1. მუჭოთ 1 პეტრეშ 5:2-შე იძირე, მუ მნიშვნელოვან საქმე რე მენდებულ უხუცესეფშა?

 ᲘᲔᲰᲝᲕᲐᲥ მუშ ძვირფას შხურშე ზრუნვა ქრისტიან უხუცესეფს მიანდჷ. თე ართგურ ჯიმალეფ მანგარო აფასენა, ნამდა უღნა პატი, მემსახურან თანაქრისტიანეფს დო ბრელს ხანდენა, ნამდა რდან ჯგირ ჭყიშეფ (იერ. 23:4; წეკითხით 1 პეტრეშ 5:2). ჩქი ხოლო მანგარ მარდულეფ ვორეთ, ნამდა კრებეფს თეცალ ჯგირ ჯიმალეფ პჸუნა.

2. მუ სირთულეს შილებე შეხვადას ნამთინე უხუცესიქ?

² უხუცესეფ ბრელ სირთულეს ხვადუნა მუნეფიშ პასუხიშმგებლობეფიშ შესრულებაშ დროს. მაგალთო, კრებაშე ზრუნვა, ბრელ ხანდას ითხინს. ამერიკაშ შეერთებულ შტატეფს მახორუ ართ უხუცეს ჯიმაქ, ტონიქ, ქიმეხვად, ნამდა საჭირო რდჷ უმოს მოკრძალება გიმირჩქინკო, მუჟამსით მუშ დუდშა ართათ ბრელ საქმე ეჭოფ. თინა იჩიებ: „მუჟამსით კოვიდ-19 პანდემიაქ დიჭყჷ, ჩქიმ დუდშა ებჭოფ კრებაშ შეხვალამეფიშ ჩატარებაშ დო მსახურებაშ ორგანიზება. მარა მუთ უმოს ბრელ მუდგარენს ვორთუდ, თით უმოსო აძინუდ საქმეს. თიცალ დაკავებულ ვორდჷ, ნამდა დრო ვა მოსქიდუდ ბიბლიაშ კითხირშო, პირად გურაფაშო დო ლოცვაშო“. გვალო შხვა სირთულეს შეხვად კოსოვოს მახორუ ართ უხუცეს ჯიმაქ, სახელო ილირქ. მუჟამსით თიშ ქიანას ომქ დიჭყჷ, მანგარო გუჭირდჷ, მიაჸუნკო ორგანიზაციაშე მეღებულ მითითებას. თინა იჩიებ: „ფილიალქ ქოფთხუ, ქიმვეხვარკო თი და დო ჯიმალეფს, მით ომიშ ეპიცენტრის რდეს. მანგარო მოშქურუდ დო ფიფქრენდჷ, ნამდა ჯიმალეფშე მეღებულ თე მითითება იშენდოიშენ გონივრულ ვა რდჷ“. ართ ჯიმა, სახელო ტიმს, მით აზიას მისიონერო მსახურენდჷ, მანგარო გუჭირდჷ ირდღაშიან საქმეეფიშ მიკოჯინაქ. თინა იჩიებ: „მინშა გონებრივო დო ემოციურო თიცალ გინოშულადირ ვორდჷ, ნამდა მუთუნიშ დუდ ვამღუდ“. მუ მეხვარებ თი უხუცესეფს, მით თეცალ სირთულეეფს ხვადუნა?

3. მუ ჯგირობუას მომღანა თითოულ ქრისტიანს გედეონიშ მაგალითიშ გარჩიება?

³ უხუცესეფს ბრელ მუდგარენიშ გურაფა შეულებნა მსაჯულ  გედეონიშ მაგალითშე (ებრ. 6:12; 11:32). თინეფ ქოთ თხილანა დო ქოთ ჭყიშანა ღორონთიშ ხალხის (მსაჯ. 2:16; 1 მატ. 17:6). გედეონცალო უხუცესეფ რენა გიშაგორილ თი საქმეშო, ნამდა იზრუნან იეჰოვაშ ხალხშო, თე განსაკუთრებულო რთულ პერიოდის (საქ. 20:28; 2 ტიმ. 3:1). გედეონიშ მოთვინებაქ ბრელშა გიმიცად მუშ დანიშნულებეფიშ შესრულებაშ დროს. არძა ქრისტიანს შემლებნა ბრელ მუდგარენ დიბგურუათ თიშ მოკრძალებაშ, თანდაბლობაშ დო მორჩილებაშ მაგალითშე. თე ართგურ მსახურიშ მაგალითიშ გარჩიება მიმეხვარებნა, უმოს მარდულობა გიმიფრჩქინათ უხუცესეფიშ მიმართ დო ირნერო ხუჯ ქუდუკინათ თე ქომოლკათას, მით ბრელს ხანდენა და დო ჯიმალეფშო (ებრ. 13:17).

4. მუჭო გიმირჩქინ, გედეონქ მოკრძალება დო თანდაბლობა?

⁴ გედეონ მოკრძალებურ დო თანდაბალ კოჩ რდჷ. b მუჟამსით იეჰოვაშ ანგელოზიქ თის უწუ, ნამდა ისრაელეფ მიდიანელეფშე ოკო დერსხკო, მით მანგარ ძალიერეფ რდეს, გედეონქ თანდაბლურო უწუ: „ჩქიმ შტო არძაშ უჭიჭაშ რე მენაშეშ ტომს დო მა ხოლო არძაშ უჭიჭაშ ვორექ მუაჩქიმიშ ჸუდეს“ (მსაჯ. 6:15). გედეონ ფიქრენდჷ, ნამდა თე დავალებაშ შეიოსრულებერო შესაფერის ვა რდჷ. მარა იეჰოვას უჯგუშო უჩქუდ, ნამდა გედეონს შეულებუდ თეშ კეთება. ზუსტას იეჰოვაშ მოხვარათ გედეონს შეიალებუ წარმატებათ შეასრულკო მუშა მენდებულ საქმე.

5. მუჟამ შილებე გიმიცადას უხუცესეფიშ მოკრძალებაქ დო თანდაბლობაქ?

⁵ უხუცესეფ ირნერო ოცადნა, გეგმირჩქინან თანდაბლობა დო მოკრძალება არძა საქმეს (მიქ. 6:8; საქ. 20:18, 19). თინეფ ვეცქვანა მუნეფიშ უნარეფით დო თი საქმეეფით, მუთ კეთებულ აფნა. თეს გეძინელ, მუჟამსით შეცდომეფ მალენა ზედმეტო ვაკრიტიკენა მუნეფიშ დუდის დო ვა ფიქრენა, ნამდა მუთუნიშ მოღეეფ ვა რენა. მარა იშენით უხუცესშო ირო ვა რე ადვილ, გეგმირჩქინას მოკრძალება დო თანდაბლობა. მაგალთო, შილებე მუშ დუდშა ბრელ საქმე გეჭოფას დო უკულ ქიმეხვადას, ნამდა იზმას ვა განჭუ. ვარდა შილებე თე თვისებეფიშ გიმორჩქინაქ თიმწკუმა გუჭირდას, მუჟამსით მუშ კეთებულ საქმეშ გურშენ ნამთინე თანაქრისტიან ოცქვანს დო ნამთინე — აკრიტიკენს. მუჭო მეხვარებ გედეონიშ მაგალით უხუცესეფს თეცალ სიტუაციეფიშ დროს?

6. მუშ გურაფა შეულებნა უხუცესეფს გედეონიშ მოკრძალებაშე? (ქოძირით სურათ).

⁶ ქითხით მოხვარა. მოკრძალებურ პიროვნებას ჯგირო არჩქილე, ნამდა შეზღუდულ შესაძლებლობეფ უღჷ დო გვალო ირფელიშ  კეთება ვეშულებ. გედეონქ ჯგირო ოძირუ, ნამდა უღუდ თე თვისება, მუჟამსით საქმეშ ოკეთებელო შხვეფს ხოლო ქოთხუ მოხვარა (მსაჯ. 6:27, 35; 7:24). უხუცესეფ ხოლო გონიერებას გიმირჩქინანა, მუჟამსით თაშ იქციებნა. ჟიშე მოშინაფილ ტონი იჩიებ: «ნამთინ საქმეშე ვეფჩიებუდ ვარიას დო ბრელ მუდგარენს ეთმობჭოფუნდჷ ჩქიმ დუდშა, მუშენდა თაშ ვორდჷ რდილ დო თენა ბაღანობაშე ეთოპუნდჷ. ათეშენ გეგნობჭყვიდ, ართ–ართ ოჯახურ თაყვანიშცემას მოკრძალებაშ საკითხ ქიმშუვოხუნეკო დო ჩქიმ ოსურს ხოლო ქელვაკითხე, თე კუნთხუთ მუს მოსაჭირუდ გაუჯგუშება. თეს გეძინელ, ვებგვერდ jw.org-ის ქუჯინ ვიდეოს „იესოცალო ოგურეთ შხვეფს, ენდით თინეფს დო გუნაწილით პასუხიშმგებლობეფ“». ტონიქ შხვეფს ხოლო ქოთხუ მოხვარა დო გეგნაბარ საქმეეფ. მუქ მაჸუნ თეს შედეგო? თინა იჩიებ: „ასე კრებას საქმე უჯგუშო იკეთებაფუაფ დო მა ხოლო უმოს დრო მიღჷ, ნამდა ჩქიმ სულიერობას ქიმკვოჯინე“.

7. მუჭო შეულებნა უხუცესეფს, მიაჸუნან გედეონიშ მაგალითის, მუჟამსით შხვეფ აკრიტიკენა? (იაკ. 3:13).

⁷ გურქ ვა მოირთან, მუჟამსით გაკრიტიკენა. უხუცესეფიშ მოკრძალებაქ დო თანდაბლობაქ შილებე თიმწკუმა ხოლო გიმიცადას, მუჟამსით მიდგარენ აკრიტიკენს თინეფს. თე შემთხვევას ხოლო დამხმარე იჸუაფ გედეონიშ მაგალით. მუჟამსით თის ეფრემელეფქ ბუნტ გეუტახეს დო გაკრიტიკება ქუდუჭყეს, გედეონს გურმულირო ვა უპასუხებ თინეფშა, თეშ გინაწონს, გემუანო ეჩუ, მუშენდა ჯგირო არჩქილედ, ნამდა მუ ხოლო ვა რდჷ უჩილათ (მსაჯ. 8:1—3). თიქ თანდაბლობა გიმირჩქინ, ბოლოშა ქუმურჩქილუ თე გურმულირ კათას დო უკულ გემუანო დო მშვიდას უპასუხ, მუდგაშ ჭყოლოფათ სიტუაციაქ გეგშენწყუ. უხუცესეფ ხოლო გედეონიშ მაგალითიშ მეჸუნათ გონიერებას გეგმირჩქინანა, მუჟამსით ყურადღებათ ქუმურჩქილუანა შხვეფს დო გურ ვა მალენა კრიტიკაშე (წეკითხით იაკობიშ 3:13). თეშნერ მოქციებათ თინეფ კრებას მშვიდობას დო ართობას შეუნწყუნა ხეს.

8. მუ ოკო აკეთან უხუცესეფქ, მუჟამსით ოცქვანა? ქიმიჸუნით მაგალით.

⁸ მთელ დიდება იეჰოვას მეუძღვინით. მუჟამსით გედეონქ მიდიანელეფს გიორჯგინ, თე გამარჯვება მუშ დუდშა ვემუჭარაფ. თიქ ყურადღება იეჰოვაშა გეგნიღ დო მთელ დიდება თის მეუძღვინ (მსაჯ. 8:22, 23). მუჭო შეულებნა უხუცესეფს, მიაჸუნან გედეონიშ მაგალითის? ჯგირ იჸუაფ, თქვა ხოლო დიდება იეჰოვას მეუძღვინათ თი ირფელშო, მუთ ჯგირო გიშქალენა (1 კორ. 4:6, 7). მაგალითო, მუჟამსით შხვეფ თიშე გოცქვანა, ნამდა გურაფაშ ჯგირ უნარეფ გიღნა, შეილებნა უწუათ, ნამდა თე ირფელქ ღორონთიშ სიტყვაშე დო თიშ ორგანიზაციაშე მეღებულ მითითებეფიშ ჭყოლოფათ შეგალებუეს. ჯგირ იჸუაფ, მინშა დეფიქრათ, მუჭო ოგურუანთ. თეშ ხომ ვეგშურს, ნამდა მთელ ყურადღება თქვან დუდშა გინოიღნა დო ვართ ხოლო იეჰოვაშ განდიდებაშა?! გუვარჩუათ ართ გამოცდილ უხუცესიშ, ტიმოთიშ, შემთხვევა. მუჟამსით თის უხუცესო მსახურება ახალ დოჭყაფილ აფუდ, განსაკუთრებულო უჸორდჷ საჯარო მოხსენებეფით გიშულა. თინა იჩიებ: „ჩქიმ თემას თიცალ შესავალს ვურთუდ დო თიცალ მაგალითეფ მოპჸუნდჷ, ნამდა და დო ჯიმალეფ ხშირას მოცქვანდეს. მარა სანარღოთ, თეშ გიშმალედ, ნამდა მოხსენებაშ დროს და დო ჯიმალეფს მთელ ყურადღება იეჰოვაშა დო ბიბლიაშა ვარინ, ჩქიმდა გინუღდეს“. ტიმოთიქ ქიმეხვად, ნამდა საჭირო რდჷ მუდგარენეფ დოთირუკო, ნამდა და დო ჯიმალეფქ ზედმეტო ვეგნიღესკო თიშა ყურადღება (იგავ. 27:21). თიქ ქოთ მიქცუ თაშ. მუ რდჷ შედეგ? თინა იჩიებ: „ასე და დო ჯიმალეფ მირაგადნა, მუჭო მეხვარ თინეფს ჩქიმ მოხსენებას მორჩქილაფირ აზრეფქ, გიორჯგინესკო პრობლემეფს დო სირთულეეფს დო უმოსო დეახლოვესკო იეჰოვას. თინეფიშ თე სიტყვეფს უმოს დიდ ხიოლ მოუღ ჩქიმდა, ვინემ თი ცქვაფას, ნამდგას წანეფიშ წოხოლე ბღებულენდჷ“.

9. მუჟამ გიმიცად გედეონიშ მორჩილებაქ დო გაბედულებაქ? (ქოძირით სურათ გალენ გვერდის).

⁹ თიშ უკულ, მუთ გედეონქ მსაჯულო დენიშნჷ, თიშ მორჩილებაქ დო გაბედულებაქ გიმიცად. თიქ იეჰოვაშე დავალება მიღჷ, ნამდა განადგურკო ბაალიშ სამსხვერპლო, ნამუთ  მუამუშის უღუდ. თენა ოშქურანჯ საქმე რდჷ (მსაჯ. 6:25, 26). უმოს გვიანო, მუჟამსით მიდიანელეფწკუმა ობრძოლებერო ჯარ გეკოშაყარუ, თიქ ჟირშა მიღჷ ღორონთშე მითითება, ნამდა ჯარიშკოჩეფიშ რაოდენობაშა მურკებუდკო (მსაჯ. 7:2—7). ხვალე თენა ვარინ, იეჰოვაქ თინა ხოლო უწუ, ნამდა ნტერიშ ბანაკის შქა სერს ქიგიანთხკო დუდის (მსაჯ. 7:9—11).

10. მუჟამ შილებე გიმიცადას უხუცესიშ მორჩილებაქ?

¹⁰ უხუცესეფ ოკო გიმირჩქინანდან მორჩილებას (იაკ. 3:17). მუჟამსით უხუცეს მორჩილებას გიმირჩქინანს, თის ადვილ აფჷ, მიაჸუნას წმინდა წერილეფშე დო ღორონთიშ ორგანიზაციაშე მეღებულ მითითებეფს, მუდგათ ჯგირ მაგალითის არზენს შხვეფს. მარა, ოკო ირაგადუას, ირიათო ადვილ ვა რე მორჩილებაშ გიმორჩქინა. მაგალთო, უხუცესის შილებე მანგარო გუჭირდას ორგანიზაციაშე მეღებულ ხემძღვანელობაშ მეჸუნაქ ვარდა ფიქრენდას, ქორენ დო ვარ თინა პრაქტიკულ დო გონივრულ. მინშა უხუცესეფ თიცალ დავალებას ღებულენა, მუდგაშ შესრულებათ შილებე გვალო ციხეს ხოლო ქუმოხვადან. მუჭო შეულებნა თინეფს, მიაჸუნან გედეონიშ მორჩილებაშ მაგალითის თეცალ სიტუაციეფს?

11. მუქ შილებე მეხვარას უხუცესეფს მორჩილებაშ გიმორჩქინას?

¹¹ მიღით ხემძღვანელობა დო მიაჸუნით თის. ღორონთიქ გედეონს უწუ, მუჭო ოკო განადგურკო ბაალიშ სამსხვერპლო, ნამუთ მუამუშის უღუდ, სო ოკო აკეთკო სამსხვერპლო იეჰოვაშო დო ნამ ცხოველეფ ოკო შეწირკო მსხვერპლო. გედეონს ვა გუკრიტიკებ თე მითითებეფ დო ირფელ ზუსტას თეშ გაკეთ, მუჭოთ იეჰოვაქ უწუ. ამდღა ხოლო იეჰოვაშ ორგანიზაციაშე უხუცესეფ ღებულენა წერილეფს, განცხადებეფს დო შხვადოშხვა მითითებეფს, ნამდა სულიერო დო ფიზიკურო თხილერ ვორდათ. ჩქი მანგარო ვაფასენთ, ნამდა თე ჯიმალეფ ართგურო მეჸუნა თეოკრატიულ მითითებეფს, მუდგას მთელ კრებაშო ჯგირობუა მოუღ (ფსალმ. 119:112).

12. მუჭო შეულებნა უხუცესეფს, მიაჸუნან ებრაელეფიშ 13:17-ის მოჩამილ რჩევას, მუჟამსით ორგანიზაციას მუდგარენ ითირუ?

¹² მზათ რდათ ცვლილებეფიშ ოკეთებელო. ქიგიფშინათ, ნამდა იეჰოვაშ მითითებათ გედეონქ ჯარიშკოჩეფიშ 99 პროცენტშე მეტ ჸუდეშა გოუტუ (მსაჯ. 7:8). შილებე თინა ფიქრენდკო: „ქორენო თეშ კეთება მართალო აუცილებერ? მაჸუნუნო თეს ჯგირ შედეგ?“. მარა არგამა რე, გედეონქ დემორჩილ იეჰოვას. ამდღა უხუცესეფ მეჸუნა თიშ მაგალითის დო მორჩილებას გიმირჩქინანა, მუჟამსით ორგანიზაცია მუდგარენეფს თირანს (წეკითხით ებრაელეფიშ 13:17). მაგალთო, 2014 წანას ხემძღვანელ საბჭოქ გინოჭყვიდ, ნამდა კრებეფს დარბაზეფიშ ოშენებელო მეტო ვაჸიდეს საჭირო ორგანიზაციაშე სესხიშ ეჭოფუა (2 კორ. 8:12—14). ამდღა დარბაზეფიშ მშენებლობა მთელ მსოფლიოშ კრებეფშე მეღებულ შესაწირავეფიშ საშვალებათ ხვადუ. თეშ ჭყოლოფათ, კრებაშ შეხვალამეფშო დო კონგრესეფშო დარბაზეფ უღნა თი კრებეფს, ნამდგას ადრე თეშ ოკეთებელო ფინანსეფ ვა უღდეს. მუჟამსით ართ ჯიმაქ, ხოსექ, თე ცვლილებაშ გურშენ ქიგეგ, ფიქრენდჷ, ნამდა თე მეთოდ ვა გამართლენდჷ დო მუნეფიშ ტერიტორიას ართ დარბაზიშ აშენება ხოლო ვეშიალებედეს. მუქ მეხვარ თის, დითირუკო აზროვნება დო ხუჯ ქუდუკინკო თე ცვლილებას? ხოსე იჩიებ: „იგავეფიშ 3:5, 6-ის ინოჭარილ სიტყვეფქ ქუგმოშინ, ნამდა ოკო მივენდიკო იეჰოვას. ჩქი მართალო სარკო  შედეგ მიღნა! ასე უმოს მეტ დარბაზის ვაშენენთ, ვინემ წოხოლე ვაშენენდით. მართალო ჯგირო იძირე, ნამდა ართიშ ნაძინ ეიოფშანს მაჟიაშ ნარკულობას“.

13. ა) მუშა რდჷ გედეონ დარწმუნებულ? ბ) მუჭო შეულებნა უხუცესეფს, მიაჸუნან თიშ მაგალითის? (ქოძირით სურათ).

¹³ გაბედულო შეასრულით იეჰოვაშ ნება. მუჟამსით გედეონქ იეჰოვაშე ოშქურანჯ დავალება მიღჷ, შიშიშ გრძნობაქ გურჩქინდჷ, მარა მიაჸუნ იეჰოვაშ მითითებას დო დემორჩილ თის (მსაჯ. 9:17). იეჰოვაქ დარწმუნ გედეონ, ნამდა ელუდირთუდ თე დავალებაშ შესრულებაშ დროს. ათეშენ, თის ჯერდჷ, ნამდა ზუსტას ღორონთიშ მოხვარათ შეიალებედ დეცვუკო თიშ ხალხ. თიცალ ქიანეფს, სოდეთ ჩქინ საქმიანობა ვარიებულ რე, უხუცესეფ მეჸუნა გედეონიშ მაგალითის. თიშ უმკუჯინუო, ნამდა თინეფ შილებე ოჭოფან, დაკითხვაშა მიდეჸონან, სამუშა მიოდინუან ვარდა ფიზიკურ შეურაცხყოფა მიორინუან, გაბედულებას გიმირჩქინანა დო ირფელს ორთნა, ნამდა კრებაშ შეხვალამეფქ ვა გოჩირთას დო მსახურებაქ ხოლო ვა გაჩერდას. c განსაკუთრებულო „დიდ გაჭირებაშ“ დროს დესაჭირებნა უხუცესეფს გაბედულებაშ გიმორჩქინა, ნამდა საფრთხეეფიშ უმკუჯინუო, მიაჸუნან იეჰოვაშე მეღებულ მითითებეფს. მაგალთო, შილებე თინეფქ კონკრეტულ მითითებეფ მიღან თიწკუმა დაკავშირებით, მუჭო გაცხადან კირცხცალ ცნობა დო მუ ოკო აკეთან, მუჟამსით გოგ მაგოგელ ღორონთიშ ხალხის დუდის ქიგიანთხუ (ეზეკ. 38:18; გამოცხ. 16:21).

14. მუჭო გიმიცად გედეონიშ გარზებაქ?

¹⁴ გედეონს მსაჯულო მსახურებაშ დროს ბრელ მუდგარენშა აჸუ ფიზიკურო გარზებელქ. მაგალთო, მუჟამსით შქა სერს მიდიანელეფქ ინტეს, თიქ ქეკათხოზ იზრეელიშ დიხაშე მალწყარ იორდანეშახ, ნამდგას საეგებიოთ, ირდიხაშე ტყა გოჸუნდჷ (მსაჯ. 7:22). ეცილუო თე დაბრკოლებაქ გედეონს? ვარ! შულადაშ უმკუჯინუო, თიქ დო მუშ 300 ჯარიშკოჩიქ გეგნოკვათეს მალწყარ დო ბოლოშა ქეკათხოზეს ნტებულ მიდიანელეფს. საბოლათ, ქეკაჭიშუეს დო ხეშა ქეშიჸოთეს თინეფ (მსაჯ. 8:4—12).

15. მუჟამ შილებე გიმიცადას უხუცესეფიშ გარზებაქ?

¹⁵ მინშა შილებე კრებაშე დო ოჯახშე ზრუნვაქ უხუცესეფ ემოციურო, ფიზიკურო დო გონებრივო გეგნოშულიდას. მუჭო მეხვარებ თე დროს თინეფს გედეონიშ მაგალით?

16, 17. მუქ მეხვარ გედეონს გარზებას დო მუშა ოკო რდან დარწმუნებულ უხუცესეფ? (ეს. 40:28—31; ქოძირით სურათ).

 ¹⁶ რჯერდან, იეჰოვა გუგამანგარენა. გედეონ დარწმუნებულ რდჷ, ნამდა იეჰოვა ძალას ქიმეჩანდჷ თის. ღორონთიქ ქოთ ქიმიქცუ თაშ (მსაჯ. 6:14, 34). ართშა გედეონქ დო თიშ ჯარიშკოჩეფქ კუჩხით ქეკათხოზეს ჟირ მიდიანელ მეფეს, მით საეგებიოთ, აქლემეფს გიმახედეს დო თეშ მინტებდეს (მსაჯ. 8:12, 21). მარა ღორონთიშ მოხვარათ, ისრაელეფქ ოჭოფეს თინეფ დო მიგეს ბრძოლა. თინეფცალო უხუცესეფს ხოლო შეულებნა მიენდან იეჰოვას, მით „დღას ვა შურდუ დო ძალა ველიებ“. იეჰოვა ხოლო საჭირო დროს ქიმეჩანს თინეფს ძალას (წეკითხით ესაია 40:28—31).

¹⁷ გუვარჩუათ ართ ჯიმაშ, მეთიუშ, შემთხვევა, მით საავადმყოფოეფწკუმა თანამშრომლობაშ კომიტეტის მსახურენს. მუ ოხვარ თის გარზებას, ნამდა შეასრულას მუშ დავალება? მეთიუ იჩიებ: „ჩქიმ დუდშა გიმოფცად ფილიპელეფიშ 4:13-ს ინოჭარილ სიტყვეფიშ ჭეშმარიტება. მინშა თეშ გინოფშურდუქ, ნამდა მუთუნიშ კეთებაშ დუდ ვა მიღჷ. თე დროს ბლოცულენქ დო იეჰოვას ვოხვეწუქ, გუმამანგარას ფიზიკურო დო ემოციურო, ნამდა შემალებუას ირნერო ქელუდირთე და დო ჯიმალეფს. ლოცვაშ უკულ ბგინაფლენქ, ნამდა იეჰოვა ძალეფით ემოფშანს დო მოხვარ გარზებას“. გედეონცალო, ჩქინ ართგურ უხუცესეფ ხოლო ქიანაშ სირთულეს ხვადუნა, მუჟამსით ღორონთიშ შხურშე ზრუნენა. ათეშენ, თინეფს ოკო არჩქილედან მუნეფიშ ფიზიკურ დო ემოციურ შესაძლებლობეფიშ ზღვარ დო დარწმუნებულ რდან, ნამდა იეჰოვა ქუმურჩქილუანს, მუჟამსით მოხვარას თხინა დო გარზებელო საჭირო ძალას ქიმეჩანს (ფსალმ. 116:1; ფილ. 2:13).

18. მუჭო შეულებნა უხუცესეფს მიაჸუნან გედეონიშ მაგალითის?

¹⁸ მუჭოთ ბძირით, გედეონიშ მაგალითშე ამდღა ხოლო ბრელ მუდგარენიშ გურაფა შეულებნა უხუცესეფს. თინეფქ მოკრძალება დო თანდაბლობა ოკო გიმირჩქინან დო თიშე მეტ საქმე ვეჭოფან მუნეფიშ დუდშა, ვინემ შეულებნა. თე თვისება თიმწკუმა ხოლო ოკო გიმირჩქინან, მუჟამსით შხვეფ აკრიტიკენა ვარდა ოცქვანა. თეს გეძინელ, მორჩილება დო გაბედულება ხოლო ოკო გიმირჩქინან, განსაკუთრებულო ამდღა, მუჟამსით თე ქვეყნიერებაშ აღსასრულ მონჭაფილ რე. დო ბოლოს, მუდგა სიტუაციას ვეშეხვადანინ, ოკო მიენდან იეჰოვას დო ჯერდან, ნამდა თინა გამანგარენს. მუშო ოკო რაგად, მანგარო მოხიოლნა, თეცალ მოხანდე ჭყიშეფ პჸუნან დო ვაფასენთ თინეფს (ფილ. 2:29).