„ანაყუ მოსავალ რე ეიჭოფალ, მარა მუშეფ ბრელ ვა რენა. ათეშენ, ეხვეწით მოსავალიშ ბატონს, ქუმაშქვას მუშეფ მუშ მოსავალიშ ეიოჭოფშა“ (ლუკ. 10:2). სოდგარენ 2 000 წანაშ წოხოლე ნათქუელ იესოშ თეს სიტყვეფ ჯგირო ეთმოჭარუნს თი სიტუაციას, მუთ ამდღა რე მიანმას. მუშენ შემლებნა თეშ რაგად? მიანმას სოდგარენ 4 200 მაქადაქებელ რე დო თინეფ სახიოლო ამბეს 55 მილიონ კოჩწკუმა ქადაქენა.

იეჰოვაშ ჸოროფაქ ოშობით და დო ჯიმას შხვადოშხვა ქიანაშე გინაჭყვიდრაფუ, მიდართესკო სამხრეთ აღმოსავლეთ აზიაშ თე ქიანაშა, ნამდა ხუჯ ქუდუკინესკო ქადაქებაშ საქმეს. მუშენ დიტეს და დო ჯიმალეფქ მუნეფიშ ქიანა? მუქ მეხვარ თინეფს გეგნურთუმდესკო მიანმაშა დო მუ კურთხევეფ უღნა ამდღა? მორთ, ქიგებგათ.

მუსხირენ წანაშ წოხოლე ართ იაპონელ პიონერ ჯიმას, კაზუჰიროს ეპილეფსიაშ შეტევაქ ქუმაკათ დო გონება მიოდინუ. თინა საავადმყოფოშა მიდეჸუნეს. ექიმქ უწუ, ნამდა ჟირ წანას მანქანაშა ვეგიახუნნედ. კაზუჰირო შოკის რდუ. თიქ მუშ დუც კითხჷ: „მუჭო ვაგრძელა პიონერულ მსახურება, ნამუთ მანგარო მიჸორს?“. თინა მთელ გურით ლოცულენდჷ დო იეჰოვას ოხვეწუდ, ქიმუჩამუდკო პიონერობაშ გაგრძელებაშ საშვალება.

კაზუჰირო იშინანს: «ართ თუთაშ უკულ, ჩქიმ მეგობარქ, ნამუთ მიანმას მსახურენდუნ, ქიგეგ ჩქიმ ამბე. თიქ დომრეკ დო მიწუ: „მიანმას ძირითადო ავტობუსეფით გილულა. თაქ ქუმურქ-და, შეგალებე პიონერულ მსახურებაშ გაგრძელება დო მანქანა ვედგესაჭირებ“. ექიმს ქოპკითხჷ, ქეშმალებედ დო ვარ მიანმაშა ულა. ჩქიმ გასაკვირო, თიქ მიწუ: „ასე იაპონიაშა ნევროლოგ რე მოულირ მიანმაშე. გუგოჩინებაფუანქ თის. შეტევეფქ კინ ქუმგაკათ-და, შეილებ თის დეკავშირე“. ექიმიშ თე სიტყვეფ იეჰოვაშ პასუხო მიფრჩქინ».

კაზუჰიროქ ხეთეშე ქიმეჭარ მიანმაშ ფილიალს, ნამდა ოკოდ მუშ ოსურწკუმა ართო მიანმას პიონერო მსახურება. ზუსტას ხუთ დღაშ უკულ ფილიალშე პასუხიქ ქუმორთჷ: „ქუმორთით, ჩქი ბრელ პიონერ მოსაჭირნა!“. თიქ დო მუშ ოსურქ მარიქ, ჟირხოლო მანქანა გეგმოჩეს, ვიზა გეჭოფეს დო ბილეთეფ ქიჸიდეს. ამდღა თინეფ ხიოლით მსახურენა მანდალაიშ კრებას, ნამუთ ჟესტეფიშ ნინაშა იტარებ. კაზუჰირო იჩიებ: «თე ირფელიშ უკულ ასე უმოსო ბჯერა ღორონთიშ დუნაპირებუშ, ნამუთ ფსალმუნეფიშ 37:5-ის ინოჭარ: „იეჰოვას მიანდჷ სქან შარა, თიშ იმენდ გიღდას დო თინა ქიმოქმედენს“».

2014 წანას მიანმას იეჰოვაშ მოწმეეფს უღდეს თიშ პატი, ნამდა სპეციალურ კონგრეს ჩატარესკო. თე შეხვალამას შხვადოშხვა ქიანაშე მოულირ დელეგატეფ ოსწრუდეს. კონგრესის 34 წანერ და მონიკა ხოლო ოსწრუდ, ნამუთ შეერთებულ შტატეფშე რე. თინა იჩიებ: „კონგრესშე დიფრთინ, მნიშვნელოვან ნაბიჯიშ გინოდგუმა გეგნოპჭყვიდ დო თეშენ ბრელს ბლოცულენდჷ. სულიერ მიზნეფიშ გურშენ მშობლეფს ხოლო ქუდურაგადე. არძაქ თი დასკვნაშა ქიმეფრთით, ნამდა მიანმაშა დიფრთიკო. მარა საბოლა გადაწყვეტილება ხეთეშე ვემემღებ დო თეშო ბრელს ბლოცულენდ“. მონიკა ეთმონწყუნს, მუშენ ვემიაღებუ გადაწყვეტილებაქ ხეთეშე.

თინა იჩიებ: „იესოქ მუშ მოწაფეეფს ელუჩ, ხარჯეფ გეგმუთვალდესკო. თაშ ნამდა, ჩქიმ დუც პკითხჷ: ქეშმალებენო თექ გინულა? გემაჯუმენო დუდ თე ქიანას თეშ, ნამდა სამუშაქ ბრელ დრო ვემდამღას?“. მონიკა აღიარენს: „ქიმეფხვად, ნამდა თე ქიანაშა გინაულარო ვამღუდ დასაბაღ ფარა“. მუჭო შეიალებუ თის მიანმაშა გინულაქ? (ლუკ. 14:28).

მონიკა იშინანს: „ართ დღას ჩქიმ უნჩაშიქ ქომჭანუ. ბნერვიანენდჷ, მუშენდა ფიფქრენდჷ, სამუშაშე გომტენდეს. მარა უნჩაშიქ მადლობა ქომწუ ჩქიმ შესრულებურ სამუშაშ გურშენ. უკულ მიწუ, ნამდა პრემიას ხოლო ქიგემძინანდჷ, ზუსტას თისხის, მუსხით ვალეფიშ ოსურებელო მოსაჭირუდ“.

მონიკა 2014 წანაშ დეკემბერშე მსახურენს მიანმას. მუს ფიქრენს თინა თექ მსახურებაშ გურშენ? მონიკა იჩიებ: «მოხიოლ თაქ ვორექინ, სუმ ბიბლიაშ გურაფას ვატარენქ. ართ-ართ ბიბლიაშ მაგურაფალ 67 წანერ რე. ირ შეხვალამაშ დროს მიძიცანს დო მოხუტოლ. თის ქანგარინ, მუჟამსით პირველო გეგჷ ღორონთიშ სახელ. თიქ მონიკას უწუ: „ცხოვრებას პირველო გებგონ იეჰოვაშ სახელ. სი ჩქიმდე ბრელით ახალგაზრდა რექ, მარა თიცალ მნიშვნელოვან მუდგარენ დუმოგურე, მუთ დღას ვაგამგებ“. თენა ქომწუნ, მა ხოლო ქუმანგარინ. თეცალ შემთხვევეფიშ უკულ თექ მსახურება, სოდეთ მაქადაქებელეფიშ საჭიროება რენ, მანგარ სასიამოვნო რე». ასერდე მონიკას უღუდ თიშ პატი, გემკორთუკო სამეფოშ მახარობელეფიშ სკოლა.

შხვეფწკუმა მანგარო იმოქმედ 2013 წანაშ „წელიწდეულქ“, სოდეთ მიანმაშ გურშენ მიშჷ ჩიება. 30 წანას გინოჩილათირ ართ და ლი, სამხრეთ აღმოსავლეთ აზიას ცხოვრენდჷ. თის სრულ განაკვეთიან სამუშა უღუდ, მარა „წელიწდეულს“ მოშინაფილ შემთხვევეფქ გინაჭყვიდრაფუ მიანმაშა გინულა. თინა იჩიებ: „2014 წანას დევესწრჷ სპეციალურ კონგრესის იანგონს, სოდეთ შეფხვად ართ წყვილს, ნამუთ მიანმას, ჩინურ ტერიტორიას მსახურენდ. ჩინურ მა ხოლო მიჩქუდ დო გინოპჭყვიდ მიანმაშა გინულა, ნამდა ჩინურ ჯგუფის ქიმვეხვარკო. მა მონიკას დევეკავშირ დო ჟირხოლოქ მანდალაიშა მიდაფრთით. იეჰოვაშ მოხვარათ ართ სკოლას ნახევარ განაკვეთიან სამუშა დობგორით დო გოხოლუას ბინა ხოლო ქიფშით. ჩხე კლიმატიშ დო შხვა სირთულეეფიშ უმკუჯინუო, იშენით ხიოლით ვმსახურენქ. მიანმაშ მახორუეფ უბრალოთ ცხოვრენა, მარა ზრდილობიან ხალხ რე დო ჯგირო ირჩქილუაფნა სახიოლო ამბეს. გურშა ელამკინანს თიშ ძირაფა, მუჭო აჩქარენს იეჰოვა ქადაქებაშ საქმეს. დარწმუნებულ ვორექ, ნამდა იეჰოვაშ ნება რე, მადალაის ვორექ“.

ბრელქ, მიდგაქ თექ გინორთჷ, სოდეთ მაქადაქებელეფიშ საჭიროება რენ, მუშ დუდშა გიმოცად, მუჭო პასუხენს იეჰოვა ლოცვეფს. ქიმიპჸონათ 37 წანერ ჯიმა ჯუმპიშ დო თიშ ოსურიშ, ნაოშ მაგალით, ნამუთ 35 წანერ რე. თინეფ იაპონიას ჟესტეფიშ ნინაშა იტარებუდუნ ფერ კრებას მსახურენდეს. მუშენ გინორთეს მიანმაშა? ჯუმპი იჩიებ: „მა დო ჩქიმ ოსურს ირიათო მოკოდეს უცხო ქიანას მსახურება. ართ ჯიმაქ, ნამუთ ჩქინ კრებას  მსახურენდუნ, მიანმაშა გეგნორთჷ. მართალ რე, ბრელ ფარა ვამღუდეს, მარა 2010 წანაშ მესის ჩქი ხოლო გინიბლით. მიანმელ და დო ჯიმალეფქ ჯგირო მემღეს“. მუს ფიქრენს თინა მიანმას ჟესტეფიშ ნინაშა იტარებუნ ფერ ტერიტორიას მსახურებაშ გურშენ? თე ჯიმა იჩიებ: „ხალხის მანგარო ოინტერეს ჭეშმარიტება. მუჟამსით ჟესტეფიშ ნინაშა ვიდეოს ვოჯინუანთინ, ჸუც ვერჩქილენან ფერ მობინადრეეფ გახარებულეფ რენა. მოხიოლ, ნამდა გეგნოპჭყვიდით იეჰოვაშ მსახურება თაქ გამგრძელებდესკო“.

მუთ ეიჯუმანს დუც თე წყვილ? ქომონჯ იჩიებ: „კინოჩუალირ ფარაქ სუმ წანას დამბაღეს. ჭიჭე ფარაქ ქუდმკოსკიდეს, მარა უკულიან წანას ქირაშ ოგაფალო ვამბაღდეს. მა დო ჩქიმ ოსურ ბრელს ბლოცულენდით. ვეველუდითინ თეშ, ფილიალშე ქუმოპჭარეს, ნამდა დროებით სპეციალურ პიონერეფო ვორდით დანიშნულ! ჩქი მივენდით იეჰოვას დო ქობძირით, ნამდა თინა დღას ვემმოტენა. ღორონთ ირნერო ზრუნენდჷ ჩქინდე“. ასერდე თე წყვილქ სამეფოშ მახარობელეფიშ სკოლა მიკორთჷ.

მუქ გინაჭყვიდრაფუ 43 წანერ იტალიელ ჯიმას სიმონეს დო თიშ 37 წანერ ოსურს ანას, ნამუთ ახალ ზელანდიაშე რენ, მიანმაშა გინულა? ანა იჩიებ: «თე ირფელ 2013 წანაშ „წელიწდეულიშ“ დამსახურება რე». სიმონე აგრძელენს: „დიდ პატი რე მიანმას მსახურება. თაქ უმოს ადვილ რე ცხოვრება დო შემლებ იეჰოვაშ საქმეს უმოს მეტ ვაკეთე. გურშა ელამკინანა თიშ ძირაფა, მუჭო ზრუნენს იეჰოვა ჩქინდე თეცალ ტერიტორიას მსახურებაშ დროს“ (ფსალმ. 121:5). ანა იჩიებ: „ასე უმოს ბედნერ ვორექ. უბრალოთ ფცხოვრენთ. ჩქიმ ქომონჯწკუმა ბრელ დროს ვატარენქ დო შედეგო, ართიანწკუმა უმოს ხოლოს ვორეთ. თეს გეძინელ, ძვირფას მეგობრეფ დობგორით. ხალხის იეჰოვაშ მოწმეეფიშ გურშენ ჯგირ წარმოდგენა უღჷ დო ჭეშმარიტებას ჯგირო ირჩქილუაფნა“. სოვრეშე იძირე თენა?

ანა იჩიებ: „ართშა ბაზარს ართ სტუდენტ ძღაბის ვუქადაქ დო ქიმიბრაგადეთ, ნამდა კინ ქეშეფვხადუდ. მაჟია შეხვალამას, თიქ მუშ მეგობარ ხოლო ქიმიჸონ. უკულიან შეხვალამეფიშ დროს თიქ ხოლო უმოს მეგობარ ქიმიჸონ დო ასე თინეფშე ხუთის ბიბლიას ვოგურუანქ“. სიმონ იჩიებ: „თაქ არძა მეგობრულეფ რენა დო ბრელ მუთუნ ოინტერსენა. ბრელს ჭეშმარიტება დასურო ოინტერეს. მარა ჩქი უბრალოთ დრო ვამღუნა, არძას ქიმვაქცუათ ყურადღება“.

მუშ რაგად შილებე თი პრაქტიკულ ნაბიჯეფშე, ნამუთ მიანმაშა გინულას ოხუ? იაპონელ და მიზუჰო რაგადანს: «მა დო ჩქიმ ქომონჯის, საჩიოს, ირიათო მოკოდეს თიცალ ტერიტორიას მსახურება, სოდეთ მაქადაქებელეფიშ საჭიროება რე, მარა ვამჩქუდეს, სო იბდითკო. ჩქინ გურს მანგარო ქეშეხუ 2013 წანაშ „წელიწდეულს“ მიანმაშ გურშენ მოჩამილ შემთხვევეფქ, ათეშენ ქიდიპჭყით თიშე ფიქრჷ, ქეშმალებედეს დო ვარ თექ მსახურება». საჩიო აგრძელენს: „გეგნობჭყვიდით, დიო  ართ მარათ მიდაფრთითკო მიანმაშ დედაქალაქ იანგონშა, ნამდა ქობძირითკო თექიან სიტუაცია. თეშ უკულ დებრწმუნით, ნამდა შემლებდეს თექ მსახურება“.

50 წანას გინოჩილათირ როდნი დო თიშ მეუღლე ჯეინ, ნამუთ ავსტრალიაშე რენან, მუნეფიშ სქულეფ ჯორდანი დო დანიკაწკუმა ართო 2010 წანაშე მიანმას მსაუხრენა. როდნი იჩიებ: „ჩქინწკუმა მანგარო იმოქმედ თიშ ძირაფაქ, ნამდა ხალხი შურდოგურით ირჩქილუაფ ჭეშმარიტებას. შემლებ შხვა ოჯახეფს ხოლო ელვუჩე, იმსახურან მიანმას“. მუშენ რე თაქ მსახურება ჯგირ? თე ჯიმა აგრძელენს: „თაქ მსახურებაქ უმოსო დუმაახლოვეს იეჰოვაწკუმა. ამდღა ბრელ ახალგაზრდა ხვალე ახალ ტელეფონეფით, ჯგირ მანქანეფით დო ხელფასიან სამუშაშ გორუათ რე დაინტერესებულ. ჩქინ ბაღანეფ ახალ სიტყვეფს გურაფლენა, ნამდა მსახურებას გეგმირინუან. თინეფ ოცადნა ქიდიგურუან, მუჭო იჩუან ბიბლიურ საკითხეფშენ შხვეფწკუმა, მუჭო აკეთან კომენტარეფ კრებას თაქიან ნინაშა დო ბრელ შხვა სულიერ საქმეეფს ხოლო რენა ჩართულ“.

37 წანერ ოლივერ, ნამუთ შეერთებულ შტატეფშე რე, იჩიებ, მუშენ რე ჯგირ თეცალ მსახურება: „პირად სიამოვნებაშე ვარიაშ რაგადის დო იეჰოვაშ მსახურებას ბრელ კურთხევა მოჸუნს. შხვა ტერიტორიას მსახურებაქ მიმეხვარ, ირნერ სიტუაციას იეჰოვას მივენდე. უჩინებ, მარა ართ რწმენაშ და დო ჯიმალეფწკუმა მსახურებაქ, ქუმოძირუ, ნამდა ღორონთიშ სამეფოცალ მნიშვნელოვან მუთუნ ვა რე თე ქვეყნიერებას“. ამდღა ოლივერ დო თიშ მეუღლე ანა აგრძელენა მსახურებას თი ტერიტორიას, სოდეთ ჩინურო იჩიებნა.

50 წანას გინოჩილათირ ავსტრალიელ და ტრაზელ მიანმას 2004 წანაშე მსახურენს. თინა რაგადანს: „მდგომარეობა საშვალებას ქუგარზენან-და, იმსახურით თექ, სოდეთ მაქადაქებელეფიშ საჭიროება რე. ჩქიმ გამოცდილებაშე შემლებ ფთქუე, ნამდა მსახურება დასურო ქუგოკონ-და, იეჰოვა აუცილებერო გაკურთხენს. დღას ვეფიფქრენდჷ, ნამდა თეცალ მსახურება ქუმაღვენუდ. თენა რე არძაშ უჯგუშ დო კმაყოფილებათ ეფშა ცხოვრება“.

დეფიქრით მიანმას მსუხრენან თი და დო ჯიმალეფიშ გურიშემაკინალ სიტყვეფშე, ნამდა თქვა ხოლო გეგნოჭყვიდათ თიცალ ტერიტორიას მსახურება, სოდეთ დღას ვა რე ნაქადაქებ. მიანმაშა გინულირ და დო ჯიმალეფ იჩიებნა: „ქუმორთით მიანმაშა დო ქიმმეხვარით!“.