1, 2. ფსალმუნიშ 25:14-იშ თანახმას, ნამ თვისება ოკო გიმიფრჩქინათ, ნამდა მიღდან იეჰოვაწკუმა ხოლოშიან ურთიერთობა?

 ᲛᲣᲭᲝ ფიქრენთ, ნამ თვისებეფ რე საჭირო, ნამდა მეგობარწკუმა ხოლოშიან ურთიერთობა ვადინუათ? ალბათ, პირველო გონებაშა ჸოროფა დო ართიანიშ ელარნა მუგალედეს დო შურო ვეფიქრენდით, ნამდა ჯგირ მეგობრობაშო შიშ ხოლო მნიშვნელოვან რე. მუჭოთ თე სტატიაშ მთავარ მუხლის ბკითხულენთ, მიდგას ოკო, იეჰოვაწკუმა ხოლოშიან მეგობრობა უღდას თიშ მოშიშ ოკო რდას (წეკითხით ფსალმუნეფიშ 25:14).

² მნიშვნელობა ვა უღჷ, მუზმა ხან რე ვომსახურუთ იეჰოვას, საჭირო რე, ვა ვოდინუათ ჯანსაღ შიშ თიშ მიმართ. მარა შილებე გომრჩქინდან კითხვეფქ: მუს ნიშნენს ვორდათ ღორონთიშმოშიშეფ? მუ ოკო ვაკეთათ, ნამდა ვორდათ ღორონთიშმოშიშეფ? მუშ გურაფა შემლებნა თე საკითხწკუმა დაკავშირებით გამგებელ ობადიაშ, მღვდელმთავარ იეჰოიადაშ დო მეფე იეჰოაშიშ მაგალითშე?

3. მუჟამ შილებე გომრჩქინდან შიშიქ დო მუჭო ფთხილანა თენა?

³ შილებე შიშ თიმწკუმა მირჩქინდუნა, მუჟამსით მარჩქილენა, ნამდა მუდგარენქ შილებე ზიან ქუმმორინუან. თეცალ შიშ მოხვარნა, სწორ გადაწყვეტილება მიბღათ დო საფრთხე ეიფჩილითუათ. მაგალთო, მაღალ ადგილშე გინონთხაფაშ შიშ აღბძრენა, გეგმიფრჩქინათ სიფრთხილე დო კირდეშ ძგოპის ველვაჸუნათ. მუდგაინ გლახა ვემიბკინდუათინ თიშ შიშ ხოლო მოხვარნა, ოშქურანჯ სიტუაციეფს დუდ აურიდათ დო საჸოროფო პიროვნებაწკუმა ურთიერთობაშ გილალუაფაშ შიშ მოხვარნა, ვა ვაკეთათ დო ვა ფთქუათ თიცალ მუდგარენ, მუთ თის გურს უწყუნუანდჷ.

4. მუ მიზან უღჷ სატანას?

⁴ სატანას ოკო, ხალხის თეშ ოშქურდას იეჰოვაშ, ნამდა შიშით  კანკალანდან თიშ წოხოლე. თინა ირნერო ოცად, დუმოჯერუან თი აზრ, მუთ ართ დროს ელიფაზიქ იობის უწუ — ითამ იეჰოვა მანგიორიშ გინმაგაფალ დო რისხუან ღორონთ რე, მიდგაშა მუთუნნერო ვა გასიამოვნებე (იობ. 4:18, 19). სატანაშ მიზან რე, თეშ მოშქურდან იეჰოვაშ, ნამდა თიშ მსახურებაშე ვარია ქოფთქუათ. თექ ვა მოხვადასინ აუცილებერ რე, გუვავითარათ ღორონთიშ მიმართ ჯანსაღ შიშ, მუთ ნიშნენს, პატის ფცენდათ თის დო თიშა მოშქურდან, ნამდა გურ ვა უწყუნუათ.

5. მუს ნიშნენს, ვორდათ ღორონთიშმოშიშ?

⁵ პიროვნებას, მიდგას იეჰოვაშ მიმართ ჯანსაღ შიში უღჷ მანგარო უჸორს თინა დო ვაკო, თიცალ მუდგარენ გაკეთას, მუდგათ გილელუანდ ღორონთწკუმა ურთიერთობას. ზუსტას თაშ რდჷ იესოშ შემთხვევას ხოლო, თინა ღორონთიშმოშიშ რდჷ (ებრ. 5:7). თის იეჰოვაშ მიმართ პანიკურ შიშ ვა უღუდ (ეს. 11:2, 3). თეშ გინაწონს, მანგარო უჸორდჷ დო ოკოდ, დემორჩილკო ღორონთის (იოან. 14:21, 31). იესოცალო ჩქი ხოლო ოკო გიმიფრჩქინათ იეჰოვაშ მიმართ პატიცემა დო მოკრძალებურ შიშ, მუშენდა თინა მოჸოროფე, ბრძენ, სამართლიან დო ძალიერ რე. თეს გეძინელ, მიჩქნა, ნამდა იეჰოვას მანგარო ვუჸორთ, ათეშენ ჩქინ მეღებულ გადაწყვეტილებეფ მოქმედენს თიშა. მუჟამსით მეპჸუნთ ღორონთიშ მითითებეფს გურს ვუხარენთ თის, მარა მუჟამსით ვა დევემორჩილებუთ გურს ქელვოჭუანთ (ფსალმ. 78:41; იგავ. 27:11).

6. მუ რე თი ართ-ართ საშვალება, მუთ მიმეხვარებნა, გუვავითარათ ღორონთიშ მიმართ შიშ? (ფსალმ. 34:11).

⁶ იეჰოვაშ შიშ დაბადებაშე ვეთოპჸუნა, თის გავითარება ოსაჭირ (წეკითხით ფსალმუნეფიშ 34:11). ართ-ართ, მუთ თეშ კეთებას მიმეხვარებნა, გუნაჭყეფუეფშე დაკვირება რე. გუნაჭყეფუეფს მუთ უმოსო ვორწყეთ ღორონთიშ სიბრძნეს, ძალას დო ჸოროფას, თით უმოსო მემანგარებნა პატიცემა დო ჸოროფა იეჰოვაშ მიმართ (რომ. 1:20). ართ და, სახელო ედრიენ, თეცალ მუდგარენს იჩიებ: „ჩქიმდა მანგარო მოქმედენს თიშ ძირაფა, მუჭო იძირე გუნაჭყეფუეფშე ღორონთიშ სიბრძნე. თენა მარწმუნენს, ნამდა იეჰოვას უჩქჷ, მუ რე ჩქიმო არძაშ უჯგუშ“. ედრიენ ირიათო ფიქრენდჷ თე საკითხშე დო ბოლოს თეცალ დასკვნაშა მერთჷ: „ვა მოკო თიცალ მუდგარენ გუვაკეთე, მუთ ჩქიმ დო იეჰოვაშ შქას ურთიერთობას გილალუანს. სიცოცხლე ხომ ზუსტას ღორონთიქ მუჩჷ?!“. ჯგირ იჸუაფ, თე მარას დრო გეგმურთათ იეჰოვაშ ნამთინე გუნაჭყეფუეფშე დაფიქრებას. თენა მიგეხვარებნა, უმოსო გემანგარათ პატიცემა დო ჸოროფა ღორონთიშ მიმართ (ფსალმ. 111:2, 3).

7. მუჭო მოხვარნა ლოცვა, გუვავითარათ იეჰოვაშ მიმართ ჯანსაღ შიშ?

⁷ რეგულარულო ლოცვა რე ხოლო ართ საშვალება, მუდგათ შემლებნა ღორონთიშ მიმართ შიშიშ გავითარება. მუთ უმოს ხშირას ვურაგადუთ იეჰოვას ლოცვათ, თით უმოს რეალურ პიროვნებათ გინირთუ თინა ჩქინო. მაგალთო, ირო, მუჟამსით სირთულეეფიშ გარზებელო ძალას ფთხინთ, ჩქინ დუდის გუვოშინანთ, მუსხით ძალიერ რე თინა; ვარდა მუჟამსით, მუშ სქუა შემობწირესინ თიშენ მადლობას ვურაგადუთ, ჩქინ დუდის გუვოშინანთ, მუჭო ვუჸორთ თის; დო მუჟამსით ლოცვას მოხვარას ფთხინთ პრობლემეფიშ მაგვარებელო, თეთ გუვოშინანთ ჩქინ დუდის, ნამდა თინა ბრძენ რე. თეცალ ლოცვეფ მოხვარნა, უმოს პატიცემა გეგმიფრჩქინათ იეჰოვაშ მიმართ დო უმოსო მაფდან გინოჭყვიდილ, დუდ ეუჩილითუათ ირფელს, მუთ თიწკუმა ურთიერთობას გილამლუანა.

8. მუ ოკო ვაკეთათ, ნამდა ვა ვოდინუათ ღორონთიშ მიმართ შიშ?

⁸ ღორონთიშ შიშ ვა ვოდინუათინ თეს მიმეხვარებნა თი ჯგირ დო გლახა მაგალითეფიშ გარჩიება, ნამუთ ბიბლიას რე მოჩამილ. მორთ, პირველო გუვარჩუათ ჟირ ართგურ მსახურიშ მაგალით. თენეფ რდეს მეფე ახაბიშ სასახლეშ გამგებელ ობადია დო მღვდელმთავარ იეჰოიადა. უკულ ქობძირუნთ, მუშ გურაფა შემლებნა იუდაშ მეფე იეჰოაშიშ შემთხვევაშე, მით დუდშე იეჰოვაშ ართგურ მსახურ რდჷ, მარა უკულ ოჭიშ ქურთინუ თის.

9. მუჭო მეხვარ ობადიას იეჰოვაშ შიშიქ? (1 მეფ. 18:3, 12).

⁹ ბიბლიას თი ადგილს, სოდეთ ობადია პირველო რე მოშინაფილ, თეცალ მუდგარენ ჭარჷ: „ობადია იეჰოვაშ მოშიშ კოჩ რდჷ“ (წეკითხით 1 მეფეეფიშ 18:3, 12). თიშ ჭყოლოფათ, ნამდა ობადია ღორონთიშმოშიშ რდჷ, პატიოსან დო სანდო კოჩიშ სახელ უღუდ. ათეშენ, თინა მეფე ახაბიქ მუშ სასახლეშ გამგებელო დარინუ (ქეშუდარით ნეემიაშ 7:2). ობადიას ღორონთიშ შიშიქ მეჩჷ სარკო გაბედულება, მუთ მართალო დესაჭირებუდ, მუშენდა ომსახურუდ უბადო მეფე ახაბის, მით „არძა მუშ წოხლეიან მეფეშე უფრაშო იქციებუდ იეჰოვაშ თოლს“ (1 მეფ. 16:30). თეს გეძინელ, ახაბიშ ოსურს, იზებელს, მით ბაალიშ თაყვანიშმცემელ რდჷ, მანგარო ჯოგუდ იეჰოვა დო ირნერო ოცადუდ, ჩრდილოეთ სამეფოს მოსპუკო თიშ თაყვანიშმცემლობა. თიქ იეჰოვაშ ბრელ წინასწარმეტყველ ხოლო დაჸვილაფუ (1 მეფ. 18:4). მარა, არგამა რე, ობადია თეცალ რთულ პერიოდის ხოლო ომსახურუდ იეჰოვას.

10. მუჭო გიმირჩქინ ობადიაქ დიდ გაბედულება?

¹⁰ მუჭო გიმირჩქინ ობადიაქ დიდ გაბედულება? მუჟამსით იზებელ ღორონთიშ წინასწარმეტყველეფს ოჸვილარო მოთხოზუდ, ობადიაქ 100 წინასწარმეტყველ ჟირ ჯგუფო გორთჷ, გამოქვაბულეფს დატყობინუ დო ქობალ დო წყარ მეუღუდ თინეფშა (1 მეფ. 18:13, 14). თენა იზებელქ ქიგეგკო, გაბედულ ობადიას თიშ ხეშე ღურა ვეიოჩირთუდ. მუშო ოკო რაგად, ობადია ხოლო ჩქინცალ ადამიან რდჷ დო ღურა ვაკოდკონ იჸიდ, მარა მუშ სიცოცხლეშე უმოსო იეჰოვა დო თინეფ უჸორდჷ, მით ართგურო ომსახურუდ თის.

11. მუჭო მეჸუნა ამდღარ დროს იეჰოვაშ მსახურეფ ობადიაშ მაგალითის? (ქოძირით სურათ).

¹¹ ამდღა ბრელ იეჰოვაშ მოწმე თიცალ ტერიტორიას ცხოვრენს, სოდეთ ჩქინ საქმიანობა ვარიებულ რე. თინეფ პატიცემათ ოქცუნა ხელისუფლებაშ წარმომადგენელეფს, მარა ობადიაცალო, განსაკუთრებულ ართგურობას ხვალე იეჰოვაშ მიმართ გიმირჩქინანა (მათ. 22:21). თე და დო ჯიმალეფ, ადამიანეფიშ უმოსო ღორონთის ომორჩილნა, მუდგათ ოძირანა, ნამდა თიშ შიშ უღნა (საქ. 5:29). თე ირფელს თით ამტკიცენა, ნამდა აგრძელენა სახიოლო ამბეშ ქადაგებას დო ტყობაშე ართო აკოშაყარუას (მათ. 10:16, 28). თეს გეძინელ, ირნერო ოცადნა, და დო ჯიმალეფს სულიერ საზრდოქ ვა მაკორდან. გუვარჩუათ ართ ჯიმაშ, ჰენრიშ, მაგალით, ნამუთ ცხოვრენს აფრიკას, სოდეთ ართ დროს  ჩქინ საქმიანობა ვარიებულ რდჷ. აკრძალვაშ დროს თის მეუღუდ სულიერ საზრდო და დო ჯიმალეფშა. თინა იჩიებ: „ბუნებათ მორდებუან კოჩ ვორექ, ათეშენ დარწმუნებულ ვორექ, იეჰოვაშ მიმართ ჯანსაღ შიშ ვა ნობღვედკონ, ვეშმალებედ თიცალ გაბედულებაშ გიმორჩქინა, მუთ თიმ პერიოდის განსაკუთრებულო მოსაჭირუდ“. მუჟამსით თქვა ხოლო იეჰოვაშ მიმართ ჯანსაღ შიშის გავითარენთ, შეგალებენა გიმირჩქინათ თიცალ გაბედულება, მუნერით ჰენრის უღუდ.

12. მუჭო გიმირჩქინეს მღვდელმთავარ იეჰოიადაქ დო თიშ ოსურქ ართგურობა იეჰოვაშ მიმართ?

¹² მღვდელმთავარ იეჰოიადას იეჰოვაშ შიშ უღუდ დო ზუსტას თენა აღძრენდჷ, ჸოფედკო ღორონთიშ ართგურ დო ხუჯ ქუდუკინკო ჭეშმარიტ თაყვანიშმცემლობას. თექ ჯგირო ქიძირ, მუჟამსით იზებელიშ ცირასქუაქ, ათალიაქ უკანონოთ ქეშეჸოთ ხეშა იუდაშ სამეფო ტახტ. ხალხის მართალო უღუდ მიზეზ, ოშქურუდკო ათალიაშა. თინა თიცალ უდუნდებელ დო ძალაუფლებაშ მოჸოროფე რდჷ, ნამდა ტახტშა ეშაულარო ეცად სამეფო ხაზიშ მოსპუალას. თიქ მუშ მოთალეფ ხოლო ვეშიცოდილუ დო დოჸვილ თინეფ (2 მატ. 22:10, 11). მარა თიშ ართ-ართ მოთაქ იეჰოაშიქ ცოცხალქ ქუდოსქიდ, მუშენდა იეჰოიადაშ ოსურქ, იეჰოშაბათიქ, გინასქილიდუ თინა. თიქ დო იეჰოიადაქ დატყობინეს თე ბაღანა დო ულუანდეს. შედეგო, თე ართგურ ჩილ დო ქომონჯიქ ხე შეუნწყის თის, ნამდა დავითიშ სამეფო ხაზიქ გეგრძელკო. იეჰოიადაქ იეჰოვაშ ართგურობა გეგმირჩქინ დო ვაშქურნებ ათალიაშა (იგავ. 29:25).

13. მუჭო გიმირჩქინ იეჰოიადაქ იეჰოვაშ ართგურობა, მუჟამსით იეჰოაშ შქვით წანერ რდჷ?

¹³ იეჰოიადაქ ხოლო ართშა გიმირჩქინ იეჰოვაშ ართგურობა, მუჟამსით იეჰოაშ შქვით წანერ რდჷ. იეჰოიადაქ გეგმა ქუდარსხუ. ირფელ თე გეგმაშ მიხედვით მიდეშ-და, იეჰოაშ, ნამუთ დავითიშ კანონიერ მემკვიდრე რდჷ, სამეფო ტახტშა გეშეშ. მარა თე გეგმა ვა გამართლენდჷ-და, იეჰოიადას ღურა ვეიოჩირთუდ. იეჰოვაშ ჭყოლოფათ, ირფელქ გეგმაშ მიხედვით მიდართჷ. საგვარეულოშ დუდკოჩეფიშ დო ლევიანეფიშ მოხვარათ იეჰოიადაქ იეჰოაშ მეფეთ დარინუ დო ათალია ხოლო დაჸვილაფუ (2 მატ. 23:1—5, 11, 12, 15; 24:1). „უკულ იეჰოიადაქ მეფეს დო ხალხის იეჰოვაშ წოხოლე პირობა ქუდადვალაფუ, ნამდა თინეფ კინ იეჰოვაშ ხალხ იჸუაფდეს“ (2 მეფ. 11:17). ხვალე თენა ვარინ, „იეჰოვაშ ტაძარიშ კარმინოლეფწკუმა მცველეფ ქიგიორინუ, ნამდა ნამთინ გაუწმინდურებულს ვეშიალებუკო თექ მინულაქ“ (2 მატ. 23:19).

14. მუ გაგებათ გედვჷ იეჰოვაქ პატი იეჰოიადას?

¹⁴ იეჰოვას რაგადებულ აფუდ: „მით მა მიძღვინენს პატის, მა ხოლო თის გებდვანქ პატის“. თიქ ზუსტას თაშ მიქცუ იეჰოიადაშ შემთხვევას (1 სამ. 2:30). მაგალთო, თიქ მღვდელმთავარიშ კეთებულ ჯგირ საქმეეფ ბიბლიას ქენაჭარაფუ, ნამდა ქიდიბგურეთკო თიშე (რომ. 15:4). მუჟამსით იეჰოიადაქ დოღურ განსაკუთრებულ პატიქ ქიგიადვჷ, „თინა დავითიშ ქალაქის მეფეეფიშ ხასლას დონთხორეს, მუშენდა ჯგირს ორთუდ ისრაელს, ღორონთშო დო თიშ ტაძარშო“ (2 მატ. 24:15, 16).

15. მუშ გურაფა შემლებნა იეჰოიადაშ შემთხვევაშე? (ქოძირით სურათ).

¹⁵ იეჰოიადაშ შემთხვევა მოხვარნა არძას, გუვავითარათ ღორონთიშ მიმართ შიშ. უხუცესეფს შეულებნა მიაჸუნან იეჰოიადაშ მაგალითის თით, ნამდა დოთხილუან ღორონთიშ შხურეფ დო იზრუნან თინეფშე (საქ. 20:28). ხანშამიშულირეფს ხოლო შეულებნა მიაჸუნან იეჰოიადაშ მაგალითის თით, ნამდა ვადინუან იეჰოვაშ მიმართ შიშ დო ართგურობა. თეშნერ მოქციებათ საშვალებას არზენა ღორონთის, გეგმირინუას თინეფ მუშ ნებაშ შეიოსრულებერო დო ღორონთ ხოლო დღას ვა ურთინუანს თინეფს ოჭიშის. ახალგაზრდეფს ხოლო ბრელ მუდგარენიშ გურაფა შეულებნა თიშე, მუჭო ოქცუდ იეჰოვა ხანშამიშულირ იეჰოიადას. მუჟამსით თინეფ პატიცემათ ოქცუნა ხანშამიშულირეფს, განსაკუთრებულო თი და დო ჯიმალეფს, მით წანეფ რე ომსახურ იეჰოვას, თეშნერო მეჸუნა ღორონთიშ  მაგალითის (იგავ. 16:31). დო ბოლოს, ბრელ მუდგარენიშ გურაფა შემლებნა საგვარეულოშ დუდკოჩეფიშ დო ლევიანეფიშ მაგალითშე, მით ხუჯის უკინენდეს იეჰოიადას. მორთ თინეფცალო ჩქი ხოლო გინოჭყვიდილ მაფდან, დევემორჩილათ თინეფს, მიდგას ჩქინ შქას ხემძღვანელობა ოვალ დო თეშნერო ხუჯ ქუდუკინათ (ებრ. 13:17).

16. სოვრეშე იძირ, ნამდა იეჰოაშის ხოლოშიან ურთიერთობა ვა უღუდ იეჰოვაწკუმა?

¹⁶ იეჰოიადა ირნერო ოხვარუდ იეჰოაშის, ჸოფედკო ჯგირ პიროვნება, მუდგაშ შედეგო თე ახალგაზრდა მეფე „სწორას იქციებუდ იეჰოვაშ თოლს“ (2 მეფ. 12:2). მარა იეჰოიადაშ ღურაშ უკულ, იეჰოაშიქ ქუმურჩქილუ იუდაშ განდგომილ მთავრეფს, მით ვამსახურდეს იეჰოვას. შედეგო, ქოთ თიქ დო ქოთ ხალხიქ „ოთაყვანებელ ბოძეფიშ დო კერპეფიშ მსახურება ქიდიჭყეს“ (2 მატ. 24:4, 17, 18). იეჰოვას მანგარო უწყუნუ გურ თინეფიშ საქციელქ, ათეშენ „წინასწარმეტყველეფს მიაშქვანდჷ თინეფშა, ნამდა დართესკო თის, მარა მითინ ვა ურჩქილედ თინეფს“. ხალხიქ ვართ იეჰოიადაშ სქუას, ზაქარიას მურჩქილუ, მით ხვალე იეჰოვაშ წინასწარმეტყველ დო მღვდელ ვარინ, მეფე იეჰოაშიშ მამდასქუა ხოლო რდჷ. მეფე იეჰოაშიქ დოჸვილ ზაქარია, მუდგათ არგამათ ოძირუ, ნამდა ვა დაფას დო მარდულობა ვეგმირჩქინ თი ირფელიშ მიმართ, მუთ იეჰოიადაქ დო თიშ ოჯახიქ მუშო აკეთ (2 მატ. 22:11; 24:19—22).

17. მუჭო დითირ იეჰოაშიშ მდგომარეობაქ?

¹⁷ თიშ უკულ, მუთ იეჰოაშიქ იეჰოვაშ მიმართ ჯანსაღ შიშ მიოდინუ, თიშ საქმექ უფრაშობაშა მიდართჷ დო მუშ დუდშა გეგმოცად იეჰოვაშ სიტყვეფ: „მით მუთუნო ვემემრჩქინანს,  გოჯოგაფილ იჸუაფ“ (1 სამ. 2:30). თე სიტყვეფქ შისრულ თიმწკუმა, მუჟამსით სირიაშ ჭიჭე ჯარქ გეგშართჷ იეჰოაშიშ დიდ ჯარიშ წინააღმდეგ დო გიორჯგინ თის, დო ხვალე თენა ვარინ, იეჰოაშ ხოლო დონჭყოლეს. სირიელეფიშ ულაშ უკულ მეფე კინ მუშ მსახურეფქ დოჸვილეს, მუდგათ ზაქარიაშ ჸვილუაშენ მანგიორ გინუგეს. მუშ უბადო საქმეეფიშ გურშენ ხალხიქ თინა თიშ ღირსო ხოლო ვემირჩქინ, ნამდა მეფეეფიშ ონთხორუეს დუნთხორდესკო (2 მატ. 24:23—25; მათ. 23:35). b

18. მუჭოთ იერემიაშ 17:7, 8–შე იძირე, მუშ კეთება შემლებნა, ნამდა ვა ვაგურათ იეჰოაშის?

¹⁸ მუშ გურაფა შემლებნა იეჰოაშიშ შემთხვევაშე? თინა მოგენდჷ ჯას, ნამდგას ჩხვიჩხვეფ ტომბას ვაფჷ გოდგუმილ დო მიკომარგებულ რე ბარჯგის. მუჟამსით იეჰოიადაქ დოღურ, იეჰოაშიქ, თაშ ქოფთქუათინ, ბარჯგიშ უმშო ქუდოსქიდ დო მუჟამსით განდგომილებაშ ბორიაქ დუმბარ, მიოდინუ ღორონთიშ ართგურობა, შხვა სიტყვეფით ქოფთქუათინ, ეკირთჷ. თე შემთხვევაშე ჯგირო იძირე ართ მუდგარენ — იეჰოვას ხვალე თიშენ ოკო ვა ვომორჩილდათ, ნამდა თაშ ჩქინ თანაქრისტიანეფ ვარდა ოჯახიშ წევრეფ იქციებნა. სულიერო კურცხას ქუდოფსქიდათ დო იეჰოვაწკუმა ხოლოშიან ურთიერთობა ვა ვოდინუათინ, საჭირო რე, პირადო იბზრუნათ თიშო, ნამდა გუვავითარათ ღორონთიშ მიმართ ჯანსაღ შიშ დო ჸოროფა. თეშ კეთებას მიმეხვარებნა ღორონთიშ სიტყვაშ რეგულარულ გიმორკვიება, თიშე ფიქრ დო ლოცვა (წეკითხით იერემიაშ 17:7, 8; კოლ. 2:6, 7).

19. მუს ითხინს იეჰოვა ჩქინდე?

¹⁹ იეჰოვა ჩქინდე ქიანაშის ვეთხინს. მუდგას თინა ჩქინდე ითხინს, ეკლესიასტეშ 12:13-ს რე ეკოძინელ, სოდეთ ბკითხულენთ: „ღორონთშა გოშქურდას დო მიაჸუნ თიშ მცნებეფს, მუშენდა თენა რე ადამიანიშ ვალდებულება!“. ღორონთიშ შიშ მიმეხვარებნა, ობადია დო იეჰოიადაცალო, გაბედულო შეფხვადათ მომავალ რწმენაშ გამოცდეფს. შედეგო, მუთუნს ვეშიალებე გილამლუან იეჰოვაწკუმა ურთიერთობა.