1. კოლოსელეფიშ 2:4, 8-შ თანახმათ, მუჭო ოცად სატანა ქიმოქმედას ჩქინ აზროვნებაწკუმა?

სატანას ოკო მიმოტებაფუან ღორონთიშ მსახურება. თე მიზანიშ მიოჭირნაფალო, თინა ოცად ქიმოქმედას ჩქინ აზროვნებაწკუმა, ნამდა მუშ მოსაწონო იფიქრათ დო მიფქცუათ. სატანას ოკო მიმოჩილითუან თიცალ მუდგარენეფით, მუთ მანგარო მობწონა (წეკითხით კოლოსელები 2:4, 8).

2, 3. ა) მუშენ ოკო მივაქცუათ ყურადღება კოლოსელეფიშ 2:8-ს მოჩამილ გაფრთხილებას? ბ) მუს გუვარჩიენთ თე სტატიას?

² ნამდვილო გივორეთო სერიოზულ საფრთხეშ წოხოლე, ნამდა სატანა მიმოჩილითუანა? მუშო ოკო რაგად, ქო! ყურადღება ქიმიაქცით, ნამდა კოლოსელეფიშ 2:8-ს ინოჭარილ გაფრთხილება პავლექ ურწმუნოეფს ვარინ, წმინდა შურით ცხებულ ქრისტიანეფს მეჭარ (კოლ. 1:2, 5). თე ქრისტიანეფ საფრთხეშ წოხოლე გერდეს თიმ დროს, მარა ამდღა ჩქი ხოლო უმოს დიდ საფრთხეშ წოხოლე გივორეთ (1 კორ. 10:12). მუშენ შილებე თეშ რაგად? სატანა დედამიწაშა რე გითოჸოთამილ, ათეშენ ირნერო ოცად მიოჩილითუას ღორონთიშ ართგურ მსახურეფ (გამოცხ. 12:9, 12, 17). თეს გეძინელ, ჩქი თიცალ დროს ფცხოვრენთ, მუჟამსით უბადოეფ ხოლო უფრაშო იქციებნა (2 ტიმ. 3:1, 13).

³ თე სტატიას გუვარჩიენთ, მუჭო გიმირინუანს სატანა „პოტიკ ცდუნებას“, ნამდა დომთირუან აზროვნება. ქობძირუნთ სატანაშ სუმ ხრიკის, ნამდგას თინა ჩქინ მიოჩილითაფარო გიმირინუანს (ეფეს. 6:11). თეშ უკულიან სტატიას გუვარჩიენთ, მუჭო ვებრძოლათ თი გლახა შედეგეფს, ნამუთ სატანაშ ხრიკეფს  მოჸუნს. პირველ რიგის, დეფიფქრათ მუშ გურაფა შემლებნა თევრეშე, მუჭო მიოჩილითუ სატანაქ ისრაელეფ დუნაპირებ ქიანაშა ინულაშ უკულ.

4—6. კანონიშ 11:10—15-იშ თანახმათ, მოსავალიშ მოჸუნაფაშ ნამ ახალ მეთოდ აფდეს დაგურაფალ ისრაელეფს დუნაპირებ ქიანაშა ინულაშ უკულ?

⁴ სატანაქ მოხერხებულო მიოჩილითუ ისრაელეფ დო კერპეფიშ თაყვანიშცემა ქუდაჭყაფუ. მუჭო აკეთ თიქ თენა? თის უჩქუდ, ნამდა დუნაპირებ ქიანაშა ინულაშ უკულ, ისრაელეფს მოსავალიშ მოჸუნაფაშ ახალ მეთოდეფ აჸიდეს დაგურაფალ. ეგვიპტეს ისრაელეფ ნილოსიშ წყარს გიმირინუანდეს მოსავალიშ ოწყარალო. მარა დუნაპირებ ქიანას ვარდჷ დიდ მალწყარ მოსავალიშ ოწყარალო, ათეშენ თინეფ დამოკიდებულ რდეს სეზონურ ჭვემეფ დო ცუნდშა (წეკითხით კანონი 11:10—15; ეს. 18:4, 5). თაშ ნამდა, ისრაელეფქ მოსავალიშ მოჸუნაფაშ ახალ მეთოდეფ ოკო დიგურუესკო. თენა ადვილ ვარდჷ, მუშენდა თინეფიშ უმენტაშიქ, მიდგას თეშ გამოცდილება უღუდ, უდაბნოს დოღურ.

⁵ იეჰოვაქ გეუნწყჷ მუშ ხალხის, ნამდა თინეფიშ სიტუაციაქ დითირ. თეშ უკულ თიცალ გაფრთხილება მეჩჷ, ნამდგას ართ მეჯინათ მუთუნ კავშირ ვა უღუდ მოსავალიშ მოჸუნაფაწკუმა: „კურცხას რდათ, ნამდა ვემეჩირთას თქვან გურქ, შარაშე ვეგნურთათ, ვა ცათ თაყვან შხვა ღორონთეფს დო ვა დაშკვათ ბირგულ თინეფიშ წოხოლე“ (კან. 11:16, 17). მუშენ მეჩჷ იეჰოვაქ ისრაელეფს ტყურა ღორონთეფიშ თაყვანიშცემაშე გაფრთხილება, მუჟამსით მოსავალიშ მოჸუნაფაშ ახალ მეთოდეფშენ ურაგადუდ?

⁶ იეჰოვას უჩქუდ, ნამდა ისრაელეფს ცდუნება აღვენუდეს, ქიდიგურუესკო მოსავალიშ მოჸუნაფაშ შხვადოშხვა მეთოდეფ  წარმართ ხალხშე, მით თინეფიშ გოხოლუას ცხოვრენდეს. მუშო ოკო, რაგად თე ხალხის ბრელით უმოს გამოცდილება უღუდ თე საქმეს დო ისრაელეფს შეულებდეს ჯგირ მუდგარენიშ დოგურაფა თინეფშე, მარა თეწკუმა ართო საფრთხე ხოლო არსებენდჷ. ქანაანელეფ ბაალს ცენდეს თაყვანს დო შედეგო რდეს ტყურა რელიგიურ შეხედულებეფიშ გავლენაშ თუდო რდეს. თინეფს ბაალი ცაშ მინჯეთ მიორჩქუდეს დო ჯერდეს, ნამდა ჭვემას თინა არზენდჷ. იეჰოვას ვაკოდ, მუშ ხალხიქ მეჩირთუკო თეცალ ტყურეფით. მარა ისრაელეფქ ბრელშა გიშეგორეს ბაალიშ თაყვანიშცემა (რიცხ. 25:3, 5; მსაჯ. 2:13; 1 მეფ. 18:18). მორთ ქიდვეკვირათ, მუჭო მოხვადეს თინეფქ სატანაშ ტყვეობას.

7. მუჭო გიმიცად ისრაელეფიშ რწმენაქ დუნაპირებ ქიანაშა ინულაშ უკულ?

⁷ სატანაშ პირველ ხრიკი თინა რდუ, ნამდა გეგმირინუ ისრაელეფიშ ბუნებრივ სურვილ, ჭვემას ქუმურთუმუდკო დო დიხა დუწყარუდკო. დუნაპირებ ქიანას აპრილიშ ბოლოშე სექტემბერიშ ბოლოშახ იშვიათო ჭვენდჷ. თინეფიშ სიცოცხლე დო მოსავალიშ ხვეიანობა დამოკიდებულ რდუ ჭვემაშა, ნამუთ ხშირას სოდგარენ ოქტომბერიშ თუთას იჭყაფუდ. სატანაქ ქუდაჯერუ ისრაელეფ, ნამდა მოსავალიშ მიოღებელო, წარმართ ერეფიშ ტრადიციეფს ოკო მიაჸუნესკო. მეზობელ ერეფს წანდეს, ნამდა მუნეფიშ ღორონთეფქ ქიმოქმედესკო დო ჭვემას ქუმურთუმუდკონ, გარკვეულ რიტუალეფიშ შესრულება რდუ საჭირო. მიდგას იეჰოვაშ რწმენა ორკუდ, იჯერენდჷ, ნამდა თენა რდუ ხვალე ართ საშვალება, დუდ ეუჩილითესკო გოლოფას. ათეშენ თინეფ ტყურა ღორონც, ბაალს ცენდეს თაყვანს დო უსრულენდეს რიტუალს.

8. ხოლო მუ მეთოდ გიმირინუ სატანაქ ისრაელეფიშ მიოჩილითაფარო? გენწყით.

⁸ სატანაშ მაჟია ხრიკი, ნამუთ ისრაელეფწკუმა გიმირინუ, უზნეო სურვილეფ რდუ. წარმართ ერეფ მუნეფიშ ღორონთეფიშ თაყვანიშცემაშ დროს საშინელ გარყვნილებას მიმართენდეს. თეცალ უზნეო რიტუალეფს ტაძარიშ მეძავ ოსურეფ დო კოჩეფ ხოლო მონაწილენდეს. ჰომოსექსუალიზმი დო სექსუალურ უზნეობაშ შხვა ფორმეფ ჩვეულებრივ მუდგარენო ითვალუდ (კან. 23:17, 18; 1 მეფ. 14:24). წარმართეფს ჯერდეს, ნამდა თეცალ რიტუალეფიშ შესრულებათ მუნეფიშ ღორონთეფ ხვეიან მოსავალს ქიმეჩანდეს. ისრაელეფიშ უმენტაშის მეწონ წარმართ ერეფიშ თეცალ უზნეო რიტუალეფქ დო ათეშენ მუნეფქ ხოლო ქიდიჭყეს ტყურა ღორონთეფიშ თაყვანიშცემა. სატანაქ მიოჩილითუ თინეფ.

9. მუჭოთ ოსიაშ 2:16, 17-შე იძირე, მუჭო გაჭყოლიდუ სატანაქ ისრაელეფს, სინამდვილეს მი რდუ იეჰოვა?

⁹ სატანაშ მასმა ხრიკი თინა რდუ, ნამდა თიქ ისრაელეფს გაჭყოლიდუ, სინამდვილეს მი რდუ იეჰოვა. წინასწარმეტყველ იერემიაშ დროს იეჰოვაქ გეგმაარგამ ტყურა წინასწარმეტყველეფიშ განზრახვა, ნამდა „ბაალიშ გურშენ“ ხალხის იეჰოვაშ სახელ გაჭყოლიდუესკო (იერ. 23:27). მუჭოთ იძირენ, ღორონთიშ ხალხიქ იეჰოვაშ სახელიშ მანგიორო ბაალიშ სახელიშ გიმორნაფა ქიდიჭყჷ, ნამუთ „მინჯეს“ ვარდა „ბატონს“ ნიშნენს. შედეგო, ისრაელეფს გუჭირდუდეს ართიანშე გეგშაგორესკო იეჰოვა დო ბაალი დო ადვილო ქუკათუანდეს იეჰოვაშ დო ბაალიშ თაყვანიშცემას ართიანს (წეკითხით ოსია 2:16, 17).

10. მუ მეთოდეფს გიმირინუანს სატანა ამდღა?

¹⁰ სატანა ამდღა ხოლო ოცად ბუნებრივ სურვილეფ ჩქინ წინააღმდეგ გეგმირინუას,  მიმოჩილითუან სექსუალურ უზნეობათ დო გუმოჭყოლიდუან, სინამდვილეს, მი რე იეჰოვა. მორთ პირველო გუვარჩუათ სატანაშ მასმა ხრიკი.

11. მუჭო გაჭყოლიდუ სატანაქ ხალხის, სინამდვილეს მი რდუ იეჰოვა?

¹¹ სატანა ოცად გაჭყოლიდუას ხალხის, სინამდვილეს მი რე იეჰოვა. იესოშ მოციქულეფიშ ღურაშ უკულ ნამთინექ, მით დუც ქრისტიანო აცხადენდჷ, ტყურა გურაფეფიშ გავრცელება ქიდიჭყჷ (საქ. 20:29, 30; 2 თეს. 2:3). თე განდგომილეფ ოცადდეს, გაჭყოლიდუესკო ხალხის, სინამდვილეს მი რდუ ჭეშმარიტ ღორონთ. მაგალთო, თინეფ ბიბლიაშ ასლეფს ღორონთიშ სახელიშ მანგიორო გიმირინუანდეს წოდებას „უფალი“. ღორონთიშ სახელიშ გიშაღალათ, ხალხის გუჭირდუდ თიშ ძირაფა, მუჭო გენესხვავებუდ იეჰოვა წმინდა წერილეფს მოშინაფილ შხვა „უფალეფშე“(1 კორ. 8:5). თინეფ უფალით მიშინუანდეს მუჭოთ იეჰოვას, თეშ იესოს ხოლო. ათეშენ ხალხის უჭირდჷ თიშ გაგება, ნამდა იეჰოვა დო იესო შხვადოშხვა პიროვნებეფ რენა (იოან. 17:3). თექ ხე შეუნწყუ სამებაშ გურაფაშ ჩამოყალიბებას, ნამდგას ღორონთიშ სიტყვა ვაგურუანს. შედეგო, ბრელ ფიქრენს, ნამდა ღორონთ საიდუმლოებეფით რე მოცულ დო ვეშმალებენა თიშ გაჩინებაფა. თენა მართალო დიდ ტყურა რე! (საქ. 17:27).

12. მუს უნწყუნს ხეს ტყურა რელიგია დო მუჭოთ რომაელეფიშ 1:28—31-ის რე ეჭარილ, მუ შედეგ მოჸუნს თეს?

¹² სატანა გიმირინუანს უზნეო სურვილეფს. ჯვეშო, ისრაელეფიშ დროს, სატანა ტყურა რელიგიას გიმირინუანდჷ, ნამდა ხალხ მიოჩილითუკო უზნეობათ. თინა ამდღა ხოლო თეშნერო მოქმედენს. ტყურა რელიგიეფს ჩვეულებრივ მუდგარენო დო მისაღებო მიორჩქუნა უზნეობა. შედეგო, ბრელქ, მით დუც ღორონთიშ მსახურო აცხადენს, მიოტუ ზნეობრივ პრინციპეფით ცხოვრება. რომაელეფშა მეჭარილ წერილს პავლე ეჭარუნს, მუ შედეგეფ მოჸუნს თე ირფელს (წეკითხით რომაელები 1:28—31). თე მუხლის მოშინაფილ „სწორ ვა რენ ფერ“ საქმეეფშა მიშურს სექსუალურ უზნეობაშ არძანერ ფორმა, თინეფ შკას ჰომოსექსუალიზმი ხოლო (რომ. 1:24—27, 32; გამოცხ. 2:20). ათეშენ მნიშვნელოვან რე, მივაჸუნათ თი ზნეობრივ პრინციპეფს, ნამუთ ბიბლიაშე არგამათ იძირე!

13. ხოლო ნამ მეთოდის გიმირინუანს სატანა?

¹³ სატანა ბუნებრივ სურვილეფს ჩქინ წინააღმდეგ გიმირინუანს. არძას მოკონა, ქიდიბგურუათ თიცალ მუდგარენეფ, მუთ ჩქინ დუდიშ დო  ოჯახიშ ეჯუმალას მიმეხვარებნა (1 ტიმ. 5:8). ხშირას თე უნარეფს სკოლას გურგედვალირო გურაფაშ დროს ბღებულენთ. მარა კურცხას ოკო ვორდათ. ბრელ ქიანას სტუდენტეფს ხვალე პრაქტიკულ უნარეფს ვარინ, ადამიანურ სიბრძნეს ხოლო ოგურუანა. თინეფს ღორონთიშ არსებობაშა ეჭვის მიშაღალაფუანა დო ბიბლიაშ უპატიცემულობას ურჩქინანა. სტუდენტეფს ურაგადნა, ნამდა არძა გურაფილ დო ჭკვერ პიროვნება ევოლუციაშ თეორიას უკინენს ხუჯის (რომ. 1:21—23). თეცალ გურაფეფ ოწინააღმდეგ ღორონთიშ სიბრძნეს (1 კორ. 1:19—21; 3:18—20).

14. მუს უნწყუნს ხეს ადამიანურ სიბრძნე?

¹⁴ ადამიანურ სიბრძნე ოწინააღმდეგ იეჰოვაშ სამართლიან ნორმეფს. თინა ღორონთიშ წმინდა შურიშ ნაყოფიშ გავითარებას ვა მოხვარნა, პირიქით, ხეს უნწყუნს ხორციშ საქმეეფიშ გავითარებას (გალ. 5:19—23). თინა სიამაყეს ავითარენს დო შედეგო ხალხ დუდიშ მოჸოროფეთ გინმირთუ (2 ტიმ. 3:2—4). თეცალ თვისებეფ ოწინააღმდეგ თანდაბლობას, ნამუთ ღორონთის ოკო, ნამდა მუშ მსახურეფქ გავითარან (2 სამ. 22:28). ნამთინე ქრისტიანქ, მიდგაქ უნივერსიტეტის გაგრძელ გურაფა, ღორონთიშ აზროვნებაშ მანგიორო ქვეყნიურ აზროვნება გევითარ. მორთ ქობძირათ, მუქ შილებე მოხვადას, მუჟამსით ყურადღებას ვა ვაქციენთ თეცალ მუდგარენს.

15, 16. მუს ბგურაფლენთ ართ დაშ მაგალითშე?

¹⁵ ართ და, ნამუთ 15 წანაშე მეტ რე სრულ დროთ მსახურენს, იჩიებ: „მუჭოთ იეჰოვაშ მოწმეს, ბრელშა მაფუდ ნაკითხერ დო გუნაგონ თი საფრთხეეფიშ გურშენ, ნამუთ უნივერსიტეტის  გურაფას მოჸუნს. მარა თეს ყურადღება ვემვუაქცი. ფიფქრენდჷ, თე რჩევა მა ვა მოხუდ“. მუ პრობლემეფქ აშუ თე დას შედეგო? თინა გეუძინანს: „გურაფას თიზმა დრო მეუღუდ, ნამდა ლოცვაშო ჭიჭე დრო მოსკიდუდ. თეს გეძინელ, თიცალ გინოშულადირ ვორდჷ, ბიბლიურ თემეფშე ჩიებაშ ხიოლ ვამღუდ დო კრებაშ შეხვალამეფშო ხოლო ონდეთ ვემზადებუდ. მარა მადლობა ღორონც, ქიმეფხვად, თე ირფელ იეჰოვაწკუმა ურთიერთობას გილამლუანდჷ, ათეშენ მიჩქუდ, ოკო მივოტეკო გურაფა დო ქოთ თაშ მიფქცი“.

¹⁶ მუჭო იმოქმედ უმაღლესის გურაფაქ თე დაშ აზროვნებაწკუმა? თინა იჩიებ: „ონჯღორე მიჩქჷ თიშ აღიარებაშა, ნამდა განათლებაქ, ნამუთ მა გიშებგორ, შხვეფიშ, განსაკუთრებულო ჩქიმ და დო ჯიმალეფიშ მიმართ კრიტიკულო გინმოშკვჷ. თინეფშე ბრელ მუდგარენს იფთხინდჷ დო ხოლოშიან ურთიერთობას დუც ვარიდანდჷ. ბრელ დროქ დემესაჭირ, ჩეფთხინეკო თეცალ აზროვნება. თე მაგალითიქ ჯგირო ქუმოძირუ, მუ გლახა შედეგეფ მაჸუნუ, მუჟამსით ვეგეფთვალისწინენთ ჩქინ ზეციერ მუმაშ გაფრთხილებეფს, მუდგას მუშ ორგანიზაციაშ საშვალებათ მარზენა. ჩქიმ დუდშე უჯგუშო იეჰოვა მიჩინენს, ათეშენ თიშა ოკო დამჯერებუდკო!“.

17. ა) მუ ოკო მაფდან გინოჭყვიდილ? ბ) მუს გუვარჩიენთ თეშ უკულიან სტატიას?

¹⁷ გინოჭყვიდილ გაფდან, ვემგოჩილითუან სატანაშ ქვეყნიერებაქ „ფილოსოფიათ დო პოტიკ ცდუნებათ“. კურცხას რდათ დო დოთხილეთ თქვან დუდ სატანაშ ხრიკეფშე (1 კორ. 3:18; 2 კორ. 2:11). ვემეჩათ თიშ უფლება, გუგოჭყოლიდუან, მი რე იეჰოვა დო მუნერ თაყვანიშცემა მოწონს თის. მიაჸუნით იეჰოვაშ მაღალზნეობრივ ნორმეფს დო გეთვალისწინით თიშ რჩევეფ. მარა მუჭო ოკო მიქცუათ, მუჟამსით ორწყეთ, ნამდა თქვანწკუმა უკვე ქიმოქმედ ქვეყნიერებაშ აზროვნებაქ? თეშ უკულიან სტატიაშე ქობძირუნთ, მუჭო შეულებ ღორონთიშ სიტყვას მიმეხვარან, გივორჯგინათ ქვეყნიურ აზროვნებას დო გლახა ჩვევეფს (2 კორ. 10:4, 5).