ოგურაფალ სტატია 28
დარწმუნებულ რდათ, ნამდა მუთ რწანა, ჭეშმარიტება რე
„თის მიაჸუნ, მუთ გიგურუაფ დო მუდგაშ რჯერს“ (2 ტიმ. 3:14).
ობირეში 56 ქიჸოროფეთ ღორონთიშ სიმართლე
შინაარსი *
1. მუს ბგულისხმენთ, მუჟამსით იფჩიებუთ სიტყვას „ჭეშმარიტება“?
„მუჭო გეგჷ ჭეშმარიტება?“ „ჭეშმარიტებას ირდიო?“ „მუზმა ხან რე, მუთ ჭეშმარიტებას რექ?“ შილებე თქვანდა დუსვებნა თე კითხვეფ ვარდა თქვა გიკითხირნა თეცალ მუდგარენ შხვეფშა. მუს ბგულისხმენთ, მუჟამსით იფჩიებუთ სიტყვას „ჭეშმარიტება“? მუჭოთ წესინ, მუჟამსით იფჩიებუთ „ჭეშმარიტება“, ბგულისხმენთ ჩქინ რწმენას, თაყვანიშცემაშ ფორმას დო ცხოვრებაშ წესის. თი ხალხის, მით „ჭეშმარიტებას“ რე, უჩქჷ ბიბლიაშ გურაფეფ დო თექ მოჩამილ პრინციპეფით ცხოვრენს. შედეგო, გათავისუფლებურეფ რენა ტყურა რელიგიურ გურაფეფშე დო არასრულყოფილებაშ უმკუჯინუო, ბედნერ ცხოვრებათ ხარენა (იოან. 8:32).
2. იოანეშ 13:34, 35-იშ თანახმათ, მუქ შილებე გინაჭყვიდირაფუას პიროვნებას ჭეშმარიტებაშ გურაფა?
2 დუდშე მუქ გინგოჭყვიდირაფეს, ნამდა ქიდიჭყითკო ჭეშმარიტებაშ გურაფა? შილებე თეშ მიზეზ იეჰოვაშ ხალხიშ ჯგირ საქციელ რდუ (1 პეტ. 2:12). ვარდა შილებე თი ჸოროფა, ნამდგას ღორონთიშ ხალხ გიმირჩქინანს. ბრელ, მით პირველო მოურს კრებაშ შეხვალამაშა, ორწყე ჸოროფას დო თენა უმოსო ემახსოვრებ, ვინემ თინა, მუთ შეხვალამას მირჩქილუ. თენა ვა რე გასაკვირ, მუშენდა იესოქ თქუ, ნამდა მუშ მიმაჸუნალეფიშ გიშაჩინებელ ნიშან ჸოროფა იჸუაფუდ (წეკითხით იოანეშ 13:34, 35). ჸოროფა, ნამუთ ღორონთიშ ხალხ შქას რე, მოხვარნა გეგშეფჩინათ, მი რენა ღორონთიშ მსახურეფ. მარა ძალიერ რწმენა ქომღუდანინ, ხვალე თენა ვა რე დასაბაღ.
3. მუქ შილებე მოხვადას, თქვან რწმენა ხვალე ქრისტიანულ ჸოროფაშა გერსხილ ქიჸუაფ-და?
3 ჩქინ რწმენა ხვალე თი ქრისტიანულ ჸოროფაშა ოკო ვა რდას გერსხილ, ნამუთ ღორონთიშ ხალხ შქას რე. მუშენ იფჩიებუთ თეს? თიშენ, ნამდა ჩქინ რწმენა ხვალე ჸოროფაშა გერსხილ ქიჸუაფ-და, შილებე ადვილო მივოდინუათ თინა. მაგალთო წერმიდგინით, ნამდა თანაქრისტიანქ, ნამუთ შილებე უხუცეს ვარდა პიონერ რდას, სერიოზულ ცოდვა ჩედინ; ვარდა თანაქრისტიანქ გოწყინებაფეს; ვარდა ნამდგაინქ განდგომილო გინირთჷ დო ამტკიცენს, ნამდა მუთ ბწანა, ჭეშმარიტება ვა რე. თეცალ მუდგარენეფქ ქუმოხვად-და, დებრკოლებუთო დო მიოტენთო იეჰოვაშ მსახურებას? თაშ ნამდა, ძალიერ რწმენა გიღდანინ ქუგოკონა-და, თინა იეჰოვაწკუმა ხოლოშიან ურთიერთობაშა ოკო რდას გერსხილ დო ვართ ხოლო შხვეფიშ საქციელშა. შხვანერო თქვან რწმენა ვეჸუაფ მტკიცე. თქვან რწმენაშ ჸუდეშ ოშენებელო ხვალე თიცალ ლიბ მასალა ოკო ვეგმირინუათ, მუნერით რე გრძნობეფ დო ემოციეფ. თეშ მანგიორო, რწმენა ძალიერ დო ლოგიკურ ფაქტეფშა ოკო რდას გერსხილ. თქვა ოკო დერწმუნათ, ნამდა მუთ ბიბლიაშე დიგურეთ ღორონთიშ გურშენ, ჭეშმარიტება რე (რომ. 12:2).
4. მუჭოთ მათეშ 13:3—6, 20, 21-ის ჭარჷ, მუჭო მოქმედენს ნამთინეწკუმა რწმენაშ გამოცდეფ?
4 იესოქ თქუ, ნამდა ნამთინე ჭეშმარიტებას „ხიოლით“ მიღენდჷ, მარა თინეფიშ რწმენას გამოცდეფშა ვა გარზინედ დო დოხუმუდ (წეკითხით მათეშ 13:3—6, 20, 21). შილებე თინეფს ჯგირო ვარჩქილედეს, ნამდა იესოშ მეჸუნა სირთულეეფ დო პრობლემეფწკუმა იჸუაფუდ დაკავშირებულ (მათ. 16:24). ვარდა შილებე თინეფ ფიქრენდესკო, ნამდა ქრისტიანობა პრობლემეფშე თავისფალ ცხოვრებას ნიშნენდჷ, ნამდგას ხვალე კურთხევეფ მაჸუნუდ დო ვართ ხოლო სირთულეეფ. მარა ონდო თე ქვეყნიერება არსებენს, სირთულეეფ ირიათო იჸუაფ. ათეშენ, მინშა შილებე ჩქინ ცხოვრებას მუდგარენეფქ დითირას დო თექ ხიოლ მიმოდინაფუან (ფსალმ. 6:6; ეკლ. 9:11).
5. მუჭო ოძირანს ჩქინ და დო ჯიმალეფიშ უმენტაშ, ნამდა დარწმუნებულ რე, მუთ წანს, ჭეშმარიტება რე?
5 ჩქინ და დო ჯიმალეფიშ უმენტაშ ოძირანს, ნამდა დარწმუნებულ რე, მუთ წანს, ჭეშმარიტება რე. მუშენ შემლებნა თეშ რაგად? თინეფ ძალიერ რწმენას ვადინუანა თიმწკუმა ხოლო, მუჟამსით თანაქრისტიან ოწყინებაფუანს ვარდა მიდგაინ ქრისტიანს ვასქვანსინ თეშ იქციებ (ფსალმ. 119:165). გამოცდეფიშ დროს თინეფიშ რწმენა ხოლო უმოსო იმანგარებ (იაკ. 1:2—4). მუჭო შეილებნა, გევითარათ თეცალ ძალიერ რწმენა?
მიღით „ღორონთიშ გურშენ ზუსტ რჩქინა“
6. მუშა რდუ გერსხილ პირველ საუკუნეშ ქრისტიანეფიშ რწმენა?
6 პირველ საუკუნეშ ქრისტიანეფიშ რწმენა წმინდა წერილეფიშ დო იესოშ გურაფეფიშ, შხვა სიტყვეფით ქოფთქუათინ „სახიოლო ამბეშ ჭეშმარიტებაშ“ ზუსტ რჩქინაშა რდუ გერსხილ (გალ. 2:5). თე ჭეშმარიტებაშა მიშურს ირფელ, მუთ ქრისტიანეფს ბწანა, თინეფ შქას იესოშ გიშაჸიდირალ მსხვერპლ დო იესოშ გათელება. მოციქულ პავლე დარწმუნებულ რდუ თე გურაფეფიშ ჭეშმარიტებაშა. მუშენ იფჩიებუთ თეს? თინა წმინდა წერილეფიშ გიმორნაფათ ამტკიცენდჷ, ნამდა „ქრისტექ ოკო იტანჯკო დო გეთელკო“ (საქ. 17:2, 3). პირველ საუკუნეშ ქრისტიანეფქ მიღეს თე გურაფეფ დო ჯერდეს, ნამდა წმინდა შურ ქიმეხვარებუდ თინეფს ღორონთიშ სიტყვაშ ინონჭაფას. თინეფ წმინდა წერილეფს ირკვიენდეს თიშა დარწმუნებელო, ნამდა თე გურაფეფ ღორონთიშ სიტყვაშა რდუ გერსხილ (საქ. 17:11, 12; ებრ. 5:14). თინეფიშ რწმენა ხვალე გრძნობეფ დო ემოციეფშა ვარდჷ გერსხილ; თინეფ ვართ თიშენ ომსახურდეს იეჰოვას, ნამდა მოწონდეს თანაქრისტიანეფწკუმა ურთიერთობა. თეშ გინაწონს, თინეფიშ რწმენაშ საფუძველ „ღორონთიშ გურშენ ზუსტ რჩქინა“ რდუ (კოლ. 1:9, 10).
7. მუს მიმეხვარებნა ბიბლიურ გურაფეფიშ ძალიერ რწმენა?
7 ღორონთიშ სიტყვას ინოჭარილ ჭეშმარიტება დღას ვეთირუ (ფსალმ. 119:160). მაგალთო, თინა ვეთირუ, მუჟამსით თანაქრისტიან მოწყინებაფუანა ვარდა სერიოზულ ცოდვას ჩედინენს. ჭეშმარიტება ვართ თიმწკუმა ითირუ, მუჟამსით პრობლემეფს შეფხვადუთ. თაშ ნამდა, ჯგირო ოკო მარჩქილედან ბიბლიურ გურაფეფ დო ბჯერდან, ნამდა თინა ჭეშმარიტება რე. ბიბლიურ გურაფეფიშ ძალიერ რწმენა ქომღუნა-და, თენა მიმეხვარებნა, სირთულეეფიშ დროს იეჰოვაშ ართგურეფ ქუდოფსქიდათ, მუჭოთ ღუზა ოხვარ ნავს ქარბორიაშ დროს. მუჭო შემლებნა ხოლო უმოსო დებრწმუნათ, ნამდა მუთ ბწანა, ჭეშმარიტება რე?
დერწმუნით თიშა, მუთ რწანა
8. მუჭოთ 2 ტიმოთეშ 3:14, 15-შე იძირე, მუჭო დერწმუნ ტიმოთექ, ნამდა მუთ წანდჷ, ჭეშმარიტება რდუ?
8 ტიმოთე დარწმუნებულ რდუ, ნამდა მუთ წანდჷ ჭეშმარიტება რდუ. მუჭო დერწმუნ თიქ თეშა? (წეკითხით 2 ტიმოთეშ 3:14, 15). ტიმოთეს დიდა დო ბებიქ დაგურეს წმინდა წერილეფიშ გურაფეფ. მუშო ოკო რაგად, თინა პირადო ხოლო გეგმურთუნდჷ დროს დო ენერგიას წმინდა წერილეფიშ გიმორკვიებას. ათეშენ, თინა დარწმუნებულ რდუ, ნამდა მუთ თექ ჭარუდ ჭეშმარიტება რდუ. თეშ უკულ, ტიმოთექ, დიამუშიქ დო თიშ ბებიქ ქიდიგურეს ქრისტიანულ გურაფეფ. თი ჸოროფაქ, ნამდგას ქრისტიანეფ გიმირჩქინანდეს, იმოქმედ ტიმოთეშა დო გურჩქინ ძალიერ სურვილ, ითანამშრომლუკო სულიერ და დო ჯიმალეფწკუმა დო იზრუნკო თინეფშე (ფილ. 2:19, 20). მარა ტიმოთეშ რწმენა ადამიანეფიშ ჸოროფაშა ვარინ, ბიბლიურ გურაფეფშა რდუ გერსხილ. თის მტკიცას წანდჷ, ნამდა თე გურაფეფ ჭეშმარიტება რდუ დო თექ სურვილ გურჩქინ, უმოსო დეახლოვკო იეჰოვას. თქვა ხოლო ოკო გეგმირკუათ ბიბლია დო დერწმუნათ, ნამდა მუთ იეჰოვაშ გურშენ დიგურეთ, ჭეშმარიტება რე.
9. ნამ სუმ ძირითად ჭეშმარიტებაშა ოკო დერწმუნათ?
9 დუდშე თქვა ოკო დერწმუნათ სუმ ძირითად ჭეშმარიტებაშა. პირველ, თქვა ოკო რწანდან, ნამდა იეჰოვა ღორონთ რე ირფელიშ გუმაჭყაფალ (გამ. 3:14, 15; ებრ. 3:4; გამოცხ. 4:11). მაჟია, თქვა ოკო რწანდან, ნამდა ბიბლია ღორონთშე შთაგონებულ ცნობა რე კაცობრიობაშო (2 ტიმ. 3:16, 17). დო მასმა, თქვა ოკო რჯერდან, ნამდა იეჰოვას დედამიწას ჸუნს ორგანიზებულ ჯგუფ, ნამუთ ქრისტეშ ხემძღვანელობათ თაყვანს ცენს თის დო თე ჯგუფ იეჰოვაშ მოწმეეფ რენა (ეს. 43:10—12; იოან. 14:6; საქ. 15:14). მარა თე ძირითად ბიბლიურ ჭეშმარიტებეფშა დარწმუნება ვა ნიშნენს, ნამდა ბიბლიაშე ირფელ გიჩქნა. თქვან მიზან ოკო რდას, გეგმირინუათ მსჯელობაშ უნარ თიშა დარწმუნებელო, ნამდა მუთ რწანა, ჭეშმარიტება რე (რომ. 12:1).
მემზადით, ნამდა შხვეფ ხოლო დარწმუნათ ჭეშმარიტებაშა
10. მუ ოკო ვაკეთათ ჭეშმარიტებაშ გაგებაშ უკულ?
10 თიშ უკულ, მუთ დერწმუნებუთ სუმ ძირითად ჭეშმარიტებაშა, ნამუთ ოხუ ღორონთის, ბიბლიას დო ღორონთიშ ხალხის, თქვა ოკო შეილებდან, წმინდა წერილეფიშ გიმორნაფათ, შხვეფ ხოლო დარწმუნათ თე ჭეშმარიტებაშა. მუშენ იფჩიებუთ თეს? ჩქი ქრისტეშ მოწაფეეფ ვორეთ დო მიღნა პასუხიშმგებლობა, ნამდა ჭეშმარიტება, ნამუთ მიჩქნა, ვოგურუათ თინეფს, მიდგას მორჩქილაფაშ სურვილ უღჷ (1 ტიმ. 4:16). * მუჟამსით ვოცადუთ, შხვეფ დუვარწმუნათ ბიბლიურ ჭეშმარიტებაშა, ხოლო უმოსო იბრწმუნებუთ, ნამდა მუთ ბწანა, ჭეშმარიტება რე.
11. მუ მაგალითის მარზენა პავლე მოციქულ დო მუჭო შემლებნა, მივაჸუნათ თიშ მაგალითის, შხვეფშა ჭეშმარიტებაშ გურაფაშ დროს?
11 მუჟამსით მოციქულ პავლე ხალხის ოგურუანდჷ, თინა „საფუძვლიანო უმოწმენდჷ ღორონთიშ სამეფოშენ დო დამაჯერებელო ურაგადუდ იესოშ გურშენ, მოსეშ კანონშე დო წინასწარმეტყველეფიშ წიგნეფშე“ (საქ. 28:23). მუჭო შემლებნა მივაჸუნათ პავლეშ მაგალითის, შხვეფშა ჭეშმარიტებაშ გურაფაშ დროს? ჩქი ფაქტეფიშ გინოჩამაშე მეტ ოკო ვაკეთათ; ოკო მივეხვარათ ბიბლიაშ მაგურაფალეფს, გიმირკვიან დო იფიქრან თიშე, მუდგასით ბიბლიაშე გურაფლენა. ვა მოკონა, თინეფქ ჩქინ პატიცემათ მიღან ჭეშმარიტება. თეშ გინაწონს, ჩქინ სურვილ რე, თინეფქ დერწმუნან, ნამდა მუდგას ბიბლიაშე მოჸოროფე ღორონთიშ გურშენ გურაფლენა, ჭეშმარიტება რე.
მშობლეფ, ქუდაგურეთ სქუალეფს „ღორონთიშ სიტომბეეფ“ დო თეშნერო ქიმეხვარით ძალიერ რწმენაშ გავითარებას (ქოძირით აბზაცეფი 12, 13) *
12, 13. მუჭო შეულებნა მშობლეფს, ქიმეხვარან სქუალეფს, ჭეშმარიტებას ქუდოსქიდან?
12 მშობლეფ, ბჯერა, ნამდა გოკონა თქვან სქუალეფქ ჭეშმარიტებას ქუდოსქიდან. შილებე ფიქრენთ, ნამდა თინეფს კრებას ჯგირ მეგობრეფ ქაჸვენნა-და, სულიერო წიმი მიდულა. მარა თქვან სქუალეფქ ბიბლიურ გურაფეფიშ ჭეშმარიტებაშა დერწმუნანინ, ვა რე დასაბაღ, ჯგირ მეგობრეფ ჸუნდან. თინეფს პირად ურთიერთობა ოკო უღდან ღორონთწკუმა დო ოკო დერწმუნან, ნამდა მუდგას ბიბლია ოგურუანს, ჭეშმარიტება რე.
13 მშობლეფქ სქუალეფს ბიბლიურ ჭეშმარიტება ქუდაგურუანინ, მუნეფქ ოკო მეჩან ბიბლიაშ გიმორკვიებაშ ჯგირ მაგალით. თინეფქ დრო ოკო გუმურთან ნაგურეფშე ფიქრის. თეშ უკულ შეიალებენა, იგივეშ კეთება ქუდაგურუან მუნეფიშ სქუალეფს. მშობლეფქ ოკო დაგურუან სქუალეფს ბიბლიაშ გიმარკვიებელ საშვალებეფიშ გიმორნაფა, მუჭოთ თეს ბიბლიაშ მაგურაფალს დაგურუანდეს. თეშნერო, მეხვარებნა მუნეფიშ სქუალეფს, უჸორდან იეჰოვა დო დერწმუნან, ნამდა თინა ართგურ დო გონიერ მონაშ საშვალებათ მარზენა სულიერ საზრდოს (მათ. 24:45—47). მშობლეფ, ვედეკმაყოფილათ თქვან სქუალეფშა ხვალე ძირითად ბიბლიურ ჭეშმარიტებაშ დოგურაფათ. სქუალეფიშ ასაკ დო უნარიშ გათვალისწინებათ ქუდაგურეთ თინეფს „ღორონთიშ სიტომბეეფ“ დო თეშნერო ქიმეხვარით ძალიერ რწმენაშ გავითარებას (1 კორ. 2:10).
გეგმირკვით ბიბლიურ წინასწარმეტყველებეფ
14. მუშენ ოკო გიმიბრკვიათ ბიბლიურ წინასწარმეტყველებეფ? (ქოძირით ჩარჩო „შეილებნო გენწყე თე წინასწარმეტყველებეფ?“)
14 ბიბლიურ წინასწარმეტყველებეფ ღორონთიშ სიტყვაშ მნიშვნელოვან ნაწილ რე დო მოხვარნა ძალიერ რწმენაშ გავითარებას. ნამ წინასწარმეტყველებეფქ გამანგარ თქვან რწმენა? შილებე თენა ბოლო დღალეფიშ გურშენ წინასწარმეტყველება რდუკო (2 ტიმ. 3:1—5; მათ. 24:3, 7). მარა მუშ რაგად შილებე შხვა შესრულებურ წინასწარმეტყველებეფშე, შეულებნო თინეფს გამანგარას ჩქინ რწმენა? მაგალთო, შეილებნანო გენწყათ დანიელიშ მა-2 ვარდა მა-11 დუდის ინოჭარილ წინასწარმეტყველებეფ, ნამდგაქ ულირს შისრულ დო ამდღა ხოლო ისრულებ? * თქვან რწმენა ბიბლიაშა გერსხილ ქიჸუაფ-და, თინა დღას ვეკოცენს. გუვარჩუათ ჩქინ და დო ჯიმალეფიშ მაგალით, მიდგას მაჟია მსოფლიო ომიშ დროს, გერმანიას სასტიკო თხოზუდეს. თიშ უმკუჯინუო, ნამდა ბოლოშა ვარჩქილედეს ბოლო დღალეფწკუმა დაკავშირებულ წინასწარმეტყველებეფ, თინეფს მტკიცას წანდეს ღორონთიშ სიტყვა.
ბიბლიაშ, თინეფ შქას წინასწარმეტყველებეფიშ გიმორკვიება, მიმეხვარებნა, ართგურეფ ქუდოფსქიდათ განსაცდელეფიშ დროს (ქოძირით აბზაცეფი 15—17) *
15—17. მუჭო გამანგარ ბიბლიაშ გიმორკვიებაქ თი და დო ჯიმალეფ, მიდგას ნაცისტეფ თხოზუდეს?
15 ნაცისტურ გერმანიას, ანთასობით ჩქინ და დო ჯიმა საკონცენტრაციო ბანაკეფშა გოუტეს. ჰიტლერს დო ესესიშ უნჩაშის, ჰეინრიხ ჰიმლერს, ჯოგდეს იეჰოვაშ მოწმეეფ. მუჭოთ ართ და იშინანდჷ, ართშა ჰიმლერქ საკონცენტრაციო ბანაკის დალეფიშ ჯგუფის უწუ: „თქვან იეჰოვა შილებე ზეცას რე მეფე, მარა თაქ, დედამიწას, ჩქი ვორეთ მართველეფ! ბძირათ, თქვა უმოს ხანს გარზუთ დოვარ ჩქი!“. მუქ მეხვარ ღორონთიშ ხალხის, ართგურო ქუდოსქიდკო?
16 ბიბლიაშ მარკვიებელეფს უჩქუდეს, ნამდა ღორონთიშ სამეფოქ 1914 წანას დიჭყჷ მართველობა. თინეფს ვა გაკვირებნა, ნამდა სასტიკ წინააღმდეგობას შეხვადეს სატანაშ ქვეყნიერებაშე. მარა თინეფ დარწმუნებულ რდეს, ნამდა მუთუნნერ ადამიანურ მართველობას ვეწარნედ ღორონთიშ განზრახვაშ შესრულებაშა. ჰიტლერს ვეშიალებუ მოსპუკო ჭეშმარიტ თაყვანიშმცემლობა დო დამყარკო მართველობა, ნამუთ ღორონთიშ სამეფოს გიორჯგინანდჷ. ჩქინ და დო ჯიმალეფ დარწმუნებულ რდეს, ნამდა ართ დროს ჰიტლერიშ მართველობა დესრულებუდ.
17 თე და დო ჯიმალეფიშ იმენდ ვა გამტყუნებე. ჭიჭე ხანშა ნაცისტურ რეჟიმქ აკოცუ დო ჰეირიხ ჰიმლერს, ნამუთ თეიშახ იჩიებუდ, დედამიწას ჩქი ვორეთ მართველეფია, დუდიშ ორსხებელო ონტებელქ აჸუ. თე დროს თიქ ქეშეხვად ყოფილ პატიმარს, ჯიმა ლუბკეს დო ქიჩინ თინა. გურგოტახილ ჰიმლერქ ჯიმა ლუბკეს კითხჷ: „ბიბლიაშ მარკვიებელ, ანწ მუ მოხვადუ?“. ჯიმა ლუბკექ გეუნწყჷ ჰიმლერს, ნამდა იეჰოვაშ მოწმეეფს დღას ვაეჭვუდეს, ნამდა ნაცისტურ რეჟიმ დესრულებუდ დო თინეფ გეთავისუფლებდეს. ჰიმლერს, ნამუთ თეიშახ ბრელ გლახას იჩიებუდ იეჰოვაშ მოწმეეფიშ გურშენ, ასე ვა უჩქუდ მუ თქუკო. თეშ უკულ, მალას თიქ დუდ დიჸვილ. მუს ბგურაფლენთ თე შემთხვევაშე? ბიბლიაშ, თინეფ შქას წინასწარმეტყველებეფიშ გიმორკვიებას, შეულებ მიმეხვარან თიცალ რწმენაშ გავითარებას, ნამუთ დღას ვეკოცენს. თენა მიმეხვარებნა, ბოლოშა მივენდათ იეჰოვას განსაცდელეფიშ დროს (2 პეტ. 1:19—21).
18. იოანეშ 6:67, 68-შ თანახმათ, მუშენ ოკო მიბღათ „ზუსტ რჩქინა“, ნამუთ მოციქულ პავლექ მიშინუ?
18 ჩქი, თითოულქ ოკო გიმიფრჩქინათ ჸოროფა — ჭეშმარიტ ქრისტიანეფიშ გიშაჩინებელ ნიშან. მარა თეწკუმა ართო, „ზუსტ რჩქინა“ ხოლო მოსაჭირნა (ფილ. 1:9). შხვანერო ჩქინდე „გურაფაშ ირნერ ბორია“ ქიმოქმედენს, თინეფ შქას განდგომილეფიშ გურაფეფ (ეფეს. 4:14). მუჟამსით პირველ საუკუნეს, ბრელ მოწაფექ მიოტუ იესოწკუმა ართო გილულა, მოციქულ პეტრექ მტკიცას გეგმოხანტჷ, ნამდა ჯერდჷ იესოშ დო თქუ, ნამდა იესოს უღუდ „მარადიულ სიცოცხლეშ სიტყვეფ“ (წეკითხით იოანეშ 6:67, 68). თიშ უმკუჯინუო, ნამდა თე დროს პეტრეს ბოლოშა ვარჩქილედ იესოშ გურაფეფ, თიქ ართგურო ქუდოსქიდ, მუშენდა დარწმუნებულ რდუ, ნამდა იესო ღორონთიქ მაშქვჷ. თქვა ხოლო შეილებნა, ხოლო უმოსო დერწმუნათ ბიბლიურ გურაფეფშა. თაშ ქიმიქციებუთ-და, თქვან რწმენა ქუგურზუ გამოცდეფს დო შხვეფს ხოლო ქიმეხვარებუთ ძალიერ რწმენაშ გავითარებას (2 იოან. 1, 2).
ობირეში 72 სამეფოშ სიმართლეს ვაცხადენთ
^ აბზ. 5 თე სტატია მიმეხვარებნა, დუვაფასათ ღორონთიშ სიტყვას ინოჭარილ ჭეშმარიტება. თეს გეძინელ, გუვარჩიენთ, მუჭო შემლებნა ხოლო უმოსო დებრწმუნათ, ნამდა მუთ ბწანა, ჭეშმარიტება რე.
^ აბზ. 10 ძირითად ბიბლიურ გურაფეფიშ გურშენ შხვეფწკუმა ჩიებას მიგეხვარებნა 2010—2015 წანეფიშ „გინაჯინალ კოშკის“ მოჩამილ სტატიეფ: „ღმერთია იესო?“; „როდის დაიწყო ღვთის სამეფომ მმართველობა? — ნაწილი 1“, „როდის დაიწყო ღვთის სამეფომ მმართველობა? — ნაწილი 2“; „აწამებს ღმერთი ადამიანებს ჯოჯოხეთის ცეცხლში?“, სტატიეფიშ სერიაშე „საუბრები ბიბლიურ თემებზე“[ქორთ.].
^ აბზ. 14 თე წინასწარმეტყველებეფიშ გურშენ მეტიშ გაგებელო, ქოძირით 2012 წანაშ 15 ივანობაშ „გინაჯინალ კოშკი“, გვ. 7—11; 12, 13; 14—18; [ქორთ.] დო 2020 წანაშ მესიშ „გინაჯინალ კოშკი“.
