ბიბლია თეშ გურშენ კონკრეტულ პასუხის ვერზენს, მარა მოგებაფუანა მუსხირენ დეტალიშ გურშენ, მუთ ენწყუნს მარიამიშ დო იოსებიშ თე გადაწყვეტილებას.

მუჟამსით ანგელოზიქ უწუ მარიამს, ნამდა დეორსულებუდ დო გეიორჩქინანდჷ ბაღანას, თე დროს ქოთ თინა დო ქოთ იოსებ გალილეაშ ქალაქ ნაზარეთის ცხოვრენდეს (ლუკ. 1:26—31; 2:4). უმოს გვიანო, თინეფქ ეგვიპტეშე ნაზარეთშა დირთეს. იესოქ თექ მირდჷ დო თეშ გურშენ გიადვჷ ნაზარეთელქ (მათ. 2:19—23). ათეშენ, ბუნებრივ რე, მუჟამსით იოსებ, მარიამ დო იესოშე იფჩიებუთ გონებაშა ნაზარეთ მუმალედან.

მარიამს ჸუნდჷ ნათესე ელისაბედ, ნამუთ იუდეას ცხოვრენდჷ. თინა მღვდელ ზაქარიაშ ოსურ დო იოანე მანათალიშ დიდა რდჷ (ლუკ. 1:5, 9, 13, 36). მარიამქ იუდეას, ელისაბედიშ ჸუდეშა მერთჷ დო სუმ თუთას დოსქიდ თექ დო უკულ კინ ნაზარეთშა დირთჷ (ლუკ. 1:39, 40, 56). ათეშენ, მარიამშო უჩინებ ვა რდჷ იუდაშ ტერიტორია.

უმოს გვიანო, იოსებიქ ნაზარეთშე ბეთლემშა მიდართჷ, მუშენდა რომაელეფ ითხინდეს აღწერას, მუდგაშოთ არძას მუშ ქალაქშა ოკო ულინუდკო. თეს გეძინელ, ბეთლემ რდჷ „დავითიშ ქალაქ“, სოდეთ წინასწარმეტყველებაშ თანახმას მესიაქ ოკო დებადკო (ლუკ. 2:3, 4; 1 სამ. 17:15; 20:6; მიქ. 5:2). იესოშ დაბადებაშ უკულ, მუშო ოკო რაგად, იოსების ვართ უფიქრებ, ნამდა მარიამ დო ახალდუნაბად იესო ნაზარეთშა, თეშმაშორა შარაშა მოლეჸონკო. თინეფქ ბეთლემს დოსქიდეს, ნამუთ იერუსალიმშე 9 კილომეტრიშ მაშორას რდჷ. თეშნერო, თინეფშო უმოს ადვილ იჸუაფუდ ახალდუნაბად ბაღანაშო ტაძარს მსხვერპლიშ შეწირუა, მუდგას მოსეშ კანონ ითხინდჷ (ლევ. 12:2, 6—8; ლუკ. 2:22—24).

ღორონთიშ ანგელოზის მარიამშა რაგადებულ აფუდ, ნამდა თიშ სქუა დემკვიდრენდჷ „დავითიშ ტახტის“ დო მეფე იჸუაფუდ. თე მიზეზიშ გურშენ შილებე მარიამ დო იოსებიქ იფიქრესკო, ნამდა მნიშვნელოვან რდჷ, იესოქ დავითიშ ქალაქის დებადკო (ლუკ. 1:32, 33; 2:11, 17). შილებე თის ხოლო ფიქრენდესკო, ნამდა ჭკვერულ იჸუაფუდ თექ გაჩენდესკო, ონდო ღორონთშე კონკრეტულ მითითებას ვემიღენდეს თიწკუმა დაკავშირებით, ანწ მუ ოკო აკეთესკო.

ზუსტას ვა მიჩქნა, მუზმა ხან რდჷ მიკულირ იოსებ დო მარიამიშ ბეთლემშა ინულაშე თი დროშახ, მუჟამსით თინეფ ასტროლოგეფქ იძირეს. მარა მიჩქნა, ნამდა თე დროს თინეფ უკვე ჸუდეს მილარდეს დო იესო ხოლო ვა რდჷ ახალდუნაბად (მათ. 2:11). მუჭოთ იძირე, მარიამ დო იოსებიქ ჭიჭე ხანს ქუდოსქიდეს ბეთლემს დო ვა დურთინნა ნაზარეთშა.

ჰეროდექ ზოჯჷ, ნამდა ბეთლემს „ჟირ წანაშახ ასაკიშ არძა ბაღანა ბოშ“ დოჸვილესკო (მათ. 2:16). ანგელოზიქ თე ირფელ ქუგაგებაფუ იოსების, მუდგაშ უკულ თინეფქ გინოჭყვიდეს, ინტესკო ეგვიპტეშა დო ჰეროდეშ ღურაშახ თექ ქუდოსქიდეს. მარა ჰეროდეშ ღურაშ უკულ იოსებიქ მუშ ოჯახ ნაზარენთშა მიდეჸონ. თინეფს ბეთლემშა ვა დურთინნა, მუშენდა იუდას თიშ სქუა არქელაე მეფენდჷ, ნამუთ მანგარ უდუნდებელ რდჷ. ანგელოზიქ თეშ გურშენ ხოლო გაფრთხილ იოსებ დო ათეშენ, თიქ ხე ქუმოთხჷ მუშ ჩილ დო სქუას დო ნაზარეთშა მიდეჸონ. თექ იესო თხილერ იჸუაფუდ დო იოსებ დო მარიამს შეიალებედეს თინა ღორონთიშ მოსაწონო მორდესკო (მათ. 2:19—22; 13:55; ლუკ. 2:39, 52).

მუჭოთ იძირე, იოსებიქ თეიშახ ღურჷ, ონდო იესოშ ღურათ ნამთინეს მიაჩამუდ ზეცაშა ულაშ შესაძლებლობა. ათეშენ, იოსებ დედამიწას გეთელებ. ბრელს აღვენუ შესაძლებლობა, გეჩინებაფუან თე ართგურ კოჩ დო თიშე ქიგეგან ხოლო შხვა დეტალეფ თიწკუმა დაკავშირებით, მუშენ დოსქიდეს იოსებ დო მარიამქ იესოშ დაბადებაშ უკულ ბეთლემს.