ლიზა a იჩიებ დუდშე მუქ დაინტერეს ჭეშმარიტებათ: „ჩქიმდა არძაშ უმოსო ქრისტიან და დო ჯიმალეფიშ გიმორჩქინელ ჯგირ საქმეეფქ იმოქმედ“. ენიშ შემთხვევას ხოლო თაშ მოხვად. თინა რაგადანს: „ჭეშმარიტებაშ მიმართ ინტერეს მოწმეეფიშ ჯგირ საქმეეფქ უმოსო გომრჩქინ, ვინემ ბიბლიურ გურაფეფქ“. ასე თე დალეფ ხიოლით კითხულენა ბიბლიას დო ფიქრენა თიშე, მარა დუდშე თინეფშა და დო ჯიმალეფიშ გიმორჩქინელ სიკეთექ იმოქმედ.

მუჭო გიმიფრჩქინათ თიცალ სიკეთე, ნამუთ იმოქმედენს შხვეფშა? გუვარჩუათ ჟირ მხარე — ჩქინ ჩიება დო ჩქინ საქმეეფ. თეშ უკულ ქობძირათ, მიშ მიმართ ოკო გიმიფრჩქინათ სიკეთე.

იგავეფიშ 31-ა დუდ ჯგირ ოსურს თეშნერო ეჭარუნს: „თიშ ნინას სიკეთეშ კანონ რე“ (იგავ. 31:26). თე „კანონს“ თინა საშვალებას არზენს, იმოქმედას მუშ ჩიებაშა — მუ თქუას დო მუჭო თქუას. ჯგირ იჸუაფ, მუმალეფქ ხოლო თე „კანონით“ იხემძღვანელან ჩიებაშ დროს. მშობლეფიშ უმენტაშიქ ქოძირ, ნამდა უხეშო ნარაგად გლახათ მოქმედენს მუნეფიშ ბაღანაშა. თინეფ ბაღანას უხეშო დო ჸინჩას ქუდურაგადუანან-და, თეს შილებე ჯგირ რეაქციაქ ვა მაჸუნას. მუჟამსით მშობლეფ სქუალეფწკუმა ჩიებაშ დროს სიკეთეს გეგმირჩქინანა, თინეფს უმოს ადვილ აჸინა მორჩქილაფა დო მორჩილება.

ქეშეილებნანო თქვან ჩიებათ სიკეთეშ გიმორჩქინა? თეშ გაგებას მოხვარნა იგავეფიშ 31:26-იშ პირველ ნაწილ: „თინა სიბრძნეს რაგადანს“. თეშა მიშურს, სიტყვეფ დო ხონარიშ ტონ გონივრულო გეგშაბგორათ. უმენტაშ შემთხვევას ჯგირ იჸუაფ, ჩქინ დუდის ქობკითხათ: „მუდგაშ რაგად მილამუნ თინა, გურიშმოულას შეუნწყუნს ხეს დოვარ — მშვიდობას?“ (იგავ. 15:1). თაშ ნამდა, ჩიებაშახ ფიქრ ბრძნულ რე.

ხოლო ართ იგავ იჩიებ: „გურუგუჩამუო ჩიება ყამაშ გეშქუმალაცალ რე“ (იგავ. 12:18). მუჟამსით დეფიფქრებუთ, მუჭო იმოქმედენს ჩქინ სიტყვეფ ვარდა რაგადიშ ტონ შხვეფშა, უმოსო გუვაკონტროლენთ ჩიებას. „სიკეთეშ კანონიშ“ მეჸუნა მიმეხვარებნა, დუდ ეუჩილითუათ გურსაჭუო სიტყვეფიშ გიმორნაფას დო უხეშ ტონს (ეფეს. 4:31, 32). თეს გეძინელ, ჩქინ ფიქრეფს დო ჩიებას დოფთირანთ დადებით, გურიშემაკინალ სიტყვეფით დო ლიბ ტონით. თეშ ჯგირ მაგალით მუჩეს იეჰოვაქ, მუჟამსით მუშ შქურნაფილ მსახურს, ელიას, გურშა ელუკინ. ანგელოზიქ, ნამუთ იეჰოვას წარმოადგინენდჷ, თის „მშვიდ, წყნარ“ ხონარით დურაგადუ (1 მეფ. 19:12). მარა რდე კეთილ, გემუან ჩიებაშე უმოსის ნიშნენს. თეშო საჭირო რე, ჯგირ საქმეეფ ხოლო ვაკეთათ. მარა, მუჭო რე თენა შეიოლებერ?

იეჰოვაშ მაგალითის მეპჸუნთ, მუჟამსით კეთილ სიტყვეფიშ გიმორნაფაწკუმა ართო, კეთილ საქმეეფს ხოლო გიმიფრჩქინანთ (ეფეს. 4:32; 5:1, 2). ჟიშე მოშინაფილ ლიზა ეჭარუნს სიკეთეს, ნამუთ მოწმეეფქ თიშ მიმართ გიმირჩქინეს: „მუჟამსით ჩქინ ოჯახის სასწრაფოთ შხვადო აჸუ გინაულარქ, ჟირ იეჰოვაშ მოწმე წყვილქ, მით ჩქინ სამეზობლოს ცხოვრენდჷ, დრო დამითმეს დო ენონწყუალას მიმეხვარეს. თე დროს დიო ხოლო ვა მაფუდ ბიბლიაშ გურაფა დოჭყაფილ“. თინეფიშ კეთილ საქმეეფქ ლიზას გინაჭყვიდირაფუ, მეტ ქიგეგკო ჭეშმარიტებაშ გურშენ.

 ენი ხოლო მანგარ მარდულ რდჷ თი სიკეთეშენ, ნამუთ მოწმეეფქ თიშ მიმართ გიმირჩქინეს. თინა იშინანს: „ქვეყნიერებაშ მდგომარეობაქ ადამიანეფიშ მიმართ ნდობა მემდინუ. ეჭვიშ თოლით უჯინედ თინეფიშ მოტივეფს. მოწმეეფს ქეშეფხვადინ, მიკვენდჷ, მუშენ გიმირჩქინანდეს თინეფ ჩქიმ მიმართ ინტერესის. მარა ბიბლიაშ მასწავლებერიშ მთელ გურით ნაკეთებ სიკეთექ თიშ ნდობა გომრჩქინ. თეშ უკულ ქიდიბჭყჷ თიშე დაკვირება, მუდგას ბგურაფლენდჷ“.

ყურადღება ქიმიაქცით, ნამდა ლიზა დო ენიშა მანგარო იმოქმედ და დო ჯიმალეფიშ ჸოროფათ გიმორჩქინელ ჯგირ საქმეეფქ. თექ თინეფს გინაჭყვიდირაფუ, უმოს ქიგეგესკო ჭეშმარიტებაშ გურშენ დო მეხვარ, ნდობაქ გურჩქინდესკო იეჰოვაშ დო თიშ ხალხიშ მიმართ.

ნამთინეს გემუან ჩიება წესო უღჷ, მუშენდა მუნეფიშ კულტურას თაშ რე მეღებულ. თენა მანგარ ჯგირ რე, მარა თეს ხვალე კულტურას ვარდა ხასიათის მიღნან, თიშენ ქუვორთუთ-და, თენა ვეჸუაფ ღორონთიშ მაგალითიშ მეჸუნა (ქეშუდარით საქმეეფიშ 28:2).

სიკეთე, ნამდგაშ მაგალითის ღორონთ მარზენა, წმინდა შურიშ ნაყოფიშ ართ-ართ  ნაწილ რე (გალ. 5:22, 23). თაშ ნამდა, ნამდვილ სიკეთეშ გავითარებელო ღორონთიშ წმინდა შურ რე საჭირო. თეშნერო მივაჸუნუთ იეჰოვაშ დო იესოშ მაგალითის. თეწკუმა ართო, მუჭოთ ქრისტიანეფს, მოინტერესნა შხვეფიშ მდგომარეობა. თაშ ნამდა, მოქმედებას ჟირ მუდგარენ გინმოჭყვიდირაფუანა — იეჰოვა ღორონთიშ ჸოროფა დო ადამიანეფიშ ჸოროფა. შედეგო სიკეთე, ნამდგას გიმიფრჩქინანთ, ძალიერ თვისებათ გინირთუ, ნამუთ გურშე მოურს დო ნამდგას ღორონთ იწონუანს.

შილებე ადვილ რდას სიკეთეშ გიმორჩქინა თინეფიშ მიმართ, მით აშო მოქცუნა კეთილო ვარდა მიდგას იფჩინენთ (2 სამ. 2:6). თეშნერო მარდულობას ხოლო გიმოფხანტუნთ (კოლ. 3:15). მარა მუ ოკო ვაკეთათ თინეფიშ შემთხვევას, მიდგაშე ფიფქრენთ, ნამდა ღირს ვა რენა ჯგირო მოქციებაშ?

დეფიფქრათ: იეჰოვა მანგარ ჯგირ მაგალითის ირზენს თინეფიშ მიმართ სიკეთეშ გიმორჩქინაშ, მით თეშ ღირს ვა რე. ბიბლია მნიშვნელოვან მუდგარენს მოგურუანა თე თვისებაშ გიმორჩქინაშ გურშენ. ქრისტიანულ-ბერძნულ წერილეფს ფრაზა „დიდ ჭყოლოფა“, ნამუთ ნიშნენს სიკეთეშ გიმორჩქინას თინეფიშ მიმართ, მით თეშ ღირს ვა რე, ბრელშა რე გიმორნაფილ. მუჭო გიმირჩქინანს ღორონთ ჩქინ მიმართ სიკეთეს?

იეჰოვა სიკეთეს გიმირჩქინანდჷ არძა ადამიანიშ მიმართ. თინა ირფელს არზენდჷ თინეფს, მუთ სიცოცხლეშო რდჷ საჭირო (მათ. 5:45). იეჰოვა თეიშახ ხოლო გიმირჩქინანდჷ ჩქინ მიმართ სიკეთეს, სოიშახ თის გეფჩინებაფუანდით (ეფეს. 2:4, 5, 8). მაგალთო, თიქ მუშო არძაშ უჯგუშ, ხვალეგუნაჭყეფ სქუა, შეწირ მთელ კაცობრიობას. მოციქულ პავლექ ჭარჷ, ნამდა იეჰოვაქ გინიგ გიშაჸიდირალ მუშ „დიდ ჭყოლოფათ“ (ეფეს. 1:7). ათეშ გურშენ თიმწკუმა ხოლო, მუჟამსით ფცოდენთ დო გურს უწყუნუანთ იეჰოვას, თინა აგრძელენს ჩქინ დოგურაფას. თიშ მითითებეფ დო სიტყვეფ თიცალ რე, მუჭოთ „ციზაფ დოლოს“ (კან. 32:2). ჩქი ვეშემლებნა იეჰოვას სრულას გეგნუგათ თი სიკეთეშენ, მუდგას იეჰოვა ჩქინ მიმართ გიმირჩქინანს. სინამდვილეს ჩქინ მომავალ იეჰოვაშ სიკეთეშა რე დამოკიდებულ (ქეშუდარით 1 პეტრეშ 1:13).

იეჰოვაშ სიკეთე გინმოჭყვიდირაფუანა, ჩქი ხოლო მივაჸუნათ თიშ მაგალითის. შედეგო თე თვისებას ხვალე მუსხირენ პიროვნებაშ მიმართ ვეგმიფრჩქინანთინ, ჩქინ ცხოვრებაშ ნაწილო გინვოშქვანთ (1 თეს. 5:15). სიკეთეს ირიათო გეგმიფრჩქინანთ-და, შხვეფშო იპჸუაფუთ, მუჭოთ ჩხურუს დაჩხირიშ სიტიბა — შემალებედან იჸი გურშა ეუქექუათ ჩქინ ოჯახიშ წევრეფს, თანამორწმუნეეფს, თანამშრომელეფს, სკოლაშ ამხანაგეფს დო მეზობელეფს.

დეფიფქრათ ჩქინ ოჯახიშ თი წევრეფშე ვარდა თანამშრომელეფშე, მიდგას ჯგირობუა მოუღ ჩქინ კეთილ სიტყვაქ ვარდა საქმექ. შილებე კრებას რდას თიცალ მიდგარენ, მიდგას მოხვარა ოსაჭირ ჸუდეშ საქმეეფს ვარდა მაღაზიაშა აფჷ ოულარ დო თენა ვეშულებ. თეს გეძინელ, შილებე მსახურებას ქეშეფხვადათ თიცალ მიდგარენს, მიდგას თი მომენტის მოხვარა ოსაჭირ. თეშნერ სიტუაციეფს სიკეთეშ გიმორჩქინაშ საშვალება მუმაჩამნა.

მივაჸუნათ იეჰოვაშ მაგალითის დო ჩქინ სიტყვეფ დო საქმეეფ გერსხილ რდას „სიკეთეშ კანონშა“.