1, 2. მუშ პატი მიღუნა ღორონთიშ ართგურ მსახურეფს?

 ᲛᲘ ᲠᲔ იეჰოვა სქანო? ალბათ თქუანქ: იეჰოვა ჩქიმ ღორონთ, მუმა დო მეგობარ რე. შილებე ჩქინ ძვირფას ღორონთის შხვა ბრელ სიტყვა ხოლო მეურინუე, მარა დღას ქოიფიქრებუნო, ნამდა იეჰოვა სქანო მენძელ ხოლო რე დო სი თიწკუმა სტუმარო რექჷ?

² მეფე დავითიქ იეჰოვა მენძელს შეადარ დო თიშ მსახურეფ — სტუმარეფს. თიქ თქუ: „იეჰოვა, მი მოურს სტუმარო სქან კარავშა? მი დემკვიდრებ სქან წმინდა გვალას?“ (ფსალმ. 15:1). თე მუხლშე ვორწყეთ, ნამდა შემლებუნა სტუმარო მეფრთათ იეჰოვაშ კარავშა, შხვანერო ქოფთქუათინ, თიშ მეგობრეფ ვორდათ. მუშმაშხვა პატი რე, ვარო?!

ᲘᲔᲰᲝᲕᲐᲡ ᲝᲙᲝ, ᲗᲘᲨ ᲡᲢᲣᲛᲐᲠᲔᲤ ᲕᲝᲠᲓᲐᲗ

3. მი რდჷ იეჰოვაშ პირველ სტუმარ დო მუნერ ურთიერთობა უღუდეს თის დო იეჰოვას?

³ ონდო ირფელიშ გოჭყაფას დიჭყანდუკო, იეჰოვა ხვალე რდჷ, მარა უკულ, თიქ მუშ სქუა გაჭყჷ დო თეშნერო, სიმბოლურ კარავშა პირველ სტუმარ ქიმიჸუნ. მუჭოთ ბიბლიაშე ბგებულენთ, ქოთ სტუმარ დო ქოთ მენძელ ხარენდჷ თე ურთიერთობათ (იგავ. 8:30).

4. დროშ ულაწკუმა ართო ხოლო მი დაპატიჟ იეჰოვაქ მუშ კარავშა?

⁴ უკულ, მუჟამსით იეჰოვაქ ანგელოზეფ გაჭყჷ, თინეფ ხოლო ქუდაპატიჟ მუშ კარავშა. თე სულიერ ქმნილებეფს ბიბლია ღორონთიშ სქუალეფო მიშინუანს დო იჩიებ, ნამდა თინეფ მანგარ ბედნერეფ რენა იეჰოვაწკუმა რინათ (იობ. 38:7; დან. 7:10). მუდგარენ პერიოდის იეჰოვაშ სტუმარეფ ხვალე თინეფ რდესჷ, მით ზეცას თიწკუმა ართო  კვიდრენდეს. მარა ადამიანეფიშ გოჭყაფაშ უკულ, იეჰოვაშ კარავშა სტუმარო მეულაშ საშვალებაქ თინეფს ხოლო ქიმიაჩეს. ღორონთიშ სტუმარეფ შქას რდესჷ თიშ ართგურ მსახურეფ, მაგალთო ენოქ, ნოე, აბრაამ დო იობ. ბიბლიაშე იძირე, ნამდა თინეფ იეჰოვაშ მეგობრეფ რდესჷ, მუშენდა ირიათო ომორჩილუდეს ჭეშმარიტ ღორონთის (დაბ. 5:24; 6:9; იობ. 29:4; ეს. 41:8).

5. მუს ბგებულენთ ეზეკიელიშ 37:26, 27-ის ინოჭარილ წინასწარმეტყველებაშე?

⁵ თეშ უკულ ხოლო, საუკუნეეფიშ დინახალე, იეჰოვა აგრძელენდჷ ადამიანეფიშ სტუმარო დაპატიჟებას მუშ კარავშა. მაგალთო, ეზეკიელიშ წინასწარმეტყველებაშე ვორწყეთ, ნამდა ღორონთის მანგარო ოკო, მუშ მსახურეფს თიწკუმა ხოლოშიან ურთიერთობა უღუდან (წეკითხით ეზეკიელიშ 37:26, 27). დეკვირით, იეჰოვა თაქ იჩიებ, ნამდა „მშვიდობაშ შეთანხმებას“ ქუდოდვანს თინეფწკუმა. თე წინასწარმეტყველება თი დროშ გურშენ რე რაგადებულ, მუჟამსით ქოთ ზეცას დო ქოთ დედამიწას ცხოვრებაშ იმენდ უღუნან ფერ ღორონთიშ მსახურეფ ართო იჸუაფუდეს იეჰოვაშ კარავს, მუჭოთ „ართ ოჭყიშალ“ (იოან. 10:16). თე წინასწარმეტყველება ამდღა ჩქინ თოლიშ წოხოლე ისრულებ.

ᲦᲝᲠᲝᲜᲗ ᲖᲠᲣᲜᲔᲜᲡ ᲩᲥᲘᲜᲓᲔ, ᲡᲝᲓᲒᲐ ᲕᲐ ᲕᲝᲠᲓᲐᲗ

6. მუჭო გინირთუ ადამიან იეჰოვაშ სტუმარო დო სო რე იეჰოვაშ კარავ?

⁶ ბიბლიურ დროს კარავს მახორუ კოჩის შეულებუდ თექ გემოშა მისვანჯუკო დო გლახა ამინდიშ დროს ხოლო თხილერ რდუკო. კარავშა მეულირ სტუმარს ხოლო უჩქუდ, ნამდა მენძელ აუცილებერო ყურადღებას მიაქციენდ დო ქიზრუნენდ თიშე. მუშ რაგად შილებე ჩქინდე? მუჟამსით დუდის უძღვინენთ იეჰოვას, ჩქი ხოლო სტუმარო მეურთ თიშ კარავშა (ფსალმ. 61:4). შედეგო, ხვეიანო მიღუნა სულიერ საზრდო დო ფხარენთ თინეფწკუმა ურთიერთობათ, მით ჩქინწკუმა ართო რენა სტუმარო იეჰოვაშ კარავს. საინტერესო რე, ნამდა თე სიმბოლურ კარავ ხვალე ართ კონკრეტულ ადგილს ვარინ, ირდიხას რე, სოდეთ ღორონთიშ ართგურ მსახურეფ რენა (გამოცხ. 21:3). თეს ჩქინ თოლო ვორწყეთ, მუჟამსით შხვა ქიანაშა მეურთ, მაგალთო, სპეციალურ კონგრესშა დასწრებელო, დო შეფხვადუთ ძვირფას და დო ჯიმალეფს, მიდგაშათ ღორონთიშ კარავს რინას ბედნერობა მოუღ.

7. მუშენ შემლებუნა ფთქუათ, ნამდა ღორონთიშ ართგურ მსახურეფ ღურაშ უმკუჯინუო, კინ იეჰოვაშ კარავს რენა სტუმარო? (ქოძირით სურათ).

⁷ მუშ რაგად შილებე ღორონთიშ თი  ართგურ მსახურეფშე, მით ღურელეფ რენა? კინ ქორენანო თინეფ იეჰოვაშ სტუმარეფ? ქო! თეს თიშენ იფჩიებუთ, ნამდა, მუჭოთ მიჩქუნა, თინეფ იეჰოვაშ მეხსიერებას კინ ცოცხალეფ რენა. თე საკითხიშ გურშენ იესო იჩიებ: «ღურელეფ გეთელებუნან, თენა მოსექ ხოლო თქუ, მუჟამსით ძიგირამ ბართვიშ გურშენ ჭარჷ — თიქ იეჰოვას „აბრაამიშ, ისაკიშ დო იაკობიშ ღორონთ“ დუძახ. თინა ღურელეფიშ ვარინ, ცოცხალეფიშ ღორონთ რე, მუშენდა თინეფ თიშო ცოცხალეფ რენა» (ლუკ. 20:37, 38).

ᲓᲘᲓ ᲞᲐᲢᲘᲬᲙᲣᲛᲐ ᲐᲠᲗᲝ ᲡᲔᲠᲘᲝᲖᲣᲚ ᲞᲐᲡᲣᲮᲘᲨᲛᲒᲔᲑᲚᲝᲑᲐ

8. მუ ჯგირობუა მოუღ იეჰოვაშ კარავს რინას?

⁸ მუჭოთ კარავს შილებედ კოჩიქ მისვანჯუკო დო გლახა ამინდიშ დროს დუდ ქექთუფორუკო, თეშ იეჰოვაშ კარავშა მეულირ სტუმარეფ ხოლო სულიერო თხილერეფ რენა დო მომავალიშ იმენდ უღუნა. თაშ რე, იეჰოვაწკუმა ხოლოს ქიპჸით-და, სატანას დღას ვა დაშებე ჩქინდა თიცალ მუთუნ, მუთ ჩქინ ღორონთის ვეგშასწორებე (ფსალმ. 31:23; 1 იოან. 3:8). იეჰოვა ახალ ქვეყნიერებას ხოლო გაგრძელენს მუშ ართგურ მსახურეფიშ თხილუას. მარა თექ ხვალე სულიერო ვარინ, ფიზიკურო ხოლო თხილერ იპჸუაფუთ, მუშენდა ბიბლიაშე ბგებულენთ, ნამდა „მეტო ვეჸუაფ ღურა“ (გამოცხ. 21:4).

9. მუს თხულენს იეჰოვა მუშ სტუმარეფშე?

⁹ მართალო მანგარ დიდ პატი რე, სტუმარო ვორდათ იეჰოვაშ კარავს, შხვანერო ქოფთქუათინ, მიღუდან თიწკუმა ხოლოშიან ურთიერთობა. მარა მუ ოკო ვაკეთათ, ნამდა თეცალ ურთიერთობაშ საშვალება მარადიულო ქომღუდან? მაგალთო, მიდგაინშა სტუმარო ქიმიშათინ, ალბათ თეშ მიქციებუდით, მუჭოთ მენძელს უსხუნ. შილებე თის ოკოდას, სტუმარეფქ მინულაშახ კუჩხშა გემინწყან. ალბათ, თქვა ხოლო თაშ გაკეთენდით. თეშნერო, იეჰოვაწკუმა ჩქინ ურთიერთობაქ ირიათო გეგრძელასინ ქუმოკონან-და, ოკო ქიგებგათ, მუს თხულენს ჩქინ მენძელ სტუმარეფშე. იეჰოვაშ მიმართ ჸოროფა გინმოჭყვიდირაფუანა, ნამ შემლებუნან ირფელ გუვაკეთათ, ნამდა „ირნერო გურს მოუჰამუათ თის“ (კოლ. 1:10). მართალ რე, იეჰოვა ჩქინ მეგობარ რე, მარა ოკო ვაგმოჭყორდან, ნამდა თინა ჩქინ ღორონთ დო მუმა ხოლო რე. ათეშენ, თიშ პატიცემა ოკო მიღუდან (ფსალმ. 25:14). მოკონა, მოკრძალებურო გილაფრთათ ჩქინ ღორონთიშ წოხოლე, ათეშენ, ირიათო ოკო ფშუდან, მი რე თინა დო თიშ რიდ მიღუდან (მიქ. 6:8). თენა მიმეხვარებუნა, მუთუნ თიცალ ვა ვაკეთათ, მუთ გურს უწყუნუანდ თის.

ᲘᲔᲰᲝᲕᲐ ᲕᲔᲒᲛᲘᲠᲩᲥᲘᲜᲐᲜᲓᲷ ᲒᲘᲨᲐᲙᲔᲠᲫᲐᲤᲐᲡ ᲘᲡᲠᲐᲔᲚᲔᲤᲬᲙᲣᲛᲐ

10, 11. მუჭო ოძირუ იეჰოვაქ სინაიშ უდაბნოს, ნამდა გიშაკერძაფას ვეგმირჩქინანდჷ ისრაელეფწკუმა?

¹⁰ იეჰოვა ართიანშე ვეგშაგორუნს მუშ სტუმარეფს (რომ. 2:11). თექ ჯგირო ქიძირ თევრეშე, მუჭო ოქცუდ თინა ისრაელეფს სინაიშ უდაბნოს.

¹¹ მუშ ხალხიშ ეგვიპტეშ მონობაშე დარსხებაშ უკულ, იეჰოვაქ კარავს მსახურებაშო მღვდელეფ დანიშნჷ. შხვა ლევიანეფს კარავწკუმა დაკავშირებულ შხვა საქმეეფქ ქიდევალეს. საინტერესო რე, იეჰოვა უმოსო ზრუნენდუო თინეფშე, მით კარავს მსახურენდჷ ვარდა თინეფშე, მით თიწკუმა უმოს ხოლოს ცხოვრენდჷ? ვარ, მუშო ოკო რაგად; იეჰოვას კოჩიშ გიშაგორუა ვა უჩქჷ.

12. ნამ დეტალეფშე იძირე, ნამდა იეჰოვას ართიანშე ვა აფუდ გიშაგორილ ისრაელეფ? (გამ. 40:38; ქოძირით სურათ).

¹² არძა ისრაელს ართნერო უღუდ იეჰოვაწკუმა ურთიერთობაშ საშვალება, თიშ უმკუჯინუო, მუსხით ხოლოს ცხოვრენდჷ კარავწკუმა ვარდა მუ დანიშნულებას ასრულენდჷ. მაგალთო, იეჰოვაქ თეშ გაკეთ,  ნამდა მუნაფაშ სვეტის დო დაჩხირიშ სვეტის, ნამუთ კარავიშ ჟი რდჷ, მთელ ერ ორწყედუკო (წეკითხით გამოსვლაშ 40:38). მუჟამსით მუნაფა ეიკინანდჷ დო მოძრაობას დაჭყანდჷ, თინეფს ხოლო, მით იეჰოვაშ კარავშე არძაშ უმოს შორს რდესჷ დაბანაკებულ, შეულებუდეს ძირესკო თე ნიშან, გაკანწყისკო მუნეფიშ ნივთეფ, დოხისკო კარავ დო ქეკაჸუნესკო შხვეფს (რიცხ. 9:15—23). თეწკუმა ართო, არძას შეულებუდ გეგონუკო ჟირ ვარჩხილიშ საყვირიშ ხონარ, ნამუთ არძას მიოხვამლუანდჷ, ნამდა ოკო ეყარესკო (რიცხ. 10:2). მუჭოთ ვორწყეთ, კარავწკუმა ხოლოს ცხოვრება ვა ნიშნენდჷ, ნამდა მიდგაინს იეჰოვაწკუმა შხვეფშე უმოს ხოლოშიან ურთიერთობა უღუდ. არძა ისრაელს ართნერო უღუდ საშვალება, რდუკო იეჰოვაშ სტუმარ, ჸოფედუკო თიშე თხილერ დო მიაჸუნუკო თიშ ხემძღვანელობას. ამდღა ხოლო, დედამიწაშ ნამდგა კუნთხუს ვა ფცხოვრენდათინ, იეჰოვას არძა ართნერო უჸორთ, ზრუნენს ჩქინდე დო ფთხილანა.

ᲘᲔᲰᲝᲕᲐ ᲕᲐᲠᲗ ᲐᲛᲓᲦᲐ ᲒᲘᲛᲘᲠᲩᲥᲘᲜᲐᲜᲡ ᲒᲘᲨᲐᲙᲔᲠᲫᲐᲤᲐᲡ

13. სოვრეშე იძირე ამდღა, ნამდა იეჰოვა მუშ სტუმარეფს ართიანშე ვეგშაგორუნს?

¹³ ამდღა ხოლო, ნამთინე იეჰოვაშ მოწმე უმოს ხოლოს ცხოვრენს მსოფლიო მთავარ სამართველოწკუმა ვარდა ჩქინ ნამდგაინ ფილიალწკუმა. ნამთინე გვალო თექ მსახურენს. შედეგო, თინეფს შეულებუნა ბრელ შხვადოშხვა საქმეს მიღან მონაწილება, ნამუთ თექ იკეთებ, დო პირადო უღუდან ურთიერთობა ნამთინე ხემძღვანელ ჯიმაწკუმა. ნამთინე ხოლო რაიონულ ზედამხედველო მსახურენს ვარდა სპეციალურ სრულ დროთ მსახურებაშ შხვა ფორმეფს ღებულენს მონაწილებას. თე ირფელიშ საშვალება ჩქინ და დო ჯიმალეფიშ უმენტაშის ვა უღჷ. სი ხოლო თინეფ შქას ქორექ-და, რჯერდას, ნამდა ჩქინ მენძელს, იეჰოვას, მუშ არძა სტუმარ ართნერო უჸორს დო არძაშე ართნერო ზრუნენს (1 პეტ. 5:7). ათეშენ რე, ნამდა იეჰოვა არძას მარზენა სულიერ  საზრდოს, ართნერო ფხემძღვანელენა დო ფთხილანა.

14. ხოლო სოვრეშე იძირე, ნამდა ჩქინ მენძელ, იეჰოვა, სტუმარეფს ართიანშე ვეგშაგორუნს?

¹⁴ იეჰოვას, ჩქინ მენძელს, სტუმარეფიშ გიშაკერძაფა ვა უჩქუნ თენა, თევრეშე ხოლო ირწყებე, ნამდა მთელ მსოფლიოს ირკოჩის უღჷ საშვალება, ბიბლია წეკითხას. გვალო დუდშე წმინდა წერილეფქ სუმ ნინაშა იჭარ — ებრაულ, არამეულ დო ბერძნულ. თეშ რენო, ნამდა თინეფს, მიდგას თე ნინეფშა შეულებუნა ბიბლიაშ კითხირ, უმოს ხოლოშიან ურთიერთობა უღუნა იეჰოვაწკუმა თინეფიშ კარს, მიდგას ვა უჩქჷ თე ნინეფ? ვარ, თაშ ვა რე (მათ. 11:25).

15. ბიბლიაწკუმა დაკავშირებულ ხოლო ნამ დეტალშე ირწყებე, ნამდა იეჰოვა ართიანშე ვეგშაგორუნს ადამიანეფს? (ქოძირით სურათ).

¹⁵ იეჰოვაწკუმა მეგობრობაშ საშვალება ქუმმაჩამუნან დო ვარ, თენა განათლებაშა ვარდა თი ნინეფიშ რჩქინაშა ვა რე დამოკიდებულ, ნამდგაშათ ბიბლიაქ იჭარ. ვა უღჷ მნიშვნელობა, ადამიან განათლებურ რენ დო ვარ, ღორონთ მუშ სიბრძნეს არძას არზენს. თიშ სიტყვა, ბიბლია, ანთასობით ნინაშა რე თარგმნილ, მუთ საშვალებას არზენს მთელ მსოფლიოს მახორუ არძა ადამიანს, ქიდიგურუას თიშე დო ქიგეგას, მუჭო შილებე ღორონთიშ მეგობარო გინორთა (2 ტიმ. 3:16, 17).

ᲥᲣᲓᲝᲡᲥᲘᲓᲘᲗ ᲘᲔᲰᲝᲕᲐᲨ ᲡᲢᲣᲛᲐᲠᲝ

16. მუჭოთ საქმეეფიშ 10:34, 35-შე იძირე, მუს ითხინს იეჰოვა მუშ სტუმარეფშე?

¹⁶ მანგარ დიდ პატი რე, ვორდათ იეჰოვაშ სტუმარეფ თიშ სიმბოლურ კარავს. ვა არსებენს იეჰოვაცალ მოჸოროფე, კეთილ დო სტუმარს პატის ცენსინ ფერ მენძელ. მუჭოთ ბძირით, თის ვა უჩქჷ კოჩიშ გიშაგორუა დო მთელ გურით ღებულენს არძას, ვა უღჷ მნიშვნელობა, სო ცხოვრენს, სო ირდჷ, მუნერ განათლებურ, ნამ რასაშ, ასაკიშ ვარდა სქესიშ რე; მარა მოთხოვნა ხოლო უღჷ — მუშ სტუმარეფშე მორჩილებას ითხინს (წეკითხით საქმეეფიშ 10:34, 35).

17. მუს გუვარჩიენთ უკულიან სტატიას?

¹⁷ მა-15 ფსალმუნს დავით თეცალ კითხვეფით იჭყანს: „იეჰოვა, მი მოურს სტუმარო სქან კარავშა? მი დემკვიდრებ სქან წმინდა გვალას?“. ღორონთიშ შთაგონებათ თიქ პასუხ ხოლო მეჩჷ თე კითხვეფს. ზუსტას თეშე მაღვენუნა ჩიება უკულიან სტატიას. გუვარჩიენთ, მუ მოთხოვნეფ უღჷ იეჰოვას თინეფშო, მიდგას ოკო, თიშ მოსაწონ რდასჷ დო ქუდოსქიდას თიშ მეგობარო.