1. მუს ბგურაფლენთ ეკლესიასტეშ 7:20-ის ენოჭარილ სოლომონიშ სიტყვეფშე?

 მეფე სოლომონქ ჭარჷ: „ვა არსებენს დედამიწას მართალ კოჩ, ნამუთ ირიათო ჯგირს ორთუდას დო დღას ვა ცოდენდას“ (ეკლ. 7:20). თენა დასურო თაშ რე! ჩქი არძა ცოდვილეფ ვორეთ (1 იოან. 1:8). თაშ ნამდა, არძას მოსაჭირნა პატიება ქოთ ღორონთშე დო ქოთ ადამიანეფშე.

2. მუს გინაფლენთ, მუჟამსით ხოლოშიან მეგობარ გაპატიენა?

² ხოლოშიან მეგობარშა დღას ქოიწყინუაფნან-და, მუშო ოკო რაგად, გოკოდესკონ იჸიდ სიტუაციაშ გიშასწორება დო თიწკუმა ჯვეშობურ ურთიერთობაშ დორთინაფა. ალბათ მთელ გურით ქოთხინდით თის პატიებას. მუჭო იგინით დუდ, მუჟამსით თიქ სრულას ქუგაპატის? შურ მუგადგუმუდეს დო მანგარ ბედნერ იჸუაფუდით!

3. მუს გუვარჩიენთ თე სტატიას?

³ მოკონა, იეჰოვა ჩქინ არძაშ უმოს ხოლოშიან მეგობარ რდას, მარა მინშა სიტყვეფით დო საქმეეფით გურს უწყუნუანთ თის. მუშენ შემლებნა ვორდათ დარწმუნებულ, ნამდა იეჰოვა მზათ რე, ქუმაპატუან? მუ განსხვავება რე თიშ დო ჩქინ პატიებაშ შქას? დო ბოლოს, მის პატიენს იეჰოვა?

4. მუშენ შემლებნა ვორდათ დარწმუნებულ, ნამდა იეჰოვა მზათ რე პატიებაშო?

⁴ ბიბლია მარწმუნენა, ნამდა იეჰოვა მზათ რე პატიებაშო. თიქ სინაიშ გვალას მუშ ანგელოზის მოსეშა ორაგადაფუ: „იეჰოვა, იეჰოვა მოჭყოლოფე, შხვეფიშ გაჭირებაშ  გურშა მიმაღალარ დო ხეთეშე ვერისხებუნ ფერ ღორონთ რე, გურხვე რე სიჯგირას დო ჭეშმარიტებას. ანთასეფშო გიმირჩქინანს ართგურ ჸოროფას, პატიენს დაშებულს, უდუჯერებლობას დო ცოდვას“ (გამ. 34:6, 7). თინა რე კეთილ დო მოჭყოლოფე ღორონთ, მით ირო მზათ რე, ქაპატუას მომნანიებელ შემცოდველეფს (ნემ. 9:17; ფსალმ. 86:15).

5. მუჭოთ ფსალმუნიშ 103:13, 14-შე იძირე, მუს გინაჭყვიდირაფუანს იეჰოვას რჩქინა, ნამუთ ადამიანეფიშ გურშენ უღჷ?

⁵ მუჭოთ ჩქინ გუმაჭყაფალს, იეჰოვას, ირფელ უჩქჷ ჩქინ გურშენ. უბრალოთ დეფიქრით, თის დედამიწას თითოულ პიროვნებაშ გურშენ არძა დეტალ უჩქჷ (ფსალმ. 139:15—17). თაშ ნამდა, თის შეულებ ძირას არძა კილ, ნამუთ ჩქინ მშობლეფშე არასრულყოფილებაშ შედეგო მიბღით. თის თინა ხოლო უჩქჷ, მუქ გინმოშქვეს თიცალ პიროვნებეფო, მუნერით ასე ვორეთ. თე ირფელიშ რჩქინა იეჰოვას გინაჭყვიდირაფუანს, ჩქინ მიმართ ჭყოლოფა გეგმირჩქინას (ფსალმ. 78:39; წეკითხით ფსალმუნიშ 103:13, 14).

6. მუჭო დამტკიც იეჰოვაქ, ნამდა მზათ რე პატიებაშო?

⁶ იეჰოვა მზათ რე პატიებაშო, მუთ უკვე ბრელშა დამტკიც. თის ჯგირო არჩქილე, ნამდა ადამიშ მოქმედებაშ შედეგო არძა ადამიან ცოდვილ რე დო ღურუ (რომ. 5:12). თინეფს თე მდგომარეობაშე ვართ მუნეფიშ დუდ დარსხებედეს დო ვართ შხვა (ფსალმ. 49:7—9). მარა ღორონთიქ მიშელ ადამიანეფიშ მდგომარეობაშა დო იმოქმედ ჩქინ ორსხებელო. მუ აკეთ თიქ? იოანეშ 3:16-შე ვორწყეთ, ნამდა თიქ მუშ ხვალეგუნაჭყეფ სქუა გოუტუ დედამიწაშა, ნამდა ჩქინ გურშენ დოღურედკო (მათ. 20:28; რომ. 5:19). იესოქ არძაშ მანგიორო დოღურ, ნამდა ირსხას თინეფ, მით თიშ მიმართ რწმენას გიმირჩქინანა (ებრ. 2:9). იეჰოვაშო მანგარ ძნელ იჸუაფუდ თიშ ძირაფა, მუნერ დამცირებულო დო ტანჯებულო ღურუდ მუშ სქუა. მუშო ოკო რაგად, იეჰოვას ჩქინ პატიება ვაკოდკონ, მუშ სქუაშ ღურას ვა დუშვენდჷ.

7. ქიმიჸონით ნამთინე ბიბლიურ პერსონაჟიშ მაგალით, მიდგას იეჰოვაქ ირფელ აპატუ.

⁷ ბიბლია ეფშა რე თინეფიშ მაგალითეფით, მიდგას იეჰოვაქ ირფელ აპატუ  (ეფეს. 4:32). თქვა ალბათ მენაშე ქუგგაშინენა. თე უბადო კოჩ საშინელო ცოდენდჷ იეჰოვაშ წინააღმდეგ. თიქ ტყურა ღორონთეფიშ თაყვანიშცემა გემშეღ ქიანაშა დო მუშ სქუალეფ ხოლო შეწირ თე ღორონთეფს. თე ირფელს ვეგეჯერდჷ დო ტყურა ღორონთიშ ქანდაკება იეჰოვაშ წმინდა ტაძარშა გემნიღ. ბიბლიას თიშ გურშენ ჭარჷ: „დიდ უბადობას ორთუდ თინა იეჰოვაშ თოლს დო შეურაცხყოფას მიორინუანდჷ თის“ (2 მატ. 33:2—7). მარა, მუჟამსით მენაშექ მთელ გურით მინანუ, იეჰოვაქ ირფელ ქაპატუ დო მეფობა ხოლო დურთინუ (2 მატ. 33:12, 13). მუჟამსით ცოდვეფიშ პატიებაშე მეურს ჩიება, ალბათ მეფე დავითიშ მაგალით ხოლო ქუგგაშინენა. თიშ ცოდვეფშა მრუშობა დო კოჩიშ ჸვილუა ხოლო მიშეშ, მარა იეჰოვაქ თიშ გულწრფელ აღიარება დო მონანიება ქოძირუნ, ირფელ ქაპატუ (2 სამ. 12:9, 10, 13, 14). თაშ ნამდა, შემლებნა დარწმუნებულ ვორდათ, იეჰოვა მზათ რე პატიებაშო. თიშ პატიება ადამიანეფიშ პატიებას ვა გჷ.

8. მუჭო მოქმედენს იეჰოვაშ პატიებაშ უნარშა თინა ნამდა, არძაშ უჯგუშ მოსამართლე რე?

⁸ იეჰოვა „მთელ დედამიწაშ მოსამართლე რე“ (დაბ. 18:25). ჯგირ მოსამართლეს კანონეფ ჯგირო ოკო არჩქილედას. იეჰოვაშ შემთხვევას ხოლო თაშ რე, მუშენდა თინა მოსამართლეწკუმა ართო კანონმდებელ ხოლო რე (ეს. 33:22). იეჰოვაცალო მითინს ვა უჩქჷ, მუ რე სწორ დო მუ — არასწორ. თეს გეძინელ, ჯგირ მოსამართლეს გადაწყვეტილებაშ მეღებაშახ არძა საჭირო ფაქტ ოკო უჩქუდას კონკრეტულ საკითხწკუმა დაკავშირებით. თე ირფელ მარწმუნენა, ნამდა იეჰოვა არძაშ უჯგუშ მოსამართლე რე.

9. მუ ინფორმაცია უღჷ იეჰოვას, მუჟამსით გინოჭყვიდუნს, ქაპატუას დო ვარ მითინს?

⁹ იეჰოვას ირო სრულყოფილო უჩქჷ არძა ფაქტ ნებისმიერ საკითხწკუმა დაკავშირებით, მუთ ადამიანეფიშ გურშენ ვა მარაგადენა (დაბ. 18:20, 21; ფსალმ. 90:8). თინა ადამიანეფშე ბრელით უმოსის ორწყე. თის ჯგირო არჩქილე, მუ მიჸონანს პიროვნებას კონკრეტულ მოქმედებაშა. თენა შილებე რდას გენეტიკა, გარემო, ნამდგას ირდუდ ვარდა ასე ცხოვრენს, დო ემოციურ ვარდა ჯანმრთელობაშ შხვა პრობლემა. იეჰოვა გურეფს ორწყე დო წკანტილო უჩქჷ, მუს მუშენ ვორთუთ. თიშა მუთუნ ვეფულე (ებრ. 4:13). მუჟამსით იეჰოვა ადამიანს პატიენს, თეს თიშენ ორთჷ, ნამდა თე სიტუაციაშ გურშენ არძა ფაქტ უჩქჷ.

10. მუშენ შემლებნა ფთქუათ, ნამდა იეჰოვაშ გადაწყვეტილებეფ ირო სამართლიან რე? (კან. 32:4)

¹⁰ იეჰოვაშ გადაწყვეტილებეფ ირო სამართლიან რე. თინა გიშაკერძაფას მუთუნნერო ვეგმირჩქინანს. თიშ პატიება დღას ვა რე გერსხილ მითინიშ მეჯინაშა, ფარაშა, პოპულარობაშა ვარდა უნარეფშა (1 სამ. 16:7; იაკ. 2:1—4). მითინს ვეშულებ თის მუთუნ დანძალას ვარდა ქრთამ ქიმიარზუას (2 მატ. 19:7). გადაწყვეტილებეფიშ მეღებაშ დროს თინა ემოციეფს ვეჸუნს (გამ. 34:7). მუშო ოკო რაგად, იეჰოვა არძაშ უჯგუშ მოსამართლე რე, მუშენდა ჯგირო უჩქჷ, მუნერეფ ვორეთ დო მუ სიტუაციას მოფხვადით (წეკითხით კანონიშ 32:4).

11. მუთ რე განსაკუთრებულ იეჰოვაშ პატიება?

¹¹ ებრაულ წერილეფიშ მაჭარალეფ მირაგადნა, ნამდა იეჰოვაშ პატიება განსაკუთრებულ რე. ნამთინე მონაკვეთის თინეფქ გიმირინუეს სიტყვა, ნამდგაშ გურშენ ართ წყაროს ჭარჷ, ნამდა თინა „ცოდვილიშ მიმართ ხვალე ღორონთშე პატიებაშ ეიოჭარალო გიმირინუაფ. თე  სიტყვა დღას ვეგმირინუაფ ადამიანეფიშ გიმორჩქინელ პატიებაშ ეიოჭარალო“. ხვალე იეჰოვას უღჷ ძალაუფლება, სრულას აპატუას მომნანიებელ შემცოდველს. მუს მომღანა იეჰოვაშ პატიება?

12, 13. ა) მუს გინაფლენს პიროვნება, მიდგას იეჰოვაქ აპატუ? ბ) პატიებაშ უკულ მოფთხინანო იეჰოვა პასუხის ჩქინ ცოდვაშენ?

¹² მუჟამსით მეფხვადუთ, ნამდა იეჰოვაქ ქუმაპატის, დუდის უმოს თავისფალო ბგინაფლენთ, შინაგან სიმშვიდეს ბღებულენთ და სინდის მეტო ვა მაწუხენა. თეშნერო ხვალე თიმწკუმა ბგინაფლენთ დუდის, მუჟამსით იეჰოვა მაპატიენა (საქ. 3:19). პატიებაშ შედეგო იეჰოვა თეშ გიშანწყუნს ჩქინწკუმა ურთიერთობას, ითამ დღას ვეშემცოდებნა.

¹³ პატიებაშ უკულ იეჰოვა დღას ვეგებდვანა ბრალს დო ვა დაბსაჯენა თე ცოდვაშ გურშენ (ეს. 43:25; იერ. 31:34). იეჰოვა, თაშ ქოფთქუათინ, თიცალო მითხინუანა ჩქინ ცოდვეფს, „მუჭოთ ბჟაეიოლ რე შორს ბჟადინოლშე“ b (ფსალმ. 103:12). თიშ პატიებაშ უნარშე ფიქრ მარდულობათ დო მოწიწებათ ემოფშანა (ფსალმ. 130:4). მარა მის პატიენს იეჰოვა?

14. მუ გებგით იეჰოვაშ პატიებაშ გურშენ?

¹⁴ მუჭოთ უკვე ბძირით, იეჰოვაშ პატიება თიშა ვა რე დამოკიდებულ, ჩქინ ცოდვა დიდ რენო დო ვარ — ჭიჭე. თინა ხოლო ქიგებგით, ნამდა იეჰოვა პატიებაშ გადაწყვეტილებას გიორსხუანს რჩქინაშა, ნამუთ თის უღჷ, მუჭოთ ჩქინ გუმაჭყაფალს, კანონმდებელს დო მოსამართლეს. მუს აქციენს იეჰოვა ყურადღებას პატიებაშახ?

15. მუჭოთ ლუკაშ 12:47, 48-შე იძირე, მუ რე თი ართ-ართ მხარე, მუდგას იეჰოვა აქციენს ყურადღებას?

¹⁵ ართ-ართ მუდგარენ, მუდგას იეჰოვა ყურადღებას აქციენს, თინა რე, ქუჩქუდ დო ვარ შემცოდველს, არასწორს ორთუდუნ? თენა ჯგირო იძირე ლუკაშ 12:47, 48-ს მოჩამილ იესოშ სიტყვეფშე (წეკითხით). მუჟამსით პიროვნება შეგნებულო ორთჷ თის, მუთ იეჰოვას ვა მოწონს დო თენა ჯგირო უჩქჷ, სერიოზულო ცოდენს. შილებე იეჰოვაქ გინოჭყვიდას, ნამდა თის ვაპატუას (მარ. 3:29;  იოან. 9:41). მარა თინა ხოლო ქოფთქუათ ოკო, ნამდა მინშა მიჩქნა, არასწორს ვორთუთინ. ქომღუდანიო ოკო თეცალ დროს პატიებაშ იმენდ? ქო! ასე გინიბლენთ ხოლო ართ მხარეშა, მუდგას იეჰოვა აქციენს ყურადღებას.

16. მუს ნიშნენს მონანიება დო მუშენ რე თინა მნიშვნელოვან, იეჰოვაქ ქუმაპატუანინ?

¹⁶ მაჟია, მუდგას იეჰოვა აქციენს ყურადღებას თინა რე, მთელ გურით ქინანიენს დო ვარ შემცოდველ. მუს ნიშნენს მონანიება? მონანიება ნიშნენს აზრიშ, დამოკიდებულებაშ დო მიზანიშ თირუას. თეშა მიშურს ნარღება დო წუხება თიშ გურშენ, მუთ პიროვნებაქ აკეთ ვარდა ოკო უკეთებუდკო, მარა ვა უკეთებ. მომნანიებელ შემცოდველ ხვალე თიშ გურშენ ვა წუხენს, მუთ აკეთ, თის მუშ გლახა სულიერ მდგომარეობა ხოლო აწუხენს, მუდგაქ ცოდვაშა მიჸონ. ქიგიშინით, ნამდა მენაშე დო დავითის იეჰოვაქ სერიოზულ ცოდვეფ აპატუ, მუშენდა მთელ გურით მინანის (1 მეფ. 14:8). თაშ რე, იეჰოვაქ შემცოდველს ქაპატუასინ, მონანიებაშ ნიშნეფ ოკო ქოძირას. მარა ხვალე ცოდვაშ გურშენ წუხება დასაბაღ ვა რე. საჭირო რე მოქმედება. c თეს მეპჸუნთ ხოლო შხვა მხარეშა, მუდგას იეჰოვა აქციენს ყურადღებას.

17. მუს ნიშნენს ცხოვრებაშ წესიშ თირუა დო მუშენ რე მნიშვნელოვან, დღას ვადვართათ გლახა საქმეეფს? (ეს. 55:7).

¹⁷ ხოლო შხვა მხარე, მუდგას იეჰოვა ყურადღებას აქციენს თინა რე, მუზმათ თირანს პიროვნება ცხოვრებაშ წესის. შხვა სიტყვეფით ქოფთქუათინ, თიქ ოკო მიოტუას გლახა საქმეეფ დო იეჰოვაშ მოსაწონო გაგრძელას ცხოვრება (წეკითხით ესაიაშ 55:7). თეს გეძინელ, ოკო დითირას, ნამდა იეჰოვაშ აზროვნებათ ქიხემძღვანელას (რომ. 12:2; ეფეს. 4:23). საჭირო რე, გინოჭყვიდილ აფდას, ჩეთხინუას გლახა აზროვნება დო საქმეეფ დო დღას ვა დართას თინეფს (კოლ. 3:7—10). მუშო ოკო რაგად, იეჰოვა ცოდვეფს ქრისტეშ გიშაჸიდირალიშ მიმართ ჩქინ რწმენაშ საფუძველშა მაპატიენა. მარა თეს თიმწკუმა  ორთჷ, მუჟამსით ორწყე, ნამდა მთელ გურით მოკონა გლახა საქმეეფიშ ჩათხინაფა (1 იოან. 1:7).

18. მუ გუვარჩით თე სტატიას იეჰოვაშ მოწონაშ გურშენ?

¹⁸ მორთ ქიგნვოჯინათ თე სტატიას გარჩიებულ ნამთინე მთავარ აზრის. მთელ სამყაროს იეჰოვას დასურო არძაშ უჯგუშო შეულებ პატიება. მუშენ შემლებნა თეშ რაგად? პირველ, თინა ირიათო მზათ რე პატიებაშო. მაჟია, თის ირფელ უჩქჷ ჩქინ გურშენ, უჩქჷ მუჭო ვორეთ გოჭყაფილ დო ორწყე, მთელ გურით ქიმნანიენთ დო ვარ. დო მასმა, პატიებაშ უკულ იეჰოვაშ თოლს ჩქინ ცოდვა ილასუ. თენა საშვალებას მარზენა, მიღდან სუფთა სინდის დო ღორონთიშ მოწონა ქიბგინათ.

19. მუშენ შემლებნა მიღდან ხიოლ, ცოდვაშა დუდ სრულას ვემაჩილითენან თიშ უმკუჯინუო?

¹⁹ მუშო ოკო რაგად, არასრულყოფილეფ ვორეთინ თიშ გურშენ სრულაშე ვემაჩილითენა დუდ ცოდვაშა, მარა გურშა ემქექუანა „წმინდა წერილეფიშ საკვლევ ცნობარს“ (სათაურ „მონანიება“) მოჩამილ აზრ: „იეჰოვა მოჭყოლოფე რე დო არჩქილე მუშ მსახურეფიშ სისუსტეეფ. ათეშენ თინეფს არასრულყოფილებაშ შედეგო დაშვებულ შეცდომეფიშ გურშენ ირიათო ოკო ვაწუხენდან სინდის (ფს. 103:8—14; 130:3). ღორონთის სუფთა სინდისით ქამსახურნან-და, თინეფს ხიოლიშ დინაფაშ მიზეზ ვაღვენუნა (ფლ. 4:4—6; 1ინ. 3:19—22)“. თენა მართალო გურიშემაკინალ აზრ რე.

20. მუს გუვარჩიენთ ანწიან სტატიას?

²⁰ მარდულეფ ვორეთ, ნამდა იეჰოვა მზათ რე პატიებაშო, მუჟამსით მთელ გურით იმნანიენთ დაშებულს. მუჭო შემლებნა მივაჸუნათ თიშ მაგალითის დო ვორდათ მპატიებელეფ? მუთ მოგენს ჩქინ დო იეჰოვაშ პატიება ართიანს დო მუ განსხვავება რე თინეფ შქას? მუშენ რე მნიშვნელოვან, ჯგირო მარჩქილედან თე განსხვავება? ანწიან სტატია პასუხის ქიმეჩანს თე კითხვეფს.