1, 2. ა) მუნერ პოლიტიკურ მდგომარეობა რე მსოფლიოს? ბ) მუ საკითხეფს გუვარჩიენთ თე სტატიას?

ართ სამხრეთ ევროპელ და იშინანს ულირ ცხოვრებას: „ბაღანობაშე ირიათო უსამართლობას ვორწყედ, ათეშენ ვოწინააღმდეგუდ პოლიტიკურ სისტემას ჩქიმ ქიანას დო ხუც ვუკინენდ რადიკალურ ცვლილებეფს. თეს გეძინელ, მუსხირენ წანას ურთიერთობა მიღუდ პიროვნებაწკუმა, ნამუთ ტერორისტ რდუ“. ართ სამხრეთ აფრიკელ ჯიმა ჭეშმარიტებაშ გაგებაშახ ძალადობას ამართლენდ. თინა იჩიებ: „მა ბჯერდჷ, ნამდა ჩქიმ ტომი არძაშ უჯგუშ რდუ დო ათეშენ პოლიტიკურ პარტიას ქუვაკათ. ჩქი მოგურუანდეს, ნამდა მოწინააღმდეგეეფ ჭვირთით დომჸვილდესკო დო თინეფწკუმა ართო თი კათა ხოლო, მით ჩქინ ტომშე რდეს, მარა შხვა პოლიტიკურ პარტიაშ მხარე უკინებდეს“. ართ და, ნამუთ ცენტრალურ ევროპას ცხოვრენსინ, იჩიებ: „არასწორ წარმოდგენა მიღუდ დო ბჯოგუდ თინეფ, მით შხვა ეროვნებაშ ვარდა რელიგიაშ წარმომადგენელეფ რდეს“.

² თე მაგალითეფშე იძირე, მუნერ ტენდენცია რე ამდღა მსოფლიოს. ძალადობა უმოსო იძინანს, მსოფლიო უმოსო რე პოლიტიკურო გორთილ დო ბრელ ქიანას უცხოელეფ არგამათ გინაფლენა, მუჭო ჯოგნა თინეფ შხვეფს. ბიბლიას ბოლო დროს მახორუ ხალხიშ გურშენ  ჭარ: „თინეფწკუმა მორიგება შეიოლებერ ვეჸი“ (2 ტიმ. 3:1, 3). მუჭო შემლებნა ართობაშ შენარჩუნება გორთილ მსოფლიოს? ჩქი შემლებნა ბრელ მუდგარენ დიბგურუათ თევრეშე, მუჭო იქციებუდ იესო პირველ საუკუნეს, მუჟამსით ქიანა პოლიტიკურო რდუ გორთილ. მორთ, გუვარჩუათ სუმ საკითხ: მუშენ ვარდ იესო, ნამთინ პოლიტიკურ მოძრაობაშ წევრი? მუჭო ოძირუ თიქ, ნამდა ღორონთიშ მსახურეფქ ნამთინ პოლიტიკურ პარტიაშ მხარე ოკო ვედეკინან? დო მუჭო მოძირეს, ნამდა შხვეფიშ წინააღმდეგ ძალადობას გამართლება ვა უღჷ?

3, 4. ა) მუშ იმენდ უღდეს იუდეველეფს იესოშ დროს? ბ) მუჭო იმოქმედ მესიაწკუმა დაკავშირებულ იმენდეფქ იესოშ მოციქულეფწკუმა?

³ ბრელ იუდეველს, ნამუსით იესო უქადაქუდუნ, შურ ოლუდ, მუჟამ გეთავისუფლებდეს რომაელეფშე. იუდეველ ზელოტეფ ხეს უნწყუნდეს თის, ნამდა ხალხის თავისუფლებაშ სურვილ უმოსო ქოშიბუდკო. თე ექსტრემისტეფშე ბრელ გალილეელ იუდაშ აზრის უკინენდ ხუც, ნამუთ მუშ დუც მესიას უძახუდ დო ბრელ მიშეჸონ შეცდომაშა პირველ საუკუნეს. ებრაელ ისტორიკოს იოსებ ფლავიუს იუდაშ გურშენ იჩიებ: „თინა ახნარენდჷ თანამემამულეეფს, ნამდა რევოლუცია მუნწყუდესკო დო მშიშარეფს უძახუდ თინეფს, მით რომაელეფს ხარკის არზენდჷ“. საბოლათ გალილეელ იუდა რომაელეფქ ღურათ დასაჯეს (საქ. 5:37). ნამთინე ზელოტ ძალადობაშა ხოლო მიშჷ.

⁴ თე ექსტრემისტეფიშ გინაწონს, იუდეველეფიშ უმენტაშ შურ დო გურით ელუდ მესიას, ნამუთ პოლიტიკურ სისტემას დოთირანდ. მესიაშე ელდეს, ნამდა თინა მუშ ერს დიდებას ქუმუღანდ დო რომაელეფიშ ტყვეობაშე გათავისუფლენდ (ლუკ. 2:38;  3:15). ბრელს ჯერდ, ნამდა მესია დამყარენდ სამეფოს ისრაელს დო მილიონობით იუდეველ, ნამუთ შხვადოშხვა ტერიტორიას რდუ მიკოცუმილ, დართუდ მუშ ქიანას. ქიგიფშინათ, მუ კითხვა დუსვჷ ართშა იოანე ნათლიშმცემელქ იესოს: „სი რექო თინა, მიდგაქ ოკო მორთუკო, დო ვარ შხვას ოკო ველუდათ“ (მათ. 11:2, 3). შილებე იოანეს ოინტერესუდკო, შხვა მითინ ხომ ვეშუსრულენდ იუდეველეფს მუნეფიშ იმენდეფს. იესოშ ჟირ მოწაფე ხოლო, მიდგაქ თის გათელებაშ უკულ ემაუსიშ შარას შეხვადუნ, ფიქრენდჷ, ნამდა მესია ირსხენდჷ ისრაელს (წეკითხით ლუკა 24:21). * თე შემთხვევაშე ჭიჭე ხანშა, მოციქულეფქ იესოს კითხეს: „უფალ, ასე ოკო დურთინუენიო სამეფო ისრაელს?“ (საქ. 1:6).

5. ა) მუშენ ოკოდ გალილეას მახორუ ხალხის იესოშ გამეფება? ბ) მუჭო მიოხვამილუ იესოქ თინეფ, ნამდა ვა უღდეს სწორ აზროვნება?

⁵ მუჭოთ იძირენ, გალილეას მახორუ ხალხის იმენდ უღუდ, ნამდა მესია ირსხენდ თინეფს, ათეშენ ოკოდეს იესოქ იჸუკო მუნეფიშ მეფექ. თინეფ ალბეთ ფიქრენდეს, ნამდა იესო იდეალურ ლიდერ დო ჯგირ ორატორ იჸუაფუდ; თინა დასკილიდუანდ ლეხეფს დო შკირენულ კათას დარძღანდ. ართშა, მუჟამსით იესოქ სოდგარენ 5 000 კოჩი დადიარუნ, ქიმეხვად, მუ ულამდეს თინეფს (იოან. 6:10—15). მარა მაჟია დღას გალილეაშ ზღვაშ მაჟია მხარეს, იესოქ თექ შაყარელ ხალხის გეუნწყჷ, ნამდა სინამდვილეს თიშ მთავარ მიზანი რდუ, ხალხის სულიერო ქიმეხვარკო დო ვართ ხოლო მატერიალურო. თიქ ხალხის უწუ: „ვეხანდათ თიცალ საზრდოშო, ნამუთ გილელებ. იხანდით თიცალ საზრდოშო, ნამუთ მარადიულ სიცოცხლეს მოიღანა“ (იოან. 6:25—27).

6. მუჭო ოძირუ იესოქ, ნამდა თიშ მიზან ვა რდუ, დედამიწას უღუდკო ძალაუფლება? (ქოძირით სურათ მა-3 გვერდის).

⁶ ღურაშახ ჭიჭე ხანით ადრე, იესოქ ქეშიამჩნუ, ნამდა ნამთინე მუშ მიმაჸუნალ ელუდ, ითამ თინა იერუსალიმს ქუდაარსენდ სამეფოს. მარა იესოქ მინაშ მაგალით ქუმუჸუნ თინეფს დო ქაძირუ, ნამდა სწორას ვა ფიქრენდეს. თე მაგალითის იესოქ, ნამუთ „დიდგვაროვანო“ რე მოშინაფილ, შორ ქიანაშა ოკო იდუკო, მუდგას ბრელ დრო დესაჭირებუდ (ლუკ. 19:11—13, 15). იესოქ ხალხის თინა ხოლო ქაძირ, ნამდა ნეიტრალურ  პოზიცია უკინებუდ რომაელ მართველეფწკუმა. პონტიუს პილატექ იესოს კითხჷ: „სი რექო იუდეველეფიშ მეფე?“ (იოან. 18:33). შილებე თის ოშკურუდკო თიშა, ნამდა იესოქ პოლიტიკურ არეულობას გეგმიწვიენდ, მუთ დიდ პრობლემა რდუ პილატეშ მართველობაშ დროს. მარა იესოქ თის უპასუხ: „ჩქიმ სამეფო თე ქვეყნიერებაშ ნაწილ ვა რე“ (იოან. 18:36). თინა პოლიტიკურ საქმეეფშა ვემშეშ, მუშენდა თიშ სამეფო ზეცას რდუ. იესოქ პილატეს გეუნწყჷ, ნამდა დედამიწას თიშ მიზან „ჭეშმარიტებაშ გურშენ ქადაქება“ რდუ (წეკითხით იოანე 18:37). *

7. მუშენ შილებე ადვილ ვა რდას, ხუჯი ვადუკინათ პოლიტიკურ მოძრაობას?

⁷ იესოცალო, ჩქი ხოლო ჯგირო ქუმარჩქილენა, მუ რე ჩქინ მიზან-და, ირნერო ქივეცადებუთ, ფიქრეფით ხოლო ვადუკინათ ხუჯ მუთუნნერ პოლიტიკურ მოძრაობას. თენა შილებე ადვილ ვა რდას. ართ გილმალ ზედამხედველ იჩიებ: „მუთ დრო მიკურსინ, ხალხი უმოს რადიკალურ რე. ნაციონალიზმ უმოსო ივრცელებ დო ბრელ ფიქრენს, ნამდა პოლიტიკურ დამოუკიდებლობა გაუჯგუშენს თინეფიშ ცხოვრებას. თინეფიშ გინაწონს, ჩქინ და დო ჯიმალეფ ირნერო ოცადნა ვადინუან ქრისტიანულ ართობა დო მთელ ყურადღება გინუღნა სამეფოშ გურშენ სახიოლო ამბეშ ქადაქებაშა. თინეფ უჯინენა თი დროს, მუჟამსით ღორონთ ბოლოს მუღენს უსამართლობას დო შხვა პრობლემეფს, ნამუთ ამდღა მაწუხენა‘‘.

8. ქიმიჸონით მაგალით, მუჭო ურთულენდეს ცხოვრებას ოგაფურიშ ემაშაყარალეფ პირველ საუკუნეს მახორუ იუდეველეფს.

⁸ უსამართლობა ხშირას პოლიტიკურ არეულობაშ მიზეზ რე. იესოშ დროს ოგაფურეფიშ გაფა არძას აწუხენდჷ. გალილეელ იუდაშ აჯანყებაშ მიზეზ მოსახლეობაშ აღრიცხვა რდუ, ნამუთ რომაელეფქ თიშ გაგებელო ჩატარეს, ქოგაფულენდ დო ვარ ხალხი ოგაფურს. რომიშ მოქალაქეეფ დო თეწკუმა ართო თინეფ ხოლო, მით იესოს ურჩქილედუნ, ბრელ მუთუნიშ ოგაფურს გაფულენდეს. თეს გეძინელ, ოგაფურეფიშ კორუმპირებულ ემაშაყარალეფ უმოსო ურთულენდეს ხალხის ცხოვრებას. თინეფ საჯარო აუქციონს ჸიდულენდეს ოგაფურეფიშ ეშაყარუაშ უფლებას დო შაყარელ ფარაშე მოგებას ორწყედეს. მაგალთო, ზაქე ოგაფურიშ ემაშაყარალეფიშ უნჩაშ რდუ იერიხონს დო ხალხშე ფარაშ გიწოტყაბარუათ გემდიდრჷ (ლუკ. 19:2, 8). თიმ დროს ზაქეცალო ბრელ იქციებუდ.

9, 10. ა) მუჭო ოცადდეს იესოშ ნტერეფ, გემშუტყურუაფდესკო თინა პოლიტიკურ საკითხეფშა? ბ) მუს ბგურაფლენთ იესოშ პასუხშე? (ქოძირით სურათი მა-3 გვერდის).

⁹ იესოშ ნტერეფს ოკოდეს თიშ შეცდომაშა  მიშაჸონაფა დო ოცადდეს ოგაფურეფიშ საკითხწკუმა ნამდგაინიშ მხარე ქიდუკინებუდკო. თინეფქ იესოს სულადობრივ ოგაფურშენ კითხეს, ნამუთ ართ დინარ რდუ დო რომიშ იმპერიას მახორუ არძა კოჩის აფუდ ოგაფალ (წეკითხით მათე 22:16—18). * იუდეველეფს განსაკუთრებულო თე ოგაფურ ჯოგდეს, მუშენდა თავრეშე იძირედ, ნამდა რომს ომორჩილდეს. ჰეროდეშ მიმაჸუნალეფ, მიდგაქ თე საკითხ წიმოჭკირესინ, ფიქრენდეს, ნამდა იესო თე ოგაფურიშ საწინააღმდეგოს ქოთქუანდ-და, თის ამბოხებას ქეკაბრალენდეს. მარა იესო ქოთქუანდ, ნამდა თიშ გაფა აუცილებერ რდუნ, თეთ შილებედ მუშ მიმაჸუნალეფიშ გურ მიოდინუკო.

¹⁰ იესოქ სიფრთხილე გეგმიჩრქინ დო ნეიტრალურ პოზიცია ქიდეკინ ოგაფურეფიშ გაფაშ საკითხწკუმა. თიქ თეცალ პასუხ მეჩჷ თინეფს: „კეისარიშ კეისარს ქიმეჩით, ღორონთიშ ხოლო — ღორონც“ (მათ. 22:21). მუშო ოკო რაგად, იესოს უჩქუდ, ნამდა ოგაფურეფიშ ემაშაყარალეფწკუმა კორუფცია გავრცელებურ რდუ. მარა იესოს ვაკოდ შხვა მუდგარენშა ყურადღებაშ გინოღალა, მუშენდა არსებენდ ბრელით უმოს მნიშვნელოვან საკითხ — ღორონთიშ სამეფო, ნამუთ არძანერ პრობლემას ბოლოს მუღენდჷ. თიქ მაგალით მეჩჷ არძა მუშ მიმაჸუნალს, ნამდა ვეჩერუან მუთუნნერ პოლიტიკურ საკითხის, მუდგა სამართლიანო დო სწორას ვეძირედას თენა. თიშ მანგიორო, ნამდა უსამართლობაშ წინააღმდეგ მუნეფიშ აზრი ხონარმაღალო გიმოხანტანინ, ქრისტიანეფს პირველ ადგილშა ღორონთიშ სამეფო დო თიშ სამართლიანობა გეურენა (მათ. 6:33).

11. მუჭო შემლებნა აზროვნებაშ თირუა?

¹¹ ბრელ იეჰოვაშ მოწმექ გიორჯგინ პოლიტიკურ შეხედულებეფს, ნამუთ ართ დროს უღდეს. ართ და, ნამუთ დიდ ბრიტანეთის ცხოვრენსინ, იჩიებ: „უნივერსიტეტის სოციოლოგიაშ გურაფაშ უკულ, რადიკალურ აზროვნებაქ ქუმაშუ. მოკოდ ფერადკანიან ხალხიშ უფლებეფიშ დაცვება, მუშენდა ჩქი ბრელ უსამართლობა გინიბღით. მართალ რე, შემლებუდ ლოგიკურ არგუმენტეფიშ მოჸონოფა, მარა საბოლათ იშენით მუთუნქ ვეგშამირთ დო გურქ გომტირხ. ვამჩქუდ, ნამდა რასობრივ უსამართლობაშ მიზეზეფ ხალხიშ გურეფშე მოურს. მარა, მუჟამსით ბიბლიაშ გურაფა ქიდიპჭყინ, ქიმეფხვად, ნამდა საჭირო რდუ ცვლილებეფ ჩქიმ გურს ქიდიპჭყიკო. ართ ჩეკანიან და მოთვინებათ მოხვარუდ დოფთირეკო ჩქიმ ცხოვრება. ამდღა პიონერო ვმსახურენქ ჟესტეფიშ კრებას დო ბგურაფლენქ არძანერ ხალხის გეგნოფჩე ჭეშმარიტება“.

12. მუ რდუ „საფუარ“, მუდგას მოწაფეეფქ დუდ ოკო ეუჩილითესკო?

¹² იესოშ დროს რელიგია დო პოლიტიკა ართიანს რდუ მეწყორილი. ართ წიგნი (Daily Life in Palestine at the Time of Christ) იჩიებ, ნამდა „თი რელიგიურ სექტეფი, ნამუთ იუდეველეფ შკას რდუნ, ამდღარ პოლიტიკურ პარტიეფს მოგენს“. იესოქ მუშ მოწაფეეფ გაფრთხილ: „კურცხას ორდათ დო ვემკანჭათ ფარისეველეფიშ დო ჰეროდეშ საფუარს“ (მარ. 8:15). თე სიტყვეფ იესოქ ჰეროდეშ პარტიაშ მიმაჸუნალეფიშ გურშენ თქუ. ფარისეველეფ ხუც უკინენდეს იუდეველეფიშ დამოუკიდებლობას. მათეშ სახარებაშე იძირე, ნამდა იესოქ თე ჩიებაშ დროს სადუკეველეფ ხოლო მიშინუ, ნამუსით ვაკოდეს სიტუაციაშ თირუა. თე სექტაშ ბრელ წევრ სარგებლენდ პოლიტიკურ ძალაუფლებათ, ნამუთ თინეფშა რომიშ იმპერიას აფუდ მეჩამილ. იესოქ გასაგებო უწუ მოწაფეეფს, ნამდა ვა ურჩქილდესკო თი გურაფეფშა, ნამუსით თე ჯგუფეფ ავრცელენდეს (მათ. 16:6, 12). საინტერესო რე, ნამდა თე ირფელ იესოქ თიშ უკულ თქუ, მუჟამსით ხალხიქ თიშ გამეფება მინდომ.

13, 14. ა) მუჭო მაჸუნ ძალადობაქ დო უსამართლობაქ პოლიტიკურ დო რელიგიურ საკითხეფს? ბ) მუშენ ვამართლენს ძალადობას უსამართლობაშ წინააღმდეგ ულა? (ქოძირით სურათ მა-3 გვერდის).

¹³ მუჟამსით რელიგია დო პოლიტიკა რე  ართიანშა მეწყორილინ, თეს ადვილაშე შილებე მაჸუნას ძალადობაქ. იესო ოგურუანდჷ მუშ მოწაფეეფს, ნამდა თე სიტუაციეფს მითინიშ მხარე ვა დუკინებდესკო. ზუსტას ათეშენ ოკოდეს ფარისეველეფს დო მღვდელმთავარეფს იესოშ ჸვილუა. თინეფ იესოს პოლიტიკურ დო რელიგიურ ნტერო თვალუნდეს, ნამუთ მუნეფიშ ძალაუფლებას საფრთხეშ თუდო გიორინუანდჷ. თინეფქ თქვის: „მუშ ნებაშა მივაშკვათინ, არძა ქირწმუნენს თის, ქუმულა რომაელეფ დო ტაძარსით მიდამღანა დო ხალხის ხოლო“ (იოან. 11:48). თაშ ნამდა, მღვდელმთავარ კაიაფა მონაწილებას ღებულენდჷ იესოშ ღურათ დასაჯებას (იოან. 11:49—53; 18:14).

¹⁴ კაიაფაქ თიშ ოჭოფალო ჯარიშკოჩეფ სერით მიდაშკვჷ. იესოს უჩქუდ თინეფიშ საონჯღორო გეგმეფიშ გურშენ დო ბოლო სერს, მუჟამსით ართო ჭკუმუნდესინ, მოწაფეეფს უწუ ყამეფ მალუღალდესკო. ჟირ ყამა დასაბაღ იჸუაფუდ, ნამდა მოწაფეეფშა მნიშვნელოვან გაკვეთილ ქუდუგურუაფუდკო (ლუკ. 22:36—38). თიმ სერს პეტრექ ყამა იესოშ ოჭოფშა მოულირ ართ-ართ კოჩიშ წინააღმდეგ გეგმირინუ. მუშო ოკო რაგად, მოციქულ გარისხებულ რდუ თით, ნამდა იესოშ ოჭოფშა თინეფქ სერით მორთეს (იოან. 18:10). მარა თიქ პეტრეს უწუ: „დართინე ყამა მუშ ადგილშა, მუშენდა ყამაშ ემაჭოფალ ყამათ დოღურუ“ (მათ. 26:52, 53). თე გაკვეთილ ჯგირო მეურდჷ ლოცვას, ნამუთ იესოქ მუშ ჭოფუაშ სერს თქუ. თიქ ლოცვას მიშინუ, ნამდა მოწაფეეფ ვა ჸოფედესკო ქვეყნიერებაშ ნაწილ (წეკითხით იოანე 17:16). * უსამართლობაშ წინააღმდეგ ბრძოლა თინეფს იეჰოვაშა ოკო დუთმებდესკო.

15, 16. ა) მუჭო ოხვარ ღორონთიშ სიტყვა ქრისტიანეფს დაპირისპირებაშა დუდიშ ეჩილითაფას? ბ) მუ სხვაობას ორწყე ღორონთ ქვეყნიერებაშ დო მუშ ხალხ შკას?

¹⁵ ჟიშე მოშინაფილ სამხეთ ევროპელ დაქ ხოლო თე დასკვნაშა მერთჷ. თინა იჩიებ: „ქობძირ, ნამდა ძალადობას სამართლიანობა ვა მუღჷ. თეს ღურა დო შხვეფიშ განწარება მოჸუნს. გუმახარ ბიბლიაშე თიშ გაგებაქ, ნამდა ხვალე ღორონც შეულებ დედამიწას სამართლიანობაშ დამყარება. ბოლო 25 წანა რე ზუსტას თე ამბეშ გურშენ ფქადაქენქ“. დაჭყაფუს მოშინაფილ სამხრეთ აფრიკელ ჯიმაქ ჭვირთი „შურის ყამაშა“, ბიბლიაშა გოთირუ დო ასე მშვიდობაშ გურშენ უქადაქ შხვეფს, ვა უღჷ მნიშვნელობა თინეფ მუშ ტომშე რენა დო ვარ შხვა ტომშე (ეფეს. 6:17). ჟიშე მოშინაფილ დაქ, ნამუთ ცენტრალურ ევროპას ცხოვრენდუნ, იეჰოვაშ მოწმეთ გინირთ. თიქ ოსურო მიდაჸუნ თიცალ ეროვნებაშ ჯიმას, ნამუთ ადრე ჯოგუდ. სტატიას მოშინაფილ სუმ ხოლო პიროვნებაქ დოთირუ ცხოვრება, მუშენდა ოკოდეს ქრისტეშ მაგალითის მიაჸუნესკო.

¹⁶ მუნერ მნიშვნელოვან ცვლილებეფ რე თენა! ბიბლია კაცობრიობას ადარენს აღელვებულ ზღვას, ნამუსით ვა უჩქჷ მუშ ადგილი (ეს. 17:12; 57:20, 21; გამოცხ. 13:1). პოლიტიკურ საკითხეფ ხალხის ემოციეფწკუმა გლახათ მოქმედენს, რთუნს თინეფს დო უაზრო ძალადობას იწვიენს, მარა თინეფიშ გინაწონს, ჩქი მშვიდობას დო ართობას ვა ვოდინუანთ. მუჟამსით იეჰოვა თე გორთილ მსოფლიოს ოკვირუნ, თის გურს უტიბუანს თი ართობა, ნამუთ მუშ ხალხ შკას რე (წეკითხით სოფონია 3:17). *

17. ა) ნამ სუმ საშვალებათ შემლებნა ართობაშა ხეშ შენწყუალა? ბ) მუს გუვარჩიენთ ანწიან სტატიას?

¹⁷ მუჭოთ ბძირითინ, ართობაშა ხეშ შენწყუალა სუმ საშვალებათ შემლებნა: 1) ვონდუთ ღორონთიშ სამეფოს, ნამდა თინა გეგშასწორენს უსამართლობას, 2) ნამთინ პოლიტიკურ პარტიაშ მხარეს ვა ვორეთ დო 3) ვარიას იფჩიებუთ ძალადობაშენ. მარა მინშა ჩქინ ართობას შილებე ეცილას შხვა დო შხვა საკითხეფშე არასწორ წარმოდგენაქ. ანწიან სტატიას გარჩიებულ იჸუაფ მუჭო შემლებნა გივორჯგინათ თეს, მუჭოთ თენა იესოქ აკეთ პირველ საუკუნეს.