მაჟია მსოფლიო ომიშ დროს ჩქიმ მშობლეფქ ესტონეთშე გერმანიაშა გინორთეს ოცხოვრებშა დო მა ხოლო თექ დებაბდჷ. ჩქიმ დაბადებაშ უკულ, ჭიჭე ხანშა, კანადაშა გინულა გინოჭყვიდეს. ჩქი კანადაშ ქალაქ ოტავაწკუმა ხოლოს ართ შენობას ქიდიფხორით, სოდეთ ჩქინწკუმა ართო ქოთომეფ ხოლო რდეს. ფინანსურო მანგარო მიჭირდეს, მარა ირ ოჭმარეს ოჭკუმალო კვერცხ ვა მორკუდეს.

ართ დღას იეჰოვაშ მოწმეეფქ დიაჩქიმს გამოცხადებაშ 21:3, 4 წუკითხეს. თე სიტყვეფქ დიაჩქიმიშ გურს თეშ შეხუ, ნამდა ქანგარინ. დიაჩქიმ დო მუაჩქიმიშ გურს ჭეშმარიტებაშ თასიქ ქინითას. თინეფქ ბიბლიაშ გურაფა ქიდიჭყეს დო ბრელ დროს ვემკურთუმუნ თეშ დინათეს.

ჩქიმ მშობლეფს ინგლისურ ჯგირო ვა უჩქუდეს დო თე ნინაშა ჩიება ხოლო უჭირდეს, მარა იეჰოვაშ მსახურებას დიდ მონდომას გიმირჩქინანდეს. მუაჩქიმ ქალაქ სლადბერის მუშენდჷ ქარხანას, სოდეთ ნიკელს გინმანდღულუანდეს. თიშ უმკუჯინუო, ნამდა წოხოლენ სერს მთელ სერიშ ნამუშერ რდჷ, საბატონ ოჭმარეს მა დო ჩქიმ დას, სილვიას, ხეს ქუმოფთხუნდეს დო მსახურებაშა მეპჸუნდით. ირ მარას, მთელ ოჯახ ართო ვარჩიენდით „გინაჯინალ კოშკის“. ჩქიმ მშობლეფქ თეშ ქომიჸოროფუეს იეჰოვა, ნამდა 1956 წანას, 10 წანერ ვორდინ თეშ, დუდ მევუძღვინ თის დო დიბნათ. იეჰოვაშ მიმართ თინეფიშ ძალიერ ჸოროფა ამდღა ხოლო მოხვარ, ვემვოტუე ღორონთიშ მსახურება.

სკოლაშ თებაშ უკულ იეჰოვაშ მსახურებას გამკვოჩირთჷ დო ბრელ დროს ვაგმურთუნდჷ თის. ფიფქრენდჷ, ნამდა პიონერობას ქიდიბჭყანდჷ-და, დღას ვეკმაშაყარედ ფარა დო ვეშმალებედ მიბლიკო მთელ მსოფლიო, მუთ ჩქიმ ოცნება რდჷ. თი დროს მუშობა ქიდიბჭყჷ ართ ადგილობრივ რადიოსადგურს, სოდეთ დიჯეი ვორდჷ. ჩქიმ სამუშა მანგარო მიჸორდჷ, მარა ონჯუა-ონჯუას მუფშენდჷ, ათეშენ რეგურალურო მიჩირთუდ კრებაშ შეხვალამეფ დო თიცალ ხალხ შქას ვორდჷ, მით ვეჩინენდჷ ღორონთის დო ვამსახურუდ თის. მარა საბოლათ, ბიბლიათ ნაგურეფ სინდისიქ გინმოჭყვიდრაფუ, დოფთირეკო მუდგარენეფ.

ოცხოვრებშა ქალაქ ოშავაშა გეგნოფრთჷ, სოდეთ გეფჩინებაფე რეი ნორმან, თიშ და ლესლი დო ხოლო შხვა პიონერეფ. თინეფქ მანგარ ჯგირო შეფხვადეს. თიშ ძირაფაქ, მუნერ ხიოლ მოუღუდ თინეფშა ღორონთიშ მსახურებას გინმოჭყვიდრაფუ, ჩქიმ მიზნეფს გეგნვოჯინკო. თინეფ ირნერო სურვილს მირჩქინანდეს, ქიდიბჭყკო პიონერობა დო 1966 წანაშ სექტემბერს ზუსტას თაშ მიფქცი. ჩქიმ ცხოვრებათ მანგარ ბედნერ დო კმაყოფილ ვორდჷ, მარა წიმი ხოლო უმოს მელუდ.

ბეთელიშ ბლანკ დიო ხოლო სკოლას ვორდინ თეშ შევავსჷ დო თევრეშე მოწვევაქ მომითრჷ, მუჟამსით  პიონერო ვმსახურენდჷ. ბეთელ კანადას, ტორონტოს რდჷ დო ოთხ წანათ მიწვიენდეს. თიმ პერიოდის ლესლი მანგარო მობწონდჷ, ათეშენ ფიფქრენდჷ, თე მოწვიებას ქიმიბღენდ-და, დღას ვა ბძირუნდჷ თის. თე საკითხიშ გურშენ ბრელს ბლოცულენდჷ დო საბოლათ მიბღჷ გადაწყვეტილება, ნამდა მიდაფრთკო ბეთელშა დო ლესლის დევემშვიდობკო, მუდგაქ მანგარო გამჭირდჷ.

დუდშე ბეთელს სამრეცხაოს ვმსახურენდჷ დო უკულ მდივანო დაბნიშნეს. თიმ პერიოდის ლესლი სპეციალურ პიონერო დანიშნეს გატინოს, კვებეკიშ პროვინციას. ხშირას მაფიქრუაფუდ, მუჭო რდჷ დო მუს ორთუდ თინა. თიშე ხოლო ფიფქრენდჷ, მიბღჷ დო ვარ სწორ გადაწყვეტილება მუშ დროს. მარა უკულ ჩქიმ ცხოვრებას თიცალ მუდგარენქ მოხვად, მუდგას შურო ვეველუდ. ლესლიშ ჯიმა, რეი, ბეთელშა მიწვის დო ართ ოთახის ფცხოვრენდით. თეშ ჭყოლოფათ, კინ ქუმმაჩ ლესლიწკუმა კონტაქტიშ საშვალებაქ დო 1971 წანაშ 27 ფრევალს ბეთელს ოთხწანიან მსახურებაშ ბოლო დღას დებქორწინით.

მა დო ლესლი დუმანიშნეს კვებეკიშ ართ-ართ კრებას, ნამუთ ფრანგულ ნინაშა რდჷ. მუსხირენ წანაშ უკულ, 28 წანერ ვორდინ თეშ, რაიონულ ზედამხედველო დაბნიშნეს. თექ მანგარო გამკვირდჷ. ფიფქრენდჷ, ნამდა თე დანიშნულებაშო შესაფერის ვა ვორდჷ, მუშენდა ასაკით ჭიჭე ვორდჷ დო თე საქმეს ხოლო გამოცდილება ვამღუდ. მარა გურშა მანგარო ელამკინ იერემიაშ 1:7, 8-ს ინოჭარილ სიტყვეფქ. რდჷ ხოლო ართ სირთულე, ნამდგაშეთ მაფიქრუაფუდ. ჩქიმ მეუღლე, მუსხირენშა რდჷ მუნახვამლეფ ავარიას დო დორულაფა ხოლო უჭირდჷ. ათეშენ, ფიფქრენდით, შემალებედეს დო ვარ თეცალ მსახურებაშ დოჭყაფა, მარა ლესლიქ თეცალ სიტყვეფ მიწუ: „იეჰოვაქ მუდგარენ საქმე დუმავალეს დო მუჭო ოკო ფთქუათ თიშე ვარია?!“. ჩქი ქიდიბჭყით რაიონულ მსახურება დო 17 წანას ხიოლით ვასრულენდით თე დანიშნულებას.

რაიონულ ზედამხედველო მსახურებაშ დროს მანგარ დაკავებულ ვორდჷ. ათეშენ, ირო ვეშემლებუდ თისხი დრო გეგმურთკო ლესლის, მუსხით საჭირო რდჷ. ქიმეფხვად, ნამდა მუდგარენ ოკო დოფთირეკო. ართშა, თუთაშხა ოჭმარეს, ჩქინ კარს ზარქ დორეკ. კარ გუვონჯინ, მითინქ ვა დოფხვად. ხვალე კალათ გეძუდ, სოდეთ სტოლსაფინ, ხილ, ჸვალ, ბაგეტიშ ქობალ, ღვინ, ჭირქეფ დო ბარათ ინოძუდ, სოდეთ თეცალ მუდგარენ გეჭარუდ: „მიდეჸონ სქან ოსურ პიკნიკშა“. თიმ დღას მართალო ჯგირ ამინდ რდჷ, მარა მოხსენებეფ მაფუდ მამზადებელ. ათეშენ, ლესლის გევუნწყჷ, ნამდა ვეშმალებედეს ულა. მართალ რე, თიქ ქუგამიგ, მარა გურქ ქელაჭვჷ. მუჟამსით მოხსენებეფიშ მამზადებელო სტოლს ქიმკობზოჯ, სინდისიქ შემაწუხ. ქუგმაშინ ეფესოელეფიშ 5:25, 28-ს ინოჭარილ სიტყვეფქ დო დუდ თეშ იბგინ, ითამ იეჰოვა პირადო მა მირაგადუდკო, იბზრუნკო ოსურიშ ემოციურ საჭიროებეფშე. უკულ იბლოც დო ლესლის ვუწი: „მალართ, იბდათ“. თის მანგარო ახიოლ თეშ მორჩქილაფაქ. ართ სქვამ ადგილს, წყარპიჯის ქეკობდოხოდით, გუვონწყით სუფრა დო მანგარო იფსიამოვნით. თე დღას სასიამოვნოთ იფშინანთ. თქვა წერმიდგინით, მოხსენებეფიშ მომზადება ხოლო ქუვოჭიშე.

რაიონულ მსახურება მანგარ სასიამოვნო რდჷ. ქიანაშ ადგილ მიბლით, ბრიტანეთიშ კოლუმბიათ დოჭყაფილ ნიუფაუნდლენდით თებულ. ზუსტას თი პერიოდის ემირთჷ ოცნებაქ, ნამდა იმობგზაურკო შხვადოშხვა ქიანას. გალაადიშ მიკულაშე ხოლო მაფიქრუაფუდ, მარა იშენდოიშენ სურვილ ვამღუდ, შხვა ტერიტორიას მისიონერო იმსახურკო. მისიონერეფ განსაკუთრებულ ხალხო მიმორჩქუდ დო თეცალ მსახურებაშო დუდის შესაფერისო ვემიფრჩქინანდჷ. თეს გეძინელ, თიშა ხოლო მოშქურუდ, ნამდა სკოლაშ  თებაშ უკულ აფრიკაშ ნამდგაინ ქიანაშა ვა გუტებუდითკო, სოდეთ შხვადოშხვა ლახალა რდჷ გავრცელებურ დო ომ რდჷ. კანადას ხოლო გვალო ჯგირო ბგინაფლენდით დუდის.

საბჭოთა კავშირიშ ეკოცუმაშ უკულ, 1992 წანას იეჰოვაშ მოწმეეფქ კინ ქიდიჭყეს ქადაგება თი ნამთინე ქიანას, ნამუთ ართ დროს საბჭოთა კავშირშა მიშეშ. ჯიმალეფქ მა დო ლესლის ბკითხეს, შემალებედეს დო ვარ გინოფრთითკო ესტონეთშა დო ივმსახურითკო მისიონერეფო. მუშო ოკო რაგად, თეს ვეველდით, მარა ლოცვა ქიდიბჭყით თე საკითხშე. კინ თი აზრის ვორდით, ნამდა იეჰოვა მუდგარენს დუმავალენდეს-და, ოკო გუვაკეთითკო თინა. ათეშენ, მიბღით თე დანიშნულება. ალალას ქოფთქუე, შურქ მუმადგჷ დო იფიფქრჷ, თინა ვარა ჯგირ აფრიკაშა ვემურთ-მაქ.

ხეთეშე ქეშუდირთით ესტონურ ნინაშ გურაფას. თექ ინულაშე მუსხირენ თუთაშა ჯიმალეფქ ფთხუეს, ნამდა რაიონულ მსახურება ქიდიბჭყითკო. თაშ ნამდა, ოკო იბძირეთკო 46 კრება დო ჯგუფეფ ბალტიაშ ზღვაშ სუმ ქიანას, თეს გეძინელ, რუსეთიშ ქალაქ კალინინგრადის ხოლო. ათეშენ, ასე უკვე დაგურაფალ მაჸიდეს ლატვიურ, ლიტვურ დო რუსულ ნინეფ. მუშო ოკო რაგად, თენა ვა რდჷ ადვილ, მარა და დო ჯიმალეფ აფასენდეს ჩქინ მონდომას დო ირნერო მოხვარდეს. 1999 წანას ესტონეთის ფილიალქ გინწყჷ დო კომიტეტის დუმანიშნეს. ჩქიმწკუმა ართო ფილიალიშ კომიტეტის მსახურენდეს ტომას ედურ, ლემბით რეილე დო ტომი კაუკო.

მა დო ლესლიქ ბრელ თიცალ და დო ჯიმა გეფჩინებაფეთ, მით ართ დროს ციმბირშა გინახორეს. თიშ უმკუჯინუო, ნამდა თინეფს მანგარ გლახათ ოქცუდეს დო ოჯახეფშე ხოლო შორს რდეს, გლახა ადამიანეფო ვეგნორთენა. თეშ გინაწონს, ხიოლით დო მონდომათ ქადაგენდეს. თინეფიშ მაგალითიქ დუმარწმუნეს, ნამდა ჩქი ხოლო შემალებედეს გავურზითკო რთულ სიტუაციეფს დო ვა ვოდინეთკო ხიოლ.

წანეფიშ დინახალე ბრელს ვმსახურენდით დო მოსვანჯაშო დრო იშენდოიშენ ვა მოსქიდუდეს, მუდგაქ გლახათ იმოქმედ ლესლიშ ჯამრთელობაშა. თინა ირიათო გინოშულადირ რდჷ დო სუსტას გინაფლენდჷ დუდის. დუდშე ვემეფხვადით, მუშენ უღუდ თის თეცალ მდგომარეობა, მარა უკულ ქიგებგით, ნამდა თენა ჸოფე ლახალა, ნამდგას ფიბრომიალგია ჯოხო. თეშ გაგებაშ უკულ სერიოზულო ქიდიბჭყით თიშე ფიქრ, ვარია ქოფთქვითკო ჩქინ დანიშნულებაშე დო დიფრთითკო კანადაშა. ზუსტას თიმ პერიოდის, მა დო ლესლი მემწვის პატერსონშა, ნამდა გამკოფრთითკო სკოლა ფილიალიშ კომიტეტიშ წევრეფშო დო თინეფიშ მეუღლეეფშო. ფიფქრენდჷ, ნამდა ლესლიშ ჯამრთელობაშ მდგომარეობაშ გურშენ ვეშმალებედეს თე სკოლაშ მიკულა, მარა თე საკითხშე ბრელს ბლოცულენდით დო ბოლოს გეგნობჭყვიდით, მიდაფრთითკო პატერსონშა. იეჰოვაქ აკურთხჷ ჩქინ გადაწყვეტილება. ლესლის ზუსტას სკოლაშ მიკულაშ პერიოდის შეიალებუ მკურნალობაქ. საბოლათ, შემალებეს ჯვეშობურ ცხოვრებას დუვართითკო.

2008 წანას, მუჟამსით ესტონეთის ვორდით, ართ ონჯუას მთავარ სამართველოშე დომრეკეს. თინეფს ოინტერესდეს, შემალებედეს დო ვარ მიბღითკო ახალ დანიშნულება დო იბდითკო კონგოშა. თეს ვეველუდ. ხვალე თენა ვარინ, პასუხ მაჟია დღას ოკო ვუწიკო. თიმ ონჯუას ლესლიშა თენა ვამთქუალ, მუშენდა მიჩქუდ, თეშ გაგებაშ უკულ თიმ სერს ვადარულედ. მთელ სერს თოლ ვენკომდვალ. იეჰოვას ქივეჩი არძა ჩქიმ ოწუხებელ, მუთ აფრიკაშა გინულაწკუმა დაკავშირებით მიღუდ.

მაჟია დღას ლესლის ირფელ ქივეჩი. ჟირხოლოქ თეცალ მუდგარენ ფთქვით: „იეჰოვას ოკო, აფრიკაშა იბდათ. თექიანობა მიმეწონებნა ვარდა თექ მსახურება გიშმალენან დოვარ, მუჭო გებგენთ ვებდით დო ვაფცადით-და?!“. თაშ ნამდა, ესტონეთის 16 წანიან მსახურებაშ  უკულ, კინშასაშა მიდაფრთით. თექიან ბეთელიშ ტერიტორიას, მანგარ მშვიდ გარემო დო სიმწვანე რდჷ. პირველ, მუთ ლესლიქ აკეთ თინა რდჷ, ნამდა ჩქინ ოთახის მიკაბუნუ ბარათ, ნამდგას თევრეშე მოჸუნაფილ ჩუანს, მუთ კანადა დიბტეთ. ბარათის თეცალ სიტყვეფ გეჭარუდ: „რდა ბედნერ თექ, სოდეთ რექ“. თიშ უკულ, მუთ თექიან და დო ჯიმალეფ გეფჩინებაფეთ, ქიდიბჭყით თინეფწკუმა ართო ბიბლიაშ გურაფეფიშ ჩატარება დო ხოლო ართშა დებრწმუნით, მუშმაჯგირა რე მისიონერულ მსახურება, ჩქინ ხიოლქ უმოსო მიძინ. თექ მსახურებაშ პერიოდის მუმაჩეს პატიქ, იბძირეთკო 13 ფილიალ აფრიკაშ შხვადოშხვა ქიანას. თექ საშვალება ქომჩეს, გეფჩინებაფეთკო საინტერესო ადამიანეფ, ნამდგას განსხვავებულ კულტურა უღდეს. ართ დროს აფრიკაშა ულა მანგარო მოშქურუდ, მარა თე შიშიქ მედინ. ასე ქოთ მა დო ქოთ ლესლი მადლობას ვურაგადუდით იეჰოვას, ნამდა თავრე გომტეს.

კონგოს ბრელ შხვადოშხვანერ ოჭკუმალ გუვასინჯით, თინეფ შქას რდჷ მწერეფ, ნამდგაშეთ ფიფქრენდით, ნამდა პიჯის დღას ვეგებდვანდით. მარა მუჟამსით ქობძირით, მუ გემუანო ჭკუმუნდეს თის და დო ჯიმალეფ, ჩქი ხოლო მუმაკორნეს, გუვასინჯით დო ქოთ მიმეწონეს.

კონგოშ აღმოსავლეთ ნაწილს რდუნ თი სოფელეფს, პარტიზანეფ გიანთხუდეს დუდის დო ოსურეფს დო ბაღანეფს ხოლო ვენდენდეს. ჩქი თი ადგილეფშა გენოფრთით, ნამდა გურშა ელვუკინითკო და დო ჯიმალეფს დო ქიმუღითკო ირფელ, მუთ ოსაჭირდეს. ბრელ და დო ჯიმას ეკონომიკურო მანგარო უჭირდჷ, მარა თინეფს უჸორდეს იეჰოვა, ართგურო მეჸუნდეს თიშ ორგანიზაციას დო უღდეს გათელებაშ ძალიერ იმენდ, მუდგაქ მანგარო შეხუ ჩქინ გურს. თინეფიშ მაგალითიქ აღბძრეს, დეფიფქრითკო, მუშენ ვომსახურუთ იეჰოვას დო თეშნერო გემამნგარითკო რწმენა. ნამთინექ ჸუდეეფ დო მოსავალ მიოდინუ. თექ ხოლო ართშა ქუმოძირუ, ნამდა მატერიალურ ქონებაქ შილებე თოლიშ დოვალაფაშა მედინას დო ქუგმოშინ, ნამდა არძაშ უმოს მნიშვნელოვან იეჰოვაწკუმა ურთიერთობა რე. თეზმა სირთულეშ უმკუჯინუო, თე და დო ჯიმალეფ იშვიათო წუხენდეს. თინეფიშ მაგალითიქ ჩქინდა მანგარო იმოქმედ დო აღბძრეს, გაბედულო შეფხვადითკო შხვადოშხვა სირთულეეფს, თინეფ შქას ჯამრთელობაშ პრობლემეფს ხოლო.

ჩქინ ცხოვრებას ხოლო ართშა ქუმოხვად თიცალ მუდგარენქ, მუდგას ვეველდით. მიწის, ნამდა ჰონკონგიშ ფილიალშა ოკო გეგნოფრთითკო. დღას ვეწერმიბდგინენდით, ნამდა აზიას მაჸიდეს ოცხოვრებელ. მარა თიშ უკულ, მუთ ბრელშა გიმოფცადით, მუჭო ელამრდეს იეჰოვა ჩქინ არძა დანიშნულებას, მიბღით თე დავალება დო გეგნოფრთით ჰონკონგშა. თაშ ნამდა, 2013 წანას ჩილამურით ეფშა თოლეფით ქიდიბტეთ  ჩქინ ძვირფას მეგობრეფ დო სქვამ აფრიკა. მარა ვამჩქუდეს მუ მელდეს წიმი.

დუდშე მანგარო გამჭირდეს, მივარჩქვანითკო ჰონკონგის ცხოვრებას, მუშენდა თინა მანგარ ხმაურიან ქალაქ რე დო თექ მსოფლიოშ შხვადოშხვა კუნთხუშე ინულირ ხალხ ცხოვრენს. თეს გეძინელ, ჩქინო რთულქ იჸუ ჩინურ ნინაშ გურაფაქ. მარა თე ირფელშა მერჩქვანას მიმეხვარეს თიქ, ნამდა და დო ჯიმალეფქ ჯგირო დოფხვადეს დო ადგილობრივ ოჭკუმალეფქ ხოლო მანგარო მიმეწონეს. საქმე ირდღას იძინანდჷ, ათეშენ აუცილებერ რდჷ ფილიალიშ გაფართოება, მარა დიხეფს დო შენობეფს დაჩხირიშ ფას გეძუდ. ათეშენ ხემძღვანელ საბჭოქ გინოჭყვიდ, ნამთინე განყოფილებაქ შხვადო გინორთკო დო გეგმოჩკო ჰონკონგიშ ფილიალიშ საკუთრებაშ დიდ ნაწილ. 2015 წანას ჩქი ხოლო სამხრეთ კორეაშა გეგნომიჸონეს დო ამდღარშახ თაქ ვაგრძელენთ მსახურებას. ჩქინო რთულქ იჸუ კორეულ ნინაშ დოგურაფაქ ხოლო. თე ნინაშა ჯგირო დიო ხოლო ვეფჩიებუთ დო ბრელ მუდგარენ მაფნა დაგურაფალ, მარა გურშა ელამკინანა და დო ჯიმალეფიშ სიტყვეფ, მუჟამსით მირაგადნა, ნამდა კორეულიშ გურაფას პროგრეს მიღნა.

ირიათო ვა რე ადვილ, გირჩქინე ახალ მეგობრეფ. მარა ქობძირით, ნამდა ინიციატივაშ ჩქინ დუდშა ეჭოფუათ დო სტუმარიშ ჸოროფაშ გიმორჩქინათ, შემალებუეს, ხეთეშე გეფჩინებაფეთკო და დო ჯიმალეფ. თეს გეძინელ, დებრწმუნით, ნამდა და დო ჯიმალეფწკუმა ბრელ საერთო მიღნა დო თიშა ხოლო დებრწმუნით, მუ სარკოთ ვაფუთ იეჰოვას გოჭყაფილ — შემლებნა მუთ შილებე მეტ ადამიანს გოვუნწყათ გურ დო პჸუნდან ბრელ მეგობარ (2 კორ. 6:11).

ჯგირო ქობძირით, ნამდა ადამიანეფს იეჰოვაშ თოლით ოკო ვუჯინათ დო ირიათო ოკო დევეკვირათ, მუჭო ვუჸორთ ღორონთის დო მუჭო ფხემძღვანელენა თინა. მუჟამსით გურგოტახილ ვორდით ვარდა მაფიქრუაფდეს, ქუმობწონდით დო ვარ და დო ჯიმალეფს, გინვოჯინედით მეგობრეფშე მეღებულ ბარათეფს დო წერილეფს, მუთ მანგარო ელამკინანდეს გურშა. ირიათო ვორწყედით, ნამდა იეჰოვა პასუხენდჷ ჩქინ ლოცვეფს, მარწმუნენდეს, ნამდა ვუჸორთ დო მამანგარენდეს.

წანეფიშ დინახალე მა დო ლესლიქ დიბგურეთ, ნამდა ვა უღჷ მნიშვნელობა, მუსხით დაკავებულეფ ვორეთ, აუცილებერ რე, დრო გეგმურთათ ართიანს. თის ხოლო ქიმეფხვადით, ნამდა საჭირო რე შემლებდან იბძიცუათ ჩქინ დუდშე, განსაკუთრებულო თი შეცდომეფშე, ნამუთ ახალ ნინაშ გურაფაშ დროს მუმალენა. ირ სერს მა დო ლესლი ვოცადუთ, დეფიფქრათ, მუშ გურშენ შემლებნა მადლობა ვუწუათ იეჰოვას.

ალალას ქოიწუათინ, ფიფქრენდჷ, ნამდა დღას ვეშმალებედ მისიონერო მსახურება დო შხვა ქიანეფს ცხოვრება. თე დროშ დინახალე ჩქიმ დუდშა გეგმოფცად, მუშმადიდა ხიოლ მოუღ თიშ ძირაფას, ნამდა იეჰოვაშ ელარნათ ირფელიშ კეთება შეიოლებერ რე. გონებაშა ხშირას მუმალე წინასწარმეტყველ იერემიაშ რაგადებულ სიტყვეფ: „სი დუმაღორ იეჰოვა“ (იერ. 20:7). იეჰოვაქ ჩქინ ცხოვრება სიურპრიზეფით გეიოფშჷ, მუჩეს ნინათ ვეიჭარენფერ კურთხევეფ დო ხვალე თენა ვარინ, თიშ ჭყოლოფათ გერთჷ ჩქიმ ბაღანობაშ ოცნებაქ, ნამდა იმობგზაურკო მთელ მსოფლიოს. მა დო ლესლი თიშე უმოს მეტ ადგილს ვორდით, ვინემ ბაღანობას წერმიბდგინენდჷ დო იბძირეთ შხვადოშხვა ფილიალეფ მსოფლიოშ ხუთ კონტინენტის. მანგარ მარდულ ვორექ ჩქიმ ძვირფას მეუღლეშ, მუშენდა არძა დანიშნულებაშ შესრულებაშ დროს ელამირდჷ დო ხუჯის მიკინენდჷ.

ვოცადუთ ირიათო ფშუდან, მიშო დო მუშენ ფხანდენთ თეზმას. თი კურთხევეფ, ნამდგას ამდღა ბღებულენთ მოძირანა, მუშმაჯგირა იჸუაფ ახალ ქვეყნიერებას მარადიულო ცხოვრება, მუჟამსით იეჰოვა გოფაჩუნს ხეს დო დაკმაყოფილენს „არძა ცოცხალ არსებაშ სურვილს“ (ფსალმ. 145:16).