ბჯერა, ნამდა თე „ბოლო დღალეფს“ იეჰოვა ხემძღვანელენს მუშ ხალხის დო არზენს ირფელს, მუთ საჭირო რე, მუწკუმა ხოლოშიან ურთიერთობაშო (2 ტიმ. 3:1). მარჩქილენა, ნამდა ჩქინ მხარეშე საჭირო რე მორჩილება. ჩქინ მდგომარეობა შემლებნა შევადარათ ისრაელეფიშ სიტუაციას, მუჟამსით თინეფ უდაბნოს რდეს. თინეფქ ოკო იმოქმედესკო, მუჟამსით საყვირიშ ხონარს ქიგეგონენდეს.

იეჰოვაქ მოსეს უწუ, გაკეთკო ვარჩხილიშ ჟირ საყვირ დო უღუდკო თინა „კრებულიშ აკაშაყარალო დო ბანაკიშ ეიონწყუალო“ (რიცხ. 10:2). მღვდელეფ საყვირიშ შხვადოშხვანერო ინომბარუათ ოჩინებაფუანდეს ხალხის, მუ ოკო აკეთესკო კონკრეტულ შემთხვევას (რიცხ. 10:3—8). ამდღა ღორონთიშ ხალხ მითითებეფს შხვადოშხვა საშვალებათ ღებულენს. მორთ გუვარჩუათ სუმ თეცალ საშვალება დო შევადარათ ჯვეშ დროშ საყვირიშ ინომბარუას. თე სუმ საშვალება რე: დიდ აკოშაყარუეფ, სოდეთ ღორონთიშ ხალხის იწვიენა, მომზადება, ნამდგას ზედამხედველეფ მიკმულა დო ცვლილებეფ, ნამუთ ორგანიზაციას ხვადუ.

მღვდელეფ ჟირხოლო საყვირს ართდროულო ქინამბარანდესინ, თენა თიშ ნიშან იჸუაფუდ, ნამდა იეჰოვას ოკოდ, „მთელ კრებულქ“ კარავიშ აღმოსავლეთ მხარეს აკიშაყარკო (რიცხ. 10:3). მთელ კრებულ, ნამუთ ოთხ ნაწილო რდუ გორთილ დო კარავიშ გოხოლუას რდუ დაბანაკებულ, გეგონენდჷ თე საყვირიშ ხონარს. კარავიშ მინალწკუმა ხოლოს დაბანაკებულეფს შეულებდეს მუსხირენ წუთშა მერთესკო აკოშაყარუაშ ადგილშა. შხვეფ უმოს შორს რდეს დო ათეშენ უმოს დრო დო მონდომა ოსაჭირდეს მიოულარო. ხოლოს რდეს დოვარ შორს, იეჰოვას ოკოდ, არძაქ აკიშაყარკო დო ქიმირჩქილუკო მითითებეფ.

მართალ რე, ჩქი ამდღა კარავწკუმა ვეფშაყარუთ, მარა ღორონთის ოკო, აკიფშაყარათ რეგიონულ კონგრესეფს დო შხვა სპეციალურ ღონისძიებეფს, სოდეთ ბღებულენთ მნიშვნელოვან ინფორმაციას დო მითითებეფს. მთელ მსოფლიოს იეჰოვაშ ხალხ ართ პროგრამათ სარგებლენს. არძა, მით მიღენს მოწვევას აკოშაყარუაშ გურშენ, გინმირთუ დიდ, ბედნერ ჯგუფიშ ნაწილო. მართალ რე, ნამთინეს შორ შარა აფჷ ოულარ, ნამდა ქიდესწრას თე ღონისძიებეფს, მარა, მუჟამსით ღებულენა მოწვევას დო ოსწრუნა თეცალ შეხვალამეფს ოთანხმნა თი აზრის, ნამდა თე ირფელ ღირუდ თეშა.

მუშ რაგად შილებე თინეფშე, მიდგას ვეშულებ ქიდესწრას თე დიდ აკოშაყარუეფს? თანამედროვე ტექნოლოგიეფიშ ჭყოლოფათ თეცალეფშო შეიოლებერქ იჸუ, სრულ სარგებელ მიღესკო სულიერ პროგრამაშე დო დიდ აკოშაყარუაშ ნაწილო ქიგინესკო დუდ. მაგალთო, მუჟამსით ბენინიშ ფილიალშა მთავარ სამმართველოშ წარმომადგენელ რდუ მეულირ, პროგრამა ტრანსლაციათ გინიჩამუდ საჰარაშ უდაბნოს, ნიგერიშ ართ ჭიჭე ქალაქ არლიტის. თე ტრანსლაციას ხუთ იეჰოვაშ მოწმე  დო ვითაამშვ დაინტერესებულ ოსწრუდ. მართალ რე, შორს რდეს, მარა დუდის თეშ გინაფლენდეს, ითამ თი 44 131 კოჩწკუმა ართო რდეს, მით ბენინს თე შეხვალამას ოსწრუდ. ართ ჯიმაქ მობჭარეს: „მადლობა, ნამდა საშვალება მიღდეს თე ღონისძიებას ტრანსლაციათ ვუჯინითკო. თექ მანგარო შეხუ ჩქინ გურს დო ხოლო ართშა ქობძირით, ნამდა მანგარო გიჸორთ“.

ისრაელ მღვდელ ხვალე ართ საყვირს ქინამბარანდუნ, თენა თიშ ნიშან იჸუაფუდ, ნამდა დუდკოჩეფქ, ანთასიშდუდეფქ, ოკო აკიშაყარესკო შეხვალამაშ კარავწკუმა (რიცხ. 10:4). თექ მოსეშე ინფორმაციას დო მითითებეფს მიღენდეს, ნამუთ მეხვარებუდ თინეფს, შეასრულესკო მუნეფიშ პასუხიშმგებლობეფ. თქვა ხოლო ართ-ართ დუდკოჩ ქოჸოფედითკონ, ვა გაკეთენდითო ირფელს, ნამდა ქიმერთითკო თექ დო მიღითკო მითითებეფ?

ამდღა უხუცესეფ კრებაშ დუდკოჩეფ ვა რენა დო ვართ ღორონთიშ შხურშე ბატონენა (1 პეტ. 5:1—3). მარა ირფელს ორთნა, ნამდა ღორონთიშ შხურ დოჭყიშუან. თინეფ მზადყოფნათ ღებულენა მოწვევას, ნამდა მიკილან დამატებით მომზადება, მაგალთო, სამეფო მსახურებაშ სკოლას. თე მომზადებაშ დროს უხუცესეფ გურაფლენა, მუჭო შეასრულან კრებაშ პასუხიშმგებლობეფ უმოს ეფექტურო. შედეგო, თეს ჯგირობუა ხვალე უხუცესეფშო ვარინ, მთელ კრებაშო მოუღ. თაშ ნამდა, თეცალ სკოლეფ ვემკოირთუმნა-და, იშენით ღებულენთ სარგებელს თე სკოლაშე თინეფიშ საშვალებათ, მიდგაქ უკვე დესწრჷ თის.

მინშა ისრაელ მღვდელეფ საყვირს თეშ ინამბარანდეს, ნამდა თის შხვადოშხვა ხონარ უღუდკო. თენა თიშა მეუთითენდჷ, ნამდა მთელ ბანაკიქ შხვადო ოკო გინილკო (რიცხ. 10:5, 6). თენა მანგარ ორგანიზებულო ხვადუდ, მარა თეწკუმა ართო დიდ მონდომას ითხინდჷ. მინშა შხვადო გინულა ნამთინეს შილებე შურო ვა უსხუნუდკო. მუშენ იფჩიებუთ თეს?

ნამთინე თიშე წუხენდჷ, ნამდა ხშირას დო ველდესინ თეშ აფდეს ართ ადგილშე მაჟიაშა გინაულარ. ბიბლიას ჭარჷ, ნამდა „სოიშახ მუნაფა კარავიშ ჟი რდუ გაჩერებულ, ისრაელეფ დაბანაკებულ რდეს დო სოთინ ვემიშეს“, მარა „მინშა მუნაფა ონჯუაშე ოჭმარეშახ სქიდუდ“. შხვა დროს თიქ შილებე უმოს ხანს, მაგალთო, ჟირ დღას, ართ თუთას ვარდა უმოს მეტ ხანს გაჩენდუკო (რიცხ. 9:21, 22). ხშირას უხვადუდესო გინულა ისრაელეფს? რიცხვეფიშ 33-ა დუდის მოშინაფილ რე სოდგარენ 40 ადგილ, სოდეთ ისრაელეფქ დებანაკეს.

მინშა ისრაელეფ ორო ადგილს იბანაკებდეს. თენა მანგარ სასიამოვნო იჸუაფუდ „დიდ დო ოშქურანჯ უდაბნოს“ (კან. 1:19). თე დროს შილებე ნამთინექ იფიქრუკო, ნამდა შხვადო გინულა გლახა აზრ იჸუაფუდ..

მუჟამსით ისრაელეფ გინულას ქიდიჭყანდეს, ნამთინე ტომქ მოთვინება ოკო გეგმირჩქინკო დო ქიჯინკო, სოიშახ მუშ ულაშ დრო დოდირთუდ. მართალ რე, არძა ირჩქილედ საყვირიშ ხონარს, ნამუთ ითირუდ, მარა არძაქ ართდროულო ოკო ვედიჭყკო გინულა. საყვირიშ პირველ ინომბარუა გინულაშ ნიშან იჸუაფუდ აღმოსავლეთჸურე დაბანაკებულ იუდაშ, ისაქარიშ დო ზებულონიშ ტომეფშო (რიცხ. 2:3—7; 10:5, 6). მუჟამსით თინეფ ქიდიტენდეს ბანაკის, მღვდელეფ მაჟიაშა ქინამბარანდეს საყვირს, ნამუთ უკვე სამხრეთჸურე დაბანაკებულ სუმ ტომშო იჸუაფუდ ნიშან. მღვდელეფ თეიშახ აგრძელენდეს თეშ კეთებას, სოიშახ მთელ ბანაკ ვედიტენდჷ თექიანობას.

ხომ ვაიჭირა ნამთინე ორგანიზაციულ ცვლილებაშ მერჩქვანა? შილებე ფიქრენთ, ნამდა ცვლილებეფ ნაბეტან ხშირას ხვადუ. ვარდა შილებე მუდგარენს მერჩქვანელ რდით დო ვა გოკოდეს თიქ დითირკო. მიზეზ მუდგა ვა რდუკონ, შილებე ქოძირით, ნამდა სიახლეეფს ქიმვარჩქვანათინ, საჭირო რე დრო დო მოთვინება. თაშ ნამდა, ცვლილებეფს ქუდვაჸუნუთ-და, ქობძირუნთ, ნამდა თინეფ ჩქინ საჯგირობუოთ ხვადუ დო იეჰოვა კურთხევეფს ვა მარკენა.

ეგვიპტეშე გიშულაშ უკულ იეჰოვა უდაბნოს აწოჸუნდჷ მილიონობით ქომოლკოჩის, ოსურკოჩის დო ბაღანას. თიშ მზრუნველობაშ დო მითითებეფიშ უმშო თინეფ ვეგნოსქიდუდეს. ამდღა, იეჰოვა ჩქი ხოლო მარზენა მითითებეფს. თენა მოხვარნა, მიღდან ძალიერ რწმენა დო ხოლოშიან ურთიერთობა ღორონთწკუმა. თაშ ნამდა, მორთ არძას გინოჭყვიდილ მაფდან, ართგურ ისრაელეფცალო ირიათო ქუმურჩქილუათ „საყვირიშ ხონარს“!