1. მუშენ შილებე ფთქუათ, ნამდა ირფელ ღორონთიშ საკუთრება რე? (ქოძირით სურათ თე გვერდის)

ირფელ იეჰოვაშ საკუთრება რე. თიშ რე, „ზეცა, დედამიწა დო ირფელ, მუთ თის რე“ (კან. 10:14; გამოცხ. 4:11). იეჰოვაქ გაჭყჷ ადამიანეფ ათეშენ ჩქი ხოლო თიშ საკუთრება ვორეთ (ფსალმ. 100:3). კაცობრიობაშ ისტორიაშე იძირე, ნამდა ღორონთიქ გეგშეგორ ხალხ, ნამუთ მუშ განსაკუთრებულ საკუთრება რდუ.

2. მის მიშინუანს ბიბლია გიშაკერძაფილ საკუთრებათ?

² მაგალთო, 135-ა ფსალმუნს მოშინაფილ რე ისრაელს მახორუ იეჰოვაშ ართგულ მსახურეფ, მუჭოთ „გიშაკერძაფილ საკუთრება“ (ფსალმ. 135:4). თეს გეძინელ, ოსიაშ წიგნის მოჩამილ რე წინასწარმეტყველება, ნამდა ისრაელიშ გარდა შხვეფ ხოლო იჸუაფუდ ღორონთიშ ხალხ (ოს. 2:23). თე წინასწარმეტყველებაქ შესრულ, მუჟამსით იეჰოვაქ იესოშ თანამართველებო ებრაელ ვა რდუნ ფერ ხალხ გიშეგორ (საქ. 10:45; რომ. 9:23—26). თე „წმინდა ერი“ ღორონთიშ „გიშაკერძაფილ საკუთრება“ იჸუაფუდ. თეს გეძინელ, თიშ წევრეფ ცხებულეფ იჸიდეს დო მუჭოთ ბიბლია იჩიებუნ, ზეცას იცხოვრენდეს (1 პეტ. 2:9, 10). მუ შემლებნა ფთქუათ ქრისტიანეფიშ უმენტაშშე, ნამდგას დედამიწაშ ცხოვრებაშ იმენდ უღნა? იეჰოვა თინეფიშ გურშენ ხოლო იჩიებ, ნამდა მუშ „გიშაგორილეფ“ რენა (ეს. 65:22).

3. ა) მის უღჷ ამდღა იეჰოვაწკუმა განსაკუთრებულ ურთიერთობა? ბ) მუს გუვარჩიენთ თე სტატიას?

 ³ ამდღა „ჭიჭე ოჭყიშალი“, მიდგას ზეციერ იმენდ უღუნ, „შხვა შხურეფწკუმა“ ართო, ნამუსით დედამიწაშ ცხოვრებაშ იმენდ უღუნ, ართ ოჭყიშალშა მიშულა. იეჰოვა თინეფს მანგარო აფასენს დო მუშ ხალხო მირჩქინანს (ლუკ. 12:32; იოან. 10:16). მუშო ოკო რაგად, მოკონა მარდულობა გიმიფრჩქინათ თიშენ, ნამდა იეჰოვაქ მუწკუმა ურთიერთობაშ საშვალება მუჩეს. თე სტატიას გუვარჩიენთ, მუ საშვალებეფით შემლებნა გიმიფრჩქინათ იეჰოვაშ მარდულობა თეცალ პატი მუჩესინ თიშენ.

4. ნამ საშვალებათ შემლებნა გიმოფხანტათ თიშ მარდულობა, ნამდა იეჰოვაქ მუწკუმა ურთიერთობაშ საშვალება მუჩეს დო მუ მაგალით დომტუეს იესოქ?

⁴ მუჟამსით იეჰოვას მთელ გურით დუც ვუძღვინენთინ, თეთ ვოძირანთ, ნამდა თის მანგარო ვაფასენთ. წყარს ნათუათ სახალხოთ ვოძირანთ, ნამდა იეჰოვას ვოკუთნუთ დო ჩქინ სურვილით ვომორჩილუთ თის (ებრ. 12:9). იესოქ ხოლო მუშ ნათუათ თენა ოძირუ, მუჟამსით თქუ: „სქან ნებაშ შესრულება მახარენს, ჩქიმ ღორონთ“ (ფსალმ. 40:7, 8). იესოქ იეჰოვაშ მეძღვინელ ერს დებად, მარა თეშ უმკუჯინუო, თიქ იშენით მეუძღვინ დუდ იეჰოვას.

5, 6. ა) მუს ფიქრენდ იეჰოვა იესოშ ნათუაშენ? ბ) ქიმიჸონით მაგალით თიშ ოძირაფალო, ნამდა იეჰოვა აფასენს, მუჟამსით თის ჩქინ სურვილით ვუძღვინენთ დუც?

⁵ მუს ფიქრენდ იეჰოვა იესოშ ნათუაშენ? ბიბლია იჩიებ: «მუჭოთ დინათუნ, იესოქ ხეთეშე გეშართ წყარშე დო გინწყჷ ცაქ დო იოანექ ქოძირ, ნამდა ღორონთიშ შური ტორონჯო გიმიშ იესოშა. ცაშე ხონარქ გისიმ: „თენა რე ჩქიმ საჸოროფო სქუა, ნამუთ მა მიპწონე“» (მათ. 3:16, 17). იესო მუშ ზეციერ მუმას ოკუთნუდ, მარა იეჰოვას იშენით ახიოლ თიშ ძირაფაქ, ნამდა იესოს ოკოდ თის ემსახურკო დო თიშ ნება შეასრულკო. თეგვარო, იეჰოვას ჩქინდე ხოლო ახიოლე, მუჟამსით დუც მევუძღვინენთ დო კურთხევეფით ემოფშანა (ფსალმ. 149:4).

⁶ თენა უჯგუშო ქიგებგათინ, მორთ, ქიმიპჸონათ თეცალ მაგალით. წერმიდგინით, ნამდა პიროვნებაქ მუშ ბაღის სქვამ ყვავილეფ დორგჷ. ართ დღას მუშ ჭიჭე ძღაბიქ თე ბაღშე ართ ყვავილ გელაწილ დო მუმას ქაჩუქ. მუჭო შილებე ბაღანაქ მუამუშის თიცალ მუდგარენ აჩუქას, მუთ თეშით თიშ საკუთრება რე? მუშო ოკო რაგად, მოჸოროფე მუმა თაშ დღას ვეფიქრენს. მუმას მანგარო ახიოლე მუშ ძღაბიშ საჩუქარ დო დღას ვაგაჭყორდუ თიშ გიმორჩქინელ ჸოროფა. მუმაშო ბაღიშ არძა ყვავილშე უმოს ძვირფას სქუაშ ნაჩუქერ ყვავილ იჸუაფ. თეგვარო, იეჰოვას ხოლო მანგარო ოხიოლ, მუჟამსით ჩქინ სურვილით ვუძღვინენთ თის დუც (გამ. 34:14).

7. მუჭოთ მალაქიაქ თქუნ, მუს გინაფლენს ღორონთ თინეფიშ გურშენ, მით თის მუშ სურვილით ომსახურ?

⁷ წეკითხით მალაქია 3:16. * დიო ხოლო ვაგაფნა დუდ მეძღვინელ დო ნათილ ვა რეთ-და, დეფირქით მუშმადიდა მნიშვნელობა უღჷ თე ნაბიჯიშ გინოდგუმას. მთელ კაცობრიობა იეჰოვაშ საკუთრება რე. ათეშ გურშენ, შემლებნა ფთქუათ, ნამდა დაბადებაშ მომენტშე თქვა ხოლო იეჰოვაშ საკუთრება რეთ. მარა, დეფიქრით, მუჭო ახიოლე ღორონც, მუჟამსით თიშ უზენაესობას აღიარენთ დო დუც მეუძღვინენთ, ნამდა თიშ ნება შეასრულათ (იგავ. 23:15). იეჰოვა ხოლოს რე თინეფწკუმა, მით მუნეფიშ სურვილით ომსახურნა თის. მუშო ოკო რაგად, თეცალ კათაშ სახელს თინა „გასაშინე წიგნის“ ინმაჭარანს.

8, 9. მუს ითხინს იეჰოვა თინეფშე, მიდგაშ სახელეფ „გასაშინე წიგნის“ რე ინოჭარილ?

 ⁸ მუჟამსით ჩქინ სახელ „გასაშინე წიგნის“ ინიჭარუნ, თენა დიდ პასუხიშმგებლობა რე. მალაქიაქ თქუ, ნამდა პიროვნებას ოკო ოშქურდას იეჰოვაშა დო თიშ სახელშე ფიქრენდას. მუჟამსით პიროვნება იეჰოვაშ გარდა შხვა მიდგარენს ვარა მუდგარენს ოთაყვანუნ, თიშ სახელ სიმბოლურ სიცოცხლეშ წიგნიშე გიშილასუ (გამ. 32:33; ფსალმ. 69:28).

⁹ მარა, იეჰოვაშა დუდიშ მეძღვინუაშა უმოს მეტ მიშურს, ვინემ პირობაშ მეჩამა, ნამდა თიშ ნებას შევასრულენთ დო დიმნათუთ. თეს ჩქი ხვალე ართშა ვორთუთ, მარა იეჰოვაშ მსახურება მთელ ცხოვრებას ოკო ვაგრძელათ. ონდო ფცხოვრენთინ, ირიათო ოკო გიმიფრჩქინათ თიშ მორჩილება მუჭოთ ასე, თეშ მომავალს ხოლო (1 პეტ. 4:1, 2).

10. მუ სხვაობა ოკო რდას თინეფ შქას, მით ომსახურ ღორონც დო ვამსახურ თის?

¹⁰ თეშ წოხოლეიან სტატიას გარჩიებულ რდუ კაენიშ, სოლომონიშ დო ისრაელეფიშ მაგალითეფ. არძა იეჰოვას ომსახურუდ, მარა განსაკუთრებულ ართგურობა ვეგმურჩქინუნა. თე მაგალითეფშე იძირე, ნამდა თინეფ, მით იეჰოვას მთელ გურით ომსახურუნ, მტკიცაშე ოკო გერდან სიმართლეშ მხარეს დო შორს ოკო რდან უბადობაშე (რომ. 12:9). თეგვარო, მუჟამსით მალაქიაქ „გასაშინე წიგნი“ მიშინუნ, იეჰოვაქ გეუძინ: „ქოძირუნთ სხვაობას მართალ დო უბადო შქას, ღორონც ომსახურ დო ვამსახურუნ თიშ შკას“ (მალ. 3:18).

11. მუშენ ოკო ვოძირათ შხვეფს არგამათ, ნამდა იეჰოვაშ მეძღვინელ მსახურეფ ვორეთ?

¹¹ თეს გეძინელ, შემლებნა შხვანერო ხოლო ვოძირათ, ნამდა ვაფასენთ იეჰოვაქ გიშაბგორესინ თის. ჩქინ სულიერ წიმიულა არძაქ ოკო ქოძირას (1 ტიმ. 4:15; მათ. 5:16). ქოკითხით თქვან დუც: ქარწყენანო შხვეფ, ნამდა იეჰოვაშ ართგურ ვორექ? ქობგორუნქო თიშ შესაძლებლობეფს, ნამდა ხალხის ვუწუე იეჰოვაშ მოწმე ვორექინ? იეჰოვას მანგარო აწყუნე გურს, ქიმეთაკილებნა თიშ რაგად, ნამდა ვომსახურუთ თის (ფსალმ. 119:46; წეკითხით მარკოზი 8:38). *

12, 13. მუშენ რე მინშა ძნელ იეჰოვაშ მსახურეფ დო ქვეყნიერებაშ ხალხ შქას სხვაობაშ ძირაფა?

 ¹² სანარღოთ ნამთინე იეჰოვაშ მოწმე „ქვეყნიერებაშ შურიშ“ გავლენაშ თუდო რე დო შედეგო, ბრელით ვეგნესხვავებ თინეფშე, მით ღორონც ვამსახურ (1 კორ. 2:12). „ქვეყინიერებაშ შურ“ ხეს უნწყუნს, ნამდა თინეფქ მთელ ყურადღება ხორციელ სურვილეფშა გეგნიღან (ეფეს. 2:3). მაგალთო, ბრელ რჩევაშ უმკუჯინუო, ნამთინეს იშენით თიცალო მიკაქუნს დო თიცალ გარენგობა უღჷ, ნამუთ შუროთ ვა რე მოკრძალებურ. ქრისტიანულ შეხვალამეფს ნამთინეს მორწკიპილ ვარდა ეშაღალირ ბარგ მიკაქუნს. თეს გეძინელ, კანკალეს ქვეყნიერებას გავრცელებურ ექსტრავაგანტურ თუმაშ სტილ უღჷ (1 ტიმ. 2:9, 10). ათეშენ ძნელ გარჩიებელ რე, მი რე იეჰოვაშ მოწმე დო მი — „ქვეყნიერებაშ მეგობარი“ (იაკ. 4:4).

¹³ ნამთინე იეჰოვაშ მოწმეს ბოლოშა ვემუტებ ქვეყნიერებას მოსაწონ საქციელი. წვეულებეფიშ დროს თინეფიშ სხაპუა დო საქციელ ქრისტიანულ ნორმეფს გინაჩირთუ. თინეფ თიცალ სურათეფს დო პოსტეფს გედვანა სოციალურ ქსელეფს, მუნერით ქრისტიანს ვასქვანს. შილებე სერიოზულო ვადუშებნა დო მითინს ვემუჩამ სერიოზულ რჩევა, მარა თინეფიშ საქციელ გლახათ მოქმედენს შხვეფწკუმა, მით ოცად იეჰოვაშ თოლს სწორას მიქცუას (წეკითხით 1 პეტრე 2:11, 12). *

14. მუჭო ოკო დეფცვათ იეჰოვაწკუმა ჩქინ ურთიერთობა?

¹⁴ ქვეყნიერებას ირფელ თეშ რე გენწყილ, ნამდა მთელ ყურადღება ხორციელ სურვილეფშა გეგნიბღათ დო ქონებათ იფცქვათ (1 იოან. 2:16). ჩქი იეჰოვას ვოკუთვნუთ, ათეშენ მეპჸუნთ ბიბლიას ინოჭარილ რჩევას: „ვარია ქოფთქუათ უღორონთობაშე დო ქვეყნიურ კორნებეფშე, ასეიან ქიანას აზრიანო, სიმართლეთ დო ღორონთიშ ართგურობათ იფცხოვრათ“ (ტიტ. 2:12). ჩქინ ცხოვრებაშ წესი, ნამდგაშა მიშურს რაგადი, ჭკუმუა, შუმა, მიკოქუნა, გარეგნობა დო სამუშა არგამათ ოძირანდას ოკო შხვეფს, ნამდა  იეჰოვას ვოკუთვნუთ (წეკითხით 1 კორინთელები 10:31, 32). *

15. მუშენ ოკო მივექცუათ თანაქრისტიანეფს ჸოროფათ?

¹⁵ თანაქრისტიანეფს მუჭო ვოქცუთინ თევრეშე იძირე, ქუვაფასენთ დო ვარ იეჰოვაწკუმა ურთიერთობას. ჩქინცალო, თინეფ ხოლო იეჰოვას ოკუთვნუნა. თენა ირიათო ქოფშუნან-და, და დო ჯიმალეფს ირო ჸოროფათ მივექციებუთ (1 თეს. 5:15). იესოქ მუშ მიმაჸუნალეფს უწუ: „ჩქიმ მოწაფეეფ რეთინ, თით გეგენა, ნამდა ართიანიშ ჸოროფა გაღვენუნა“ (იოან. 13:35).

16. მოსეშ კანონშე ნამ მაგალით ოძირანს, მუჭო უჯინე იეჰოვა მუშ ხალხის?

¹⁶ ქიმიპჸუნათ თიშ მაგალით, მუჭო ოკო მივექცუათ ართიანს კრებას. იეჰოვაშ ტაძარს გიშართილ რდუ ჭურჭლეულობა, ნამუთ ხვალე წმინდა თაყვანიშცემაშ დროს ოკო გიმირინესკო. მოსეშ კანონს კილკილშა რდუ ენწყუმილ, მუჭო იზრუნესკო თიშე დო თინა ხოლო ჭარუდ, ნამდა მით თე კანონს ვედეცვენდუნ, ღურათ დესაჯებუდ (რიცხ. 1:50, 51). იეჰოვა თე უსიცოცხლო საგანშე, ნამუთ თიშ თაყვანიშცემაშო რდუ მეძღვინელ, თაშ ქოზრუნენდ-და, მუსხით უმოსო ზრუნენდას იჸი თინა მუშ გიშაგორილ ხალხშე, მით ართგურო ომსახურ თის. იეჰოვაქ მუშ ხალხიშ გურშენ თქუ: „სი შეგეხებუნ თინა, ჩქიმ თოლიშ გუგას შეხებუ“ (ზაქ. 2:8).

17. მუს აქციენს ყურადღებას იეჰოვა?

¹⁷ წინასწარმეტყველ მალაქია იჩიებ, ნამდა იეჰოვა ყურადღებას აქციენს, მუჭო ოქცუნა თიშ მსახურეფ ართიანს (მალ. 3:16). იეჰოვა იჩინენს მუშიანს (2 ტიმ. 2:19). თის უჩქჷ ირფელ, მუს ვორთუთ დო მუს იფჩიებუთ (ებრ. 4:13). ღორონთ ორწყე, მუჟამსით ჯგირო ვა ვოქცუთ და დო ჯიმალეფს. მარა შემლებნა დარწმუნებულ ვორდათ, ნამდა იეჰოვა თის ხოლო ორწყე, მუჟამსით პატიცემას გიმიფრჩქინანთ, ვაპატიენთ შეცდომეფს დო ჯგირო ვოქცუთ ართიანს (ებრ. 13:16; 1 პეტ. 4:8, 9).

18. მუჭო შემლებნა მარდულობაშ გიმორჩქინა, ნამდა ღორონთიქ მუშ ხალხო გიშაბგორეს?

¹⁸ ჩქი მოკონა მარდულობა გეგმიფრჩქინათ, მუშენდა ღორონთიქ მუშ ხალხო გიშაბგორეს. მიჩქუნა, ნამდა არძაშ უმოს გონივრულ გადაწყვეტილება თიმწკუმა ვაკეთით, მუჟამსით დუდ მეუძღვინით თის. მართალ რე, „უსინდისო დო უკუღმართ თაობაწკუმა“ ფცხოვრენთ, მარა შემლებნა ჩქინ საქციელით ვოძირათ, ნამდა პატიოსანეფ ვორეთ დო თეგვარო ვანათათ ქვეყნიერებას (ფილ. 2:15). ჩქი ირნერო ვოცადუთ ვა ვაკეთათ თინა, მუთ ჯოგჷ იეჰოვას (იაკ. 4:7). თეს გეძინელ, მიჸორა დო პატის ფცენთ და დო ჯიმალეფს, მუშენდა თინეფ ხოლო იეჰოვას ოკუთვნუნა (რომ. 12:10).

19. მუ კურთხევეფ უღჷ იეჰოვაშ გიშაგორილ ხალხის?

¹⁹ ბიბლია მოპირნა: „იეჰოვა ვემიოტალენს მუშ ხალხის“ (ფსალმ. 94:14). თე სიტყვეფ მარწმუნენა, ნამდა მუდგაქ ვა მოხვადასინ, იეჰოვა ვემმოტალენა — ღურას ხოლო ვეშულებ, დუმაშორან იეჰოვაშ ჸოროფას (რომ. 8:38, 39). რომაელეფიშ 14:8-ს ჭარ: „შურ ქომდგუნან-და, იეჰოვაშ შურ მიდგუნა დო დობღურით-და, იეჰოვაშო ბღურუთ. ათეშენ ქოთ ცოცხალო დო ქოთ ღურელო იეჰოვას ვოკუთვნუთ“. ართ შურ მოლნა ქუმორთას თი დღაქ, მუჟამსით იეჰოვა სიცოცხლეს დურთინუანს მუშ ართგურ მეგობრეფს (მათ. 22:32). კურთხევეფ ამდღა ხოლო ბრელ მიღნა. ბიბლია იჩიებ: „ბედნერ რე ერი, ნამუშ ღორონთ იეჰოვა რე დო ხალხი, ნამუთ თიქ მუშ მემკვირდეობათ გიშეგორ“ (ფსალმ. 33:12).