ᲝᲒᲣᲠᲐᲤᲐᲚ ᲡᲢᲐᲢᲘᲐ 30
გამანგარით ჸოროფა
„ირნერო მიბრდათ ჸოროფათ“ (ᲔᲤᲔᲡ. 4:15).
ᲝᲑᲘᲠᲔᲨᲘ 2 იეჰოვა რე სქან სახელი
ᲨᲘᲜᲐᲐᲠᲡ a
1. მუ გეგით, მუჟამსით ბიბლიაშ გურაფა დიჭყით?
ᲐᲚᲑᲐᲗ რშუნა თი დრო, მუჟამსით ბიბლიაშ გურაფა დიჭყით. შილებე გუგაკვირეს თიშ გაგებაქ, ნამდა ღორონთის სახელ ნოღვე. შილებე თიშ გაგებაქ ხოლო მოიდგეს შურ, ნამდა თინა ადამიანეფს ჯოჯოხეთის ვატანჯენს. თიშ გაგება ხოლო გახიოლედეს, ნამდა გიღნა შესაძლებლობა, კინ ქოძირათ თქვან საჸოროფო ადამიანეფ, მით ღურაქ მიდაიღეს დო მარადიულო იცხოვრათ თინეფწკუმა ართო სამოთხეთ გინორთელ დედამიწას.
2. მუს მიგეხვარეს ბიბლიაშ გურაფაქ? (ეფეს. 5:1, 2).
2 მუთ უმოსის გებულენდით ღორონთიშ სიტყვაშე, თით უმოსო ირდუდ თქვან ჸოროფა იეჰოვაშ მიმართ დო ზუსტას თე ჸოროფაქ აღგძრეს, ცხოვრებას გეგმირინეთკო ნაგურეფ. ღებულენდით ბიბლიაშა გერსხილ უჯგუშ გადაწყვეტილებეფს დო რახანს გოკოდეს იეჰოვას გურ გუხარითკო, ქიდიჭყით სწორას აზროვნება დო მოქციება. მუჭოთ ჭიჭე ბაღანა ოცად, ირფელ მშობელცალო გაკეთას, თეშ თქვა ხოლო მეჸუნდით თქვან ზეციერ მუმაშ მაგალითის (წეკითხით ეფესოელეფიშ 5:1, 2).
3. მუ შემლებნა ბკითხათ ჩქინ დუდის?
3 შემლებნა ჩქინ დუდის ბკითხათ: „ქორენო იეჰოვაშ მიმართ ჩქიმ ჸოროფა თიშე უმოს ძალიერ, ვინემ თიმწკუმა რდჷ, მუჟამსით იბნათ? ქაძირანსო ჩქიმ აზროვნება დო საქციელ, ნამდა ასე უმოსო მეპჸუნქ იეჰოვაშ მაგალითის, განსაკუთრებულო და დო ჯიმალეფიშ მიმართ ჸოროფაშ გიმორჩქინას?“. თე ირფელიშ გიმორკვიებაშ უკულ, ქოძირით, ნამდა „დუდშეიან ჸოროფაქ“ გოირგიდეს-და, გურ ვეგიტახათ. თეცალ მუდგარენქ პირველ საუკუნეს მახორუ ქრისტიანეფიშ შემთხვევას ხოლო მოხვად, მარა იესოს ვა უფიქრებ, ნამდა თინეფშე მუთუნ ვაგშეშ დო ზუსტას თეცალ დამოკიდებულება უღჷ ჩქინ მიმართ ხოლო (გამოცხ. 2:4, 7). თის ჯგირო უჩქჷ, ნამდა შემლებნა კინ დიფრთინუათ თი ჸოროფა, ნამუთ დუდშე მიღდეს, მუჟამსით ჭეშმარიტება გებგით.
4. მუს გუვარჩიენთ თე სტატიას?
4 თე სტატიას გუვარჩიენთ, მუჭო შემლებნა გუვამანგარათ ჸოროფა იეჰოვაშ დო შხვეფიშ მიმართ დო ქობძირუნთ, მუ კურთხევეფს მომღანა თეშ კეთება, მუჭოთ ჩქი, თეშ შხვეფს ხოლო.
ᲒᲔᲛᲐᲜᲒᲐᲠᲘᲗ ᲸᲝᲠᲝᲤᲐ ᲘᲔᲰᲝᲕᲐᲨ ᲛᲘᲛᲐᲠᲗ
5, 6. ა) მუ სირთულეეფს ხვადუდ პავლე მსახურებაშ დროს? ბ) მუქ მეხვარ თის, ვემიოტუკო იეჰოვაშ მსახურება?
5 მართალ რე, მოციქულ პავლეშო იეჰოვაშ მსახურებას ხიოლ დო კმაყოფილება მოუღუდ, მარა ბრელ სირთულეს ხოლო ხვადუდ. თინა ხშირას შორ შარაშა მიშჷ, მუდგაშ კეთება თი დროს ვა რდჷ ადვილ. მუჭოთ ბიბლიაშე ბგებულენთ, თეცალ მოგზაურობაშ დროს, პავლე ხშირას რდჷ „საფრთხეს მალწყარეფს [დო] გიმარნაფალეფშე“. თეს გეძინელ, პავლე მოციქულს მინშა მოწინააღმდეგეეფ ლახუნდეს (2 კორ. 11:23—27). ხვალე თენა ვარინ, მინშა და დო ჯიმალეფ ვაფასენდეს თი ირფელს, მუდგას პავლე თინეფიშ მახვარებელო ორთუდ (2 კორ. 10:10; ფილ. 4:15).
6 თე ირფელიშ უმკუჯინუო, მუქ მეხვარ პავლეს, ვემიოტუკო იეჰოვაშ მსახურება? თიქ წმინდა წერილეფიშ დო მუშ პირად გამოცდილებაშ ჭყოლოფათ, უმოსო გეჩინებაფუ იეჰოვაშ პიროვნება დო დერწმუნ, ნამდა ღორონთის მანგარო უჸორდჷ თინა (რომ. 8:38, 39; ეფეს. 2:4, 5). თე ირფელიშ შედეგო, პავლეს ხოლო უმოსო ქეჸოროფ იეჰოვა ღორონთიქ დო თე ჸოროფას თით ოძირანდჷ, ნამდა ირიათო ომსახურუდ „წმინდეფს“ (ებრ. 6:10).
7. მუ მიმეხვარებნა იეჰოვაშ მიმართ ჸოროფაშ გამანგარებას?
7 იეჰოვაშ მიმართ ჸოროფაშ გამანგარება თიშ სიტყვაშ გურგედვალირო გიმორკვიებათ ხოლო შემლებნა. ჯგირ იჸუაფ, ბიბლიაშ კითხირიშ დროს დეფიფქრათ, მუს მოგებაფუანა თითოულ მონაკვეთ იეჰოვაშ გურშენ. ქოკითხით თქვან დუდის: „მუჭო იძირე თე მონაკვეთშე, ნამდა იეჰოვას ვუჸორქ? ხოლო მუ ბძირ თე მონაკვეთის თიცალ, მუთ უმოსო ქომიჸოროფუანს იეჰოვას?“.
8. მუჭო შეულებ ლოცვას, გამიმანგარან იეჰოვაშ მიმართ ჸოროფა?
8 ხოლო ართ საშვალება, მუთ იეჰოვაშ ჸოროფას გამმანგარენა რე ირდღას ალალას რაგადებულ ლოცვა (ფსალმ. 25:4, 5). შემლებნა ბჯერდან, ნამდა იეჰოვა აუცილებერო ქომპასუხენა (1 იოან. 3:21, 22). ართ აზიელ და თეცალ მუდგარენს იჩიებ: „დუდშე იეჰოვა ბიბლიაშე მეღებულ რჩქინაქ მიჸოროფუ. მარა, მუჟამსით ქობძირ, მუჭო პასუხენდჷ ჩქიმ ლოცვეფს, ხოლო უმოსო ქიმეჸოროფ, მუდგაქ სურვილ გომრჩქინ, ირნერო გურ გუხარკო თის“.
ᲒᲐᲛᲐᲜᲒᲐᲠᲘᲗ ᲸᲝᲠᲝᲤᲐ ᲨᲮᲕᲔᲤᲘᲨ ᲛᲘᲛᲐᲠᲗ
9. მუჭო იძირედ პავლეშ სიტყვეფშე, ნამდა ტიმოთეს უჸორდჷ და დო ჯიმალეფ?
9 პავლექ ქრისტიანო გინორთაშ უკულ, მუსხირენ წანაშა, გეჩინებაფუ ართ ახალგაზრდა, სახელო ტიმოთე. ტიმოთეს მანგარო უჸორდჷ იეჰოვა დო ადამიანეფ. პავლე მოციქულქ თე ახალგაზრდა ჯიმაშ გურშენ ფილიპელეფს თეცალ მუდგარენ მეჭარ: „მითინ ვამწონებ თიშნერ განწყობა უღუნ ფერ, მით მთელ შურდოგურით იზრუნენს თქვანდე“ (ფილ. 2:20). პავლეს თე სიტყვეფს ვა უგულისხმებ ტიმოთეშ ორგანიზატორობაშ დო ორატორობაშ უნარ. თიქ ყურადღება გამახვილ ტიმოთეშ ჸოროფაშ გურშენ, ნამუთ და დო ჯიმალეფიშ მიმართ უღუდ. მუშო ოკო რაგად, არძა კრება ხიოლით ელუდკონ იჸიდ ტიმოთეცალ ჯიმაშ მეულას (1 კორ. 4:17).
10. მუჭო გიმირჩქინ ართ მისიონერ წყვილქ და დო ჯიმალეფიშ ჸოროფა?
10 ჩქი ხოლო ირნერ შესაძლებლობა ოკო ბგორათ, ნამდა მივეხვარათ და დო ჯიმალეფს (ებრ. 13:16). გუვარჩუათ წოხოლენ სტატიას მოშინაფილ მისიონერ წყვილიშ შემთხვევა. თინეფიშ ტერიტორიას მოხვალამირ ქარბორიაქ ჩქინ თანაქრისტიანიშ ჸუდეს ორთვალ ქინატახ, მუდგაშ შედეგო ართ ხე სუფთა ბარგიქ ხოლო ვა დასქიდეს. თე წყვილქ დაზარალებურ ოჯახიშ ოძირაფშა მიდართჷ. მისიონერ და იჩიებ: „ჩქი თინეფიშ ბარგ მოლებღით, გობნახვით დო იშო უნთელ დო კიჩილ მეუღით. მართალ რე, თენა ბრელ მუთუნ ვა რდჷ, მარა თი დღაშ უკულ ხოლოშიან მეგობრეფო გინიფრთით“. თე მისიონერ წყვილ და დო ჯიმალეფიშ ჸოროფაქ აღძრჷ, ქელუდირთესკო დო ირნერო მეხვარესკო თინეფს (1 იოან. 3:17, 18).
11. ა) მუჭო შილებე იმოქმედას ჩქინ გიმორჩქინელ ჸოროფაქ შხვეფშა? ბ) მუჭოთ იგავეფიშ 19:17-ის ჭარჷ, მუს გაკეთენს იეჰოვა ჩქინო, მუჟამსით შხვეფიშ მიმართ ჸოროფას გეგმიფრჩქინანთ?
11 მუჟამსით შხვეფიშ მიმართ სიკეთეს დო ჸოროფას გიმიფრჩქინანთ, თინეფ ორწყენა, ნამდა თეცალ საქციელით ვოცადუთ, იეჰოვაშ მაგალითის მივაჸუნათ. თინეფქ შილებე ჩქინ გიმორჩქინელ სიკეთე თიშე უმოსო დაფასან, ვინემ დღას წერმიბდგინენდით. ჟიშე მოშინაფილ აზიელ და ჸოროფათ იშინანს თი და დო ჯიმალეფს, მიდგაქ თის მეხვარეს. თინა იჩიებ: „მთელ გურით ვუმარდუქ თი და დო ჯიმალეფს, მიდგას მსახურებაშა გილაპჸუნდჷ. თინეფ ჸუდეშა ქუმმაკითხანდეს, ოჭკუმშა მიდამჸუნანდეს დო აშო ხოლო მოლმაზარენდეს. ასე ფხვადუქ, მუშმადიდა მონდომას გიმირჩქინანდეს თე ირფელიშ ოკეთებელო, მარა თეს ჸოროფათ დო ხიოლით ორთუდეს. ნოტე ქეშემლებდას, მადლობა გეგნუგე თი ირფელ ჯგირშო, მუთ მიკეთეს, მარა თინა ხოლო ვა მიჩქჷ, სო ცხოვრენა. ირიათო ბლოცულენქ, ნამდა ჩქიმ მანგიორო, იეჰოვაქ გეგნუგას დო ბჯერს, ქოთ გაკეთენს თეს“. მუშო ოკო რაგად, არძა ვა დაფასენს თი ირფელს, მუდგას თინეფიშ საჯგირობუოთ ვორთუთ, მარა იეჰოვაშ თოლს ვამკაკორდუ ჩქინ მხარეშე კეთებულ აკაბცხა სიკეთე ხოლო. თინა თეს უჯინე, მუჭოთ ძვირფას მსხვერპლის დო ართ წუთით ხოლო ვა მოეჭვნა, ნამდა ჯგირს ჯგირით გინომგანა (წეკითხით იგავეფიშ 19:17).
მუჟამსით პიროვნება სულიერო წიმი მეურს, თინა შხვეფიშ მახვარებელო ირნერ საშვალებას გორუნს (ქოძირით აბზაც 12)
12. მუჭო შეულებნა ჯიმალეფს, გეგმირჩქინან ჸოროფა კრებას, თანაქრისტიანეფიშ მიმართ? (ქოძირით სურათეფ).
12 ჯიმალეფ, მუჭო შეილებნა გეგმირჩქინათ და დო ჯიმალეფიშ ჸოროფა დო ქიმეხვარათ თინეფს? მორთ გუვარჩუათ, ართ ახალგაზრდა ჯიმაშ, ჯორდანიშ, შემთხვევა. თიქ უხუცესის ელაკითხუ, მუჭო შეულებუდ უმოსიშ კეთება კრებაშო. უხუცესიქ, პირველ რიგის, ქაცქუ ჯორდანს თი ირფელიშ გურშენ, მუდგას უკვე ორთუდ დო მუსხირენ რჩევა ქიმეჩ თი საკითხწკუმა დაკავშირებით, მუთ ოინტერესუდ. მაგალთო, თიქ ჯორდანს ელუჩ, დარბაზშა ადრე ქიმერთკო დო და დო ჯიმალეფ მიკითხუკო, მიღკო მონაწილება შეხვალამეფს, იქადაგკო მუშ სამქადაგებლო ჯგუფწკუმა ართო დო დოგორკო შესაძლებლობეფ და დო ჯიმალეფიშ ელარნალო. მუჟამსით ჯორდანქ თე რჩევეფ გეგმირინუ, გევითარ ახალ უნარეფ დო თეწკუმა ართო, გემანგარ და დო ჯიმალეფიშ მიმართ ჸოროფა. თიქ ართ მუდგარენს ქიმეხვად — ჯიმა მომსახურეთ დანიშნებაშ უკულ ვეჭყანს შხვეფიშ მოხვარას, თინა თე პასუხიშმგებლობაშ მეღებათ აგრძელენს თეშ კეთებას (1 ტიმ. 3:8—10, 13).
13. მუჭო მეხვარ ჸოროფაქ ართ ჯიმას, კინ იმსახურკო უხუცესო?
13 მუშ რაგად შილებე თქვანდე, მით ართ დროს მომსახურეთ ვარდა უხუცესო მსახურენდით? დარწმუნებულ რდათ, იეჰოვას შჷ თი საქმეეფ, მუთ ულირს გიკეთებნა დო თი ჸოროფა ხოლო, მუთ თე ირფელს გოკეთებაფუანდეს (1 კორ. 15:58). თინა თის ხოლო ორწყე, ნამდა ვემეიტებნა თე თვისებაშ გიმორჩქინა. ართ ჯიმას, კრისტიანს, მანგარო გუტირხჷ გურქ, მუჟამსით მუდგარენ მიზეზეფიშ გურშენ, მეტო ვა მსახურენდჷ უხუცესო. თინა იჩიებ: „გინობჭყვიდ, ირფელ გუვაკეთკო იეჰოვაშ მსახურებას, თიშ უმკუჯინუო, ნამდა უხუცესო ვა ვმსახურენდჷ“. დროშ მიკულაშ უკულ, თიქ კინ დენიშნჷ უხუცესო. კრისტიან გეუძინანს: „იეჰოვაქ ქიანაშმადიდა ჭყოლოფა გიმირჩქინ ჩქიმ მიმართ დო ოკოდ, კინ უხუცესო იმსახურკო. მართალ რე, ჭიჭეს ქობნერვიანენდჷ, მარა გინოჭყვიდილ მაფუდ, იეჰოვაშ დო და დო ჯიმალეფიშ ჸოროფათ შევასრულკო თე პასუხიშმგებლობა“.
14. მუს ბგურაფლენთ ელენეშ სიტყვეფშე?
14 იეჰოვაშ მოწმეეფ მოყვასიშ მიმართ ხოლო გიმირჩქინანა ჸოროფას (მათ. 22:37—39). საქორთუოს მახორუ ართ და, ელენე, თეცალ მუდგარენს იჩიებ: „გვალო პირველო ქადაგება იეჰოვაშ ჸოროფაქ გინმოჭყვიდირაფუ, მარა მუთ უმოსო ირდუდ ზეციერ მუმაშ მიმართ ჩქიმ ჸოროფა, თით უმოსო ირდუდ ხალხიშ მიმართ ხოლო. ვოცადუდ, წერმიბდგინკო, მუ პრობლემეფს ხვადუდეს თინეფ დო მუ საკითხშე ჩიება ოსიამოვნუდეს არძაშ უმოსო. მუთ უმოსო ფიფქრენდჷ შხვეფშე, თით უმოსო მირჩქინდუდ სურვილ, ნამდა მივეხვარკო თინეფს“ (რომ. 10:13—15).
ᲙᲣᲠᲗᲮᲔᲕᲔᲤ, ᲛᲣᲗ ᲸᲝᲠᲝᲤᲐᲨ ᲒᲘᲛᲝᲠᲩᲥᲘᲜᲐᲡ ᲛᲝᲸᲣᲜᲡ
ჸოროფათ კეთებულ ართ საქმეს შეულებ ბრელს მოუღას ჯგირობუა (ქოძირით აბზაცეფ 15, 16)
15, 16. მუ კურთხევეფ მაჸუნუ შხვეფიშ მიმართ ჸოროფაშ გიმორჩქინას? (ქოძირით სურათეფ).
15 და დო ჯიმალეფიშ მიმართ გიმორჩქინელ ჸოროფას ხვალე თინეფშა ვა მოუღ ჯგირობუა. მაგალთო, ᲙᲝᲕᲘᲓ-19 პანდემიაშ დოჭყაფაშ უკულ, ართ ჯიმაქ, პაულოქ, დო თიშ მეუღლექ ბრელ ხანშამიშულირ დას მეხვარეს, ქიდიგურუესკო ელექტრონულ მოწყობილობაშ გიმორნაფა, ნამდა შეიალებესკო თით მსახურება. ართ დას დუდშე მანგარო გუჭირდჷ თე ირფელშა მეხუჯაფაქ, მარა ბოლოს იშენით ქიდიგურუ. შედეგო, თიქ მუშ ნათესეეფ ქუდაპატიჟ გოშინაშ ონჯუაშა დო თინეფშე 60-იქ, ქიდესწრჷ თე შეხვალამას ვიდეოკონფერენციაშ საშვალებათ. თავრეშე ქიძირ, ნამდა პაულოშ დო თიშ ოსურიშ გიმორჩქინელ მონდომაქ არძას ჯგირ შედეგეფ მოუღ. უმოს გვიანო, თე დაქ პაულოს თეცალ სიტყვეფ მეჭარ: „მადლობა, ნამდა თაშ მოგურუანთ ხანშამიშულირეფს. დღას ვეგიბჭყოლიდუანქ, მუჭო იზრუნ იეჰოვაქ თქვან საშვალებათ ჩქინდე დო მუჭო იხანდით ჩქინო დუდუდუზოგებუო“.
16 თე შემთხვევაქ პაულოს ართ მნიშვნელოვან მუდგარენ ქუდაგურუ — ჸოროფა ბრელით უმოს მნიშვნელოვან რე, ვინემ მუდგარენიშ რჩქინა ვარდა უნარ. თინა იჩიებ: „რაიონულ ზედამხედველო წანეფიშ დინახალე ვმსახურენდჷ, მარა ასე მეფხვად, შილებე და დო ჯიმალეფს ვა შუდან ჩქიმ კეთებულ მოხსენებეფ, მარა შუდან თი საქმეეფ, მუთ თინეფიშ მახვარებელო ვაკეთ“.
17. ხოლო მიშა მოუღ ჯგირობუა შხვეფიშ მიმართ ჸოროფაშ გიმორჩქინას?
17 შხვეფიშ მიმართ ჸოროფაშ გიმორჩქინა ჩქი ხოლო მომღანა თიცალ ჯგირობუას, ნამდგას შურო ვეველუთ. თექ ჯგირო ქიძირ, ახალ ზელანდიას მახორუ ართ ჯიმა, იონათანიშ, შემთხვევაშე. ართ საბატონ დღას თიქ ქოძირ, ნამდა ართ პიონერ ჯიმა ონდღეშ გურს, მანგარ სინჩხეს, ხვალე მსახურენდჷ. იონათანქ გეგნოჭყვიდ, ირ საბატონს თე ჯიმაწკუმა ართო იმსახურკო. თიმ დროს, თის წარმოდგენა ხოლო ვა უღუდ, მუშმადიდა ჯგირობუას მოუღანდჷ თე ნაბიჯიშ გინოდგუმა. თინა იჩიებ: „ალალას ქოიწუათინ, მსახურება იშენდოიშენ ვა მიჸორდჷ, მარა მუჟამსით ქობძირ, მუჭო ქადაგენდჷ თე პიონერ დო მუ ჯგირ შედეგეფ მოუღუდ თიშ მსახურებას, მსახურებაქ მა ხოლო ქიმეჸოროფ. ხვალე თენა ვარინ, თეშ ჭყოლოფათ ქუმაშუ მეგობარქ, მიდგაქ მიმეხვარ, მიბრდიკო სულიერო, ხიოლ მიბღიკო მსახურებას დო უმოსო დევეახლოვკო იეჰოვას“.
18. მუშ სურვილ უღჷ იეჰოვას?
18 იეჰოვას ოკო, არძაქ გუვამანგარათ ჸოროფა თიშ დო შხვეფიშ მიმართ ხოლო. მუჭოთ თე სტატიაშე გებგით, იეჰოვაშ მიმართ ჸოროფაშ გამანგარებას მიმეხვარებნა ბიბლიაშ კითხირ, თიშე დაფიქრება დო რეგულარულ ლოცვა. შხვეფიშ მიმართ ჸოროფას გემამგარენთ, მუჟამსით ირნერ საშვალებას გეგმიბრინუანთ თინეფიშ მახვარებელო. მუჟამსით ჩქინ ჸოროფა მირდუ, უმოსო დევეახლოვებუთ იეჰოვას დო ჩქინ საჯიმალოს დო თე მეგობრობათ მარადიულო გეფხარენთ!
ᲝᲑᲘᲠᲔᲨᲘ 109 მთელ გურით გიჸორდან ართიან
a ვა უღჷ მნიშვნელობა, ამარდე გებგით ჭეშმარიტება დოვარ წანეფ რე, მუთ იეჰოვას ვომსახურუთ, არძას მოსაჭირნა მუდგარენ საკითხეფს გაუჯგუშება. თე სტატიას გუვარჩიენთ, ართ-ართ მნიშვნელოვან მხარეს, მუთ შემლებნა გუვაუჯგუშათ. თენა რე, იეჰოვაშ დო შხვეფიშ მიმართ ჸოროფა. თე საკითხიშ გარჩიებაშ დროს დეფიქრით, მუს მიოჭირინეთ დო მუშ კეთება შეილებნა მომავალს.