ბიოგრაფია
თინა ვაკეთ, მუთ ოკო მიკეთებუდკო
დონალდ რიდლი 30 წანაშე მეტ ხანს იეჰოვაშ მოწმეეფიშ ინტერესეფს იცვენდჷ სასამართლოს. თიქ ბრელ მუდგარენ აკეთ თი პაციენტეფიშ უფლებეფიშ დაცვებელო, მით ვარიას იჩიებდეს ზისხირიშ გინობუნაშე. თიშ მოხვარათ იეჰოვაშ მოწმეეფქ ბრელ საქმე მიგეს შეერთებულ შტატეფიშ უზენაეს სასამართლოეფს. მეგობრეფ თის დონს უძახდეს, თინა გონიერ, თანდაბალ დო დუდგინოდვალირ პიროვნება რდუ.
დონს, 2019 წანას, იშვიათ ნევროლოგიურ ლახალაშ დიაგნოზ ქიგუშქვეს, ნამდგაშა მუთუნ ვემიხვარებე. თე ლახალაქ ხეთე გევითარ დო 2019 წანაშ 16 არგუსოს დონქ დოღურ. თენა დონიშ ბიოგრაფია რე.
დებაბდჷ 1954 წანას, სენტ პოლს, მინესოტაშ შტატის, საშვალო ფენაშ ოჯახის. ჩქიმ მშობლეფ კათოლიკეეფ რდეს. მა მაჟია ვორდჷ ხუთ სქუაშე. თიშ უმკუჯინუო, ნამდა კათოლიკურ სკოლას ბგურაფლენდჷ დო სტიქაროსან ვორდჷ, ბრელ მუთუნ ვა მიჩქუდ ბიბლიაშენ. მართალ რე, ბჯერდჷ, ნამდა არსებენდჷ ირფელიშ გუმაჭყაფალ ღორონთ, მარა ფიფქრენდჷ, ნამდა კათოლიკურ ეკლესიას ვეშულებუდ, მიმეხვარკო თიშ თაყვანიშცემას.
ჭეშმარიტებაშ გაგება
უილიამ მიტჩელიშ სამართალიშ სკოლას გურაფაშ პირველ წანას, იეჰოვაშ მოწმეეფქ ჸუდეშა ქუმმაკითხეს. თე დროს ონახვალეფს ბნახუნდჷ დო ვა ბჩოდუდ. ათეშენ, თინეფქ ქომწის, ნამდა შხვა დროს ქუმმაკითხანდეს. ქუმორთესინ ჟირ კითხვა დუსვჷ თინეფს: „მუშენ რე გლახა კათა უმოს წარმატებულ?“ დო „მუ რე საჭირო ნამდვილ ბედნერობაშო?“. თინეფქ მუჩეს წიგნ „მარადიულ სიცოცხლეშა მიმაჸუნაფალ ჭეშმარიტება“ დო „ბიბლიაშ ახალ ქიანაშ თარგმანი“, ნამუთ გალეშე მწვანე ფერ რდუ. თეს გეძინელ, ბიბლიაშ გურაფა ხოლო ქიდიბჭყჷ. თექ ბრელ მუდგარენიშ გაგებას მიმეხვარ. ჩქიმდე მანგარო იმოქმედ თიშ გაგებაქ, ნამდა ღორონთიშ სამეფო რე მთავრობა, ნამუთ მთელ დედამიწას იმართველენს. ვორწყედ, ნამდა ადამიანურ მართველობაქ შურო ვა გამართლჷ დო თიქ ქიანაშ ჭუა, ტანჯება დო უსამართლობა მოუღჷ ადამიანეფს.
იეჰოვას დუდ მევუძღვინ 1982 წანაშ დაჭყაფუს დო თე წანაშ ბოლოს დიბნათ კონგრესის „სამეფოშ ჭეშმარიტება“, ნამდგაქ სენტ პოლიშ ართ-ართ დიდ შენობას ჩეტარ. უკულიან მარას თე შენობაშა კინ ქიმეფრთჷ, ნამდა გამოცდეფ ჩამბარებუდკო. ოქტომბერიშ დაჭყაფუს, ქიგებგჷ, ნამდა გამოცდეფ ჩუვაბარ დო ადვოკატო მუშობა შემლებუდ.
კონგრესის, „სამეფოშ ჭეშმარიტება“, გეფჩინებაფე მიკ რიჩარდსონ, ნამუთ ბრუკლინიშ ბეთელს მსახურენდჷ, თიქ მიწუ, ნამდა მთავარ სამმართველოს იურიდიულ განყოფილებაქ ჩემეყალიბ. ქუგმაშინ საქმეეფიშ 8:36-ის ინოჭარილ სიტყვეფქ დო ჩქიმ დუდის ბკითხჷ: მუ მოცილ იურიდიულ განყოფილებას ვიმსახურენ? გეგნობჭყვიდ, ბეთელიშ ბლანკ შევავსკო.
ჩქიმ მშობლეფს ვახიოლეს იეჰოვაშ მოწმეთ გინიფრთინ. მუაჩქიმქ ბკითხჷ, მუთუნ ჯგირობუას ქუმუღანდუო ბეთელს მსახურება ჩქიმ კარიერას. მა გევუნწყჷ, ნამდა თექ მოხალისე იპჸიდ დო ვუწი, ნამდა თუთას 75 დოლარს მუჩანდეს, მუთ ირთუთიან შემწეობა რდუ ბეთელელეფშო.
მარა ბეთელშა ხეთე ვა მალნედ, მუშენდა სასამართლოს მუშობაშენ უკვე თანხმობა მაფუდ რაგადებულ. ათეშენ, ბრუკლინიშ ბეთელს მსახურება 1984 წანას დიბჭყჷ. იურიდიულ განყოფილებას ვმსახურენდჷ. სასამართლოს მეღებულ გამოცდილებაქ მუმამზად თიშო, მუთ წიმი მელუდ.
სტენლიშ თეატრიშ გინოკეთება
თეცალ რდუ სტენლიშ თეატრ, მუჟამსით ჩქინ ორგანიზაციაქ თინა იჸიდ
სტენლიშ თეატრ ჯერზი-სიტის (ნიუ-ჯერზის), 1983 წანაშ ნოემბერს იჸიდ ორგანიზაციაქ. ჯიმალეფქ ქითხის თე შენობეფიშ ელექტრო დო სანტექნიკაშ სისტემეფიშ გარემონტებაშ უფლება. მუჟამსით თინეფქ ადგილობრივ ხელისუფლებაშ წარმომადგენელეფს ქეშეხვადეს, გეუნწყეს, ნამდა ოკოდეს სტენლიშ თეატრიშ იეჰოვაშ მოწმეეფიშ საკონგრესო დარბაზო გიმორნაფა. თეს პრობლემეფქ ქუმაჸუნ. ჯერზი სიტიშ კანონ, ნამუთ შენობეფიშ გიმორნაფას ოხუდ, ითხინდჷ, ნამდა რელიგიურ თაყვანიშცემაშო გიმარნაფალ შენობეფ ქალაქიშ დასახლებურ ზონას ოკო ჸოფედკო. მარა სტენლიშ თეატრ ქალაქიშ კომერციულ ზონას რდუ, ათეშენ, ხელისუფლებაშ წარმომადგენლეფქ რემონტიშ უფლება ვა მუჩეს. ჯიმალეფქ თე გადაწყვეტილება გასაჩივრეს, მარა სარჩელქ ვარიებულქ იჸუ.
ბეთელს ჩქიმ მსახურებაშ პირველ მარას, ორგანიზაციაქ თე საქმე ფედერალურ ოლქიშ სასამართლოშა გემშეღ, ნამდა რემონტიშ უფლება ქომჩესკო. სენტ პოლს, მინესოტას, საოლქო სასამართლოს მუშობა ახალ ნათებ მაფუდ; თექ ჟირ წანას მუფშენდჷ. ათეშენ, თეცალ საქმეეფ ჩქიმო უცხო ვარდჷ. ჩქინ ართ-ართ იურისტიქ თქუ, ნამდა სტენლიშ თეატრის შხვადოშხვა ღონისძიებეფ იტარებუდ, კინოეფშე დოჭყაფილ როკ კონცერტეფით თებულ. მუშენ ოკო ვეშილებედკო თიშ გიმორნაფა რელიგიურ ღონისძიებეფშო? ფედერალურ ოლქიშ სასამართლოქ გარჩუ თე საქმე დო გინოჭყვიდ, ნამდა ჯერზი-სიტი ჩქინ რელიგიურ თავისუფლებაშ უფლებას ვეცვენდჷ. სასამართლოქ მოთხუ ქალაქიშ ხემძღვანელობას, ნამდა ჩქინდა რემონტიშ უფლება ქუმუჩამუდკო. არგამათ ვორწყედ, მუჭო აკურთხენდჷ იეჰოვა მუშ ორგანიზაციას იურიდიულ უფლებეფიშ გიმორნაფათ, ნამდა მუშ საქმექ წიმი მიდართკო. ბედნერ ვორდჷ, ნამდა მა ხოლო მიბღჷ თე ირფელს მონაწილება.
ჯიმალეფქ ქიდიჭყეს შენობაშ რემონტ, მუთ მართალო დიდ პროექტ რდუ. რემონტიშ დოჭყაფაშე ართ წანა ხოლო ვარდჷ მიკულირ, მუჟამსით 1985 წანაშ 8 სექტემბერს, ჯერზი-სიტიშ საკონგრესო დარბაზის ჩეტარ გალაადიშ 79-ა კლასიშ გამოშვებაშ პროგრამაქ. ჩქიმო დიდ პატი რდუ, ნამდა იურიდიულ განყოფილებაწკუმა ართო ხე შევუნწყი სამეფოშ საქმეშ წიმი ულას. თიცალ ხიოლს ბგინაფლენდჷ, მუნერით ბეთელს მსახურებაშახ, იურისტო მუშობაშ დროს ვა ნობღვე. თიმწკუმა აზრო ხოლო ვამმალედ, ნამდა იეჰოვა ბრელ თეცალ საქმეშო გეგმომრინუანდჷ.
პაციენტეფიშ უფლებეფიშ დაცვება ზისხირიშ უმშო მკურნალობაშო
ექიმეფ დო საავადმყოფოეფ, 1980-იან წანეფს, პატის ვა ცენდეს იეჰოვაშ მოწმე პაციენტიშ უფლებას, ნამდგას ზისხირიშ უმშო ოკოდ მკურნალობა. ხშირას მოსამართლეეფ ფიქრენდეს, ნამდა ორსულ ოსურს ვა უღუდ უფლება, ვარია თქუკო ზისხირიშ გინობუნაშე. მოსამართლეეფ იჩიებდეს, ნამდა შილებედ დიდაქ დოღურკო დო ბაღანა ომბოლო ქიმწოსქიდუდ.
ართ დაქ, დენიზ ნიკოლაუქ, 1988 წანაშ 29 დეკემბერს მშობიარობაშ უკულ ბრელ ზისხირ ოდინუ. თიშ უკულ, მუთ ჰემოგლობინქ 5.0-შე უმოს თუდო ქუდუოლ, მუშ ექიმქ უწუ, ნამდა ზისხირ ოკო გეგნიბკო, მარა თე დაქ ვარია თქუ. მაჟია ოჭმარეს, საავადმყოფოქ სასამართლოს თხუ, ქიმუჩამუდკო პაციენტშა ზისხირიშ გინობუნაშ უფლება. მოსამართლექ ვართ თე დას დო ვართ თიშ ქომონჯის ვემეჩეს მუნეფიშ პოზიციაშ ენწყუმაშ საშვალება. ხვალე თენა ვარინ, თინა ხოლო ვა უწუეს, ნამდა საავადმყოფოს თე დაშა ზისხირიშ გინობუნაშ უფლება მეჩეს.
თიშ უმკუჯინუო, ნამდა თე დაშ ქომონჯ დო ოჯახიშ შხვა წევრეფ ზისხირიშ გინობუნაშ წინააღმდეგ რდეს, ობიშხას, 30 დეკემბერს, საავადმყოფოშ მედპერსონალქ თე დას იშენით გეგნუბ ზისხირ. თიმ ონჯუას, თე დაშ ოჯახიშ მუსხირენ წევრ დო ნამთინე უხუცეს ოჭოფეს, მუშენდა თინეფ შარას უკილანდეს ექიმეფს, ნამდა თე დაშა ზისხირ ვეგნუბუნდესკო. 31 დეკემბერს, საბატონ ოჭმარეს, ნიუ-იორკიშ გაზეთეფ დო ტელე დო რადიო მაუწყებლობა გინოჩანდჷ თინეფიშ ამბეს.
ახალგაზრდობას ფილიპ ბრამლიწკუმა ართო
თუთაშხა ოჭმარეს, უმაღლეს სასამართლოშ მოსამართლეს, მილტონ მოლენს ქუდურაგადე. თის ქუვოძირ თე საქმეს არსებულ ფაქტეფ დო გევუნწყჷ, ნამდა ართ მოსამართლექ საქმეშ მორჩქილაფაშ უმშო მაჭარ ხე ზისხირიშ გინობუნაშ უფლებას. მოსამართლე მოლენქ ფთხუ, ნამდა თიმ დღას უმოს გვიანო თიშ ოფისშა ქიმეფრთიკო დო ართო გუვარჩითკო საქმეშ დეტალეფ დო თიწკუმა დაკავშირებულ კანონეფ. ჩქიმ ზედამხედველქ, ფილიპ ბრამლიქ, მოლმაჸუნ მოსამართლე მოლენშა. თე მოსამართლექ საავადმყოფოშ იურისტეფ ხოლო ქიჭანუ. მანგარ დაძაბულ რაგად მიღდეს. ჯიმა ბრამლიქ მუშ ჩანაწერეფიშ რვეულშა ქიგემჭარ, ნამდა ხონარს ოკო დუკინკო. თენა მართალო ჯგირ რჩევა რდუ, მუშენდა გაღიზიანებულ ვორდჷ დო ვოცადუდ დუვამტკიცკო, ნამდა საავადმყოფოშ იურისტეფ ვა რდეს მართალ.
კვარჩხანშე მარძგვანშა: რიჩარდ მოკი, გრეგორი ოლდზი, პოლ პოლიდორო, ფილიპ ბრამლი, მა დო მარიო მორენო — ჩქინ იურისტეფ, მით მონაწილებას ღებულენდეს შეერთებულ შტატეფიშ უზენაეს სასამართლოს ართ-ართ საქმეს „გინაჯინალ კოშკ სტრატონიშ წინააღმდეგ“ (ქოძირით 2003 წანაშ 8 იანარიშ „გეგშაკურცხით!“, გვ. 3, 4; 4, 5; 6—8; 9—11)
სოდგარენ ართ საათიშ უკულ მოსამართლე მოლენქ თქუ, ნამდა მაჟია ოჭმარეს პირველ რიგის თე საქმეს გარჩიენდჷ. თიშ კაბინეტშე გიმურდითინ, მოსამართლე მოლენქ თქუ, ნამდა საავადმყოფოშ იურისტეფს სერიოზულ მომზადება დესაჭირებდეს მაჟია დღაშო. მუთ ნიშნენდჷ, ნამდა თინეფს გვალო ეფას ხოლო ვა დამტკიცებედეს, ნამდა საავადმყოფოს უღუდ უფლება, და ნიკოლაუს დანძალკო ზისხირიშ გინობუნა. ბგინაფლენდჷ, მუჭო მარწმუნენდჷ იეჰოვა, ნამდა თე საქმეს მიბგენდით. მართალო სარკო რდუ თიშ ძირაფა, მუჭო გიმომრინუანდეს იეჰოვა მუშ ნებაშ შეიოსრულებერო.
თიმ სერს გვიანშახ მუფშენდით, ნამდა ჯგირო მივემზადითკო მაჟია ოჭმარეშო. სასამართლოშ შენობა ბრუკლინიშ ბეთელწკუმა ხოლოს რდუ, ათეშენ, ჩქინ განყოფილებაშ უმენტაშიქ თევრე კუჩხით იდჷ. თიშ უკულ, მუთ ოთხ მოსამართლექ ჩქინ არგუმენტეფ მირჩქილუ, თინეფქ გაუქმეს საავადმყოფოშა მეჩამილ ზისხირიშ გინობუნაშ უფლება. უმაღლეს სასამართლოქ და ნიკოლაუშ მხარე ქიდეკინ დო აღნიშნჷ, ნამდა საბუთშა ხეშ მოჭარუა პაციენტიშ აზრიშ გაგებაშ უმშო ადამიანიშ უფლებეფიშ უხეშ დარღვევა რდუ.
ჭიჭე ხანიშ უკულ, ნიუ-იორკიშ უმაღლეს სასამართლოქ აღიარ, ნამდა და ნიკოლაუს უღუდ ზისხირიშ უმშო მკურნალობაშ უფლება. თენა რდუ პირველ სასამართლო გადაწყვეტილება შხვა ოთხ თეცალ საქმე შქას, ნამდგას მონაწილებაშ პატი მიღუდ (ქოძირით ჩარჩო „უზენაეს სასამართლოს მოგებულ საქმეეფ“). თეს გეძინელ, ბეთელს შხვა იურისტეფწკუმა ართო მონაწილება მიბღჷ თიცალ საქმეეფს, ნამუთ ოხუდ ბაღანეფშე მეურვეობაშ, ქონებაშ მართუაშ დო განქორწინებაშ უფლებას.
ქორწინება დო ოჯახურ ცხოვრება
ჩქიმ მეუღლე დენიზწკუმა ართო
მუჟამსით პირველო შეფხვად ჩქიმ ოსურს, დენიზის, თინა ქომონჯის ჩათხულ რდუ დო სუმ სქუას რდუნდჷ. თინა ქოთ მუშენდჷ დო ქოთ პიონერო მსახურენდჷ. თის რთულ ცხოვრება აფუდ მიკნაულა. ჩქიმდა მანგარო იმოქმედ თიქ, ნამდა თის მტკიცას აფუდ გინოჭყვიდილ იეჰოვაშ მსახურება. 1992 წანას ნიუ-იორკის ქიდვესწრით საოლქო კონგრესის „თინეფ სინთანა“, სოდეთ თის ბკითხჷ, ქორდჷ დოვარ თანახმას უჯგუშო გეფჩინებაფეთკო ართიან. წარმოწანაშ უკულ დებქორწინით. ძღვინ რე იეჰოვაშე, რჸუნდას სულიერო მოწიფულ დო მოჸოროფე ოსურ. დენიზწკუმა გატარებულ თითოულ დღა ძღვინ რე ჩქიმო (იგავ. 31:12).
მუჟამსით დებქორწინით ბაღანეფ 11, 13 დო 16 წანერეფ რდეს. მთელ გურით მოკოდ, ჯგირ მუმა პჸოფედკო თინეფშო, ათეშენ, ჩქინ პუბლიკაციეფს გურგედვალირო ბკითხულენდჷ დო გიმიბრინუანდჷ ირფელს, მუთ ჸონერ მშობელს ოხუდ. თე წანეფიშ დინახლე ბრელ სირთულეს შეფხვად, მარა მოხიოლ, ნამდა ბაღანეფქ სანდო მეგობარო დო მოჸოროფე მუმათ მემღეს. ჩქი ჯგირ ურთიერთობა მიღდეს ჩქინ ბაღანეფიშ მეგობრეფწკუმა დო ირიათო მთელ გურით ბღებულენდით თინეფს ჸუდეშა.
მა დო დენიზიქ 2013 წანას ვისკონსინშა გეგნოფრთით ოცხოვრებშა, ნამდა ხანშამიშულირ მშობლეფს მიკულეთკო. მარა ბეთელს ჩქიმ მსახურება თაქ ვათებე, მუდგას ვეველუდ. ბეთელშა დროებით მოხალისეთ ქუდომძახეს, ნამდა იურიდიულ საქმეეფს მივეხვარკო ჩქინ ორგანიზაციას.
სიტუაციაშ უცფაშიან თირუა
ვოკვირუდ, ნამდა ხორხოტას მუდგარენ მაწუხენდჷ; თექ 2018 წანაშ სექტემბერს მოხვად. ჩქინ ექიმქ გამოკვლევეფ ჩამტარ, მარა მიზეზშა ვეგიადგინ დუდიქ. თეშ უკულ, შხვა ექიმქ ელამიჩ, ნამდა ნევროლოგშა ქიმეფრთიკო. 2019 წანაშ იანარს, ნევროლოგიქ იშვიათ ნევროლოგიურ ლახალაშ დიაგნოზ ქიგემიშქვჷ, ნამდგას პროგრესულ სუპრანუკლეარულ დამბლა ჯოხო.
სუმ დღაშ უკულ, მუჟამსით მიჸორსინ ფერ სპორტით ვორდჷ დაკავებულ, მარძგვან მაჯა იბწყუნე. მთელ ცხოვრებას თე სპორტით ვორდჷ დაკავებულ; თინა მანგარო მიჸორდჷ. ვორწყედ, ნამდა მოძრაობაშ უნარს ვოდინუანდჷ. თე ლახალა ირწუთის ივითარებუდ დო ჩქიმ მდგომარეობა ხოლო იუფრაშებუდ. ვოდინუანდჷ რაგადიშ, მოძრაობაშ დო გინოყინტუაშ უნარს.
ჩქიმო დიდ პატი რდუ, ნამდა იურიდიულ რჩქინათ ჩქიმ ჭიჭე წვლილ გემშებღჷ სამეფოშ ინტერესეფიშ წიმი ულაშა. თეს გეძინელ, მიღუდ პატი, დობჭარკო ბრელ სტატია თიცალ ჟურნალეფს, ნამდგას კითხულენა ექიმეფ, იურისტეფ დო მოსამართლეეფ. თეწკუმა ართო, მთელ მსოფლიოს ვატარენდჷ ლექციეფს დო იფცვენდჷ იეჰოვაშ მოწმეეფიშ უფლებას, ნამუთ ოხუდ ზისხირიშ უმშო ოპერაციას დო მკურნალობას. მარა ლუკაშ 17:10-ის ინოჭარილ სიტყვეფცალო, იფჩიებუქ: ურგებელ მონა ვორექ, თინა ვაკეთ, მუთ ოკო მიკეთებუდკო.
