1. მუს გინაფლენს იეჰოვა, მუჟამსით კრებას მოჩილათირ, ართ შხურ რდასინ ხოლო, ართუ თის?

მუჭოთ წოხლენ სტატიას გუვარჩით, იეჰოვა მუშ დუდის ჯგირ ჭყიშის ადარენს, მით ირნერო ზრუნენს მუშ შხურშო. თინა გორუნს თი შხურეფს, მით მაჩირთუ ოჭყიშალს. იეჰოვაქ, ისრაელეფს, მიდგაქ მიოტუეს თინა, უწუ: „დუმართით დო მა ხოლო დუგართუთ“. ჩქი მიჩქნა, ნამდა იეჰოვა ამდღა ხოლო თაშ ფიქრენს, მუშენდა იჩიებ: „მა ვეფთირუქ“ (მალ. 3:6, 7). იესოქ თქუ, ნამდა იეჰოვა დო ანგელოზეფს მანგარო ოხიოლნა, მუჟამსით, ართ შხურ რდასინ ხოლო, ნამუთ მოჩილათირ რდუ კრებას, ართუ იეჰოვას (ლუკ. 15:10, 32).

2. მუს გუვარჩიენთ თე სტატიას?

² მორთ გუვარჩუათ იესოშ მოჸუნაფილ სუმ იგავ, სოვრეშეთ იძირე, მუჭო შემლებნა მივეხვარათ თინეფს, მიდგაქ იეჰოვას გამაჩირთეს. გუვარჩიენთ ნამთინე თვისებას, ნამუთ მოსაჭირნა, ნამდა მივეხვარათ დინაფილ შხურეფს, დართან იეჰოვას. თეს გეძინელ, ქობძირუნთ, მუშენ ღირ მივეხვარათ სულიერო დასუსტებულეფს.

3, 4. მუშენ გორუნს მთელ მონდომათ ლუკაშ 15:8—10-ის ინოჭარილ იგავს მოშინაფილ ოსურ დინაფილ მონეტას?

³ ჩქი ირნერო ოკო ვეცადათ, დობგორათ თინეფ, მიდგას იეჰოვაშა დორთაშ სურვილ უღნა. ლუკაშ სახარებას ინოჭარილ იგავს, იესო ეჭარუნს, მუჭო გორუნს ოსურ ძვირფას მონეტას — დრაქმას, ნამდგაქ უდინ. თე იგავ ყურადღებას ამახვილენს, მუნერ მონდომათ გორუნს თე ოსურ მონეტას (წეკითხით ლუკაშ 15:8—10).

⁴ იესო ეჭარუნს თე ოსურიშ გრძნობეფს, მუჟამსით ქიმიოგორუანს ძვირფას მონეტას, ნამდგაქ უდინ. მუჭოთ იძირენ, იესოშ დროს ძღაბ გეთხუაფუდუნ, ნამთინე ებრაელ დიდა კამპანიაშ დღას ვით დრაქმას არზენდჷ ოსურსქუას. შილებე თე მიზეზიშ გურშენ რდუ იგავს მოშინაფილ ოსურშო თე მონეტა ძვირფას.  თე ოსურ ფიქრენს, ნამდა მონეტაქ პროლს ქუდუოლ, ათეშენ, ლამპას ეიორზანს დო გორუნს, მარა მონეტა ვაგორე. შილებე თიშენ, ნამდა ზეთიშ ლამპას ვა უღჷ დასაბაღ სინთე ჭიჭე ვარჩხილიშ მონეტაშ ოგორალო. ბოლოს, თინა მთელ ჸუდეს გიმოხუშუნს დო შაყარელ ტვერს, მუშ ძვირფას მონეტას მიშახვილუანს, ნამუთ ლამპაშ სინთეს გერწკინუნს. ოსურ მანგარ გახარებულ დო დამშვიდებულ რე. თინა მუშ მეგობრეფს დო მეზობელეფს უძახ, ნამდა თინეფს ხოლო ქუწუას თე ჯგირ ამბე.

5. მუშენ შილებე დიდ მონდომაქ დემესაჭირან არააქტიურეფიშ ოგორალო?

⁵ მუჭოთ იესოშ იგავშე ვორწყეთ, მუდგარენიშ ოგორალო ძალისხმევა რე საჭირო. თეშნერო, შილებე დიდ მონდომაქ დემესაჭირან არააქტიურეფიშ ოგორალო. შილებე წანეფ რე მიკულირ თიშ უკულ, მუთ თინეფქ ჩქინწკუმა ურთიერთობა მიოტუეს. ხვალე თენა ვარინ, შილებე თინეფქ თიცალ ტერიტორიაშა გინორთეს ოცხოვრებშა, სოდეთ ადგილობრივ და დო ჯიმალეფ ვეჩინენა. მარა ბჯერა, ნამდა ნამთინე არააქტიურს მთელ გურით ოკო, დართას იეჰოვას. თინეფს ოკონა, თანაქრისტიანეფწკუმა ართო კინ ემსახურან იეჰოვას, მარა თენა ჩქინ ელარნაშ უმშო ვაკეთებენა.

6. მუჭო შემლებნა არძას, მონაწილება მიბღათ არააქტიურეფიშ გორუას?

⁶ მის შეულებ მონაწილება მიღას არააქტიურეფიშ გორუას? თეშ კეთება არძას შემლებნა — უხუცესეფს, პიონერეფს, ოჯახიშ წევრეფს დო კრებას შხვა მაუწყებელეფს. ხომ ვა რჸუნა თიცალ მეგობარ ვარდა ნათესე, მიდგაქ არააქტიურო გინირთჷ? კარდოკარ ვარდა სტენდწკუმა მსახურებაშ დროს, ხომ ვა შეხვალამუთ არააქტიურ ქრისტიანს? გეუნწყ, თეცალ პიროვნებას, ნამდა ქაკო ქიმიაკითხუან-და, სიამოვნებით გეგნოჩანქ თიშ საკონტაქტო ინფორმაციას ადგილობრივ უხუცესეფს.

7. მუშ გურაფა შემლებნა ართ უხუცესიშ, ტომასიშ მაგალითშე?

⁷ ნამ კონკრეტულ ნაბიჯეფიშ გინოდგუმა შეულებნა უხუცესეფს, თი არააქტიურეფიშ ოგორალო, მიდგას იეჰოვაშა დორთა ოკონა? დეკვირით, მუს იჩიებ ესპანეთის მახორუ ართ უხუცეს, ტომას. * თიქ 40-შე მეტ არააქტიურ მაუწყებელს მეხვარ, დართუკო კრებას. თინა იჩიებ: „დუდშე, და დო ჯიმალეფს ვოკითხუქ, ხომ ვა უჩქნა სო შილებე ასე ცხოვრენდან თი არააქტიურ და დო ჯიმალეფ, მით ჩქინ კრებას რდეს. ვარდა ვოკითხუქ, ხომ ვაშუნა მითინ თიცალ, მით ბრელ ხან რე ვეგლურს კრებაშ შეხვალამეფშა. კრებას მაუწყებელეფიშ უმენტაშ ხიოლით მოხვარნა, მუშენდა უჩქნა, ნამდა არააქტიურეფიშ გორუას ღებულენა მონაწილებას. მუჟამსით არააქტიურ დას ვარდა ჯიმას მივაკითხანქ, ვოკითხუქ მუნეფიშ სქუალეფიშ დო ნათესეეფიშ გურშენ. ნამთინეს მუნეფიშ სქუალეფ კრებაშ შეხვალამეფშა გილაჸუნდჷ, ხვალე თენა ვარინ, შილებე თე ბაღანეფ ართ დროს მაუწყებელეფ ხოლო რდესკო. თინეფს ხოლო ოსაჭირნა მოხვარა, ნამდა დართან იეჰოვას“.

8. მუჭო მექცუ მუმაქ სქუას ლუკაშ 15:17—24-ის ინოჭარილ იგავს შარასეჩილათირ სქუაშ გურშენ?

⁸ ნამ თვისებეფ მოსაჭირნა, ნამდა ქიმვეხვარათ თინეფს, მიდგას იეჰოვაშა დორთა ოკო? დეკვირით, მუშ გურაფა შემლებნა იესოშ იგავშე შარასეჩილათირ ქომოლსქუაშ გურშენ, ნამდგაქ ჸუდეშე იდჷ (წეკითხით ლუკაშ 15:17—24). იესო ენწყუნს, საბოლათ მუჭო მეხვად თე ქომოლსქუაქ, ნამდა მანგარო მეჩირთჷ დო ეჭარუნს, მუჭო დირთჷ ჸუდეშა. მუმაქ ირულ თიშ შეიოხვამლაფშა, ქახუტოლ დო თეშნერო დარწმუნ, ნამდა მანგარო უჸორდჷ თინა. თე ქომოლსქუას სინდის მანგარო აწუხენდჷ დო ფიქრენდჷ, ნამდა ვარდჷ ღირს  მუმაქ კინ სქუათ მიღუკო. მარა, მუჟამსით სქუა მუშ გრძნობეფს გიმოხანტუნდჷ, მუმაქ გემშართჷ თიშ მდგომარეობაშა. თეშ უკულ, მუმაქ მუსხირენ ნაბიჯ გეგნოდგჷ, თიშ ოძირაფალო, ნამდა სქუას მუჭოთ მოჯამაგირეს ვარინ, თეშ ღებულენდჷ მუჭოთ ოჯახიშ ძვირფას წევრის. ათეშენ, თიქ დიდ სუფრა მანწყუ დო ჯგირ ბარგ ქიმეჩ სქუას, ნამუთ მთელ გურით ინანიენდჷ.

9. ნამ თვისებეფიშ გიმორჩქინა რე საჭირო, ნამდა მივეხვარათ არააქტიურეფს, დართან იეჰოვას? (ქოძირით ჩარჩო „მუჭო მივეხვარათ არააქტიურეფს, მიდგას იეჰოვაშა დორთა ოკო?“)

⁹ იეჰოვა თე იგავს მოშინაფილ მუმას რე შედარებულ. თის უჸორს ჩქინ არააქტიურ და დო ჯიმალეფ დო ოკო, ნამდა თინეფქ დართან. იეჰოვაშ მაგალითის ქიმვაჸუნუთ-და, შემალებენა, მივეხვარათ თინეფს თეშ კეთებას. თეშო საჭირო რე, გეგმიფრჩქინათ მოთვინება, გემშაფრთათ თინეფიშ მდგომარეობაშა დო გეგმოფხანტათ ჸოროფა. მუშენ რე საჭირო თე თვისებეფ დო მუჭო შემლებნა თინეფიშ გიმორჩქინა?

10. მუშენ მოსაჭირნა მოთვინება, მუჟამსით არააქტიურეფს ვოხვარუთ, დართან იეჰოვას?

¹⁰ მოთვინება მოსაჭირნა, მუშენდა დრო რე საჭირო, ნამდა პიროვნებაქ დართას იეჰოვას. ბრელ, მით ადრე არააქტიურ რდუ, იჩიებ, ნამდა თიშ უკულ დირთჷ კრებაშა, მუთ უხუცესეფ დო შხვა და დო ჯიმალეფქ ბრელშა მიაკითხეს. ართ და, ნენსი, ნამუთ აზიას ცხოვრენს, ჭარუნს: „ხოლოშიან მეგობარქ, ნამუთ ჩქიმ კრებას რდუ, მანგარო მიმეხვარ. თის უნჩაშ დაცალო ვუჸორდჷ. ირიათო გუმოშინანდჷ, მუ ჯგირ დროს ვატარენდით ართო. თინა მოთვინებათ მირჩქილედ, მუჟამსით ჩქიმ გრძნობეფშე ვეჩიებუდ დო რჩევას ხოლო მარზენდჷ. თინა ირიათო მზათ რდუ, ქიმმეხვარკო დო დამტკიც, ნამდა ნამდვილ მეგობარ რდუ“.

11. მუშენ ოკო მიშაფრთათ თინეფიშ მდგომარეობაშა, მიდგაქ თიშენ გინირთჷ არააქტიურო, ნამდა ოწყინებაფეს?

 ¹¹ შხვეფიშ მდგომარეობაშა მიშულა მოგენს ძლიერმოქმედ მალამოს, ნამუთ ჭრილობას ოსქილიდუანს. თინა ოხვარ პიროვნებას, დუდ უჯგუშო ქიგინას. ნამთინექ თიშენ გინირთჷ არააქტიურო, ნამდა წანეფიშ წოხლე კრებას მიდგარენქ მანგარო ოწყინებაფუ დო ამდღარშახ გურმულირ რე. თენა პიროვნებას იეჰოვაშა დორთაშ სურვილს უდინუანს. შილებე ნამთინე ფიქრენდას, ნამდა უსამართლოთ მექცის. თინეფს შილებე ოსაჭირდან თიცალ მიდგაინ, მით მურჩქილუანს დო გაუგენს (იაკ. 1:19). მარია, ნამუთ ართ დროს არააქტიურ რდუ, იჩიებ: „მა მოსაჭირუდ პიროვნება, მით მომრჩქილუანდჷ, გურშა ემქექუანდჷ დო ჯგირ რჩევას მუჩანდჷ“.

12. მუთ მოგენს იეჰოვაშ ჸოროფა თოკის?

¹² ბიბლიას იეჰოვაშ ჸოროფა მუშ ხალხიშ მიმართ, თოკშა რე შედარებულ. მუთ მოგენს იეჰოვაშ ჸოროფა თოკის? მაგალთო, წერმიდგინით, ნამდა აღელვებურ ზღვას ქინანთხით დო იშქვიდუთ. თე დროს, მიდგარენ ნავშე სამაშველო რგოლს გიჸოთანა. მუშო ოკო რაგად, მარდულ იჸუაფუთ, მუშენდა თე რგოლ მიგეხვარებნა წყარს ვედინწყვათ. მარა ხვალე თე რგოლს ვეგნატებეთ, მუშენდა წყარ ქუაცალ რგილ რე დო სამაშველო ნავშა ვეშართით-და, ვეგნოსქიდუთ. თქვა გოსაჭირნა მიდგაინ, მით თოკის ქოიჸოთანა დო ნავშა ეშულას ქიმგეხვარებნა. იეჰოვაქ ისრაელეფშენ, მიდგაქ მაჩირთეს თის, თქუ: „ჩქიმდა მოპჸუნდჷ თინეფ . . . ჸოროფაშ თოკეფით“ (ოს. 11:4). ღორონთ ამდღა ხოლო იგივეს გინაფლენს თინეფიშ მიმართ, მიდგაქ მიოტუ თიშ მსახურება დო პრობლემეფ დო ოწუხებელ ოშქვიდუანს. იეჰოვას ოკო, თეცალეფს უჩქუდან, ნამდა უჸორს თინეფ დო სურვილ უღჷ, კინ დართან თის. იეჰოვაქ შილებე თქვა  გეგმოირინუან, ნამდა მუშ ჸოროფა ქაძირუას არააქტიურეფს.

13. მუჭო ოძირანს პაბლოშ შემთხვევა, ნამდა ქრისტიანულ ჸოროფას დიდ ძალა უღჷ?

¹³ მნიშვნელოვან რე, არააქტიურეფ დუვარწმუნათ, ნამდა იეჰოვას უჸორს თინეფ დო ჩქი ხოლო მიჸორა. ულირ სტატიას მოშინაფილ პაბლო, ნამუთ სამხრეთ ამერიკას ცხოვრენს, 30 წანაშე მეტ ხანს რდუ არააქტიურ. თინა იჩიებ: „ართ ოჭმარეს, ჸუდეშე გიმიფშინ, ართ მოხუცებულ დაქ ქეშეფხვად დო გემუანო დო ჸოროფათ დომრაგადუ. ბაღანაცალო ნგარაქ გემიოლ. თის ვუწი, ნამდა ჩქიმდა იეჰოვაქ მაშქვჷ. ზუსტას თე დროს გინობჭყვიდ, დუვართკო იეჰოვას“.

14. მუჭოთ ლუკაშ 15:4, 5-ის მოშინაფილ იგავს ჭარჷ, მუს ორთჷ ჭყიშ, მუჟამსით მიოგორუანს დინაფილ შხურს?

¹⁴ არააქტიურეფს ჩქინ ელარნა ოსაჭირნა. იესოშ იგავს მოშინაფილ შარასეჩილათირ ქომოლსქუაცალო, შილებე თინეფ რთულ ემოციურ მდგომარეობას რდან. თინეფ სულიერო მოსუსტებულეფ რენა, მუშენდა სატანაშ ქვეყნიერებას ბრელ მუდგარენ გინმუღნა. ჩქი ოკო მივეხვარათ თინეფს, კინ გემანგარან იეჰოვაშ მიმართ რწმენა. დინაფილ შხურიშ იგავს, იესო ეჭარუნს, მუჭო გილეხუნუანს ხუჯშა ჭყიშ შხურს დო ორთინუანს ოჭყიშალშა. ჭყიშიქ ბრელ დრო დო ენერგია ახარჯჷ დინაფილ შხურიშ ოგორალო. მარა თის არჩქილე, ნამდა შხურს უმოს მოხვარა ოსაჭირ, მუშენდა თის გილულაშო ძალა ვა უღჷ. ათეშენ ჭყიშიქ ოკო იჸუნას თინა (წეკითხით ლუკაშ 15:4, 5).

15. მუჭო შემლებნა მივეხვარათ თი არააქტიურეფს, მიდგას ოკონა, დართან იეჰოვას? (ქოძირით ჩარჩო „ძვირფას საშვალება“)

¹⁵ ჩქი ოკო მივეხვარათ არააქტიურეფს, ნამდა გიორჯგინან თი პრობლემეფს, ნამუთ ოცილნა, დართან იეჰოვას. შილებე თეშო დრო დო ენერგიაქ დემესაჭირან. მარა იეჰოვაშ  წმინდა შურიშ, თიშ სიტყვაშ დო თიშ ორგანიზაციაშ მომზადებულ პუბლიკაციეფიშ საშვალებათ, შემლებნა მივეხვარათ თინეფს, კინ გემანგარან სულიერო (რომ. 15:1). მუჭო შემლებნა თეშ კეთება? ართ გამოცდილ უხუცეს იჩიებ: „თი მაუწყებელეფს, მით გინოჭყვიდნა, ნამდა დართან იეჰოვას, ხშირას ბიბლიაშ გურაფა ოსაჭირნა“. * თაშ ნამდა, უხუცესეფქ არააქტიურ მაუწყებელშა ბიბლიაშ გურაფა ქორთხის-და, ხიოლით ოკო მიღათ თე პატი. თე უხუცეს გეუძინანს: „თი მაუწყებელ, მით ბიბლიაშ გურაფას ატარენს, ჯგირ მეგობარ ოკო რდას; თიცალ პიროვნება, მიდგას არააქტიურ მაუწყებელ თავისფალო ქეჩიებ მუშ გრძნობეფშე დო თიშ ნდობა აღვენუ“.

16. სოვრეშე მიჩქნა, ნამდა ანგელოზეფ მოხვარნა?

¹⁶ ბრელ შემთხვევა ამტკიცენს, ნამდა ანგელოზეფ მოხვარნა თი არააქტიურეფიშ გორუას, მიდგას დორთაშ სურვილ უღჷ (გამოცხ. 14:6). მაგალთო, სილვიო, ნამუთ ეკვადორს ცხოვრენს, ლოცვას თხინდჷ იეჰოვას, მიდგაინ ქიმუშქვუკო, მით მეხვარებუდ კრებაშა დორთას. მუჟამსით ლოცულენდჷ, კარს ზარ დორეკეს. კარწკუმა ჟირ უხუცეს გერდჷ. თე მონახულებაშე მოჸუნაფილ თე ჯიმალეფ ხიოლით ოხვარდეს თის.

17. მუს ბგინაფლენთ, მუჟამსით ვოხვარუთ სულიერო მოსუსტებულეფს?

¹⁷ ჩქი მანგარო მოხიოლნა, მუჟამსით ვოხვარუთ სულიერო მოსუსტებულეფს, დართან იეჰოვას. დეკვირით, მუს იჩიებ ართ პიონერ, სალვადორ, ნამუთ განსაკუთრებულ ყურადღებას აქციენს არააქტიურეფს: „მინშა ხიოლით მანგარინე. მოსიამოვნ, მუჟამსით ფიფქრენქ, ნამდა იეჰოვაქ მუშ ხოლო ართ შხურ დერსხჷ სატანაშ ქვეყნიერებაშე დო მა მუჩჷ პატი, თე საქმეს თიწკუმა ქიფთანამშრომლიკო“ (საქ. 20:35).

18. არააქტიურ ქორეთ-და, მუშა შეილებნა რდათ დარწმუნებულ?

¹⁸ ღორონთიშ ხალხწკუმა ურთიერთობა მეტებულ ქუგაფნა-და, შეილებნა დარწმუნებულ რდათ, ნამდა თის კინ უჸორთ დო ოკო, ნამდა დართათ. მარა თეშ ოკეთებელო მუსხირენ ნაბიჯ ოკო გეგნოდგათ. იესოშ იგავს მოშინაფილ მუმაცალო, იეჰოვა მთელ გურით ელჷ თქვან დორთას დო ხიოლით მეიღენა მუშ დიდ ოჯახშა.