფს ელუჩ: „მთელ გურით მიღით თინა უფალს, მუჭოთ წმინდეფს ოსკვანა დო ქიმეხვარით ირფელს, მუდგას გიგახვილნა“. პავლექ პრისკილა დო აკვილა ხოლო მიკითხჷ, მიდგას ხვალე მუ ვარინ, „უცხოტომელეფიშ არძა კრება“ უმარდუდ. თეს გეძინელ, მოციქულქ თინეფს ხოლო მეუჩინ მოკითხვა, ნამდგაშ გურშენ მუთუნნერ ინფორმაცია ვამღუნა, მაგალთო, ეპენეტეს, ტრიფენას დო ტრიფოსას, მით დუდგინოდვალირო ომსახურდეს ღორონც. თავრეშე იძირე, ნამდა პავლეს დღას ვაზარუდ და დო ჯიმალეფიშ მოკითხირ (რომ. 16:1—16).

წერმიდგინით, მუჭო ახიოლედეს თე ქრისტიანეფს თიშ გაგება, ნამდა პავლეს თინეფ ვა გოჭყოლად. შედეგო, თინეფს უმოსო ქეჸოროფებდეს პავლე მოციქულ დო ართიან ხოლო. თეშნერ ჸოროფათ მოკითხირ გურშა ელუკინანდჷ შხვა ქრისტიანეფს ხოლო დო მეხვარებუდ, რწმენა გემანგარესკო. დასურო, ართიანით დაინტერესება დო მოკითხირ, ამანგარენს მეგობრობას დო ართობას უნწყუნს ხეს.

მუჟამსით პავლე პუტეოლიშ პორტშე რომშა მიშუნ, ადგილობრივ ქრისტიანეფქ ქუმორთეს თიშ ოძირაფშა. მოციქულქ თინეფს შორშე თოლ ქუმუკინდუ დო „ღორონც მადლობა უწუ დო გურშა ელაკინ“ (საქ. 28:13—15). მინშა ხვალე გოძიცებულ სახეთ დო ხეშ დოვალაფათ შილებე გურშა ელვუკინათ თიცალ პიროვნებას, მიდგას დეპრესია უღჷ ვარდა მოწყინაფილ რე.

მოციქულ იაკობის მკაცრ რჩევა აფუდ ქრისტიანეფშა მიოჩამალ, მუშენდა თინეფ ქვეყნიერებაწკუმა მეგობრენდეს დო თენა სულიერ გაგებათ მრუშობათ ითვალუდ (იაკ. 4:4). მარა ყურადღება ქიმიაქცით, მუჭო დიჭყჷ თიქ წერილიშ ჭარუა:

„იაკობი, ღორონთიშ დო უფალ იესო ქრისტეშ მონა, მიკოცუმილ ვითოჟირ ტომს. მიგესალმებუთ!“ (იაკ. 1:1). მუშო ოკო რაგად, თინეფს უმოს ეფ აჸიდეს რჩევაშ მეღება, მუჟამსით მოციქულიშ მოკითხირშე ქოძირუნდეს, ნამდა თინა მუნეფიშ მანგო თვალუნდჷ დუც. დასურო, თანდაბლურ მოკითხირს საშვალებას მარზენა, სერიოზულ საკითხეფშე ადვილო იფჩუათ.

შილებე კოჩ მოკლეთ ქიმიპკითხუათ, მარა თეს ჯგირ შედეგეფ მაჸუნუ, მუჟამსით თეს ჸოროფათ გუვაკეთენთ. მინშა შილებე თენა შურო ვეშვამჩნუათ (მათ. 22:39). ირლანდიას ართ დაქ დარბაზშა კრება იჭყაფუდუნ ფერ დროს ქიმერთჷ. თინა კარს მინიშუნ თეშ, ართ ჯიმაქ გოუძიცუ დო უწუ: „გამარჯობა, მოხიოლ სქან ძირაფა“. თე დაქ გემნორთჷ დარბაზშა დო ქუდოზოჯ.

მუსხირენ მარაშ უკულ თე დაქ ქიმერთჷ თი ჯიმაშა დო უწუ, ნამდა თიმ დროს ჸუდეს პრობლემეფ უღუდ. თიქ უწუ: „თიმ ონჯუას გურ თიცალ აკოჭირებულ მაფუდ, ნამდა დახე კრებაშა ვებდჷ. კრებაშ შეხვალამაშე ბრელ მუთუნ ვაფშჷ, მარა სქან გამარჯობა დღას ვაგმოჭყორდუ. თექ მანგარო ელამკინ გურშა. მადლობა“.

თე ჯიმას აზრო ხოლო ვამალედ, მუშმადიდა ძალა უღუდ მუშ მისალმებას. თიქ თქუ: „მუჟამსით ქიგებგჷ, ნამდა ჩქიმ მოკითხირქ თე დაწკუმა ჯგირო იმოქმედუნ, მა ხოლო ჯგირო იბგინ დუდ“.

სოლომონქ ჭარ: „წყარს ქაჸუნე სქან ქობალ დო ბრელ დღაშ უკულ ქოძირუნქ თის“ (ეკლ. 11:1). მუჟამსით მარჩქვენუნა მუშმადიდა ძალა უღჷ მოკითხირს, განსაკუთრებულო ჩქინ და დო ჯიმალეფწკუმან, შხვეფსით ელვუკინანთ გურშა დო ჩქინ დუც ხოლო. თაშ ნამდა, ირიათო ქოფშუდან გამარჯობაშ ძალა!