ᲝᲒᲣᲠᲐᲤᲐᲚ ᲡᲢᲐᲢᲘᲐ 31
„მტკიცას რდათ, მანგარო ქიგედირთით“
„ჩქიმ საჸოროფო ჯიმალეფ, მტკიცას რდათ, მანგარო ქიგედირთით“ (1 ᲙᲝᲠ. 15:58).
ᲝᲑᲘᲠᲔᲨᲘ 122 გიღდან ძალიერ რწმენა!
ᲨᲘᲜᲐᲐᲠᲡ a
1, 2. მუ გაგებათ შილებე ქრისტიან მოგენდას მაღალ შენობას? (1 კორ. 15:58).
ᲘᲐᲞᲝᲜᲘᲐᲨ დედაქალაქ ტოკიოს, 1970-იან წანეფიშ ბოლოს, 60-სართულიან შენობა აშენეს. თე ქალაქის მიწისძვრეფ ხშირას ხვადუდ, ათეშენ ხალხის აფიქრუაფუდ, ქუგურზუდ დო ვარ თე შენობა მიწისძვრეფს. მუჭო აშენეს თინა? ინჟინერეფქ თეშ მანწყის, ნამდა თე შენობაქ მიწისძვრაშ დროს მყარას ქიგედირთკო დო, თეწკუმა ართო, ქუდაჸუნკო სეისმურ ბიძგეფს. შილებე ირაგადუას, ნამდა ქრისტიანეფ ხოლო თე მაღალ შენობას მოგენა. მორთ ქიგებგათ, მუშენ იფჩიებუთ თეს.
2 საჭირო რე, ქრისტიან ქოთ მტკიცას გერდას დო ქოთ დუხუჯუას სიტუაციას. მაგალთო, მუჟამსით საქმე ოხუ ღორონთიშ კანონეფიშ დო მითითებეფიშ მეჸუნას, თიქ სიმტკიცე ოკო გიმირჩქინას (წეკითხით 1 კორინთელეფიშ 15:58). მართალ რე, ქრისტიან ირიათო მზათ რე, რდას მორჩილ დო ვედას კომპრომისშა, მარა თეწკუმა ართო, საჭირო რე, გეგმირჩქინას გონიერება დო ქუმუხუჯუას სიტუაციას, მუჟამსით თენა აუცილებერ რე (იაკ. 3:17). ქრისტიან, ნამდგას თეცალ გაწონასწორებულ დამოკიდებულება აფჷ გავითარებულ, ვართ ზედმეტო მკაცრ იჸუაფ დო ვართ ირფელიშ დათმობაშა ურს. თე სტატიას ქობძირუნთ, მუჭო შემლებნა გიმიფრჩქინათ სიმტკიცე. თეს გეძინელ, გუვარჩიენთ, ნამ ხუთ საშვალებას ირინუანს სატანა, ნამდა მიმოდინაფუან სიმტკიცე დო ქიგებგენთ, მუჭო შემლებნა ქივეწინააღმდეგათ თის.
ᲛᲣᲭᲝ ᲠᲔ ᲨᲔᲘᲝᲚᲔᲑᲔᲠ, ᲕᲝᲠᲓᲐᲗ ᲛᲢᲙᲘᲪᲐᲡ?
3. მუჭოთ საქმეეფიშ 15:28, 29-შე ბგებულენთ, მუ კანონეფ მეჩჷ იეჰოვაქ ქრისტიანეფს?
3 არძაშ უმოს დიდებულ კანონმდებელ, იეჰოვა, ირიათო თიცალ კანონეფს ირზენს, ნამუთ მუშ ხალხშო ადვილ გაგებელ რე (ეს. 33:22). მაგალთო, თიქ პირველ საუკუნეშ ხემძღვანელ საბჭოშ საშვალებათ გიმაარგამ, ნამ სუმ საკითხის ოკო დეცვესკო ქრისტიანეფქ სიმტკიცე: 1) თინეფქ ოჭიშ ოკო ურთინუესკო კერპთაყვანიშმცემლობას დო ხვალე იეჰოვას ცესკო თაყვან, 2) ოკო დემორჩილესკო იეჰოვაშ კანონს ზისხირიშ სიწმინდეწკუმა დაკავშირებით დო 3) ოკო მიაჸუნესკო ღორონთიშ დოდგინელ მაღალზნეობრივ ნორმეფს (წეკითხით საქმეეფიშ 15:28, 29). მუჭო შეულებნა ამდღარ დროს მახორუ ქრისტიანეფს, დეცვან სიმტკიცე თე სუმ საკითხის?
4. მუჭო ვოძირანთ, ნამდა ხვალე იეჰოვას ფცენთ თაყვანს? (გამოცხ. 4:11).
4 ოჭიშის ვურთინუათ კერპთაყვანიშმცემლობას დო ხვალე იეჰოვას ფცენთ თაყვანს. ღორონთიქ უზოჯ ისრაელეფს, ნამდა ხვალე თის ცესკო თაყვან (კან. 5:6—10). მუჟამსით სატანაშე ცდუნებას შეხვად, იესოქ ხოლო არგამათ ოძირუ, ნამდა ჩქი ხვალე იეჰოვას ოკო ფცათ თაყვან (მათ. 4:8—10). ზუსტას თე ირფელიშ გურშენ ვა ფცენთ თაყვანს კერპეფს დო ვართ ადამიანეფს გინიფრთინუანთ ღორონთეფო, იჸუაფნა თენეფ რელიგიურ ლიდერეფ, პოლიტიკურ მართველეფ დოვარ შხვა ცნობილ კათა, მიდგას ქვეყნიერებას აღორონთენა. ჩქი მტკიცას გივორეთ იეჰოვაშ მხარეს დო ხვალე თის ფცენთ თაყვანს, მუჭოთ ირფელიშ გუმაჭყაფალ ღორონთის (წეკითხით გამოცხადებაშ 4:11).
5. მუშენ მეპჸუნთ სიცოცხლეშ დო ზისხირიშ სიწმინდეწკუმა დაკავშირებულ იეჰოვაშ კანონს?
5 მეპჸუნთ იეჰოვაშ კანონს სიცოცხლეშ დო ზისხირიშ სიწმინდეწკუმა დაკავშირებით. მუშენ ვორთუთ თეს? მუშენდა, იეჰოვაქ თქუ, ნამდა ზისხირით წარმოდგენილ რე სიცოცხლე, ნამუთ თიშე მეღებულ ძვირფას ძღვინ რე (ლევ. 17:14). მუჟამსით იეჰოვაქ პირველო მეჩჷ უფლება ადამიანეფს, ოჭკუმესკო ცხოველიშ ხორც, თინა ხოლო უზოჯ, ნამდა ვა ჭკუმესკო თიშ ზისხირ (დაბ. 9:4). მუჟამსით ისრაელეფს მოსეშ კანონ მეჩჷ, თე მითითებას ხოლო ართშა გუსვჷ ხაზ (ლევ. 17:10). თეს გეძინელ, პირველ საუკუნეშ ხემძღვანელ საბჭოშ საშვალებათ თიქ არძა ქრისტიანს მეჩჷ მითითება, დუდ ეუჩილითესკო ზისხირს (საქ. 15:28, 29). ჩქი ხოლო მტკიცას მეპჸუნთ თე მითითებას, მუჟამსით მკურნალობაწკუმა დაკავშირებულ გადაწყვეტილებეფ მაფნა მიოღებელ. b
6. მუ ოკო ვაკეთათ, ნამდა მივაჸუნათ იეჰოვაშ მაღალზნეობრივ ნორმეფს?
6 მეპჸუნთ იეჰოვაშ მაღალზნეობრივ ნორმეფს (ებრ. 13:4). პავლე მოციქულქ სიმბოლურ ნინა გიმირინუ დო მუჩეს რჩევა, ნამდა „ქინვოჸვილათ“ ჩქინ გურს ხორციელ სურვილეფ. შხვა სიტყვეფით ქოფთქუათინ, მუთ შემლებნა ირფელ ოკო გუვაკეთათ, ნამდა ვევაჸუნათ არასწორ სურვილეფს. ჩქი დუდის ურიდანთ თი ირფელიშ ჯინას დო კეთებას, მუდგაქ შილებე უზნეობაშა ქიმემჸონან (კოლ. 3:5; იობ. 31:1). მუჟამსით ცდუნებაშ წოხოლე გივორეთ, ხეთეშე იფთხინუანთ უწმინდურ აზრეფს დო ვა ვორთუთ თიცალ მუდგარენს, მუთ იეჰოვაწკუმა ჩქინ მეგობრობას ეცილებ.
7. მუშ კეთება ოკო მაფდან გინოჭყვიდილ დო მუშენ?
7 იეჰოვა ღორონთ ჩქინდე ელჷ, ნამდა „მთელ გურით“ დევემორჩილებუთ თის (რომ. 6:17). ხემძღვანელობა, ნამდგას თიშე ბღებულენთ კინ ჩქინ საჯგირობუოთ რე დო თიშ მოჩამილ ნამთინ კანონშა კილ ვეგორე (ეს. 48:17, 18; 1 კორ. 6:9, 10). ჩქი ირნერო ვოცადუთ, იეჰოვას გურ გუხარათ დო მიღდან თიცალ განწყობა, მუნერით ფსალმუნმაბირეს უღუდ, მიდგაქ თეცალ სიტყვეფ თქუ: „მტკიცას გინობჭყვიდ, მთელ ცხოვრება სქან წესეფიშ მორჩილ ვორდენ, ღურა დღაშახ“ (ფსალმ. 119:112). მარა სატანა მუშ მხარეშე ირფელს გაკეთენს, ნამდა სიმტკიცე მიმოდინაფუან. მუ მეთოდეფს ირინუანს თეშო?
ᲛᲣ ᲡᲐᲨᲕᲐᲚᲔᲑᲔᲤᲘᲗ ᲝᲪᲐᲓ ᲡᲐᲢᲐᲜᲐ, ᲛᲘᲛᲝᲓᲘᲜᲐᲤᲣᲐᲜ ᲡᲘᲛᲢᲙᲘᲪᲔ?
8. მუჭო ირინუანს სატანა თხოზინს, ნამდა მიმოდინაფუან სიმტკიცე?
8 თხოზინ. სატანა ოცად, ფიზიკურო დო ემოციურო თეშ გობტახან, ნამდა მივოდინუათ სიმტკიცე. თიშ მიზან რე, „გეგნობრყინტან“, შხვა სიტყვეფით ქოფთქუათინ, იეჰოვაწკუმა ურთიერთობა გილამლუან (1 პეტ. 5:8). პირველ საუკუნეშ ქრისტიანეფს ხოლო სიმტკიცეს ვა თმენდესინ თიშენ ორცქინანდეს, ლახუნდეს დო ქოთ ჸვილუნდეს (საქ. 5:27, 28, 40; 7:54—60). სატანა ამდღა ხოლო თხოზ ჭეშმარიტ ქრისტიანეფს. მაგალთო, ვორწყეთ, ნამდა რუსეთის დო შხვა ნამთინე ქიანას ჩქინ თანაქრისტიანეფს რწმენაშ გურშენ სასტიკო თხოზუნა დო შხვადოშხვანერ წინააღმდეგობას ხოლო ხვადუნა.
9. ქიმიჸუნით მაგალით, მუჭო ირინუანს სატანა მახეეფს ჩქინ მიოჩილითაფარო.
9 მახეეფ. არგამა თავდასხმეფწკუმა ართო, სატანა შხვადოშხვანერ ხრიკეფს ხოლო ირინუანს ჩქინ მიოჩილითაფარო (ეფეს. 6:11). გუვარჩუათ ართ ჯიმაშ, ბობიშ, შემთხვევა, ნამდგას სერიოზულ ოპერაციაქ დესაჭირ დო ათეშენ, საავადმყოფოშა იჸონეს. თიქ ექიმეფს უწუ, ნამდა მუდგაქ ვა მოხვადკონ ზისხირ ვეგნუბესკო. ქირურგიქ გეთვალისწინ ბობიშ პოზიცია დო პატი ქოც თიშ გადაწყვეტილებას. მარა ოპერაციაშ წოხოლენ სერს, მუჟამსით ბობიშ ოჯახიშ წევრეფქ ჸუდეშა მიდართეს, ანესთეზიოლოგიქ თის პალატაშა გემნაკითხუ დო უწუ, ნამდა მართალ რე, საეგებიოთ ზისხირიშ გინობუნა ვედესაჭირებუდ, მარა სიტუაცია მითხინდჷ-და, ხეშ ხოლოს აღვენუდეს. შილებე თე ანესთეზიოლოგ ფიქრენდჷ, ნამდა რახანს ბობიშ ოჯახიშ წევრეფ უკვე ულირეფ რდეს, ბობ დოთირანდჷ გადაწყვეტილებას. მუჭო მიქცუ თიქ? მტკიცას ქიგედირთჷ დო გინოჭყვიდილ აფუდ, მუდგაქ ვა მოხვადკო ვა დათმუკო მუშ პოზიცია დო ვეგნიბუკო ზისხირ.
10. მუშენ რე ოშქურანჯ ადამიანურ შეხედულება? (1 კორ. 3:19, 20).
10 ადამიანურ შეხედულება. საკითხეფს ადამიანიშ თოლით ჯინა ქუდუჭყით-და, შილებე მუთუნო ვემიფრჩქინათ იეჰოვაშ დოდგინელ კანონეფ დო ოჭიშ ქურთინუათ ჩქინ ძვირფას ღორონთის (წეკითხით 1 კორინთელეფიშ 3:19, 20). „ქვეყნიერებაშ სიბრძნე“ ხშირ შემთხვევას მანგარო მოქმედენს ადამიანშა დო ხორციელ სურვილეფს ურჩქინანს. მაგალთო, ჯვეშ დროს, პერგამონს დო თიატირას მახორუ ნამთინე ქრისტიანიშ აზროვნებაშა მანგარო იმოქმედ თე ქალაქეფს მახორუ კათაქ, მით კერპეფს ცენდეს თაყვანს დო უზნეო ცხოვრებას მეჸუნდეს. იესოქ ქოთ პერგამონიშ დო ქოთ თიატირაშ კრებას მკაცრ რჩევა ქიმეჩ თიშ გურშენ, ნამდა პრობლემათ ვემირჩქინანდეს უზნეობას (გამოცხ. 2:14, 20). ჩქინ შემთხვევას ხოლო ადამიანეფ ირნერო ოცადნა, მუდგარენ საკითხეფწკუმა დაკავშირებით თიცალ აზრ მიღდან, მუნერით მუნეფს უღნა. ოჯახიშ წევრეფქ დო ნაჩინებუეფქ შილებე მიწუან, ნამდა მუდგარენეფს ნაბეტან მკაცრაშე ვუჯინეთ დო აღბძრან, გინურთათ იეჰოვაშ კანონეფს. მაგალთო, შილებე ირნერო ეცადან, დუმოჯერუან, ნამდა ზნეობაწკუმა დაკავშირებით ბიბლიურ ნორმეფ მოჯვეშებულ რე დო შუროთ ვა რე მნიშვნელოვან ზნეობრივ სიწმინდეშ დაცვება.
11. მუს ოკო ევუჩილითუათ დუდ, ნამდა ვა ვოდინუათ სიმტკიცე?
11 მინშა შილებე იფიფქრათ, ნამდა იეჰოვაშე მეღებულ მითითებეფ იშენდოიშენ არგამათ გაგებელ ვა რე დო შილებე თიშ ცდუნებაშ წოხოლე ხოლო ქიგებდირთათ, ნამდა „გინურთათ ჭარილს“ (1 კორ. 4:6). ზუსტას თექ აღოლეს იესოშ დროს მახორუ რელიგიურ წინამძღოლეფს. თინეფქ იეჰოვაშე მეღებულ კანონს მუნეფიშ მოგონილ წესეფ ქიგუძინეს, მუდგაშ დაცვებაქ მანგარ ძნელქ იჸუ უბრალო ხალხშო (მათ. 23:4). ჩქი მუთუნნერ მიზეზ ვა მიღნა, იეჰოვაშე მეღებულ მითითებეფს მუდგარენეფ ქიგუძინათ, მუშენდა თინა მუშ სიტყვაშ დო ორგანიზაციაშ საშვალებათ არგამა ხემძღვანელობას მარზენა (იგავ. 3:5—7). ათეშენ, ჩქი ოკო ვეგნურთათ ბიბლიას ჭარილს დო ვართ მუდგარენ წესეფ ოკო დუდგინათ თანაქრისტიანეფს, მუჟამსით საქმე პირად საკითხეფს ოხუ.
12. მუჭო ირინუანს სატანა „უსარგებლო აზრეფს“?
12 ტყურეფ. სატანა „უსარგებლო აზრეფს“ დო „ქვეყნიერებაშ შეხედულებეფს“ ირინუანს, ნამდა დაღორას დო გორთას ხალხ (კოლ. 2:8). პირველ საუკუნეს სატანა თეშ მიონჭირნაფალო ირინუანდჷ ფილოსოფიას, ნამუთ ადამიანურ შეხედულებეფშა რდჷ გერსხილ. თეს გეძინელ, იუდაურ გურაფეფს, ნამუთ წმინდა წერილეფშა ვა რდჷ გერსხილ დო გურაფას თიწკუმა დაკავშირებით, ნამდა ქრისტიანქ ოკო მიაჸუნკო მოსეშ კანონს. თეცალ ტყურეფით სატანა ხალხის მიკმაჸათანდჷ იეჰოვაშე, მიდგაშეთ მოურს ჭეშმარიტ სიბრძნე. ამდღა სატანა პოლიტიკურ ლიდერეფიშ საშვალებათ, სოციალურ ქსელეფს დო მედია საშვალებეფს ავრცელენს ტყურა ინფორმაციას დო „შეთქმულებაშ თეორიეფს“. თენა ბრელშა ბძირით ᲙᲝᲕᲘᲓ-19 პანდემიაშ დროს. c ნამთინექ დეჯერ თე ტყურა ინფორმაციეფ, მუდგაშ გურშენ ოწუხებელქ ქუმაძინეს. მარა იეჰოვაშ მოწმეეფ, მით მეჸუნდეს ღორონთიშ ორგანიზაციაშე მეღებულ ხემძღვანელობას, თე ხალხიშ გინაწონს, დუდის მშვიდას გინაფლენდეს (მათ. 24:45).
13. მუშენ ოკო ვორდათ ფრთხილას, ნამდა ვა მოფჩირთათ მნიშვნელოვანს?
13 მოცილე მუდგარენეფ. მუჭოთ ღორონთიშ სიტყვაშე ბგებულენთ, ყურადღება ოკო გინიბღათ თიშა, მუთ უმოს მნიშვნელოვან რე (ფილ. 1:9, 10). მოცილე მუდგარენეფს შეულებ ჩქინ დრო დო ენერგია მიდეღას დო გემკმოჸოთან თი ირფელშე, მუთ უმოს ჯგირობუაშ მიმაღალარ რე. მაგალთო, ირდღაშიან საქმეეფქ, მუნერით რე: შუმა-ჭკუმუა, გართობა დო სამუშა, შილებე მოცილეთ გინირთას, მუჟამსით მთელ ყურადღებას თინეფშა გეგნიბღანთ დო ჩქინ ცხოვრებას პირველ ადგილს ქიგვორინუანთ (ლუკ. 21:34, 35). თეს გეძინელ, ირდღას ახალ ამბეეფს ზღვა ინფორმაციას ბგებულენთ სოციალურ პრობლემეფიშ დო პოლიტიკურ დაპირისპირებეფიშ გურშენ. ჩქი ოკო დებრწმუნათ, ნამდა მთელ ყურადღება თე ირფელშა ვა მაფნა გინოღალირ. თაშ ვემიფქციებუთ-და, შილებე ართ დროს ნამდგაინიშ მხარე ქიდებკინათ. ჩქი გინოჭყვიდილ მაფნა, ვაკეთათ თინა, მუთ სწორ რე, მარა სატანა, თე მეთოდეფიშ გიმორნაფათ, ირნერო ოცად, მეცილან თეშ კეთებას. მორთ გუვარჩუათ, მუჭო შემლებნა ქივეწინააღმდეგათ სატანას დო ქუდოფსქიდათ მტკიცას.
ᲛᲣ ᲛᲘᲛᲔᲮᲕᲐᲠᲔᲑᲜᲐ ᲕᲐ ᲕᲝᲓᲘᲜᲣᲐᲗ ᲡᲘᲛᲢᲙᲘᲪᲔ?
სიმტკიცე ვა ვოდინუათინ საჭირო რე: დეფიფქრათ ჩქინ მეძღვინუა დო ნათუაშე, გეგმიბრკუათ ღორონთიშ სიტყვა დო ქიფიფქრათ თიშე, გუვავითარათ მტკიცე გურ დო მივენდათ იეჰოვას (ქოძირით აბზაცეფ 14—18)
14. მუ მიმეხვარებნა, ბოლოშა ქიგებდირთათ იეჰოვაშ მხარეს?
14 დეფიქრით თქვან მეძღვინუა დო ნათუაშე. თქვა თე ნაბიჯეფ თიშენ გინოდგით, ნამდა გოკოდეს, იეჰოვაშ მხარეს ქიგედირთითკო. ქიგიშინით, მუქ მიგეხვარეს, დერწმუნითკო, ნამდა ქიმიოგორეთ ჭეშმარიტებას. თქვა გეჩინებაფეთ იეჰოვა, გავითარით პატიცემა თიშ მიმართ დო ქიჸოროფეთ, მუჭოთ ზეციერ მუმა. თეს გეძინელ, გევითარით რწმენა, მუდგაქ აღძრეს მინანითკო ულირს კეთებულ გლახა საქმეეფ. მიოტეთ თი ირფელიშ კეთება, მუთ იეჰოვას ჯოგჷ დო ქიდიჭყით ღორონთიშ მოსაწონო ცხოვრება. თეშ უკულ, გურშა ეიქექუეს თიშ გაგებაქ, ნამდა ღორონთიქ გაპატუეს (ფსალმ. 32:1, 2). თეს გეძინელ, ოსწრუდით ქრისტიანულ შეხვალამეფს დო ქიდიჭყით შხვეფშა თი ირფელიშ გინოჩამა, მუთ თქვა დიგურეთ. ასე, მუჭოთ ღორონთშა მეძღვინელ დო ნათილ ქრისტიან, გეჸუნთ სიცოცხლეშ შარას დო გინოჭყვიდილ გაფნა, მუდგაქ ვა მოხვადასინ, ვეგნურთათ თის (მათ. 7:13, 14).
15. მუშენ რე ჯგირობუაშ მუმაღალარ ღორონთიშ სიტყვაშ გიმორკვიება დო თიშე ფიქრ?
15 გეგმირკვით ღორონთიშ სიტყვა დო იფიქრით თიშე. მუჟამსით ჯას ჩხვიჩხვეფ ტომბაშო აფჷ დიხას გოდგუმილ, მანგარო გერე დო ვეკირთუ. თეშნერო, იეჰოვაშ მიმართ ძალიერ რწმენა ქუმაღვენუნან-და, შემალებენა ვა ვოდინუათ სიმტკიცე. მუჟამსით ჯა ირდუ, თიშ ჩხვიჩხვეფ დიხაშა უმოს ტომბაშო ენურს დო უმოსო იფაჩუ. თეშნერო, მუჟამსით გეგმიბრკვიენთ ღორონთიშ სიტყვას დო იფიფქრენთ თიშე, რწმენა გემემანგარებნა დო უმოსო იპჸით დარწმუნებულ, ნამდა ღორონთიშ შარა არძაშ უჯგუშ რე დო მუთუნ ვა რე თიშმადარა (კოლ. 2:6, 7). დეფიქრით, მუჭო მეხვარ ჯვეშ დროს მახორუ ღორონთიშ მსახურეფს თიქ, ნამდა იეჰოვა ხემძღვანელენდჷ დო თხილანდჷ თინეფს. მაგალთო, დეფიქრით ეზეკიელიშ შემთხვევაშე. თიქ ხილუას ძირჷ ანგელოზ, მით კილ-კილშა ზიმუნდჷ ტაძარს დო ყურადღებათ დეკვირ თი ირფელს, მუდგას ანგელოზ ორთუდ. თე ხილუაქ ეზეკიელიშ რწმენა გამანგარ დო ჩქი ხოლო მოხვარნა თიშ გაგებას, მუჭო დეფცვათ წმინდა თაყვანიშმცემლობაშო დოდგინელ ღორონთიშ ნორმეფ d (ეზეკ. 40:1—4; 43:10—12). ჩქი ხოლო რწმენა გემემანგარებნა, მუჟამსით დროს გეგმურთუნთ ღორონთიშ სიტყვაშ სიტომბეეფიშ გიმორკვიებას დო თიშე დაფიქრებას.
16. მუჭო მეხვარ ბობის მტკიცე გურქ? (ფსალმ. 112:7).
16 გავითარით მტკიცე გურ. მეფე დავითიქ იეჰოვაშ მიმართ მუშ დიდ ჸოროფა თეცალ სიტყვეფით ეჭარ: „მტკიცე რე ჩქიმ გურ, ღორონთ“ (ფსალმ. 57:7). იეჰოვაშა ბოლოშა მენდებათ, დავითცალო, ჩქი ხოლო შემლებნა მიღდან მტკიცე გურ (წეკითხით ფსალმუნეფიშ 112:7). გუვარჩუათ, მუჭო მეხვარ თექ ბობის, ნამუთ ჟიშე მიფშინეთ. მუჟამსით თის ექიმქ უწუ, ნამდა სიტუაცია ქიმითხინდჷ-და, ზისხირ ხეშ ხოლოს აღვენუდეს, ბობიქ ხეთეშე უპასუხ, ნამდა ზისხირიშ გინობუნა ქულამდეს-და, თიმწუთის ქიდიტენდჷ საავადმყოფოს. უმოს გვიანო, თიქ თეცალ სიტყვეფ თქუ: „ართ წუთით ხოლო ვემშამღალ ეჭვ ჩქიმ გადაწყვეტილებაშა დო ვა გაბნერვიანებექ“.
ძალიერ რწმენას გუვავითარენთ-და, ნებისმიერ განსაცდელიშ უმკუჯინუო, შემალებენა ვა ვოდინუათ სიმტკიცე (ქოძირით აბზაც 17)
17. მუშ გურაფა შემლებნა ბობიშ შემთხვევაშე? (ქოძირით სურათ).
17 ბობის გადაწყვეტილება თეიშახ აფუდ მეღებულ, ონდო საავადმყოფოს ქუმოხვადუდ, მუდგაშ ჭყოლოფათ შეიალებუ, ვადინუკო სიმტკიცე. თის გადაწყვეტილებაშ მეღებას სუმ მუდგარენქ მეხვარ. პირველ: მთელ გურით ოკოდ, გურ გუხარკო იეჰოვას. მაჟია: გურგედვალირო ირკვიენდჷ ბიბლიას დო თიშა გერსხილ პუბლიკაციეფს, სოდეთ გარჩიებულ რდჷ სიცოცხლეშ დო ზისხირიშ სიწმინდე. დო მასმა: დარწმუნებულ რდჷ, ნამდა იეჰოვაშ მითითებეფიშ მეჸუნა მარადიულ ჯგირობუას მოუღანდჷ. თაშ ნამდა, ბობცალო, ჩქი ხოლო შემლებნა ნებისმიერ განსაცდელიშ უმკუჯინუო, ვა ვოდინუათ სიმტკიცე.
ბარაკ დო თიშ ჯარიშკოჩეფ გაბედულო გიანთხუნა სისერაშ ჯარს (ქოძირით აბზაც 18)
18. მუჭო მოხვარნა ბარაკიშ შემთხვევა, ქიმვენდათ იეჰოვას? (ქოძირით სურათ გალენ გვერდის).
18 მიენდით იეჰოვას. ქიგიფშინათ, მუ ჯგირობუა მოუღ ბარაკის იეჰოვაშა მენდებაქ დო თიშ ხემძღვანელობაშ მეჸუნაქ. თიშ უმკუჯინუო, ნამდა ისრაელეფ ბრძოლაშო მომზადებულ ვა რდეს დო ვართ ობრძოლებერ იარაღეფ უღდეს, იეჰოვაქ მითითება მეჩჷ ბარაკის, ნამდა გეგშართკო ქანაანელეფიშ მეთაურიშ, სისერაშ, წინააღმდეგ, მით დიდ ჯარით, 900 ეტლით დო ქიანაშ იარაღით რდჷ გიშულირ (მსაჯ. 5:8). წინასწარმეტყველ დებორაქ ბარაკის უწუ, ნამდა გეგმორთკო თაბორიშ გვალაშე დო კიშონიშ ხევწკუმა ქებრძოლკო სისერას. მართალ რე, ბარაკის უჩქუდ, ნამდა ტრიალ მინდორს სისერაშ ეტლეფს უმოს უპირატესობა აღვენუდ, მარა იშენით დემორჩილ იეჰოვას. ისრაელიშ ჯარ გვალაშე გიმიშუნ თეშ, იეჰოვაშ ძალათ გიმანტირე ჭვემაქ ქიგიაშქვჷ, მუდგაშ შედეგო სისერაშ ეტლეფქ ლეტას ქენინწყჷ დო თეშ ჭყოლოფათ, იეჰოვაქ ბარაკის დიდებულ გამარჯვება ქუმუღ (მსაჯ. 4:1—7, 10, 13—16). თეშნერო, მუჟამსით იეჰოვას დო თიშ ორგანიზაციაშე მეღებულ ხემძღვანელობას მივენდებუთ, ღორონთ ჩქი ხოლო დიდებულ გამარჯვებას ქუმომღანა (კან. 31:6).
ᲒᲘᲜᲝᲭᲧᲕᲘᲓᲘᲚ ᲒᲐᲤᲓᲐᲜ, ᲕᲐᲓᲘᲜᲣᲐᲗ ᲡᲘᲛᲢᲙᲘᲪᲔ
19. მუშენ გოკონა, ვადინუათ სიმტკიცე?
19 ონდო თე სისტემა არსებენს, ირიათო მაჸინა ობრძოლებერ, ნამდა ვა ვოდინუათ სიმტკიცე (1 ტიმ. 6:11, 12; 2 პეტ. 3:17). გინოჭყვიდილ მაფდან, ჩქინ სიმტკიცეშა ვემოქმედას თხოზინქ, მახეეფქ, ადამიანურ შეხედულებეფქ, ტყურეფქ დო მოცილე მუდგარენეფქ (ეფეს. 4:14). თეშ მანგიორო, ირნერო ვეცადათ, ქიგებდირთათ მტკიცას, ვა ვოდინუათ იეჰოვაშ მიმართ ართგურობა დო მივაჸუნათ თიშ მითითებეფს. ხვალე თენა ვარინ, ჩქი გონიერებაშ გიმორჩქინა ხოლო მოსაჭირნა. უკულიან სტატიას გუვარჩიენთ, მუჭო მარზენა იეჰოვა დო იესო თე თვისებაშ გიმორჩქინაშ სრულყოფილ მაგალითის.
ᲝᲑᲘᲠᲔᲨᲘ 129 ბოლოშა მიფთვინენთ
a ადამ დო ევაშ დროშე მოჸუნაფილ სატანა ოცად, ხალხ ქუდაჯერუას, ნამდა მუნეფიშით შეულებნა გინოჭყვიდან, მუ რე სწორ დო არასწორ. თის ოკო, ჩქი ხოლო თეცალ დამოკიდებულება მიღდან იეჰოვაშ კანონეფიშ დო თი მითითებეფიშ მიმართ, ნამდგას ორგანიზაციაშე ბღებულენთ. თე სტატია მიმეხვარებნა, ქივეწინააღმდეგათ სატანაშ აზროვნებას, ნამუთ ქვეყნიერებას რე გავრცელებურ, დო უმოსო მაფდან გინოჭყვიდილ, ქიგებდირთათ მტკიცას იეჰოვაშ მხარეს.
b თე საკითხწკუმა დაკავშირებით მეტ ინფორმაციაშ მიოღებელო ქოძირით 39-ა დუდ წიგნშე, „მარადიულო გეხარით ცხოვრებათ!“.
c ვებგვერდ jw.org-ის ქოძირით სტატია „დუდ დითხილეთ ტყურა ინფორმაციაშე“ [ქორთ.].
d უმოს მეტ ინფორმაციაშ მიოღებელო, ქოძირით წიგნ „იეჰოვაშ თაყვანიშმცემლობა აღდგენილ რე“, დუდეფ 13, 14 [ქორთ.].