1. მუ ოკო ვაკეთათ, ნამდა გინუსქიდათ იეჰოვაშ დღას?

 ᲑᲘᲑᲚᲘᲐ მიშინუანს „იეჰოვაშ დღას“, მუჭოთ დროს, მუჟამსით თინა ნტერეფს განაჩენს გეგშუღანს, შხვა სიტყვეფით ქოფთქუათინ, განადგურენს თინეფს დო დერსხენს მუშ ხალხის. ულირს, იეჰოვას თეცალ მუდგანერ ბრელშა უკეთებ დო ჩქინ დროს ხოლო გაკეთენს (ეს. 13:1, 6; ეზეკ. 13:5; სოფ. 1:8). მუჟამსით პოლიტიკურ ლიდერეფ „დიდ ბაბილონს“ ქიგიანთხუნა, თეთ ქიდიჭყაფუ „იეჰოვაშ დღა“, ნამდგას მაჸუნუ „არმაგედონიშ ომ“. თე „დღას“ გინუსქიდათინ ამდღარშე ოკო დიბჭყათ მომზადება დო მუჭოთ იესოქ მიწის საჭირო რე, „დიდ გაჭირებაშო“ ირიათო „მზათ ვორდათ“ (მათ. 24:21; ლუკ. 12:40).

2. მუ ჯგირობუა მოუღ ჩქინდა თესალონიკელეფშა მეჭარილ პავლეშ პირველ წერილს?

² თესალონიკელეფშა მეჭარილ პირველ წერილს, მოციქულ პავლექ გიმირინუ შხვადოშხვა შედარება, ნამდა ქიმეხვარკო ქრისტიანეფს, მზათ ჸოფედესკო იეჰოვაშ დღაშო, მუჟამსით თინა გასამართლენს არძას. პავლეს უჩქუდ, ნამდა იეჰოვაშ დღა თიმ წუთის ვა დოდირთუდ (2 თეს. 2:1—3). მარა, თიქ იშენით ელუჩ ჯიმალეფს, მემზადესკო თი დღაშო თეშ, ითამ თიშ მოულაშა ართ დღა მეძუდკო. ჯგირ იჸუაფ, თე რჩევა ჩქი ხოლო ფშუდან. მორთ, ასე გუვარჩუათ, მუს იჩიებუდ პავლე თიწკუმა დაკავშირებით, 1) მუჭო მიშჷ იეჰოვაშ დღა, 2) მი ვეგნუსქიდუდ თის დო 3) მუჭო მივემზადათ თიშო.

3. მუ გაგებათ მოურს იეჰოვაშ დღა, მუჭოთ მახირალ სერით? (ქოძირით სურათ).

³ „მუჭოთ მახირალ სერით“ (1 თეს. 5:2). თენა რე სუმ შედარებაშე პირველ, ნამდგათ პავლე მოციქულქ იეჰოვაშ დღაშ მოულა ეჭარ. მახირალეფ სერით გვიანს, უკმელა რენ თეშ მოულა, მუჟამსით მითინ ველჷ თინეფს დო ოცადნა, დრო ვეღანინ თეშ ხეთეშე იმოქმედან. იეჰოვაშ დღა ხოლო ზუსტას თაშ, მითინ ველუნ თეშ მოურს. მოვლენეფ თიშმამალას გევითარებ, ნამდა  თექ შილებე ჭეშმარიტ ქრისტიანეფ ხოლო გაკვირას. მარა უბადო კათაშ გინაწონს, ჩქინო თენა რსხებაშ დღა იჸუაფ.

4. მუ გაგებათ გჷ იეჰოვაშ დღა მშობიარობაშ ჭუეფს?

⁴ „მუჭოთ ორსულ ოსურს მალე მშობიარობაშ ჭუეფ“ (1 თეს. 5:3). ორსულ ოსურს წინასწარ ვა უჩქჷ ზუსტ დრო, მუჟამ დაჭყაფუ მშობიარობა. მარა თიშა დარწმუნებულ რე, ნამდა თე მომენტ აუცილებერო ქუდოდირთუ. მშობიარობა მოულოდნელო იჭყაფ, ჭუეფ მოჸუნს დო მითინს ვეშულებ თე პროცესიშ გაჩერება. თეშნერო, ვართ ჩქი მიჩქნა ზუსტ დღა დო საათ, მუჟამ მოურს იეჰოვაშ დღა. მარა დარწმუნებულეფ ვორეთ, ნამდა უბადო კათაშა გიშაღალირ ღორონთიშ განაჩენ მოულოდნელო შისრულებ დო თიშე დუდ ვა დარსხებენა თინეფს.

5. მუ გაგებათ გჷ დიდ გაჭირება ოჭმარეს?

⁵ მუჭოთ ოჭმარე. პავლეშ მოჸუნაფილ მასმა შედარება კინ მახირალშე რე, ნამუთ სერით მეურს ოხირშა. მარა თე შემთხვევას იეჰოვაშ დღას თინა ადარენს ოჭმარეს (1 თეს. 5:4). სერით მოულირ მახირალქ შილებე საქმეს თეშ ქასკიდას, ნამდა დროშ მიკულა შურო ვეგინას დო ეშობას ქუგათანდას. აგოთანას შილებე ყარულს თიშა თოლქ ქუმუოლას დო ხირუას ქიგიოჭოფას, თეშნერო დიდ გაჭირება ხოლო გეგმაარგამენს თიცალ კათას, მით მახირალცალო უკმელას მოქმედენს დო ორთჷ თიცალ საქმეეფს, მუდგას ღორონთ ვეწონუანს. თინეფიშ გინაწონს, ჩქი მზათ იპჸუაფუთ ღორონთიშ დღაშო, მუჟამსით ოჭიშის ქურთინუანთ თი ირფელს, მუთ იეჰოვას ვა მოწონს დო გუვაკეთენთ თის, მუთ „ჯგირ, მართალ დო ჭეშმარიტ რე“ (ეფეს. 5:8—12). თე ირფელიშ უკულ, პავლეს მოჸუნს ჟირ შედარება თი კათაშ ეიოჭარალო, მით ვეგნუსქიდუ იეჰოვაშ დღას.

6. მუ გაგებათ ლურს ხალხიშ უმენტაშის? (1 თეს. 5:6, 7).

⁶ „ლურენჯეფ“ (წეკითხით 1 თესალონიკელეფიშ 5:6, 7). იეჰოვაშ დღას ვეგნუსქიდნან თი კათა პავლექ ლურენჯ კოჩის შეადარ.  ლურსინ თი კოჩ აზრის ვა რე, მუ ხვადუ მუშ გოხოლუას, ვართ დროშ მიკულას გინაფლენს დო მუდგაინ მნიშვნელოვანქ მოხვადასინ ხოლო, რეაქცია ვა უღჷ. ამდღა ხალხიშ უმენტაშის სულიერო ლურს (რომ. 11:8). თინეფს ვა ჯერა, ნამდა „ბოლო დღალეფს“ ფცხოვრენთ დო „დიდ გაჭირება“ მონჭაფილ რე. მუჟამსით მსოფლიოს მუდგარენ სერიოზულ მოვლენა ხვადუ, ნამთინექ შილებე სულიერო გეგშაკურცხას დო დეინტერესას სამეფოშ ცნობათ, მარა უმენტაშო თეცალ კათა კინ ართუ ლურს. თინეფშე ნამთინე ხოლო, მიდგას იეჰოვაშ დღაშ ჯერს, ფიქრენს, ნამდა დიო ხოლო ბრელ მეძჷ თიშ მოულაშა (2 პეტ. 3:3, 4). მარა ჩქი მარჩქილენა, ნამდა პავლეშ რჩევა, ვორდათ კურცხას, დღაშ მიკულაწკუმა ართო უმოსო დო უმოს მნიშვნელოვანო გინმირთუ.

7. მუ გაგებათ გუნა შუმილეფს თი კათა, მით ველერჩქილუანს ღორონთიშ გაფრთხილებას?

⁷ „მით იშუმუ“. მოციქულ პავლექ შუმილიეფს შეადარ თი კათა, მიდგას ღორონთ განადგურენს. შუმილ კოჩის ვეშულებ ხეთეშე უღდას რეაგირება, მუჟამსით თიშ გოხოლუას მუდგანერ ხვადუ დო ვართ ჭკვერულ გადაწყვეტილებეფს ღებულენს. თეშნერო, უბადო კათა ჸუჯშა ველეშკვანს ღორონთიშ გაფრთხილებას დო გიშეგორნა თიცალ ცხოვრებას, მუდგას საბოლათ განადგურებაშა მეჸუნს თინეფ. მარა ჭეშმარიტ ქრისტიანეფს პავლექ ელუჩ, ნამდა კურცხას ჸოფედესკო, შხვა სიტყვეფით ქოფთქუათინ, ხერძელო (1 თეს. 5:6). ართ ბიბლიაშ მარკვიებელ ხერძელობას თაშ ეჭარუნს: „თენა რე გონებაშ მშვიდ დო სტაბილურ მდგომარეობა, მუჟამსით შემლებნა ირფელშე ჯგირო დეფიფქრათ, სწორას შევაფასათ სიტუაცია დო თეშნერო სწორ გადაწყვეტილებეფ მიბღათ“. მუჟამსით მშვიდას იპჸით დო ვა ვოდინუანთ სტაბილურობას, ვემშურთ პოლიტიკურ დო სოციალურ საკითხეფშა. მუთ უმოს ხოლოს რე იეჰოვაშ დღა, თით უმოს რთულ იჸუაფ ზეწოლაშა გარზება, ნამდა მივოდინუათ ნეიტრალურ პოზიცია თე საკითხეფს. მარა წუხებაშ მუთუნნერ მიზეზ ვა მიღნა თიწკუმა დაკავშირებით, მუ ფთქუათ დო მუჭო მიფქცუათ, მუშენდა ღორონთიშ წმინდა შურ მიმეხვარებნა, ვორდათ მშვიდას, ვა ვოდინუათ სტაბილურობა დო მიბღათ სწორ გადაწყვეტილებეფ (ლუკ. 12:11, 12).

8. მუჭო ეჭარუნს 1 თესალონიკელეფიშ 5:8 თი თვისებეფს, ნამუთ მოხვარნა, ქუდოფსქიდათ კურცხას? (ქოძირით სურათ).

⁸ ქიმკიქუნით ჯავშან დო ქიგირთვით მუზარად. პავლე მადარენა ჯარიშკოჩეფს, მით ირ წუთის მზათ რენა ობრძოლებერო დო შესაფერისო რენა მონწყილ (წეკითხით 1 თესალონიკელეფიშ 5:8). ჯარიშკოჩის მეთხიებ, ირიათო მზათ რდას ობრძოლებერო ომიშ დროს. თეშნერო, ჩქი ხოლო მზათ იპჸით იეჰოვაშ დღაშო, მუჟამსით ქიმკიფქუნანთ რწმენაშ დო ჸოროფაშ ჯავშანს დო ქიგიფრთვანთ იმენდიშ მუზარადის. თე თვისებეფ მანგარ მნიშვნელოვან რე ბრძოლაშ დროს.

9. მუჭო ფთხილანა რწმენა?

⁹ მუჭოთ ჯავშან თხილანს ჯარიშკოჩიშ გურს, თეშ რწმენა დო ჸოროფა თხილანს ჩქინ სიმბოლურ გურს. თე თვისებეფ მიმეხვარებნა, ვემვოტუათ ღორონთიშ მსახურება დო მივაჸუნათ იესოს. რწმენაშ ჭყოლოფათ დარწმუნებულ ვორეთ, იეჰოვა დუმაჯილდოვენა თიშ გურშენ, ნამდა მთელ გურით ბგორუნთ თის (ებრ. 11:6). რწმენა გინმოჭყვიდირაფუანა, ქუდოფსქიდათ ჩქინ უფალიშ იესოშ ართგურეფქ თიმწკუმა ხოლო, მუჟამსით სირთულეეფშა მაფნა გარზებელ. სირთულეეფიშ გარზებელო რწმენაშ გამანგარებას მიმეხვარებნა თანამედროვე დროს მახორუ და დო ჯიმალეფიშ მაგალითეფიშ გარჩიება, მიდგაქ თხოზინიშ დო ეკონომიკურ პრობლემეფიშ უმკუჯინუო, ვადინუეს ართგურობა. თი და დო ჯიმალეფიშ მაგალითეფიშ მეჸუნა, მიდგაქ ღორონთიშ სამეფო პირველ ადგილს ქიგიორინუესკონ თიშენ ცხოვრება გემარტივეს, მიმეხვარებნა, დუდ ევუჩილითუათ მატერიალიზმიშ მახეს. b

10. მუჭო მოხვარნა ღორონთიშ დო მოყვასიშ ჸოროფა, გუვაგრძელათ ქადაგება?

 ¹⁰ კურცხას ქუდოფსქიდათინ თიშო ჸოროფა ხოლო მნიშვნელოვან რე (მათ. 22:37—39). ღორონთიშ ჸოროფა მოხვარნა, გუვაგრძელათ მსახურება თიმწკუმა ხოლო, მუჟამსით შილებე თეს სირთულეეფქ ქუმაჸუნას (2 ტიმ. 1:7, 8). მოყვასიშ ჸოროფა აღბძრენა, არძა საშვალება გეგმიბრინუათ, ნამდა სახიოლო ამბე გეგნოფჩათ ჩქინ ტერიტორიას მახორუ კათას, მაგალთო, ვუქადაგათ ტელეფონით ვარდა წერილეფით. ჩქი იმენდ მიღნა, ნამდა თინეფ ართ დღასით დითირუნა დო ქიდიჭყანა თიშ კეთებას, მუთ სწორ რე (ეზეკ. 18:27, 28).

11. მუჭო მოხვარნა და დო ჯიმალეფიშ ჸოროფა? (1 თეს. 5:11).

¹¹ მოყვასიშ ჸოროფას თით ხოლო გიმიფრჩქინანთ, ნამდა მიჸორა თანაქრისტიანეფ დო გურშა ელვუკინანთ დო ვამანგარენთ თინეფს (წეკითხით 1 თესალონიკელეფიშ 5:11). მუჭოთ ჯარიშკოჩეფ ელურენა დო ამანგარენა ართიანს ბრძოლაშ დროს, თეშ ჩქი ხოლო, გურშა ელვუკინანთ ართიანს. ჯარიშკოჩიქ შილებე ბრძოლაშ დროს მუშიან დაზიანას, მარა მუშო ოკო რაგად, თეს შეგნებულო დღას ვაკეთენს. თეშნერო, შეგნებულო ჩქი ხოლო დღას ვა უწყუნუანთ გურს თანაქრისტიანეფს დო გლახა გამკეთეს-და, მანგიორს ვეგნუგანთ (1 თეს. 5:13, 15). ჸოროფას გიმიფრჩქინანთ თიმწკუმა ხოლო, მუჟამსით პატის ფცენთ თი ჯიმალეფს, მით კრებას ხემძღვანელენა (1 თეს. 5:12). მუჟამსით პავლექ თე წერილ ჭარჷ, თესალონიკეშ კრებაშ ჩამოყალიბებაშე ართ წანა ხოლო ვა რდჷ მიკულირ. თექ დანიშნულ ჯიმალეფს, თე საქმეს საეგებიოთ დიდ გამოცდილება ვაღვენუდეს დო შეცდომეფ ხოლო მალედესკონ იჸიდ, მარა იშენით რდეს პატიცემაშ ღირსეფ. დიდ გაჭირებაშ მონჭაფაწკუმა ართო, შილებე უმოსო დო უმოსო დემესაჭირან ჩქინ კრებაშ უხუცესეფშე მეღებულ ხემძღვანელობაშ მეჸუნაქ, მუშენდა შილებე მთავარ სამართველოწკუმა დო ადგილობრივ ფილიალწკუმა კონტაქტიქ მედინას. ათეშენ, მნიშვნელოვან რე, ამდღარშე გუვავითარათ ჸოროფა დო პატიცემა ჩქინ კრებაშ უხუცესეფიშ მიმართ. მუდგაქ ვა მოხვადასინ, გინოჭყვიდილ მაფდან, კურცხას ვორდათ დო ყურადღება თინეფიშ არასრულყოფილებაშა ვარინ, თიშა გეგნიბღათ, ნამდა იეჰოვა დო იესო თე ართგურ ქომოლკათაშ საშვალებათ ფხემძღვანელენა.

12. მუჭო თხილანს იმენდ ჩქინ აზროვნებას?

¹² მუჭოთ მუზარად თხილანს ჯარიშკოჩიშ დუდის, თეშ რსხებაშ იმენდ თხილანს ჩქინ  აზროვნებას. ძალიერ იმენდ ქუმაღვენუნან-და, მარჩქილედან იჸი, ნამდა თი ირფელს, მუდგას ქვეყნიერება ფთავაზენა მუთუნ ჯგირობუა ვა მოუღ (ფილ. 3:8). იმენდიშ ჭყოლოფათ მიღნა სიმშვიდე დო ვა ვოდინუანთ სტაბილურობას. თენა მუშ დუდშა გიმოცად ართ ჩილ დო ქომონჯიქ, უოლეს დო ლაურინდაქ, მით აფრიკას მსახურენა. სუმ მარაშ დინახალე ჟირხოლოს მშობლეფქ დუღურეს, ლაურინდას დიდაქ დო უოლესის — მუმაქ. კოვიდ-19 პანდემიაშ გურშენ თინეფს ვეშიალებეს მუნეფიშ ქიანაშა ულაქ დო თე რთულ პერიოდის ოჯახიშ წევრეფწკუმა ართო რინაქ. უოლეს იჩიებ: „გათელებაშ იმენდ მოხვარ, ვეფიფქრე თიშე, მუნერ მდგომარეობას რდეს თინეფ სიცოცხლეშ ბოლო დღალეფს. თე იმენდ მოხვარ, წერმიბდგინე, მუნერეფ იჸუაფნა ახალ ქვეყნიერებას, მუჟამსით გეთელებნა. მუჟამსით გურშა ეთმაკათუ, თე იმენდ მოხვარ, ვა ვოდინუე სიმშვიდე დო ჯგირშე ქიფიფქრე“.

13. მუ ოკო ვაკეთათ წმინდა შურიშ მიოღებელო?

¹³ „ვენაშქირიტათ თქვან გურს წმინდა შურიშ დაჩხირ“ (1 თეს. 5:19). პავლექ წმინდა შურ შეადარ დაჩხირს, ნამუთ ჩქინ გურს რე. მუჟამსით ღორონთიშ წმინდა შურ მიღნა უმოსო ვორეთ აღძრულ ვაკეთათ თინა, მუთ სწორ რე დო გურგედვალირო შევასრულათ იეჰოვაშ საქმე (რომ. 12:11). მუ ოკო ვაკეთათ წმინდა შურიშ მიოღებელო? თეშო საჭირო რე, იბლოცათ, გეგმიბრკუათ ღორონთიშ სიტყვა დო მონაწილება მიბღათ თი საქმეეფს, ნამდგას იეჰოვა მუშ ორგანიზაციაშ საშვალებათ ხემძღვანელენს. თეს გუვაკეთენთ-და, გუვავითარენთ „წმინდა შურიშ ნაყოფის“ (გალ. 5:22, 23).

14. მუს ოკო ევუჩილითუათ დუდ, ნამდა ღორონთშე წმინდა შურ ირო მიბღათ? (ქოძირით სურათ).

¹⁴ თიშ უკულ, მუთ ღორონთ წმინდა შურს ქომჩანა, კურცხას ოკო ვორდათ, ნამდა თინა ჩქინ გურს ვენუოშქირიტათ. ღორონთ მუშ წმინდა შურს ხვალე თინეფს არზენს, მით ოცად, ვადინუას სუფთა აზროვნება დო თიშ შესაბამისო მიქცუას. იეჰოვა მეტო ვემეჩანს მუშ წმინდა შურს თინეფს, მიდგას უწმინდურ ფიქრეფ უღჷ დო თეშ შესაბამისო იქციებ (1 თეს. 4:7, 8). თეს გეძინელ, წმინდა შურ ირო მიბღათინ, წინასწარმეტყველებეფს არდებულო ოკო ვა ვუჯინათ (1 თეს. 5:20). თე მუხლის მოშინაფილ სიტყვა „წინასწარმეტყველებეფს“ იგულისხმებ ღორონთიშ წმინდა შურით გინოჩამილ ცნობეფ, ნამუთ ოხუ იეჰოვაშ  დღას დო თი მნიშვნელოვან დროს, ნამდგასით ფცხოვრენთ. ოკო ვეფიფქრათ, ნამდა არმაგედონშახ დიო ხოლო ბრელ მეძჷ დო თე დღა ჩქინ სიცოცხლეს ვა დოდირთუ. თეშ გინაწონს, ღორონთიშ მოსაწონო მოქციებათ დო სიწმინდეშ დაცვებათ ოკო ვოძირუათ, ნამდა თე დღას ირ წუთის ველუთ დო შურ მოლნა, მუჟამ დოდირთუ თინა (2 პეტ. 3:11, 12).

15. მუ ოკო ვაკეთათ, ნამდა ვედებჯერათ ტყურა ინფორმაცია დო ვევაჸუნათ დემონეფიშ პროპაგანდას? (1 თეს. 5:21).

¹⁵ მალას ღორონთიშ მოწინააღმდეგეეფ გაკეთენა განცხადებას „მშვიდობა დო უსაფრთხოებაშ“ გურშენ (1 თეს. 5:3). დემონეფიშ პროპაგანდა მთელ მსოფლიოს მადვალუ დო ბრელ გეიაჸუნუ თის (გამოცხ. 16:13, 14). მუშ რაგად შილებე ჩქინდე? თე ხალხიშ გინაწონს, ჩქი ვედებჯერთ დემონეფიშ ტყურეფს, მუჟამსით „ირფელს შევამოწმენთ“ (წეკითხით 1 თესალონიკელეფიშ 5:21). თე მუხლის მოშინაფილ ბერძნულ სიტყვას, ნამუთ თარგმნილ რე, მუჭოთ შემოწმება, ჯვეშო ძვირფას მეტალიშ, მაგალთო, ოქროშ ვარდა ვარჩხილიშ შემოწმებაშ კონტექსტის ირინუანდეს, ნამდა დერწმუნესკო ქორდჷ დო ვარ თინა ნამდვილ. თეშნერო, ჩქი ხოლო ოკო შევამოწმათ, თაშ ქოფთქუათინ, დებრწმუნათ ქორენ დო ვარ მართალ თინა, მუდგას იფრჩქილეთ ვარდა ბკითხულენთ. თეშ კეთება მნიშვნელოვან რდჷ თესალონიკელეფშო დო ბრელით უმოს მნიშვნელოვან იჸუაფ ჩქინო დიდ გაჭირებაშ მონჭაფაწკუმა ართო. თიშ მანგიორო, ნამდა ხეთეშე ქიდებჯერათ ირფელ, მუდგას შხვეფ იჩიებნა, ოკო გეგმიბრინუათ სწორას აზროვნებაშ უნარ დო ირფელ, მუდგას ბკითხულენთ ვარდა იფრჩქილუაფუთ, ოკო ქეშუდარათ თის, მუდგას ბიბლიაშე დო იეჰოვაშ ორგანიზაციაშე ბგებულენთ. თაშ ქიმიფქციებუთ-და, ვევაჸუნუთ დემონეფიშ პროპაგანდას დო ვედებღორებუთ (იგავ. 14:15; 1 ტიმ. 4:1).

16. მუშა ვორეთ დარწმუნებულ დო მუშ კეთებას გინმოჭყვიდრაფუანა თენა?

¹⁶ მიჩქნა, ნამდა იეჰოვაშ მსახურეფ, მუჭოთ ჯგუფ, გინასქიდნა დიდ გაჭირებას. მარა ვა მიჩქნა, მუ შილებე მომღან ჩქინდე თითოულს ჭუმენერ დღაქ (იაკ. 4:14). ვა უღჷ მნიშვნელობა, დიდ გაჭირებას ჩქინ თოლით ბძირუნთ დო ვარ თიშახ ბღურუთ, ბოლოშა ართგურეფ ქუდოფსქიდუთ-და, ღორონთშე ჯილდოს — მარადიულ სიცოცხლეს მიბღენთ. ცხებულ ქრისტიანეფ ქრისტეწკუმა ართო იჸუაფნა ზეცას დო „შხვა შხურ“ მარადიულ ცხოვრებათ გეხარენს დედამიწას. მორთ, მთელ ყურადღება ჩქინ დიდებულ იმენდშა მაფდან გინოღალირ დო მზათ ვორდათ იეჰოვაშ დღაშო!