1. მუ ოხვარ ღორონთიშ ხალხის, სირთულეეფიშ უმკუჯინუო, ართგურო გაგრძელას თიშ მსახურება?

 „ᲫᲜᲔᲚ გარზებელ დრო“ — თეშნერო ეჭარუნს ბიბლია ჩქინ დროს (2 ტიმ. 3:1). თი პრობლემეფწკუმა ართო, ნამუთ თე უბადო ქვეყნიერებას ირკოჩის უღჷ, იეჰოვაშ ხალხის თხოზინ დო წინააღმდეგობეფშა ხოლო აფჷ გარზებელ. თეცალ სირთულეეფიშ უმკუჯინუო, მუ მოხვარუნა, ართგურო გუვაგრძელათ იეჰოვაშ მსახურება? ართ-ართ არძაშე მთავარ თინა რე, ნამდა ბრელშა გიმომცადებუნა დო მიჩქუნა, იეჰოვა „ცოცხალ ღორონთ“ რენ (იერ. 10:10; 2 ტიმ. 1:12).

2. მუ მიჩქუნა იეჰოვაშ გურშენ დო მუჭო მამანგარენა თენა?

² იეჰოვა რეალურ პიროვნება რე. თინა ორწყე ჩქინ არძა სირთულეს დო მთელ გურით მოხვარუნა (2 მატ. 16:9; ფსალმ. 23:4). იეჰოვა „ცოცხალ ღორონთ“ რენ თენა დღას ვაგმოჭყორდუნან-და, მუდგა სირთულეს ვეშეფხვადათინ, ირფელს გეგნიბღანთ. ქობძირათ, მუჭო მოხვად თექ მეფე დავითიშ ცხოვრებას.

3. მუს გულისხმენდჷ დავით, მუჟამსით იეჰოვაშენ თქუ, ნამდა „ცოცხალ ღორონთ რე“?

³ დავით ჯგირო იჩინენდჷ იეჰოვას დო ბოლოშა ონდუდ თის. მუჟამსით მეფე საულ დო შხვა ნტერეფ თის ოჸვილარო თხოზუდეს, დავით ლოცულენდჷ დო იეჰოვას თხინდჷ მოხვარას (ფსალმ. 18:6). თიშ უკულ, მუთ ლოცვაშ პასუხ ქოძირ დო იეჰოვაშ მოხვარა გეგმოცად მუშ დუდშა, თიქ თქუ: „ცოცხალ ღორონთ რე იეჰოვა“ (ფსალმ. 18:46). თეთ დავითის ხვალე თინა ვა უთქუალ, ნამდა ჯერდჷ, ღორონთ არსებენდუნ. მუჭოთ ართ ნაშრომს ჭარჷ, თის თე სიტყვეფით თიშ რაგად ოკოდ, ნამდა იეჰოვა რე ჭეშმარიტ ღორონთ, ნამუთ ირიათო ოხვარ მუშ მსახურეფს. მეფე დავითის ჯერდჷ, ნამდა იეჰოვა ორწყედ თიშ  მდგომარეობას დო მზათ რდჷ, ქიმეხვარუკო. თენა არზენდჷ ძალას, გაგრძელუკო თიშ მსახურება (ფსალმ. 18:28, 29, 49).

4. მუშენ ოკო პწანდან, ნამდა იეჰოვა ცოცხალ ღორონთ რე?

⁴ მუჟამსით დარწმუნებულ იპჸით, ნამდა იეჰოვა ცოცხალ ღორონთ რე, შემალებენა უმოს მონდომათ დო ხიოლით ვემსახურათ თის. თეწკუმა ართო, თენა ქომუჩანა ძალას, ქუგურზათ ირნერ სირთულეს დო მუთუნს ვემეფჩანთ საშვალებას, თიწკუმა ურთიერთობა გილამლუან.

ᲪᲝᲪᲮᲐᲚ ᲦᲝᲠᲝᲜᲗ ᲒᲣᲒᲐᲛᲐᲜᲒᲐᲠᲔᲜᲐ

5. მუშენ ოკო ვა მოშქურუდან მუთუნნერ სირთულეშა? (ფილ. 4:13).

⁵ იეჰოვა ცოცხალ ღორონთ რე დო ირო მზათ რე ჩქინ მახვარებელონ თენა ქოფშუნან-და, ირნერ სირთულეს გეგნიბღანთ. იეჰოვას, ირფელიშშემალებე ღორონთის, ვა მახვარებუასინ ფერ პრობლემაქ მუქ ოკო მაშუან?! ათეშენ, ოკო ბჯერდან, ნამდა თის შეულებ ქომუჩან გარზებაშ ძალა (წეკითხით ფილიპელეფიშ 4:13). თეწკუმა ართო, მუჟამსით ვორწყეთ, მუჭო მოხვარუნა იეჰოვა ჭიჭე პრობლემეფიშ დროს, იბრწმუნებუთ, ნამდა თინა უმოს დიდ სირთულეეფს ხოლო გეგნმოღალაფუანა. თაშ ნამდა, მუთუნნერ სირთულეშა ოკო ვა მოშქურუდან.

6. ნამ შემთხვევეფქ გაუმანგარ დავითის იეჰოვაშ ნდობა?

⁶ ქიგიფშინათ დავითიშ ცხოვრებას მოხვალამირ ჟირ შემთხვევა, ნამდგაქ თის იეჰოვაშ ნდობა გაუმანგარ. მუჟამსით თინა ბაღანაბოშ რდჷ დო მუამუშიშ შხურს ჭყიშანდჷ, ართშა თუნთიქ დო მაჟიაშა ლომქ ქიგიანთხჷ ოჭყიშალს დო შხურ ქიხვამილუ. ჟირხოლო შემთხვევას დავითიქ უშქურანჯუო გამათხოზ მხეცეფს დო დერსხჷ შხურ. მარა თის თე ირფელ მუშ დუდშა ვემუჭარაფ; დავითის არჩქილედ, ნამდა იეჰოვაშ უმშო მუთუნ ვეგშალედ (1 სამ. 17:34—37). თის დღას ვა გოჭყოლად, მუჭო მეხვარ თე შემთხვევეფს იეჰოვაქ. თეშე ფიქრიქ დავითის გაუმანგარ იმენდ, ნამდა მომავალს ხოლო, მუდგაქ ვა მოხვადუკონ, ცოცხალ ღორონთ ძალას ქიმეჩანდ.

7. მუშა აფუდ დავითის ყურადღება გინოღალირ დო მუჭო მეხვარ თექ გოლიათშა გერჯგინას?

⁷ ჭიჭე ხანშა, მუჟამსით დიო ხოლო ბაღანაბოშ რდჷ, დავითიქ თი ადგილშა ქიმერთჷ, სოდეთ ისრაელიშ ჯარ ფილისტიმელეფიშ წინააღმდეგ ობრძოლებერო რდჷ დაბანაკებულ. მეულირს, თიქ ქოძირ, ნამდა ისრაელეფ შიშით ღურათებულეფ რდესჷ, მუშენდა ფილისტიმელ გოლიათის დურცქინაფ თინეფშა დო უთქუალ: „ამდღა ქიგვაძიცანქ ისრაელიშ ლაშქარს!“ (1 სამ. 17:10, 11). ისრაელეფქ მთელ ყურადღება გოლიათიშ სიდიდაშა დო თიშ სიტყვეფშა გეგნიღეს, მუდგაშ გურშენ შიშიქ ქინაჭკირეს (1 სამ. 17:24, 25). მარა თინეფიშ გინაწონს, დავითიქ გვალო შხვა მუდგარენშა გეგნიღ ყურადღება. თის არჩქილედ, ნამდა გოლიათ ისრაელეფს ვარინ, „ცოცხალ ღორონთის“ გაძიცანდჷ დო თიშ წინააღმდეგ გიშეშ (1 სამ. 17:26). დავითის იეჰოვაშ მოხვარაშ იმენდ უღუდ. თის ჯერდჷ, ნამდა თი ღორონთ, ნამდგაქ ლომშა დო თუნთშა გიორჯგინაფუ, თე გოლიათიშ ხეშე ხოლო დერსხენდ. ათეშენ, გაბედულო გეგშართჷ თიშ წინააღმდეგ დო ღორონთიშ მოხვარათ, ქოთ გიორჯგინ (1 სამ. 17:45—51).

8. მუ გამიმანგარენა იეჰოვაშ მიმართ ნდობას სირთულეეფიშ დროს? (ქოძირით სურათ).

⁸ დავითცალო ჩქი ხოლო შემალებენა გივორჯგინათ ირნერ სირთულეს, მუჟამსით ვეგიპჭყოლიდუანთ, ნამდა ცოცხალ ღორონთ მზათ რე ჩქინ მახვარებელო (ფსალმ. 118:6). იეჰოვაშ მიმართ ნდობაშ გამანგარებას მიმეხვარებუნა თი ირფელშე დაფიქრება, მუთ ღორონთიქ ჯვეშ დროს მუშ მსახურეფშო აკეთ. წეკითხით თი ბიბლიურ მონაკვეთეფ, სოვრეშეთ ჯგირო იძირე, მუჭო მეხვარ იეჰოვაქ მუშ ართგურ მსახურეფს სირთულეეფიშ გინოღალას (ეს. 37:17, 33—37). თეს გეძინელ, ქოძირით ჩქინ ვებგვერდის მოჩამილ თანამედროვე დროს მახორუ და დო ჯიმალეფიშ შემთხვევეფ, მიდგას იეჰოვაქ სირთულეეფიშ დროს  ალუდირთჷ. ღორონთიშ მიმართ ნდობაშ გამანგარებას თიშ გოშინა ხოლო მიგეხვარებუნა, მუჭო ალაიდირთეს თიქ, მუჟამსით ცხოვრებას რთულ პერიოდ გიღუდეს. შილებე ვა ნორღვენა თიცალ შემთხვევა, მუჟამსით იეჰოვაქ თიცალ სერიოზულ პრობლემაშე გიშაიჸონეს, მუნერით ლომიშ დო თუნთიშ ჸვილუაშ მოტოლუა იჸიდ. თაშ რდასინ ხოლო, იეჰოვაშ ხე თქვან ცხოვრებას ბრელშა გაჸინა ძირაფილ. ხვალე თინა ქობაღ, ნამდა მუშ დუდ გუგოჩინებაფუეს დო მეგობარო მეიღეს (იოან. 6:44). ზუსტას იეჰოვაშ მოხვარაშ ჭყოლოფა რე, ნამდა ამდღარშახ ჭეშმარიტებას რეთჷ. ჯგირ იჸუაფ, ღორონთის ქოთხუათ, ქუგგოშინან თი შემთხვევეფ, მუჟამსით თიქ უპასუხ თქვან ლოცვეფს, მიგეხვარეს, მუჟამსით თენა მანგარო გოსაჭირუდეს დო გიშაიჸონეს რთულ სიტუაციაშე. თე ირფელშე დაფიქრებაშ უკულ, უმოსო რჯერდან იჸი, ნამდა იეჰოვას თქვანდა აიშახ ქალურინუნ-და, ანწ ხოლო ვემგოტენა.

9. მუ ოკო ფშუდან, მუჟამსით სირთულეეფს ფხვადუთ? (იგავ. 27:11).

⁹ იეჰოვა ჩქინო ცოცხალ ღორონთ ქორენ-და, სირთულეეფიშ მიმართ სწორ დამოკიდებულება მაღვენუნა. თენა ნიშნენს, ნამდა ჩქინ სირთულეეფს თეშ უჯინედათ იჸი, მუჭოთ იეჰოვა დო სატანა შქას წუმოჭკირილ საკამათო საკითხიშ ნაწილს. სატანა მაბრალუაფუნა, ნამდა სირთულეეფიშ დროს ოჭიშის ქურთინუანთ იეჰოვას დო მივოტენთ თიშ მსახურებას (იობ. 1:10, 11; წეკითხით იგავეფიშ 27:11). მარა, მუჟამსით სირთულეეფიშ დროს ხოლო იეჰოვაშ ართგურეფ ფსქიდუთ, ვოძირანთ, ნამდა მანგარო მიჸორა ჩქინ ღორონთ დო ვამტკიცენთ, ნამდა სატანა მეტყურე რე. ათეშენ, ასე მთავრობაშე წინააღმდეგობას ქოხვადუთ, ეკონომიკურო ქოიჭირა, მსახურებაშ დროს ვაირჩქილენა ვარდა შხვანერ სირთულეეფ ქოიღუნან-და, რშუდან, თე სირთულეეფ საშვალებას გარზენა, გურ გაუხარათ იეჰოვას. ვართ თიქ გუგოჭყორდან, ნამდა ღორონთ მუთუნით ვეშეიხვამილუანა თიცალ მუდგარენს, მუდგაშ გარზება ვეშგალებენა (1 კორ. 10:13). თინა აუცილებერო ქიმერჩანა ძალას სირთულეეფიშ გარზებელო.

ᲪᲝᲪᲮᲐᲚ ᲦᲝᲠᲝᲜᲗ ᲓᲣᲒᲐᲯᲘᲚᲓᲝᲕᲔᲜᲐ

10. მუჭო დაჯილდოვენს იეჰოვა მუშ ართგურ მსახურეფს?

¹⁰ იეჰოვა ირო აჯილდოვენს მუშ ართგურ მსახურეფს (ებრ. 11:6). თინა ამდღა ხოლო მარზენა სიმშვიდეს დო მოხვარუნა, ბედნერეფ  ვორდათ, დო მომავალს მარადიულ სიცოცხლეს ქომუჩანა. შემლებუნა ბოლოშა მივენდათ იეჰოვას დო ბჯერდან, ნამდა აუცილებერო დუმაჯილდოვენა, მუშენდა ქოთ მანგარო ოკო თეშ კეთება დო ქოთ ძალა უღჷ თეშო. თეშ რჩქინა მოხვარუნა, ულირს მახორუ ღორონთიშ ართგურ მსახურეფცალო, დუდ ვა დაბზოგათ თიშ მსახურებას. ზუსტას თაშ ომსახურუდ იეჰოვას პირველ საუკუნეს მახორუ ტიმოთე (ებრ. 6:10—12).

11. მუშენ ვა ზოგენდჷ დუდის ტიმოთე კრებაშო? (1 ტიმ. 4:10).

¹¹ წეკითხით 1 ტიმოთეშ 4:10. ტიმოთე ბოლოშა ონდუდ ცოცხალ ღორონთის დო ჯერდჷ, ნამდა თინა დაჯილდოვენდ. ზუსტას თენა ოხვარუდ, დუდგინოდვალირო იხანდუკო იეჰოვაშ საქმეს. მუ ოვალუდ ტიმოთეს? ქოფშუნა, პავლექ თის ელუჩ, გეუჯგუშუკო მუჭოთ მაქადაგებელქ დო მასწავლებერქ კრებას. თეწკუმა ართო, თინა ჯგირ მაგალით ოკო ჸოფედუკო თანაქრისტიანეფშო, ჭიჭე დო დიდშო. მინშა ძნელ საქმე ხოლო აფუდ ოკეთებელ, მაგალთო, ნამთინეშა მკაცრ რჩევა აფუდ მიოჩამალ დო თენა ჸოროფათ ოკო გაკეთუკო (1 ტიმ. 4:11—16; 2 ტიმ. 4:1—5). ტიმოთეს თიცალ საქმეეფ ხოლო აჸიდ ოკეთებელ, ნამდგას დღას მითინ ვა ძირუნდ დო ათეშენ ვართ მითინ უწინდ მადლობას. მარა თის ჯერდჷ, ნამდა იეჰოვა ორწყედ დო დაჯილდოვენდ (რომ. 2:6, 7).

12. მუ ოხვარ უხუცესეფს, შურ დო გურით შეასრულან მუნეფიშ დავალებეფ? (ქოძირით სურათ).

¹² ტიმოთეცალო ამდღარ უხუცესეფს ხოლო შეულებუნა ჯერდან, ნამდა იეჰოვა ორწყე დო მანგარო აფასენს თინეფიშ კეთებულ საქმეეფს. უხუცესეფ ჭყიშანა დო ოგურუანა კრებას დო ქადაგენა. ნამთინე უხუცესის შხვა დავალებეფიშ შესრულება ხოლო უხვადუ. მაგალთო, ნამთინე ჯიმა სამშენებლო პროექტეფს ვარდა შხვადოშხვა უბედრობათ დაზარალებურეფიშ მოხვარას მონაწილენს. ნამთინე ხოლო პაციენტიშ მონახულებაშ ჯგუფის ვარდა საავადმყოფოეფწკუმა თანამშრომლობაშ კომიტეტის მსახურენს. უხუცესეფს არჩქილენა, ნამდა ქრისტიანულ კრება იეჰოვაშ რე დო ვართ ხოლო კოჩიშ. ზუსტას თენა ოხვარ თინეფს, შურ დო გურით შეასრულან მუნეფიშ დავალებეფ დო დარწმუნებულეფ რდანჷ, ნამდა იეჰოვა აუცილებერო დაჯილდოვენს მუნეფიშ ჯგირ საქმეეფშენ (კოლ. 3:23, 24).

13. მუჭო უჯინე იეჰოვა თი ირფელს, მუდგას თიშო ვორთუთ?

 ¹³ მუშო ოკო რაგად, უხუცესეფ არძა ვეპჸუაფუთ, მარა იეჰოვაშო მუდგარენიშ კეთება არძას შემლებუნა. ჩქინ მოჸოროფე ღორონთის მანგარო ოხიოლ, მუჟამსით ნამ შემლებუნან ირფელს ვორთუთ თიშ მსახურებაშო. თიშ თოლს ვამკაკორდუ ჩქინ კეთებულ შესაწირავეფ, გვალო აკაბცხა რდასინ ხოლო. თის გურ ეხარებ, მუჟამსით ორწყე, ნამდა ირნერო ვოცადუთ, ვორჯგინათ მორდებუანობას დო ქუგვაბედათ კრებას ხეშ ეკინა დო კომენტარიშ რაგად. თის თიმწკუმა ხოლო ხიოლით აფშაფ გურ, მუჟამსით იპჭყოლიდუანთ წყენას დო მთელ გურით ვაპატიენთ შხვეფს. შილებე მინშა გოკონან თისხი ვა გაკეთებედან იეჰოვაშ მსახურებას, მარა რჯერდან, ნამდა თინა მთელ გურით აფასენს, მუდგას ორთუთ. იეჰოვას მანგარო უჸორთ დო აუცილებერო დუგაჯილდოვენა (ლუკ. 21:1—4).

ᲓᲦᲐᲡ ᲕᲔᲩᲔᲗᲮᲣᲐᲗ ᲪᲝᲪᲮᲐᲚ ᲦᲝᲠᲝᲜᲗᲘᲡ

14. მუჭო მოხვარუნა იეჰოვაწკუმა ხოლოშიან ურთიერთობა, ქუდოფსქიდათ ართგურეფქ? (ქოძირით სურათ).

¹⁴ იეჰოვა ჩქინო რეალურ პიროვნება ქიჸინ-და, უმოს ადვილ მაჸინა, სწორას მიფქცუათ. ზუსტას თაშ მოხვად იოსებიშ შემთხვევას. თინა ჯგირო იჩინენდჷ იეჰოვას დო ვაკოდ, მუთუნ თიცალ გაკეთუკო, მუთ გურს უწყუნუანდჷ თის. თეშ ჭყოლოფათ თიქ ვეიაჸუნ ცდუნებას (დაბ. 39:9). იეჰოვა ჩქინო ხოლო რეალურ პიროვნება ქორდასინ, საჭირო რე, დრო გეგმურთათ ლოცვას დო თიშ სიტყვაშ გიმორკვიებას. თენა უმოსო დუმაახლოვენა თიწკუმა. იოსებცალო, ჩქი ხოლო იეჰოვაწკუმა ხოლოშიან ურთიერთობა ქუმაღვენუნან-და, ვა მოკოდან იჸი, გუვაკეთათ თიცალ მუდგაინ, მუთ გურს უწყუნუანს თის (იაკ. 4:8).

15. მუს ბგურაფლენთ ისრაელეფიშ შემთხვევაშე? (ებრ. 3:12).

¹⁵ თიცალ კოჩიქ, ნამუთ იჭყოლიდუანს, ნამდა იეჰოვა ცოცხალ ღორონთ რე, გვალო ადვილო შილებე ოჭიშ ქურთინუას თის. თენა ჯგირო იძირე ისრაელეფიშ შემთხვევაშე. მართალ რე, თინეფს ჯერდეს იეჰოვაშ არსებობაშ, მარა მუჟამსით უდაბნოს რდესჷ, თიშა გემშეღეს ეჭვ, ქიზრუნენდ დო ვარ იეჰოვა თინეფიშ საჭიროებეფშე დო იჩიებუდეს, „ქორენიაო იეჰოვა ჩქინ შქას“ (გამ. 17:2, 7). თე ირფელქ თინეფ დაუმორჩილებლობაშა ქიმიჸუნ. თინეფიშ შემთხვევა ჯგირო მოძირანა, მუ გლახა შედეგეფ მაჸუნუ, მუჟამსით გიპჭყოლიდუანთ, ნამდა იეჰოვა  რეალურ პიროვნება რე. მუშო ოკო რაგად, ნამთინს ვა მოკონა, მიფქცუათ თე ისრაელეფცალო (წეკითხით ებრაელეფიშ 3:12).

16. მუქ შილებე დასუსტას ჩქინ რწმენა?

¹⁶ თე ქვეყნიერებას ვა რე ადვილ, იეჰოვაშ ართგურეფქ ქუდოფსქიდათ. ბრელს ვა ჯერსჷ ღორონთ ქოარსებენსინ დო თეშ იძირე, ნამდა თინეფ, მით ვამორჩილუნა იეჰოვაშ ნორმეფს, გვალო ჯგირო ცხოვრენა. მართალ რე, ჩქი ბჯერა იეჰოვა არსებენსინ, მარა თე ირფელიშ მიმაჯინუს შილებე რწმენაქ დემესუსტან დო ეჭვ გემშებღათ თიშა, მართალო ქიმმეხვარებუნა დო ვარ იეჰოვა. თექ აღოლ 73-ა ფსალმუნიშ მაჭარალს ხოლო. თინა ორწყედ, მუ ბედნერო ცხოვრენდჷ თი კათა, მით ვემეჸუნდჷ ღორონთიშ კანონეფს. ათეშენ, თიშე ქიდიჭყჷ ფიქრ, შურო ქოღირუდ დო ვარ ღორონთიშ მსახურება (ფსალმ. 73:11—13).

17. მუ მიმეხვარებუნა, ვა ვოდინუათ ხოლოშიან ურთიერთობა იეჰოვაწკუმა?

¹⁷ მარა ფსალმუნმაბირექ დითირუ აზროვნება. მუქ მეხვარ თის? თინა ფიქრენდჷ, მუ აღოლედ თი კათას, მით იჭყოლიდუანს იეჰოვას დო ოდინუანს თიშ ნდობას (ფსალმ. 73:18, 19, 27). თის თი კურთხევეფშე ფიქრიქ ხოლო მეხვარ, მუთ ღორონთიშ მსახურებას მოუღ (ფსალმ. 73:24). ჩქი ხოლო შემლებუნა ქიგიფშინათ, მუ კურთხევეფ მუჩეს იეჰოვაქ დო დეფიფქრათ, მუნერ იჸუაფუდ ჩქინ ცხოვრება თიშ მსახურეფ ვა ვორდითკონ. თე ირფელიშ ჭყოლოფათ, შემალებენა ბოლოშა ღორონთიშ ართგურეფქ ქუდოფსქიდათ დო ფსალმუნმაბირეცალო ფთქუათ: „ჩქიმო ჯგირ რე ღორონთწკუმა დაახლოება“ (ფსალმ. 73:28).

18. მუშენ ვა მიღუნა შიშიშ მიზეზ?

¹⁸ თე ბოლო დღალეფს ჩქინ ცხოვრებას მუდგაქ ვა მოხვადასინ, შემალებენა გივორჯგინათ ირნერ სირთულეს, მუშენდა „ცოცხალ დო ნამდვილ ღორონთიშ“ მსახურეფ ვორეთ (1 თეს. 1:9). ჩქინ ღორონთ რეალურ პიროვნება რე დო ირო ოხვარ მუშ ხალხის. თის ულირს დღას ვემუტებ მუშ მსახურეფ დო ამდღა ჩქი ხოლო ალამრენა. წოხოლე „დიდ გაჭირება“ მელუნა, მარა თინა ხვალე ვა მაჸინა გინაღალარ, იეჰოვა იჸუაფ ჩქინწკუმა (ეს. 41:10). არძას თამამას ქომთქუალუდან: „იეჰოვა ალამრე, ვა მაშქურინე“ (ებრ. 13:5, 6).