ᲝᲒᲣᲠᲐᲤᲐᲚ ᲡᲢᲐᲢᲘᲐ 32
მიაჸუნით იეჰოვაშ მაგალითის დო რდათ გონიერეფ
„არძაქ ქოძირას თქვან გონიერება“ (ᲤᲘᲚ. 4:5).
ᲝᲑᲘᲠᲔᲨᲘ 89 ვურჩქილათ დო ვორდათ ხვამელი
ᲨᲘᲜᲐᲐᲠᲡ a
ნამ ჯას გოკონა აგურათ? (ქოძირით აბზაც 1)
1. მუ გაგებათ ოკო აგურას ქრისტიანქ ჯას? (ქოძირით სურათ).
ᲐᲠᲡᲔᲑᲔᲜᲡ თეცალ ანდაზა: „ბორიას ვეგნატახე ჯა, ნამუთ თის დოჸუნს“. თე ანდაზა ჯგირო ოძირანს, მუსხით მნიშვნელოვან რე ჯაშო დოჸუნა, თაშ ქოფთქუათინ, დოხუჯაფა, ნამდა ძალიერ ქარბორიაშ დროს ვეგნოტირხას დო მანგარო ქიგედირთას. თეშნერო, ჩქი ხოლო სულიერ გაგებათ ვეკიფრთათინ მზათ ოკო ვორდათ, ქუდუხუჯუათ სიტუაციას. მუჭო შემლებნა თეშ კეთება? ოკო გეგმიფრჩქინათ გონიერება თით, ნამდა მუჟამსით ჩქინ ცხოვრებას მუდგარენეფ ითირუ, დუხუჯუათ სიტუაციას დო პატი ფცათ შხვეფიშ შეხედულებეფს დო გადაწყვეტილებეფს.
2. ნამ თვისებეფ მიმეხვარებნა, ქუდუხუჯუათ ცვლილებეფს დო მუს გუვარჩიენთ თე სტატიას?
2 მუჭოთ იეჰოვაშ მსახურეფს, მოკონა, ვორდათ გონიერეფ, თეს გეძინელ, თანდაბალეფ დო შემლებდან გურშა მიბღათ შხვეფიშ გაჭირება. თე სტატიას გუვარჩიენთ, მუჭო მეხვარ თე თვისებეფქ ჩქინ ნამთინე თანაქრისტიანს, გიორჯგინესკო სირთულეეფს, მუჟამსით მუნეფიშ ცხოვრებას მუდგარენეფქ დითირ. თეს გეძინელ, ქობძირუნთ ჩქი მუჭო მიმეხვარებნა თე თვისებეფ. მარა პირველ რიგის, გუვარჩუათ იეჰოვაშ დო იესოშ მაგალით, მით სრულყოფილო გიმირჩქინანა გონიერებას.
ᲘᲔᲰᲝᲕᲐ ᲓᲝ ᲘᲔᲡᲝ ᲒᲘᲛᲘᲠᲩᲥᲘᲜᲐᲜᲐ ᲒᲝᲜᲘᲔᲠᲔᲑᲐᲡ
3. სოვრეშე ვორწყეთ, ნამდა იეჰოვა გიმირჩქინანს გონიერებას?
3 ბიბლია იეჰოვას მიშინუანს მუჭოთ „კირდეს“, მუშენდა თინა კირდეცალ მტკიცე რე (კან. 32:4). თეწკუმა ართო, თინა რე გონიერ. მაგალთო, მუჟამსით მოვლენეფ ითირუ, თინა უხუჯანს სიტუაციას, ნამდა მუთუნქ ვეცილას მუშ განზრახვაშ შესრულებას. იეჰოვაქ მუშ ამნახანტო გუმოჭყეს, მუთ ნიშნენს, ნამდა მიღნა უნარ, მუჟამსით ჩქინ ცხოვრებას მუდგარენეფ ითირუ, ქუდუხუჯუათ თის. თეს გეძინელ, ბიბლიაშ საშვალებათ თინა მარზენა პრინციპეფს, მუთ მოხვარნა მუდგა სირთულეს ვეშეფხვადათინ, მიბღათ ბრძნულ გადაწყვეტილებეფ. იეჰოვაშ პირად მაგალით დო თი პრინციპეფ, ნამდგას თინა მარზენა, არგამა მტკიცება რე თიშ, ნამდა მართალ რე, იეჰოვა კირდეცალ მტკიცე რე, მარა თეწკუმა ართო, გიმირჩქინანს გონიერებას დო დოჸუნს სიტუაციას.
4. ქიმიჸონით მაგალით, სოვრეშეთ იძირე, ნამდა იეჰოვა უხუჯანს შხვეფს (ლევ. 5:7, 11).
4 იეჰოვა ირფელს სრულყოფილო ორთჷ დო თინეფშე გონიერება იძირე. თინა უხეშო ვეთხინს მუდგარენს ხალხშე. გუვარჩუათ, მუჭო უხუჯანდჷ იეჰოვა ისრაელეფს. მაგალთო, თინა ქოთ მდიდარშე დო ქოთ ღარიბშე ართნერ შესაწირავს ვეთხინდჷ. ნამთინე შემთხვევას, თინა მუშ ხალხის საშვალებას არზენდჷ, მუნეფიშ შესაძლებლობეფშე გამომდინარე გაკეთესკო შესაწირავ (წეკითხით ლევიანეფიშ 5:7, 11).
5. ქიმიჸონით მაგალით, მუჭო გიმირჩქინ იეჰოვაქ თანდაბლობა დო ჭყოლოფა.
5 თანდაბლობა დო ჭყოლოფა რე თი თვისებეფ, მუთ აღძრენს იეჰოვას, გეგმირჩქინას გონიერება. მაგალთო, მუჟამსით თიქ სოდომს უბადო ხალხიშ განადგურება გინოჭყვიდ, მუშ ანგელოზეფიშ საშვალებათ გაფრთხილ მართალ ლოტ, ქიდიტუკო თექიანობა დო ინტუკო გვალამ ადგილშა. მარა ლოტის ოშქურუდ თექ ულაშა, ათეშენ იეჰოვას თხუ, ნამდა უფლება ქიმეჩკო, მუშ ოჯახწკუმა ართო ჭიჭე ქალაქ ცოარშა ინტუკო, ნამდგაშ განადგურება ხოლო იეჰოვას უკვე გინოჭყვიდილ აფუდ. იეჰოვას შეულებუდ მოთხუკო ლოტის, დემორჩილკო თიშ მითითებეფს. მარა თეშ მანგიორო, თანდაბლობა გეგმირჩქინ დო ქუდაჸუნ ლოტიშ ოთხუალს, მუთ თის ნიშნენდჷ, ნამდა იეჰოვა მუშ გადაწყვეტილებაშ უმკუჯინუო, ვა განადგურენდჷ ცოარს (დაბ. 19:18—22). საუკუნეეფიშ უკულ, იეჰოვაქ ხოლო ართ თვისება, ჭყოლოფა გიმირჩქინ ნინევეს მახორუ ხალხიშ მიმართ. თიქ მუშ წინასწარმეტყველ იონა მიდაშქვჷ, ნამდა გაცხადკო თე ქალაქიშ დო თექ მახორუ უბადოეფიშ განადგურებაშ გურშენ. მარა მუჟამსით ნინეველეფქ მინანის, იეჰოვას ეცოდ თინეფქ, ქიჭყოლოფუ, დოთირუ მუშ გადაწყვეტილება დო ვა განადგურ ნინევე (იონ. 3:1, 10; 4:10, 11).
6. ქიმიშინეთ ნამთინე შემთხვევა, სოვრეშეთ იძირე, მუჭო მეჸუნს იესო იეჰოვაშ გონიერებაშ მაგალითის.
6 იესო მეჸუნდჷ იეჰოვაშ გონიერებაშ მაგალითის. თინა დედამიწაშა რდჷ მოშქუმალირ, ნამდა ქუქადაგკო „ისრაელიშ დინაფილ შხურეფს“, მარა გონიერებას გიმირჩქინანდჷ მუშ დანიშნულებაშ შესრულებაშ დროს. მაგალთო, ართშა თის ართ ოსურქ, ნამუთ ებრაელ ვა რდჷ, ქოთხუ, დასქილიდუკო მუშ ძღაბ, ნამდგას დემონეფ ატანჯენდჷ. იესოქ ჭყოლოფა გეგმირჩქინ თე ოსურიშ მიმართ დო შეუსრულ ოთხუალ (მათ. 15:21—28). გუვარჩუათ ხოლო ართ შემთხვევა. მუჟამსით იესოს მსახურება ახალ დოჭყაფილ აფუდ, თეცალ სიტყვეფ თქუ: „მით ჩქიმდე ვარიას თქუანს, მახოლო ვარიას ქოფთქუანქ თიშე“ (მათ. 10:33). მარა გაკეთუო თენა, მუჟამსით პეტრექ სუმშა გინივარუ, ნამდა იჩინენდჷ თის? მუშო ოკო რაგად, ვარ! თის ოჭიშ ვა ურთინუაფ პეტრეშა, მუშენდა ჯგირო უჩქუდ, ნამდა პეტრე მანგარო ნარღენდჷ მოხვალამირს დო თინა ხოლო უჩქუდ, მუნერ ართგურ კოჩ რდჷ. გათელებაშ უკულ იესოქ დუდ ქაძირუ პეტრეს დო დარწმუნ, ნამდა აპატუ დო კინ მანგარო უჸორდჷ თინა (ლუკ. 24:33, 34).
7. ფილიპელეფიშ 4:5-იშ თანახმას, მუნერ რეპუტაცია მოკონა მიღდან შხვეფიშ თოლს?
7 ჩქი ქობძირით, ნამდა იეჰოვა დო იესო გონიერეფ რენა. მუშ რაგად შილებე ჩქინდე? მუჭოთ ფილიპელეფიშ 4:5-შე იძირე, იეჰოვა ჩქინდე ხოლო ელჷ, ნამდა გეგმიფრჩქინანთ გონიერებას (წეკითხით). ართ თარგმანს, თე მუხლ თაშ რე მოჩამილ: „გიღდან გონიერ კოჩიშ რეპუტაცია“. შემლებნა ჩქინ დუდის ბკითხათ: „ქომჩინენსო ხალხ გონიერ დო დამთმობ პიროვნებათ? დოვარ თინეფიშ თოლს აჯამ დო უხეშ ვორექ? იბჩემენქო, შხვეფქ ირფელ ზუსტას თეშ გაკეთან, მუჭოთ მა მოკო? დოვარ შემლებ მიფრჩქილუე შხვეფიშ აზრ დო გეფთვალისწინე თინეფიშ სურვილ, მუჟამსით თენა შეიოლებერ რე?“. თაშ ნამდა, მუთ უმოსო გიმიფრჩქინანთ გონიერებას, თით უმოსო მეპჸუნთ იეჰოვაშ დო იესოშ მაგალითის. მორთ ასე გუვარჩუათ ჟირ მხარე, სოდეთ გონიერებაშ გიმორჩქინა განსაკუთრებულო მნიშვნელოვან რე. პირველ: მუჟამსით ჩქინ ცხოვრებას მუდგარენეფ ითირუ დო მაჟია: მუჟამსით შხვეფიშ შეხედულებეფ დო გადაწყვეტილებეფ გენესხვავებ ჩქინდე.
ᲒᲔᲒᲛᲘᲠᲩᲥᲘᲜᲘᲗ ᲒᲝᲜᲘᲔᲠᲔᲑᲐ, ᲛᲣᲟᲐᲛᲡᲘᲗ ᲛᲓᲒᲝᲛᲐᲠᲔᲝᲑᲐ ᲘᲗᲘᲠᲣ
8. მუ მიმეხვარებნა გონიერებაშ გიმორჩქინას, მუჟამსით მდგომარეობა ითირუ? (ქოძირით სქოლიო).
8 გონიერებაშ გიმორჩქინაშა თინა ხოლო მიშურს, ნამდა ქუდუხუჯუათ სიტუაციას, მუჟამსით ჩქინ ცხოვრებას მუდგარენეფ ითირუ. მაგალთო, შილებე ჯამრთელობაშ პრობლემეფქ ქუმაშუან, ჩქინ ქიანას ეკონომიკურ კრიზისიქ ქიდიჭყას ვარდა პოლიტიკურ მდგომარეობაქ დითირას (ეკლ. 9:11; 1 კორ. 7:31). თეცალ ცვლილებეფქ შილებე თიცალ სირთულეეფიშ წოხოლე ქიგმორინუან, ნამდგას ვეველდით. თეს გეძინელ, ორგანიზაციას დანიშნულებაშ თირუაქ შილებე ჩქინო გამოცდაქ ქიჸუას. მარა, მუდგა სირთულეშ წოხოლე ვეგებდირთათინ, ჩქი შემალებენა წარმატებათ გივორჯგინათ თის დო ქუდვაჸუნათ ახალ სიტუაციას. თეშ კეთებას მიმეხვარებნა თე ოთხ ნაბიჯიშ გინოდგუმა: 1) თოლ გუსწორათ რეალობას, 2) ულირიშ მანგიორო მომავალშე იფიფქრათ, 3) ყურადღება დადებითშა გეგნიბღათ დო 4) ჯგირ გუკეთათ შხვეფს. b მორთ გუვარჩუათ ჩქინ და დო ჯიმალეფიშ შემთხვევეფ დო ქობძირათ, მუჭო მეხვარეს თინეფს თე ნაბიჯეფიშ გინოდგუმაქ.
9. მუჭო გიორჯგინ ართ მისიონერ წყვილქ სირთულეეფს?
9 თოლ გუსწორით რეალობას. გუვარჩუათ ართ წყვილიშ, ემანუელეშ დო ფრანჩესკაშ, შემთხვევა. თინეფ მისიონერეფო დანიშნეს უცხო ქიანას. თექიან კრებას ახალ გინულირ რდეს დო ახალ ნინაშ გურაფა ხოლო დოჭყაფილ აფდეს, მუჟამსით ᲙᲝᲕᲘᲓ-19 პანდემიაქ ქიდიჭყჷ, მუდგაშ გურშენ ვეშულებდეს და დო ჯიმალეფწკუმა ფიზიკურო უღდესკო ურთიერთობა. თეს გეძინელ, თიმ პერიოდის შუროთ ველდესინ თეშ, ფრანჩესკაშ დიდაქ დოღურ. თის მანგარო ოკოდ, თე რთულ პერიოდის მუშ ოჯახწკუმა ართო ჸოფედკო, მარა პანდემიაშ გურშენ ვეშიალებუ მუშ ქიანაშა ულაქ. მუქ მეხვარ თის, გიორჯგინკო თე არძა სირთულეს? პირველ: ემანუელე დო ფრანჩესკა ირდღას ართო ლოცულენდეს დო იეჰოვას სიბრძნეს თხინდეს. იეჰოვა ხოლო საჭირო დროს პასუხენდჷ თინეფიშ ლოცვეფს მუშ ორგანიზაციაშ საშვალებათ. მაგალთო, თინეფს გურშა ელუკინეს ართ ჯიმაშ ვიდეოინტეᲠვიუქ, სოდეთ თეცალ სიტყვეფს იჩიებუდ: „მუთ უმოს მალას მივარჩქვანუთ ახალ სიტუაციას, თით უმოს მალას დიფრთინუანთ ხიოლს, ნამდა ჯგირო გეგმიბრინუათ ქადაგებაშ ირნერ შესაძლებლობა“. c მაჟია: თინეფქ გეგნოჭყვიდეს, გეუჯგუშესკო ტელეფონით მსახურებას, მუდგაშ შედეგო ბიბლიაშ გურაფა ხოლო ქიდიჭყეს. მასმა: თინეფს თანაქრისტიანეფ ირიათო ელურდეს დო გურშა ეუქექუანდეს, მუდგაშ მანგარ მარდულეფ რდეს. მაგალთო, ართ ჩქინ ძვირფას და, თინეფს წანაშ დინახალე ირდღას, ჭიჭე წერილს უჯღონანდჷ, სოდეთ ბიბლიურ მუხლ ხოლო მიშუჭარუდ. ემანუელე დო ფრანჩესკაცალო, ჩქი ხოლო იპჸით კმაყოფილეფ დო მაღვენუნა ხიოლ, მუჟამსით ირფელს გუვაკეთენთ, ნამდა ქიმვარჩქვანათ ახალ სიტუაციას.
10. მუქ მეხვარ ართ დას, მიარჩქვანკო მუშ ცხოვრებას მოხვალამირ ცვლილებას?
10 იფიქრით მომავალშე დო ყურადღება დადებითშა გეგნიღით. ართ რუმინელ დას, ქრისტინას, მით იაპონიას ცხოვრენს, მანგარო გუტირხჷ გურქ, მუჟამსით ინგლისურ კრებაქ, ნამდგაშათ თინა გილეშ, აკოცუ. მარა მოხვალამირშე ფიქრის ქაჸუნკოᲜ თიშ მანგიორო, ყურადღება მომავალშა გეგნიღ. ათეშენ გეგნოჭყვიდ, გეგნორთკო იაპონურ კრებაშა, ნამდა თი ტერიტორიას მსახურებას დუდ ვა დაზოგკო. ქრისტინაქ ართ ოსურს, ნამუთ მუშ ყოფილ თანამშრომელ რდჷ, ქოთხუ, ქიმეხვარკო იაპონურ ნინაშ უჯგუშო დოგურაფას. თინეფქ მირაგადუეს, ნამდა იაპონურ ნინაშ ოგურაფალო, გეგმირინუანდეს ბიბლიას დო ბროშურას „მარადიულო გეხარით ცხოვრებათ!“. თე ირფელიშ შედეგო, ქრისტინაქ იაპონურ ნინა უჯგუშო ქიდიგურუ დო მუშ ყოფილ თანამშრომელქ ხოლო დეინტერეს ჭეშმარიტებათ. თაშ ნამდა, მუჟამსით წიმი იბჯინეთ დო დადებით განწყობას ვა ვოდინუანთ, უცფას მოხვალამირ ცვლილებეფს შეულებ ვეველუთინ ფერ კურთხევეფ მომღან.
11. მუშ კეთებაქ მეხვარ ართ ჩილ დო ქომონჯის, მუჟამსით ფინანსურ პრობლემეფქ ქაშუეს?
11 ჯგირ უკეთით შხვეფს. ართ წყვილქ, მით თიცალ ქიანას ცხოვრენს, სოდეთ ჩქინ საქმიანობა ვარიებულ რე, ეკონომიკურ კრიზისიშ დროს სტაბილურ შემოსავალ მიოდინუ. მუქ მეხვარ თე ჩილ დო ქომონჯის, მიარჩქვანესკო ახალ სიტუაციას? პირველ მუთ აკეთესინ თინა რდჷ, ნამდა ცხოვრება გემარტივეს. უკულ, თიშ მანგიორო, ნამდა მთელ ყურადღება მუნეფიშ პრობლემეფშა გეგნიღესკო, გეგნოჭყვიდეს, შხვეფს ქიმეხვარესკო დო უმოს მონაწილება მიღესკო ქადაგებაშ საქმეს (საქ. 20:35). ქომონჯ იჩიებ: „მსახურებას აქტიურო ბღებულენდით მონაწილებას, ათეშენ ჭიჭე დრო მოსქიდუდეს თიშო, ნამდა იფიფქრითკო უარყოფით მუდგარენეფშე, მუშენდა მთელ ყურადღება ღორონთიშ ნებაშ შესრულებაშა მაფდეს გინოღალირ“. მუჟამსით ჩქინ მდგომარეობა ითირუ, ოკო ფშუდან, მუსხით მნიშვნელოვან რე, გუვაგრძელათ შხვეფიშ მოხვარა, განსაკუთრებულო მსახურებას მონაწილებაშ მეღებათ.
12. მუჭო მოხვარნა პავლეშ მაგალით, ქუდუხუჯუათ ადამიანეფს მსახურებას?
12 ჩქი მსახურებაშ დროს ხოლო ოკო დუხუჯუათ არძანერ სიტუაციას, მუშენდა ვუქადაგუთ განსხვავებულ მრწამსიშ, შეხედულებეფიშ დო წარმომავლობაშ ადამიანეფს. თე მხარეთ ბრელ მუდგარენიშ გურაფა შემლებნა მოციქულ პავლეშ მაგალითშე. იესოქ თინა „უცხოტომელეფიშ მოციქულო გიშეგორ“ (რომ. 11:13). მუშ დავალებაშ შესრულებაშ დროს თინა უქადაგუდ ბერძნეფს, იუდეველეფს, განათლებურ დო უბრალო კათას, სახელმწიფო მოხელეეფს დო მეფეეფს. ჭეშმარიტება თინეფიშ გურშა ქიმიღკონ თიშენ, პავლე „არძაშო ირფელ“ გინირთუდ (1 კორ. 9:19—23). თინა ყურადღებას აქციენდჷ მუშ მარჩქილეეფიშ მრწამსის, ულირ ცხოვრებას დო წარმომავლობას დო თინეფწკუმა ჩიებაშ დროს თე ირფელს ითვალისწინენდჷ. მუჟამსით პავლე მოციქულცალო, მსახურებაშ დროს ჩქი ხოლო ქუდუხუჯუანთ ადამიანეფს დო თითოულს ინდივიდუალურო მევუდირთუთ, ქადაგებას ჯგირ შედეგეფს ქიმვოჭირინუანთ.
ᲞᲐᲢᲘ ᲥᲝᲪᲘᲗ ᲨᲮᲕᲔᲤᲘᲨ ᲨᲔᲮᲔᲓᲣᲚᲔᲑᲔᲤᲡ
გონიერეფ ქუვორეთ-და, პატის ქოფცენთ შხვეფიშ დამოკიდებულებეფს (ქოძირით აბზაც 13)
13. 1 კორინთელეფიშ 8:9-ს მოშინაფილ, ნამ საფრთხეს ევუჩილითუანთ დუდის, მუჟამსით პატის ქოფცენთ შხვეფიშ შეხედულებეფს?
13 გონიერებაშ გიმორჩქინა თის ხოლო მოხვარნა, ნამდა პატი ფცათ შხვეფიᲨ შეხედულებეფს მუდგარენ საკითხეფწკუმა დაკავშირებით. მაგალთო, ნამთინე დას მოწონს მაკიაჟიშ კეთება, მარა ნამთინეს — ვარ. ნამთინე ქრისტიანს ოსიამოვნ ზომიერო ალკოჰოლიშ მეღება, მარა ნამთინეს გინოჭყვიდილ აფჷ, შურო ვემკანჭას თის. თეს გეძინელ, არძა ქრისტიანს მოკონა, ჯგირ ჯამრთელობა მიღდან, მარა თითოულ მკურნალობაშ განსხვავებულ მეთოდის გიშებგორუნთ. ქოფიფქრენთ, ნამდა ირიათო მართალ ვორეთ დო ქუვოცადუთ შხვეფ ხოლო ჩქინ აზრშა ქიმიპჸონათ-და, შილებე დუვაბრკოლათ და დო ჯიმალეფ დო კრებაშ ართობას ხოლო ვეცილათ. მუშო ოკო რაგად, ნამთინს ვამკონა თექ ქუმოხვადას! (წეკითხით 1 კორინთელეფიშ 8:9; 10:23, 24). მორთ ასე გუვარჩუათ, მუჭო მიმეხვარებნა ბიბლიურ პრინციპეფიშ გიმორნაფა, ვორდათ გაწონასწორებულ დო ხე შევუნწყუათ მშვიდობას, მუჟამსით საქმე ოხუ მიკოქუნა დო გარეგნობას დო ჯამრთელობას.
გონიერეფ ქუვორეთ-და, პატის ქოფცენთ შხვეფიშ დამოკიდებულებეფს (ქოძირით აბზაც 14)
14. ნამ ბიბლიურ პრინციპით ოკო იფხემძღვანელათ, მუჟამსით საქმე ოხუ მიკოქუნას დო გარეგნობას?
14 მიკოქუნა დო გარეგნობა. იეჰოვას ჩქინდა მკაცრ წესეფ ვამუჩამ თიწკუმა დაკავშირებით, მუ ოკო მიკიფქუნათ. თეშ მანგიორო, მუჩეს პრინციპეფ, ნამდგათ შემლებნა იფხემძღვანელათ თე საკითხის. ჩქინ მიკაქუნალ ღორონთის ოკო განადიდენდას დო თინა „მოკრძალებურო დო გონივრულო“ ოკო რდას გიშაგორილ (1 ტიმ. 2:9, 10; 1 პეტ. 3:3). ნამთინს ვა მოკონა, ჩქინ მიკაქუნალით ზედმეტ ყურადღება მიფქცუათ. ბიბლიურ პრინციპეფ უხუცესეფს ხოლო ოხვარ, კანონეფ ვა დადგინან მიკოქუნა დო ვარცხნილობაწკუმა დაკავშირებით. მაგალთო, ართ კრებას უხუცესეფს ოკოდეს, რჩევა ქიმეჩესკო ნამთინე ახალგაზრდას, მიდგას კუნტა, მარა ეჯარჯილ ვარცხნილობაშ სტილ უღუდ, ნამუთ პოპულარულ რდჷ. მუჭო შეიალებუეს ჯიმალეფს თინეფწკუმა დორაგადაფაქ წესეფ ვა დუდგინესკონ თეშ? რაიონულ ზედამხედველქ უხუცესეფს ელუჩ, ნამდა თი ახალგაზრდა ჯიმალეფს თეცალ მუდგარენ ქოუწისკო: „სცენაშა დავალებათ გიშულაშ დროს აუდიტორია სქან ჩიებაშ მანგიორო ყურადღებას სქან გარეგნობა დო მიკაქუნალშა გეგნიღანს-და, გიშურს, თე საკითხის მუდგარენ გაფჷ ოთირალ“. თეცალ მარტივ სიტყვეფით უხუცესეფს შეიალებუეს, კანონეფ ვა დუდგინესკონ თეშ, ახალგაზრდა ჯიმალეფ ქუდაფიქრესკო, მუ აფდეს ოკეთებელ. d
გონიერეფ ქუვორეთ-და, პატის ქოფცენთ შხვეფიშ დამოკიდებულებეფს (ქოძირით აბზაც 15)
15. ნამ ბიბლიურ კანონეფ დო პრინციპეფ მოხვარნა მკურნალობაწკუმა დაკავშირებულ გადაწყვეტილებეფიშ მეღებაშ დროს? (რომ. 14:5).
15 ჯამრთელობა. თითოულ ქრისტიანქ პირადო ოკო გინოჭყვიდას, მუჭო მიკაჯინე მუშ ჯამრთელობას (გალ. 6:5). მკურნალობაშ მეთოდეფიშ გიშაგორუაშ დროს ქრისტიანეფქ ოკო გეფთვალისწინათ ბიბლიურ კანონ — დუდ აურიდათ ზისხირს დო სპირიტიზმის (საქ. 15:20; გალ. 5:19, 20). მარა თე საკითხწკუმა დაკავშირებით შხვა მუდგარენეფ პირად გინაჭყვიდირალ რე. მაგალთო, ნამთინეს უსხუნ ომკურნალებერო ხვალე ექიმეფშა მერთას, მარა ნამთინე მკურნალობაშ ალტერნატიულ მეთოდის გიშეგორუნს. შილებე დარწმუნებულ ვორეთ, ნამდა მკურნალობაშ კონკრეტულ მეთოდ ჯგირ ვარდა გლახა რე, მარა ჩქი პატი ოკო ქოფცათ თითოულ და დო ჯიმაშ უფლებას — მიღან პირად გადაწყვეტილებეფ. თაშ ნამდა, თე საკითხწკუმა დაკავშირებით ჯგირ იჸუაფ, ფშუდან ოთხ მუდგარენ. პირველ: ხვალე ღორონთიშ სამეფო დუმოსქილიდუანა საბოლათ ირნერ ლახალაშე (ეს. 33:24). მაჟია: თითოულ ქრისტიანქ პირადო ოკო დერწმუნას, მუ რე მუშო არძაშ უჯგუშ (წეკითხით რომაელეფიშ 14:5). მასმა: ჩქი ოკო ვა გუვასამართლათ შხვეფ მუნეფიშ მეღებულ გადაწყვეტილებეფიშ გურშენ დო ვართ ოკო დუვაბრკოლათ მითინ (რომ. 14:13). მანთხა: ქრისტიანეფ ჸოროფას გიმიფრჩქინანთ დო მარჩქილენა, ნამდა კრებაშ ართობა უმოს მნიშვნელოვან რე, ვინემ პირად არჩევანიშ თავისუფლება (რომ. 14:15, 19, 20). თე ოთხ მხარე ირიათო გონებას ქუმაღვენუნან-და, ვა ვოდინუანთ ხოლოშიან ურთიერთობას და დო ჯიმალეფწკუმა დო კრებას მშვიდობას შევუნწყუნთ ხეს.
გონიერეფ ქუვორეთ-და, პატის ქოფცენთ შხვეფიშ დამოკიდებულებეფს (ქოძირით აბზაც 16)
16. მუჭო შეულებ უხუცესის გეგმირჩქინას გონიერება შხვა უხუცესეფწკუმა თანამშრომლობაშ დროს? (ქოძირით სურათ).
16 უხუცესეფ გონიერებაშ გიმორჩქინაშ ჯგირ მაგალითის ოკო ირზენდან (1 ტიმ. 3:2, 3). მაგალთო, უხუცეს ოკო ველდას, ნამდა მუშ აზრის ხვალე თიშენ გეთვალისწინენა, ნამდა შხვა უხუცესეფშე ასაკით უმოს რე. თის ოკო არჩქილედას, ნამდა იეჰოვაშ წმინდა შურს შეულებ უხუცესეფიშ საბჭოშე ნებისმიერ ჯიმას ქარაგადაფუას თიცალ მუდგარენ, მუთ ბრძნულ გადაწყვეტილებაშ მეღებას შეუნწყუნს ხეს. დობოლოს, მუჟამსით უხუცესეფიშ საბჭოშე უმენტაშ თიცალ გადაწყვეტილებას უკინენს ხუჯის, ნამუთ ბიბლიურ პრინციპეფს ვაწინააღმდეგ, გონიერ უხუცეს განსხვავებულ აზრიშ უმკუჯინუო, ხუჯის ქუდუკინენს თე გადაწყვეტილებას.
ᲒᲝᲜᲘᲔᲠᲔᲑᲐᲨ ᲒᲘᲛᲝᲠᲩᲥᲘᲜᲐᲡ ᲯᲒᲘᲠᲝᲑᲣᲐ ᲛᲝᲸᲣᲜᲡ
17. მუ კურთხევეფ მოუღ გონიერებაშ გიმორჩქინას?
17 გონიერებაშ გიმორჩქინას ჩქინდა ქიანაშ კურთხევა მოუღ. მაგალთო, უჯგუშ ურთიერთობა მიღნა და დო ჯიმალეფწკუმა დო კრებას ხოლო მშვიდობა რე. თეს გეძინელ, მოსიამოვნუნა შხვადოშხვა კულტურაშ დო ხასიათიშ თანაქრისტიანეფწკუმა ურთიერთობა, მიდგაწკუმა ართო იეჰოვას გაერთიანებულო ფცენთ თაყვანს. დო მუთ არძაშ უმოს მთავარ რე, ჩქინდა კმაყოფილება მოუღ თიშ რჩქინას, ნამდა მეპჸუნთ ჩქინ გონიერ ღორონთიშ, იეჰოვაშ, მაგალითის.
ᲝᲑᲘᲠᲔᲨᲘ 90 ართიანს ელუდირთათ
a იეჰოვა დო იესო გიმირჩქინანა გონიერებას დო ოკონა, ჩქი ხოლო გუვავითარათ თე თვისება. გონიერეფ ქიპჸუაფუთ-და, შემალებენა ქუდუხუჯუათ ჩქინ ცხოვრებას მოხვალამირ ცვლილებეფს, მაგალთო მუნერით რე, ჯამრთელობაშ ვარდა ფინანსურ მდგომარეობაშ თირუა. თეს გეძინელ, თე თვისება მიმეხვარებნა, ჩქინ მᲮარეშე ხე შეუნწყუათ მშვიდობას დო ართობას კრებას.
b ქოძირით სტატია „მუ მიმეხვარებ ქიმვარჩქვანე ცვლილებეფს“, „გეგშაკურცხით“ No. 4, 2016 წ. [ქორთ.].
c ვიდეოშ ოძირაფალო ვებგვერდ jw.org-ის ოგორალ ველს ქინაჭარით: „ინტერვიუ ჯიმა დიმიტრი მიხაელოვწკუმა“.
d თე საკითხწკუმა დაკავშირებით უმოს ინფორმაციაშ მიოღებელო ქოძირით 52-ა დუდ წიგნშე „მარადიულო გეხარით ცხოვრებათ!“.